اخر ظرفاء ودمدني

[elfatih]

ودمدني كانت ايام جميلة

اخر ظرفاء ودمدني


= محمد ود حليوة =
ليه داير واشمعنى عاوز تعرس بت المصريين ؟
عشان لما تشرب البيبسي اشوفو نازل اسود في حلقها .
ياود حليوة استغفر الله الموت حق ابوك مات خلاص - لا مايموت هسي يصحى يديني الخمسة جنيه حقاتي ويموت تاني .
كان ود حليوة يلبس في يديه مجموعة من السعات اذا سالته الساعة كم ينظر الي يديه ويقول لك الساعة اربعين وخمسة وثلاثين طبعا بي لجنة خفيفة في لسانه .
= طارق هويا =
وانت في الموقف موقف مواصلات السوق الكبير وانت ملخوم بتفتش في المواصلات فجاة تسمع صوت يقول ليك هويا لاشعوري تلتفت ناحية الصوت ليرفع لك طارق يده مشيرا بتلك الاشارة العجيبة .
= بت الموقف =
وانت في الموقف مدنقر بتعاين في اكوام الطماطم عاوز تشتري في تلك اللحظة تأتي تلك البنت وتهمزك وانت من الهمزة تطيت فوق والناس كلها ترقب ذلك المنظر اها حتعمل شنو حتضرب البنت غايتو تاكلها وتمشي .
= الصاروخ ود احمد السني وللقريبين من ودمدني زيادة الصاروخ ود حبيب =
ياهو داك الصاروخ مارق من بيتهم مايشوفني الليلة بنشف ريقي وبديني واحدة قاتله كدي اللنندسا منو – اخونا مافي غير عمود حق تلفون مشى ادسا وراه جاء الصاروخ ماري بي عندو وشافو قال ليه الليلة مالك عامل زي الساعة اتناشر – عندما تتلاقى شوكات الدقائق مع الساعات لكن صاحبنا برضو ماجاته حاجة .
قالو الصاروخ كان في زيارة لي اخوانه اولاد ابوه في المزاد وبعدين داير يركب من موقف شندي فوق عشان يرجع السوق قالوا اتزنق دخل خور شندي فوق وقعد تحت في الخور لسوء حظه جاء صاحبه ابو لمبة سائق الكارو حقه شاف الصاروخ حاول الصاروخ يدسا منه ابو لمبة قال ليه شوفتك عامل كدا زي الموريس المقلوبة .
= استاذ النو =
في كثير من الاحيان كنا بالقرب من فندق النيل في الجانب الخلفي تقيف عربة العيفونة وهي عبارة عن تراكنور وهو يجر تريلة في مقدمة التريلة اوجد كنبة يجلس عليها اخوانا عمال العيفونة تقف الترلة بالقرب مننا وينزل منها عمنا استاذ النو الظاهر انهم بقابلوه في طريقه من العشير الي منزله في ودازرق وحبا فيه والفي راسه من علم وغيره ياخذونه معهم – اذا كان مزاجه رائق وقف وتونسى معنا واسمعنا اغنية من حسن عطية وكل مرو يتحسس الفتيل الفي جيبه فتيل المزاج وهو الفاضي من العصير المركز للفراولة كان مطبطب الشكل يسهل وضعه في الجيب يبداء في الغناء مع حركة تكريج للسنون وهو ينظر اليك من وين انت اهلك ناس منو احي انا .
اختفي عمنا النو وسمعنا ان الرئيس نميري قد امر بعلاجه في لبنان وسمعنا ان عملية تغيير لدمه قد تمت وشفناه بعد فترة اخر بدل وكدوس وجنتلمان خواجة عديل لكن بعد فترة عاد مرة اخري الي سيرته الاولي .
= شعشاع ود الهواوير =
وانا جالس في حلواني الجامع في السوق الصغير مع اصدقائي ميرغني البوب وهبار قبل ان يفتح مطعم الفول ياتيك من داخل الحلة الجديدة وهو في طريقه الي منزله في حي الهوارة العم شعشاع وبذلك الصوت الفخيم وترتيل للقران الكريم والواحد يقول سبحان الله الله يهدى من يشاء بتلك الحالة وتفوح منه تلك الرائحة وهو يرتل القران ترتيلا – وانت جالس في تلك الجلسة ياتيك عبدالحميد ود ناس العرضي اخو البعيو ويكون قد زوغ من الابحاث وعدا الحشرات من بدري وجاء الي السوق الجديد يوزع قفشاته وزكرياته مع كرة القدم .
= صافيات =
عندما كنا صغار كنا نقول لو صافيات ركبتنا في حقها دا ووصلتنا حتى الاساس من مقر تمركزها تحت شجرة المدرسة الاميرية كان عندها اكبر صلب شفتو في حياتي واظن تاني ماحاشوف زيه .
= المدييك =
في المنزل بعد منزل وداللمين الحريف والان منزل التاية بت البن كان يعيش المدييك في غرفة يقاسمه في الغرفة الثانية بنداس ركيب القهاوي الشهير وتلك الكسيكتات الشهيرة لبنداس – كان المدييك يشتهر ببيع العونكليب وقصب السكر والنبق وعلي الرغم من اننا كنا نشتري منه الا اننا كنا مغرمين بمعاكسته حتي يجري ورانا في شوارع القسم الاول ونحن نغني المدييك قلبوا طيب .


= استاذ الزين حسن مدني =
من ظرفاء حي ام سويقو اذا كان حظك سعيد كنت تقابله وانت تملك عربية وتو صله الي السوق سوف تراه هنالك امام كبري قباني سوف تاخذه الي وزارة التربية والتعليم وسوف تستمتع بهذه الدقائق في معية هذا الشخص الرقم والذي لايمكن تخطيه بسهولة التحية الي ابن اخته السباح الماهر في الزمن الجميل ومدرب السباحة بنادي اتحاد جدة فيصل كزمبع .
= عبيد ابو حنك ود ناس السناري =
جانا زيارة في بيتنا في المدينة عرب كان متزوج من المدينة عرب – طبعا بيوت مشروع الجزيرة والسرايات كانت محاطة بي نمليات من كل الجوانب جاء شافنا انا واخواني في البرندات دي قام طوالي قال لينا زي الجداد في القفص الحمد لله سلمنا منها – كانت حياته قصيرة توفي بعد محاولته عمل رجيم عن طريق اذابة الدهون بواسطة علاج مشبوه وقاتل .
= استاذ الحاج البشير =
استاذ الحاج البشير البرهاني من ظرفاء ودمدني منزلهم بالقرب من منزل ال شبك وهو من عائلة عامر الجاك وحسن ويوسف عامر اخواله .
عندما يكون جالسا مع اولاد الفريق وتنادي عليه اخته الحاج هو يعرف ان الفطور جاهز ويقول لي اولاد الفريق جاني تلفون عن اذنكم – سمع بي قطر والقروش مطر شد الرحال الي هنالك وبداء في البحث عن عمل انتهت مدة زيارته ولم يحظى بعمل قال الي اولاد مدني هنالك اولاد ابراهيم السناري بلا قطر قروش مطر دي كتاحة ساكت مافيها .
= احمد شبك =
ابن المدنيين وفردة ثنائي الجزيرة كان صاحب قفشات ونكات ودكانه بتاع النجارة في حي المدنيين كان تجمع لشلة ظريفة من ناس مدني يجمع اخوه معلم حسبو ومشجع النيل بيومي طه – ومشجع الثوار نوفل – بمناسبة بيومي طه قالوا في واحد عنده مناسبة وتم توزيع الكروت الكان بوزع الكروت دق باب ناس معلم حسبو وطلع ليه معلم حسبو قال ليه هاك كرتك وكرت اخوك احمد ودا كرت بيومي طه معلم حسبو قال ليه هاك كروتك دي وقول للعريس ماجايين العرس لحدي ماتعرف بيت ناس بيومي طه _
واحد صاحبي كان بمشي كل يوم مع شبك الي جنينة كعكاتي وكل يوم وهم جلوس في الجنينة يسمعوا واحد بصفق ويكورك يارحيمة كبدة ابل يارحيمة زقني كل يوم يتكرر هذا المشهد وصاحبي يسال في شبك منو دا وشبك يقول ليه بوريك بعدين جاء يوم لم يستمع صاحبي لصوت ذلك الشخص قام قال لي شبك ياخي وريني الزول الكل يوم دا بياكل كبدة ابل وزقني دا منو رد عليه شبك سريعا دا الصراف حقنا في الاشغال الليله قبضوا .
= يعقوب موسي النور =
ابن المدنيين وظريف ظرفاء ودمدني في الوقت الحالي كان واقفا امام قبة ودمدني وجات واحدة من الحلبيات وهي تدعوا يا يوسف ابوشراء تعمل ليه كدا وكدا رد عليها يعقوب وقال ليها الواقفة جنبه دا السلموني .
سال يعقوب عن سوق ودمدني فكانتى اجابنه سوق مدني بقي زي الكلمات المتقاطعة دكان فاتح ودكان قافل .
= مبارك محمد يوسف ابورقعة =
من ابناء فريق ام سويقو وابناء ودمدني البررة عمل في شركة جلاتلي هنكي وسميت فيما بعد بشركة الجزيرة تراه في المقدمه في كل مناسبات ودمدني الاجتماعية لازم ابناء شيخ عبدالله محمد الامين وكان معهم في حلهم وترحالهم له الجنة باذن الله .
= باردبس =
السمسمية الطرية والهشة ذات المزاق المميز لاتجدها الا عندهم اشهر من يصنعونها في ودمدني – تقابله وهو يعمل كانه يعزف في الة الكمنجة وتلك الحركات العجيبة وهو باللباس الكامل فول سوت ودائما تراع والكدوس عل فمه وكلماته الشهير وهو يحاكي صوت المسدس في افلام الكاو بوي تشينك تشينك جبان خائن .
نواصل ان شاء الله الموضوع طويل شديد .


= عائلة ود الفتلي =

الفتلي الكبير كان من اشهر المكوجية في سوق ام سويقو كان ابيض اللون رزق من الابناء الاشهرعبد الغفار شمام البنزين وكل ودمدني في تلك الفترة تعرفه كان ملازما للبحر يتابط ذلك اللستك الجواني الاسود يقفز من عند الطلمبة شل الشاطي لكي يخرج من عند الرملة بالقرب من الجزيرة المواجهة لمدرسة النهر – اشتهر بصيد الاخشاب والاشجار العائمة في البحر كان له صديق يشم البنزين ايضا وهو غير معروف للكثيرين اسمه ود فاروز من عائلة فاروز الشهيرة وكان له كارو يعمل عليه .علي ودالفتلي الاخ الكبير كان يعشق نادي الاتحاد وكان كثير التواجد في دكان الترزيان عثمان كرورو وودالقوس اصيب بمرض نفسي صار معزولا عن الدنيا والمجتمع . لهم اخ صغير اسمه فائز يقال انهم قد رجعوا الي السعودية ونالوا التابعية -
زينب بت الفلتي الاستاذة والمربية وعاشقة الرئيس جعفر نميري من رائدات العمل الثوري في تلك الفترة ومن نشطاء الاتحاد الاشتراكي تم منحها منزل من منازل حي الموظفين مكافاة لها من الرئيس نميري .
= ابو شمس =
ذلك الدكان الكبير او ماصار يطلق عليه الان سوبر ماركت لم نعرف اننا كنا في الدنيا والحضارة قبل الاخرين في منتصف الستينات وعندما ذهبن لمصر للدراسة شاهدنا كل ماكنا نشاهده في دكان ابوشمس من ماكينة تقطيع الباسطرمة والجبن الرومي والمارتديلا وكل اصنواع الزيتون من الاسود ولاخضر والزيتون بدون بذر وكل انواع الشوكولاتة نعم كنا متقدمين على الكل في ذلك الزمان الجميل .
= ابوجو =
عاشق نادي الشاطي والاسكافي المتميز كان مكان جلوسه هو في برندة دكان ابوشمس كان محله مجلس وملتقى للرياضيين من ابناء المدينة – عهد اليه اتحاد الكرة في ما توفير كور لعبة كرة القدم فكان يتعهد بتجهيزها ونفخها وجعلها صالحة لي اللعب تزوج من بلاد النوبة في صعيد مصر وله عدد من الابناء لعب بعضهم كرة القدم في نادي علم الوطن –كان منزله بالقرب من جامع ابوعيسي .
= التوم النمر =
الــــــدنيا مدرســـــة استاذها الظــــــروف وفصولها المجتمــــع وقلمهــــــا الامــــــل وحبرهــــــا الدمـــوع وكــــــتابها حـــــياة الانــــــســــــان كانت معلقة امام مكان جلوسه امام مكتبة الفجر – اشتهر بتفصيل كدارات لعيبة كرة القدم كان صديقه في ذلك الزمن البعيد حسن ودكشك النجار .
= ريمون صقال =
كان وكيلا لمجموعة حجار بودمدني – اشتهر عندما كان وكيل الغاز لشركة شل بودمدني كان رجلا منظما يحدد تاريخ تسليم الانبوبة المليانة حسب ماتوفر له من انابيب كان لايجامل احد خدم سكان ودمدني تراه بكثرة في احزانهم مجاملا .
= يحيى منصور =
رجل التربية والتعليم اتذكر في الزمن الماضي كان منزله الان مقر لنادي الكوكب الذي اندثر وتلاشى كما تلاشي نادي الشاطي – اخر محاولة لكي ينهض نادي الكوكب من كبوته كانت في الثمانينات عندما تصدى نفر كريم عبدالعزيز ود العمدة واخوه عمر ومجموعة من شباب المنطقة المحيطة بالمدرسة الاميرية لم تنجح المحاولة وتلاشي نادي الكوكب _
كان منزله في فترة من الفترات مكان لبيع الغاز ولديه ابن اسمه نبيل يقال انه قد انضم الي جون قرنق ايام التمرد في تلك الفترة كان ملازم في الجيش .
= محمد نخاس الدجاج =
كان نخسها يهمهم بصوت خفيض وكلام غير مفهوم اشتهر ببيع الدجاج في سوق الدجاج في السوق الكبير كان منزلهم في زقاق الرضي جنوب جامع الحكومة كان يتفاهم معك اذا كنت تريد ان تشتري منه ويكون نصحيح وكان مغرما بالساعات تراه دائما يلبس الساعات الجديدة .
= مكرم مانسي =
زمان اشتهرت الساعات الجوفيال وكان مكرم وكيلا لها دكانه في شارع الجمهورية بالقرب من مكتبة مضوي بعد رحيلها من جنوب حديقة سليمان وقيع الله .
كان يجلس معه بالدكان في جزء مستقل من كان يصلح الساعات وله موتر فيسبا وكان انيقا وممتلي الجسم كنا نتجنب ان يصلح لنا ساعاتنا كان سعره عاليا خاصة في صيانة الساعة او مايعرف في ذلك الوقت بالمسحة .
ماهي المسحة بالنسبة للساعة تفصل الزجاجة عن ماكينة الساعة وتوضع الماكينة في علبة نيفيا يوضع فيها البنزين الابيض لمدة بسيطة حتي تخرج الاوساخ والاتربة ثم تنفخ بذلك الشي والذي يشبه الكرة البلاستيكية ثم يعاد تركيب الساعة في مكانها اذا احتاجت الي وزنة من البندال اذا كانت تقدم او تاخر علي حسب شكواك للساعاتي .
نواصل ان شاء الله

= فاروق ود النقاش =
عمل موظفا بالبنك الزراعي تراه في كل المناسبات الاجتماعية مقدما للحفل بتلك الكلمات الجميلة والمنمقة كان شعلة من النشاط في مجتمع ودمدني اغترب لفترة باليمن السعيد عاد الي ودمدني تعرض لهجوم من سرب من النحل قضى فيه نحبه له الرحمةوالمغفرة .
= علي ابورونجة =
مشجع فريق الاتحاد ذو الصوت الرنان وصاحب الكشك الشهير بالقرب من سوق السمك وعلي قيفة البحر اشهر من يطبخ حلة مسبكة من اللحم وتشتهي ان تتناولها معه في الرملة قطعت البحر بواسطة مراكب اهلنا الدرنية والحجوز وبالعدم مركب ود فواد السماكي .
= مخبز سعد سعيد انور =
من الاخوة اليمانية المعادين لحكم الامامة في اليمن استقر بودمدني وامتلك موقعا استراتيجيا علي قيفة البحر ملاصق لمدرسة النهر وفي مواجهة الجزيرة والتي علي الضفة الاخري للنهر اقام مخبز شهير في تلك المنطقة بالاضافة الي منزل سكني – كانت له مجموعة من العجلات لتوزيع الرغيف علي الدكاكين والمطاعم في ودمدني – لبني الحسين صاحبة قضية البنطلون الشهير تعتبر حفيدة له .
يمر بالقرب من منزله خور اطلق عليه خور سعد يتمدد حتي ناس العمري وكنا نعرف به حجم الفيضان عندما يخرج بالقرب من ناس ود فاروز .
= علي جدة =
الفكي عاوز لي حجاب ولا عاوز تشوف لي طالعي ولا عاوز لي حجاب محبة كله كان تجده عن علي جده في اطراف حي ام سويقو كنا نراه ونحن صغار وكبار وفتح لنا كتاب الابراج – ابنه الان من اكبر المحامين في ودمدني .
الشيخ قنديل عبدالسيد =
ياقنديل جره بالجنزير غناء البنات له تبركا به وللخروج من دنيا العزوبية يمتلي يوم الجمعة مسيد الشيخ عبدالسيد بالمريدين والذاكرين فيما يعرف بالعصري اذا كنت تسكن حي المدنيين او ام سويقو او كنت مار بشارع السوق الدباغة وانتبالقرب من المسيد تسمع صوت النوبة وهي تضرب محدثاة ذلك الصوت الجميل .
= صالح يوسف سعد =
ونحن في طريقنا من جامع الحكومة والي القبة كنا نراه جالسا علي كرسي امام منزله وكنا نعرف انه قريب الكوتش سعد الطيب وحكيم الطيب وكمال الطيب وقريب صديقنا سعد الحمريطي كنا نعطيه السلام لم نرى ولد له كل خلفته من البنات لذلك لم نكن متداخلين معهم كنا نعرفهم البنات بالاسم لكن لم يكن هنالك شي يجمعنا بهم لاتوجد دراسة مختلطة ولا بلغنا سن الجامعة في تلك الفترة .
= مدثر القطر =
عاشق فريق النيل وابن فريق الحمر والمعلق الداخلي لاستاد ودمدني ومذيع المباريات في الاذاعة مع الاخ اسامة علي حسين _
كنا نراه مع المرحوم هاشم الخليفة في تلك العربة والتي تجوب احياء ودمدني معلنة تاريخ المباراة القادمة في استاد ودمدني الف كثير من القصائد في حب اندية ودمدني تقال عند فوز ذلك الفريق في مباراة خارجية خاصة ضد اندية الخرطوم _
= فهمي البوشي =
في زمن الشباب كان فهمي ود ناس البوشي يلبس الفنيلة الكت ويركب الموتر الباجاج وتظهر عضلاته ومقانصه بعد فترة استغل تلك القوة في عمل الخير اذ صار من اشهر حفاري القبور بعد المرحوم شيخ العرب حضر فهمي جزء من حياة شيخ العرب في حفر القبور وكانت بينهم مناكفات كثيرة .
كان فهمي والشباب يحفرون في قبر وصادفهم قبر قديم له عشرات السنين كان الكفن يبدوء جديدا وكأن المتوفي قد دفن امس لم يفوت فهمي الفرصة قطع من الكفن قطعة للبركة – الارض لاتاكل الانبياء والصالحين .
= عباس شدو =
وانت في مواجهة مدرسة المعهد العلمي ومدرسة النيل الازرق ومدرسة السني الثانوية تطالع ذلك الصرح التعليمي والذي ساهم وبكل صراحة في انقاذ كثير من الشباب والذين كاد قطار التعليم ان يتحرك ويتركهم في محطة خلوية – ساهم العم عباس شدو وبمدرسته شدو الوسطي وبتكلفة قليلة وفي كثير من الاحيان ببلاش في تعليم كثير من الاخوان – تلك المدرسة والتي كانت تحفها الاشجار من الداخل والترعة الشهيرة من الجهة الشرقية لهم التحية ابنائه من يوسف وحتي علاء ولكل عائلة شدو العريقة كان له اهتمام بالزراعة وله جنائن على البحر وله مانجو شهير باسمه منجة شدو.
= عبدالعزيز شدو =
رجل القانون الضليع وعاشق ودمدني ونادي النيل ونادي المريخ العاصمي كان حاضر في ودمدني دائما لحل كل ازمات نادي النيل زامل الرئيس نميري وكانت له وقفات شهيرة في محاكمات الفلاشا مع تلميذه سبدرات .
= الريح الليثي =
يابنات لو عاوزين تطلعوا عروسات بطلعكم عروسات فعلا طلعهم العم الريح الليثي عروسات ومتعلمات في مراحل التعليم المختلفة من المرحلة المتوسطة والثانوية في مدرسته بالقرب من سوق الدرجة – اذكر بالخير ابنه الاستاذ ياسر .


= عزالدين ابوشيبة =
من الشباب بمقياس هذا الزمان والذين نذروا انفسهم لخدمة الناس في المقابر ومعه شباب من حي المدنيين – ابوشيبة من عائلة عرمان العريقة في ودمدني .
= التاج طعمية =
التاج ود محمد سيد الطعمية علم علي راسه نار من الشباب الخيرين في ودمدني شاب خدوم لكل اهل ودمدني ويده تلحق الجميع مشارك اساسي في حفر القبور وله عدة لحفر القبور يشاركه في ذلك مجموعة من الشاب النشطاء .
= سيد محمد سليم =
كوتش سيد سليم فتحنا اعيننا ورايناه لاعبا في فريق النيل ومن ثم ارتبط بتدريب كرة القدم كان يعمل فريز للاقطان بمشروع الجزيرة ساعدته اللغة الانجليزية التي يجيدها في دراسة كورسات لمدربي كرة القدم بالخارج درب كل اندية مدني الشهيرة وفريق المريخ العاصمي والفريق القومي السوداني يعتبر من خبراء التدريب في السودان .
= سعد الطيب =
كوتش سعد ساعده عمله في مشروع الجزيرة واتقانه اللغة الانجليزية ان يدرس علم تدريب كرة القدم في انجلترا .
ارتبط بنادي الاهلي لاعبا ومدربا نال في عهده نادي الاهلي الكثير من البطولات كان يساعده في التدريب زميله في بركات عبدالصمد كان لاعبا وصخرة في دفاع سيد الاتيام – كان كوتش سعد يعتمد علي عبد الصمد في التدريب العملي وتطبيق خطط اللعب واذكر انه اول من ادخل طريقة ثلاثة خمسة اثنين لسيد الاتيام كخطة لعب جديدة يعتبر من اكبر الخبراء في تدريب كرة القدم في السودان لايوجد احد يتفوق عليه .
= عبدالمنعم عبدالعال حميدة =
موظفبنك باركليز ومن بعد بنك الخرطوم ورئيس اتحاد الكرة بودمدني ورئيس اتحاد التضامن بين الابيض وبورتسودان وودمدني في عهد كل من دقق وكير في زمن الممانعة والقوة التي تميزت بها هذه الاتحادات في مواجهة اتحاد الكرة بالخرطوم –
عبد المنعم عبدالعال رجل لبق وحسن الكلام ومتحدث لبق يسحرك بكلامه المرتب – هاجر الي خارج السودان افتقده الوسط الرياضي ومدني بصفة خاصة لم يعد هنالك من يقاتل ويحاجج فتفوقت علينا الحصاحيصا وماشابهها من اتحادات صارت لهم اليد الطولي في الاتحاد العام لكرة القدم .
= الفاضل سانتو =
عندما تكون هنالك فاول بالقرب من خط ثمانية عشر وتكون لصالح الاتحاد وياتيك الفاضل متلولوا كنا نضع ايدينا علي قلوبنا نحن مشجعي نادي الاهلي كانت هذه التصويبة بنسبة تسعين في المائة هدف لكل هذه الحرفنة وكالعادة كلما يبزغ نجم موهبة من ودمدني تتلقفه اندية العاصمة شد الفاضل رحاله نحو المريخ العاصمي فابدع معه وزاع خبره حتى وصل الي نادي النصر بدبي فلعب له وابدع واراهم فنون وسحر الكرة احبه ال مكتوم واجزلوا له العطاء يوم اراد ان يفارقهم اتوا له بفريق لفربول تكريما له كاعظم لاعب شاهدوه في الامارات يلعب كرة القدم اتي السودان ومعه اخر موديل من سيارات ذلك الزمان انقلبت هذه العربية الي موتر فيسا ومن ثم انتقلت الي عجلة هل العجلة موجودة حتى الان .
= قناب ود الدرنية =
تراه في كل مناسبات حي المدنيين يمسك بكوب الشاي ويهمهم بكلام غير مفهوم مهنته الاساسية هي تكسير الحطب وقص الشجر عندما تراه ممسكا بالفاس وهو يلبس ذلك الصديري يذكرك باهله الصعايدة وكانه رجع الي جذوره – كلفه مرة قريبه خالد بشير بقص الشجر امام منزله وطلب منه قص شجرة واحدة نفذ قناب الطلب بعد كم يوم ماتت شجرة قانب قال لي خالد ماكان تخليني احلق ليهم كلهم اها شوف دي زعلت من اختها وقالت اشمعنا انا ماحلقوا لي .
=حكيم الجاك =
عاشق النادي الاهلي وهدافه الخطير في الستينات رايته في احد المباريات ضد النيل وهو يمزق الشباك لعب لنادي النيل الخرطوم في فترة دراسته بالخرطوم عمل موظفا ببركات وتقاعد وهو بمنصب مدير في ذلك المشوع العملاق ونال السيارة الحكومية المارسيدس في اخر ايام عمله بمشروع الجزيرة .
= ابوجيبين المكنيكي =
في السوق الكبير وفي مواجهة بنك الخرطوم وفي الشجرة المعروفة بشجرة الجار يمارس ابوجيبين عمله سريع النكته ومن ظرفاء ودمدني يسكن في المزاد مع عائلة كبيرة يجد معاناة في الصباح في دخول الحمام بيكون الحمام بالصف قالوا ليه ياابوجيبين لو جاتك ليلة القدر بتطلب منها شنو قال سريعا مجموعة من الحمامات في هذا البيت .