بركاتيات [الأرشيف] - منتديات ودمدني

نزار حسن محمد

17-08-2014, 12:39 AM

رجعنالكم ..وجينا ..
الحلقه الاولى : عن حديث الذكريات
• مرت الاجازة سريعا مع الاحباب ..والسودان حلو بي ناسه ...وبس ولا كلمه
ونحمدا الله كثيرا بعادتنا وتقاليدنا السمحه واكاد اجزم بان فى كل عائله سودانيه "عشميق الاصم "..يظهر فى الوقت المناسب .
وياخرطوم وينك ...وشليل وينه اكله الدوده وشليل وين راح ختفه التمساح جاء مع المطر ..و شوارع واحياء العاصمه غرقت وقام دفر السيل على الجزيره وشمال السودان ..والنيل واقف لمبه وما زال.. وكل شى بيد الله ..ومخير الله ..وشال السيل اروح شعب بلادي الصابرين ..وهدم المنازل ..وكل شى عاااادي فى بلادي؟؟؟ وبخت البعوضه !!والفحصين
• الغيوم تملاء السماء والبرق عبادى والشمس فى اجازه سنويه ..والنسيم يـداعب الخدود وعن حبيبتى انا بحكى لكم وعن بركات الصامده انى بحكى لكم ..تغسل ماء الامطار الاشجار فتزداد خضره وتمتلى الميادين بالماء بدون جنائنيه ..وتتهلل وجوه الطيبين ...
ويتحول القــد الى بساط اخضر ..حتى الحنبوك اثمر واخرج ثمرته الجميله زهرية الون ..وقـــدلن جدي الريل فى المساحات الخضراء ..
ادرت مفتاح سيارتى والغيم فرش مظله .. وكان عثمان مصطفى يغنى عبر الاذاعه الخدود الشاربه من لون الشفق عند المغارب ..والنسيم من مزارع مرنجان المحطه ولفريق القطاطي اخضر .. وذادت قوة المطره حتى وصلت كبري التعاون والمطر اصبح يبادل الجو متعة فصل الخريف ثم توقفت المطر وانا جالس على السياره اتامل الايام الخوالى ..ومكان وقوف باصات المدارس ..
وانا فى وقوفى وتأملى ..شاهدته القمر ينزل الى ارض الميعاد ويتمشى مع اثنين من الحرس النثوئ وهم يمشون الهوينه ..وتذكرته شبلوف وهو يرتدى بنطلونه الصوف وزراير القميص مفتوحه ..ويادنيا مافيك الا انا ..هههههه
ومصطفى سيد احمد يصدح من الاكشاك القريبه من كبري التعاون تبقى ايه الدنيا من بعدك تكون وابقى ايه بعدك اكون...
تحركت الى سوق بركات حيث الالفه وبخور التيمان وقعدت الجبنه الما خمج والضحكه الصادقه ...
وقوقى القمري الراجعه للعش والضنا .. وانشرح صدرى واستمرت الونسه الى وقت متاخر ثم عدته الى ودمدنى وتتبعنى زخات المطر ... ودندنة ودالامين .. لو تسافر دون رضانا بنشقى نحن العمر كله
وبكره نواصل
ودعتكم الله

ياسر عمر الامين

17-08-2014, 01:02 AM

وعن حبيبتى انا بحكى لكم وعن بركات الصامده انى بحكى لكم ..

بركات ياجرح دنياي الذي لا يندمل يا من تركتى القلب ينزف في أنين حسرات لحظات تولت في وجل كصدى يطير مضيعا عبر السنين...تلك المدينة الصغيرة الوادعة التى بها ولدت ودرست مرحلتى الابتدائية...لعبت فى ميادينها سبحت فى ترعتها خضت فى جداولها اكلت من خضرواتها تنسمت عبيرها تفيئت ظلال سراياتها...بركات تسكن الوجدان راكزة فى القلب...رغم رحيلنا عنها قبل ثلاثة عقود الا ان ارتباطنا بها وباهلها لازال متوهجا كيف ولا وهم احلى جيرة واطيب ناس...
شكرا نزار على هذه الطلة البهية ولك منى خالص الود والتقدير يا جار حبيب...

عبدالله محمد العقاد

17-08-2014, 01:29 AM

ابوسفرووووق حمدلله على السلامة و اجازة سعيدة انشاءلله و منتظرين بقية التفاصيل ...

mahagoub

17-08-2014, 07:20 AM

الحبيب الغائب
سلامة الوصول
وعشنا معك الرحله خطوة خطوه
واصل وامتعنا بالصور
فهى اكثر تعبيرا

نزار حسن محمد

18-08-2014, 12:52 AM

الاحباب الاعزاء ياسر والعقاد والمحجوب لكم الود الجميل
وسنواصل حديث الذكريات

نزار حسن محمد

18-08-2014, 12:56 AM

بتخيالك ساعة القروب
بتخيلك يا كرنفال حزني المضى
بتخيلك .. بتخيلك ..و بتخيلك
نبتت تلك الحشائش الخرفيه فى ميادين وطرقات بركات تلك الورد صاحبة الون الارجوانى تتفتح كانها عروس لليلة دوخلتها تشع بهجه ونضار ولكن على استحياء ..تشاركها الرجله الكذبه والدريسه وبعض الحشائش النجيليه فتـكون لوحة خريفه خرافيه فى ارض بلادي ..
بعد ان زمجرة السحب الرعديه وشلع البرق وبدات زخات المطر وتأهب الجميع لساعات ممطره فجاء يظهر ذلك القوس " قوس قزح " ليعلن للملاء بانه موجود ..وان الجو سيكون عليل من غير امطار
دبت الحركه فى شوارع بركات واصبحت رايحة الطلح والشاف سيدة الموقف ..خرج الرجال والشباب الى راس الترعة يستمتعون بذلك الجو المستفيذ ...!
وعلى اطرف بركات خرجت افواج الحسان يمشون الهوينه فى طرقات بركات الخارجيه ..
تغيرت ملامح بركات بعد دمار المشروع فاصبحت الاشجار كثيفه بفعل الطبيعة وعدم وجود عمال الجناينيه ..بعد المغرب تتحول بركات الى غابات الجنوب حيث تنعدم الاضاء تماما...
يتمركز شباب بركات على كبري التعاون ... وبعض المنازل ذات الغرف الخارجيه ..حيث يبداء السمر الجميل مع نسمات الخريف ..يلعبون الكوتشينه والضمنه ..واصبح نادى عمال بركات تحت ادارة حى التكامل ..انتهاء نادى موظفى بركات تماما واصبحت تسكنه الضبوب والسحالى ... مبانى الاستراحه اصبحت نوعا ما تحافظ على شكلها الخارجى اما من الداخل فحدث ولا حرج دمار نصف شامل .. البيت الوحيد الذى يزكرك ببركات القديمه هو بيت المحافظ .. ثم المشتل .. وترانا ماشين
مرنجان تسعة لغات والعاشرة ابتسامه تناضل من اجل البقاء بدون المحالج ..وحال مرنجان السريات هو نفس حال بركات السريات
• شارع النيل بمدنى هو الذكري المتبقيه من جمال مدنى مع ارتفاع النيل واشجار حنتوب الجميله ..ومع نسمات الخريف تتحول تلك المنطقه الى ملتقى اهل المدينه ..ثم نادى الجزيره بعد ان رفعت عنه الوصايه الولائيه ..واصبح يعود تدرجيا لاهل ودمدنى ..
انعكس اثار الاقتصاد السودانى على حواء السودان فاصبح الجمال عملة نادره ؟
• ويظل ترابط اسر بركات فى ما بينهم ..العلامة المميزه فى كل مدن بلادى وتصرخ بركات متحديه الجميع بانها احتوت المجتمع المثالى فى ارض وطنى ..
• وختاماً .
بتخيلك كل ما الصباح طل وبدا
بتخيلك في زرقة السما والمدى
كل ما الغروب لون خواطري و هدهدا
وكل ما ابتهجت وبلل اعماقي الندى

بتخيلك يا كرنفال حزني المضى
لما النجوم تغفى وتنوم
وانكسر خاطري و يموت فيني الرضا
بتخيلك زحمة فرح تملك حواسي و تبهجا
ونجدة غريق يتلاشى في جوف الدجى
لا قربو ساحل لا جزر لا طوق نجا

بتخيلك لمة صغار ونسة و حجى
و قمراً طلع ضو الدساتر و مهرجا
بتخيلك في كل شي لمن ابالغ وانتشي
لما تظلمني الخطى وابا المشي
و بتخيلك

وبكره نتلاقى
ودعتكم الله

مرتضى يوسف العركي

18-08-2014, 01:01 AM

يا سلالالالالالالالالالالالالالالالالالالالالالالالال الالالالالالالالالالالالام
الرائع ابو النيز
والله شهيتنا البلد الجينا منها قبل شهر كده ......... طربيزة مبالغة شكلهم حرفاء وانا اطالع هذه الصور اجتاحني الجابري
البلوم فى فرعو غناااا البلوم فرعو غناااا
طرانا يا الحبان اهلنا
الزمن علمنا يامااااا حرمنا شااال الابتسامااااا
ياالمسافرين بالسلامة بلغو الحااال لأهلناااااا
طرينا مشوار العصارى ورعشتة الورد البلالى
البريد داير يدارى والقلوب عاوزة المحنة
الغمااااامة حلات رحيلة فوق روابينا الجميلة
الطيور جااااااات لمقيلة كلموها خلاص رحلنا
البلوم فى فرعو غنااااا البلوم فرعو غنااااا
طرانا يا الحبان اهلنا

نزار حسن محمد

19-08-2014, 08:17 AM

نزار حسن محمد

24-08-2014, 12:56 AM

يوم من أيام بركات
مع ساعات الصباح الباكر وقــوقـــى القــماري وجريان خــرير المياه على الجدول ونسمة بركات الصباحية ..وانتهاء الجزء الأول من صباح بركات بعد عــودة كبار القوم من أداء صلاة الفجر .
يشد انتباهك صوت القاري الراحل صديق احمد حمدون وهو يرتل آيات من الذكر الحكيم معلناً بداية يوم جديد عبر الاذاعه السودانية ثم تسمع تلك الموسيقى الاخباريه
معلنتاً مؤجز الصباح ثم يأتك ذلك الصوت الندى للراحلة ألمقيمه لليلى المغربي وهى تنشر الدف والطمانينه على شعب بلادي .
ربة البيت تلك الإنسانة التي وصانا بها رسولنا الكريم ثلاث مرات إلام تجدها قد استيقظت مبكراً كإعادتها وقد أعدة شاي الصباح وتفرغت لإعمال المنزل أنها كنترول الحياة ..وصيتى لكم قبل ان يعود التراب الى التراب هذه الانسانه " الام"
تعمل في صمت لاتكل ولا تمل تشرف على كل كبيره وصغيره
يذهب رب المنزل للعمل وتجدها تشرف على هندام أبناءها وهم يستعدون للذهاب للمدارس بعد أن تكون قد أعدت لهم سندوتشات الفطور وكل ما يلزم لقضاء اليوم
تنشط الحركة في شوارع بركات وخاصتاً الشوارع المتجه للمدارس تشاهد الطلاب
وهم يمشون جماعات وافرد في همه ونشاط يستقبلون يوما جديدا
مدارس بركات ...غير
في حضرة من اهوي عصفت بي الأشواق
حدقت بلا عين ورقصت بلا ساق
عشقي يفني عشقي وفنائي اســــــــــــتغراق
مملوكك لكني ســــــــلطان العشاق
ويا حليلك يابركات
..تتوقفت باصات الترحيلات أمام مدارس الابتدائية بنين وبنات والمتوسطة بنين وبنات .
تشاهد الابتسامة في وجوه كل الطلبة وهم مقبلون على المدارس فاليوم استثنائي وعلى غير العادة .. يضرب جرس الطابور الصباحي ويطلب من
الجميع التوجه نحو الباصات وذلك للذهاب إلى حقول جني القطن
يتحرك الجميع نحو الباصات في سعادة غامرة..هناك من تشعر بان سعادته نابعة لأنه سوف يلبى نداء الوطن وهناك من تشعر بان سعادته نابعة من نداء قلبه لأنه سوف يشاهد محبوبته في نفس الحقل وهناك مجموعه من ألطلبه والطالبات سعادتهم نابعة لأنهم يستمتعون بالشمشره فى هذه الاجواء
تنطلق الباصات إلى أن تصل لتلك الحقول الخضراء مع نسيم بركات العليل الصباحي وذلك بعد أن تكون قد بحت الأصوات من ترديد تلك الأناشيد عن حب الوطن ..بلادي ..بلادي.. فداك دمى وهبت حياتي فداً فسلمي . وفى الجزيرة نزرع قطنا نزرع نتيرب نحقق أملنا ..وبعد الوصول تبداء عملية تسليم كل طالب "مخلايه" وهى عبارة عن كيس دموريه به شريطين من الأطرف ليربط في منتصف البطن .
ويبداء الجميع في الدخول نحو الحقل وتبداء عملية جني القطن بهمه ونشاط
وهنا ينشط فريق الشمشرجيه بالمراقبة والرصد بقيادة حسام دبوره في تحركات الجميع فذلك يحاول إن يتحدث مع محبوبته وذلك فعلا منشغل بجني القطن وذلك يفكر في الوصول لسندوتش البيض الذي يحمله ابن المحافظ ويستمر هذا البرنامج حتى ينتصف النهار ثم تبداء رحلة العودة ..مرة أخرى نحو المدارس .يستمر هذا البرنامج لمدة أسبوع ..
من أشهر الشخصيات في تلك الفترة هم بايعات الاطعمه وكانت سارة ألفلاتيه صاحبة أشهر طعميه وشطه ثم بايعات السندوتشات وهم كثر
أما الحجة الاوري فهي صاحبة أشهر تسالي والفول المدمس اشتهرت بالتقنية والجودة العالية في تحميص ذلك التسالي ذو الحبة الكبيرة والرائحة الجذابة والذي تنطبق علية مقولة " سبحة إبليس" لا يستطيع احد مقاومته..
استمرت الحجة الاورى في شهرتها حتى عندما تغلق المدارس أبوبها في الاجازه السنوية كان لها مقر أخر للبيع وهو بحي فريق الافنديه تحت شجرة النيم المقابلة لمنزل عبدالله حاج بابكر عليهما الرحمه ..
..ثم تهداء الحركة رويدا رويدا ويظل صوت ورش العربات والهندسه المدنيه هم الاعلا صوتاً .
يمضى اليوم بكل تفاصيله المعتادة ..إلا أن ياتى المساء .
ولا المساء ولا المساء
المحزون في جوف الضباب
وانأ أهي زينتي واعده مفتخر الثياب
مساء بركات هادى بكل تفاصيله تهداء الشوارع من الحركة بعد عـودة الموظفين والعاملين إلى مدنهم والقرى المجاورة لبركات يستمتع أهل بركات بذلك الصمت
المسائي الجميل

صلاح ودالطاهر

24-08-2014, 01:17 AM

ابوسفروق آزول وين الحي بيك يا جميل يا مدلل

naz_imam

24-08-2014, 01:37 AM

ابو سفروق والله ليك شوق وينك يامان دا انا كنت راجيك في كبري حنتوب وانت بتلعب حريق حركتك جبانه يااخ اها انا من دربي دا مارق لي عشرة وست في نادي الخريجين والكبري دا احرسوا براك

والله مشتاقين

نزار حسن محمد

25-08-2014, 12:57 AM

ود الطاهر .. والحب الظاهر
والله بتبالغ عديل..شنوا ياخى فكو وطار
ولا الريالات بقت بالشوالات
ياخى انا سمعت بانك جيت مدنى
ورجعت ود الصول واقف لمبه
كدى تعال نعيد الكان وحليل الكان

نزار حسن محمد

25-08-2014, 12:58 AM

يانيزو وينك ياحبيب يازول خلى الوست
كبري حنتوب مقفول عشان ود المطامير
مطلوب للعداله الناجزه
ابقى عشره وخلى السلاح صاحى
والله لكم وحشه

نزار حسن محمد

25-08-2014, 01:08 AM

نزل المطر وبرد الجو
هبت نسائم الصباح وهى تحرك صفق الاشجاربعد ان تحولت من الون الاخضر الى الون الاصفر وبدات تتساقط الاوراق فى حدائق بركات.. لم تخرج الشمس كعادتها .. السماء تبدو أقرب إلى الأرض في مثل هذه الساعة
من الصباح الباكر .
السماء ملبدة بالغيوم وبرغم ضوء الصباح لكن يظهر البرق كالسيف البتار
مع تحرك واضح للسحاب وبعض الاصوات البعيده للرعد
توقفت بصات الترحيلات امام رئاسة مشروع الجزيرة وورشة عمال بركات نزل الموظفين والعمال الى مقر عملهم ..
سائقى الباصات يستعدون لترحيل الطلبه الى مدارسهم ..
فى هذه الاثناء بدات حبات صغيرة من المطر تتساقط ..ثم بدات تكبر رويداً رويداً ..ثم اصبحت ترتفع اصوات الرعد بوضوح.. ثم اصبحت مطره
تجمع العمال داخل مكاتب المهندسين واقفلت شبابك الموظفين ابوابها خوفا على الاوراق والمستندات . مع فرحه تعم الوجوه بهذا الطقس البديع المستفذ
لم تذهب الباصات للمدارس ... اسعد الناس فى مثل هذا الصباح هم اصحاب المطاعم ..حيث يزدد الطلب على حبيب الشعب الفول الساخن مع الطعمية
ولكن كيف الوصول ...
لم يهداء نزول المطر الا بعد مرور اكثر من ساعتين
امتلات الميادين والحدائق والشوارع بماء المطر .. ثم بدات تصدح العصافير وهى فرحه بهذا اليوم الاستثنائي ..
البخور يملاء الانوف فى سوق بركات ...ولكن مياه المطر تغطي الشوارع
لاتتوقف حبات المطر ..بين الهدوء والنزول بقوة ..
اجازة اجبارية لكل الجنائنيه وعمال النظافة ..سائقى الباصات يرجعون بالموظفين والعمال مع صفارة الساعه الثانيه ..
يعود الهدوء لى بركات وتظهر الشمس خجوله ثم تختفي بين السحاب
غدا نواصل ودعتكم الله،،،

مصطفى هاتريك

25-08-2014, 01:26 AM

حبيب القسا
سلامات

هسع لو تسافر دون رضانا دي ما نفذتها عملي

و بعد

كنا و نحن صغار عمر (( ولا زلنا )) نقضي الاجازة الكبيرة أو معظمها في بركات

وما أدراك ما بركات ...

ناس نضاف جوة و برة

نظام خواجاتي ... كل شئ بالمواعيد

شباب زي الورد

لكن يا نزار

إنت كنت و كان زمان

ود الجعلي

26-08-2014, 08:59 AM

بركات جميلة باخضرارها و اخضرار قلوب أهلها انها ذكريات جميلة احس بنفس الشيء وهذا يؤكد ان اللحظات الجميلة والتفاصيل التي مرت بسرعة لايمكن ان يأتي مثلها

عشنا معاك في دواخل كلماتك
عندما تسترسل فانني أيضا أتذكر جزء كبيرا من تاريخي الماضي ليس في بركات فحسب انما في كل شبر من ست المدائن

انها بحق مدينة للجميليين امثالك
نحن نتابع

نزار حسن محمد

26-08-2014, 10:39 AM

نزار حسن محمد

26-08-2014, 10:40 AM

نزار حسن محمد

26-08-2014, 11:02 AM

شاع نور الصباح والفجر لاح
برغم تلبد السماء بالسحب الماطره ولكن للصباح نور ..واشعة الشمس فى اجازه خريفيه اجباريه... رائحة الشاي المقنن والقيمات تملاء الانوف وتسري رائحة البن الحبشى ..ويصير المزاج ملكي .. وبخور التيمان له مفعول السحر ..واذاعة ام درمان تكتمل الوحه..
تمدد على عنقريب القد المصنع من جلد البقر تحت شجرة البخ بسوق بركات ووضع عمامته مسنده بعد ان انتهاء من ذبائح الجزاره..كان خال فاطمه لكل اهل بركات وكانت الجزاره تجمعه مع كل اهل بركات كان صوته قوياً مثل جسده كان جميل الخط وويقرض الشعر ..كان ابو العلاء احمد عواض محبوب من الكل له الرحمه والمغفره ..
ومع الاجواء الخرفيه والغمام يخرج ابناء بركات الى راس الترعه وهم يحملون الجبادات والصارقيل وتبداء رحلة الصيد الجماعى تشاهدم يجلسون على مسافات متباعد ومن خلفهم قد تم حفر حوض صغير لوضع الاسماك المصتاده ...
وكلما طالت الايام الخريفيه والغمام كلما طالت مدة الجلوس على راس الترعه ..
ثم ابتكر حبيب صبحى حبيب تلك الشباك العرضيه والتى تسحب من كل جانب على ضفتي الترعه كان ابن جبال النوبه ابراهيم يعمل معهم فى البيت ويحضر معهم جميع رحلات الصيد البريه والترعيه ...
ثم ابتكر حافظ محمود حافظ تلك المركب العجيبه والتى صنعت من الانابيب الداخليه للساتك الواري ووضع من فوقها قناء وطرور واصبحت متعه للجميع من يشاهد تلك المركب فى ذلك الزمن الجميل وعهد بركات الذهبي يتخيل نفسه فى ضاحيه ريفيه انجليزيه
كان سكان بركات يحبون تربية الوز ..والوز عوام ..تشاهد يسبح ويعوم فى الترعه فى منظر جميل ...
وكان نتاج هذه المنطقه الريفيه الانجليزيه يتمثل فى جمال حواء البركاتيه وقادر ربنا الخلاق ادهم الخلقه والاخلاق ..
جميع مبداعي بلادى كان يتنافسون فى الحضور لمناسبات اهل بركات من وردى ود الامين وعثمان حسين وابودؤاد وسيد خليفه وابراهيم عوض ود الباديه ومحمد ميرغنى وابوعركى وشرحبيل احمد والعميري حتى خلف الله حمد والقائمه تطول وتطول ..كانت بركات تلهمهم فيخرج الفنان كل ما يملك من ابداع
وذلك لجمال منظر بركات وزوق اهلها..
وعصريات بركات الخريفيه غير ....قدلن الحسان على مزارع بركات وشارع الاستراحه وما بين البوسته والمدارس وفريق الافنديه غير.. فيهم الحمراء والصفر والزرقه ولون زينب ..وقام اتعزز الليمون عشان بالغنا فى ريده
وعند دخول المساء يتجمع الشباب فى رمال حلتنا ما بين فصل التدريب المهنى.. وكبري التعاون ..
يا رمال حلتنا زولاً
كان بآنسك ياحليلو
فات رحل من بلدو روح
وفاتلو لى ناس ماها هيلو
الليلة يبكى دموعو سايلة
نازلى ما بسرك حويلو
يبكى مطرطش مودر
متلفت فاقد دليلو
يا حليلو الكان بيطلع
ينزل ومرة يشرب من سبيلو
ومرة يترنم يحاكى
حسو يرزم فوق نخيلو
الرمال تشكى وتعاتبو
تبكى منو وتشتكيلو
تقولو ليه خليتنى فت
والسمر فتش بديلو
فاقد اللى ايدو يمسك
يورى لى ضلو ومقيلو
وفاقد الى دموعو يمسح
يرتى ليهو وكت يسيلو
ينظر القمر المنور
راح شعاعو مغتى نيلو
ينتشى ويعزف ربابتو
لحن ما موجود مثيلو
يا سلام لو كان رجعلك
يا بلدنا الهم يزيلو
يسمع القمرى المغرد
ينسى حزنو مع هديلو
ودعتكم الله،،،

نزار حسن محمد

26-08-2014, 10:01 PM

خليكم قراب ..نحن يادوب بنسخن

نزار حسن محمد

27-08-2014, 12:38 AM

ياصديـق مالك مشغول بالك
قالوا لى الحب غير حــالك
التقيا بعد ردحاً من الزمان واتــي .. التقيا فى مرتع الصبا واتذكرو الايام الذاذ والمطره اب رزاز ..ولكنه ؟؟!! لاحظ لرفيق عمره مشغول البال
كان هائم وهو ينظر فى المجهول ولانه لايبوح بسره الا.. لرفيق عمره ..ولانه صاحب قلب مرهف تسللت دمعه من عينه وهو يقول لرفيقه اين هى الان لقد اشتقت الى روحها الحلوه ووجها الصبوح الى صرة حاجبيها الى ابتسامتها الى جديتها الى كل شى فيها ..
خرجت آها من دواخل رفيقه وقال له تعال ياخى واستغفر تعال نجلس على جدول ابوعشرين بتاعنا الزماااان ..داك واحكي لى عن تلك السعات الكهربائيه التى يحدثها الحب الاول فى كل البشر ..
جلسا على ذلك الجدول الذى كان مكمن البوح لديهم وهم فى مقتبل العمر ..
فقال لصديقه ..تعرف يا ابو الصحب لقد دارت بنا الايام ومضى بنا العمروشالتنا الدنيا مثل صفقه فى محيط هائج وخلنى احكى لك عن تباريح الهوي بعد فرقتنا بالسنوات تعرفت على عالم وعالم استطيع ان اكتب عنه مجلدات وما دام الموضوع عن الحب والغرام الاول فاسمع ما صادفنى ياصديقى العزيز فى مشوار هذا العمر الطويل القصير ...
بعد عودتى من دراستى الجامعيه وفى احدى ايام الخريف وانا عائد جديد لنج من بلاد الخواجات ذهبت لزيارة رفيق الدراسه فى اقصى شمال بلادى وكانت منطقة صديقى تقع على ضفاف النيل وفى احدى اليالى وقبل مغيب الشمس بقليل كان فى ذلك اليوم النيل صافى وبعضاً من شجرات النخيل ترسم ضلها على سطح المياه فى لوحة رائعه جلسنا على ضفافه نتسامر وكان الجو عجيب شاعري ..لم اتخيل بان اشاهد تلك الفتاه التى غصبن عنك تلفت نظرك ..ولطبيعة اهل المنطقه وصلة القرابه التى تربطهم بعضا ببعض حضرة الينا بكل ثقه وسلمت على كانت واثقه من نفسها ومن جمالها ومن ادبها وثقافتها التى تنم على انها بنت عز ... ولانها بنت عمدة المنطقه قالت لمضيفى جيب صاحبك وتعالوا اتعشوا معانا عشان ما يقول علينا ما اكرمنه..
وبالفعل ذهبنا لمنزلهم والذى تظهر عليه علامات الثراء واضحه جلسنا فى حديقة البيت وجاء والدها ووالدتها واخيها فهى كبيرة البيت وكانت دهشتى عندما شاهدته تلك الطفله وهى تنادى مضيفتنا با ماما ..فعلمت انها متزوجه وجايه اجازه بس لعرس اخوها حضرة وجايه من بلاد بره..جلست بالقرب منى وبدانا فى الونسه وكان صوت وردى ياتينا من على البعد وهو يردد اغنية اول غرام يا اجمل هديه انتبهت لى وانا اتابع كلمات وردى وقالت وهى ضاحكه تعلمنا الدرس ياسى وردى .. وسالتنى هل تؤمن بالحب الاول قلت لها والله الناس كلها بتقول الغرام الاول ده ما بتنسيى قاطعتنى سريعا وقالت لى كنا كلنا قايلين كده لكن اتضح لى انه وهم كبير ... قلت لها كيف ..وهنا استعدلت فى جلستها وقالت لى شوف ياسيدى وكما تراه فانا من اسرة ميسورة الحال عندما التحقت بجامعة الخرطوم وبعد مرور العام الاول تعلق قلبى باحد الزملاء وكان هذا غرامى الاول وتتطور الامر بيننا الى ان جاء لخطبتى ونحن مازلنا طلبه وكان من اسرة تقدر تقول عليها فقيره ..جلس مع والدى ولان والدى رجل متعلم ومثقف فقد استمع له بكل وعى متفتح وتناقشا بمنتهى العقلانيه وخرج بالخلاصه التاليه اين سنعيش بعد الزوج فى الشارع وتدخلت مدافعه عن حبى ولكن كان راي والدى منطقى وخرج خطيبى وهو مقتنع براي والدى وللاسف لم يصمت كثيرا فى الدفاع عن حبنا ذهب بعد ذلك تخرجنا
من الجامعه وقلبى يحن اليه الا ان جاء زوجى الحالى وكان لا ينقصه شى لكى ارفضه فهو صاحب تخصص نادر ومثقف ثقافه عاليه ومنفتح وتزوجت منه وسافرت معه لاروبا حيث مكان عمله ..لا اكذب عليك برغم كل السعاده التى عيشنى فيها زوجى ولكن كنت فى بعض الاحيان احن لى غرامي الاول وكان هذا الحنين يترك اثرة سلبى فينى ولن زوجى كان متعلم لم يناقشنى فى ايام حزنى هذه عن السبب الا انا جاء يوم واطريت للرجوع للسودان وبعد وصولى
ذهبت لمكاتب وزارة الخارجيه لتوثيق شهادتى فقالوا لى اذهبى لذلك المكتب فنظرت اتجاه المكتب فاذا بى اشاهده لحما ودما ..تصرفت سريعا وغطيت وجهى وتبلمت وجدته بعض المراجعين امامى فجلست انتظر دوري ..وفجاء سمعته يصرخ فى وجه المراجع الواقف امامه بان مواعيد الفطور جات انتظر لمن افطر
وهنا بدات اتامل غرامى الاول ..اولا شكله العام يوحى اليك بانه شماسي كيس التمباك امام الطاوله بعض من زراير القميص مقطوعه شعره غير مهذب وجاء صحن الفطور واذا بى اراء حيوان وليس انسان طريقه الاكل العشوائيه وذلك الصوت الذى يصدره من فحل البصل الذى وضعه امامه ...شاهدته كل هذا وانا غير مصدقه هل هذا هو غرامى الاول ...هل هذا عندما احن اليه يتعكر مزاجى بالاسبوع ..المهم جاء دوري ..اتخيل حتى صورتى واسمي لم ينتبه لهم طالبنى مباشرة بالرسوم وعندما اخرجته له وضع الختم على الشهاده وقال لى مافى فكه اصلكم انتو المغتربين ما محتاجين للباقى ..لم افتح خشمى بكلمه اخذت شهادتى وخرجت وانا افكر فى زوجى الذى كان يتحمل انفعالتى من اجل غرامى الاول
ومنذا تلك الحظه عرفت بان الغرام الاول هو اكبر وهم نعيشه .. ثم صمتت محدثتى وقالت هذه تجربتى الشخصيه احتمال اكون ظلمت معنى الغرام الاول لك ولكن هذه تجربتى الشخصيه ومنذا ذلك الوقت اصبح زوجى هو تاج راسي ... وذاد حبى له
لا اكذب عليك ياصديقى وجدته قصتها منطقيه ومنذا ذلك اليوم وانا بين نارين..لكن سبحان الله لمن اسمع وردى يردد اجمل غرام يا اجمل هديه انفعل مع الكلمات واهتز ثم عند انتهاء الاغنيه اتذكر قصة بنت العز و ام عيالى ورفيقة دربى
قوم ياخى بالله اشتقت لروحه الحلوه بلا لمه معاك ... ضحك رفيق دربى ثم قال لى يالى ظلمته الحب قلت عليه ايه..مش عارف ايه ..
ودعتكم الله ،،،

نزار حسن محمد

27-08-2014, 04:52 AM

مشتهيك انا يا بلد
مشتهيك انا يابركات
حلف بالله لا اشيل قلبى فى ايدى باريت البلد من جم
اقالد ده واخابر داك واشارك ده بهم
واديكم شباب لسع بحنضله ما اتهدم...
احس بانى ما كفيت جمايلكم
حلف بالله زولاً ماهو منكم انتم ندماً في حياته ندم
حلف بالله زولاً ما هو منكم انتو مقطوع فيه اي عشم
اهلي الطيبين
نسيتونى ما ظنيت بتنسونى لا انى ما ناسيكم وانتو ما نسين
انا الدوام مشتاق
ومشتهيك انا يابلد
ولك راجع لا محاله .
يا اهلي ناس بركات
ماذا يكون حبيبتى ماذا يكون
مدخل : الحب فى الشتاء ...
للشتاء ذكريات جميلة بعد ان يتعود الناس على موجة البرد ونسمات الشمال الباااارده ..يتبرمج العقل على هذا الفصل الذى يبرد اطراف الجسد ويدفئ قلوب المحبيبن ..
يدخل البرد فى تفاصيل الانسان يغير ...خرئطة طريقه اليومي ..وما فى احلى من هدؤا الطرق فى فصل الشتاء وتلك القصص الغراميه المشهود لها بالنقاء والوفاء ومالى والهوي
توااااعده بأن يلتقياء على مزارع بركات مع ساعة العصاري لكى تكتمل الصوره مع الخضراء وجريان خرير المياه والوجه الحسن ..
واتنى يابهجة الروح ترحنى.. إن كان " بالعمر " باقى
تماسكا بالايدى وهم يسرون كانوا يبتسمون ويضحكون يتحدثون ودقات قلوبهم لها صدى من الخفقان
وهنا تكمن سعادة المحبين يتوقف الزمان وتصبح اللحظه ...
وبين العصر والمغرب تتناجى القلوب فى حباً صادق قال لها وهو يتلعثم متين ياربى تلمنا وردة عليه وهى فى استحياء قريب ياربى انشاءالله تلمنا ...
لايهتمون العشاق بتفاصيل الحياه ومعانتها اليوميه المهم انهم يلتقياء ..وكل شى يهون ..
قالت له يانور عيونى كم انا مشتاقه اليك ..قال لها لو فتحت لك قلبى ستجدي نفسك بين الضلوع والحنايا . يشتد البرد رويدا رويد ..

ولكنهم لايشعرون ويتمنون ان يتوقف الزمن ..وكلما دنا المغيب وحانة مواعيد الفراق يتماسكون بقوة حتى تتصبب الايدى عرقا برغم نسمات الشتاء ..
ثم يعدون للحياة اليوماتيه ويندمجون مع الناس ولكنهم يظلون فى عالمهم الداخلى وهم يعدون كل كلمه ذكروها وهم فى قبطه وسعاده لايعلمها من حولهم ..
ويمضى الشتاء وبرغم برودته ولكنه يترك فى النفوس السعاده والبهجه بين المحبين..
ويالنسيت ايامنا ..ايامنا دى العشنا فيها غرامنا ايامنا
ايامنا فى الفؤاد ذكراها ايامنا قولى كيف انساها ايامنا
يالنسيت ايامنا ..ايامنا دى العشنه فيها غرامنا ايامنا
ثم يوثق قلم ابن المنطقه دكتور واصل الهادي احمد يوسف
ويترجم مشاعر المحبين فى الزمن الخرافى
ويقول :
ياتفاحة القلب والغيبوبة المشتهاة
للفجر وجهك يطل عبر القزح
والسحب المنتقاه
لليل وجهك يظل خفيا وراء القمر
ويهدي رونقة للسماء
للروح وجهان ..وجه مضئ ووجه يصطفيه المساء
للقلب الطريق الى الدم المؤكسد
لك الله ايها الجميل الموحد توحد توحد
ولنا الريح والعواصف تسري من القلب للقلب
والموت الجميل المؤكد
اجيئك والقلب نافذة الى الروح
وباب الى الخفقان لك التاج والصولجان
اديري كؤؤسا من الحان
تسري من الشرايين للقلب تنبت اغنية الاقحوان
تشهق الروح والراح يسري رويدا رويدا
تضى الخلايا بالنور والجلنار
اجئ كما تجئ الفراشات الى النار
كما تجي الطيور الى الوكر المستعار
كما تجئ الخنافس للدم المستباح
اجيئك مثقل بالجراح موغل فى التوحد
حد التماهى مع الذات
لعل التقمص يحررنى والانفراط
للروح الطريق الى الله
وللجسد الملذات والقبلة الارتواء
للقبلة الاخيرة الصلاة.
....
ودعتكم الحى الدائم

نزار حسن محمد

28-08-2014, 01:25 AM

ومرت الايام
كان الجــــو مستفز ادرت مفتاح سيارتى وعلى شارع بركات طلعت وكعادتى عندما اريد ان اتغزل فى معشوقتى بركات فدخل لها من اماكن معينه تعرفنى واعرفها..
بعد ان اخذت دورتى وامتلا صدري بهواء بركات وبداء غروب الشمس وجدته نفسى فى ذلك الطريق المؤدى الى الترعة نمرة اتنين ..
ومع نسمة الشتاء فى المغيب وايام اكتمال البدر يظهر القمر باكراً وهو مكتمل ويقول للارض من قدي
وانا ما بين جمال البدر وجمال حبيبتى وحبيبت الكل بركات يسوقنى الخيال لى عوالم بعيده
كان هناك سرب من عذراوات المنطقة يجلسون على جداول الري وهم يحملون كتبهم لاقتراب ايام الامتحانات وياخذون عقولنا وهم لايدرون ..
فاردد الشال منام عنيى وفؤادى جارحه انشاءالله يلاقنى وبى هواى اصارحه ..
عندما وصلت الى منتصف حى الموظفين ..فاذا بى سيارة اخى حسام الكورلا تتجسد فى خيالى فاذكر رائعة ام كلثوم الف ليله وليله ونحن متوجهين الى كبري التعاون نسير الهوينه ومعنا صوت الست يتبعنا..
واتحدى عنتر وقيس لو كانوا عاشوا فى بركات ..وشاهدوا ناس فلان وفلانه
كيف كانوا بعلمه الناس الهوى والريده ..
وانا فى نومى بتقلب حرامى القلوب تلب
ودعتكم الله

الملكة اسماء ( ام محمد )

28-08-2014, 01:45 AM

وانا ما بين جمال البدر وجمال حبيبتى وحبيبت الكل بركات يسوقنى الخيال لى عوالم بعيده
كان هناك سرب من عذراوات المنطقة يجلسون على جداول الري وهم يحملون كتبهم لاقتراب ايام الامتحانات وياخذون عقولنا وهم لايدرون ..

واتحدى عنتر وقيس لو كانوا عاشوا فى بركات ..وشاهدوا ناس فلان وفلانه
كيف كانوا بعلمه الناس الهوى والريده ..

وانا اتحدى الجميع ....
تحمل بداخلك كاتبا يجيد نقل احساسه ورسم الصور بتقنية عالية الجودة من تشبيهات وترتيب احداث

وعليه .. عازماك في الثقافي .. اتدفق هناك و اتحفنا كلما تأتت لك الفرصة

كن بخير عمو

نزار حسن محمد

28-08-2014, 06:44 AM

[quote=الملكة اسماء ( ام محمد );730503]
وانا اتحدى الجميع ....
تحمل بداخلك كاتبا يجيد نقل احساسه ورسم الصور بتقنية عالية الجودة من تشبيهات وترتيب احداث

وعليه .. عازماك في الثقافي .. اتدفق هناك و اتحفنا كلما تأتت لك الفرصة

كن بخير عمو
[COLOR="#FF0000"][SIZE=6]بتنا ام محمد ..مساك الله بالخير
ابشري بالخير انا جايكم هناك فى الثقافى
بس بدور لى عنقريب هبابي وكباية جبنه
وبخور تيمان ..وخلى الباقى على
ودعتك الله

نزار حسن محمد

31-08-2014, 01:05 AM

من امس والجو خرافي امطار خفيفه وغمام عجيب غلبنى اقعد فى البيت نزلت وقعدته ادور حول نفسي وقربته اقول يامطره صبى لنا فى عينينا
الجو لمن اكون مستفز تحتار تعمل شنوا ..
طلعت الشقه وفتحت جميع النوافذ واغنية الف ليله ولليله خلت ...الجو بهجه
قلت فى نفسي ياود ما تقوم تعمل حلة دمعة القطر قام مع الجو الخطير ده وبالفعل عملت حلة ما يعملا صلاح امين ذاتووو ..
صحيت الصباح وبعد صليت الصبح لقيت الجو ما زال بديع والمطر الدقاقه شغال بمزاج الى ان وصلت المكتب ..
رجع الصدي للحبيبه بركات تذكرت
خلف فريق الموظفين هناك طريق ينتهى بك عند الترعه نمرة 2 كنت احمل كتابى المدرسي واتمشى فى هذا الطريق وعلى جنبات الطريق كانت الخضراء على مد البصر والمياه وطير الجرول ونسمة المزارع الى ان اصل الى الترعه نمر اتنين ... وخلف الترعه كانت المزارع مد البصر ..
ما جعلنى اداوم على هذا الطريق ذلك الصوت الملائكى لاحد مزارعى تلك المزارع حفظت مواعيد تواجده لانه كان يترنم ويشدوا بصوت لم اسمع مثله من قبل يشدو ويترنم بى دوبيت واغانى اهل البطانه وياله من صوت ما زال صداه على اذنى ..شاب فى مقتبل العمر يمتلك موهبه لو اشترك فى ارب ايدل لاصبح كروان الشرق والغرب ولكن؟؟؟؟ اين نحن من العالم وحتى لو احضروا ناااس ال mbc لتلك البقعه لما اعارهم اهتمام ذلك الفتى لانه كان يطرب نفسه ويستمتع بتلك الطبيعه ويعشق عمله ..
وياحليل زمن ما كانت المزارع مخضره ..الله اجازي الفى بالى .
من كثرة مداومتى لهذا المكان ومتابعتى لذلك الشاب من غير ان يعرفنى او اعرفه عن قرب بدات احفظ بعض ما كان يردد فاذكر منها كان يناجى حبيبته بهذا الابيات
ويقول بصوت شجى شجى حتى الثماله
*وما حميره هريريجه وما زرقــه كنـكيـجه
ضيفت الوقفـن سيجى وخلت عضمى دهيجا
ما حميره ام دمن حار ومي زرقـه خويض النار
ما بتجيب غلط الجار وما بتقــول ده شـن قال
يالله ودعتكم الله

نزار حسن محمد

31-08-2014, 01:19 AM

سوف ياتى
**الامة السودانيه فى انتظار تحقيق كلمات اغنية الرائع الاستاذ محمد الامين سوف ياتى .. لكي ينقذ هذا الشعب من الا انقاذيون الا اسلاميون
فما زالت مهيرة بت عبود بخير وسوف تاتينا بمن يخرجنا من هؤلاء المجرمين ..فصبراً جميلا آل السودان ....
***ام البنات عملت لى كباية شاى وجات بتى عزه شايله ورقه وقلم وقالت لى يابابا ملنى اكتب لك شنوا قلت ليها اكتبى لى
**تبتبا تبتبا تبتبا تبتب
باكر تعرف تقرا وتكتب
وياما ترتب
نحنا بنحلم وكم نتمنى
هي تحقق كل ما تحب
تبني حياتا الند بالند
اي مكانة وخانة تسـد
هدهدا هدهد كل الورد ينوم ويفرهد
زي عصفورة تطير وتــرك
تحبا وتمسك وتـاني تفـك
سيبا تفكفك سيبا تلكلك عايزة تنطط
بكرة حترسم و ياما تخطط
بكرة حا يبنوا مدائن ضـــو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب

شخبتت بتى عزة فى الورقه لمن لقتنى بقول فى الكلام الكتير ده
وقالت لى يابابا الكلام ده ذى اغنية شخبط شخبيت لخبط لخبيط
قلت يابتى الكلام ده علمنا ليه استاذ محجوب شريف وربنا يقدرنا نعلمه لكم حرفا ووعياً ..ذهبت ومعها ورقتها ..
وتركتنى مع خيالى وسرحت فى كلمات محجوب شريف ربنا يرحمه ويجعله فى الفردوس الاعلى
*ربنا يرحمك ياجمال عبد الناصر ..شهدته بالامس فى اليوتيوب عندما دخل الى صاله المسرح لحضور الحفل الشهري لسيدة الغناء العربى ام كلثوم .. رجالا تحبه من نظرته وهدواء كلماته .. وبعد نظره فقدناك ياجمال الى ان وصل الحد بان يظهر علينا واحد مصري فى قناة الفراعنه وهو يتبجح بانه لايعترف برئيس السودان ولا خريطة السودان والسودان هو جنوب مصر ؟؟؟!! عجبي
** عجبتنى هذه النكته
قالووو واحد امريكى بحكى عن المراة السودانيه قال : رايت المراة السودانية وهى تكوي ثياب زوجها ثم تنحنى لتقبل هذه الثياب وتشمها ياله من موقف مهيب .. ويالها من زوجه عظيمه .. وليت عندنا بالغرب مثل هؤلاء الزوجات..
المهم مافى زوووول يوريهو انها كانت بتقرم الخيوط الزائدة من الجلابية بسنونها ..
ودعتكم الله

نزار حسن محمد

31-08-2014, 01:24 AM

بتذكـرك ..
ساعة الكلام يصبح صعب والليل يودر فى النعاس ..
• المكان : بركات زماااان
• الزمان : الزمن الخرافي
تستمع لصوت اذاعة امدرمان كان يقدم مختارات الاغانى الليليه والفنان عثمان مصطفى يردد فى عينك تظهر لى دنيا شوقك فيها ظاهر ..
الصمت والس...كينه يشعرونك بوحدة وانجذب لمن جعلت خفقات القلب تنبط من غير انتظام ..
لم يستطيع الصبرطويلا.. ساقته خطاه لمسكن عشيقت الفؤاد وكانهما كان على موعيد مسبـق
شاهد نور غرفتها مازال مضئ..شعرت به ولم يخب ظنها شاهدته
من خلف الاشجار والاذهار ولم تعد تتنفس كالمعتاد تغيرت انظمة الجسد واصبح المهم كيف يلتقياء فى سكون الليل ..
ومازال صوت عثمان مصطفى يردد العيون طرتنى زول من اهل غائب والشعر فى كتيفه يتهادل سبايب
اصدرت صوت متعمد ..وكان هو فى انتظار استقبال الاشاره ..خفق قلبه ورده اشارة الاستقبال ..واستعد الطرفين للخطوه التاليه..
وبدات للغة الاشاره والتى لايستطيع خبير الاسلكي ترجمتها .. الا هم
تحرك نحو تلك الشجره التى كانوا يلتقيان فيها لم تمضى لحظات الا
وكانت حاضره لحما ودما ً واشتياق..وتعطلت للغة الكلام ..واصبح كل الكلام بالعينين..ومد.. لها ..يده ..وتبادلا التحيه ولكنه نسي او تنسى يديه عنيه بين يديها ..ثم ابتسمت فى استحياء وهنا غار القمرفى سماه من جمال القمر الارضى ..وبداء الحديث همساً يعتليه الشوق والاشواق والاشتياق..
لم يفقاء الا عند سماع صوت البرنده تقفل فانسحبت مسرعه وظل هو يراقب الا ان انتظمت دقات قلبه ..
هكذا كان حال المحبين فى جيلى انا .. بنين وبنات بركات
ثم رده عايدً وهو يردد مع صوت الاذاعه ومختارات الليل وسكونه
بين الريد والهوي
عشنا ايامنا سوي
ماقسينا النوه
ما احلاك ياهوي
الهم راح وانطوي
عش ريدتنا استواء
ودعتكم الله

نزار حسن محمد

01-09-2014, 10:23 AM

يا بركات العز ..
وصى عينـيك الحنينه
ترسم الفرح المهاجر..
برغم الحاصل والبحصل يوماتى تزرع الامطار الصباحيه الفرح فى ربوع بلادي ..وفى بركات تغسل الامطار الاشجار وتمحو الاحزان .. وتعود بنا للا يام الخوالى الشمس فى اجازه مفتوحه .. والقيمات الحار مع شاى الصباح له مزاق اخر ..
صفق الاشجار مازالت بى قطرات الماء تغسل فرعه والهواء العليل يفعل بالاشجار حمام استشوار فتنزل ما تبقى من قطرات المطر ويظل الجو روعه ..
وكعادة دول العالم الثالث ..لا مدارس لا انتاج تتوقف الحياه لانعدم البنيه التحتيه فى كل ربوع بلادى .. وينصب اهتمام الاسر بالاكلات الساخنه مع هذا الجو المستفز .. ويكون للفسيخ والبصل الابيض والشطه والليمون القدح المعلى فى كل البيوت ..
وفى هذه الاجواء يعتدل المزاااج وتكون الونسه غير .. يمتلى سوق بركات بالرواد وتسمع رنين للضحكات والقفشات وربنا يرحمك يا على محمد صديق ... المريخ وعشقى المريخ فى مثل هذه الاوقات يفتقدون تعليقاتك الساخره ..المحببه للكل ..
اما المحبين يظلون مرابطين فى تلك الاماكن التى يمكن ان تظهر فيها محبوباتهم مع المحاوله من الاختفاء من اعيون الشمشرجيه ولكن هيهات .. " توم اند جيري"
وما اجمل عيون حبيبتى .. وعيون حبيبتى ديار تستقبل السواااح بشوشه طول اليوم غرقانه فى الافراح ...
وتصدح لها حنان النيل ..
يا رزينة ٠٠
وصي عينيك الحنينة ٠٠
ترسم الفرح المهاجر
في عيون كل المدينة ٠٠
سيبي أحزانك تعالي
نحضن القمر البيلالي
فوق نجيمات الليالي ٠٠
نحكي للأطفال حكاوي
نهدي للناس الغناوي ٠٠
في الصباحات والأصايل
للرياحين والخمايل ٠٠
يا رزينة ٠٠
للرياح الهابة نحكي ٠٠
للنجيمة ٠٠
للغيوم نهدي التحايا ٠٠
غيمة ٠٠ غيمة ٠٠
ولي قمر طلا في جبينك ٠٠
وللنجيمة ٠٠
العيون كيفنها ؟؟
خلي بالك منها !!
الحزن فارقنا أمسو ٠٠
والنسيم يطربنا همسو
والصباح الطل جانا
فوق جيبنك
شارقه شمسو ٠٠
يا رزينة ٠٠
وصي عينيك الحنينة
ترسم الفرح المهاجر ٠٠
يا عيون كل المدينة
ودعتكم الله ،،،

ود الضو

01-09-2014, 11:54 AM

ياسلام يانزار علي هذا التسفار الجميل
وكل التفاصيل تقف امامي
بركات , مارنجان ,
ياخ سلم لي علي داخلية ود الجاك
تحياتي ياوريف ..

نزار حسن محمد

02-09-2014, 01:17 AM

ياسلام يانزار علي هذا التسفار الجميل
وكل التفاصيل تقف امامي
بركات , مارنجان ,
ياخ سلم لي علي داخلية ود الجاك
تحياتي ياوريف ..

ود الضو ياحليلكم والله لم تغيبوا عن الخاااطر
لك الود ياغالى وخليك قريب

نزار حسن محمد

02-09-2014, 01:18 AM

محطات اجازيه
وانا فى نومى بتغلب
الناموس لى تلب
ربي معكم يا اهلي الطيبين اليوم سوف احكى لكم عن معايشتى عن قرب لمعاناة اهل السودان من غلاء فاحش ..وانقطاع للكهرباء مع العلم بانهم يدفعون مقدما لهيئة الكهرباء .. نعم كل شى متوفر ..ولكن لا رقابه على السلع الصباح سعر والضهر سعر والمساء سعر والقريبه كل الاسعار فى صعود لا يوجد نزول ..
ما عدا احياناً الموز ..كيلو الضان لمن استطاع اليه سبيلا يبداء من 70 فما فوق العجالى يبداء من 60 فما فوق كيلوه الكبده من 40 فما فوق كيلو السجوك من 60 فما فوق الكستليته من 70 فما فوق طبق البيض من 28 فما فوق دسته المانجو من 60 فما فوق كوم الباميه من عشره فما فوق البطاطس من 20 فما فوق الطماطم من 15 فما فوق ..الخ
نجى لناس الكهرباء عطل فى العداد الخارجى فى العمود عربة الطواري تصل بعد مرور 5 ساعات ثم لايتم التصليح لكى تتصل مرة اخري وفى كل مره يطالبونك العمال بالبقشيش اجباري انا فى يوم واحد دفعته 500 جنيه على ثلاثه دفعات من اجل تصليح العداد ثم يقولون لك لابد من تغير العداد وبعد تفتيش فى العدادات المنتهيه الصلاحيه واعادة تاهيله يدوياً مع العلم البلد المنتج هو جنوب افريقيا والصين ..وبعد تركيب العداد الجيد تبداء رحلة اخري فى ارجاع الرصيد من العداد السابق ..
نجى للمواصلات نعم متوفره ولكن الكل يضع تسعرته وعلى كيفه ..اما باصات الخطوط الخارجيه على شباك سعر وعند الكمسنجيه سعر اخر وكل التذاكر عند الكمسنجيه ..ودقى يا ميزيكا ..
الصيدليات ..توجد ادويه لايستطيع شراها الا اولاد الهرمه ..
• بالامس استمعت لمقطع تم حذفه من برنامج جلسة بن ..شاب يلقى قصيدة وينعى الوطن بس بشكل محبط للغايه ويقول كل شباب السودان يكرهون السودان ..ياهذا نلوم سوداننا والعيب فينا .. نسعى ونرضى بالحلول الساهله والربح السريع والأوطان لاتبنى هكذا من يحكمون السودان ليسو ملائكه ..انما عصبة زكت نفسها " قل لاتزكوا أنفسكم " حزموا امرهم وقادهم غدرهم وربما غيرتهم !! ثم ضلوا الطريق .. ياهذا الأوطان لايبنيها الحكام لو كانوا عساكر أو غيرهم ..الاوطان يبنيها أبناؤها ..
فإن كنت لابد لائما ..فلم الصادق المهدي والميرغنى وغيرهم فلو لا فشلهم لما أتانا البشير يمتطي جواد الاسلام ..ثم يتركه يجوع ..ثم يموت ..ثم تعم الرذيله فى كل الوطن ..بل وتتمرد وتصل للخارج
• لاتلموا عصابة الا انقاذ ..لومو انفسكم مرتين ضيعتم ثورتكم ..لانكم فوضتم الأمر لورثة الوهم ورثة المهدي وذلك المهوس دنياً مدعياً ومتوهماً أنه المهدي المنتظر ..وورثة الميرغنى ايضا امتطى نفس الجواد الذى امتطاه البشير فأمتلك نصف اراضى السودان بمجرد المشى فوقها ..فما أشبه هذا بذاك ..
• كلنا قرانا عن عمر بن الخطاب ..وعمر بن عبد العزيز ..ونعرف كيف يكون الحكم بالاسلام ..لم يحكم العمران بفقة الضروره ..لم يتدبجا بالحرير والمقاعد الوثيره ..بحكم فقة الضروره وتغير الزمن ..إنما حكما بتقوي الله ..لم ياكلا الا ما أكله افقر المسلمين ولم يلبسا الا ما يلبسه افقر المسلمين ..فلا تلمون عصابة الانقاذ ..لوموا انفسكم ولوموا الصادق والميرغنى ومن عاصرهم وصاهرهم.. وصلوا الثمانين او كادوا ..ولا يزالون يهيمون ويحلمون بحكم السودان .
• ومن المؤسف أن يهرب الشباب ويقنع بفشل السودان وينسى فشله ..ويسلم الامر للثمانينى الترابي ذلك الضاحك بلا سبب والذى لايتكلم دون ان يضحك والمؤسف ان الشاب السودانى فقد الرأى والشخصية وصاروا يؤمنون بهؤلاء الدجالين المتشبثين بالدنيا وقد بلغو من العمر عتيا .
• فأنا لا اذكر معارضا سوا الصادق او الميرغنى اونقد او التربى ولا اجد حاكما سوء عسكري من الجيش لما لاتسالون انفسكم ..هل عقمت حواء السودانيه حتى من وعى الفرق ضل الطريق الى البندقية ..التى تثمن ولا تغنى من جوع ..ولا تجنى سوء الخراب ..
معليش لانى زعلان اكتر من ذلك الشاب الذى ينعى الوطن بذلك الشكل المحبط ... فى المقطع المحذوف من برنامج جلسة بن

بالامس وصلتنى رساله عبر الواتساب مضمونها عااااجل قناة الجزيرة السودان يغلق المركز الثقافى الايرانى فى العاصمة والولايات ويطلب من الملحق الثقافي وطاقمه مغادرة البلاد فى غضون 72 ساعه ..
انشاء الله يكون الكلام ده صاح ..
ولبكره
ودعتكم الله ..

مرتضى يوسف العركي

02-09-2014, 04:46 AM

يا سلام سعادة العميد ركن ابو سفروق
سطرت المفيد الذي يلامس الوجدان صدقا لمعايشة بعفوية سوداني ود بلد وبصراحة الحقاني الما بقبل في الحق هدية
تجدني وربما الكثيرون مشدهون لصدق ما تصور سواء كان زخات مطر او حتى سوء حال طال نفوسنا قبل ان يطال وقائعنا
انها دعوة صدق للجميع لان نغير ما بانفسنا حتى نستطيع ان نغير حالنا
سلمت ايها المصادم دايرين لينا حزب بتاع ناس حقانيين
لا مظاهرات لا احتجاجات لا استنكارات
رجالة ساي كده وحمرة عين والله اسبوع واحد اي واحد يخش جحرو
لا تسالني عن الوسائل المادية لذلك
فللجميع عقول وقبول لكل معالجة تختلف عن المالوف
فهلا قول انا واحد

نزار حسن محمد

03-09-2014, 12:32 AM

نزار حسن محمد

03-09-2014, 12:47 AM

ود الامين ابن ود النعيم ذلك الهرم الانسانى
ابكانى وهو ينعى رفيق دربه ابن الابيض
خليل اسماعيل ولم يستطيع ان يحبس الدمع
اثناء اداء مرثية رفيق عمره
**أنا في قربك يضنيني حنين واشتياق
وحياتي في ظلال الوصل وجهاً واحتراق
كيف لو شطتت دياري
كيف لو طال الفراق
أتراه بعد الاساء والياسي يأتينا اتفاق
يا..يا.. يا..يا.. حبيبي
ماتلاقينا على ودا كلنا كان يعلم
بل تبادلنا حديثاً كان طلسم
وتعاهدنا وفاءً وصفاءً فتحدينا
وسروراً طاف قلبينا ومعنى لا تترجم
يا..يا..يا..يا.. حبيبي
ومشينا ومشينا والامانى حولنا تمشى تباعاً
وانتشينا وانتشينا بكاؤس الحب والأقمر تباع
كان عمري قبل لقيأك هباً وضياعاً
انا ألقاك وحدي قلت

نزار حسن محمد

04-09-2014, 08:26 AM

قطر الخميس ..الفات
والخميس صفقه ورقيص بالسودانى
والمابطلع الخميس يخيس بالخليجى
يلملم الخريف اطرفه بعد ان جاد على الخلق بالنعم ..والبيوت الوقعت والناس الماتت فى رقبة ناس الحكومه يسالونهم يوم الموقف العظيم .
ويبداء الشتاء فى الهبوط والاستعداد والدخول لاجواء السودان والحال ياهو ذاتو الحال ربنا يقدر الناس على الجرسلين والكركر.. والغبار ... ويخفف البعوض ويطير الذباب ويرخص الخرفان ويكتر الشربوت ...
• اعاد الخريف الشباب لبركات واخضرة الاشجار والبلوم فى فروع غنا وذكرنا يالحبان اهلنا ..قبل المغيب تعود العصافير افراده عاد طاير البلوم فهو لا يفارق رفيقة دربه من شروق الشمس لمغيبها ..
تخرج فنائل البرد والشالات من الدولاب ويصبح شاى المغرب فرض عين .. وما احلى نسمة الغروب مع شفق المغارب
ومع دخول الليل يزداد البرد وتخلو الطرق من الماره عدا .. ناس محبتنا فهم من فصيلة طاير البلوم .
الخبز الحار اولويه فى كل المنازل اما نداما الليل باقة الكرستال هى الاولويه ثم حبيب الشعب والمروقين حلة القطر قام ..
• رسالة للشباب من غيركم يعطى لهذا الشعب معنى ان يعيش وينتصر .. الفكره يمكنها ان تصبح واقع ..لو اقتنع الجميع بها .. عندما تمرد عريس الحور العين طه يوسف عبيد كان يداً واحده ..لهذا جات الصفقه متاخره حتى ابريل 85 ..ثم ضاعت مع المهديه والمرغنيه والترابيه وغيرهم نريد ان نضع بذرة انتفاضة شباب السودان بدون الاحزاب التقليديه شباب يهمه مصلحة السودان الوطن الواحد لا لكل الاحزاب .. لا للقبليه ..شباب سودانى رضع من ثدى مهيره وتربي بى اخلاق عشميق الاصم .. وهذا ليس بالمستحيل نضع المبادئ وتعمم الفكره عبر وسائل التواصل ..ودى ضربة البدايه وفى الايام القادمه سوف نضع المبادئ الرئيسيه ولا يغير الله قوما حتى يغيره ما بانفسهم ..وهذا دور الشباب وللحديث بقية ..
• ونختم اليوم كما قال الفارس السودانى مـحـى الديـن فـارس
لا لـن أحـيــد ..
أنـا لســت رعــديداً
يكـبـل خـطـوِهِ ثقـل الحـديد
عــن الكـفــاح لــن أُحـيــد
وهـنـاك أسـراب الضـحـايـا
الكـادحـون
العـائدون
مـن المـصـانـع .. والحـقــول
مـلأوا الطـريـق
وعـيـونـهـم مـجـروحـة الأغـوار
ذابــلــة البريـق
يتهــامـســون
وسيــاط جـلاد تســوق خـطـاهـم

مـا تصـنـعـون
ويجـلـجـل الصـوت الـرهيـب كـأنـه
القــدر اللـعـيـن
وتـظـل تـفـغـر فـى الـدجـى المـشـئـوم
أفــواه السـجـون
ويقـهـقـهـون
نـحـن الشعــوب الكـادحــون
وهـنـاك قـافـلـةً تـولـول
فـى متـاهـات الـزمـان
وبــلا دليـــل
عـمـيــاء فـاقـدة المـصيــر
يمشــى الملاييـن الحـفاة الجـائعــون
مشــردون
فـى اللاشعــور
حياتهـم وكـأنهـم صـمٌ الصـخـور
وهـنـاك فـى دنيـا الـمـزابـل
والخـرائـب ينـبشــون
والحـالمـون .. المـترفــون
يقـهـقـهـون .. ويـضـحـكـون
يمـزقــون الليــل فـى الحـانـات
فـى دنيــا الفـتون
والجـاز مـلـتهـب
يـؤج حيـالـه نـهـد وجيـــد
ومـوائــدٍ خـضــراء
تطـفـح بالنـبـيـذ وبالـورود

كـهـف مـن الشـهـواتِ
يجـتاز الـمـعـالـم والســدود
هــل يسمـعـون
صخــب الـرعـــود
لا يســمــعــــون
لا .. يسـمـعـون
صخــب الـمـلاييـن الجيــاع
تشــق أسمــاع الـوجــود
وغــداً نـعـــود
حتمــاً نــعـــود
...
ودعتكم الله ،،،

نزار حسن محمد

07-09-2014, 12:45 AM

بـلادى انـا
بلادى انا بلاد.. زولا فى اول شى مواريثم كتاب الله.. وسيف مسلول حداه درع
بسم الله نبدأ..
برغم بغضى للسياسه ولكن لابد من ما ليس له بد فقد بلغ السيل الذبا ..
اولاً لتعالج أى مرض او مشكله علاجاً ناجعاً وجزرياً يجب أن تشخصه تشخصياً وافياً ودقيقاً لا يقبل الجدل ..ويكون حقيقه علميه لا تحمل التأويل ..بمعنى ( 1+1=2)
السؤال الأول من أجل هذا التشخيص :- مالذي نشخص هنا ؟ هل هو السودان أم الشعب السودانى
السؤال الثاني :- أين يظهر الالم فى اى منهما او كليهما ؟ حتى نعرف العلاقه بين ظاهر الالم وباطنه ..
السؤال الثالث :- من الذى نحتاجه للتشخيص هل علماء وخبراء فقط ..هل علماء وخبراء ..وعامه ..هل المتعلمين فقط ..ام الكل
السؤال الرابع :- هل هناك أسئله اخري !!!
فلنبدأ بهذه الاسئله وليدلو الكل بدلوه ..ولكنى سوف اطرح بعض التلميحات والملاحظات لعلها تساعد كنت مساء الخميس أشاهد مباراة كرة قدم بين السودان وجنوب افريقيا حضر الجمهور منذ وقت مبكر جدا لتشجيع فريقه السودان وعند بداية المبارة بدأ التشجيع حماسياً ومتواصلاً ولعب " صقور الجديان بجديه وعزم " لكنهم لم يحرزوا هدفاً " ثم جاء الشوط الثانى من اللعب فكان نفس الأمر يتكرر ثم فجاة أحرز الفريق الخصم هدفاً علينا فماذا حدث ؟! همد التشجيع وبدأ التشنج والعصبيه وبالتالي الشتائم ..فتراخى الاعبون فولج مرمانا اهدافا اخري ..
ولو أخذنا هذا الامر كمقياس يمكننا القول أن الحماس موجود والغيره موجوده بدليل أن الجمهور حضر مبكرا وبدأ التشجيع بقوة .. ولكن ما أن دخل الهدف الآول حتى تسرب اليأس للجميع ..الجمهور واللاعبين وسريعاً.. والياس يأتى من انعدام الأمل وانعدام الثقه فى النفس والغيره .. فهل نحن شعب غيور يآئس .. ومتحمس بائس ؟؟ !! أم نحن شعب عجول يستعجل النجاح ..وحينما نتفاجأ بالفشل ..نيأس ونغتظ!!! ام نحن شعب فاقد للثقه فى النفس ..ونؤمن فقط بانفسنا عندما ننجح ونذلها ونمسح بها الارض عندما نفشل ؟!
فلنشخص المشكله ونحللها .. ونبدأ بكورة القدم ..ليس لأهميتها ولكن لأنها الحقل المناسب للتجربة.. فالدواء الجديد يجرب فى الفئران والضفادع قبل أن يجرب فى الانسان ..
فاذا نجحنا فى تطوير كرة القدم والرياضه عموماً فى السودان فسوف ننجح فى الأمور المهمه بنفس الطريقه العمليه ..والعلميه ..
والسؤال المطروح هنا لماذا ننهزم بهذه السهولة؟؟ او لماذا نيأس بهذه السرعه ؟؟
فليجب الجميع على هذه الأسئله والنري ماذا ستكون النتيجه ؟!!
ثم نتقدم إلى الخطوه التاليه ..ألا وهى التشخيص العلمى للمشكله السودانيه .
فليعلم الجميع اننا نتحدث عن الســـودان وليس حكومة السودان لانها ببساطه لاتمثل كل السودان وانما شريحه من السودانين ..
ايها الشباب فلنبدأ بحب الوطن ..ولكى نحب بلدنا يجب الاتي :-
1- نجعل الوطن فى مقام الوالدين فمن من لايحب والديه .
2- الا نسير فى ركاب الحكومه الحاليه لانها تتحدث عن الوطن كانهم قد ورثه ولانهم يخلطون حب الوطن بالدين ليس حرصاً على الوطن ولا على الدين وانما من اجل التمكين . والنهب المصلح .
3- يجب ان نحى بيننا الاناشيد الوطنيه التى تحجبها عمداً اجهزة اعلام الانقاذ الا وهى اناشيد واغاني الوطن التى صدح بها محمد الامين ومحمد وردى وعثمان حسين والكابلي وغيرهم من فنانين السودان العظماء الذين تشبعوا بحب الوطن .
4- يجب ان يطور كل شاب نفسه فى مجاله ولا يطمح فقط بالوظيفه بل يطمح فى ان يتميز فى مجاله وان يبدع حتى تنموا ثقته فى نفسه
5- على الشباب خارج الوطن ان يساعد شباب الداخل بالاتي
(أ‌) تذويدهم بالمعلومات والتقنيات الحديثه من خلال وسائل التواصل الاجتماعي بدون التخصيص ترسل للجميع للاطلاع عليها دون تخصيص
(ب‌) كل شاب يعمل خارج الوطن عليه ان يخلق اسواق لمنتجات سودانيه ويكلف بها بها شباب الداخل ..وان يكسروا حاجز الياس ولا ينظرون للانقاذين
(ت‌) على الشباب فى الداخل ان ياتوا بأفكار وابداعات لاتخطر على بال الانقاذيون بحيث يصعب عليهم تنفيذها حتى ولو ارادوا
(ث‌) على الشباب ان يلتفوا بعضهم ببعض وينشئوا مجالاتهم دون ان يمكنوا الانقاذيون من ولوجها وذلك عبر مواقع التواصل الاجتماعي " الواتساب وغيرها ":
(ج‌) كشف وتحديد الانقاذيون وتحديهم حتى يعزلوا تماما فى الاحياء وفى العمل والمجالات كافة حتى يعلموا ان السودان ليس ملكا لهم ويتخلوا عن التمكين
6- على الخبراء وذوي الكفاءات ان ينقلوا خبراتهم الى الكفاءات التى يثقون بانها لا تنتيمى للانقاذيين ..حتى لايجد الانقاذين بدا من الاستعانه بهم .
7- على السودانين الشرفاء فى الخارج انشاء قنوات فضائيه تنقل الواقع بشفافيه حتى ولو احسن الانقاذيون فى عمل ..حتى يتعلم الشباب أن الحق لايقبل التجزئه ..كما يفعل الانقاذيون
8- ليس بالضرورة ان يكون المتصل بالخبير .او العالم خارج السودان من اقرباء او اصدقاء الخبير والعالم أى على العلماء والخبراء ان يفسحوا المجال لكل سوداني فى الداخل للنقاش معهم على أن يحذروا من خبث الانقاذيون .
9- على الشباب والخبراء والعلماء فى الداخل أن ينقلوا الحقائق العلميه والعملية للعلماء والخبراء فى الخارج بدون تحيز ..أن ينقولها كما هي حتى يجد لها الخبراء فى الخارج العلاج والمعالجه المناسبة وان يتناقشوا فيها بعلميه وواقعيه ..على ان يتجنبوا الاشاعات والمعلومات الغير مؤكده .
10- على الجميع ان يتسع صدره للآخر مهما بدا له سخف أو سذاجة الاخر حتى نجعل السودان لكل السودانيين .
واخيراً نفديك باروح يا موطنى ..
معليش السياسه عموما سخيفه لكن غصبن عنا ..
ولبكره
ودعتكم الله ،،،

عاطف عولي

07-09-2014, 01:23 AM

أقرا وأعيد

وماني الزول البليد

لكن جمال السرد وتسلسل الأحداث

وإرتباطي بالكثير هنا

وأدي الفرجخه يا عم دهب

وفي الأخير بجيك

بي بركاتيات

ومارنجانيات

ومابين الأثنين قصة عشق لا ينتهي

نزار حسن محمد

08-09-2014, 12:58 AM

أقرا وأعيد

وماني الزول البليد

لكن جمال السرد وتسلسل الأحداث

وإرتباطي بالكثير هنا

وأدي الفرجخه يا عم دهب

وفي الأخير بجيك

بي بركاتيات

ومارنجانيات

ومابين الأثنين قصة عشق لا ينتهي

حاشاك من البلاده
انت من بلاد تسعه لغات
والعاشره ابتسامه
حجزت لك معاى قدااام
مقعد مكندش
كارو السرور
وحليل زمن الصبا الماضى
وحليل زهر الحياه الصافى
منتظراك

نزار حسن محمد

09-09-2014, 12:34 AM

وامطرة لؤلؤ من نرجس
مازالت رحمة ربى تتولاه ..وامطار الخريف تأبى ان تفارق ارض الوطن والجو البديع والغمام ينشر مظله من الفرح برغم الحاصل !!!
اغلب منازل بركات يتم تصميم البرندات فيها من الزنكى وايقاع المطر على الزنكى غير .. وتلك البرندات المطله على الحدائق المنزليه ..والحيشان ..تجبر السكان على التأمل فى امطار الخريف وتلك الاجواء البديعه وتشاهد تلك القماري التى تفرد جناحيها وهى تتنقل ما بين الاشجار منتشيه تجعل عصافير ود ابرق وعشوشه يحسدونها على اجنحتها الكبيره وهم يختبون خلف اوراق الاشجار تشاهدهم ماتلاصقين مع بعض وهذا يسعد عشوشه كثيراً ..
ثم تبداء ايقاعات الزنك فى ختام لحن الامطار وهنا يبداء خروج السكان من المنازل للهواء الطلق ..وتبداء فى سماع ايقاعات اللواري وهى تحاول الخروج من الوحل ..
ومع هذه الاجواء يزداد الطلب على حبيب الشعب " الفول " ..ويتشهى الكل للفسيخ والشطه القبانيت وبصل كسلا .. وسجائر البنسون وشراب الجبنه بالجنزبيل ..
اما ناس معزتنا المابنريد غيرم تجدهم فى شوق واشتياق لملاقاة تؤام القلب ..ويصدح المذياع لم يكن إلا لقاء وافترقنا
كالفراشات على نار الهوى
جئنا إليها واحترقنا
كان طيفا وخيالا ورؤى
ثم ودعنا الأماني وأفقنا
بالذي أودع في عينيك
إلهاما وسحرا

اكثر المتضررين من هذه الاجواء هم بايعات التسالى والفول المدمس وذلك لعدم تمكنهم من الوصول لمكان بيعهم .. وينتصف النهار ومازالت الشمس مختفيه بين طيات السحاب ..
وما احلى العصاري ومشوار العصاري فى اطراف بركات ولان اهل بركات سمحين ومتسامحين يعشقون امكان الجمال والماء والخضره والوجه الحسن .. تجدهم يزرعون البهجه فى النفوس بالبسمه والنظره لكى تصل النفوس مرحله لا منتهى من الجمال
ويبداء المساء وتسمع سيد خليفه وهو يشدو ولى المساء
ولّى المساء
الواله المحزون في جنح الضباب
وأنا أهيء زينتي
وأعد مفتخر الثياب
آملاً لقياك الحبيب
يصدني زهو الشباب
أمسي مضى بين التحسر والأنين
ووسادتي بللتها بالدمع والدمع السخين
مع تباشير الصباح
وبسمة الفجر الأمير
غنيت مثل الطير فرحى
في رياض العاشقين
تسري النسايم عذبة
وأنا أهيم بلا ملال
وتقودني الآمال في
دنيا المباهج والخيال
وهناك أرقد في الرمال
ولا آرى غير الرمال
غداً أذوب مهجتي
في حرأنفاس الغرام
أرنو إليك وا لوعتي
دمعة توجج في ضرام
أبيت أعشق في الدجى
صوتاً ينادي بملام
أبداً أعيش في حبه
أنا غير أحبابي حطام
أنا دون أحبابي حطام
غداً نكون كما نودّ
ونلتقى عند الغروب
غداً تجف مدامعي
وتزول عن نفسي الكروب
غداً تعود مباهجي
غداً حبيبي حتماً يعود
***
وياحليلك يابلدنا
يالله لبكره
ودعتكم الله

عمرالماحي

09-09-2014, 05:29 AM

عاطف عولي

09-09-2014, 09:36 AM

الأستاذ محمد الأمين في عرس بت ناس دبورة

حكاوي المرحوم الشهيد طه يوسف عبيد مع وردي وأبو اللمين

نزار حسن محمد

10-09-2014, 12:51 AM

ذكريات الخريف البركاتيه
المكان : بيتنا بركات السريات
الزمان : فصل الخريف اوخر الثمنينات
في احدي أيام فصل الخريف الماطره.. كانت هذه القصه الواقعيه
وكعادتي كنت استمتع قمة الاستمتاع أثناء هطول المطر..واتمرد الدخول للمنزل .
هل تذكرون تلك السلالم الخشبية المطليه بالبوهيه الخضراء والتي كانت تقودك إلى سطح المنزل ..كانت لدينا شجرة لبخ عريقة امتدت أفرعها إلى سطح المنزل فا شكلت تلك الأفرع شكل كوخ واصبح ملاذي ..وعند هطول الإمطار كنت احتمى بتلك الأفرع وأتعمد الجلوس في تلك المنطقة برغم محاولات الوالدة عليها الرحمة بمنعي من الطلوع إلى السطح إثناء هطول المطر ..
وفى ذات مساء كانت الغيوم كثيفة واعجبنى منظر القمر وهو يظهر بين تلك الغيوم إلا آن اشتد ضوء ولمعان البرق بذلك الضوء الفسفوري
ثم اختفى القمر ..وبدأت حبات المطر خفيفة ثم بدأت تزداد قوتها شيئاً فشيئاً
كانت الساعة قد تجاوزت التاسعة مساء وأنا ما زالت اجلس في مكاني المفضل مستمتعاً بتلك الأجواء الخريفية .
تم قطع التيار الكهربائي وبداء المطر يهطل بغزاره فأخذت كرسي لاحتمى بتلك الأفرع ثم سمعت صوت الوالدة وهى تسال اخوتى أين نزار فأطريت إلى النزول مسرعاً حيث جرأت العادة بان نجتمع في مكان واحد إلى انتهاء ألمطره وخاصتاً مع قطع التيار الكهربائي
لم تستمر المطره لوقت طويل توقفت ولكن ما لفت انتباهي ارتفاع صوت العصافير في تلك الليلة فأخذت البطارية وطلعت لاستكشف الأمر.
وعندما أشعلت ضوء البطارية شاهدته كمية كبيره من العصافير " ودبرق وعشوشه" يهبطون إلى الأرض ثم يحلقون نحو الشجرة وهم يطلقون أصوات استغاثة ..فلاحظت إلى عدد ثلاثة فروخ عصافير صغيره لم تتعلم الطيران بعد فقلت لنفسي هذا هو السبب ..
ولكن كان الأمر أفظع من ذلك ... فعندما رفعت ضوء البطارية فإذا بى أشاهد ثعبان وهو يتدلى إلى نصفه من أفرع الشجرة محاولا الوصول لتلك العصافير الصغيرة ولكن صياح العصافير ومحاولات الطيران من أمهات تلك العصافير تمنعه من الوصول إلى فروخ العصافير الصغيرة
توقفت في مكاني وطلبت من احد اخوانى بان يحضر لي بندقيتي التي اصطاد بها القمري من دولابي . في تلك ألحظه عادت الكهرباء وأصبح المنظر أكثر وضوحاً فقمت بالتنشين على رأس الثعبان وأصبته أصابه قاتله فنساب من بين الأفرع إلى الأرض .
حملت تلك العصافير ووضعتها على اقرب فرع مع استمرار صياح العصافير إلى أن اطمأنت
أمهات العصافير.
وأمي تراقب في المنظر وهى تطلب منى الدخول للمنزل تعا ل خلاص ادخل من مصائب الخريف دى ..
تذكرته هذه القصة وعظمة الأم على ضنها
حتى العصافير كانت تحاول أن تضحى بنفسها من اجل صغارها ..

وختاماً
وشوفي الزمن يا يمة ساقني بعيد خلاص
جرعني كاس
دردرني واتغربت واتعذبت
يا يمة وريني الخلاص
يا يمة يا بحر المودة وكت يفيض
يا يمة يا شعلة أمل زادت وميض
يا يمة يا عنقود كلام منضوم غليد
***
التجلاء والانحناء لكل أمهات بلادي.
ولبكره
ودعتكم الله،،،

نزار حسن محمد

10-09-2014, 12:53 AM

روعة سرد من زول جميل

[IMG]http://i57.tinypic.com/2ylwj0g.jpg[/IM

الغالي جدا حبيبنا ود الماحى وزير الماليه
لك الود ..ودايرين لنا رحله فى عيد الضحيه
نضحك ونغنى ونعيد الكان .

نزار حسن محمد

10-09-2014, 12:55 AM

الأستاذ محمد الأمين في عرس بت ناس دبورة

حكاوي المرحوم الشهيد طه يوسف عبيد مع وردي وأبو اللمين

ود عولى محبوبنا الفنان
لك على نعيد الكان وحليل الكان
وبالمناسبه الفنانين الغنوه فى بركات
ممكن تقول الاذاعه السودانيه باكملا
محمد الامين كان تخصص ال حسن بابكر
وردى كان تخصص بيتنا
بجيك برواقه

سواااح

10-09-2014, 05:18 AM

نزار ود حسن ..
اخوي حديثك يرد الروح
مشتاقين يا رجل
تحياتي لك دوماً وابداً ...

نزار حسن محمد

11-09-2014, 12:43 AM

نزار ود حسن ..
اخوي حديثك يرد الروح
مشتاقين يا رجل
تحياتي لك دوماً وابداً ...

هلا رفيق الدرب والمشوار حبيبنا سواااح
طلتك تسعد القلب الحزين
وادبك جميل ذى بسمتك
والله مشتاقين ياحبيب

نزار حسن محمد

11-09-2014, 12:47 AM

محطات اسريه
اخر الاسبوع ..
كان ليوم الخميس زمان طعم ونكهة ولون " اين تسهر هذا المساء ..كازينو النيل الازرق ، سينما كلوزيوم، الحلفايا ، البلو نايل، المسرح القومى . مدينة الملاهى ..الخ
اما فى عام 2014 اصبح اخر الاسبوع اين تذهب هذا المساء .. مستشفى القلب ..مستشفى امراض ورم السرطان ..مستشفى الاطفال .. مستشفي الامراض العقليه ..قسم الطواري ..مقابر البكري ..مقابر فاروق .. ..
ولا نقول الا ما يرضى الله ..الحمد الله والله يجازي الكان السبب
* دخلت ربة المنزل للمطبخ تلفتت يمين شمال لم تجد سوى بصله وطماطمه وبقى ملح حمدالله فى سرها واتجهت نحو القبله وهى تدعوا الله " احمد الله على نعمة النفس الطالع ونازل" .
• رن هاتف رب الاسره المتحدث من الطرف الاخر ربة الاسره ام العيال ثم تسمعه يردد.. حاضر .. حاضر ..حاضر ..ايوه عرفته ثم يقفل هاتفه ويغمض عينيه ويلفت الى اقرب واحد جنبه ويساله ياخى القى معاك حبتين بندول ..ثم تبداء مرحلة التوهان والزهايمر الاجباري و يبدأ يردد اللهم نسالك حسن الخاتمه .
• ابنه فى عنفوان الشباب فتح محفظته وجدها خاويه نظر الى فردة حذائه وجدها مقطوعه لبس قميصه وجده ناقص نصف الزراير نظر لنفسه فى المريه شاهد شاشة التلفزيون تعكس صورة الحاكم وهو يرقص .. ضرب المرايا وسالت الدماء من يده وضع سفه على الجرح ثم الباقى فى خشمه وخرج للمجهول ...
• بنتهم فى عمر الزهور فتحت هاتفها ليس به رصيد نظرة الى الرف المخصص لها من الدولاب مع اخوتها لم تجد غير المتبقى من علبة كريم تحمل علامة منتج فاخر وبداخلها قطرات من المتبقى من زيت السمسم اغمضت عينيها وتمنت ان يتحول زيت السمسم الى سم ..
• وقف الطفل فى الحوش وهو ينظر لافراد اسرته ثم رفع نظره الى السماء وتمتم بكلمات فزمجر السماء ونزل المطر فصاح ..يامطره صبى لنا فى عينينا ..
• ضحك افراد الاسره ورقصه معه وهم يرددون مع المذياع ..
بكره تتحقق امانى
تبقي هاني وابتساماتك معادة
والسرور يملأ حياتي ويبقى زادة
وعيني تشبع نوم بعد ما طال سهادا
وانسي غلبي ..
والرياحين تملأ دربي
وامسح الدمع البسيل يملأ الوسادة

**اما اول واخر الاسبوع لسكان كافوري والمنشيه .. واولاد الهرمه السهر صباحي داخل الصالات المصممه تحت الفلل الفارهه
" underground"
..رب الاسره يقلع جلابابه ويرتدى البندكور او البرموده
ربة الاسره ترتدي الشفتشى
الابن يرتدى بنطلون داقى سستيم
الابنه ترتدى صفقة العنب
وخلال دقائق يحضوره باقى اولاد الهرمه التانين
وتجى الفلبينيه جاره عربة المشروبات
ودقى يامزيكا ..

وكل اخر اسبوع وانتم بخير
ودعتكم الله،،،

نزار حسن محمد

14-09-2014, 12:26 AM

صوت العصافير مع ريحة المطر
قبل ان تشرق شمس اليوم وعند الرابعه فجراً هبت رياح الخريف بقوة فى سماء ودمدنى ثم بدأ البرق والرعد وهطلت الامطار بغزاره معلنه انها لم تنضب بعد ومازال فى الخريف بقيه...
انها رحمة ربى على العباد وينزل عليكم من السماء ماء مدرارا
تبتسم الارض وتتمائل الخضره وتجرى الوديان وهى تشكر الخالق ويطمئن الانسان وكل الكائنات الحيه فى هذه الاجواء البديعه..
وبرغم الحاصل والبحصل من معاناة اهل بلادى ..من قبل ناس القصر العالى الا انهم .. حمدون شاكرون صابرون..صامتون !!
بخور التيمان فى هذه الاجواء ..يجعل شكل الحياه غير ..وصوت صديق احمد حمدون ..وآيات من الذكر الحكيم تحلق بالنفوس وتجعلها راضية مرضيه وتشرح الصدور ..
حاجه امنه بعد ما ادت فريضة الصبح عملت شاى اللبن وجلست مع رفيق العمر وهو ممسك بمسبحته ويهمهم حمدا شاكرا الموالى
دقــت اذاعة ام درمان معلنة نشرة السادسه صباحا ..العصافير تغرد مبتهجه بهذا الطقس الخريفى البديع ..ثم عاودت الامطار رزازا لتكمل رحمة الخالق على الخلق ..
تتمائل اشجار بركات كعروس لليله زفافها .. وتتحول الى لوحه ناطقه اشجارا وعصافير وغمام وهواء منعش وزهور فواحه تسعد الروح المعنى
يكمن جمال بركات فى اطرافها شارع الترعة نمرة اتنين يعكس لك اللوحه مكتمله تشاهد بركات امامك من حى الجعلين مرورا بفريق الافنديه ثم فريق التعاون والتكامل الى حى فلاته ..
اللقد من خلف السريات الترعه نمره واحد من حى الجعلين بيت ناس معتصم طاسه من المدارس ..طريق الترماج من خلف ميدان نادي العمال
ثم تنطلق الحياه من سوق بركات يفترش الخضرجيه خضارهم وتستمع لصوت السكان يطلبون الحم من الجزاره ينشط شارع الفرن لجلب الرغيف ساخنا صوت مكنة العاقب الترزي تدخل فى ايقاع الصباح كمقطع موسيقى لحافظ عبد الرحمن مكمله لاجمل معزوفه ..بخور التيمان عامل مشترك فى كل المتاجر رائحة الطعميه تنافس بخور التيمان ..ورائحة البن الحبشى تفرض نفسها .
ومع رزاز المطر تشارك اسماك الترعه اهل بركات الفرحه حيث يزداد الاكسجين بفعل رزاز المطر وتلك الفقاقيع فتخرج الاسماك الى سطح وهى ترقص رقصة البالي غير مباليه..
وتتنافس ربة البيوت فى شطارة شراءهم للطلح والشاف فيخرج عطراً من البيوت يتلوي كثعبان الى عنان السماء ..
تهداء النفوس وتحمد الله على نعمه ..ويظل المغتربين يرددون ..الغريب عن وطنه مهما طال غيابه مصيره يرجع تانى لى اهله وصحابه
وختاماً
جنبك عمرى كان املاً مفرهد ياغرام الروح
زهور تملاء دنياي بالأمانى تفوح
وبعدك ياما بتألم حزين وانوح
غريب انا غير اهل
وقلباً حزين مجروح
بحبك عمري ما تنكرت ما جافيت
لغيرك يوم ولا اتهنت
خلافك ريدا ما حبيت
ولا غنيت غناوي الفرحه من تبيت
وقبل لقاك ماحسيت بطعم الدنيا .
من تبيت
ولبكره
ودعتكم الله ،،،

نزار حسن محمد

14-09-2014, 11:52 PM

رحله بين طيات السحاب
ارتحل عن بلاده منذ ..أعوام تجاوزت الخمسه وعشرين عاما وهو يتجول فى مطارات العالم .." وفى كل بلده سوالو بلاد "..كان يجلس وحده على درجةclass first ذات الكراسي الوثيره وبدأ يعيد شريط الذكريات ويتوقف عند كل ذكري ما زالت عالقه بذهنه ثم انتبه للمضيفه وهى تبتسم له وتساله إذا كان يريد شئ ..رفع رأسه ونظره لها طويلا وهو يتأمل وجهها الصبوح فقال لها أريد ورقه وقلم .
ابتسمت له وذهبت لاحضارها ..كانت الرحله طويله احضرت له الورقه والقلم وبدأ يكتب ثم تفاجأ بالمضيفه وهى تحضر له كوباً من القهوه وقالت له اري فيك ملامح انسان كان يعشق الكتابه فبتسم لها وشكرها على كوب القهوة ارتشفه سريعاً ثم واصل كتابته ..كان قد
كتب بعض الكلمات السودانيه العاميه " التبروقه ، البرش ، النطع ، المشلعيب ، المخلايه ، الخرتايه ، الترعه ، القنطره ، اب عشرين ، اب سته ، الانقايه ، التقنت ، القنقر ، الموليته ، الدباره ، الدموريه ، الفركه ، القرمصيص ، الربابه ، الضانقيل ، الاندايه ، القرقيبه المعراكه ، الصقيعه ،" فى هذه الاثناء طارت الورقه فى ممر الطائره وكانت المضيفه فى ذهابه وايابه فلتقطت الورقه وقالت له تسمح لى أن اقرأ ...لم تنتظر رده كانت شغوفه وبدات تقرأ فى تلك الكلمات وقالت له هذه الكلمات من العاميه السودانيه صاااح ولكنى لم اعرف اغلب معانيها ممكن تشرحها لى وواصلت حديثها وهى مبتسمه فرحله طويله طويله ومكتوب على وبمشيها فقال لها من اين عرفتى كلمات هذه الاغنيه فقالت له دى قصه يطول شرحها وبالمناسبة
انا اعرف عنكم الكثير ايها السودانيون .. وقالت له كانت اجمل ايام العمر عشتها مع زميل دراسه سودانى فى بلاد الضباب فقد علمنى الكثير المثير .. جلست المضيفه بالقرب منه كانت من لهجتها تنتمى لبلاد شمال افريقيا ..جميله ذات شعر اشقر وعيون خضراء ولها ابتسامه ساحره ..قالت له ما زالت اذكر زميلى كان من شمال السودان .. تعرفنا على بعض ونحن فى بدايه الدراسه الجامعيه ولكن لظروف تركت الجامعه وعملت فى هذه الخطوط إلى يومنا هذا ..
فكان يحكى لى عن قريته التى تطل على نهر النيل .. وعن عادات اهل بلادكم الجميله وما زالت اذكر قصته مع النخيل وكيف كانوا يحصدون البلح وما تبقى منه يصنعون منه المشروبات الروحيه لجلسات السمر مثل الكدي والكجمارو والشربوت والمريسه على ما اعتقد من قنقر العيش ..وبعرف برضوا الفركه والقرمصيص والخمره والدلكه قالت تلك الكلمات الاخيره ورددت انتم شعب عجيب تعشقون الحياه وتصنعون من الفسيخ شربات ..تمنيت ان اكون سودانيه ..ويكون لى منزل بالقرب من شلالات بلادكم
فما زلت اذكر كلمات زميلى عن نساءكم وهم يصحون مبكراً ويذهبون للمزارع وفى طريقهم يمرون على الشلال ليلتقطون تلك الأسماك التى تقفز طوعاً من مياه النيل لليابسه اتخيل منظر قراكم حيث الطبيعه الخلابه من شلالات الى اشجارالنخيل ومزارع الفواكه والمساحات الخضراء ..مافى اجمل من كده .
فى هذه الحظات اضيات أنوار ربط الحزام وذلك استعدادا للهبوط ..قالت له هذا رقمى ساكون لمدة 48 ساعه ياريت تتصل على نواصل الحديث .. وتشرح لى معانى تلك الكلمات ..
ابتسم ونظر لها وقال لها متنهداً..لقد ايغظتى فينى الشجن الاليم ..سوف اتصل عليك وامرنا لله ،،
وبكره نواااصل
ودعتكم الله،،،

نزار حسن محمد

15-09-2014, 12:44 AM

نزار حسن محمد

17-09-2014, 12:26 AM

وما زالت تمطر
سماء بلادى
تاتنى القطات مباشرة من ارض الوطن ورحمة ربي على العباد تتوالى تنزل عليهم وتفيض السحب امطارا غزيره وكثيره ..
ومهما حاولت ان اجد من تعبير عن حال الغربه الكربه .. لن اجد
شاهدته فيديو مباشرة وتذكرت رائعة الشاعره اسماء الجنيد وهى تقول وانا البتشابا فوق للغيمه تشفع لى كان الغيمه تختفنى وتحلق فوق ديارنا العامره تسرح بى ..بحس بالخطوة تبقي تقيله أريت التانيه ترجع بي.. الاقيك يمه الاقى الخاله الاقى العمه تقول لى ودعتك الله ودبطنى قريب ترجع تانى تضوي متل الضي..
تقف الام والاب والاخوان والاخوات يطلبه منك وضع رجلك اليمين على تراب ارض الوطن امام باب المنزل ويحمله التراب من تحت قدميك ثم يضعونه على الحائط تيمناً وتمنى بعودتك لهم سالم غانم وحليل امى.
دياركم انتو يا أهلى دياراً زين وبركات الطيبه كســـت دروبا حاره حاره وسكه سكه بى رجلى ..ورضيت بالغربه شان عزة حروفا غاليه على فوق احلامي تتواري وتقول لى يابا يانى راجياك تانى ترجع لى .
لاتوصف مرارة الغربه وما ذالت اذكر ذلك الموقف وانا فى بداية اغترابى ..خرجت ومعى ابن اختى الذىكان يبلغ من العمر ثلاث اعوام لكى اشتري له حلوه .. وفجاء توقفت امامى سياره ونزل منها شاب هندى فى العقد الثالث
من عمره هندامه انيق وقال لى بلهفه هل تسمح لى اسلم على ابنك ان لى ابن فى نفس عمرابنك قلت له تفضل فما كان منه الا وان جلس على الارض وحضن ابن اختى ودموعه اقترنت ثم شكرنى وهو متحشرج الصوت ..وعاد لسيارته وهو يرد ابنى فى مثل عمر ابنك لم يعطونى اجازه لكى اري ابنى وزوجتى واهلى ..ودموعه تعطيك احساس قساوة الغربه ومرارة حنضلها .
هناك فى الغربه يا اهلى بشوف الناس اجناس غريبه وتايهه فى احزانا طاويه الحى ..بشوف فى عيونا نظرات الودار ..مليون سؤال فى جوفي تكوينى وتخلف كى
نعم حتى القمر ..ما بتشبه قمر بلدى البيضوى الساحه ..وين الخضرة وين راحت لى.. وين خريفنا تنزل مويته تروي الخضراء تروي الحى..
ونحن السودانين من دون خلق الله ما ناس غربه لكن دى الاراده ونحن ما بنقدر نجابه المستحيل ..ويارمال حلتنا زولا كان بانسك ياحليلو
وحاتكم انتو يا هلى مافى احن من أهلى ..منو الغيركم بعرف البي ..طعم الغربه فى لسانى واصابعو تدور تاشر لي بسلم امري للايام ..واجيكم تانى شان بي شوفتكم اتعطر واكحل بيه ضى عينى .
وغريب والغربه اقسا نضال ،،
ودعتكم الله

نزار حسن محمد

17-09-2014, 11:49 PM

ياصديـق مالك مشغول بالك
قالوا لى الحب غير حــالك
التقيا بعد ردحاً من الزمان واتــي .. التقيا فى مرتع الصبا واتذكرو الايام الذاذ والمطره اب رزاز ..ولكنه ؟؟!! لاحظ لرفيق عمره مشغول البال
كان هائم وهو ينظر فى المجهول ولانه لايبوح بسره الا.. لرفيق عمره ..ولانه صاحب قلب مرهف تسللت دمعه من عينه وهو يقول لرفيقه اين هى الان لقد اشتقت لها.. والى روحها الحلوه ووجها الصبوح الى صرة حاجبيها الى ابتسامتها الى جديتها الى كل شى فيها ..
خرجت آها من دواخل رفيقه وقال له تعال ياخى واستغفر تعال نجلس على جدول ابوعشرين بتاعنا الزماااان ..داك واحكي لى عن تلك السعات الكهربائيه التى يحدثها الحب الاول فى كل البشر ..
جلسا على ذلك الجدول الذى كان مكمن البوح لديهم وهم فى مقتبل العمر ..
فقال لصديقه ..تعرف يا ابو الصحب لقد دارت بنا الايام ومضى بنا العمروشالتنا الدنيا مثل صفقه فى محيط هائج وخلنى احكى لك عن تباريح الهوي وهوج الرياح بعد فرقتنا بالسنوات تعرفت على عالم وعالم استطيع ان اكتب عنه مجلدات وما دام الموضوع عن الحب والغرام الاول فاسمع ما صادفنى ياصديقى العزيز فى مشوار هذا العمر الطويل القصير ...
بعد عودتى من دراستى الجامعيه وفى احدى ايام الخريف وانا عائد جديد لنج من بلاد الخواجات ذهبت لزيارة رفيق الدراسه فى اقصى شمال بلادى وكانت منطقة صديقى تقع على ضفاف النيل وفى احدى اليالى وقبل مغيب الشمس بقليل كان فى ذلك اليوم النيل صافى وبعضاً من شجرات النخيل ترسم ضلها على سطح المياه فى لوحة رائعه جلسنا على ضفافه نتسامر وكان الجو عجيب شاعري ..لم اتخيل بان اشاهد تلك الفتاه التى غصبن عنك تلفت نظرك ..ولطبيعة اهل المنطقه وصلة القرابه التى تربطهم بعضا ببعض حضرة الينا بكل ثقه وسلمت على كانت واثقه من نفسها ومن جمالها ومن ادبها وثقافتها التى تنم على انها بنت عز ... ولانها بنت عمدة المنطقه قالت لمضيفى جيب صاحبك وتعالوا اتعشوا معانا عشان ما يقول علينا ما اكرمنه..
وبالفعل ذهبنا لمنزلهم والذى تظهر عليه علامات الثراء واضحه جلسنا فى حديقة البيت وجاء والدها ووالدتها واخيها فهى كبيرة البيت وكانت دهشتى عندما شاهدته تلك الطفله وهى تنادى مضيفتنا با ماما ..فعلمت انها متزوجه وجايه اجازه بس لعرس اخوها حضرة وجايه من بلاد بره..جلست بالقرب منى وبدانا فى الونسه وكان صوت وردى ياتينا من على البعد وهو يردد اغنية اول غرام يا اجمل هديه انتبهت لى وانا اتابع كلمات وردى وقالت وهى ضاحكه تعلمنا الدرس ياسى وردى .. وسالتنى هل تؤمن بالحب الاول قلت لها والله الناس كلها بتقول الغرام الاول ده ما بتنسيى قاطعتنى سريعا وقالت لى كنا كلنا قايلين كده لكن اتضح لى انه وهم كبير ... قلت لها كيف ..وهنا استعدلت فى جلستها وقالت لى شوف ياسيدى وكما تراه فانا من اسرة ميسورة الحال عندما التحقت بجامعة الخرطوم وبعد مرور العام الاول تعلق قلبى باحد الزملاء وكان هذا غرامى الاول وتتطور الامر بيننا الى ان جاء لخطبتى ونحن مازلنا طلبه وكان من اسرة تقدر تقول عليها فقيره ..جلس مع والدى ولان والدى رجل متعلم ومثقف فقد استمع له بكل وعى متفتح وتناقشا بمنتهى العقلانيه وخرج بالخلاصه التاليه اين سنعيش بعد الزوج فى الشارع وتدخلت مدافعه عن حبى ولكن كان راي والدى منطقى وخرج خطيبى وهو مقتنع براي والدى وللاسف لم يصمت كثيرا فى الدفاع عن حبنا ذهب بعد ذلك تخرجنا
من الجامعه وقلبى يحن اليه الا ان جاء زوجى الحالى وكان لا ينقصه شى لكى ارفضه فهو صاحب تخصص نادر ومثقف ثقافه عاليه ومنفتح وتزوجت منه وسافرت معه لاروبا حيث مكان عمله ..لا اكذب عليك برغم كل السعاده التى عيشنى فيها زوجى ولكن كنت فى بعض الاحيان احن لى غرامي الاول وكان هذا الحنين يترك اثرة سلبى فينى ولن زوجى كان متعلم لم يناقشنى فى ايام حزنى هذه عن السبب الا انا جاء يوم واطريت للرجوع للسودان وبعد وصولى
ذهبت لمكاتب وزارة الخارجيه لتوثيق شهادتى فقالوا لى اذهبى لذلك المكتب فنظرت اتجاه المكتب فاذا بى اشاهده لحما ودما ..تصرفت سريعا وغطيت وجهى وتبلمت وجدته بعض المراجعين امامى فجلست انتظر دوري ..وفجاء سمعته يصرخ فى وجه المراجع الواقف امامه بان مواعيد الفطور جات انتظر لمن افطر
وهنا بدات اتامل غرامى الاول ..اولا شكله العام يوحى اليك بانه شماسي كيس التمباك امام الطاوله بعض من زراير القميص مقطوعه شعره غير مهذب وجاء صحن الفطور واذا بى اراء حيوان وليس انسان طريقه الاكل العشوائيه وذلك الصوت الذى يصدره من فحل البصل الذى وضعه امامه ...شاهدته كل هذا وانا غير مصدقه هل هذا هو غرامى الاول ...هل هذا عندما احن اليه يتعكر مزاجى بالاسبوع ..المهم جاء دوري ..اتخيل حتى صورتى واسمي لم ينتبه لهم طالبنى مباشرة بالرسوم وعندما اخرجته له وضع الختم على الشهاده وقال لى مافى فكه اصلكم انتو المغتربين ما محتاجين للباقى ..لم افتح خشمى بكلمه اخذت شهادتى وخرجت وانا افكر فى زوجى الذى كان يتحمل انفعالتى من اجل غرامى الاول
ومنذا تلك الحظه عرفت بان الغرام الاول هو اكبر وهم نعيشه .. ثم صمتت محدثتى وقالت هذه تجربتى الشخصيه احتمال اكون ظلمت معنى الغرام الاول لك ولكن هذه تجربتى الشخصيه ومنذا ذلك الوقت اصبح زوجى هو تاج راسي ... وذاد حبى له
لا اكذب عليك ياصديقى وجدته قصتها منطقيه ومنذا ذلك اليوم وانا بين نارين..لكن سبحان الله لمن اسمع وردى يردد اجمل غرام يا اجمل هديه انفعل مع الكلمات واهتز ثم عند انتهاء الاغنيه اتذكر قصة بنت العز و ام عيالى ورفيقة دربى
قوم ياخى بالله اشتقت لروحه الحلوه بلا لمه معاك ... ضحك رفيق دربى ثم قال لى يالى ظلمته الحب قلت عليه ايه..مش عارف ايه ..
ودعتكم الله ،،،

نزار حسن محمد

18-09-2014, 12:42 AM

محطات اخر الاسبوع
وو..وطنااا
واى لحظه بعيده عنك
ضايعه من ايام زمانى
مدخل :-
• برنامج حتى تكتمل الصوره ..الذى يقدمه الاستاذ الطاهر حسن التوم كانت الحلقه عن السياسات الاقتصاديه وتاثيرها على الواقع المعيشى للمواطنين ... بتاريخ 15/9/2014 ..يشهد الله خجلت عددديل للمسئول الاقتصادى بتاع المؤتمر الوطنى . ادوها على راسه لمن بقى ما عارف اودى وشه وين .. واكثر ما عجبنى فى هذه الحلقه ذلك الاستطلاع وتلك المراه المسنه التى قالت للمذيع ياولدى نحن بس بنقول الحمدالله ..لكن تانى مافى شى بتقال ..لخصت الحلقه فى كلمتين وبس ..
* لم تتوقف الامطار هذا الاسبوع عن الوطن وجعلت الطقس جميل ولكن لايكتمل الحلو.. قطوعات الكهرباء والماء امتدت باليومين وتلاته ..
وعااادي
• اكثر ما اضحكنى وابكانى هذا الاسبوع سؤال سعادة الرئيس عن احد اقربه وقالوا ليه اغترب بدولة قطر قال والله احسن حاجه عمل لانه البلد دى ذاته ماشى لوين ما معروف ؟؟؟!!!
• نترحم على الطالب الذى توفى بالخطاء اثناء مطاردة الشرطه لاحد المواطنين الذى اعتداء على احد الضباط ..ونتمى الشفاء للطالبه التى اصيبت ايضا بالخطاء فى عنقها اثناء المطارده ..غايتوا شويه كده وبنحصل تكساس
• لاتوجد اى رقابه على المنتجات السودانيه ونقول ليه السرطان انتشر بهذا الشكل فجعت لمشاهدة ذلك الفيديو والذى تم فيه القبض على مصنع عشوائي لتصنيع زيت الطعام .. اما لحم الحمير والكلاب مافوقه شى على حسب كلام وزير الصحه !!؟؟وهى الله لاللسلطه ولا للجاه .
• نـــداء لاهل بركات ..عيد الاضحى على الابواب والكل يعلم الحال
نريد تكاتف الجميع لانسعد الاسر المتعففه والمحتاجين فهل لا تضامنا من اجلهم ياكنزي وياصلاح وياسامى ويا حسام ويا اهل الحاره ها قد جاء دوركم وانا على ثقه الكل رهن اشارتكم فى وضع اليه المساعده
• وصية ام لابنها باللهجه السودانيه ..الجايه من الله بتكون ..مافى زول بقدر يمنعا ،..واقسامنا قبال نتخلق.. رب الخلايق وزعا ..، والربو كاتب لى الضرر.. من وين يلاقى المنفعه..، سلم امورك للاله.. وبين ايدى روحك اودعا..، واوعاك تغرك دنيتك .. وتقوم نخرتك ترفعا..، شان نعمتك زرعا الكريم.. وفى لمحا ممكن يقلعا ..، تاج التواضع مالو زي.. خليك راضى وقانعا ..، ازرع جميلك بنفعك.. يوم الخلايق تجمعا..، ادى الفروض فى وكتها .. واوعاك تاخرا تجمعا ..، واتوضا كل مانادى نول.. فضل الصلاة الجامعه..، واوعاك تظلم للضعيف..، بدعيك وعينو مدمعا.. ودعواتو توصل دون حجاب ..، رب الخلق ما برجعا.. طبق شرايع دين نبيك.. اوعاك تفارق شارعا ..، واحرص تبر بي والديك ..،يوم كلمتم لا ترجعا ..،ودعى الاله يوم ارحمنا من باب رحمته الواسعه ..شان بكره تلقى جناك بار وزيك كلمتك يسمعا ..اوعاك تكشر خلقتك ..اضحك صدقتك وزعا ..،هى الدنيا زاتا قدر شنو ..شان فى زعلنا نضيعا ..، وطول ماك عايش وفيك نفس ..دايراك تحفظ اربعا ..لاتشيل جواك من اى زول .. نوم قلبك ابيض ناصعا ..القلتو ليك كلام كبير..دايراك تطبقو بى وعا ..وابقى الختام خير الانام .. خاتم النبيين اجمعا ..صلى عليه وزيد صلاه ..ملء الوطا وحد السماء السابعه .
وكل خميس وانتم بالف خير
ودعتكم الله

مصطفى هاتريك

19-09-2014, 03:13 AM

الجميل في هذا البوست يا نزار أنك تنداح بتلقائية و تكتب بعفوية احساسك الذي أعرف

وفق لغة لا ينقصها الادب و لا جمال التعابير

شكرا

مصطفى هاتريك

19-09-2014, 03:16 AM

انعكس اثار الاقتصاد السودانى على حواء السودان فاصبح الجمال عملة نادره

بعد النجمات و الكريمات و مراكز التجميل دي كلها ؟؟؟؟

نزار حسن محمد

21-09-2014, 12:41 AM

وابتداء المشوار
ايام قليله تفصلنا عن المشهد المحبب لكل امة محمد وهم وقوف على صعيد جبل عرفات فهنئياً لمن كتب الله له حج هذا العام.
وكل عام وامة نبينا محمد "ص" بالف خير وصحه وعافيه..
وحجه امنه اتصبري شايف الوجع فى جوف شديد ..نصدر خرافنا لجميع الدول الاسلاميه وغيرها واهل الجلد والراس لايستطيعون ان يضحوا ..!!!
وفرقة الانقاذ الماسيه ..يحللون الضفادع ..واصبح لحم الحمير والكلاب على قفه من يشيل ..ودقى يامزيكه
ود الغرب واخوي ادروب
شعباً صبح مغلوب
لحم الفقير مسلوب
ومال البلد منهوب
كيزان ولاد مركوب
صفحاتكم ملانه ذنوب
وشيخكم كمان معيوب
نرجمكم يمين بالطوب
وراجيكم الحى ووب
وسنين وراها سنين
شعاراتكم باسم الدين
غرقتو البلد فى الدين
وغتست كمان فى الطين
غشيتونا غشاً شين
قرشنا راحت وين
فى ماليزيا ام فى الصين
مابتخجلو ومن الله ما خايفين
يوم داك حسابكم شين ..
***
استوقفنى مقال للكاتب السعودي د/ عبد الله الدويس يتعجب من الفارق بين السعوديه والسويد يقول:-
رغم أن فى السعوديه وعظ وارشاد وخطب وقران وتفسير وتوحيد وفقه وسيرة ومئآت المساجد وعشرات الآف من الوعاظ وكل هذا غير موجود فى السويد! ومع هذا تتصدر السويد قائمة دول العالم فى الشفافية بينما السعوديه تقبع فى ذيل القائمة! فرسول الرحمه صلى الله عليه وسلم أوصى أصحابه بالهجرة إلى الحبشه وقال : إن فيها ملك لايظلم عنده احد ..لم يكن فى بلاد الحبشه قرآن يتلى ولا خطب تقرأ ومع هذا عم العدل والخير فى أرضهم .. لم تكن مشكلة المسلمين فى نقص خطب أو تلاوة قران أو تدريس حديث بقدر ماهو التعامل بالعدل والانصاف .
فالقاضى – الذي عينه على بن أبي طالب رضى عنه – حكم ليهودى بدرع على عندما لم يستطع على إثبات ملكية الدرع !! إن الله ليبقى دولة العدل وان كانت كافرة.. وينهى الدولة الظالمة وان كانت مسلمه ..ان الخطب والقران والسيرة والحديث ان لم تنعكس سلوكا فى التعامل مع الضعفاء والمساكين واعطاؤهم حقهم حتى وان لم يسالوه- فاقرأ على مناهجك السلام . فى السويد لا يعامل الانسان على اساس
جنسيته ، بل على اساس ادميته ..فى السويد يقرع باب بيتك فى الصباح الباكر بزجاجة حليب طازج لطفلك الذى لا يحمل الجنسيه السويديه
كل مافى الأمر انه بشر ويحتاج الى حليب طازج كما يحتاجه الطفل السويدي
وفى بلادنا لايقرع باب المقيم الا الجوازات لترحيله او تفتيشه ..فى السويد تحصل على اقامة دائمه بعد المكوث 4 سنوات متواصلة وفى بلدنا يجدد المقيم اقامته ولو مكث الف سنة مما تعدون ..فى السويد يحصل المقيم على الجنسية ان حفظ تاريخ السويد وعاش فيها 6 سنوات متواصلة ..وفى بلدنا ينتظر المقيم 6 سنوات للحصول على اذن لزواج مواطنة ولا يمنح الجنسيه حتى وان حفظ القران والانجيل والزبور وتاريخ الجزيرة العربية من هبوط ادم علية السلام حتى العام 2014 م السويد يتعاملون بالاسلام رغم كفرهم وفى بلاد المسلمين نتعامل بمنهج الكفر رغم انا مسلمون !!
فى السويد لاتجد كفيلا سويدياً يبتز مقيماً لم ينبت شاربة ،ليقول لك إسكت ولا وربي اسفرك .. فى السويد لن تجد خادمة تعمل لمدة 24 ساعة فى اليوم و7 ايام فى الاسبوع ! علم اولادك ان البنغالي الذى ينظف شارعكم فى كل صباح هو اخوك فى الاسلام بل قد يكون افضل منك عند الله ..علم اولادك ان من يصلح لك ثوبك ويخبز لك خبزك ويطهو طعامك هو بشر مثلك له مشاعر وكرامة وما أتى به هنا إلا طلب الرزق الحلال .
هذا الأمر ينطبق على كل دول الخليج بلا استثناء ..
التجلاء والانحناء للدكتور عبد الله الدويس..
ياريت حكام العرب يفهمون هذا الدرس ..
ولبكره
ودعتكم الله ،،،

نزار حسن محمد

21-09-2014, 12:52 AM

انعكس اثار الاقتصاد السودانى على حواء السودان فاصبح الجمال عملة نادره

بعد النجمات و الكريمات و مراكز التجميل دي كلها ؟؟؟؟

جميل الدواخل الغالي هاترك
تعرف يادرش ..وانت واحد عشتا معانا ايام الزمن الجميل
وكيف كانت بت بلدي ..جمال ما عادى فى البيت وفى الشارع
وفى المسرح ..
لكن لمن الاقتصاد الخربان ادخل البيوت يهرب الجمال من الشباك
انشاء الله نتلاقى فى عيد الضحيه ونكمل الحديث
لك الود يا راقى

نزار حسن محمد

22-09-2014, 12:29 AM

اغنية قصتنا
الزمان: عام1978 بركات فريق الافنديه
المكان : شجرة تطل على غرفتى
تعودنا ان نجلس عليها ومعى شباب الحى ..
يتجمع شباب الحى ايام الاجازه و كنا نجلس نتسامر ونتمعن فى كلمات اغانى العملاقه وكان فى ذلك الزمان هناك تنافس حقيقى بين الفنانين مثلا تجد العندليب زيدان ومنافسه ابوعركى البخيت ومحمد الامين ومنافسه محمد وردى
وترباس ومنافسه عبد الوهاب الصادق ..الخ وكانت شرائط الكاسيت هى الوسيله الوحيده للا نتشار بين الفنانين وكان وبرنامج ما يطلبه المستمعين عبر اذاعة ام درمان .. يجرى منافسه لاجمل اغنيه والتى فازت به اغنية العملاق ابن ود النعيم محمد الامين بتتعلم من الايام اكثر من مره
كاتب كلمات تلك الاغنيه الشاعر المرهف حسين بازرعة ادئها العملاق عثمان حسين واخذت منا ما اخذت وهى اغنية قصتنا
كان كل ما انتهت اعدنا تشغيلها ونتامل فى تلك الكلمات الصادقه
بالمعزة بالمودة البينا
بي أغلى الصلات
بالهوى العشناه بأعصابنا خمسة سنين ومات
بالعذاب الشفته والسر الكتمته وباقي الطيبات
استحلفك أترك سبيلي وسيبني وحدي أقاسي وأبكي مر الذكريات
أنا بحناني الغالي خصيتك وحبيتك بكل جوارحي وعواطفي العميقة
أنا شلت من أجلك هموم الدنيا ..قاسيت من جراحها وكل ضيقها
لسعادتك إنت كم ضحيت وإتغربت ما خليت طريقة
وفي مسيري المضني من أجل الحقيقة
كل طائر مرتحل عبر البحر قاصد الأهل حملته أشواقي الدفيقة
ليك ياحبيبي للوطن لترابه لشطآنه للدار الوريقة
لكن حنانك لي أو حتي مشاعرك نحوي ما كانت حقيقة
كانت وهم ... كانت دموع
مسفوحة بي أحرف أنيقة
ما بإيدي لو ضباب الغيرة أعماني وزيف لي الحقيقة

إنت نبع حناني إنت كياني
إنت الدنيا بهجتها وشروقها
وإن حصل زلت خطايا معاك أو ضلت طريقها
هل تصدق تنـتهي قصتنا يا أجمل حقيقة
نحن عشناها بدموعنا وبالضنى في كل دقيقة
ياحبيبي لم تزل قصتنا قصة حب أقوى من الحقيقة
***
وما زالت قصتنا قصة حب أقوى من الحقيقة
نعم هكذا نشاءنا وهكذا كنا وهكذا ما زالنا
الان بنسمع فى حرااامي القلوب تلب،،،
ودعتكم الله،،،

نزار حسن محمد

22-09-2014, 01:00 AM

أغنية
عشق في بركات
***
مهدية من زمن المسيح
لي مسلمين عهد النبي
شفخانة ترعة ومئذنة
... وحواشة للحلم الصبي
بركات تجينا مع المنام
ترسم شدر ... ترسم بيوت
ووليد صغير سموهو كان "جار النبي"
من عن حدود فلاتة لي نقطة عساكرك
... تهربي
وتنادي من زيداب الى النمرة الورا
وتغني لقاطة القطن
نقارة مردوم تطربي
بقارة لامن تحلبي
وتنادي حي على الصلاة
و"أُمحمّد أحمد" يئمنا
والتاني جاي من الشرق
سموه "اسماعين" تعب
ضهرو انحنى
لكنو لسه بئمنا
ويدعولنا تنصلح البلد
نطامنا ....
و"الكامل" اب شعرا عديل
يملانا ضحكة وقرقراب
شيخ "العجب" درس العشا
"عثمان قطم" زاد إنتشاء
"طمبل" حريف
للكورة دنقر وشوشا
"مروان" كما زيدان يجيك
"كحلاوي" "خوفو" ودردشة
"شلبي" الرحيل بدري السفر
يا زول جميل يا فرفشة
وصوت المغنين الهناك
بركات قبيلة وقبلة وين
زيك يكون يا منعشة
يا زاكرة في جوف الدجى
"غميد" و"منويشي" و"جمال"
ومهذبة الروح يا غمام
ما ضر حين عاشقك سجى
وأنا جدي زاتو اتوسدك
وأمي الجميلة كما الوحي
طلبت ثراك
رغم الصياصي الموحشة
عم "نوح" يجيني رهاب رهاب
و"الست" و"فاطنة العيش" قراب
"فريال" "غناوة" و"ستنا"
و"عزيزة" بت "احمد عواض"
سر التجار وابوالمكارم عارشا
"الباشا" "أبعون" و"النقر"
شن القبايل يا ولد
جارك أخوك
عم "صبحي" يا سمح الولف
و"دبورة" يا سمح الوصف
ونخيلنا يا سمح الشموخ
"العاقب" اب طبعا جميل
يا ترزي سمح الزي أجيك
شايلني شوق واحدثك
وجعة قليبي الما عرف
غير قصتك يا محترف
بركات حكاية انصهار
لي كم بلد
وكمين قبيلة حواها دار
لي كم حقب
لموها في نومة مقيل
أو عز نهار
واتشتت بين الخلوق
شايلة المحبة هوى وبهار
بركات بحبك يا بلد
وصبية مالياني انبهار
بركات اجيك
في المدرسة
و"أحمد حسن" يديني درسك يا بلد
بركات أجيك في ملعبك
"فوزي" و"حسن" خواجة جد
بركات أجيك في مسجدك
في نمرتك
سكة الحديد
في قريتك
أنا التقيك
"سيد احمد" المشتل أنيق
زي رقتك
ومرتبة ومنظمة
زمن "الرشيد" عم "بلة" أو
"عبدالرحيم"
يا حليل غناك
مركز شبابك وصالتك
رابطة شبابك وحالتك
طاحونتك
شفخانتك
يا حليل بريدك وبوسطتك
زمن اللقد ..يا صنتك
طرماج يجيب خبر البعيد
وزّان قطن محلج نضيف
زي سمعتك
مين استباحك يا بلد
ارهق حواسك بالنزيف
بنده عليك أنا برتجيك
ناوليني
ايدك وجتتك

كلمات : سامر حسن محمد

نزار حسن محمد

23-09-2014, 12:58 AM

الم ياتى الاوان لتنجب لنا حواء السودانيه
ما نديلا السودان

نزار حسن محمد

29-09-2014, 11:57 PM

كيف كنا ..ويـن بقينا
وبى اى حالاً عدته ياعيد ..
تمتلى شوارع بركات بانواع مختلفه من الخراف ..وتشهد من اشتري الاضحيه وهو يربط اضحيته ويضعها فى السياره .. ثم تتوقف احدى لواري النيسان التابعه لقسم الترحيلات وتشاهد عدديه من عمال وموظفي المشروع وهم فى طريقهم لقري الجزيره حيث اسعار الخراف بسعر قليل ..وهناك من تجده فى طريقه للكريبه حيث السوق المركزى الرئيسي للماشيه ..
وعند المغرب تتحول اجواء بركات لرمضان مصغر نسبة لصيام اهلها يــوم الوقوف بعرفه ثم تبداء المرحله الثانيه من استعدادات العيد تشاهد الكل بالسوق لشراء بعض مستلزمات البيوت وتكون المحطه الاخيره سوق الخضار ... ويصبح الحديث عن اشهر وامهر صانعات الشربوت" و الكل فى قبطه وسعاده .
لاتهداء الحركه فى شوارع بركات لوقت متاخر من يوم الوقفه .. وتشاهد عمال الكهرباء وهم ينيرون كل الطرق بتلك الانوار البيضاء القمريه والصفراء القمردنيه ويلبس المسجد العتيق احلى حله تشاهد تلك القصاصات الملونه وتلك الرايات الضخمه قد وضعت فى مقدمة المسجد ذلك بعد ان يكون قسم الهندسه المدنيه قد رتب مكان صلاة العيد وتم فرشه بالرمال البيضاء.. ورشه بالمياه وتم تسوية المكان ..
ومع ساعات الصباح الباكر تشاهد جموع المصلين من اهل بركات وهم يرتدون الجلاليب البيضاء والعمامه الناصعة البياض وبعضهم يرتدى ملابس مزركشه والكل يسير اتجاه المسجد العتيق ..ويكون فى استقبالهم الوالد الباشا عليه رحمة الله وهو واقف بقفطانه المزركش وامامه العارف بالله مولانا محمد احمد عليه الرحمه
ويبداء التكبير والتهليل.. بعد اداء الصلاة والخطبه .. تشاهد جموع المصلين وهم يتبادلون التهانى وتبداء ثم تتحول جولات التهانى للمنازل ويصبح الجزار عملة نادره الكل يبحث عن الجزار وتتحول اجواء بركات لرحلة شواء .
هكذا كان الـعيد فى بركات وكل مدن بلادي ..ام الان فقد انطفاء ذلك البريق وتلك الفرحه ..اصبحت بركات حزينه ظلام دامس فى كل الطرق اوساخ فى كل الشوارع ..كابه ..هـم ..مرض .. معاناه ..وكل العيون تنظر للسماء ولاتسمع غير حسبنا الله ونـعم الوكيل .
وبرغم الحاصل والبحصل يوماتى تظل بركات واهل بركات داخل الفؤاد والحنايا
ارادو اولاد الهرمه ان يقتلو بركات ..كما فعل اخوة سيدنا يوسف فلم يمت وهكذا ستظل بركات ثم ارادو أن يمحى اثره فارتفع شانه ثم بيع مملوكا فاصبح ملكا ثم ارادو ان يمحو محبته من قلب ابيه فازدادت فلا تقلق من تدابير البشر فارادة الله فوق اردة الكل .. وهذا ايمانه وسوف يعود لك مجدك يا بــــــركــــات
وعدت ياعيدى بدون زهور
وين قمرنا وين البدور غابو
عــنى...
كــل سنه وانتم بالف خير وسعاده
ودعتكم الله ،،،

نزار حسن محمد

01-10-2014, 12:52 AM

صوره من الماضى..
سوق بركات...
اعلنت اشارة ضبط الوقت من اثير اذاعة ام درمان الساعة العاشره
وبعد نشرة العاشره صباحاً تسمع صوت الحاج عبدالله احمد عواض وهو يصيح ياوووولد جيب الضمنه خلنى ادى لك حاج الرباع وعمك عبد الوهاب سالم وحــده عفنه " صايمه " وخليهم اسوه الشاي من جوه ثم تسمع صوت عبد الوهاب سالم وهو يزيد فى ارتفاع وتيرة المنافسه هوووى ياود كدباس العب شديد مع الحلفاوي ده وخلى على الدنقلاوي محمد سعيد انا برقد به الواطه.. وتشاهد عمك جباره يضحك فى صمت .. يجلس كمراقب عام الحاج عبيد المبارك وهو فى كامل حليته بالجلباب الابيض والعمامه وهو يبتسم ..
ويبداء رواد السوق فى التجمع والتجمهر حول طاولة كبار اشهر تجار بركات ... يكسر انفعال اللعيبه حضور .. النور كنكش من فلاته وهو وفل تنك " مرسديس" وتسمعه يصيح ارقد يا عيش.. رقد فليلك وينفجر الجميع ضاحكاً .. وتكتمل المسرحيه بحضور رفيق دربه محمود الزوز ..ويبداء الحاج عبيد فى توبيخ النور ومحمود الله يهديكم من السجم ده ..وهم فى عالم اخر ولكن بما تبقى لهم من تركيز ..يسمعون فى تأدب واحترام .. ولكن لا يستمر لفتره طويله وتسمع تعليق من احدهم لينفجر السوق ضاحكا بما فيم الحاج عبيد احمد المبارك ...يستمر ..التجمع فى ازدياد ..ثم تشاهد على محمد صديق وهو قادم من سقالة السوق ويحمل جريدة الجزيره فى يده اليسره ويبدأ نقاش من شكل اخر يضم مساعد حمد خالد والسر ابوشوك ومبارك سعد والانسان الخلوق عثمان عبد اللطيف ويكون النقاش عن الهلال والمريخ وفى زاويه اخري من شجرة البخ .. تشاهد مجموعة اخرى قد انزوت ما بين الدكان تضم الرشيد طمبل ومعاويه عبد اللطيف ومبارك يوسف وعادل امين وهذه المجموعه متخصصه فى مكاواة عبد الغفار عواض ... ومشاكسة نورالدين طراوه..
وهناك على شجرة البخ الاخري حيث تجلس الحجه نفو والحجه ام الحسن ومن خلفهم محمد القصير وعثمان طمبل ويوسف دبيبه لتبداء المسرحيه فى قمة اثارتها فى التناوش والسخريه والضحكات التى تنبع من دواخل اهل بركات النقيه..
ويتواصل المشهد بظهور حلاقى سوق بركات عمك ابكر وولده التجاني ذهابا واياباً ما بين دكان الحلاقه وشجرة البخ وهم على تواصل مع بشير حسونه والذى يفضل الجلوس فى ذلك العنقرب الذى يتوسط محله ..
ومن مقدمة السوق تسمع تعليقات ابن دار ام بلال التجانى الشريف وجارة الترزى ابــــا وتكتمل اللوحة بظهور الخليفه جمال عبد الغنى وهو يحمل مسباحه الطويل ويشارك الناس بالابتسامه وهو يتمتم بذكر الله والحمدالله وسبحان الله ..
وعند الساعه الواحده يبداء الرواد بالمغادره والضحكه لا تفارقهم ..على ان يبداء الفاصل الثانى من يوم سوق بركات بعد الثالثه ظهراً
وبكره نواااصل
ودعتكم الله،،،

نزار حسن محمد

16-10-2014, 12:41 AM

حبايبى واهلى
كل عام وانتم بالف خير وعيدو مبارا علينا عليكم كل سنة تيبين تيبين ..
والشوق ..بحر كبار وصغار.. شياب وشباب
وصلت فجر اليوم الامارات ومازالت رائحة الاحباب والوطن فى مسماتي
وجيناكم ياحبايبنا ..
ورجع الصدى وعاد لى حكايات وردداه ..وكانت ملاذى وملهمتى بركات واهل بركات محور اجازتي ..التقيت بعدد كبير من اهل بركات فى الجزيره والعاصمه وتسامرنا ورجعنا شرئط الذكريات وامتلت الذاكره ..ومراسلكم ابكرووونه ..بــداء
*امتدت اجازتى غصبن عنى لانى لم استطيع ان اختم الخروج "المغادره "وكل مكاتب المغتربين فى الولايات غير مربوطه مع المكتب الرئيسي بالعاصمه واجازة العيد ليوم الاحد الدوام وكان مفروض ارجع من يوم الجمعه!!!
وعاش الملك اريد الملك ..وعادى ذى الذبادي ..واللهم اجعله خير
*برغم اننا فى منتصف اكتوبر ..ولكن مازالت السحب فى سماء بلادي تذمجر رعدا وبرقا وامطار يتخلالها.. قوس قزح فتنتشى الروح وتمتلئ الريه برائحة الاديم ..
ولانى ما زلت مرهق من تعب السفر ..لكن نقول ابتدينا ..
جيناكم يا حبايبنا ..
بعد غربة وشوق
نغالب فيو ويغالبنا
ونكتوم آه .. تظهر آه ..
تتعبنا
حنين لشوفت الغاليين..
يدوبنا ..
هناك غربتنا ما هنتنا ..
ياحلوين
هناك الهم بدل واحد ابين ..
همين
ومهما قلوبنا تتأوه وتتأوه ..
سنين وسنين
مصيرو الحي يلاقي ..
احبتوا ..
سماع أهلن من الأحباب ..
شروق آمال
ووصف البهجة بالكلمات ..
محال اتقال
حلاوة العودة غنيناها في ..
موال
بحكي عن الولف ..
اصلو الولف كتال
ولبكره
ودعتكم الله

نزار حسن محمد

18-10-2014, 02:36 AM

ودارت الايام
حليل زمااان
وايام زماااان
تجد داخل البوست ..ود الماحى ود الماذون والخواجه والادمن و114 ومدنيه ..واميمه عشريه وبت ملوك النيل ..وزل فرده والعقد الفريد
مخير الله

نزار حسن محمد

21-10-2014, 12:20 AM

طالت المده ياحبيب الروح
وانا فى غـــربه ....
والظروف صعبه.
وربنا يهون..
يتنازعه الشوق والحنين وهو جالس على بلكونة شقته ينظر لتلك الانوار الاتيه من السفن البحريه ..احضر قهوته واشعل سجارته وكان سكون الليل ينشر مظله ومع نسمات البحر ودخان السجاره تخيل له بان هذا الدخان هو دخان علاء الدين والمصباح السحري نظر لمقدمة الدخان وفى هذه اللحظه رن جرس هاتفه فكان الصوت من الطرف الاخر يقول له مساء الخير على الناس الهائمه فى ملكوت الله ..عرف صاحبة الصوت ..
والتى كان يلقبها بذات الشامه
صمت للحظات ..
وقال لها: يابنت العشرين والايام مغبلتاً ما ذا تريدين من موعيد خمسيني
ضحكت وقالت له : اتبخل على بمعرفتك وخبرتك للحياه ..
قال لها : انتوا جيل غير جيلى انا
قلت له : لاتؤمن بمقولة تواصل الاجيال
قل لها : بلى ..بس انتوا وصلته لحرامي القلوب تلب
ونحن انتهينا : بى جميله ومستحيله وذات الشجون
قلت له : لذلك نريد ان نتعلم من الايام
قال لها : طيب حبه ..حبه على يامرسي وامرنا لله ،،
ثم ختم المحادثه على وعد ان يتواصل بينهم الحديث
انتهت المحادثه ورجع لسكون الليل واشتغل المومري ..تذكر تلك الليله وهو جالس على قطار الشرق ..ذلك القطار عابر الدول كان يطالع من شباك غرفته على تلك الطبيعه الخلابه وتلك الخضره وذلك الجمال الربانى وفجاء دق باب غرفته قام بفتح الباب واذا به يجد تلك المراه البدينه وهى المسئوله عن كل شى بداً من تذاكر الركاب انتهاء بنظافة كل الغرف .
قالت له : متاسفه للزعاج ولكنى اريد ان طلب منك خدمه ..
قال لها : اتفضلي
قالت : الغرفه على العربه الثانيه من القطار غرفه جماعيه وتوجد فتاه تجلس فى غرفه بها مجموعه من الشباب يتحدثون للغه لانعرفها ويعكسون تلك الفتاه وانت تجيد لغتنا اتمنى ان تجلس معك تلك الفتاه حتى اجد لها حلاً ..لو سمحت
قال لها : مافى مشكله يمكن ان تحضريها ..
وفجاء: نطق بالشهادتين عندما شاع نور رب الجمال فى الغرفه ذلك الجمال الفريد ردد متمتماً بشطر قصيدة ابوالقاسم الشابي كل شئ موقعاً فيك حتى.. لفتت الجيد واهتزاز النهودي ..
جلست على استحياء وادب ..قدم لها بعض من الفواكهة ثم قال لها ضاحكاً الان انت سيدة الغرفه لذلك يجب ان تتصرفى براحتك نظرة اليه مطولا وقالت له اشكرك على اضيفتك لى وعلى كرمك واخلاقك فانت تختلف تماما عن تلك المجموعه الذى فرضها على قدري ..
وبعد مرور ساعه من الحوار كان الجو قد اختلف داخل تلك الغرفه والقطار يتهاده بين تلك السهول والجبال والوديان ..اصبحت اللفه والحديث المتواصل مع اصوات تلك الانغام التى تصدر من تلك الميكرفونات الموجوده داخل الغرفه فحكى لها عن مدينة البندقيه وعن كيلو باترا وعن قيس بن الملوح ..واستمرة السهره وهى تشكره بين اللحظه واللحظه على تلك الاستضافه التى لن تنساها طول العمر وتحدث عن كل شى فى ثقافه الشعوب وعاداتهم وتقاليدهم وكانت محطتها قد اقتربت فاخرجت ورقه وقلم وسجلت له رقم هاتفها على امل ان يتواصل معها ..ثم فجاء وقفت وقالت له دقائق وسوف اعود رجعت اليه وقالت له بصوت واثق تماما... انا ......
غدا نواااصل
ودعتكم الله ،،،

أبا إيثار

21-10-2014, 09:51 AM

والله لوقلت ليك يازول ياوريف كل يوم بجي أتاوق
وأقرأ حد الشرقة وبطلع وأنا مبسوط حد الكيف ,,
أها المشكلة بتغلبني الكتابة لأني بكون مستف
شوق لشخصياتك البتشبه ناسى وصور الشارع
والزقاقات وطعم الإلفة والشوق وريحة السوق ,,

يااااااه ماأجملك وأنت تملانا بهذه الإبتسامات الألق
وتعيد فينا ريحة الطين وطعم الإلفة وعيشة اللمة .

شكراً نزار لبركاتياتك والتي هي سوداننا المصغّر والجميل .

يمتعك ربي بالصحة والعافية .

نزار حسن محمد

22-10-2014, 12:57 AM

نزار حسن محمد

22-10-2014, 01:00 AM

لا تســــــلنى
كيف مضت بينا الايام وانت قريب بعيد عنى ..لا تسلنى ..فقد بتنا ليالينا حطامه .." التقيأ بعد فراق .. ثم افترقا "
*الشتاء يدق الابواب ويعلن عن مقدمه ويدخل التقويم الشتوي ..وما اصعب لحظات بين اليقظه والاستيقاظ مبكراً ومشوار دوامة الحياة اليوماتي ..
تسعد جميع الخلوق التى تقع على خط الاستواء بعد فصل الخريف بفصل الشتاء برغم قساوة البرد الجاف..ولكنهم عنما يتذكرون هجير الصيف يستمتعون بفصل الشتاء حتى اخر يوم فيه . الوحيدين الذين لايتاثرون بالبرد ويسعدون به هم العاشقين واساله ناس لبنى وعلويه وقيس بن الملوح .
" حليلنا منها الزائله"
*يتجمع جيل البطولات بجيل التضحيات عن ملتقى باصات الترحيلات بكبري الخواجات او التعاون ببركات للتوصيلهم للمدارس ..وهنا ..تتفتح المشاعر للجنسين والكل يتفنن فى توصيل الابداعات والاحاسيس والمشاعر المرهفه للحب الطاهر وما اجمل الزهور الانجليزيه الغانية الاحمرا ر وهى تقدم من شباب بركات لبنات بركات ..والزهور الصفراء عندما تشتد الغيره بالمحبين ..ومالى والهوي انا انا مالي ..
*مواقـف :
نزل من الباص عندما حان موعيد الفطور بمحطة المسيد جلس على الطاوله وطلب من الجرسون فول وطعميه من مظهره تتبين بانه من المغتربين ..قبل ان ياكل شاهد ذلك الطفل المشرد وهو ينظر له ولصحن الفول ابتسم فى وجه وقال له اجلس على هذه الطاوله ونده على الجرسون وقال له احضر له طلبين شيه وزجاجة بارد ..اكل الطفل المشرد بنهم حساب الجرسون وهو فى طريقه للباص وضع مبلغ مالى فى جيب الطفل وعندما ركب الباص شاهد من الشباك الطفل المشرد يدعى زملاه المشردين ويطلب لهم صحن فول كبير ،، فبتسم وهو يردد سبحان الله والحمدالله كثيرا..
• طير الحبار والجرويل تشاهده مع المغارب خلف مزارع الترعه نمره اتنين..وما اروووع المنظر تشاهدعلى مد البصر تلك السنابل الخضراء وجريان جداول الماء وطير الجرويل ما بين التحليق والطيران والهبوط الى تلك الجداول وتكتمل الوحه مع لون شفق المغارب ..وكانت لنا ايام .
• واخيرا ً
يا صوتها لما سرى عبر الأثير معطرا
مثل الحرير نعومةً
ونداوةً وتكسراً
مثل الصباح
طلاقةً و رشاقةً وتخضرا
وهماً حنيناً حالماً وصبابةً وتأسرا
ودعتكم الله ،،،

نزار حسن محمد

27-10-2014, 01:11 AM

حكاية ريـــا ..
كم هى جميله بنت بلادي بتسريحة الامهات وتلك الخصل المجعده..
هكذا رايت " ريـــا" فى عام 2014 نعم تتوارث الاجيال جينة الجمال الاصلى فى السودان ..
كانت "ريــا " السـاده من غير شلوخ تشبه الصيده فى بدر السماء ويشرق وجها الصبوح عند الابتسامه ومع ظهور تلك الفلجه مع السن المخلوف على الاجانب اليسر من فاها .. تشع الدنيا جمال ..ممشوقة القامه جميلة القوام واثقه من ما وهبها رب العالمين من جمال " ولكنه الجمال المسحور " تنهدت من اعماقها مع ابتسامه ساخره من هذه الحياه ...
قلت لها ..معقول انسانه بهذا الجمال تتنهد بهذا الشكل العميق ..اخرجت ااااها
وقالت الم تسمع ياصديقى .. بالتجانى حاج موسي عندما قال :وجرحك ياغرام الروح لاطاب لا بدور ابرا ..ونظرة للسماء ورددة الحمدالله بس كتر على الهم وحظى قليل فى هذه الدنيا ثم قالت اسمع ياسيدى ما قابلته فى حياتى .. اعلم بان الله وهبنى نعمة الجمال ولكنه كان على نغمه وليس بنعمه ..عرفت فى تجاربى معنى المراره وطعم الحنضل ..عشت مع اسرتى وكانت ظروفنا الاجتماعيه صعبه ومثلنا كان اغلب سكان منطقتنا ..وعندما التحقت بالثانوي العالى عرفت الحب لاول مره فى حياتى كان ابن جيرانا كان ذو طبع هادى لايتحدث كثيرا وكان قد تخرج من كلية الشرطه واصبح ضابطا وكان يوم جميل عندما ذهبنا لحضور تخرجه ..فى ذلك اليوم صارحنى بانه حقق حلمه الاصغر وانا حلمه الاكبر لكى نعيش مع بعض .. ومرت الايام واصبحت اسرتى على علم تام بقصة غرامنا
واسرته ايضاً ..ثم فجاء طلب منه ان ينتقل للعمل فى جنوب بلدنا فى ذلك الزمان ...وبالفعل انتقل الى مكان عمله الجديد واصبحت كل شهر انتظر ساعى البريد والذى يحضر لى منه خطاب ..
وعندما انتهت ماموريته من الجنوب عاد ..ولكنه لم يحضر للسلام على كعادته وعندما طالت المده اصبحت ابحث له فى الاعذار عند اهلى ولكن طال غيابه ولم يحضر للسلام على واصبح الاستغراب سيد الموقف من اهلى واهله وكل المقربين لنا ..
قررت ان اذهب للسلام عليه ..قابلنى ولكن ليس ذلك الانسان الذى كنت اشعر بشوقه من نظراته ..كان يحاول ان يخفى عنى عيونه ويهرب بنظره الى الارض ..
حاولت ان اعرف منه السبب ولكنه ظل صامتاً تالمت كثيرا الى ان ادخلت الى المستشفى وانا اعانى الامرين من عذاب الاكتئاب وهجر الحبيب ومرات الايام وبدات اعيد توازنى من جديد وكان الخطاب يترددون على والدى ويتوددون لى لكى اقبل الارتباط بهم ..ولكنى قررت ان لا اعيد تجربة غرامي الاول ...
والتحقت بالجامعه وكان الغدر يرسم لى مصيري بالرتباط باستاذى الذى ربطتنا معه علاقه اسريه واصبح بيتنا بيته الثانى وكان السبب رئيسي فى تسجلى فى تلك الجامعه التى كان يعمل بها ..ثم صمتت " ريــا " وابتسمت حتى ظهرت تلك الفلجه الجانبيه والتى تجعل وجها يشع صفاء ولكنه به بعض الحزن واضحاً ...
قالت لى تصور ذهبتا مع استاذى لحضور زواجه وكنت بمثابة وزيرة العريس الى ان اكتملت مراسم زواجه ..وحتى هذه الحظه لم اكن اعلم بانى ازوج ..ابو ابنائي !!!؟؟
كان استاذى ملتحقا بالجيش وله رتبه كبيره ..وتم نقله ايضا الى جنوب بلادى فى ذلك الزمان ..تخرجت من الجامعه التحقت بالعمل ..وبعد مرور شهر تقدم لى مدير عملى الجديد طالبا يدى ...طلبت منه ان يعطنى فرصه لكى ارد عليه ..فى نفس ذلك اليوم وصل استاذى من ماموريته وحاضر لمكان عملى ...واثناء جلوسه وكعادت صديقات العمل بدات التبركات والتلميحات ..على تقديم مدير عملى اوراقه لكى اقبل به زوجاً ..
قال لى استاذى ونحن فى طريق عودتنا ..اسمعى يا "ريـــا " انا حضرة لك مخصوص لانك انتى ستكونى ام ابنائي وقال لى انتى تعلمى زواجى وكنتي وزيرتى ولكن كان زواج من اجل ترضية والدى ووالدتى ولكن انتى يا "ريـــا " حبى الحقيقي ..ولا اكــــذب عليك تعلقت به بكل ما املك من حب وعاطفه ..وخلال اسبوع كنت زوجته الثانيه ..
وسافرة معه مباشرةً الى مكان عمله بالجنوب وابتدت اجمل ايام عمري وحملت منه بطفلتى الاولى وانجبت له خلال ثلاث اعوام مشوار حياتى
مع الزواج ثلاث ابناء ثم انتقل الى الرفيق الاعلى وانا مازلت ارضع ابنه الصغير فى ايامه الاولى ... فى هذه الحظه طفرت دمعــه حارقه من عيونها الجميله ولكن مسحتها سريعاً وابتسمت ضاحكه وقالت لى شفت كيف ياسيدى لهذا اردد وجرحك ياغرااام الروح لاطاب لا بدور ابراا ..ومتين ابرااا ..لااظن ذلك
قالت لى وقد تحولت نظراتها الى المراه الحديديه حتى يومى هذا اناضل من اجل تربية ابنائي ..ورفضت كل العروض لخوض تجربه اخري ورضيت بقسمتى ..فى هذا الوقت كان نسمة الشتاء تلفح الخدود ولكن تلك الزفرات والاهااات التى تخرج من جوف " ريــا " كانت كفيله بحرق اسرائيل وداعش .
ثم قالت لى مودعة ..الجرح جرحى براي منوا البقاسي معااااي
ذهبت " ريـــا" التى تشع جمالا وتنشر الابتسامه لكل من حوليها ولكن فى اعماقها نااااار حارقـــــه .
الان " ريــا" تعبت من كثرة التفكير..لم تعد ترغب في شيء .. فقط تريد
ان تربى اطفالها .،،،

انتـهــت ،،
وودعتكم الله .

نزار حسن محمد

30-10-2014, 12:33 AM

الخميس ..
اواخر شهر اكتوبر .. ما اجمل فصل الربيع والخريف فى دول مجلس التعاون تتحول الاجواء على تلال ورمال الامارات الى جــو اروبي شاعري مع ظهور نصف الهلال ..واليوم الهلال ان شاء الله غالب مريخ اتنين صفر ..
*من طلعت القمره والخير ياعشاى تودينا لى اهلنا بسالوك عننا ..على رمال الخليج العربى ..جلسوا مجموعه من السودانين ولانه الجو ظريف شاعري اخذ احدهم باقه ثم انطلق صوته الطروب الشجى القوة وهو يردد من طلعت القمره والخير ياعشاي ..اجبرنى صوته للوقوف والاستماع اليه ..وبدات اراقب الماره من جميع الجنسيات ..وكان اكثرهم من الجنسيه الهنديه ..وعلمت السر من وقوفهم انه السلم الخماسي الذى يجمعنا طرباً ..
اعجبنى مقال للصحفى السعودى مطلق العنزي :-
فى الاسبوع الماضى اصبت بحاله شديده من اعراض تبدو " مزيجاً" من البهجه والحيرة والامتنان والضعف والزهو والفخر . ولو بحثت فى المراجع العلمية لجهابذة علم النفس وحتى الانثروبولوجيات واكيولوجياتها لما وجدت اسما جامعا او توصيفاً دقيقاً لهذا المزيج ،لكن لأننى المجرب والمجرب افقه من ألف طبيب فلم اجد إلا ان اسميها " المتلازمة السودانية sudanism””
ففي الاسبوع الماضى غمرنى السودانين بكرمهم الهطال على موقف املاه الواجب الاخلاقي مدفوعاً بودى ومشاعري الميالة المنحازة نحو السودانيين ، ومعرفتى بهم فهم كريمو المتحد ذوو مشاعر لطيفه ويتمتعون باكبر مساحة من الاحترام وصفات الامانة فى الوطن العربي
وهذا اسمى فخر " انجاز تاريخى يطمح الى ان يتمتع به فرد وشعب كسبه السودانيون بجداره واستحقوا " دروعاً" وكؤوساً ماسية" من مهج ومشاعر وخلجات قلوب .والدليل هو ذاك الشعور الذى يختلج فى مهجنا واذهاننا .
فعلى الرغم انه لايمكن ان يكون كل سكان الخرطوم وكل السودانيين ملائكة لاينطقون عن الهوي لو قيل لى ان عربياً قد فاز بجائزة الامانة بين عشرين من العرب مختلفى الجنسية فارجح والذهنية العربيه ايضاً ترجح ان يكون سودانياً
ولو قيل ان عربيا قد فاز بجائزة التهذيب بين عشرين من العرب فالارجح ان يكون سودانيا ولو قيل ان عربياً قد فاز بجائزة نظافة اللسان بين عشرين من العرب فالارجح ان يكون سودانياً ولو قيل ان عربياً قد فاز بجائزة الوفاء بين عشرين من العرب فالارجح ان يكون سودانياً والواقف الشاهدة للصفات الرفيعه المترفه للسودانيين كثيرة ..هاك احداها شركة سعوديه كانت تحتاج الى مترجم وبطبيعة عمله سيطلع على اسرار علاقاتها التجاريه مع المنافسين وتوريداتها وتصديراتهم ورسائلها ولابد ان يتمتع بامانة شديدة بحث مديرو الشركة عن مترجم لكنهم اجتهدوا اكثر فى البحث عن مترجم "سودانى" وانتظروا الى ان جاءهم المخلص .
وهذه اخري كثيرون من المرضى فى المستشفيات " يتزاحمون على عيادات الاطباء السودانيين بالذات لانهم يتوسمون ان السودانى بصفه عامة شجاع فى مقاومة غرور النفس ولا يجرؤ على ارتكاب اجتهادات مغامرة خطيرة فيما يجهل .
وهذه ثالثه شاهدت سودانيين كثيرين يعاتبون سودانيين اخرين يتجاوزون فى نقدهم او يستخدمون كلمات جارحة بحق مسيئين للسودان ولكل ذلك ندرك لماذا يبحث عليه القوم عن مرافقين وطباخين وسائقين من السودان لان السودانيين اكثر مقاومة لاغراءات النفس واقل جراة على الانخراط فى المؤامرات والخيانة واكثر الناس حفاظاً للامانة والاسرار واكثر الناس حفاظا للود ونظافة اللسان والملبس ..وبعد كل هذه القصص كثيرة تروي عن السودانيين النشامي ومشاعرهم اللطيفه لن يكون لى اى فضل او منة الدفاع عنهم . وقد طوق السودانيين عنقى برسائل ومداخلات تحمل حلاوة وطلاوة الكلام وكتبت لهم محنيا الراس لهذا الكرم الهطال " كم انا مدين لكم بجميل لايقاس ولا يقدر ولايوزن ولا يكال فقد غمرتمونى بحبكم وكرمكم وهذا دين ثقيل وهو دين ثقيل ولا ريب
اسقنى ياشادى الماء
من سلاف النيلين
اذ يتواعد الخالدان ووادى الماء المهيب
من مهج الفلاحين وازهار حقول الدمازين ..
ومن مهوي افئدة السري فى امبادر الى شموس حلفا واناشيد حداة القوافل
بينى وبينهم وصل من الحب واقمار تدغدغ ضياءها
مطلق العنزي ..جريدة اليوم " السعوديه :"
وختاماً :
انا سودانى انا
نزحوا لا ليظلموا احدا لا ولا لاضطهاد من امنوا
وكثيرون في صدورهم تتنزى الاحقاد والاحن
دوحة العرب اصلها كرم والى العرب تنسب الفطن
ايقظ الدهر بينهم فتنا ولكم افنت الورى الفتن
يا بلادا حوت ماثرنا كالفراديس فيضها منن
فجر النيل في اباطحها يكفل العيش وهي تحتضن
رقصت تلكم الرياض له وتثنت غصونها اللدن
وتغنى هزارها فرحا كعشوق حدا به الشجن
حفل الشيب والشباب معا وبتقديسه القمين عنوا
نحن بالروح للسودان فدا فلتدم انت ايها الوطن
ودعتكم الله ،،،

نزار حسن محمد

04-11-2014, 12:22 AM

هامـ ذاك النهر يستلهم حسنه
فاذا عبر بــلادي ما تـمنى
نعم تدفقت نعمة ربى من تلك المياه الهادره عبر الجبال والوديان تبحث عن مواقع الجمال والحسن فوجدته فى ارض بلادي فطرب النيل لديها فتثنى
لهذا فرضاً علينا نحكى للاجيال كيف كنا واين صرنا ؟؟؟!!! وبرغم كل شى فان الجمال الاصلي مطبوع فى دواخل هذا الشعب المتفرد المعجون بالجمال ..
كانت اسمها ..الخرطوم بالليل ..تغنى بها مبدعى الزمن الجميل ..وكانت اسمها ام در ياربوع سودانا ..وكانت اسمها ارض المحنه وقلب الجزيره وكانت اسمها ابنة القاشى انسري الطيف وهناً وكانت اسمها بورسودان ياجنة وطنا ..وكان اسمها كردفان الغرا.. ام خيرا جو.. وبره. وكان اسمها جنينة بحر الدين وجبل مره تغشى الحبان فى كل مكان.
عبرت تلك المياه من الشرق ومن الجنوب وكونت مقرن النيلين ..وهاما ذاك النهر يستلهم حسنه حتى حلفا ..
وتوارثت الاجيال معنى الجمال الروحى لهذا الوطن ..الى ان اتوا اولاد الهرمه جاؤا كالذئاب فكسروا الاغصان وقتلوا الارواح الجميله وحرموا اطفال من قولة بابا فى صباح عيد ويتموا.. ورملوا وصفصفه كل الخزائن
وباسم الدين ..
وتبدل حال شعب بلادى ..هاجرة العقول ..وحتى الشرف والعرض اصبح معروض على ارصفة الدول ...
ومازالت الماسي تنحر فى جوف شعب بلادى المفتري عليه وعلى خيرات بلادي من قبل قوم اولاد الهرمه ..ولكن مهما طال بهم الزمان ..
سوف ياتى ..حفيد مهيره يعدل الكان وحليل الكان .
وودعتكم الله ،،،