دخانكم يدخن ورقيصكم يمحن

[الشمشار]

سلام من الله عليكم بعد غياب طويل شويه لعدد من المشغوليات وشكرآ لكل من سأل عني ومن لم يسأل
في هذا المنتدي قبل مده من الزمن كنت قد كتبت بوست عن التعليم العام بعنوان المابهمك وصي علي راجل امك
اليوم اجد نفسي ابحث عن راجل الام ذاتو في هذا البوست الذي هو بعنوان
دخانكم يدخن ورقيصكم يمحن
وده ايضآ مثل سوداني سمح من تراثنا وان كان المثل ((دخانكم يدخن وجوعكم يمحن )) لكن انا غيرت كلمه جوعكم دي لي رقيصكم
نرجع للمثل السوداني البقول دخانكم يدخن وجوعكم يمحن الذي يضرب كنايه عن الشخص الذي يظهر للناس بشكل الغني وينبعث الدخان من مطبخه والحقيقه هو لايملك مايقتات به اي ان الدخان كاذب دخان فالصو سااي مافي اي شئ بيطبخ
الخلاني اقول بدل كلمه جوعكم يمحن كلمه رقيصكم يمحن حادثه حصلت لي قبل 3 يوم كدي في الاول ادوني فرصه اخد نفسي وبعد داك اجي احكي ليكم

[الشمشار]

Non può essere tutti di diventare un mondo di senso della parola, che è quello di diventare un essere umano prima di quel senso della parola.


هههههههههههه ماتتخلعو ده مثل ايطالي معناه

لا يمكن لأي إنسان أن يصبح عالما بمعنى الكلمة، من غير أن يصير قبل ذلك إنسانا بمعنى الكلمة


بعدين حا اوريكم انا جبت المثل ده ليه بعد تسمعو القصه
قبل 3 يوم تقريبآ خرجت من منزلي في الصحافه قاصدآ احدي الكليات التي يقام فيها كورس اعلامي مشيت عشان انا بدرس في الكورس مواد الاعداد والانتاج والتصوير والاخراج التلفزيوني والتخطيط البرامجي وللمعلوميه الكورس فيه عدد من الشباب والشابات من عدد من الجامعات وفيه عدد برضو من الخريجين وعدد من الذين لم تمكنهم ظروفهم من ولوج الجامعات
ولانو انا اكثر قربآ من الطلاب لعامل السن فالطلاب والطالبات منسجمين معاي ودائمآ نحن مع بعض يعني لو في زول جاء مابعرف المحاضر ياتو والطالب ياتو
بعد اديت محاضرتي وانا طالع جاتني واحده من الطالبات وبابتسامه كده مدت لي كرت دعوه وقالت لي لازم تشرفنا يا استاذ شلت الكارت ومشيت وللامانه لحظتها ماعاينت ليه وصلت البيت فتحت الكرت مكتوب فيه الاتي
السيد ................ المحترم
تدعوكم رابطه طلاب ...... لحفل ((حنه الخريج )) في صاله ...... يوم كذا الساعه كذا
ماتقلعو عيونكم انتو شفتو شئ انا جااااااي

[الشمشار]

ومشيت الصاله
اول ملحوظه الصاله دي راقيه جدآوتسع لاكتر من 2000 شخص
وغااااااااااااااليه
خشيت لقيت نفسي زي الكلمه الشاذه
اول شئ اللبس هههههههههههه لا وراكم
الحفله بي فنانه وفنان
عداد كل واحد فيهم قدر ماهيتي 10 مرات
الاولاد من البنات مابتفرزو
اللهم اجرنا
الحنه للكل العريس اقصد الخريج والعروس اقصد الخريجه
واهلهم
واولاد خالاتهم
وبنات اعمامهن
وعييييييييييييييييك
الضهب ذاتو يتحننو
مصطلح الضهب يعني الزول الجاء الحفله وماعنده فيها لاقرايب لا ام تي ان حبايب
المهم
انا من دربي داك علي الشارع وفي ذهني كان في عده اسئله
ياربي ديل برقصو عشان حيبقو عطاله بعد يومين تلاته ؟؟؟؟
برقصو عشان طايره ليهم فرحه ؟؟؟؟؟
ولابرقصو علي اشلاء مجتمع تهتك ؟؟؟؟؟
اذا كان حنه الخريج كده طيب عرسو كيف ؟؟؟؟
طيب حفله التخريج ذاتها حتكون كيف ؟؟؟؟؟؟
هوووووووووووووي
ارجعو للمثل السوداني الفي العنوان
وبعد داك شوفو مثل الطليان
زي ديل ممكن ننتظر منهم شئ
فل استوووووووووب
البوست كمل
مهم جدآ
الحفله المشيتها دي بعد قرار ايقاف حفلات التخريج
يلاااااااااااااااا ياعبد الله
هاكم دي ده دكتور اتخيلوووووووو

http://youtu.be/hU0sFSC7TSY

[آلاء عبد الرحمن]

دي الحالة بعد القرار



:cool:

[بنت الرفاعي]

:):):)

حمداً لله على السلامة أخي الشمشار.:)

!!!!!!!
كلام عجيب!!
في البداية قلت يمكن عندهم زميلهم عريس
ومجاملة لهُ عملوا ليهُ حفلة حنة!!
:d:d:d
يعني يتحايلوا بالاسم!!

الله يهديهم ويهدينا أجمعين.:)

:):):)

[ودالعمدة]

الغالى معاوية
والله مشتاقين كتير
أكثر مايعجبنى فى كتاباتك
معالجاتك لسلبيات مجتمعنا
والتى كثرت فى السنين الآخيرة
الى درجة شوهت كل موروثاتنا وتاريخنا
وحقيقة ما قرأناه وشاهدناه شئ يؤسف له
وسبب ذلك هو الخلل الاجتماعى الذى يحدث الآن فى بلدنا بكل اسف
تسبب فيه أولاً الدولة باعلامها الذى لا يحتوى على أى ثقافة غير الغناء والرقص
وتعليمها ومناهجه الواهنة التى لم تثمر غير الفساد الأخلاقى وترويج المخدرات وحفلات المجون
وادارتها حيث نعرف جميعاً الاعداد الكبيرة للعطالة بين الخريجين والخريجات مع الفرص المتعثرة لهم للاغتراب
وثانيا ضعف الأسرة السودانية فى تنشئة جيل معافى وتفككها بسبب عدم متابعة أولياء الأمور لما يحدث فى المجتمع
وباختصار شديد مايحدث فى بلدنا سببه هؤلاء الديناصورات الحاكمين بأمرهم ويتمشدقون بما يسمى بالمشروع الاحتضارى
لك الله ياوطن

وماتطول الغيبة ياشمشار متعك الله بالصحة والعافية

[عنكوليب]

علموا النشء علما يستبين به سبل الحياة وقبل العلم اخلاقا

لم يعلموهم ، الدين ،،
ان تعلموا الدين كما هو ، فلن ينصاغوا تحت مسميات التحضر ،
لن يذهبوا في غياهب اللا أخلاق ،
لا تقف أمامهم مغريات حياة الجهل والأستهتار ،،


أسألوا ألأب والأم ، عما يحدث اليوم في مجتمعاتنا ،،
أسألوا الأم ، التي لم تعلم ابنتها ، ماهي السُترة ،،؟
ماهو البيت ،، ؟ ماهي الأسرة ؟؟ ما هو الأحتشام ؟؟
ما هو التهذيب ؟؟ بل وما هو الأدب ؟؟


أسألوا الأب ، ماذا تعرف عن ابنك ؟ عن ابنتك ؟
أين يذهب ابنك ، الذي فرض على أمه أنه أصبح رجلاَ ، ولابد له
أن يخرج ، قبل أن يقول عنه أصحابه ، أنه ود أمو ؟؟؟


الأم تخيط لأبنتها ، الملابس العارية ،، وتجعلها تبيت عند صاحبتها ،
وعند أهلها !!!؟؟؟؟
( ماشه لصحبتي أذاكر معاها ؟؟؟) ( مارقين مع صاحباتنا، نتفسح ؟؟؟ )

( وتسوقها أمها ، لبيت صديقة الأم ، عشان تتفسح مع بنتها ،

لأنها أخوها عندو بيها علاقة ، وتفر كُلُ واحدة مع صاحبها ) أحييييييييييي أنا ؟؟؟

والأم قاااااعدة تتونس وما جايبا خبر !!! سجم خشمك ،،،




الأساس ،،، الأساس ،،، الأساس ،،،،


حنة ،، ودخان ،،
للمتخرجات ،، نعم ،،،


ولا حرج ،،، عشان مافي راع ،،
لا قانون ،، ولا أسرة ،،



وكلُُ يغني ليلاه ،،،


عجبي !!!