ثقافة عدم إحترام الزمن فى أغانينا

[أم سماح]

نحن شعب يوصف بعدم إحترامه للزمن - مثلا إذا دعينا لتناول وجبة إفطار نأتى بعد منتصف النهار
بحجة إنها مواعيد سودانين و كأنه خصصت لنا مواعيد لوحدنا دون شعوب العالم لأننا سودانين ..
فى الإجتماعات نصل مع خواتيم الاجتماع لأنها مواعيد سودانيين .. و أحيانا نقول أن تأتى متأخرا
خير من أن لا تأتى .. عدم أحترام الزمن ثقافة عندنا نتصف بها ويضرب بنا الأمثال فيها ..
هذه الثقافة وصلت حتى أغانينا

[أم سماح]

سنة سنتين شوية يا بلال على ..
معقولة ؟ السنة إنتى عندك كم يوم ..؟ والمهلة القدردة عشان شنو ؟ ومنو القال ليك أو بضمن ليك تعيشى السنتين

[أم سماح]

تعال بكرة أو بعد بكرة
عليكم الله شوفوا الفاقة والقاقة !! ما فارقة بكرة أو بعد بكرة كله واحد والزول يفضى نفسه اليومين

[أم سماح]

يا زمن وقف شوية
دى مبالغة عديل .. كمان جابت ليها وقفة زمن .. يقيف ليه إنت لو ما محتاج ليهو غيرك محتاجه

[أم سماح]

فيها إيه لو جيت تانى
ما فيها أى حاجة .. ما هو ما عنده شغلة أو مشغلة غيرك .. يجيك تانى وثالث ورابع وراه شنو ؟

[أم سماح]

بدرى عليك تودعنى وأنا مشتاق ليك
بدرى عليك الوقت طويل .. أول مرة نسمع بطول الوقت .. طالما الوقت طويل خليك قاعد وما فى داعى للعجلة

[أم سماح]

طال إنتظارى فى ليلة السبت
ومنتظر قدر ده يا عديم الشغلة مالك ؟ ما جات بلاش من الإنتظار و أكسب زمنك أقضى ليك شغلة تانية

[أم سماح]

وأنا المستنى فى الميعاد
فراغ منك لا أكثر ولا أقل .. الجابرك على كدة شنو ؟ .. ياسيدى زمنك ده ما محتاج ليهو ؟

[أم سماح]

جيته وما لقيته وجانى وما لاقانى
شوفوا جنس المعاقبة دى .. وريهو إنك جاى عشان ينتظرك .. والوقت من ذهب

[أم سماح]

أساسق بالدريب الجاى بحداك
كمان فيها مساسقة ولو ما صادف ولاقيتو تقع تكسر رقبتك يعنى ..

[ودسمير]

تعرفى يا ام سماح االزمن ليس فى السودان وحده ليس له قيمه ! ولكن فى كل دول العالم الثالث وخصوصا افريقيا ,,,

اما نحن فى السودان فموضوع الزمن ده يحير الما يتحير !! حتى الاستاذ وللاسف يدخل الفصل متأخر لان شاى الفطور ما جاهز مع ان الحصه فقط 35 دقيقه !!!


نكته دائما ارددها :

واحد وافق فى الشارع فترة طويييييييييييله ! سأله آخر يا زول ما لك واقف من قبييييييييييييييل ؟!!

فقال له صاحبنا : والله انا ما عارف مواعد واحده الساعه اتنين ولا اتنين الساعه واحده !!!!

[مدنيّة]

والله يا ام السموحة
بوست لذيذ جدا
انا متابعة معك
واصلي لينا فيه

------
تسلمي كتير يارب

[ابو علا]

نحن شعب يوصف بعدم إحترامه للزمن - مثلا إذا دعينا لتناول وجبة إفطار نأتى بعد منتصف النهار
بحجة إنها مواعيد سودانين و كأنه خصصت لنا مواعيد لوحدنا دون شعوب العالم لأننا سودانين ..
فى الإجتماعات نصل مع خواتيم الاجتماع لأنها مواعيد سودانيين .. و أحيانا نقول أن تأتى متأخرا
خير من أن لا تأتى .. عدم أحترام الزمن ثقافة عندنا نتصف بها ويضرب بنا الأمثال فيها ..
هذه الثقافة وصلت حتى أغانينا

نقد جميل للذات بدون ذكر الاسباب عشان القطر فيهو مفتش ولكنَ القدح المعلا في كل سبب من هذه الاسباب .
ويازمن ارحم شوية ...... والزمن ماشي .................................................. .............>>>>
ونعيب زمانانا والعيب فينا ... وما لزمانانا عيب سوانا
======================
ويحسبون أن الزمان به فساد ... هم فسدوا ومافسد الزمان
مشكورة ام سماح

[روبش]

العزيزة ام سماح
اديك العافيه
بوست رائع بروعتك
وحقيقة مشكلة الزمن مشكلة خاصة عندنا في السودان، وانعكس هذا حتى خارج السودان عند السودانيين رغم احترام الشعوب للزمن في بقاع الدول ... إلا السودانيين
مشكلة كبيرة حلها ما معروف
اقول ::: بوعدك يا زاتي يا اقرب قريبه ... بكره اهديك دبلة الحب والخطوبة
بحدد وللان ما وفى بوعده .. وده مشكلة

[روبش]

ام سماح
اقول ::: خليك مع الزمن

[كارلوس2008]

سلام
بوست رائع مع ذكريات الأغاني الجميلة

يعطييييييييييييك العافية


أبومصطفى

[عباس الدسيس]

ام سماح سلام وتحايا
المفترع جميل يحتاج تناول باستفاضة في الشعر الغنائي السوداني وهي تندرج في مسألة الشواكيش وعدم التوافق بين الحبيبين والخيارات للجنسين.
الموضوع الدغرى البوصلنا لي باب حكاية المواعيد عندنا لو نظرنا ليها من ناحية عواطف والتزامات بمعني انك وصلت لقناعة انك بتحب الزول ده تموت بيهو والنقطه بالتحديد تموت بيهو صعبه للبنت السودانيه بعد الخروج لعبائة التحرر في اختيار الزوج بعد ان كان الزواج يتم بواسطة الاب والاهل والاقارب في الزام البت بان تتزوج ود عمها او خالتها او ود الفريق الذي تمت الخطوبه لها بواسطه والدته والتي هي صاحبة امها وحكاية الانتظار وال(شرة) ممكن توصلنا لي البيع.
نجي لي (الشرة) ودلع البنات في حالة اقتنعت بالمحبوب وما عندها قائمة تفاضل بين المحبوبين استحيل توعد بت تلقاها جاتك في المواعيد ((تعمل فيها البت تقيله)) برضو الولد اهميات وكده بعد اكتشف البت مكسره فيهو .
عموما المرحله بتاعت ((شرة)) المواعيد البنتظرو فيها فتناها حسي دخلنا مقالب الموبايل وحكاية بتصل عليك وتفضل منتظر وبدل ما تكون مكتف يديك واقف في الحيطه وتاكل رجلك اليمين تقعد اليوم كلو ماسك موبايلك والطرف الاخر لا يمكن الوصول اليه.
نستعرض كلمات اغنية الفنان اطيب عبدالله .... ملانه انتظارات وبعد التاخير والزول خلاس اقول قبض القا المحبوب نفس الملامح والشبه وما عندو مانع اقيف سنين ليس لحظات(يعمل ليهو معسكر عديل) لو الحكاية ما اتحلت امشي افتش البيوت وادق في البيبان بتاعت الناس وقت ما يظفر بالحبيب ارجع تاني بعد مغالطة نفسه انو جاء قبل الميعاد انتظر.
لقيتو واقف منتظر
تشتاق عيوني لطلعتو
نفس الملامح والشبه
والمشية ذاتا وقدلتو
واللفتة والتوب والقوام
اوصاف حبيبي وروعته
لكنو يا قلبي الحنين
راجيني بي شوق السنين
لكنو آه يخلق من الشبه اربعين
من كم سنة
لا هو عارف ولا أنا
سايبني في بحر انتظار
ما عدى في ليلو الهنا
واعدني بي لحظات شجون
تشتاقا كل الأمكنة
أنا في مسار الشوق لقيت
ميعادو فرهد وانتنى
يا ربي جيت قبل الميعاد
وللا الزمن غفلني زاد
قصة يغيب ما اظن تكون
وما اظن تطوف يوم في اعتقاد
جاييهو من مشوار بعيد
كايس عليهو بلاد بلاد
مرسالو لي دايماً بقول
ارجاهو في نفس الميعاد
انا ديمة يا أجمل ميعاد
راجيك وانت علي مطول
امشي واكوس في كل بيت
واسأل صحابو وكل زول
يقول لي هنا هسا كان
عنك بيسأل وليك بقول
ارجاه في نفس الميعاد
ما اظنو تاني عليك مطول

[اسعد]

قبل ميعادنا بساعتين ابيتوا أنا واباني البيت
أغالط نفسي بي إصرار ..
وأقول يمكن أنا الما جيت
طالت وقفة الاشواق معاي جمب المكان زاتو

**************

زمني الخائن ظلمك بائن

[مرتضى يوسف العركي]

الرائعة ام سماح
بوست عالي جدا ونقد محبب للذات ربما اجد قليل استثناء في كافة الاغاني التي اوردتيها ومعكم نفر كريم من المتداخلين فالشعراء استثناء بالذات في مسألة العاطفة ولا ضير في تمدد زمنهم طالما ينصب في القيمة العاطفية التي تتطلبهاا لحالة الاستثنائية بوستيك ده قطع افكاري في بوست اخر تمددت فيه في استدعاء الرسائل التقليدية المحببة وهي بالطبع تقوم بخلاف ما تبرزينه هنا من استغلال الزمن عبر الرسائل الالكترونية العاجلة وما اطرقه من قدسية الرسائل التقليدية غير المتسارعة على كل لكل وجهة نظر بزوايا وتقاطعات مختلفة بيد ان ذلك لا يحجب اعجابي بالطرح ربما اعود لتعميق رؤوية مغايرة خاصة في الغنا ده لاني بصراحة اميل لتاخرهم المسبب 0

[أم سماح]

الرائعة ام سماح
بوست عالي جدا ونقد محبب للذات ربما اجد قليل استثناء في كافة الاغاني التي اوردتيها ومعكم نفر كريم من المتداخلين فالشعراء استثناء بالذات في مسألة العاطفة ولا ضير في تمدد زمنهم طالما ينصب في القيمة العاطفية التي تتطلبهاا لحالة الاستثنائية بوستيك ده قطع افكاري في بوست اخر تمددت فيه في استدعاء الرسائل التقليدية المحببة وهي بالطبع تقوم بخلاف ما تبرزينه هنا من استغلال الزمن عبر الرسائل الالكترونية العاجلة وما اطرقه من قدسية الرسائل التقليدية غير المتسارعة على كل لكل وجهة نظر بزوايا وتقاطعات مختلفة بيد ان ذلك لا يحجب اعجابي بالطرح ربما اعود لتعميق رؤوية مغايرة خاصة في الغنا ده لاني بصراحة اميل لتاخرهم المسبب 0

هلا والله وغلا وحباب الغاليين
أكيد ما بنختلف قانون هواك وقانون هواى واحد وخليك إنت أنا ذاتى البوست قطع أفكارى
ووقفت فى محطاته كتير.. ويا زمن وقف شوية
شكرا لإعجابك بالطرح

[أم سماح]

قبل ميعادنا بساعتين ابيتوا أنا واباني البيت
أغالط نفسي بي إصرار ..
وأقول يمكن أنا الما جيت
طالت وقفة الاشواق معاي جمب المكان زاتو


**************

زمني الخائن ظلمك بائن

أسعد سعدت بمشاركتك
وشوف الكلام ده الناس زمان بتجى قبل الميعاد بساعنين

[أم سماح]

عباس الدسيس ألفين سلام وتحية
ناس زمان يا سيدى بالشرة والشواكيش أحسن من ناس الزمن دهه
زمان الحبيبة واحدة والحبيب واحد .. تعال شوف هسى الإسيبرات .. واحد للرصيد وواحد لزوم الطلعة والنزلة وواحد
لمصاريف الجامعة وواحد لعربية الفسحة والمشاوير وواحد لونسة الليل بالموبايل وزى ما قال أخونا المميز
الباقى تموه خيال ..
لقيته واقف منتظر شنو هسى تلقاه واقف على جمر تهبه الريح خايف دى تتأخر والتانية تطير من يده

[أم سماح]

سلام
بوست رائع مع ذكريات الأغاني الجميلة

يعطييييييييييييك العافية


أبومصطفى

كارلوس عساك والأسرة بخير
شكرا على الإشادة وبالتأكيد لكل ذكرياته الجميلة وغير الجميلة

[أم سماح]

العزيزة ام سماح
اديك العافيه
بوست رائع بروعتك
وحقيقة مشكلة الزمن مشكلة خاصة عندنا في السودان، وانعكس هذا حتى خارج السودان عند السودانيين رغم احترام الشعوب للزمن في بقاع الدول ... إلا السودانيين
مشكلة كبيرة حلها ما معروف
اقول ::: بوعدك يا زاتي يا اقرب قريبه ... بكره اهديك دبلة الحب والخطوبة
بحدد وللان ما وفى بوعده .. وده مشكلة

روبش الجميل
الرائعون هم أمثالكم .. شكرا ليك
عدم إحترام الزمن سلوك من سلوكياتنا إذا إختلفنا فى إنه ثقافة من ثقافاتنا

[أم سماح]

نقد جميل للذات بدون ذكر الاسباب عشان القطر فيهو مفتش ولكنَ القدح المعلا في كل سبب من هذه الاسباب .
ويازمن ارحم شوية ...... والزمن ماشي .................................................. .............>>>>
ونعيب زمانانا والعيب فينا ... وما لزمانانا عيب سوانا
======================
ويحسبون أن الزمان به فساد ... هم فسدوا ومافسد الزمان
مشكورة ام سماح

أبو علا يا مبعث الروعة والجمال
مشكور على المرور والمشاركة .. لكن الزمن برحم ؟

[أم سماح]

والله يا ام السموحة
بوست لذيذ جدا
انا متابعة معك
واصلي لينا فيه

------
تسلمي كتير يارب

مدنية الحنينة السكرة
ألذ ما فى البوست هو مشاركتك .. وهاك دى
صبرت على الهدف سنوات صبر أيوب على قليل

[أم سماح]

تعرفى يا ام سماح االزمن ليس فى السودان وحده ليس له قيمه ! ولكن فى كل دول العالم الثالث وخصوصا افريقيا ,,,

اما نحن فى السودان فموضوع الزمن ده يحير الما يتحير !! حتى الاستاذ وللاسف يدخل الفصل متأخر لان شاى الفطور ما جاهز مع ان الحصه فقط 35 دقيقه !!!


نكته دائما ارددها :

واحد وافق فى الشارع فترة طويييييييييييله ! سأله آخر يا زول ما لك واقف من قبييييييييييييييل ؟!!

فقال له صاحبنا : والله انا ما عارف مواعد واحده الساعه اتنين ولا اتنين الساعه واحده !!!!

مشكله الزمن هى إرث عجيب توارثناه من جدودنا
وجدودنا زمان وصونا على الوطن وما جابو سيرة للزمن
أعجبت بمشاركتك