القلبُ القاسى تَخَاف مِنّو الحجاره

[الشمشار]

سلام من الله عليكم وكل عام وانتم بخير
عيد سعيد عليكم وكل سنه وانتو طيبين وتامين ولامين
والعفو والعافيه
عنوان البوست القلبُ القاسى تَخَاف مِنّو الحجاره هو مثل سوداني جميل ويعني المثل
ان القلوب القاسيه تخاف من قسوتها الحجاره والحجاره يضرب بها المثل في القسوه الموضوع عنده علاقه بالعيد وعنده علاقه بالقلوب
في الاول قلت اعيد عليكم وانتظروني جاي هسي

[الشمشار]

في الساعه الثانيه عشر ظهرآ بالامس
خشيت الفيس بوك وانا زول مدمن فيس زي ما انا مدمن منتديات كتبت في صفحتي علي الفيس بوك
انا ذاتي حاربت المطر ووقفت في صف الحراز
لانو المطره لغت لي امس مشوار مهم شديد
ومن ضمن التعليقات التي اتتني تعليق طريف من احد اصدقائي واسمه محمد الاخطبوط قال لي فيه ده يوم قعاد في البيت اطلع بره الجو رهيب وقال لي انا ماشي مشوار لو عرفت المشوار الماشيه ده حتجيني طيران وقام كتب لي انا ماشي دار المسنات مجموعه قلوبنا ليكم عامله احتفال هناك لي اماتنا المسنات
هنا انا ضربت لخمه الشبط وين ؟ هدومي وين ؟ وين الصابونه ؟ وين البشكير ؟ ووين ووين ووين وبسرعه استحميت وطلعت (حمام تجاري خمسه دقايق والشارع ههههههههه)
خرجت والدنيا طين ومطر اشرت لاول ركشه
انا
السلام عليكم
بتاع الركشه
وعليكم السلام
انا
لو سمحت ماشي دار المسنات بالسجانه المايقوما توديني بي كم ؟
بتاع الركشه
بي 7جنيه
انا
جدآ
وركبت الركشه رغم صوت الركشه وطرطشه المياه وبوري ناس الحافلات المزعج سرحت في ثلاثه بوستات كتبتها هاهنا في هذا المنتدي
الاول كان باسم
من دار المسنات حسره وآهات
والثاني حمل عنوان
هنا المايقوما هنا الشجن هنا الامل
اما الثالث فحمل عنوانه مثلآ سودانيآ جميلآ
كان عمرك طال بتشوف ضبح الجمال
ذكريات كثيره
ماما عشه
ماما ستنا
جحود ابناء لا يعرفون قيمه من ضيعو
قلوب قست فاصبحت كالحجاره او اشد قسوه
حملت كل تلك الذكريات والعبرات والركشه تسير كأنها مشتاقه مثلي لماما عشه في سرعه جنونيه وصوتها العالي كأنه نواح انسان يبكي مجتمع تهتك وقيم راحت في حق الله وحاجات سمحه رفعنا فيها الفاتحه وسبلناها
انا جاااااي

[الشمشار]

البوستات المذكوره سابقآ دي بوستات كتبتها عن زيارات قمت بها لدار المسنات حتي انني وصلت لدرجه ان اسميتها باسم دار التعيسات لكني اليوم تمنيت ان يغلق نعم تمنيت ان تكون هذه آخر زياره لي لهذه الدار بعد ان تغلق لعدم وجود نزلاء ايوه عدم وجود نزلاء النزيلات الفيهن تحن قلوب اهاليهن ويسوقوهن يرجعوهن بيوتهن تلك اماني لكن الواقع غير ذلك حتي السماء كانت تبكي مع الحاضرين قيمنا وتقاليدنا وكنت معها ابكي واسأل نفسي لماااااااااذا ؟؟؟؟؟
سؤال واحد لكنه يحمل في طياته مجموعه اسئله
دلفت للدار شباب ماشاء الله بنيات الله فوقهن رجال ونساء الكل لم تشغله ظروف الحياه القاسيه ولايضع بالآ لارتفاع الدولار ولا هدوم العيد وخبيز العيد البقو بالشئ الفلاني
فنانين كوميدين اعلاميين ورجال اعمال وناس تانين في شكلهم بسيطين لكن بالفي قلوبهم والله غنيانين الكل يحمل الماء والعصائر والحلويات والملابس والهدايا يتراقصون مع اماتنا المسنات يداعبوهم يخففو عليهم ونسه سمحه فيها عطف وفيها توقير فيها احترام
اتمنيت اهل المسنات ديل يجو يشوفو اهل اماتهم شكلهم كيف؟ وعددهم كم ؟
لصديقتي نضال حسن الحاج بيت شعر يقول عجزه
(قول لي فلنتاين تعال اتعلم الحب من نضال)
تمنيت ان ياتي ذوو اماتنا المسنات عشان يشوفو بي عينهم الرموهم في الدار في ناس لقوهم وفرحو بيهم وما مستعدين يضيعوهم وياريت تلين القلوب لكن المثل القبيل واضح
القلبُ القاسى تَخَاف مِنّو الحجاره

والما بخاف الله حقو الناس تخافو وليهم يوم
شوله
قلوبنا ليكم متعكم الله بالصحه والعافيه ياشباب انا معاكم في اي شئ وياشباب المنتدي العضويه في قلوبنا ليكم مامحتاجه غير 30جنيه شهري ورغبه في عمل الخير
خاص لي ناس المنتدي
دي صوره ماما عشه
http://farm9.staticflickr.com/8298/7836106038_439f61060a_z.jpg

استحلفكم بالله ان تدققو النظر في عيون تائهه تاهت في قلوب كاالحجاره او اشد قسوه
فتكم بي عافيه

[wadyousif]

لا حول ولا قوة الا بالله ،،،،،،،،

يا زول مالك علينا قطعت قلبنا وربنا يعلم

معقولة في (سودانيين) بالقسوة دي ،،،

التحية لماما عشة والتحية لكل مسن رمت به الاقدار في دار ليست خيرا من داره

والتحية لك اخي العزيز ولكل من ساقته خطواته لهذه الدار معايدا ومؤانسا ،،،،


((عليك الله المرة الجاية ادينا خبر من عصرا بدري ))