مذارف علي جدث الفن..الي روح الرائع محمد وردي رحمه الله..عبدالحليم سر الختم

[ابو قصي]

بسم الله الرحمن الرحيم
(ا)
حين القي الدهر في الربع خطوبه
ورمي الكونُ علي الافق شحوبـــــــه
وتخلي النيلُ عن فعل العذوبـــــــــــه
وتداعت ادمع الـــــــورد سكوبـــــــه
عـــــــربا نحن بكينـــاك ونوبـــــــــه
(2)
وفجأة رحلت غير ميعاد
مليت الدنيا بالاحزان
وشبّعت الليالي سهاد
خليت البلد ممكون
معطن بالدموع غرقان
مودر في الدروب محتار
يفتش ليك في الاعواد
وبين الريشه والاوتار
ويستجوب انين الساقيه والطمبور
ويسأل انّة الجيتار
ويسأل نبرة القيثار
يساسق في حواري الفن
ويسأل عنك الاثار
ويستفسر لحا الاشجار
ويبحث عن ملامحك
في ندي الانسام
صدي الانغام في تهويمة الالهام
وفي نار الهوي الوقاد
يكوس من فكره لي فكره
ويتحراك في الذكري
ويتقصاك في الاماد
ينادي عليك في الاباد
ويهتف ليك في اصرار
تعال نستكمل المشوار
علي المبدأ
علي الدرب الطويل ماحاد
عشان تتعلم الاجيال
عشان يتدرج الاحفاد
عشان الخارطه ما تتباد
وماننقص من الاطراف
اطار اللوحه ما ينهار
ومسكين البدأ يأمل
ماعرف الزمن غدّار
ومابتتكرر الاجيال
ولاتتأخر الاجال
ولا بتتجدد الاعمار
صحيح والله المنون نقاد
صحيح بتخير الاخيار
صحيح وقع الفجيعه ثقيل
مابنقدر نجابه نحنا
مهما كنا ياخي المستحيل
(3)
رحلت مشيت نشرت الحسرة في كل بيت
وخليت الوطن مَبْكي
صبح في لحظة مستشفي
نحيب من نُملي لي حلفا
وطن حدادي مدادي
بكاك (بالصورة) والرادي
وفقد الامه ماببكوهو فرادي
نعاك السهل والوادي
نعاك القصر والنادي
وموية نيلنا والضفه
وعشان كنت وزمان كنت
زمان كنت بتشيل الود
وتدي الريده والإلفة
غمرت حياتنا بالافراح
سعيد لاغلطه لاصدفه
مشيت خليتنا للآلام
وبينا وبينك الايام
وقصة حب طويله خلاص
تركتنا يا اعز الناس
نعايش وحشة الاحساس
عذاب الفرقه والتبريح
صحيح يا الغالي والله صحيح
ودعناك شيعناك يا الغالي قبضنا الريح
(4)
حليلنا حليلنا ياسمرة
عيونا سيولا منحدره
قلوبنا تلهلبت جمرة
ضلوعنا الليله بي نيرانها مستعرة
خواطر الاغنيات مقهورة منكسرة
جناحات ليلنا منفرة
ظلام،، والصبح ما اصبح
ولا طلعت شمس بكره
حليلنا حقيقه ياسمرة
سَرَبْ ورد الاماني العذبه
من روض الديار خلسه
مشي وخلانا في وحسه
ولا برّانا بي نظرة
ولا خصّانا بي همسه
رحل قبال تطيب للشادي
في حضرة جلالك ياوطن جلسه
وكان موعدنا نتقابل
لوكان في زمن ماضي
لوكان في زمن آتي
او كان في زمن لسه
حقيقه حقيقه وا اسفاي
قدر الكون ده كلو اساي
وقيل اكبر عليهو كتير
سمانا عِدم سحابة الصيف
بعد ماكان سمانا مطير
وعصفور الخريف هاجر
بعد ما كنّا مَهوي الطير
عقولنا ظهر عليها جفاف
كان دايما حصادها وفير
زمن كان الضراع اخَضر
ندق الصخرة تتكسر
وتتفجر..
قمح في لمعة التِبرِ
ولوز القطن يتفتح..
زَرَعنا مَسُورُو من بدري
زمان زمن السنين ثرّة
وكل جروفنا مخضرّه
وفوقنا الرحمة منشرّه
غمام الضل وشمسية
ببسمة طفله تتفرّا
وتتصرّا..
وقت نتذكر (الدُّرة)
حليل زمن النسيم يسري
عيون المويه في وسط الحقول تجري
وبي ازهارها تتوشي
تجيك السمحه تتمشي
تصيبنا الرهبه والرعشه
نمتع روحنا بالدهشه
حليلها الليله ياسمره
حليل السمحه..
ذات الشامه.. نور العين..
و كلها ضي.
حليل الحلوة زينة الحي
امست كيف وراحت وين
وكيف بالله تتحمل شجون البين
بعد ماسافر الغنّاي
صديق النمّه والدوباي
غُني الحردلو والمسدار
وصوت الحادي والشاشاي
حليل عاشق القمر بوبه
و(حد الزين) وحبوبه
تواشيح السمح والزين
وجلابية العيدين..
ومركوبها...
معاها صديري والشوتال
ومره معاها طاقيه
وفوقها العمه ملويه
وملفحة الكتف والشال
حليل السيف
يعزي الليله في السكين
حليل افريقيا تتأوّه
تشاطر مقرن النيلين
وتتوسد حنين وانين
حليلك ياربوع عزة
حليل الغابه والهبباي
ارادة المولي غلابة
براهو الآخذ العطّاي
(5)
كرري تؤاسي في الصخور العاتيه
والنهر يطفح بالدموع الرابيه
ماطابت الدنيا لنا بل بان سر الفانيه
(6)
موجةٌ من وهنِ يشتكي منها بدني
تحملني تنقلني الي مرافئ المحنِ
(7)
يانيلنا...
يا ارضنا الخضراء ياحقل السنا
اليوم نعلن لحظة استوحاشنا
وترفرف الاكدار في احراشنا
(8)
ايُّ القلوب الصُّم
مابعْثَرتَ في يوم الفراق رفاتها
ايُّ المشاعر...
لم تزلزل بالرحيل ثَباتها
ايُّ الفضائيات..
ماغطت غمامات الحداد قناتها
ايّ الاناشيد السماويات..
ماناحت عليك واعلنت يوم الوداع وفاتها
(9)
ابدا ماهنت يافناننا يوما علينا
بالذي اصبح إرثا في يدينا
وعطاءً يفخر القُطرُ به
فيختال الهويني

[انور النور محمد]

شكرا على هذا الوفاء لهرم الغناء وردي

وشكرا جميلاً على هذا الارواء العذب

[ساريه]

بسم الله الرحمن الرحيم
ابدا ماهنت يافناننا يوما علينا
بالذي اصبح إرثا في يدينا
وعطاءً يفخر القُطرُ به
فيختال الهويني



سلمت يمناك أخى ابو قصى .....
ورحم الله الفنان الاسطوره محمد وردى .... سفير الاغنية السودانيه ..... وتغمده بواسع رحمته ..