عرس ود امنه

[الشمشار]

سلامات
في ذات صباح شتوي صحت الحله علي زغاريد حاجه امنه اكتر امرأه في الحله زوله واجب واكتر امراه في الحله فضلها علي الجميع عشان كده الحله انكسرت في بيتهم والعميان جاء شايل الشمشار هي بسم الله العميان جاء شايل المكسر
الناس الشمار كاتله
الحاصل شنو ؟؟؟؟
كل الناس كانت مستغربه لكن في نفرين ما كانو مستغربين ولامندهشين الاول صلاح صديق عمر ود حاجه امنه لانو هو كان عارف بالحيحصل قبل 24 ساعه اما الشخصيه التانيه فكانت مهاد حبيبه عمر او فلنقل زوجه المستقبل التي اماط عمر اللثام عن علاقته بها في هذا الصباح لوالدته واخبرها بنيته في الزواج منها
هسي انا بحكي ليكم مامسيت عليكم
مساء الخير والنور والسرور وان شاء الله طيبين
بنفس هذه العباره وبكم كبير من الغبطه استقبلت حاجه امنه خبر ابنها عمر الذي صبر سنين وسنين ونال من الشواكيش ما نال (لاحقني وجاي )قبل ان يبوح بما في قلبه لمهاد ست الحسان (ما البقولوها في الحفلات والعروس تكون تشبه كندوره ) لا مهاد بالجد حاجه تااااااااااااااانيه
انتو مالكم خلوني اعجب بي مهاد دي من وراء عمر ومافي زول يجيني ويعمل لي فيها ............. اقول ليكم
انا جاي بس ادوني دقايق

[الشمشار]

وووووووووووووووووووووب علي ووووووووووووب علي انتي مغفله
مالقيتي غير عمر الكمل بنات الحله
اي بت يحبها يجو يعرسوها طوالي ويخلو خشمو ملح ملح
يابت انتي جنيتي ؟؟؟؟؟؟
اتي السؤال من العاجبه والده مهاد محبطا لابنتها التي ارادت ان تخبر والدتها في نفس اللحظه التي يخبر فيها عمر والدته
(شفتو الرومانسيه دي كيف تقولو لي الاتراك )
مهاد
ماما .................
قاطعتها امها
ابو مي اليشق حنكك
(ماتسألوني من ابو مي ده لانو ما ادونا ليها )
عمر ده كان بقي آـخر راجل مابتعرسي
مهاد بقهر
ليه ياماما مالو ؟؟؟

عاااااااااااااااااااايب
هكذا كان رد امها التي واصلت
بنات الحله غشنو واكلن قروشو والتومه خلتو يبني ليها اوضتين في بيتها الكان اوضه واحده واوضه جالوص وعشمتو بي ناديه لامن جاء مغترب وكف ختف ناديه
وست النفر كان بدفع ليها قروش الصندوق لامن صرفت الصندوق ابت تديهو رانيا بتها
انتي يابت ماعايشه معانا في الحله دي
عمر ده عوووووووووووووقه وتلوووووووووووووقه
بري بري بري عمر

رغم اختلاف رده الفعل الا انني كنت متفائل ماعارف ليه انو عمر ده حيحظي بمهاد لانو عمر زول بسيط ونضيف ودغري
لكن كل ما ارجع لي ارشيفو بلاوز
مهاد قضت باقي يومها داك تبكي والعاجبه تسب وتسخط وحاجه امنه المسكينه من الفرح دايره تطير
اما عمر فكان يلوك الصبر وهو يحاول الاتصال بمهاد ولايوجد رد
الجاي احلي خليكم قرااااااااااااااب

[الشمشار]

نال الملل والخوف من قلب عمر مانال حتي رن هاتفه
اهتز مع رنه الهاتف وايقن انها ليست مهاد
(مهاد مخصصين ليها نغمه ياجماعه اتعلمو اصول الريده هههههههههه )
رد عمر
الو
صلاح
اها بشر
عمر
ميه ميه امي دايره تطير من الفرح
بس
صلاح
بس شنو ؟
عمر
مهاد
صلاح
ماله ؟؟؟؟
عمر
لي ساعتين بضرب ليها ماردت
صلاح
يازول ماتخت في بالك تكون مشغوله في البيت ولا التلفون سايلنت ولا .....
عمر
لا
(والله لا دي سمحه عن مهاد لكن عمر قالها بنفس طريقتها عشان كده عجبتني )
صلاح
لا شنو ياخ
انت مالك متشائم كده ؟؟؟
عمر
ياصلاح انا خايف من العاجبه
صلاح
لالالا ياخ العاجبه مره راقيه وحتقبل ارتباطكم
عمر
ياخ مهاد لو كانت ماكلمت امها هسي واجلت الموضوع شويه
صلاح
وليه ماقلت ليها وليه ماطلبت منها انها ما تكلم امها البعرفو انها مطيعه وبتسمع كلامك؟؟؟
عمر
ماعارف لكن ما حبيت اقتل فرحتها
رن جرس الباب في منزل صلاح
صلاح
دقيقه ياعمر
في زول في الباب
خليك معاي اشوف الفي الباب منو؟؟؟
اتجه صلاح للباب وعندما فتح الباب وجد امامه العاجبه والشرر يتطاير من عينيها
العاجبه
شوف ياصلاح قول لي صاحبك العواليق اده ابعد من بتي احسن ليك
سمع عمر الذي كان منتظرا في التلفون هذه العباره وهوي في بئر من التعاسه والحزن
نواصل هسي

[الشمشار]

ماعارفه اقول ليك شنو؟؟

كانت مهاد بالجد ماعارفه تقول شنولعمر الذي التقته بعد الحكيتو ليكم داك بي يومين
كان عمر كما ان كبر مئه سنه تعيسا حزينا كسيرا كان محطم الدواخل الا انها كانت تعطيه الدافع وتشجعه ان يقوي في مواجهه صلف والدتها التي منذ ان توفي والدها كانت لها الام والاخ والاخت والاب لان مهاد وحيده مثل عمر وحيد حاجه امنه
بائت كل محاولات عمر ومهاد وصلاح وحاجه امنه وناس الحله في اقناع العاجبه بقبول الزواج بالفشل الذريع وكانت تقول لكل من يحادثها في هذا الموضوع
no way
(حاجه العاجبه دي مفلهمه وبتعرف انجليزي انتو قايلنها قاعده ساكت)

لكن
الاراده خلقت المستحيل
وبعد سنين من الصبر
استمتعت الحله وسهرت طربانه
بعرس عمر ود حاجه امنه
والعروس مهادبت العاجبه
والعاجبه الكانت رافضه
ياها ديك دموعها في وشها
دي دموع فرح
ما دموع حزن
دموع فرحها بعرس بتها الوحيده
نقطه سطر مهم شديد
الاراده اهم شئ والاهم منها انو يكون املنا بالله كبير
واي زول عندو مشكله ان شاء الله حتتحل
بس
خليكم
مستمتعين
بي
عرس
عمر
ود امنه
علي
مهاد
بت العاجبه
لانو
ده
مثال
حي
للاراده
فتكم بي عافيه

[ريمون]

عقبال ما نزيل كل الصعاب بالإرادة ..

[mahagoub]

وانت عرسك متين
بس ما تبقى زى ود امنه ولا زى الزين