خمائر العكننة فى السودان

[أم سماح]

قديما قيل أن خمائر العكننة فى السودان سبعة فقط .. وهذا قول عفا عليه الزمن .. لأن التطور من سنة الحياة والسبع القديمة تطورت بالتأكيدحتى خميرة البيرة التى تستخدم فى الرغيف تطورت لبرومات البوتاسيوم المسرطنة ..
يتحدث الناس حاليا عن خمس وخمسين خميرة عكننة موجودة بالسودان .. أما السبعة القديمة فأذكر منها ستة وهى
انقطاع الكهرباء فجأة والعيال بتذاكر
شخير ماسورة الموية طوال النهار
عربية النفايات ما تجى أربعة يوم
انتظار الموظفين فى مواقف المواصلات
عدم وجود الدواء الضرورى فى الصيدليات
ازدحام كبرى أم درمان بعد الظهر

[أم سماح]

نبدأ بخمائر العكننة فى قنواتنا الفضائية كان نقدر نحصيها :

من خمائر العكننة لما تفتح قناة الخرطوم تلقى اسحق الحلنقى والتجانى حاج موسى وعمر الشاعر وتمشى تفتح قناة أم أدرمان تلقى فيها عمر الشاعر والتيجانى حاج موسى واسحاق الحلنقى وتفتح النيل الازرق تلقى عمر الشاعر والتيجانى حاج موسى وعمر الشاعر وبالعكس زى بصات زمان درجق الجزيرة المكى وبالعكس

[أم سماح]

ومن خمائر العكننة لما المذيع والمذيعة يجيبو محلل ( استراتيجى) ويقعدوا يلتوا ويعجنو وهو يتفرج عليهم و آخر حاجة يقولولوا كيف تقرأ هذا الخبر ؟ لما يبدأ .. يقولولوا فاصل ونواصل .. وبعد الفاصل يقولولوا شكرا كنت ضيفا عزيزا علينا ( غايتوا مرق بى شوية كندشة وكباية عصير ولما يصل البيت بالمواصلات بيكون طرشا )

[أم سماح]

ومن خمائر العكننة لما تفتح قناة ثانية عشان تشوف ليك حاجة معقولة تلقى بوهيات وعدس الوابل .. وبطاح وكسرة بى ملاح وخالد ود الجيران وعثمان سيد الدكان .. وشوفوا مسخرة النسوان الوابل يا بيت أبوى .. منتهى السخف والاسفاف

[أم سماح]

من خمائر العكننة لما تجى البيت و تفتح التلفزيون عشان تسمع ليك حاجة تبرد عليك عكننة النهار من مواصلات وده فى وده مافى وده غالى .. تقوم تلقى واحد بيغنى دقيت ليهو ماااا ردا دقيت ليهو ماااا ردا دقيت ليهو ماااا ردا .. يا خى يمكن خاتيهو فى الصامت ..يمكن نسى يمكن قسى .. يمكن ما عايز يرد .. يمكن البطارية ضعيفة ..يا أخى على كيفه ..
عجائب ..

[أم سماح]

لما تحول منه وتغتح قناة تانية تلقى واحد بيغنى معاى تضحك ومن وراى تقطع ** انت ما زولى انت ما بتنفع
والله انت الما نافع خالص والقبلك كمان ما نافع .. قال فنانيين قال .. ده غير بهدلة اللبس والشعر لامن ياخدك شك فيهو

[أم سماح]

ومن خمائر العكننة لما تهرب من ديل وتقول أسمع الأخبار من قناة الدولة الرسمية تلقاها كلها .. وجه سيادته بتفعيل التمويل الأصغر و الأكبر والمتوسط ووجه سيادة المسؤول بتشغيل الخريجين .. وجه بعدم فرض جبايات على الطرق القومية .. وانت عارف وكلهم عارفين انو مافى توجيهات بتتنفذ وكله كلام على الهواء فى الهوا .. وكلنا فى الهوا سوا .. وبينى وبينكم البيتفعل بس التمويل الأكبر جدا جدا ( وبعده القروش تكمل )

[أم سماح]

ومن خمائر العكننة لما تشوف واحدة فى التلفزيون تتكلم عن مضار الكريمات وفيها سرطانات وفيها كورتزون وفيها وفيها تلقاها بلا خجلة بارطا وشيه وايدينا وكرعينا تقول أطراف صناعية من خشب أبيض

[عبدالرحمن مدثر]

هاها

ام سماح تحياتى

معالجه كوميديه جميله لواقع معاش

مواصله بس لدقيت ليهو مارد .. فى ليله راس السنه اتلميت فى البيت من بدرى وانا امنى نفسى

بليله جميله انعم فيها بجو الاسره بعيدا عن (جديع البيض .. وكشيح المويه ) .. كانت هناك سهره على النيل الازرق

كان فيها عاصم البنا بكل اناقته ورزانته وحضوره الطااااغى

وكان بصحبته بتاع (دقيت ليهو مارد ) الزعلنى اكتر ونقص على الاستمتاع بعاصم وفراااسته

رشاقه الود الاسمو طه دا .. فاااير جنس فوره .. عامل فيها متواضع وقريب للناس والمؤسف انو معاهو

4 بودى قاردااات .. وغناء مسف .. وفااير الصاله كولها ..

اها دا عكنن لى ليلتى كولها

[أم سماح]

شوية وبرجع أواصل بقية خماير العكننة المعكننانى والعندو خمائر معكنناهو يخليها جاهزة

[أم سماح]

تشكرات أخى عبد الرحمن على المرور والمشاركة ..
وياسيدى الناس دى كلها عندها خمائر معكنناها خاصة من قنواتنا الفضائية ..
وراجعة ليكم

[صلاح ودالطاهر]

اها متابعين من الصباح الخمائر صدقتي يا امها

[أم سماح]

هلا وغلا أخى صلاح ود الطاهر

ومن الخمائر العجيبة فى النيل الازرق برنامج أفراح أفراح وتسمع العروس بتقول ( ربنا يقدرنى واسعدو) بنات آخر زمن .. ويغلبا بالعيال وتغلبوا بالمال ديل طبعا مستعجلين لاحقين الحفلة وما جايبين خبر للقالو ..

[أم سماح]

النيل الازرق براهاىدايرة ليها محاضرات فى عكننة المزاج .. حكاية أمج الساكن فيها ده .. الزول ده ما عنده أهل .. وبعد دال بت مبارك خاطر ونسرين أس اثنين غايتو حقو يسموها شركة النيل الازرق لأمجد ورفيقاته .

[ودسمير]

ونصيحتى ليك .... جهزى دائما حبوب الضغط معاك ...

ويا هو ده السودان .. وده اعلامنا ... وزمن يااااااااااااااااا دنيا !

[أم سماح]

تزهج من النيل الازرق تجى على الشروق تلقى الشروق مرت من هنا .. حافلة البرنامج حايمة فى البلد والشفع بعراريقهم الوسخانة جارين ورا الحافلة من حلة لحلة " أنا أول مرة أشوف زول يسبق الهايس " غايتو منظر سخيف بشكل ما عادى ويجى يسألهم أسئلة من عينة الرئيس الحالى للسودان أسمه منو ؟ بعدين اللتاخة و الليقة مع النسوان .. ازيكن .. مبسوطات .. مرطبات ؟ قاعدات تسون الختة قاعدات تبرشتن القروش من رجالكن .. عكننة مش تهرى دى تفقع المرارة عديل

[أم سماح]

ود سمير أهلا بيك .. حقيقى اعلام يخجل والفرح والبسط بقى عملة نادرة ولازم نفتش ليهو فى التاريخ ونسأل عنه الأجداد .. ونسأل عنه المستقبل اللسة سنينو بعاد كما قال الراحل الدوش طيب الله ثراها ( جيب أضانك قريب بس أنا لابناديها ولا حاجة )

[ZANOON]

سلامتك يا ام سماح...من فقع المراره...
اخير خميره زمااااااان ...لو الكهرباء بتقطع طوااااالي كان جنس دا ما شوفناهو...
بالزقاق::::عجبني تعليق دقيت ليهو ما ردا...
::::لانو والله اول مره اسمع انه في اغنيه كدا...
تحياتي..

[أم سماح]

من خمائر العكننة لما تشوف واحد مستلم بيت البكا صينية بى هناك .. جيب صحن بامية هنا .. جيب كسرة بيجاى ..جيب صحن شية هنا .. يا جماعة صلوا على النبى ( صلى الله عليه وسلم ) أقعدوا فى الصينية دى .. والطامة لما يرفعوا الفراش والناس تفرتك وناس البكا يشوفوا الكشف .. تلقى صاحبنا الوحيد الما دفع مليم أحمر ( ان شا الله الشية الأكلتها ما تنفعك )

[أم سماح]

ذنون أبو مصعب وينك يا راجل ليك وحشة الله .. تشكر على المرور .. دقيت ليهو ما ردا رغم عكننتها أخير من حرامى القلوب تلب وآخر واحدة قالوا اسمها حرامى القلوب قبضوه

[أم سماح]

تقرأ فى الجريدة تلقى اعلان عن توظيف الخريجين تمشى تقدم وتدفع دمغات وحاجات وتدخل متاهات وتدخل معاينات وتلقى واحد من اساتذة المعيانة بتعرفوا شديد .. يقوم يتغابا فيك العرفة ويعكنن عليك حياتك كلها .. ولما تجى تسأل من النتيجة بعد شهرين تلقى الناس اتعينوا قبل ستة شهور وصرفوا رواتب وواحدين مشوا بعثات .. ياخ بطل تقرأ جرايد وأقعد فى ضل النيمة أحسن ليك .

[أم سماح]

من خمائر العكننة لما رئيس حزب تقليدى مبسوط ساكن فى عشرة كيلو مترات وعنده عشر فيلات .. عشرة بنات ..عشرة عربات .. وأربعة نسوان اتنين كبار و اتنين صغار... وولدين فى الحكومة وكل يوم يكورك .. الحكومة لازم تنقلب ..يا شيخ ما تروح تقلبا فى حد ماسكك .. واللا راجى منو يقلبا ليك ؟

[أم سماح]

فالوا فى اتنين ماشين مع بعض سألوا واحد كم هى خمائر العكننة فى السودان ؟ قال والله أنا ما عارف لكن الطيب مصطفى قال هن اتنين باقان وعرمان .. سألوا التانى قال ليهم الطيب مصطفى زااااتوو خميرة عكننة .. بقوا تلاتة

[أم سماح]

العكننة .. المصدر عكنن يعكنن معكنن .. العكنة فى لفة دارجية فى ( مناطق محددة ) هى النتوء البارز فى العود .. عود الشجر وسبحان الله فهى عائق فى استقامة العود وتشويهه والعود يجب أن يكون أملسا أمردا والعكنة فيه تشوهه .. يعنى تعكر مزاجه

[أم سماح]

دمتم سالمين وان شاء الله لاتتعكننوا ولا تشوفوا العكننة ولا تعكننو على حد ولا تشوفوه عكننة

[mahagoub]

يديك العافيه
انحنا معكنيين الزمن ده كلو وما جايبين خبر
ولا يمكن مع الغربه الواحد نسى او قسى
او فاتو باص المدرسه

[صابرحسين]

والله فعلاً عكننة وكما قال أخونا محجوب نحن ما جايبين خبر ، والإنفعالات مع الأولاد والهيجان في البيت يكون بسبب هذه العكننة التي تحدث لنا بمجرد تسمرنا أمام هذه الشاشات المملة ......... تشكري على هذا التصوير الرائع ........

[نزار حسن محمد]

برغم كل العكننات لكن والله ابداع ام سماح
عكننى ذى ماعايزه خلى الاجيال تتعلم
لك الود

[محمد الجزولى]

ومن خمائر العكننة لما المذيع والمذيعة يجيبو محلل ( استراتيجى) ويقعدوا يلتوا ويعجنو وهو يتفرج عليهم و آخر حاجة يقولولوا كيف تقرأ هذا الخبر ؟ لما يبدأ .. يقولولوا فاصل ونواصل .. وبعد الفاصل يقولولوا شكرا كنت ضيفا عزيزا علينا ( غايتوا مرق بى شوية كندشة وكباية عصير ولما يصل البيت بالمواصلات بيكون طرشا )

أم سماح كيفك
بالجد حاجه تعكنن . تحضر شعورك للاستمتاع بحوار راقي وهادف .. تطلع في النهاية عطشان زي ضيفنا المغلوب على امره
بعيدا عن القنوات .. تكون واقف في الشارع بشكل حضاري يجيك بتاع رقشة مخرم وهو يلوح بيده لشرطي المرور ممازحا ...
ولا تكون واقف في الدور عشان تختم ورقه يجيك واحد شايل ليهو ميه ورقه وتوووووش على الموظف من جوه

[ريمون]

صباحك ورد ام سماح ..
بوست جميل رغم العكننه لكننا استمتعنا بالسرد ..
واصلي وخمائر العكننه كتييييييرة ..

[نزار احمد كوارتي]

علاقتي بالتلفزيون أضعف مما ممكن أي واحد فيكم يتخيل, لي درجة إنو التلفزيون الماداني ليه الشركه ماديهُ لي زول, أها بعد الزواج وكِده لقيت نفسي مضطر

أحياناً أشوف وأسمع غصباً عني.

ما حا أعلق وحا أحتفظ بي رأيي الشخصي لأنو أكيد في ناس رايهم مغاير, لكن كلللللو كوم والبقول إتصلت علي مرتي الزعلانه لقيتها في البيت فرحانه ده كوم براااااااو

[آلاء عبد الرحمن]

انا ريحته روحي من موضوع التلفزيون عموما والقنواتنا خصوصا


طبعا من الحاجات البتعكنن الزول الناس البتجيك وتكون عامله نفسها بتعرف اي حاجة
وبمناسبة الغلا والاسعار الكل يوم زايده الحاجة البتعكننك كل دقيقة يجيك زول ويشاكلك انا زنبي شنووووووووووو

[عنكوليب]

الولد ال بفرفر ده ،،، هو كان بعرف يغني مالو ؟؟
كرهنا في الرجال ،،، وننسى شبه الرجال لما نشوفو ،،،

وال ذيو كتاااااااار ،،،،،،،

الراجل الخشن مالو ،،، عيبوهو لي يا اولاد الزمن ده ؟؟؟

البنات خلوا ليكم الكريمات وشيل الوش بالخيط والصبغة ،،،

حيرتــــونا ذاتوا ،،،، في أكتر من ده عكننه ،،،

[أم سماح]

عم محجوب ان شا الله ماتشوف عكننة ..
وكويس انك عرفت سبب عكننتك
أنا غايتو العكننة المعكنناها على قنواتنا الله لا ضوقك ليها

[أم سماح]

الاخوة صابر حسين .. ونزار الرائع
سلمتو وعليكم الله رأيكم شنو فى ثريا حقت الشعيرية
والضحكة اللحدى هسى ما فى زول عرف سببها

[أم سماح]

ريمون يا زوق فهم ده بس قليل من جمالك

نزار أحمد محمد .. وألوية
عاد النبى فيكم كان تسوا ليكم علاقة مع التلفزيون

[أم سماح]

عنكوليب والله خمائر العكننة زى الذكرتيها دى أسكتى خليها ساكت
بداية العام الدراسى كان عندى شغيلة فى الاعدادية .. لقيت ولد بعد اجتهاد حتى عرفته ولد .. وكمان قال مطقم - القميص كاروهات بالفوشى والجزمة والشراب والشنطة بنفس اللون والشعر حكايته حكاية
اللهم لا تمحنا ولا تبدلنا

[كارلوس2008]

والله فعلا تطرقتي لموضوع حساس جداً ..

وفعلا عكننه فضائيــة



مع تحياتي

[تغريدا]

والله ياأم سماح البعكنن كتتتتتتتتتتتتتتتتتتتتتتتتتتتتتتير
بوست جميل بشيل العكننة
بجيك راجعة تانى وعندى وقفة كدى فى كلمة (عكننه دى)
وياريت والله لو زول يشوف لينا هل لها أصل فى اللغة العربية
ولادى كلمة جاية من طرف مفردتنا السودانية الحلوة براها كدا

[بت أم درمان]

بصراحة يا ام سماح البوست دا شفته من اول يوم
بس ما قدرت ارد ليك
واليوم داك بالجد انبسطت منو
ونويت على طول ارشحه لنجومية الشهر
ونتمن ان ينال النجومي علشان نتشرف بجلوسك في كرسي النجوم
ونتعرف عليك من قريب اكثر

تحياتي

[بنت الرفاعي]

بصراحة يا ام سماح البوست دا شفته من اول يوم
بس ما قدرت ارد ليك
واليوم داك بالجد انبسطت منو
ونويت على طول ارشحه لنجومية الشهر
ونتمن ان ينال النجومي علشان نتشرف بجلوسك في كرسي النجوم
ونتعرف عليك من قريب اكثر

تحياتي





:):):)
:):)
:)

[أم سماح]

كارلوس لك التحية ..
عكننة فضائية سا كت دى عكننة تورم الفشفاش

تغريدا .. الجمال جمالك .. ولا أراك الله عكننة فى حياتك

بت أم درمان .. تحية هذا المساء لك أنتى وحدك دون سائر بقية الأعضاء .. وبينى وبينك إنتى بالذات ما ختيت فى بالى إنك تشاركى لحسابات اعتبرها سر من أسرارى .. أكرر لك التحية وإن شاء الله مواضيعى دائما تنال إعجابك ..

بت الرفاعى .. شكلها مشاركتك رسالة لبت أم درمان .. لكن يا ربى ياهو الفى بالى ولا شيتا غيره .. اللهم أجعله خير

[بت أم درمان]

[quote=أم سماح;663856]

بت أم درمان .. تحية هذا المساء لك أنتى وحدك دون سائر بقية الأعضاء .. .. أكرر لك التحية وإن شاء الله مواضيعى دائما تنال إعجابك ..

quote]

تسلمي يارب
وانا اتمن ان تستمري بعطاءك
ولا تبخلي علينا
فبالتأيد عندك الكثير