ذكرياتي في هارموني

[الشمشار]

سلامات
اجلت هذه الخطوه كثيرا ربما لانو ما كنت فاضي وربما لاني صريح والصراحه احيانا تؤذي واعني بالخطوه كتابه ذكرياتي مع هارموني التي بدئت منذ يوم السبت 21 يوليو 2007 وانتهت في الثلاثاء 21 يوليو 2009 وكما سردت في بوست سين سؤال لماذا لايعمل المعوقون فقد عانيت معاناه صعبه في ايجاد وظيفه منذ 11 فبراير 2004 وهو تاريخ تخرجي وبوست سين سؤال ده بنزلو ليكم قريب
اها انا حا اواصل وحا ابدا من اول يوم دخلت فيهو قناه هارموني لحدي اخر يوم طلعت فيهو من القناه خليكم معاي
واؤكد للجميع انني عندما فكرت في كتابه ذكرياتي في هارموني موش لاني مهم وffr ههههههه لكن عشان يستفيدو منها المعوقين المقبلين علي حياه عمليه وتاني بعتذر لو ما كان المنتدي العام مناسب لما ساطرحه

البوست اهداء خاص للاخوه في اتحاد المعوقين حركيآ في ودمدني

[الشمشار]

في يوم السبت 21 يوليو 2007 ركبت المواصلات من الصحافه مكان سكني الي بحري الصبابي قاصدا قناه هارموني الفضائيه التي كانت وقتها كائنه في عماره دبي في الصبابي والسبب ان احدي زميلات الدارسه اتصلت بي تليفونيا وقالت لي انها قد اخبرت الاستاذه هاديه الهادي عني وانها طلبت ان اتي للقناه في تمام الساعه الحاديه عشره صباحا كانت الساعه تشير الي الساعه 8 ونص والحافله متحركه من الصحافه صوب السوق العربي بيني وبينكم ما كنت خايف لكن كنت هامي اني ما اتوفق وياجماعه والله العطله حااااااااااااره واسالو العطاله المهم كان عندي مشوار في السوق العربي وبعد داك مشيت القناه ووصلت القناه بعد ركبت مواصلتين غير الحافله الركبتها من الصحافه للسوق العربي وصلت العماره وكان مقر القناه في الدور الثاني طلعت السلالم بيني وبينكم حسيت انها طويله وممله لكن ده احساس عادي في وقتي داك لاني كنت متوتر وشايل هم خشيت من باب الشقه واتجهت لي السكرتيره وكانت الساعه الوقت داك 10:57 دقيقه قلت للسكرتيره بعد السلام عندي مواعيد مع استاذه هاديه الهادي وعرفتها بي نفسي
قالت لي اتفضل اقعد وانا بخش ليها واوريها بيني وبينكم كلمه اقعد دي وقعت لي في جرح خصوصا انو انا كنت عرقان ومنهك (طبعا ياجماعه العرق مافي طريقه امسحو الا اقعد ماتنسو هههههه )
غابت السكرتيره وعرفت لاحقا ان اسمها سلافه وبعد قليل اتت وطلبت مني ان ادخل لاستاذه هاديه في مكتبها
قمت واتحركت علي الباب ودقيت الباب سمعت صوت قال لي اتفضل وخشيت
نواصل بعد شويه

[الشمشار]

دخلت المكتب وبيني وبينكم عشان اكون صريح شكلها احبطت لامن شافتني وقالت لي اهلا وسهلا وهي احبطت لانو كانت راسمه لي صوره في ذهنها خلاف الشافتها قالت لي اتفضل اقعد وبدت كلامه معاي (فلانه ) وبتقصد زميلتنا القلت ليكم عليها قالت لي انك انت اول دفعتك في الاخراج ومشروع التخرج بتاعك فاز بي جائزه الاكاديميه وانك زي ما انت مخرج شاطر معد برامج شاطر وقالت انك دارس دراما ولغات ومكياج مسرحي الكلام ده صح
قلت ليها ايوه صح
حسيت بيها ماصدقت او استبعدت انو الكلام كلو صح ممكن يكون جزء منو صح لكن كلو ماصح المهم انا عشان ااكد ليها قمت اديته نسخه من الشهادات دي كلها لكن ياجماعه في حاجتين مابالشهادات تثبت صحتهم الاعداد والاخراج
بعد اديته الشهادات قالت لي طيب انت مادام شاطر كده مالك مااشتغلت
قلت ليها عشان انا معوق
اتفاجات بي ردي وعملت فيها ماسمعت شئ وقالت لي ممكن اطلب منك طلب
قلت ليها جدا
قالت لي ممكن تعمل لي نموذج بتاع برنامج مسابقات مدتو ساعه وتسلمو لي يوم الاربعاء (يعني بعد 72 ساعه )
قلت ليها جدا لكن انا عندي تساؤلات قبل اعمل البرنامج وهي كالاتي
عدد الحلقات
الجمهور المستهدف
مجال التسابق
الثلاثه ديل مفتوحه ولا عندك ليهم مواصافات معينه وموجهات طالبه تضمينها
قالت لي مافي اي موجهات في اي شئ المهم انك تبدع لينا وتورينا ابداعك
قالتها بي ابتسامه تشجيعيه كده وان لم تخلو الابتسامه من شفقه وعطف
قلت ليها جدا ان شاء الله ربي يوفقنا
مع السلامه
ودعتني وخرجت
السلم القبيل حسيت بي طويل وممل بعد مرقت من مكتبها وانا نازل حسيت بي جميل وقصير ولله الحمد في اللحظه ديك ياداب حسيت بي قوه دافع انو لازم اكون علي قدر التحدي
نواصل

[الشمشار]

5stars

وانا في السلم نازل بفكر ياتو حته مفروض ابدا بيها والبرنامج ده اعملو بي ياتو طريقه ؟وكيف؟ وزمنو كم ؟وجمهورو منو؟ واهدافو شنو؟ حاجات كتيييييييييره جات في بالي
لكن انا عندي عاده من ايام الجامعه معظم الافكار البرامجيه بتاعتي بتجيني في المواصلات وطوالي في حاله اني مفوت المحطه هههههههههه المهم ركبت حافله متجهه من بحري للخرطوم وانا في الحافله كنت رسمت الشكل العام للبرنامج وبدت الفكره تتضح وفعلا مشيت البيت واول حاجه عملت اخدت دش
(شوفو المعدين ديل زي المساطيل لو اخدت دش الفكره بتربط معاك طوالي هههه )
وفعلا الفكره ربطت وشلت كل ما املكه من نقود في تلك الفتره
( باقي المواصلات )
وكانت سبعه جنيه وخشيت محل النت جيرانها الحيطه بالحيطه ونزلت الفكره في الجهاز ومعاها ملحق ترويجي وشعار البرنامج المغني والمجسم وحاجه اخراجيه مهمه الشكل العام للاستوديو وتوزيع الكاميرات والاضاءه
(مع انو ما كان مطلوب مني غير الفكره فقط لكن الحماس جراني لي حتات كان في مصلحتي بعد داك )
تاني يوم يوم الاحد حملت الملفات وذهبت الي هارموني مع انو مواعيدي كانت يوم الاربعاء في الحافله كنت بفكر في حاجه واحده رده فعل استاذه هاديه لامن اجيها تاني يوم ومعاي البرنامج ومعاهو ملحقي الرعايه والترويج وملف الشكل الاخراجي وشعار البرنامج المغني والمجسم
وقفت عند السكرتيره وطلبت مقابله استاذه هاديه وفعلا خشيت
استاذه هاديه بعد سلمت علي حسيت في عيونها سؤال الجابك شنو ؟
المهم اديته الملفات
قالت لي ده شنو ؟
قلت ليها الملف الاول فيهو مخطط البرنامج
ويحوي اسم البرنامج والمغزي من اختيار الاسم والشكل العام للبرنامج وزمنو والجمهور المستهدف والوقت المناسب للبث وسيناريو حلقه وهو برنامج تسابق في خمسه مجالات ولخمسه فرق وقمت بتسميته 5stars او خمسه نجوم
اما الملف التاني فده ملف الترويج ويحوي اشكال الترويج ومحوريه الذين يتمثلان عبر العلاقات العامه للقناه في المحور الاول والمحور الثاني عبر القناه والرعاه وقسمت الرعاه علي حسب نسبه الرعايه ونسبه ما يعود عليهم من الرعايه والملف ده بيتضمن برضو التسويق واسماء شركات يمكن ان ترعي البرنامج
الملف الثالث ده فيهو الاتي
شعار البرنامج المغني والمجسم والشكل العام للاستوديو
شالت الملفات وقرتها سطر سطر وكانت مندهشه بعد انتهت قالت لي
طيب البرنامج ده ميزانيتو عاليه جدا القناه ما بتقدر عليها
قلت ليها القناه ما حتدفع ولاقرش
قالت لي نعم
قلت ليها نعم الله عليك انا اوريك
نواصل بعد الفاصل

[الشمشار]

نواصل
شوفي انا وضعت في اعتباري انو تكفله البرنامج دي تتكفل بيها الجهات الراعيه كل جهه راعيه تساهم بي نسبه معينه مثلا
الراعي الرسمي بشارك بي 35% من النسبه الكليه
والراعي الماسي بي نسبه 30 %
والراعي الذهبي بي نسبه 20%
والراعي الفضي بي نسبه 10%
والراعي البرونزي بي نسبه 5%
وكده النسبه ميه في الميه وانا الميزانيه الكليه للبرنامج بما فيها اجور البرامجيين ولجنه التحكيم والجوائز وخلافه كلها حاصره ليك هنا في الملف بتاع الترويج والرعايه ده
وعلي قدر الرعايه بتكون الامتيازات وانا كتبت ليك اسماء الشركات الممكن ترعي من مجالات نشاط تجاري وخدمي متنوعه لكن بيبقي في حاجه مهمه لازم نراعي ليها انو ما يكون في ضمن الرعاه شركتين بعملو في مجال واحد يعني مثلا ما ممكن الراعي الرسمي تكون خطوط طيران والراعي البرونزي برضو يبقي خطوط طيران ممكن يكون شركه بناء او شركه سيارات اوغيره
وتاني في نقطه مهمه انو القناه غير الفائده الماديه وغير انها ستكون مشاهده ونسبه مشاهدتها عاليه وحتستفيد من المتاسبقين الحايفوزو وتعمل معاهم عقود احتكار لمده سنه ويكونو موديل لاعلانات وتراويج و.............و............... ...
حسيت بيها مندهشه وفي نفس الوقت مهتمه جدا بما اقول واكتر شئ اداني الامان انها سالتني
انت متاكد انو البرنامج ده والملفات الثلاثه ديل اعديتهم انت براك وفي 24 ساعه ؟
قلت ليها طبعا ولو عندك كمبيوتر وفيهو طابعه هنا ممكن انا هسي اعمل ليك اي شكل من اشكال البرامج بكل ما يحتويه هذا الشكل وما انا براي اي زول في دفعتنا ممكن يعمل قدر الانا عملتو واكتر
مدهش هكذا نطقت العباره ثم
قالت لي لحظه بس انتظرني هنا
ومرقت قعدت براي زي ربع ساعه وجات خاشه قالت لي معاويه اكرب ضهرك الجعيلي داير يشوفك
قلت ليها خير ومرقنا من مكتبها ومشينا لي مكتب الجعيلي
دقت الباب سمعنا صوتو قال اتفضل وخشينا
نواصل بعد شويه

[الشمشار]

سلامات ونواصل
خشينا المكتب المكتب نضيف ومرتب وممتاز من ناحيه الديكور الجعيلي قاعد في مكتبو ومدنقر في ملفاتي الما بتغباني ورفع راسو وعاين لي نفس تعابير النظره القلت ليكم شفتها في عيون استاذه هاديه اول ما شافتني لاول مره وان كان الجعيلي جامدا بعض الشئ وذلك يعود لخبرته وتمرسه لكن العيون مابتكضب المهم سلم علي سلام جميل كانو بعرفني من زمن وقال لي اقعد وقعدت طوالي هو نحي الملفات جانبا وقال لي
انت منو ؟
السؤال لايعني الاسم فقط السؤال يعني من هي الشخصيه التي امامي انا فهمت كده ووريتو انا منو ؟ ودرست وين ؟ وكل ما يخص الجانب المهني
وبدا يسالني اسئله عامه وبعد داك خرم لي علي المجال وسالني اسئله في التخصص ومعظم الاسئله كانت عن 5starsالمهم في الموضوع انو قال لي يسعدنا انك تكون معانا هنا متعاون مع القناه وانا بعتبرك من هسي واحد من اذرع القناه واشكرك انك قصدتنا نحن هنا في هارموني ومن الليله هارموني بيتك وحتكون مسئوله منك هاديه
وسالني السؤال التقليدي ليه وانت متخرج من 2004 ما اشتغلت لي الليله قلت لي بي بساطه لاني معوق ضحك وقال لي مافي حاجه اسمها معوق وانا في هارموني هنا برفض هذه الكلمه هناك ذوي الاحتياجات الخاصه لكن كلمه معوق دي بايخه ومابحبها قلت لي طيب اسم ذوي الاحتياجات الخاصه ده ما اسم الدلع للمعوقين هنا سالني سؤال دخل الوسواس في نفسي قال لي انت ساكن وين ؟ لاني عارف الاسئله البعدو حيكون شكلها كيف ؟ من عينه بتجي بي شنو ؟ والسلم بتطلعو كيف ؟ وانا ماناقص اسئله زي دي موش لاني متعقد من حته اني معاق دي لا لانو الاسئله دي بقت لي فوبيا بعديها طوالي بفقد مكان شغلي او بالاصح المكان المفروض اشتغل في
قلت لي ساكن في الصحافه
قال لي ايييييييييييييك الصحافه الماهنا وجيت بي شنو ؟
قلت لي بالمواصلات
قال لي مابعيده عليك
قلت لي شوف يا استاذ انا حته المسافات والسلالم دي ما فارقه معاي نهائي ولا بتتعبني والدليل انو انا عندك هسي والحمد لله انا مواعيدي مضبوطه وانت حتشوف
قال لي خير ان شاء الله وتابع مع هاديه ومرقنا انا وهاديه من مكتب الجعيلي وادتني رقم تلفونها عشان اتواصل معاها وارقام المكتب وشالت تلفوني وانا ياالسلم جاك زول
نواصل بعد الفاصل

[الشمشار]

نواصل نزلت من السلم بي سرعه السلم بقي لي زي حلاوه قطن هههههه كان جواي حماس كبير ورغم انو البرنامج اجيز من قبل ناس القناه الا انو ما اتنفذ وده بعود لي اشياء كتيره من ضمنها المشاكل التقنيه الكانت بتعاني منها القناه في تلك الفتره ولو بتتذكرو القناه كانت بتعاني وانقطع بثها كم مره وانا قبل اواصل في حاجه مهمه داير اقوله انو انا حسيت بي انو ناس هارموني ناس ودودين وحبوبين جدا وكونت صداقات في فتره قياسيه وزي ما كونت صداقات برضو للاسف اكتسبت عداوات وده برجع لي اني زي ماقلت بقول للاعور انت اعور قدامو والصراحه زي ماقلت مؤذيه ومن المواضيع الكنت دائما بناقشه ورائيي فيها كان سلبي بالنسبه لاداره القناه والعاملين فيها عدم جدوي مايعرف بالفيديو كليب وجاهرت بي رائيي ده في كم اجتماع واي اجتماع بقوم كنت بطلع منو بي عدو جديد وبدا الجو يبقي سئ ولحدي الوقت داك انا ما كنت اشتغلت كمخرج او معد ولا لحظه لكن كنت في قسم الترويج وقصه اني امشي الترويج دي جات بالصدفه انا زي ماذكرت في البوست ده عملت الملف بتاع الترويج بتاع 5stars وقامت استاذه هاديه قالت لي انت روج للبرنامج بتاعك ده بي نفسك لانك انت احسن زول يتكلم عنو هي كانت عندها سياسه جميله وبقصد استاذه هاديه ومن خلال 5stars بديت اعرف شركات كتيره ومؤسسات كبيره وده شجعني انو اعمل سهره اسمها العيد معاهم لكن للاسف حظي السئ السهره دي صادفت شهر 12 وكانت ايام الميزانيه انا هنا في جانب ما كتبت عنو وهو برنامج شنه ورنه الذي قمت باعداده واخراجه في القناه وده حا ارجع لي في المداخله الجايه
نواصل

[الشمشار]

شنه ورنه


في يوم السبت 13اكتوبر 2007 اتصلت علي استاذه هاديه تلفون من الصباح وقالت لي في اجتماع بعد بكره الاثنين 15 اكتوبر الساعه الواحده ظهرا للمعدين والمخرجين والمعدين مع الجعيلي ومطلوب حضوري طبعا الاجتماع كان لوضع خارطه برامجيه للقناه وفعلا يوم الاثنين انا اتحركت علي القناه وصلت القناه الساعه 12:45 دقيقه تقريبا والتقيت في اليوم داك لاول مره بالمعد الرائع حد الدهشه محمد حسن السيد والرائع مصعب كاروري والاجتماع بدا ناقش اشياء كثيره منها انو برنامج سلامات الذي كان يقدمه بروف عوض ابراهيم عوض مفروض يقيف (كان وقتها د.عوض والان هو بروف عوض )
انا كنت معترض علي الراي ده انا واستاذ معتصم والراي جاء من واحد من الشباب انا لامن استاذ الجعيلي سالني عن رائيي قلت لي ده البرنامج الجماهيري الوحيد ود. عوض شخصيه لها وزنها ولو القناه وقفت انتاج البرنامج ده عشان مكلف زي ماقال الشاب ده حتخسر كم هائل من المشاهدين والافضل انو البرنامج يستمر ان رائ د.عوض انو يستمر لانو اقتراح وقف البرنامج جاء لانو د.عوض كان مشغول جدا واعتذر عن المواصله علي حسب ماسمعت من بعض الزملاء في القناه
بعد داك بقينا نستعرض في مقترحات البرامج استاذ معتصم الجعيلي قال اناداير زول يعمل لي برنامج اسمو شنه ورنه
انا قلت لي فكرتو مفتوحه
قال لي بس انا عاجبني الاسم ايوه الفكره مفتوحه رائيك شنو تعملو انت ؟
قلت لي ياريت جدا حاضر (بيني وبينكم شداني الاسم )
واتحمست جدا لي درجه اني الفضل من الاجتماع كلو كنت بره الشبكه بفكر في شنه ورنه طبعا استاذ معتصم مابخلي حاجه للظروف قال لي بتجيب البرنامج متين جاهز بدون تفكير قلت لي بكره
نواصل بعد الفاصل

[الشمشار]

نواصل
اول شئ فكرت في معني اسم شنه ورنه ماذا تعني لانو علي حسب معني الاسم بتكون فكره البرنامج وبما انو الشغلانه جات بالعكس يعني جاء الاسم قبل الفكره فلازم الفكره تكون تعبر عن الاسم والعكس (الشغلانه ما كوسه شيل ولصق ساي ) ده الاتعلمتو من خلال دارستي في الاكاديميه (اكاديميه السودان لعلوم الاتصال ) ارجع ليكم لي التفكير بتاعي لقيت انو شنه ورنه لقب يطلق للشئ الذي كان له صيت في زمنه واندثر او انقرض او خبت عنه الاضواء وبقي تأريخ وربما ان اصل الكلمه ليس سودانيا وفعلا خشيت النت وبحته لحدي ماعرفت ان الكلمه مصريه وتعني ماذكرته طيب ده معني الكلمه نحن نجيب برنامج كيف يناسب الكلمه دي وبي ياتو معالجه وزمنو كم المهم بعد ساعه ونص انا كنت عملت مخطط البرنامج وزي مابتقول القواعد في الاعداد عملت مواضيع 17 حلقه (دوره برامجيه كامله ) واعاين في الشمس دي راجيها تغيب وتشرق تاني عشان اودي البرنامج سموها شفقه سموها حماس المهم ده الحصل ونواصل

[الشمشار]

انا وقفت لامن طلب مني اني اعد برنامج شنه ورنه واجيبو ووقفنا في اني منتظر الشمس متين تغرب ومتين الصباح يجي
المهم انا شلت البرنامج وياهارموني جاك زول (ما زول القناه هههههه) وصلت القناه ولقيت استاذه هاديه معاها ضيوف قعدت اتونست مع سلافه السكرتيره الحكيت ليكم عنها لقيت انو سلافه زوله ماشاء الله مثقفه وواعيه واهم شئ فيها انو افكاره مبتكره قامت قالت لي انو عندها فكره بتاعه برنامج ودايره تاخد رائي فيهو وبدت تحكي بعد خلصت لقيت انو سلافه دي السكرتاريه ما مكانه مع احترامي لكل السكرتيرات والسكرتيرين لكن لقيت انها عقليته برامجيه ميه الميه حتي هظرت معاها وقلت ليها انتي يا اختي قريتي اعلام والله الشغلانه دي جاتك بالتأثير وخشيت بعد داك لي هاديه واديته البرنامج ودخلتو للجعيلي واعتمدو طوالي ونزلو في الخرطه وطلب مني اعداد 17 حلقه (دوره برامجيه كامله ) وفي عرف الاعداد لابد عندما تقدم فكره برنامج ان تلحق الفكره بملحق يتضمن مواضيع 17 حلقه كما ذكرت وانا جبت المواضيع باقي اعد ليها واعداد مايخرش الميه زي مابقولو المصريين بعد داك اجازو لي البرنامج وطلعت من هاديه وانا طالع سلافه قالت لي
اسمع ممكن تعد لي البرنامج القلت ليك فكرتو قبل شويه قلت ليها جدا انا اتشرف اصلا انا جاي القناه بعد بكره بجيب ليك البرنامج جاهز معاي
وطلعت وبيني وبينكم الحماس زاد والتوتر زاد نواصل بعد شويه

[الشمشار]

the best design



ده اسم البرنامج القالت لي فكرتو سلافه افضل تصميم اوthe best design وحقيقه هي قالت فكرتها انها تعمل برنامج مسابقات عن تصميم ازياء تكون بتجاري الموضه وفي نفس الوقت تكون التصاميم دي مراعيه لعاداتنا وتقاليدنا ومناخنا كتبت البرنامج واديتو ليها وقلت ليها (انا حا اعرضو علي الجعيلي ) وفعلا عرضتو علي الجعيلي قام قال لي البرنامج ده رائع قلت لي سلافه الرائعه يا استاذ قال لي سلافه منو سلافه سكرتيرتي قلت لي ايوه الزوله دي تاكلين بيها الحيطه ساي البرنامج ده فكرتها يا استاذ انت ماعاينت في الورقه الاولي مكتوب اسم البرنامج فكره سلافه فلان اعداد فلان قال لي اسمع البرنامج ده تبدا تتحرك في طوالي قلت لي البرنامج بديت اتحرك في امبارح وديتو المصنفات عشان نسجلو بي اسمنا انا وسلافه والرد بكره لكن انا داير سلافه تتحرك معاي لانها هي ست الفكره وفعلا اتحركنا انا وهي وقصدنا عده جهات للرعايه وللاشتراك في البرنامج والوقت داك الدوره طلعت والتوزيع علي البرامج طلع انا مخرج لي برنامج شنه ورنه واوكلو اعداده لي زميليتين كانو معاي في البرنامج والمذيعه ندي بخيت واتحدد لي يوم لي تصويره وصادف اول يوم تصوير يوم الثلاثاء 20/11/2007
بيني وبينكم بعد ده انا خشيت في الجد وداك كلو كوم والجاي كوم
ونواصل

[الشمشار]

قصه اول يوم تصوير
اتصل علي حيدر البدري وكان وقتها مدير للبرامج بقناه هارموني طبعا حيدر البدري مخرج وزول جادي وعملي جدا وكل مده المكالمه كانت تقريبا 46 ثانيه هههههههه ماقلت ليكم عملي اوريكم قال لي شنو
(فلان كيفك بكره التصوير بتاعك الساعه 11 صباحا المونتير ابرهيم يؤنس المونتاج بتاعك يوم الخميس من الساعه 10 لي 12 مع السلامه )
هههه ما اداني فرصه اقول حاجه وفعلا تاني يوم مشيت القناه ووصلتها الساعه 9 ونص اخترت ملابس المذيعه وشكل مكياجها واديت اوردر للماكييره
(عشان ماتقولو الزول ده تالتن ده من صميم عمل المخرج )
وحضرت الاجهزه الدايره وادوني رسوم الانتاج وقبل داك كانت عندي قعده طويله مع المصور ياسر لشرح المطلوب منه ومع المعدين والمذيعه وناس الصوت والاضاءه كل علي حده وكنت مركز انو اخليهم في مود حلو عشان يومنا يطلع حلو وفعلا بعد انتهيت من الاجراءات الرسميه وغير الرسميه مرقنا علي العربيه حتي حسين السواق كنت داير يكون موده كويس عشان مايأثر علي بقيه الطاقم في حين اني كنت متوتر جدا لكن توتري ده ما ظهر علي لانو من الاشياء المهمه في عملك كمخرج كما درسنا انو مافي زول يعرف جواك شنو واحاسيسك شنو ؟ مهما كان الزول ده عشان العمل ينجح وفي مخرجين بيكونو عيانين وشغالين ومافي زول بكون عارف انهم عيانين لمصلحه العمل
وصلنا البيت المفروض نصور فيهو وكان بيت ناس تبيدي في الصافيه البيت ديكورو هاي كلاس وموضوع الحلقه كان عن الاشياء والمستلزمات البيتيه الكانت موجوده زمان في البيت السوداني وانقرضت مثل المشلعيب والدوكه والريكه وكانو ضيوف الحلقه عوضيه تبيدي والفنانه حواء الطقطاقه هنا انا لبشتي زادت وناس الطاقم كلهم حسيت بيهم اتلبشو لانو البيت هاي كلاس ونحن دايرين نتكلم عن التراث اول شئ طمنت المعاي كلهم انو حنصور وفي نفس البيت بس الافضل انو سريعا كده نستخدم الاشياء السودانيه القديمه الموجوده في البيت والجابوها المعدين معاهم وصنعنا ديكور في زمن قياسي ربع ساعه بس وبدينا تصوير
نواصل بعد الفاصل

[الشمشار]

التصوير مشي اسموز لكن ههههههههههه انا وقفت التصوير ثلاثه مرات ومقارنه بي انو اول مره ونحن لاول مره نشتغل مع بعض عدد مرات وقوف التصوير دي شويه وطلعنا من بيت ناس تبيدي البعض كان راضي عني لكن البعض الاخر ماعاجبهم المهم مشينا سوق بحري صورنا مع حاجه فاطمه وهي بائعه بروش وفخاريات وكانت عندها راكوبه ومن خلال البرنامج قلنا ليها انتي بتطلبي شنو من المسئولين؟ قالت دايره دكان بدل الراكوبه وفعلا بعد مده ادوها دكان ووفاءا منها سمت الدكان شنه ورنه بعد داك مشينا جامعه الخرطوم وعملنا استطلاع مع الطلاب والطالبات ورجعنا القناه وانا طوالي سلمت الاجهزه ورسوم الانتاج بي صمتها رجعتها لانو ما احتجنا لي حاجه نشتريها ولو كان مويه لانو الشعب السوداني الجميل ده مافي زيو طبعا الفطور كان عند ناس تبيدي وفي السوق اصر اصحاب المحلات علي دعوتنا لمياه صحه وحاجه بارده وكانو مسرورين بنا
بعد انتهت مهمتي خرجت من القناه متوجها الي منزلي وانا توتري زائد ياربي الحلقه حتطلع كيف ؟ حتعجب الناس ؟ اسئله كتيره خففها علي ثناء بعض افراد الطاقم العامل معي في البرنامج من خلال رسائل واتصالات ووصلت البيت مستوي والسرير بي وين ؟ نواصل

[بدر الدين محمد]

واصل ... اول مادة اقراها من الغلاف للغلاف

[الشمشار]

وجيت يوم الخميس المونتاج قعدت مع المونتير ولقيت انو الصورناه اكتر من الدايرنو بي كتير يعني التصوير الايجابي بعمل حلقتين خصوصا انو التصوير مع حواء الطقطاقه اخد زمن وكان فيهو غناء جميل من الزمن الجميل المهم قسمت البرنامج لي حلقتين وانتهي المونتاج وطلعت وانا طالع عاينت في بورت الاعلانات والتوجيهات بتاع القناه لقيت انا تنويه من مدير البرامج(حيدر البدري ) بوقفي عن العمل لحين مقابله اداره البرامج انا اتفأجات وبقيت بسال في روحي ياربي الحاصل شنو ؟ وطوالي مشيت خشيت لي حيدر البدري اول ما خشيت سألني عملت المونتاج ؟؟؟؟
قلت لي ايوه لكن انا قريت في لوحه الاعلانات انو انا اتوقفت من العمل ليه ؟؟؟
قال لي ايوه انت اتوقفت من العمل لانو بعض اعضاء الكاست قالو حصل منك انك كنت ما متعاون معاهم وكنت عصبي جدا وقالو انو البرنامج اكبر منك انت ؟ بعدين انت عمرك كم سنه ؟ انا مالاقاني مخرج عمرو اقل من 40 ياولدي الاخراج ده ما حاجه ساهله وما اي زول قرا لي سنه ولا سنتين بيبقي مخرج
قلت لي انتهيت من كلامك قال لي ايوه قلت لي يلا شوف القالو الكلام ده ماديراني معاهم في البرنامج ده مادايرني معاهم لانو انا لامن شلت رسوم الانتاج من اداره القناه ورجعتها تاني لانو ما احتجنا ليها هم زعلو لانهم وبالواضح كده كانو دايرين يتقسمو القروش وقالوها لي في وشي قالو لي خليك حريف ماترجع القروش وانا قلت ليهم انا لاحريف لاظريف لاحرامي والكلام ده بشهدو عليه بقيه الطاقم وممكن تسالهم وبالجد انا آسف انو التعامل في القناه دي يكون بالطريقه دي اما عن انو انا البرنامج اكبر مني دي فحتشوف الحلقتين المنتجناهم هسي اما عن عمري كم سنه فعمرو الابداع والعطاء ما كان بالعمر اما كلامك انو مافي مخرج لاقاك عمرو اقل من 40 سنه فده لانو العقليه الماشه بيها البلد كده وكمان ما شرط انو المخرج يكون عمرو معين لانو الابداع مابرتبط بي عمر ذي ماقلت ليك اما عن انو الاخراج ماحاجه ساهله وانو ما اي زول بيبقي مخرج ساي فا انا ما حا اجاوبك علي السؤال ده لانو سؤال من وجهه نظري افضل الرد بتاعو يكون عملي والحلقتين في المكتبه شكرا لي تعاونك معاي وانا ده طرفي من القناه لكن قبل امشي لازم اوري هاديه الزوله الجابتني هنا اني ماشي
وفعلا مشيت لي هاديه وكلمتها بالحصل وقلت ليها انا ماشي والدنيا جاطت في القناه بعد داك ناس يقولولازم ما تمشي وتقعد ليهم وتاخد حقك وناس يقولو في 60 داهيه لحدي ما نصفني الجليل الرحيم وباقي ناس الطاقم قالو ما ارتحنا مع زول في الشغل قدر الزول ده وقالو عني كلام كتير ده ما محلو والقالو اني كذا وكذا وقعو في شر اعمالهم واكتشفت القناه انهم بسرقوها عيني عينك المهم في الامر وصلنا انا واستاذه هاديه لي حل انو اقدم مخطط برنامج جديد واشرع فيهو بعيدا عن كل من كن لي العداوه
نواصل بعدآخر فاصل

[الشمشار]

اسف للفواصل لكن عشان القي زمن للكتابه والتذكر لانو الذاكره شبه بقت خربه كده
نعود انا كان في راسي فكره كم برنامج واحد بتاع مسابقات وواحد اجتماعي فئوي لذوي الاحتياجات الخاصه وبرضو واحد ذو صبغه اعلانيه وفعلا بديت بالاخير وقدمت المقترح واجيز وبديت فيهو لكن جاء استاذ حيدر وطلب مني ارجع للبرنامج تاني بقصد شنه ورنه وفعلا عدت للبرنامج بعد ان وطنت نفسي في مواجهه من يكنون لي العداء وصورنا حلقتين تانيات وبعد كم يوم وانا خاشي القناه لاقتني تريزا المذيعه في السلم وقالت لي ناس الحسابات دايرنك وفعلا مشيت ليهم قالو لي انت ماداير قروشك دي ولاشنو ؟ وصرفو لي مستحقاتي عن شنه ورنه بيني وبينكم احساسي مابتوصف اول قروش من شعلي احساس مباااااالغه شلت قريشاتي وقابلت هاديه قالت لي انها دايره تستقيل من القناه وماورتني الاسباب ودعت لي بالتوفيق بيني وبينكم زعلت جدا وحسيت اني وحيد
جاء في مكان هاديه استاذ بكري عوض وكهاديه كان مؤمن بمقدراتي وكان دائما مايستمع الي وبانصات عملت فكره كم برنامج واجيزت ولكن لم تنفذ لانه ليس من مصلحه البعض انو انا اكبر السنتين ديل مشو سرعه كل الحصل فيهم انو قدر ما القناه تطلبني في شغل بتلقاني لكن انا بديت افقد الدافع والحماس في المواصله لانو البيئه بقت ما نضيفه لحدي ماطلعت من القناه اشتغلت في الاخراج والاعداد والترويج وخلقت علاقات جميله مع المعلنين والرعاه واستقطبت رعايات للقناه واعلانات لكن كنت بعيد بعد فتره شنه ورنه عن العمل البرامجي وكنت بقرا في الصحف الايام ديك كل ما اتكتب عن البرنامج الوقف بعد انا صورت فيهو 3 مرات فقط وكان عدد حلقاته 4 والاكتر من كده انو جاء منتج للقناه وقال داير البرنامج واشترط انو يكون بي نفس كاست التنفيذ القديم لكن انا الوقت داك كنت قفلت صفحه البرنامج وبديت اشتغل في احد مراكز الانتاج الاعلامي كمخرج اول للاعلانات واترقيت فيهو بسرعه حتي وصلت نائب المدير وبعدها انتقلت للعمل في الاذاعه الرياضيه وقناه الامل وقناه قوون وغيرهم وانتهت صلتي بي هارموني التي اصبحت الان غير موجوده علي الاثير واتمني من كل قلبي ان تعود وانا بالجد ماندمان علي الفتره القضيته هناك وسعيد بي كل لحظه هناك مهما كانت مره او حلوه واخيرا اتمني ان اكون وفقت في ان اسرد كل التفاصيل مجرده واتمني اني ما اكون ضيعت وقتكم ساي
في امان الله

[ودالعمدة]

الحبيب الشمشار
عشنا معك شريط الذكريات
فى قناة هارمونى التى لم تعمر طويلا
ونسعد نحن كثيرا بوجودك بيننا
بما حباك به الله من مواهب عديدة
وندعو لك بالتوفيق والنجاح دوما

[فراس]

الشمشار
مساء الخيرات ياحبيب
اقسم بالله العظيم اتمنيت
الكتابة الطاعمة دي تكون بلانهاية ياخي انت مبدع بلاحدود ربنا يوفقك كمان وكمان
تسلم

[ايمن عبد الله]

واتمني اني ما اكون ضيعت وقتكم ساي


بالعكس والله .. عشنا معاك نفس الاثارة ونفس المشاعر .. وانا والله زي ما قال استاذ بدر الدين من الغلاف للغلاف .. وده دليل على قوة الموضوع وجماله
تسلم يا الشمشار .. واتمنى لك التوفيق من كل قلبي ..

[الشمشار]

واصل ... اول مادة اقراها من الغلاف للغلاف

سعدت بحضورك ومتابعتك منورني والله يادكتور تميناها بحمد الله

[الشمشار]

الحبيب الشمشار
عشنا معك شريط الذكريات
فى قناة هارمونى التى لم تعمر طويلا
ونسعد نحن كثيرا بوجودك بيننا
بما حباك به الله من مواهب عديدة
وندعو لك بالتوفيق والنجاح دوما

تسلم ود العمده ليتها تعود لتثري ساحه الاعلام السوداني ليتها
مواهب منو ؟؟؟؟ههههههههه ده انا غلباااااان علي رائي عادل امام

[الشمشار]

الشمشار
مساء الخيرات ياحبيب
اقسم بالله العظيم اتمنيت
الكتابة الطاعمة دي تكون بلانهاية ياخي انت مبدع بلاحدود ربنا يوفقك كمان وكمان
تسلم


كان صدقت كلامك ده واتلحت ناس المنتدي ديل كتابه انا غايتو بعيد في الخرطوم بقعو فيك انت جلد يقولو ليك كلو بي سببك الزول الشبكه ده قرنتنا فيهو انت هههههههههه
شكرآ اخي فراس وممنون لك ولكلماتك

[الشمشار]

بالعكس والله .. عشنا معاك نفس الاثارة ونفس المشاعر .. وانا والله زي ما قال استاذ بدر الدين من الغلاف للغلاف .. وده دليل على قوة الموضوع وجماله
تسلم يا الشمشار .. واتمنى لك التوفيق من كل قلبي ..

تسلم يا ايمن واتمني انو ربنا يقدرنا ونكتب مواضيع تطالع من الغلاف للغلاف
ممنون لك اخي

[ود بري]

الشمشار انت كده ومئة مئة واصل يامبدع مبدع يعني بتاع يعني انسان ماشا ء الله شوف بوست رحبو بي سريع

[ريمون]

الصعوبات الي نواجهها في بداية الحياة تعطينا القوة التي تساعدنا علي الصمود امام المشاكل ..
مستمتعين والله بالذكريات الثرة ..
واهم درس انو الصدق والاخلاص هم من اساسيات النجاح في الحياة ..
ربنا يوفقك في كل المجالات ..

[عاشق الترحال]

سلامات يا الشمشار

يعني يا شمشار تمضي السنين وتنقضي وذكراك في بالي لا تنتهي

والله دوختني معاك من هاديه ل سلافه ل الجعيلي والطاقم وحواء واقول ليك حاجه ,,,,,,,,,, وفقك الله في ما تصبو اليه

[ضياء الدين احمد]

الشمشار انت رجل رائع ومبدع والقراءة لمواضيعك تذهب الكثير من الرهق وتجعل النفس تستريح على ارآئك حدائقك الغناء فالي الامام دوما فأنت رجل مقدام يارائع

[عنكوليب]

شماشيرو ،، ذي ما قالوا اهلنا المصريون : الحلو ما يخلصش ،،،
انت درة من درر هذا المنتدي الفتي طالما فيه أناس مثلكم ،،
الأعاقة هي اعاقة العقل لا الجسد يا عزيزي ،،
ونحن أجببنا كتاباتك وأحببناك قبل أن ندرك انك معاقا ،،
ويزيد اعجابنا بك وحبنا لك ولكتاباتك ،، باعاقتك كما تقول انت ،،

شماشيرو ،،،، ان الله كبير فوق كبير ،،
والعمل في القطاعين العام والخاص بالسودان ،، يحتاج لمراجعة كاملة ،،

ليحفظك الله يا فــردة ،،،
وتجدنا متلهفين لكل ما تكتب أيها الأبداع ،،،

تخريمة برة الموضوع : ياخي انت ما شايف الناس الداخلين شمال
ديل ،،، بس تعرف لي انا ،، ثمــــــح ،،، أصبـــر ،،،،

[mahagoub]

سبع صنائع والبخت ضائع
العجبنى تغلبك على فكرة الاعاقة
وربنا يفتح ليك اى حاجه مقفوله

[خالد 000 ابقرجة]

واصل ... اول مادة اقراها من الغلاف للغلاف


أستاذنا بدر الدين 000
منذ يومين وأنا أتجول هنا في بيتي القديم 000
أتلمس الجدران وأتنسم طين العراميس 000
وتوقفت في هذا البوست كثيراً 000
وجالت بخاطري كثير من المشاركات والتعقيبات التي وددت أن أشارك بها 000
لكن تبقت مشاركتك خير ما عبر عني 000

الشمشار 000

لا توقف السرد عند عتبة هارموني 000

وواصل سردك كسيرة ذاتية 000 تساهم كثيراً في إثراء مخزوننا الإنساني 000

محبة وإحترام 000

_________

بوست تاني الليلة من الغلاف للغلاف (شكلة الضو والهندي ) لصديقنا الخرباش

[ابو عبد الرحمن]

والله يا شمشار تمنيت ان لا ينتهي هذا السرد الشيق الرائع .. هنئيا لنا
هذا القلم الرائع الجميل ... سلمت يداك يا شمشار .....
فانت صاحب قلم جميل وقلب نظيف .. فستكون لك الغلبة ان
شلء الله ...

[خالد علونى]

الشمشار




استمعت جداً بهذا السرد الجميل

فهيئاً لنا بك