شيله سنيه

[الشمشار]

سلام من الله عليكم
بعد غياب اكتر من 72 ساعه
لكن

امس خشيت تاوقت ومرقت
هههههههههههههههه
من خلال البوستات الكتبتها في المنتدي العام حاولت اناقش مشاكل كتيره وسلوكيات في مجتمعنا نتمني ان تزول
الليله قصتنا حتتناول واحده من الصفات السيئه في مجتمعنا من وجهه نظري
وقبل اخش في البوست
بعتذر عن الغياب الذي كان لاسباب خاصه واهو عدنا

[الشمشار]

سنيه بت حلتنا قربت تصل سن العنوسه المامنوامل بعد داك تبقي ام لكن من انا فتحت عيوني دي هي دايره فلان وخاطبها علان وفلان خاتي عيونو عليها
وعلانه دايراها لي ولدها وده كلو ماحصل
وكل عيد بيمر بتسمع من الناس دعوه القابله عروس
اول سنين كانت بتقول يارب بفرحه كده
السنين البعدها بتقول يارب وفي سرها بتقول ياريت يجي العريس قبل فوات الاوان
و السنين الفاتت دي كانت بعد زول يقول ليها القابله عروس بتمش تعاين لي روحها في المرايه لتري هل مازالت في سن الزواج او هل مازالت تحتفظ بشئ من الجمال ممكن يغري العريس يجي
وبعد ان كانت سنيه زبونه دائمه لمحلات الكوافير والبوتيكات اصبحت الان زبونه للصيدليات والدكاتره لانو عللها كترت
(والله الكريمات دي جات لي ازيه البنات لكن من يسمع ومن يقتنع)
قلت ليكم سنيه اصبحت تناجي مرآتها
يامرايتي الحاصل شنو؟
القطر شبه فاتني
القدري عرسن وولدن وولادهم في المدارس هسي
وانا لسه
انا كنت اسمح بت في الفريق ده كلو
(الفريق يعني الحله)
كنت بوقف اولاد الفريق ديل علي فد رجل
اي ولد في الفريق كان بتمناني
لكن .......
الله يسامحك يا امي
(سنيه دي عندها ام اعوذ بالله شرانيه )
لي متين يا مرايتي لي متين ؟؟؟؟؟؟؟؟؟؟؟؟
سؤال سنيه ده ذاتو انا سألتو للمرايه قالت لي اسألني دبل
كدي انا جااااااااااااي
لحظه بس

[الشمشار]

تظل سنيه لغزآ محيرآ جهجه شاويش ناس الحله
فهي رغم انها كانت وختو خطين تحت كلمه كانت دي
اجمل بنات الحله قبل ان تتنازل عن هذا اللقب للبنيات الصغار او الجيل الجديد الا انها مرات كده برضو بجوها خطاب لكن امها العازه بترفضهم
الجميع يري ان سنيه فات عليها الفوات
لكن الوحيده المادايره تقتنع بالموضوع ده حاجه العازه امها ومصره انو بتها مازالت صغيره
ماتدخلوني بالدرب الضيق وتقول لي سنيه عمرها كم قالو الراجل ماتسألو من مرتبو والمرأه ماتسأله من عمرها
وبعد زمن طويل رغم انو العازه حاسه انو بتها صغيره لكن مسكت درب الفقراء والدجالين الوهموها بي انو بتها عاملين ليها عمل ياجماعه العازه لازم تصدق بعد ده الله سنيه دي بالجد عارضها قوي
وبقت العازه خبير استراتيجي في معرفه الفكي الخبير من الفكي الكيسو فاضي وحريم الحله كلهم بقن ساكنات في بيت العازه سكنه وهي تسرد بعض الحكايا عن الفقراء وكراماتهم المزعومه وتغلف كل ماتسرده بالدهشه التي تصيب جميع من يستمع للعازه
اها في يوم من الايام وبعد المغرب طوالي سمعنا زغروده
الزغروده دي كانت شراره الفرحه العمت الحله بعد داك بخبر قرب زواج سنيه التي طلبها احد شباب الحله المجاوره لي حلتنا
طبعآ العازه هي من اطلقت الزغروده الزغروده ذاتها كان طعمها مختلف
(طعم دهشه وراحه وفرحه وشماته مع بعض )
ماتقولو لي كيف اقوم انفصم فيكم والرقيب مايحلنا
الدهشه لعدم تصديق الخبر
الفرحه لانو حست انها وبتها اخيرآ انتصرو علي العارض المزعوم
الشماته من الزوله العملت لي بتها العمل
(مشوها علي حسب فهمها ياجماعه)
انطلقت الزغروده بي جاي
والناس انكسرو في بيت سنيه والعازه بي جاي
ناس النادي جو جااااارين
اعمامك من الجامع كان عندهم اجتماع بعد المغرب لغوهو وجو جارين
نسوان الحله حاااااااااااااضرين
شفع الحله جنب بيت ناس سنيه متلمين
حتي السكاري جو جنب البيت متطوطحين
كدي انا جاااااااااي الصبر بس

[الشمشار]

سنيه خطبوها
هذه المقوله انتشرت انتشار النار في الهشيم في حلتنا والحلال المجاوره لانو حلتنا بحبو بعض وبحبو الخير لبعض
الجميع كان ينطق هذه العباره بقدر كبيييييييير من الفرحه والغبطه
كان عندنا في حلتنا الولد ولد الكل والبت بت الكل
(لكن هسي الوضع اتغير )
هو الما اتغير شنو ؟
ما تجيبو لينا الهواء مكثف خلونا مع سنيه وشيلتها
الفرحه لم تسع الجميع عندما قرر العريس انو الخميس الجاي يجيب الشيله
والزغاريد دورت
وبعد داك بقي الخميس ده عيد في الحله
لو داير من زول قروش يقول ليك بديك ليها بعد تجي شيله سنيه
لو في زول مسافر في الحله بيقول ليك انا ان شاء الله حا اسافر تاني يوم من شيله سنيه
لو في زول عنده امتحانات يقول ليك انا ممتحن الماده الفلانيه يوم شيله سنيه
وبدون مقدمات اصبح يوم شيله سنيه عيد من الاعياد ومناسبه هامه ارتبطت بيها عدد من الاحداث
وبما انو حاجه العازه دي زوله مجامله جدآ وفي نفس الوقت لوامه شديد
فاالحله كلها يوم الخميس كانت في بيتها الشباب بدقو في الصيوان بره والنسوان بعملو في العشاء والبنات بينضفن ويغسلن ويمسحن
والشفع حااااضرين للمراسيل
والناس ملمومه والشمس غابت
من بعيد سمعنا صوت البوري
اهل العريس جايين
لكن طلعو ماهم
عربيه بتدق بوري عشان الفريق الفلاني غلب
(الله يقطع الكوره وسنين الكوره)
دي ما دعوتي انا دي دعوه معظم الحاضرين
طال انتظارنا لعريس الهناء وعائلته ولم يأتي
التوتر عم الجميع
وبعد ما الزمن فات كتيييير والليل انتصف
سمعنا بكاء العازه
الجميع ذهب الي حيث مكان العازه التي قالت وسط دموعها
انا السبب
انا السبب
ثم واصلت العريس ضرب لي قبيل و قال لي الشيله 6 وانا قلت لي الا 12
قفل التلفون في وشي وزعل
انا السبب
انا السبب
نقطه سطر قوي
الي متي ينظر للمال كعنصر اساسي في الزواج؟
نقطه سطر تاني
العازه دايره تبيع وتشتري مادايره تزوج بتها
نقطه سطر مهم
الي متي يسعي الناس للزواج عبر الفقراء والفكي ومتي ينصلح حال المجتمع ؟
نقطه سطر مهم شدييييد
الكل مازال في انتظار شيله سنيه وما اظن حتجي
نقطه آخر سطر
سنيه حردت الزواج ذاتو ربنا يكون في عونها
انتهت

[عنكوليب]

شماشيـــرو ،،

الصمت عند اهل الجمال ،، جمال ،،

كتيرين يقولون ان الفقراء والدجالين والمشعوذين ،، دي خرافات وكلام فارغ ،،كما
أكد ذلك ديننا الحنيف ،،، وكثيرين يقولون انهم ثوابت والعيار اللي ما يصيبش يدوش،،
يعني كان ما كتلوك ،، بكسروك ،،

يا شمشرة ،،، الموضوع ده دخلوا لينا براه كدة في بوست نناقشو ونحاول نعرف رأي
الناس فيه شنو ؟

اما الناس ال بعرسو بالفكي والدجل ،،،،

ماااااااا أظن غايتو ،،

والعازة خليها نرجى ال 12 ،،

وكلو رايح كان 100 رايح ،،

الروح بتروح ،،


كل سنة وانت بخير وكلماتك الحلوة زايدة

بريق ولمعان وصقل ،،

وربنا يعرس ليك ،،

انت وههناييييين كلهم يارب ،،

[الشمشار]

شماشيـــرو ،،

الصمت عند اهل الجمال ،، جمال ،،

كتيرين يقولون ان الفقراء والدجالين والمشعوذين ،، دي خرافات وكلام فارغ ،،كما
أكد ذلك ديننا الحنيف ،،، وكثيرين يقولون انهم ثوابت والعيار اللي ما يصيبش يدوش،،
يعني كان ما كتلوك ،، بكسروك ،،

يا شمشرة ،،، الموضوع ده دخلوا لينا براه كدة في بوست نناقشو ونحاول نعرف رأي
الناس فيه شنو ؟

اما الناس ال بعرسو بالفكي والدجل ،،،،

ماااااااا أظن غايتو ،،

والعازة خليها نرجى ال 12 ،،

وكلو رايح كان 100 رايح ،،

الروح بتروح ،،


كل سنة وانت بخير وكلماتك الحلوة زايدة

بريق ولمعان وصقل ،،

وربنا يعرس ليك ،،

انت وههناييييين كلهم يارب ،،

هههههههه اللهم امين انا بديت من اخر كلاكم كتبتي
انا كتبت عن الدجالين في بوست دحن مسحاخوم في الرابط ده
http://wadmadani.com/vb/showthread.php?t=43632
وعندي بوست كتبتو قبل مده من الزمن باسم الفكي محيان
بنزلو هسي
فعلا كما قلتي كثيره وقليله رايح

[telecom]

ةالله سسنية دى اخير ليها تنسلى الفكرة فى الزمن الصعب دا

[تغريدا]

جاااااااااااااااااااايه افرفر الشيلة دى واحدة واحدة :)