الميج وعدم الوالي والروج في العلالي

[الشمشار]

سلامات
موضوعنا اسمو غريب برضو زي موضوعي الذي نقل لهذا المنتدي وكان سبب اصراري علي التسجيل في منتديات ود مدني النجمه والانسولين وتشاهد غدا
الليله حنتكلم عن الميج وهو صبغه تستعمل في خصلات معينه في الشعر لونه زي الصدا بتاع الحديد
وعدم لوالي دي طرحه يا خالد علوني ههههههههه اجاركم الله منها
اما الروج فهو احمر الشفاه
ههههههههه ماتستغربو انا جااااااااااااااااااي واوعه زول يغير المحطه
جااااااااااااااااااااااااااااااااااااااااااااااااا ااااي
شوله
شكرا لكل من طالع مواضيعي ورد او لم يرد واواصل لكم نشر مواضيعي من ارشيفي عن الشأن الاجتماعي ونقول الله يصلح الحال

[الشمشار]

عدنا
مادعاني لكتابه هذا البوست القصه التاليه
مرقت من بيتنا امبارح الصباح واتجهت نحو منزل احد الاصدقاء عشان نصور في بيتهم اعلان وعشان ما اتاخر في المواصلات ركبت هايس عشان اكسب الزمن ركبت في الهايس قدام واتحكرت انا وعصاياتي جات واحده ركبت جنبي الروج من الاضان للاضان هههههههه ولابسه ليها طرحه اخير منها قعاد ساكت وملابسه علي راي عادل امام لابسه من غير هدوم المهم جاني تلفون وكان من ناس المكتب مدير المكتب والوصايا العشره ومن ضمن الوصايا اجراء مكالمات كتيره لاحظت انو البت الجنبي دي راخيه اضانه تسمع في الكنت بقولو والكمساري اظنو طقطق وانا بتكلم في التلفون وهي متابعه بعد مكالماتي انتهت نبهتني انو الكمساري طق طق
هههههههههه اصطادت في المويه العكره هههههههه اخوكم طبعا وجيه وكده (ماخد مقلب في روحي ) قلت البت دي نمرت علي
وبدت تتكلم معاي وبحركه لذيذه كده نزلت الطرحه نظام شوف الميج وكده
نواصل بعد الفاصل

[الشمشار]

سمعتك بتتكلم عن اعلانات

هكذا بدئت حديثها معي الذي حاولت فيه ان تبرز كل الانوثه الطبيعيه والمفتعله في حديثها

انا

ايوه انتي شغاله في نفس المجال

هي

لا ابدا

تيييييييييييييييييييت

(صوت البوري بتاع الهايس )ومعه طنطن السواق ولعن للحظه تذكرت قصه سيد طنطنه التي كتبتها في هذا المنتدي قبل مده من الزمن

واصلت حديثها معي وهي تلوك علكه ماربيلا في خشمها

(ماتسالوني عرفت نوع اللبانه كيف )المهم انا سكته وهي بدت تثرثر

والله انا كان بالي في صاحبي وجدولي الكان ملان في اليوم داك وللامانه في حديث فرزتو وحديث مافرزتو اصله كانت بتتكلم بي حنكشه كده خلوها ساي

المهم انا سرحت في لبس بنات الزمن ده وظاهره الميج البايخه دي

وارجع ليكم للطرحه اسمها اصلا عدم الوالي ودي طرحه مخرمه تخريم غريب كده والمحزق والملزق الكان لابساهو كوم براهو

والعجب انها قالت لي انها طالبه جامعيه ووشها بالميك اب مابتقدر تفرز لون بشرتو

اخر محطه يا ابو الشباب

فقت من سرحتي علي صوت الكمساري وهو ينطق بالجمله اعلاه

لعنت السرحان والتفكير لانو فوت المحطه ونزلت من الهايس وانا افكر

عدم الوالي

طيب الوالي مشي ويييييييين؟؟؟؟؟؟

انا راجع تاني بس انتو شيلو الصبر

[الشمشار]

صباحكم ورد

بعد فوته المحطه زي ماحكيت وبعدصورت اعلاناتي مرقت علي سعد قشره وهو سوق في بحري اصلا انا كنت مفروض امشي الاذاعه الرياضيه لزياره بعض ابناء دفعتي واصدقائي وزملاء المهنه هناك (مهنه الاعلام ما الشمشره )

دخلت بوتيك اسمو بوتيك داليا وسلمت علي الشاب الفيهو ودار بينا الحوار التالي

انا

السلام عليكم انا فلان الفلاني مخرج تلفزيوني ونحن دايرين نعمل برنامج عن الملابس المستورده

هو

اهلا حبابك

انا

في البدايه البلوزه المعلقه دي عندها اسم

هو

لا

انا

طيب انا سمعت انكم بتسمو الملابس صح ولا ماصح

هو

والله التسميات عاده بتكون للتياب النسائيه

انا

طيب الملابس دي مصدره وين ؟

هو

البتتخش بالمطار والميناء بتكون من الدول الاسيويه زي الصين وتايلاند وسوريا وبعض منها اروبي من تركيا وفرنسا ووانجلترا

انا

والمابتخش لا بالميناء لا بالمطار

هو

من اسرائيل

انا

وبكل الدهشه وين ؟؟؟؟؟؟؟؟؟؟؟؟؟

هو

اسرائيل

انا وبتجي تهريب طبعا



هو

ايوه تهريب لكن انا ما بشتغل فيها

انا

طيب المرحوم كان قدرك بتخش بي وين ؟(المرحوم كان قدرك هي البسه مستعمله تباع في الاسواق العشوائيه واسواق درجه ثالثه ما زي سعد قشره )

هو بعد ضحكه عميقه

شوف يا ابو الشباب الموضوع ده اعفيني منو ؟

انا

ليه

هو

لانو ما عندي معلومات ومابقدر افيدك في النقطه دي

انا

طيب البلوزات والاسكريتيات المفتحه والضيقه دي برضو بتجي تهريب

هو

والله في جزء بجي عديل وجزء تهريب

واردف قائلا

واله يا ابو الشباب الهدوم دي انا ذاتي خجلان منها ولامن ابيعها بكون زعلان للحال الوصلنا لي لكن تقول شنو ؟

انا

وطيب الطرح بتاعه عدم الوالي وبيتنا بي هناك والاخري المسماه دردقني في النجيله دي

هو

والله بنطبق عليها كلامي عن الملابس قبيل

انا شكرا اخونا وبرجع ليك

خرجت من البوتيك وانا اضرب كفا بكف

غاليه ما تنقصنا لينا شويه

اتي صوت امراه اربعينيه ليقطع اندهاشتي وسرحتي فا اتجهت نحو تلك السيده

وحواري معاها هسي بعد الفاصل

ما تمشو بعيد جاااااااااااااااااااااي

[الشمشار]

انا

السلام عليكم

السيده

ا هلا ياولدي

انا

مالكم ياخاله ان شاء الله خير

السيده واظنو ما عجبته كلمه خاله دي وتلقاها في سرها قالت لي يخلخل ضروسك

والله ياولدي زولكم ده ابا ينزل لي السعر (كانت قايلاني انا سيد الدكان )

انتهزت الفرصه ومسكت اسكيرتي والله التقول عاملنو بي ربع متر قماش وسالتو ده بي كم

هو

45 جنيه

انا

غالي فعلا يا اخوي انت بيعك غالي

السيده وقد اعجبها كلامي اي والله

انا

هههههههه وجاتني بارده عشان ادردش مع السيده قلت ليها غالي ساي هو الناس دي قايلانا القروش دي بنلقاها في الواطه

السيده

اي والله ياولدي هسي انا من الصباح اتكلم معاهو لامن ريقي نشف

انا

الموديلات بتاعه الهدوم هنا حلوه بس ما ساتره ولاشنو

السيده

الساتر الله ياولدي بنات الزمن ده ووووب علي منهن

انا

لكن هسي انا اشتري لي لبس محتشم لي خطيبتي من وين ؟

السيده

لا الا تخيط ليها محتشم هنا مافي

انا

والله دي مشكله هسي تلقاك بتتعبي عشان تلقي هدوم كويسه

السيده انا في السوق هنا من الساعه تسعه وهسي الساعه واحده ونص

انا

طيب انتي ما تشتري اي حاجه وامرقي

السيده لا ياولدي البنات امانه وعلي حسب ماربيناهم ما بنلبسهمالهدوم الكعبه دي

انا وقد لمست ان السيده لاتريد الاسترسال في الحديث

الله يعين السلام عليكم

السيده وعليكم السلام

اتجهت صوب الاذاعه الرياضيه وانا مسرور لان مجتمعنا ما زالت فيه امثله من البشر تتمسك بالتقاليد والاعراف مثل تلك السيده

شكرا لمتابعتكم للموضوع وفي امان الله