ود الماذون ضيفنا الاسبوع ده [الأرشيف]

أبوبكرحامد

20-02-2005, 08:51 PM

الأعزاء أعضاء المنتدى ....................

عاطر التحيات والتبريكات لكم جميعاً .

أعزيكم ونفسى لوفاة الشيخ الجليل أبونا البرعى تغمده الله بواسع رحمته.

أولاً أبدى شديد الأسف لهذا الغياب وذلك بسبب عطلة عاشوراء يومى السبت

والأحد وبعدى عن الإنترنت .

البطاقة الشخصية :

أبوبكر حامد الأمين حامد

مواليد ودمدنى 24/11/1965

المراحل الدراسية:

جبرونا الإبتدائية

الأهلية (أ) المتوسطة

مدنى الثانوية

كلية الحقوق _ جامعة الزقازيق _ مصر المؤمنة بى أهل الله

مقيم بمملكة البحرين منذ عامين ونصف تقريباً

مقبل على الزواج الشهر القادم

يللا على الأسئلة وأرجو تكونوا حنينين شوية

امير عبدالباقي

20-02-2005, 09:40 PM

ابن خالي كيفك
سوالي عائلي شويه عاوزك تحكي لي اسباب تسميه
كواره وزنبير والاسامي الاخري ايه قصته

سوف نعود

خطاب العبيد

20-02-2005, 09:46 PM

الاخ ابوبكر حامد السلام عليكم ورحمةالله تعالى وبركاته .

اخوك الزول الشين طبعا :

ماهى العلاقة بينك وبين ناس الكريبة وهل لك علاقة بناس محمد هارون حسان رحمه الله ولديه اخت مقيمة فى قطر حينما سألتها أجابت بمعرفتك وخضنا فى تفاصيل أخرى .

السؤال الثانى :

ماهى علاقتك بناس مارنقوز( محمد) فى بانت قرب نادى الاصلاح .

ماهىاسباب اختيارك للدراسةفى مصروماهى الانطباعات التى تشبثت بك خلال الدرسة فيها .

وهل تعمل فى نفس مجال دراستك ؟

ولك كل حبى وتقديرى ابوبكر حامد

الزول الشين

أبوبكرحامد

20-02-2005, 09:56 PM

شكراً ياأمير لمرورك.

مسألة الألقاب أعرف فقط سبب تسمية كوارة بهذا الإسم الذى أطلقه عليه عمى

أحمد الأمين " كلتش " وقد اعتادوا ممارسة صيد الأسماك بحكم سكناهم بفريق

الجامع ، والكوارة هو سمك صغير الحجم وشقيقى محمد آنذاك كان نحيلاً جداً

فأسماه عمى أحمد " كوارة " فطغى اللقب على الإسم ولعل الكثيرين لايعرفون

إسمه الحقيقى وهو محمد الأمين تيمناً بالشيخ محمد الأمين مدنى السنى.

أما إسم زمبير فلا أعرف سبب تسميته به والعم زمبير موجود بالطائف فيمكن

سؤاله عن سبب التسمية .

أبوبكرحامد

20-02-2005, 10:07 PM

تشكر ياخطاب على المرور ، وأحيى فيك هذا الحس الصحفى فالأسئلة ملانة.

جدتى عائشة رحمها الله كانت تقيم بالكريبة وكذلك عائلتها ، ولدينا الكثير من

الأقارب بالكريبة ومنهم محمد هارون حسان.

مارنقوز هو ابن خالتى زينب واسمه محمد الخاتم أحمد ابراهيم سعد.

أما عن أسباب الدراسة بمصر فالمسألة تخضع لتوزيع البعثات وتم توزيعنا على

مصر .

أما الإنطباعات التى خرجت بها عن مصر فهى كثيرة ولايتسع المجال هنا

لذكرها وأعدك بأن أخصص موضوعاً لهذه الإنطباعات.

أما عن مجال عملى فأعمل مستشاراً قانونياً بشركة خاصة.

أبوبكرحامد

20-02-2005, 11:58 PM

الغالى Myrelan ..........................................

شكراً للمرور وأتمنى أن أكون عند حسن الظن.

بعدين ياخى شنو حكاية المخضرم دى زى ماتكون شفتنى رافع علم الإستقلال

مع الأزهرى ؟؟؟؟

أبوبكرحامد

21-02-2005, 12:07 AM

الأعزاء : خطاب - أبو مرام - إبراهيم - نيازى كشك - بابكر - أبو روان

لكم التحية لسؤالكم عنا وها نحن نجلس على الكرسى وفى انتظار أسئلتكم .

ابوفيصل

21-02-2005, 01:00 AM

اخي .. ابوبكر
لكل التحايا والاشواق ....
طبعا لينا زمن طويل ما تقابلنا ... وحقيقة انا كنت متوقعك بالسعودية ... لكن مسألة البحرين ده عايزه شرح .... ممكن ؟
اخبار شلة ودمدني الثانوية معاك

أبوبكرحامد

21-02-2005, 04:23 AM

الزول الدفعة أسامة مهدى ................ تحايا وأشواق

والله ياأسامة مسألة البحرين دى قضاء وقدر ، لأننى كنت مقيماً بأمريكا

" لوترى " ومن أمريكا تعاقدت مع شركة تدقيق حسابات " كى بى ام جى "

وهى شركة عالمية وعملت بالقسم القانونى للشركة ، ولخلافات اتفقنا على

انهاء العقد وحصلت عمل مع شركة أخرى .

دفعة مدنى الثانوية تفرقت بهم السبل والشخص الوحيد المتبقى هو فريد على

صالح " عمو " وهو مقيم باليمن بعد وفاة والده سافر لليمن بجانب شقيقته .

ابومرام

21-02-2005, 08:05 AM

اولا اخي ابو بكر حامد لك التحية والتجل وانت ضيف وعلم ونبراس على هذا الكرسي الذي تراكمت عليه الثلوج من عدم الجلوس عموما لينا وعد والف وعد

السؤال الاول تعودنا دائما يكون بسسسسسسسسسسسسسسسسسسسيط بالله عليك وبكل صراحة اخونا زيكو في كلمة عن الام ودمدني يديه العافية ( لوخيروني بي حبيبتي ومدني لاخترت حبينتي ليس لانني لا احب مدني ولكن لان حبينتي هي مدني) ( إن صح التركيب ) ماذا تختار بين مدني وشريكة الحياة الموعوده عن قريب كما تفضلت 0

*************************************************
ماتنسى المشرف حايعطينا الاسبوع الجاي عشان الناس تاخذ حقها منك
**************************************************

ابو المهتــدي

21-02-2005, 10:00 AM

[بسم الله الرحمن الرحيم
الحبيب ود الماذون ربنا يعطيك العافية
من خلال حديثك مابين الرحلتين 0 امريكا 0 البحرين 0
المخضرم 0 الزواج 0 احتفال الزواج في اي دائرة 0 اليوم0 او الامس0
نتقبل الدعوة 0 والمشاركة 0 ولو من البعد 0 التهاني مقدما وبيت مال وعيال مع خالص التحية

ضياء الدين احمد

21-02-2005, 10:26 AM

العزيز جدا ود المأذون اولا 1000 مبروك مقدما
وسوالي هو : ماهو سيكون شعورك والبص علي مدخل ودمدني؟

وسوالي الثاني : هل ستصبح العروسه (ضره) للمنتدي أم العكس ‘ ام ستنشغل انت وتظل داخل القفص الذهبي؟
ولك ودي

بابكر

21-02-2005, 11:56 AM

الاخ العزيز ابو بكر لك التحيه الطيبه ,, وارجو ان نقضى معك لحظات جميله, واسئله مفيده00 واول سؤال هو كيف الحياة بأمريكا ؟؟ وهل يمكن الاستفاده من الاقامه هنالك(( عمل, دراسه )) ام الموضوع تحصيل حاصل؟؟ وهل تعاقدك من امريكا له فوائد ماديه؟؟

هل سوف ترجع الى امريكا بعد الغربه00 ام الى السودان ولماذا؟؟

هل انت راض بوضعك الحالى فى البحرين ؟؟

شكرا لك اخى بكور واسف لكثرة الاسئله

اتمنى لك التوفيق من كل قلبى

أبوبكرحامد

21-02-2005, 08:43 PM

شكراً للغالى أبو مرام للمرور .

شريكة الحياة المرتقبة من مدنى وهى بالتأكيد عاشقة لمدنى ، يعنى عشق

جماعى " على غرار زواج جماعى !! "

مع شكرى ومودتى

أبوبكرحامد

21-02-2005, 09:08 PM

عزيزنا أبو المهتدى ..................... سلامات

شكراً للمرور والمداخلة ، وأشكرك على التهنئة مقدماً وفى انتظار مشاركتكم .

مع تحياتى

أبوبكرحامد

21-02-2005, 09:18 PM

الرائع ضياء ...............................سلاماً وتحية

إنت عارف شعورى والبص على مدخل مدنى بس عاوز تجرسنى ، وقد سبق

ووصفت شعورى فى مداخلة فى موضوع ابتسم أنت فى مدنى وأعيد ذلك

وأقول أننى أحرص على نيل حصتى من النوم من السوق الشعبى وحتى

الحصاحيصا وبعدها أقبل برموشى تراب الأرض وصولاً لمدنى وتجدنى أطالع

الشارع يمنةً ويسرةً حتى تلوح معالم مدنى وحينها يغمرنى شعورٌ لايوصف.

أما عن التوفيق بين العروسة والمنتدى فأطمئنك أن ليس ثمة تعارض بين الإثنتين

ودخولى للمنتدى خلال ساعات العمل " زمن الحكومة " ، وسأسعى لإشراكها

فى المنتدى .

مع شكرى على التهنئة وعقبالك .

أبوبكرحامد

21-02-2005, 09:37 PM

المبدع بابكر ......................تحية وداد ومحبة

والله يابابكر أسئلتك محتاجة اعملوا ليها مؤتمر صحفى ، بس بالجد أسئلة جيدة

أما عن الحياةبأمريكا فهى فى مجملها تحصيل حاصل إذ يصعب ايجاد عمل فى

مجال دراستك فتبقى الأعمال الهامشية التى يمكن أن تحقق منها بعض الفوائد

إلا أنك ستبقى محلك سر ، إضافةً للضرائب العالية .مع الوضع فى الإعتبار أن

الكثير من الأوضاع تغيرت بعد أحداث 11/9 فى غير صالح العرب والمسلمين إذ

أصبحت فرص العمل نادرة .

أما عن تعاقدى من أمريكا فليس له فوائد تذكر غير أننى أخطط للمدى البعيد

بعد اكتساب الخبرات وتطوير ملكاتك الخاصة يمكنك توقع بعض النجاحات.

أما عن العودة لأمريكا فلا أعتقد بجدواها خاصة أنه سيكون هنالك عيال تتطلب

تربيتهم توافر بيئة مشابهة لبيئتهم ، وأمريكا ليست المكان الصالح لتربية شخص

يعول عليه فى المستقبل إلا من رحم ربك ، ويكفى أن تعلم أنه بإمكان طفلك

طلب الشرطة فى حال أغضبته أو ضربته وحينها سيزج بك فى السجن ، هذا

فضلاً عن عجزك عن اتخاذ أى إجراء حيال إبنتك فيما لو اتخذت خليلاً يمكنها

إحضاره للبيت والقانون فى صفهم .لكل ذلك أنا عائد للسودان لأنه هو وطنى

وملاذى الأخير ولأنه آن الأوان لإستراحة المحارب.

أما عن وضعى بالبحرين فالحمد لله أعمل مستشاراً بإحدى الشركات وأتطلع

لما هو أفضل على الصعيد المهنى والأكاديمى.

مع تحياتى

خطاب العبيد

21-02-2005, 10:53 PM

الاخ العزيز ابوبكر حامد السلام عليكمورحمة الله تعالى وبركاته

أولا لى بعض الاسئلة الخفيفة والتى ربما تفتح شهيتك لباقى الاسئلة من الاعضاء .

هل تتواصل مع الاهل فى الكريبة ( زيارات أتصال ... الخ ) إختر اى من هذه السبل ؟

يوم الجمعةالفائته جلست فى جلسة غداء مع خالاتى وهن أخوات الخال محمد هارون حسان وعندما اخبرتهم فرحو لعلمهم بأخبارك ولكن حزنو جدا عندما قلتلهم بأنك هنا ولم تقم بزيارتهم فمارأيك ؟

وللعلم هارونحسان هو جدى خالى والدتى ؟

الاستشاره القانونية هى :

ماحكم من طال غيابه عن أهله ولما سمحتله الفرصة لم يقم بصلةالرحم بل عضه جلابتو وقام فاكى البيرك ؟

معخالص حبى الزول الشين

أبوبكرحامد

21-02-2005, 11:12 PM

قريبى القديم المتجدد خطاب ...............تحايا وأشواق

والله ياخطاب وبكل الصدق ليست لدى أية قنوات اتصال مع أغلب الأهل اللهم

إلا الأسرة المباشرة بسبب طول غيابى عن السودان وانقطاع الأخبار .

أحمد للمنتدى أن عرفنى بأهلى وقبل فترة قصيرة تعرفت على الأخ أمير عبد

الباقى ، والآن أتعرف على صلة القرابة بك وهذا يدعم رأى الأخ ياسر فقيرى

فى ضرورة استعمال الإسم الحقيقى لعضو المنتدى .

حكم من طال غيابه عن أهله ولم يزرهم يستتاب فإن عاد لنفس الفعلة يُحد ، والله

تعالى أعلم .

تحياتى لخالاتك ولنا لقاء عند زيارتى لقطر .

مع تقديرى يارفيق

rasheed

22-02-2005, 02:02 AM

العزيز ود المأذون 00
لك التحايا من على البعد وطبعاً عجبتني جداً فكرة الكرسي ده والأسئلة وخاصة الحارة منها ،، وقبل الأسئلة طبعاً عاوز أقول ليك مالك متجرس من الأولاد وإنت لسه في الدرب يأخي أقلاها عندك تسعة أوعشرة سنوات عشان يحصل البحصل ده وفي العشرة سنوات دي لا يموت الأمير لا يموت الجمل لا أموت أنا تفاءلوا خيراً تجدوه وربنا يقدرك لكن رحلتك في الحياة كانت طويلة والله يعينك على الباقي الخايف منو 00
سؤالي هل العروسة بتعرف كوارة ،،،، سؤال برئ أيضاً

أبوبكرحامد

22-02-2005, 03:58 AM

شكراً رشيد للمرور والمداخلة.................................

والله الخايف منو ممكن احصل بالذات مع جورج بوش الى فاز بولاية تانية.

العروس من مدنى ومن بانت يعنى نوارة فريقنا.

أبوبكرحامد

22-02-2005, 11:19 PM

وين الأسئلة ياناس المنتدى عاملين فيها ضبان ضكر شابكنى تعال تعال أها

جيتكم عاوزين تعملوا شنو ؟؟

الغالى Myrelan وينك مختفى فقدنا طلتك البهية .

يلا ياحبايب وصحيح عالم تخاف ماتختشيش

امير عبدالباقي

23-02-2005, 12:24 AM

ابن خالي لك التحيه
كما زكرت انفا بانه تم التعاقد معااك وانت في امريكا هل تم التعاقد بانك سوداني ولا امريكي؟
واذا تم التعاقد معاك بانك امريكي هل توجد فروق في الرواتب بينك وبين الجنسيات الاخري قصدي العربيه؟
لك الف شكر
تقبل تحيات الدكتور محمدالامين حامد (زنبير)

أبوبكرحامد

23-02-2005, 12:30 AM

الغالى أمير .................شكراً للمرور

تعاقدت على أساس أنى سودانى لأننى لم احصل بعد على الجواز الأمريكى .

باقى ليك لو متعاقد بمرتب أمريكى كان بتلقانى بكتب فى المنتدى ده !!!!

طبعاً هنالك فرق لو تعاقدت باعتبارك أمريكى !! عقدة الخواجة ولو كان ود

خفاجة .

تحياتى للعم زمبير وكل ناس الطائف.

ابراهيم

23-02-2005, 06:47 PM

جيناكم يا حبايبنا
بعد غربة وشوق نغالب فيه ويغالبنا

الأخ الوفى ود المأذون .... لك مني أطيب التحايا

يومين بفتش لي سؤال سااخن ولغاية الآن ماف فايدة الظاهر الفكي بتاعك قوية
المهم ديل سؤالين كدا نتصبر بيهم لغاية ما الاساسي يجي

1- ما هو الفرق بين (لووووووووووووووول) و (حجيتكم ما بجيتكم)

مع الأخذ بأن (لوووووووووول) رمز لجيل العولمة والانترنت وهي ضحكة بس ماخدة رمز الكتروني ....

(وحجيتكم ما بجيتكم) دي طبعاً عارفنها كلنا وهنا ترمز للجيل الغابر ، جيل الزمن الجميل ... وحكاوى الحبوبات ناس فاطنة والغول ومحمد الشاطر وووو

يعني الفرق من حيث الثقافة .. السلوك ووو الخ.

2- رايك شنو في أغاني البنات مثل أغنية:

كلو من حبوبة **** مسخت الخطوبة
انشاء الله تجيك رطوبة ** وتموتي في الراكوبة

لك الود اخى ابوبكر ولنا عودة

أبوبكرحامد

23-02-2005, 09:45 PM

المتميز أبراهيم .......................

لك عاطر التحايا وانت تعطر منتدياتنا بكل ماهو جميل.

أنا ماعندى فكى لأنى أنا الفكى ذاتو !!!!!!!!

عن السؤال الأول مازالت لحكاوى الحبوبات تأثيرها القوى فى دواخلنا وهى

حقاً أسهمت فى تشكيل سلوكياتنا ، وتعكس مدى الوئام الإجتماعى السائد

وقتها .

أما عن أغانى البنات فليست كلها هابطة كما يرى البعض ، بل المتتبع لجذورها

التاريخية يجدها اتخذت مظاهر شتى مروراً بالحكامات ودورهن الفاعل والمقدر

فى إلهاب المشاعر الوطنية وحفز الهمم نحو الفروسية وفعل الخيرات وذم كل

مظاهر القبح السلوكى وفضحها ، وتبقى أغانى البنات متنفساً لشريحة واسعة

فى مجتمعنا السودانى يعبرن بها وخلالها عن مكنونات النفس فى ظل التقوقع

الذى نفرضه على البنات ، فنحن الرجال لدينا الكثير من وسائل الترويح سواء

سينما أو كورة أو ارتياد الأندية ، بينما محرم على المرأة إرتياد أياً من هذه

الأماكن ، ثم نعيب عليها ممارسة النميمة والتغنى بساقط الكلم !!!!!

قل لى بربك ماذا أبقينا لها لنعصمها من الإنزلاق فيما نراه هبوط ؟؟؟

المرأة مظلومة ظلم الحسن والحسين وليتنا نسعى لرفع الحيف عنها قبل أن

تحمل السلاح وتفرض أجندتها وتقتسم السلطة والثروة دونما اعتبار لمعيار

التوريث " للذكر مثل حظ الأنثيين " .

مع تحياتى لحواءنا السودانية ونضالاتها وتضحياتها فى سبيل خلق جيل

معافى .

مع مودتى

صدقى

24-02-2005, 02:17 AM

ود الماذون الحبيب
اولا اهلا بك على الكرسى الحامى بالموده و الإلفه و المشاعر الدفيئه ،
ثانيا :
محمد احمد حامد ( الأسيد ) ود شيخ حامد ، اعز صاحب لى فى الدنيا ، طبعا طلعت ابن عمو مش كده ؟
برجع ليك تانى ... كل الود .

نيازى كشك

24-02-2005, 11:35 AM

مبروك وبيت مال وعيال
وماتنسى تعزمنا كويس
وانا عاوز اكون الوزير ممكن
مع اجمل تمنياتى بقضاء اسعد
الا وقات فى ربوع ود مدنى

أبوبكرحامد

25-02-2005, 08:54 PM

المبدع صدقى..................................سلامات

كلك ذوق والله ياصدقى وأعجتنى عبارة :

اولا اهلا بك على الكرسى الحامى بالموده و الإلفه و المشاعر الدفيئه ،

فكلماتك كما رسوماتك غاية فى الفتنة والجمال .

محمد أحمد حامد الأسيد ابن عمى وابن عمتى كذلك ، وحينما ذكرت لى الإسم

كاملاً تأكد لى عمق الصلة التى تربط بينكما إذ قل أن تجد حتى فى العائلة من

يحفظ الإسم بشكله الصحيح ، كذلك تأكد لى طيب أصلك من خلال صداقتك مع

الأسيد على غرار:

عن المرء لاتسل بل سل عن خليله

فلكما منى كل مودة وتقدير

ود الماذون

أبوبكرحامد

25-02-2005, 08:59 PM

الغالى نيازى كشك.............................تحياتى

شكراً على المرور والتهنئة الرقيقة ، وتم تعيينك رئيس للوزراء نسبةً لكثرة

الوزراء ، يللا شد حيلك وشكل الحكومة.

مع مودتى

أبوريلان

26-02-2005, 04:43 AM

المستشار القانونى

أبو بكر ود المأذون - سلالالالالالالالالالالالام

أشكرك لفقدى هذا من أصلك يا غالى .

أتمنى أن تكون فى صحة وعافية وأنت فى البحرين أعمل حسابك هووووووووى من ................. البارده :D

بما أنك مستشار قانونى تم تعيينك مستشار منتدى مدنى المتألق ونرجو القبول ولك الشكر .

مبروك مقدما لإعلان الزواج وربنا يتم ليك على خير وأكيد المأذون كواره .

والله مشوارك كان صعب شديد والغريب فيه بدأ بإغترابك فى أمريكا ثم البحرين ما علينا حال الدنيا فرندقس .

# العمل فى الإستشارات القانونية بين البحرين والسودان ، ماهو وجه الشبه ؟
# بعد السلام فى السودان ودخول كبرى الشركات العالمية بروؤس أموال كبيرة فى مجال الإستثمار فى السودان هل هناك مشروع عودة لحضن الوطن ، علما بأن مجال عملك مطلوب بكثرة فى الآونه الأخيرة ؟
# كيف علمت بمنتدى مدنى ؟ وكيف كان تصورك له قبل دخولك ؟ وماهو رأيك فيه الآن بعد أن أصبحت أحد الأعمدة المهمة له ؟

أبوبكرحامد

26-02-2005, 06:39 AM

الغالى ماى ريلان ............. شكراً لمرورك الأنيق

مجال الإستشارات بين السودان والبحرين يكاد يكون الشبه منعدم لأن

البحرينيين أخذوا بالنظام المصرى المأخوذ أصلاً من القانون الفرنسى بينما نحن

أخذنا عن النظام الإنجليزى ، والخلاف بين النظامين فى إجراءات التقاضى .

أما عن العودة للسودان فهى مطلوبة حتى بدون بترول ، وصدقنى أننى مللت

الغربة التى ابتدأت معى من العام 86 " الجامعة " أى قرابة العشرين سنة غربة

فماذا بقى من العمر ؟؟

أما عن منتدى مدنى فقد تصادف وجود إعلان عنه أثناء مطالعتى لصحيفة

الرأى العام على الإنترنت.

لم أكن أتصوره مختلفاً عن سودانيز اون لاين من حيث المهاترات ، غير أنى

انبهرت لمقدار الموضوعية فى المنتدى وهذا سر تمسكى به ووجودى الدائم الذى

آمل فى أن يضيف لى ويمكننى من الإسهام فى الإرتقاء بالمنتدى لآفاق أرحب.

أبوبكرحامد

26-02-2005, 11:50 PM

وين ياناس المنتدى وين الأسئلة ؟؟؟؟؟؟؟؟؟.

بعدين ياأبوروان نحن اتفقنا على اسبوع وشايف الشغلة جرت ، الحساب ح

اكون كيف ، ماعندى مانع لو تحسبوهو أوفر تايم وكلو بثوابو !!!!!!!!!!

مع محبتى

ود الماذون

ابراهيم

27-02-2005, 08:56 PM

ود الماذون السلام عليكم ورحمة الله

الناس قاعديييييييييين والاسئلة كمان قاعدة ما تستعجل لأنو المثل قال:

(العجلة من اليابان)

1- طيب انا عندي اسئلة خفيفة على الطاير كداً طبعا اذا مافي كلفه واحراج((ههههههههههههههه))..كم مره حلقت الصفر (صلعة) يعني؟

2- عندك مشوار مهم وتأخرت عليه وانت ماشي شافتك الوالدة في الباب وطلبت منك توصلها لمشوار ؟ تتصرف كيف؟؟

3- أحكي لينا موقف محرج ؟

4- ليه اخترت الدراسة في مصر وجامعة الزقازيق بالأخص؟

ولنا عودة

مع خالص ودي

أبوبكرحامد

28-02-2005, 12:47 AM

المتميز هوما ...............شكراً على المرور والمداخلة.

أنا حلقت صلعة مرة واحدة فى حياتى.

أما سؤالك إن كنت ماشى على مشوار وتأخرت وطلبت منى الوالدة توصيلها

فبدون شك الأولوية لمشوار الوالدة فهى الرب الأصغر ، ثم لأننى أصلاً تأخرت

على مشوارى فالتأخر والغياب عندى سيان .

أما عن اختيارى لمصر والزقازيق تحديداً للدراسة فهو ليس اختيارى انما اختيار

القائمين على أمر التعليم يعنى " صدفة وأجمل صدفة " .

أما الموقف المحرج فهو مبدئياً سؤالك ده " زوغة لحين تذكر موقف محرج "

ولى عودة .

مهيرة

28-02-2005, 06:29 AM

عزيزي ود المأذون
شكرا لهذه السياحة الجميلة

بما أنك رفيق ومن ألمع نجوم (( كشكول ود مدني ))

عايزين لينا طرفة قانونية لاقتك في المهنة ؟

توقعاتك لمدينة ود مدني في المستقبل القريب وليس البعيد بعد ما اصابها ما اصابها !

التحية ليك 00

عمك تنقو

28-02-2005, 06:55 AM

عزيزي جدا أبو بكر ود المأذون
التحية الخاصة لك

كبري حنتوب تفتكر فيهو كم لمبة مولعة بالليل ؟
الفندق الذي يحتل أجمل موقع في مدني مقابل للكبري 00 ما ذا يعني لك ؟

ماهي علاقتك بنادي الخريجين ونادي الجزيرة ود مدني ؟

أبوبكرحامد

01-03-2005, 12:41 AM

الغالية مهيرة ........................سلامات

شكراً لمرورك الأنيق .

الموقف الطريف حصل فى محكمة الخرطوم الجزئية ، وكانت هنالك شاكية

وكانت فى غاية الغضب وأثناء الإدلاء بإفادتها أوردت عبارة :

" صحى الفاضى إعمل قاضى "

وحمدت الله ان القاضى صديقى أحمد عمر الباقر وهو رجل سمح الأخلاق ، فمر

الموقف بسلام.

توقعاتى لمدنى سيكون مستقبلها زاهر بإذن الله مادام فيها ناس بروعتك

وروعة أعضاء هذا المنتدى الجميل.

حاشية :

كلُ منانا وحياتك

كتر من زياراتك

مهداه لمهيرة وأعضاء المنتدى

أبوبكرحامد

01-03-2005, 12:51 AM

عمك تنقو ............. بركة الجيت بركة الجيت .........عسل انت وبسكويت

اللمبة الوحيدة المولعة فى كوبرى حنتوب أتوقع تكون فى كُشُك تحصيل

الرسوم عشان العين تشوف.

أما رأيى فى فندق امبريال فأحكى ليك النكتة دى:

قالوا واحد عندو شغلة فى ديوان الزكاة ووصفوا ليهو المكان وقالوا ليهو

جنبو فندق الراجل مشى هناك واتحير لأنو المبنيين فخمين ، أنقر الراجل مادخل

الفندق قايلو ديوان الزكاة.

حاشية :

هجرانا باقى على اندفاع

نرجوك عدم الإنقطاع

مهداه لعمك تنقو ولكل الحلوين.

aborawan

02-03-2005, 02:41 AM

الغالي العزيز والحبيب الرائع جدا ود المأّون احييك والله وانت على الكرسي الساخن وماشاء الله عليك ثابت ثبات ما بعدو ثبات ودي ياها المحرية منك

اما حكاية انك ليك اسبوعين هو انتا شفتا حاجة لسه ولسه ولسسسسسسه شد حيلك ساي :D:D

ابراهيم

امير عبدالباقي

MYRELAN

خطاب العبيد

RASHEED

صدقي

نيازي

مهيرة

الشخصيات الفوق دي هم اصحاب الاسئلة في الصفحة رقم 2 من الكرسي الساخن عايزك تدينا رايك في كل واحد بي بيت شعر او مقطع اغنية لكل واحد على حدا

وبرضو عايز اعرف رأيك في المنتدى واعضاء المنتدى بدون مجاملات ؟؟

شفت اخوك حنين في الاسئلة كيف :):)

صدقى

02-03-2005, 04:40 AM

الحبيب ود الماذون
سؤالين مهمين جدا :
(1) عرسك متين ؟؟
(2) عند أى تلفون للغالى ( الأسيد ) ؟
و تانى عندى ليك اسئله .... بس بعدين :D .

أبوبكرحامد

02-03-2005, 04:53 AM

الغالى أبوروان ..................التحايا بقدر حبك لمدنى .

ابراهيم :

سلامٌ على الدنيا إذا لم يكن بها ******** صديقٌ صدوقٌ صادق الوعد منصف
...............................................

أمير عبد الباقى :

ماقال لا إلا فى تشهده ***** لولا التشهد لكانت لاءه نعم
.................................................. ........

Myrelan :

بنتم وبنا فما ابتلت جوانحنا ********* شوقاً إليكم ولاجفت مآقينا
........................................

خطاب العبيد :

وكت سيرتك إجيبوها ****** أهلى كتير بريدوها

رشيد :

ريمٌ على القاع بين " البان " والعلم ******* أحل سفك دمى فى الأشهر الحرم
.........................................

صدقى :

أملاكو فى العالم ريشة وضمير وكمان
...........................................

نيازى:

ياشبابنا وياعقابنا ويارضابنا وياسمحنا

غيب وتعال غيب وتعال
..............................................

مهيرة :

الليلة من وين يابنية

ناوية على وين السفر

قلتى لى مدنى الجميلة

مدنى يا أجمل خبر
.....................................

بالمناسبة يا أبوروان انت نسيت عمك تنقو وشيل شيلتك معاهو وانا بعمل

المديدة حرقتنى ، والله استر عليك من زعلو لأنو الراجل ده كبير ولمن يزعل

عندو كرتونة حبوب وربنا استر !!!!

عمك تنقو :

إنت فينا كبير

وريدنا ليك كتير

القومة ليك ياوطنى

بحبك ياوطنى

بريدك ياوطنى
............................
ولعمك تنقو عشان مايزعل من أبو روان نهديه هذا المقطع :

الشرق لاح نورو وازدان

سر قلب القاصى والدان

يانديم قوم بينا عجلان

نصتبح آرام وغزلان

الفرص معروضة للآن

ومافى خيراً جابو كسلان " كفانا الله واياكم شر الكسل ياعمك تنقو "

..................................

رأيى فى المنتدى رائع جداً بس الناس بدوا إمسخوا شوية والمشاركات ضعيفة

وتكتب ليك موضوع زى البتأذن فى مالطا لارد لامداخلة ، بجد الناس ميالين

للمواضيع غير الجاده وحقو نبحث الموضوع ده.

خارج النص :

لقيتنى كيف يا أبوروان أخوك من مواليد فريق الحلبة عشان كده خجل " نهى "

أبوريلان

02-03-2005, 05:08 AM

والمأذون سلام
أدروووووووب ولوووف ولا شنو يا أبو بكر شايفك الحكاية لاقت ليك شديد وقعدت بوشك .

# لو خيروك فى السكن بين أحياء مدنى أى الأحياء تحب أن تنتمى لها ولماذا طبعا غير بانت ؟
# ما هو رأيك فى مراسيم الزواج السودانى بكل صراحة وأنت مقبل على الزواج ؟
# ماهو الشىء الشد إنتباه أبو بكر فى المنتدى ؟
# الصحافة السودانية تطرقت لمنتدى مدنى بظرفاء المدينة وأنت أحد كتابه ما رأيك فيما تناولته ولماذا ظرفاء مدنى فقط ؟
# بعد أن أصبحت مشرف منتدى ماذا أضاف لك الإشراف وماهى مرئياتك الجديدة للمنتدى ؟

مشكور ولو قعدت أكتر من كدا بهريك . مع السلامة . ياحبيب .

عمك تنقو

02-03-2005, 06:37 AM

هههههههههههههههههه

هو يا ود المأذون أبوروان ده قايلني أنا ما بشوف ولا شنو ؟
كتر خيرك وياني الحضرت عرسك

بس سوي لينا في شهر سبعة عليك الله
واصبر لي يا أبو روان !

أبوبكرحامد

02-03-2005, 09:32 PM

الغالى Myrelan ................ التحايا لك وصافى الوداد.

شكراً لحضورك البهى ومداخلتك الممتازة.

إن خيرت فى السكن فى أحد أحياء مدنى فسأختار جزيرة الفيل لأنها أصالة

فسكان الجزيرة أصيلين وحُنان ، وقد شاهدت تكاتفهم فى الأتراح وكيف

يتنادى الناس لغداء البكاء حتى لو لم يكن مجاوراً لأهل المأتم تجدهم يحضرون

الغداء فى أعمدة " جمع عمود " ، وهذا السلوك غير متوافر حسب علمى فى

بقية الأحياء ، فالملتزمين بتجهيز غدا البكا هم الجيران الملاصقين أو المجاورين

لبيت البكا أما ماعداهم فيبقى التزامهم أدبى، ويكفيهم أن منهم رجل البر

شقدى الذى كرمته أمثالنا الشعبية فى مقولة :

( شقدى نايم ويدو تدى ) ، وقد صارت تضرب مثلاً فى لعبة الحريق عندما

لاتضبط اللعب وتطلق عنان النزول للخصم .

مراسم الزواج فى السودان تحوى الكثير من مظاهر البذخ والصرف غير الضرورى

لذا وجب تبنى موقف مناهض من خلال المنتدى.

أما الشىء الذى شد انتباهى فى المنتدى فهو روح التآخى التى تميز علاقات

الأعضاء ببعضهم البعض ، وقد دخلت قبل يومين على الماسنجر فوجدت بعض

الأعضاء ولديهم مناكفات تدل على عمق العلاقة والمحبة ، والملاحظة الثانية هى

الموضوعية والإنضباط لدى الأعضاء مما يميزه عن بقية المنتديات التى كثرت

فيها الشتائم والمهاترات ، كذلك ألاحظ تنوع الموضوعات بين مواضيع جادة

وألعاب وموضوعات دينية ، غايتو عينى باردة والله إكفينا شر الحسد .

أما ماتناولته جريدة الصحافة عن ظرفاء مدنى فلأن مجتمع مدنى يتميز بالنكتة

بحكم تميز المدينة بروح المدينة والقرية فى آنٍ واحد ، كما أن ناس مدنى يلتقون

فى الإستاد أو فى السوق أو فى المقابر ، يعنى هنالك حميمية تولد المواقف

الطريفة ويسهل تداول النكتة بسبب التواصل اليومى بين ناس مدنى ببعضهم

البعض .

أما سؤالك ماذا أضاف لى المنتدى فهى أعباء إضافية آمل أن أوفق فى أن

تثمر عن إضافة لمدينة أخرجت للناس برنامج " محراب الآداب والفنون " وكان هو

البرنامج الوحيد الذى يتم بثه من خارج أمدرمان .

أما عن الرؤى للمنتدى الثقافى آمل فى استقطاب أهل الثقافة لإثراء المنتدى

وبقية الإجابة فى مثلنا الشعبى " السواى ماحداث " .

الله إجازيك يا ياسر الأسئلة طويلة بس شحمانة ، وبى طريقتك دى يوم

بتكتل ليك زول !!!!!!!!!!!!

أبوبكرحامد

02-03-2005, 10:02 PM

مشكور ياعم تنقو للمرور ، وانشاء الله تحضر العرس بس أنا كان فى بالى

أعملو فى الشتا عشان أوفر حق التلج فلو عندك معرفة بى ناس حسين عوض

خليهم اعملو تخفيض !!!!!

أبو روان ماتخليهو ولو عايز تودى المحكمة نحن حاضرين حتى رسوم المحكمة

بندفعا بس ماتخلى حقك !!!

عماد الصادق

02-03-2005, 10:27 PM

الرائع أستاذنا أبوبكر ..
حبة ملل خلتنا نغيب عن المشاركة والمداخلة في منتدى مدني الجميلة ..
ولكن .. كنت أتابع استضافتك في الكرسي الساخن..
وقد كنت برداًً وسلاما ..
واستمتعت كثيرا بالمتابعة لردودك ..
نتمنى أن نسعد بمشاركتك في زواجك الميمون إن شاء الله ..

في جريدة الشرق الأوسط أمس ..
خبر أن تلك الدودة تقول في ما معناه أن سوريا أصبحت بُعبعاً في المنطقة
وطبعا الخبر بالبنط العريض .. يعني أهم خبر !!!!!!!!!!

عاوز أعرف رأيك في الإعلام العربي .. وهل ترى أنه يساعد في تقوية الرابط
العربي .. أم يساعد على التفرقة ..

أنا غير ضليع في السياسة .. لكن مغيوظ بدرجة قف!

ولك التحية

أبوبكرحامد

02-03-2005, 11:14 PM

حبيبنا عماد الصادق .............. بى زيارتك بيتنا نور وكلو زينة

حقيقى افتقدناك ياعمدتنا والبركة بالشوفه.

الإعلام العربى جزء من الحال العربى المايل والغير قابل للإنصلاح حتى يوم

القيامة ، والحمد لله عندنا افريقيا ملجأ وملاذ .

aborawan

02-03-2005, 11:15 PM

ابوبكر بما انك حا تدفع رسوم المحكمة وجاهز لمحاكمتي وكلتك للترافع عني ولك شكري :):)

أبوبكرحامد

02-03-2005, 11:48 PM

لايجوز قانوناً للمحامى تمثيل مصالح متعارضة ، وعليه أعتذر عن تمثيلك، بس

ممكن نعمل تسوية يتنازل بموجبها عمك تنقو عن شكواه شريطة إنهاء

استضافتى فى الكرسى الساخن ، وعدم استضافة عمك تنقو فى الكرسى

الملهلب ده ، يا أبو روان اصابعى وجعنى من الطباعة .

aborawan

03-03-2005, 12:45 AM

انا عارف عمي تنقو ما برضي لي البهدلة ومعروفين احنا السودانين ناس حنان وبمجرد اعتذار كل شئ بنتهى وانا هنا وقدام الملأ وبحضور حضرة القاضي بعتذر ليك ايها الغالي عمك تنقو وصدقني ما انتبهتا لي اسمك والعتب على النظر حبيبي :):)

أبوبكرحامد

03-03-2005, 01:11 AM

عالم تخاف ماتختشيش.

الزمن المريح

04-03-2005, 10:01 PM

استاذ ابو بكر اولا ربنا يتم ليك على خير و يسعدك و يهنيك ،،،

ما رايك بان تستقر فى مدنى و كفاية غربة ولى لسع ما جمعت الدولارت و اهديك اغنية عقد الجلاد ايدينا يا ولد ايدينا للبلد
حكومة كان تنصلحى كان تعرفى البى تزحى ما تبارى القول ترحى
كان اخونا البرة جانا و الله صلح الحال معانا
الغربة انشاء الله تعقرى ...... الخ
ياريت تنشاء بمدنى كلية قانون ( حقوق) و تكون عميدها؟؟؟؟؟

صالح ابوشوارب

04-03-2005, 10:57 PM

.

ابوبكر حامد

مواليد نوفبر 1965 ههههههههههههههههههههه

تعرف ضحكت لانك يوم قلت لي في واحد درس معاكم

اسمه ابوشوارب المهم انا لا . قدرك ولا لحم صدرك

قال مخضرم قال

وفي الختام لك تحياتي وتحيات الاعضاء

وكنت مستمتع باجاباتك الجميلة ولذلك فضلت ان اكون في النهاية

باي ...... باي ........باي

-----------------

ابوشوارب

أبوبكرحامد

05-03-2005, 04:14 AM

الغالى صدقى ...................سلامات

استميحك عذراً لعدم رؤيتى لمداخلتك سوى اليوم فلك العتبى حتى ترضى.

أما عن العرس فسيكون فى الشهر المقبل بإذنه تعالى.

أما عن الأسيد فليس لدى تلفونه ولكن سأسعى للحصول عليه .

مع مودتى

ود الماذون

أبوبكرحامد

05-03-2005, 04:22 AM

حبيبنا الزمن المريح .......................تحياتى

والله انا مفكر جدياً فى العودة النهائية لأرض الوطن وكفاية عذاب ، وانا مقتنع

انو الدولارات مابتتجمع ولاحاجة ، واحسن نحصل ود الجبل ونسألو كيف لم

الدولارات وهو لااتغرب ولا اتبشتن ؟؟

أما كلية الحقوق فلا داعى لها لأنو المحامين بقوا زى الهم فى القلب ، ونحن

محتاجين تخصصات تنفع البلد فى مجالات التنمية .

مع حبى

ود الماذون

أبوبكرحامد

05-03-2005, 04:28 AM

عمنا أبوشوارب ......................تحية طيبه

باين عليك ياأبوشوارب خرَّفتَ لأنى لاقلت ليك عندنا واحد قرا معانا ولاشىء

ومتذكر واحد من الأعضاء سألك السؤال ده لكن موش انا لأنى عارف انك دفعة

المرحوم الفاتح موسى بمدرسة جبرونا ، ونحن اصغر من المرحوم التاج اخو

الفاتح ، والحمد لله على توضيحك ده وقول كلامك ده لى ناس ماى ريلان

المابعرفوا المخضرمين الحقيقيين منو!!

عموماً لك تحياتى ونعتبر الحاصل ده من قبيل :

إلتقى جيل البطولات

بجيل التضحيات

مع مودتى

ود الماذون