مصطفي سيــد أحمـــد و أبو عــركي البخيت .. وقنواتنا الفضائـــية ..

[ود الضو]

اولاً في التبادي :
كل عام والجميع بالف خير ..
وكل الاماني محققة يارب ..

نخش في الموضوع :
( حــِــرب الحــراز للمطــــر ) :
شعار اتخذته قنواتنا الفضائية وإذاعاتنا المسموعة
وحرمتنا من ان نستمتع باروع الاغاني لهذين الهرمين
مصطفي سيد احمد
ابو عركي البخيت ..

[ود الضو]

لماذا هذه القنوات ضد مصطفي وضد ابو عركي ؟
لماذا هل لان رأيهم ضد اهل السلطة وبه يتم
دفن اغانيهم ؟ ام هناك اسباب اخري ؟
قاتل الله السياسة التي حرمتنا وستظل تحرمنا
من ذاك الفيض من جميل الكلام
واللحن والصوت والفن الاصيل ,,
هل مانسمعه اليوم من اشعار ( ديكور )
وافلاطون وغيرهم ممن اسمون انفسهم شعراء
هل هذا شعر ؟
والله انه لايجب ان يسمي شعراً ان انصتنا الي
ماغناه مصطفي او ابوعركي ,,,
هل هناك وجه شبه بين من يغنون القنبلة وبابور
الجاز والابرة وتجي ولا نجي
ومابين من غنوا اضحكي وياقلب ونفسي في
داخلك اعاين ومن بعد ماعز المزار ؟
هل هناك احرف قد تشابهت في اغنيات من
يسمون اليوم اساتذة وبين تلك التي
سكنت دواخلنا ,, لماذا ياناس ؟ لماذا لاتعطون
الحق لمن يستحقه ممن يستحق ان يطلق
عليه استاذ وفنان وانسان قد همه الوطن
والشعب ,, اولئك الذين قد سافروا شرقا
وغربا ينشدون راحة اجسادهم المنهكة
حتي يرتاح ذلك البسيط الكادح الذي قد اهلكه التعب والارق ( نحن ) و ( هم ) و ( أغلبنا ),,
غنوا للشعب وللوطن وللحبيبة ووضعوا هم الشعب والوطن فوق همومهم ولم يلتفتوا
الي سرقة لقب او مادة او صعود المسارح
( بالواسطة ) والمعرفة ,, اجتازوا تلك المراحل
بما فيهم من صفات جعلتهم في القمة فكانوا
وظلوا رغم كيد الكائدين ,, لم تزل اغانيهم هي
المسيطرة فلايمكن ( لان يغطي الشيخ بالشملة )
هذا المثل اطبقه انا في نفسي وساواصل
في تطبيقه فعندما اسمع الشجن الاليم او اخوان
الانسانية او أضحكي والله حرام علي قطعا
ان اسمع ولو بالغلط الي القنبلة او تجي ولا نجي
وراجل المرا حلو حلا وشنو ماعارف من تلك
التي اسموها اغاني
ومنحوا مغنواتيتها لقب ( استاذ ) ,,
{ عفواً كل هذا الكلام عن نفسي ولكل ذوقه
ولونه الذي يفضله من الغناء} ,,

[ود الضو]

فإن ذهبنا الي الحبيبة وكيف غناها مصطفي سيد احمد
فسوف نجدها بطعم آخـــر بدون قنابل , ومتفجرات ,
وخباثة في الكلام بل بكل لطافة ,,
اما الحاقدون هؤلاء احسب ان آذانهم لاتشبه
ان تسمع كلمات كتبها الرائع
ازهري محمد علي وغناها الاسمر مصطفي
( وضاحة ) :
وذلك الخيال الاجمل من الجميل فيها حين قال :
جلبت ليك الغيم رحــــط
وطرزت ليــك النيل زفاف
حـــرقت ليك الشوق بخـــور
وفرشت ليك الريد لحاف ...
لاالسكة بيك بتنتهي ولا معاك مليت طواف
ياريتني لو اقدر اكونك
وضاحة يافجـــر المشارق غابة الابنوس عيونك
يـــــــــــــابنية من خبز الفنادق ,,,
ما اروعه من كلام وما اروعها عندما تسمعها
ومصطفي يغطيها بلحنه وصوته المتفرد
ويعلنها علي الملأ ( باني كائن وسأكون )
مهما تفعلون , اعتقالات ومطاردات في تلكم المساءات والجحيم ممتد وهو بطبعه ,,
(يعشق الحياة والناس ),
( يعشق الديمقراطية والحرية ) ولم يلتفت
وقد تناهشته ايادي العسكر وكعهدهـ
لايجدون منه الا الـــ ( تــُــفْ والـ أُفْ ) ,,
عشق النيل والتراب وتلك الارض البتول
وغناها ,, وجد نفسه قد كساهـ الغيظـ وامتلأ
اكثر وهو يري ودعجبنا ( يشحد ) في الرغيف
وعجلات ذلك القطر اللعين تدوس
علي آخر يدعي عبد الرحيم وحمار علي
الطريق طريح مرفوع الاذنين فرط
الجّفلة من تلك الدوريات للكجر كثيرة التوالد والانتشار
( لحظة اللاحوجة )
سائلين عنك ويوماتي رحيل لموانئ المدن النفطية
شقيق ماتقبل يا ابو الحيل في قلوبنا مواجعك متكية
وابعثلك شال الحب مرسال تائهين في بحرو مراكبية
واكتب علي صدر الموج آمال اطفال عمال ومزارعية
كيف حال يا ابوي كيف حال ياخال
بتمسي بيوتنا الكاكية حزنانة بتشكي مآل الحال
والزمن السابكم إيدية ,,,
انه حزن طعمه مر لفقدك ايها الاسمر
مصطفي فانت فينا حي فينا ترزق ,,
ولا غيبتك كانت مرضية ولافوتك كانت مبلوعة
والتعب قد مذّ ضراع النيل سجادة الفقراء
المزاورية ...
( منو القال هو فات زولا وهب كل الحياة
للاغنيات وهرد لسانو عشان يشق قلب السكات)
سرحت في خاطري وسهيت في ذكرتك
سفرك مشاويرك تباريح سكتك ,
نتلاقي لانعرف مدي , ويتجاوز النغم الصدي ,
ويتسابق العمــــر الجميل ,,
وكيف هو الحال اليوم لو تعرف ؟
كما قلت انت ذات يوم
ومعك الزول السمح
صلاح حاج سعيد :
حتي الفصول صابها الجفاف لاغيمة لازفّة هرع
والسمبر البفرح صفيرو غشانا واتقاطر رجع
وشجرنا من نفح السموم غصناً رقص رويان وقع
لاشابي لي ريحة دعاش لاهشّ لي برقاً لمع ..
هذا هو شكل وحال فصولنا اليوم صرنا لانعرف
الخريف فيها من الشتاء ,
واسراب السمبر تعلنه الرحيل الي نقط المطر
والاخضر من الشجـــر ,,
نقطة سطـــر قديـــــم :
كيف أجاوب عن هوانا لمـــا يغلبني السؤال ؟؟

[ود الضو]

مصطفي سيد احمد وتلقيحه للكلمة الراقية واللحن المرسوم
والناتج هجيناً من الفن الاصيل ,, واريج عودهـ يزداد زكاوة
كلما ازداد احتراقا ,, علم الاطفال وحلّ لهم الواجب وغني لهم :
تعالي نطوف تعالي نعلم الشفع ,, وعاش علي حلمه بالغد المشرق دوماً :
يابكرة الفرح يوماتي بيكاتل حزن الاطفال ,, الا باكر ياحليوة لما اولادنا السمر يبقوا
افراحنا البنمسح بيها احزان الزمــــن ,, باكر ضوّاااااي ..
’ آآآهـ يامصطفي ؟؟؟
.. دبّت علي عصبي الافاعي وحقّن مفاصلنا الشتاء
وهبّت رياح كل النوازل والتداعي وزلّ ايقاع الخُطي
قالت حبيبة قلبي اكسيني من جلدك غطاء
سامحني لو نبتت بذور الريد غضب ضربت جزور العشق في الزمن الخطأ
لا ادري انحن الخطأ ام هذا الزمن الكئيب ؟؟؟
فدموع الحزن لم تزل تسيل وفي النفس كثير من الصراخ يترقب الخروج
.. غفل طرفك صرخ ياليل سرق عشقك صباحاتي شتيل احساسنا مافرهــد
( رحـــل صوت المغني حــزين ) ولسة الصوت صراع زمني
مـــواعيـــد عشقي مابتنهـــد ,, مواعيد عشقي مابتنهد ومابتنهد ,,
ومازال الشجن الاليم يعتصر دواخلنا ولكننا نصبر انفسنا والايام
فانت فينا بين حنايا جنباتنا نراك ونشتم عبقك ...
غني مصطفي لسمراء بلادهـ تلك السمحة ذات اللفتات كالغزلان
صاحبة العقل والثبات والماها الولوالة :
قتليها النية متين نتلم والحال بطالة ؟
قالتلي غنية وانت معاي مستورة حال
بنت سودانية محبوبتي ولفتاتا غـــزالة ,,,
سافر وحدانياً مع تلك الغمائم التي تعشق التسفار ليلاً
وهو يحلم بشتاءا دافئاً ,,,
وعلي الباب مازالت نهارات الصبر تواصل الوقوف
وكم ولهان وكم طائر بعد نتف جناحو وراك ولملم حر ندامتو وفات
قطع شامة هواك من قلبو الا هواك نبت تاني وعلي بابك نبت تاني
غمائم شاقِ حضن الليل مسافر فيها وحداني وبدون جنحين
إغنيك الهنا المافي يغنيلك رهافة حسو يفني علي جليد آمالو
( يحلــــم بالشتاء الدافــــــــــــــــئ )
وما اتعسها من خطي تلك :
وقدر مايمشي في سور الزمن خطوات يلاقي خطي السنين واقفات
إلاّ :
هواك نبت تاني وعلي بابك وقف تاني
وملأ الساحات ,,
اسمعها وتعال قول لي ما ارتحت

[ود الضو]

معاك ببقى الزمن حاضر ،،
و بجي العالم قريب مني ،،
و بكون أجمل
بعيد منك بموت صوتي ،،
و يغيب فرح الزمن و يكمل ،،
هواك مد الأفق جواي ،،
رسم قامة الشمس أطول ،،
و خلاك آخر المرسى و كأنك نجمي من أول ..
.....
.. بوعدك يازاتي يا اقرب قريبة
الليلة اهديك نور عيوني بكل طيبة
وبكره اهديك دبلة الحب والخطوبة
أيِ حاجة تزعلك حالاً اسيبا
عندي زيك كم اميرة وكم حبيبة
مين يفرق بين حبايب نادا شوقهم
الامل زاد العواطف في طريقهم
وكل زول في الدنيا شايفنو بيريدهم
وعد من قلبي ورادتي وماشاورت غيري
كل كلمة اقولا بتصور شعوري
دي البريدة وهي حتقاسم مصيري ,,
الم يكن هذا للحبيبة ؟ وما اروعها من حبيبة حين
يغنيها ابو عركي , ويابختها من حبيبة وهي تُغازَل
بصوت ابو عركي وبكل صدق , وعفيف كلام ..
....
واحشنى يا الخليت ملامحك فى حياتى
واحشنى ياالرسيت مراسيك جوة ذاتى
إلا باكر لما ترجع أنا بحكى ليك عن الحصل
وعن بعد المسافة وقربها
ولمن يفارق زول عيون غاليات عليهو
كتير خلاص وبحبها
والله أحكام يا قدر
والله أحكام يا مسافة ويا سفر ...
... والله احكام يازمن وياقدر وهذا الجميل يتوقف
عن البث والتواصل مع وسائل الاعلام وهو بلا
شك ردة فعل لاجحافها في حق ابوعركي ,,
وكيف لابوعركي ان يهمّش ؟ الا انه الاعلام الاعور
الذي لايري الا مغنواتية هذا الزمن الخـــراب ,,
إلا باكر لما ترجع انا بحكي ليك عن الحصل ,, عن
ماذا ستحكي ياجميل عن طي تلك الصحائف التي
كانت محشوة بجميل الكلام ؟ ام عن زمن الضحك
الحلال المباح ومشروع ؟ ام عن زمن مباراة القماري
الزمن ياعزيزي قد كمَن بالشيتاً الكُتُر وجعلك في ذاتك
ونحن عطشي الي فنك ودنك وروعتك ؟
رجوتك ان تعود وتشق صمت هذا السكات العنيف
هلاّ رحمت ايها الجميل ..؟
رجوتك ان تعود وتغني لــ أمونة ,,
ولتعرف : أنو
إنت لما تسيبنا وتسكت وتبعد
خت فى بالك إنو دنيانا فى مدارك
وجد لفافات الصبر دخناها
وكل المقاطع فى غنانا طوعناها
وغريبة غنت فرحة ... لا ... لا
غربة ..لا....لا
تقصد شنو ما عرفتها
وأهى تجربة …..
خطيرة جد وأجتزتها
ولسة واحشنى ,,
واحشنا اجمعين ومعنا تلك القماري راجية المَبَاراة
والشراب من موية المطر , استلف لك قليلاً من
اللفافات للصبر وآتينا ودخنها من جديد عشان نضحك
اقعد عافية انت انسان وفنان ورائع وراقي رغم أنف الحاقدين ..

[ود الضو]

لمتين مواعيدك سراب
والريد شقي وحرقة وجفا
واقـــف بــراك ,,,
مدني النخلي ,,
واقف براك ,,
والهم عاصف ,,
والريح تكسح زهرات الصبا ,,
والقمر يرحل مفارقاً للسماء ,,
ومطر الحزن يعاود الهطول ليجدد
عذابات الارصفة من جديد ومن قبل ان ترتب
حزنك الامس يباغتك آخــر جديد ,,
لمتين مواعيدك سراب
والريد شقي وحرقة وجفا
.. لمتين ؟ والي متي هذه المواعيد السراب ؟
الي متي والغبش التعاني ( تعاني ) ؟
الي متي والصرخة تقف في الحلق تريد ان تُطلق
ولكننا ممتنعون ؟ الي متي ونحن نتف ونأف ؟
ومتي يأتي مصطفي ونستريح نحن من تلك المشاوير
الضّهَب ؟ ومتي سنعود ونجد زولاً بعرف سر حفظ
الوداد في الزمن الصعب ؟ ومتي نستكين في مساءات
الهوي والذكريات والصبابة ؟
متين نصبح ونلقي الشمس قد اتخذت شكلها الحقيقي
واعلنت الشروق كما الاول ؟ متي نصبح ونجد الطفلة
الشايلة اللون وهي بترسم في الوطن الجميل واللوحة
خضراء , فيها قمحة , وسنبلة , ولوزة قطن , ونيل
عريض ممتد , ؟ متي سنبني لنا مملكة في عيون الشمس
وهي تنادي بالحرية ؟
فإن شئتم تعالوا الآن
نرقص رقصة البدء
ونعلم ان نمد الكف
نحو الشمس للدفء
تعالـــوا ايها الجوعــي
تعالوا ايها الفقـــراء
تعالوا ..
وشليل وين راح ؟؟
وين راح شليل ؟ شليل ماراح ,
شليل قايم نصاصي الليل يتمتم ليلو وردية
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار شليل مسدار ,,
حرازنا شليل شليلنا دليب ,,
شليلنا دليل علي البلدات بعد درب التبلدية ,
مزارع بات علي عشقين :
نمرة واحد , تراب بلدو
نمرة اتنين , سماح فوق بت مزارعية ,,
احتجنا للغيمة والبرق القبلي , احتجنا لرشة الارض
في الدارة وفي السهلة صعيدية كانت او شرقية ,
ويا اللوز الفتق في الوادي هولبلب
ويال البحر الطمح ...... هولبلب
ودي القدلة هنا بي الكلام , اقدل يا القدال اقدل
عديلة وزين :
( سألتك بالذي ركز الارض معبد وسوي الناس عليها
مقام ) ماعليك الا تخت النقطة وتشوف البعديها طوالي
سألتك بي حجا الامات ودعواتنا
سألتك بي تميراتن ودمعاتنا
سألتك ( شليل وين راح ) شعر يخليك تدور وتمشي وتاني تجي راجع ,, سؤال × شكل تعجب :
نقول ضلّ الخريف فاتنا ؟ وشليل وين راح ؟؟؟
أبشروا تعالوا آآآالجنيات شليل ماراح
شليل مافــــات ,,
وزي برق السماك الجابهة دقشية
وزي زغرودة البطن الكبارية
مـــرق من شامة القمراء ,,,

[ود الضو]

يا قليب ياما سرحنا
مرة جينا وألف رحنا
ومرة شاي عصرية في طرف الغمامة
ومرة دوبيت للمحنة
ومرة منديل مسقي حنة
ومرة حاجاتاً أجن
وإنحناءات للحمامة
جاي تسألني الدبارة
يا قليب ما فيش دبارة
لا المراكب قادرة تكسح في النزيف
ولا نحن شايفين الفنارة

.. شاي عصرية في طرف الغمامة ,, لك ان تتخيل هذا الحضور عصراً وفي طرف غمامة ( الناس دي بتبالغ )
وعندها خيال براها ولا نوعو شنو ماعارف ؟ وزي تقول ياداب عرفت الاندهاش وجائيني راجع تبقبق لي وتنتل في الآهة وترقرق , ياخوي مازمان انا وانت لفينا الموانئ :
بالقطارات
والمطارات
والسفن
واللواري زاتها ,,
ودقينا اجراس الجديد ,,
واعدنا ترديد الاغاني ,,
وداب انك عارف نقطة الضعف الفيني , طيب بتهابش مالك وانت زيي ضايق الارتعاش ,,؟؟
طيب اقول ليك نادي البقية وتعالوا :
تعالوا نفكر ايه البيحصل فى السودان
الجوع.. المرض.. الخوف
الشك عدم اطمئنان هد الانسان
تعالوا نقعد نحسب خطواتنا
من ما اخدنا الاستقلال
لحدى الآن..
اتقدمنا ولا اتأخرنا ؟
اتأخرنا ولا اتقدمنا ؟
سؤال مطروح لى كل
فئه من فئة الشعب
بالف سؤال: دم اجدادنا
بيحرض فينا على الحرية
وبيذكرنا عشان ما نحافظ
على وحدتنا الوطنية
بس مكتسابتهم بصراعاتنا وبخلافاتنا
دفناها وبقت منسية ...
هسي الكلام دا ماكلام زول اعقل من العاقل زاتو ؟
تعالوا ايوة نقعد ونشوف نحنا ماشين علي اي اتجاه
وراء ولا قدام ؟
الجوع .. المرض .. الخوف .. العطالة .. الموت .. التشرد .. مرام وشيماء , التاية ونادية وبرنجي ..
لبني والبنطلون .. السد والايثانول والطيارة .. الوحل
والموت غرقاً والسيول في قلب العاصمة والتفقد بالطيارة الخيمة ورطل السكر ووقية الدقيق .. النفق بقي بحر ..
يمكن ان تولد منه الكهرباء وتوصل لاثيوبيا ومصر .. والسد مغتغت لليوم الاسود .. مشروع الجزيرة مات وشبع موت ومازال معروضاً في المزاد العلني ومن يزوِد ؟
العين في الفيل والطعن في الضل .. الهواء شال رماد القطاطي والخلاوي الفي دارفور .. وخليل ضرب ام درمان نهاراً وجري .. نيلين متقاطعين والناس عطشانة وسد قدر الدنيا وكهرباء مافي والمستشفيات فيها عمليات عاجلة .. ومن قبل قد مات النور , النور الماعندو حق عملية الزائدة ومات في العنقريب الاسعفوه فيه ودمعة في عينيه وبسمة غازل بها الدنيا وقال لها سلام عليك دار قوم لايرحمون .. التعليم جوة العسكر .. القلم يبقي كلاشنكوف
تطير سنو وتزغرد في فجيج حشا الزول البقول الحق ..
اين الحق ؟ واين زمن الحق ؟ وهل هناك من حق مستحق ؟

[مدنيّة]

مساء الجمال المنثور علي هذا البوست ياود الضو


-----
بوست ذو نكهة خااااصة
واصل فيه
واحنا متابعين

-------
كل سنة انت والاسرة بالف خير يارب

[ود الضو]

قالتلو النعال والطرق انهرن
ماقالتلو جيب شيلن آآالحبيب
غشِهِنْ النقلتي والترزي القريب
بس يا ام الحسن طقـّهن آبزيد طقـّهن آبفيد
إنطقـّن زمن وإنطق الزمن
( لازمك توب جديد ) غصباً للظروف والحال الحرن
شان يا ام الرحوم ماتنكسفي يوم لو جاراتنا جن
مارقات لي صفاح او بيريك نجاح
( دا الواجب إذاً )
وايه الدنيا غير ( لمة ناس في خير او ساعة حزن )
.. والله ولا شيئ غير اللمتين ديل يامصطفي والدنيا دي خربانة وكعب البتفاسل فيها , حال امـُونة ياهو زي حال ( اغلب ) امونات السودان تلتيق وترقيع بعيداً عن المزركش والمطرّز من ارقي البيوتات , اغلب امونات بعرفن حقيقة الزمن الاشتر ومليانات قناعة وسترة وصبر لاكنُوا لامن فتر الصبر زاتو ودا كلو في سبيل الحياة بالحرية المليانة أمان وسلام , الحياة البتسمح للواحد يقدل وسط بلدو وبالوا مرتاح ( بغني النفس ) بعيداً عن راحة الاوراق النقدية التي لاتشتري حرية او تجلب سعادة او حب الناس , الحياة البسيطة : حليب غنم من المراح في طرف الفريق او في الزريبة والحلّة المـِقَننة وكان الحال عسير تُزاق بطعمها الطبيعي خالي من السكر الفي أزمة او من تلك الصُرّة في المخلاية في شكل ( مكعبات ) محفوظة لليوم الاسود , اليوم البباعد خطاوي عبد الرحيم وهو يهم لبداية يوم جديد يستفتحه بالدعاء ( فتاح ياعليم ) ويبدأ المسير ومعه يبدأ اشتغال البال واشتعال الذاكرة , الغبن الشديد , الضيق المحل , الفرج القريب الماوصل , حال اليوم الماكان والماحصل والسكة الحديد لم تغير موضعها بل الهم هو الذي غير الرؤية لها ويأتي النداء : ياعمو القطر , عبد الرحيم قدامك قطر , ولكن قد فات الاوان , ليسيل الدم مطر , ويجرتق للتراب تراب الارض البتحلم وتتمني ان تقع عليها خطي عبد الرحيم وباقي الشرفاء , الارض البتئن وبتسترحم عشان ماتتباع بداعي الفقر او البلادة او الانانية لانها هي الرّبّت الجدود ولسة خيرها وافر وذاخر , لمـّة من الناس الغبش البسطاء البعرفو يطلعوا للرزق ( فجر ) حيث باقي القوم يفترشون الحرير وناسون الزمهرير , اطفال ونساء وشيوخ والدمعة تسقط حزناً للفراق ياعبد الرحيم ( أكان دا الاوان ) والناس اتجمّعت في شكل اتنين اتنين وبدأت لغة السبب شنو ؟ مالو عبد الرحيم الكتلو شنو ؟ الموت قدر والمات سدر ومافي داعي لنكش الشعر والبهدلة , الزول دا ولدوه حر وعاش حر ومات حر , اهل الغبينة لازماً من السبب ماناويين يرفعوا القضية للمخافر التتاجر بالبشر لكن من حقهم يعرفوا سبب ميتة الراجل دا شنو ؟ ياناس كتلوا القطر والقطر ماغلطان زولكم هو الغلطان , تظهر بعض الاجساد التي تكتسي بالمبرقع والمخدّر وتترحم من برّة ومن جوة يعلم الله , خلاص استروه آآناس الامر قضي والبكاء مابجيب شيئ , اطفال القري قالوا لا هم الشاهد للحادثة وشافوا حاجة وشكل الموتة ماطبيعي حاج عبد الرحيم يوماتي بيجي بي هنا ليه مادقشو القطر الا اليوم ؟ طيب في شنو يا شفـّع , عم عبد الرحيم حمارو جفل , من الدورية وهو قام عَصَر ( لي تال اليسار ) متفاديها لكنو وقع في قلب السكة وطحنو القطر , خلاص نمشي المخفر وندون بلاغ ضد القطر , والقطر ياهو المجهول البقلع الخواتم والغوائش من إيد السمحة وبلقي الاحترام من ناس المخفر , الممتلكات :
روشته وجواب , مفتاح ابغراب , اورنيكين سهر , ولبدة الحمار , السحابة تشيل وتصب المطر عشان يغسل الارض من الدم الطاهر الزكي , الدم الذي تجمّع بالحلال وبقي يجري في العروق , الدم السوداني البعرف قول الحق في وجه الظالم المغفل , الدم البغلي من فرط الوجع والزمن الجحيم , زمن الكجر اللافة شال الظلم في يدها ولاتبالي , تقتل وتسلب وتنهب وتشرد وتمزق وتحرق وتصفي , يموت عبد الرحيم ويأتي الف عبد الرحيم , والف ود عجبنا ..
عبد الرحيم مات لكنو بحلم , بحلم بايام زمان المافيها الهوان ولا فيها ضيق , ايام التمر مابشيل بمتوالية ثابته بعدد كم شهر ,, عم عبد الرحيم صحـِي الموت سلام , صحي الموت ..

[ود الضو]

مساء الجمال المنثور علي هذا البوست ياود الضو


-----
بوست ذو نكهة خااااصة
واصل فيه
واحنا متابعين

-------
كل سنة انت والاسرة بالف خير يارب
------------------
يسعد مساءاتك
اختي مدنية
سعيد انا بمتابعتك
دمتِ بالف خير ..

[ود الضو]

حمـــــــــــيد .. بيقول لمصطفى -رحمه الله :

(فيا من تحيّر في سرّو الفنا
إذا الهاربين الجدد خيّروك :
تفوت ..... يا تخون البيوت
تكون من أنا؟؟؟
إذا الغالبين في أُحد أجبروك:
تموت...........يا تعضّي السكوت
فكيف الغُنــــــــــــــــــــــــــــــا؟؟؟
وكت ما الشفوت
بصوتك تصوط
تعلّق بكرتو على الميضنة
تحرِّم عليك
ملاقاة طيوفك
مناجاة ولوفك ورا المشجنة
تغمِّد تشوفك
تتبِّن حروفك
تقلبن كلامك .....تعد احتلامك .....بباكر زنا)

[ود الضو]

وبقيت اعاين في الوجوهـ واسأل عليك وسط الزحام
قبال اتوهـ يمكن الاقي البشبهك ما الليل براح والشوق تعالي بيندهك :
شايلاهـ وين النيل معاك ؟؟؟؟
عصفورة جنحاتا النجوم وانا بي وراك بسأل عليك مدن مدن واعصر سلافة النيل حزن ,
بسأل عليك في المنفي في مرفأ السفن ,
يمكن طيوفك اخريات الليل تمر تملأ البراحات للحزين طول العمر ,
مانحن بينا :
الامنيات والتضحية
بينا المعزات والعذابات في الحياة
بينا الهوي واخلاص علي قلب انكوي
وكلام كتييير قلناه آخر الليل سوا
انو راح نتلاقي لو طال النوي
لكن كلامنا الكان وكان خايف يكون شالو الهواء ..
.....
اعتقد انها لاتحتاج لاي ( مشاققـة ) ؟؟

[ود الضو]

http://www.youtube.com/watch?v=U6Tn9qmWA-w


--------------------------
عشـــــم باكـــر

ومازلنا بنحلـــم بـ :
بكرة الاحلــي ..

[ريمون]

تعرف يا ود الضو ..
لما القي ليك بوست بفتحه ملهوفه وانا واثقة اني حاعيش معاه روعة ما بتنتهي ..
خليك كده طوالي ..
وابقي عافية ..

[زيادة]

الرائع ود الضو تتقاذم الكلمات ..... وتتضاءل الاحرف .... وتجدني اعبر لك بتداخل التعبير والتفسير والتشويق والاندهاش ... موضوعك مس وجع احاول ان اتغلب عليه منذ ان سمعت بوفاة مصطفى والاختفاء القسري للفلته/ ابوعركي وهأنت بقصد او بدون قصد تنكأ الجراح سامحك الله على وجع الكلام ووصولك الى موطن الالم في النفس مصطفي وابوعركي .... وكفى نتمنى معك ان يفك الحظر من قبل القنوات الابداعية .... مصطفى في الذاكرة لا ينضب ولا يختفي هو معنا في كل لحظة وكل ثانية .... ابوعركي جواه طاقات خرافية ودرر وجواهر لم ترى النور بعد وانا وانت وكل محبيه في انتظار لحظات اراها قريبة جدا.... اما فناني هذه الايام فلا تعليق!!!!! اشكرك لانك زينت بالالم افراحنا وصحيت فينا مواجع الدهشة....

[ياسر عمر الامين]

ما أجمل ما كتبت أخى ود الضو.وبإبعادهم القسرى لهذه القمم من الفنانين الرائعين أصحاب المفرده المتميزة والنغم الطروب جافينا شاشاتهم الا قليلا.
واصل فأنت تغزى روحنا بالكلم الطيب والنغم الطروب.ولك مودتى واحترامى.

[ود الضو]

تعرف يا ود الضو ..
لما القي ليك بوست بفتحه ملهوفه وانا واثقة اني حاعيش معاه روعة ما بتنتهي ..
خليك كده طوالي ..
وابقي عافية ..
------------------------
حباب ريمون
لك التحية والشكر الجميل
مرورك انيق دون شك
دمتِ بالف خير ..

[ود الضو]

[quote=زيادة;627936] سامحك الله على وجع الكلام ووصولك الى موطن الالم في النفس مصطفي وابوعركي ....
---------------------------
زيادة
مليون حبابك ( هنا )
تسأل عن موطن الالم وانت تخط توقيعك بالخط العريض :
( لمحتك قلت بر آمن بديت أحلم ................ الخ )
ليت لنا قدرات باقيات حتي نستطيع لملمتها بس :
عشان نقدر نعيش ياخ وسط هذه ( الفوضي ) التي صارت
تغطي كل الامكنة ..
اقعد عافية ..

[ود الضو]

ما أجمل ما كتبت أخى ود الضو.وبإبعادهم القسرى لهذه القمم من الفنانين الرائعين أصحاب المفرده المتميزة والنغم الطروب جافينا شاشاتهم الا قليلا.
واصل فأنت تغزى روحنا بالكلم الطيب والنغم الطروب.ولك مودتى واحترامى.
-----------------
الجميل ياسر عمر
مرحب حبابك آآآالحبيب
مات مصطفي ولكنه فينا حيٌّ يرزق
واما ذاك العركي فالعشم لسة في بان نراه
قريباً وهو يغني ( فنحن عطشي ) لغناء هؤلاء ياصاحب
لك التحية ..

[حاتم عمر]

يا سلام عليك يا ود الضو تعظيم سلام لك على كلامك ولا ينكر ذلك إلا مكابر ،
كلامك دة ذكرني النكتة بتاعة واحد من الجيل الجديد الذي سمع الكاشف بالصدفة يغني في احدى اغانيه فقال مستغرباً هيئ عاين دة بغني لفرفور
عليك الله يا ود الضو استمر ويا ريت لو كل شوية تمسك عملاق من عمالقة الفن فانت اهل لذلك ونحن وراااك

[ود الضو]

يا سلام عليك يا ود الضو تعظيم سلام لك على كلامك ولا ينكر ذلك إلا مكابر ،
كلامك دة ذكرني النكتة بتاعة واحد من الجيل الجديد الذي سمع الكاشف بالصدفة يغني في احدى اغانيه فقال مستغرباً هيئ عاين دة بغني لفرفور
عليك الله يا ود الضو استمر ويا ريت لو كل شوية تمسك عملاق من عمالقة الفن فانت اهل لذلك ونحن وراااك

--------------------------
حاتم عمر
هاك التحية آآآآالحبيب
حكاية ( الكاشف البغني لفرفور ) ياحاتم
اذكر في حلقة من حلقات نجوم الغد احد الشباب ادي اغنية
لعملاق من عمالقة الفن فأتي رأي احد ( لجنة التحكيم )
بالله لجنة التحكيم دي خت تحتها كم خط احمر
خاطب الشاب الذي ادي الاغتية وقال ليه :
شكرا لك يا ابني لانك اديت هذه الاغنية ( أحسن ) من صاحبها ...
لم اجد غير ان اصمت وقتها ( تصدق ) ..
فإذا كان دا جايبنو يحكم وبقول كلام زي دا فما بال بعض شباب اليوم ؟؟؟
دنيا غريبة ياخ ..

[تغريدا]

أخى ود الضو أختيار مميز من قلمك المميز كل عام وانت بأتم صحة وعافية
لى عودة دا بوست مابنفات أبداً

[ود الضو]

أخى ود الضو أختيار مميز من قلمك المميز كل عام وانت بأتم صحة وعافية
لى عودة دا بوست مابنفات أبداً
----------------------
حبابك اختي تغريدا
كل عام ولكِ ماتتمنين
منتظر عودتك بالتأكيد
دمتِ بالف خير ..

[ريمون]

يا سلام عليك يا ود الضو تعظيم سلام لك على كلامك ولا ينكر ذلك إلا مكابر ،
كلامك دة ذكرني النكتة بتاعة واحد من الجيل الجديد الذي سمع الكاشف بالصدفة يغني في احدى اغانيه فقال مستغرباً هيئ عاين دة بغني لفرفور
عليك الله يا ود الضو استمر ويا ريت لو كل شوية تمسك عملاق من عمالقة الفن فانت اهل لذلك ونحن وراااك
تصدق يا حاتم مهندسة خريجة جامعة الجزيرة ومن بنات مدني بس مغتربة ما جات السودان الا للجامعة بتسألنا انتو الكاشف ده منو ؟؟
قالت بتسمع اسمو لكن ما عارفاه منو ..!!

[ود الضو]

تصدق يا حاتم مهندسة خريجة جامعة الجزيرة ومن بنات مدني بس مغتربة ما جات السودان الا للجامعة بتسألنا انتو الكاشف ده منو ؟؟
قالت بتسمع اسمو لكن ما عارفاه منو ..!!
-----------------------------
والكثير من امثالها ياريمون
ولايفوتني هنا تلك الضجة التي اعيتنا
عندما أتت تلك السورية ( زينة ) وتغنت برائعة الكاشف
( اسمر جميل ) الناس قامت وقعدت وهيلمانة
لم يفعلوها للكاشف نفسه ..
كيف تحكمون يابني وطني ؟
هل نحن يجب ان نفتخر بانها تغنت باغنيات الكاشف ؟
ام هي التي كان يجب ان تفتخر لانها تغنت بأروع الاغنيات
لعملاق فن سوداني اسمه الكاشف ؟؟
دنيا غريبة فعلاً ..

[محمد الجزولى]

الحبيب ود الضو
حضور للتحية والتمام
وجاييك برواقة

[ود الضو]

الحبيب ود الضو
حضور للتحية والتمام
وجاييك برواقة
----------------------
محمد الجزولي
حبابك مليون
تأكد باني راجي جيتك آآآالحبيب

[ود الضو]

العميري كتب :
ومصطفي غنـّي :
ادوني من قبلك مناديل الوصول ..
فردت اجنحة العشم في ساحة الوطن البتول ..
ضحكت ماهاميني شيئ وبكيت ولا هاميني شيئ ..
عندك وقفت من المشي وغرقت في ضوء النهار ..
كانوا بتمنوك لو ترتاحي لحظة علي الدرب ..
حبوك حب قدر الحروف الحايمة في بطن الكتب ..
قدر الخيال مامدّ ايدهـ علي السحب ..
مشاققة :
الواحد لو داير يكتب تعليق علي الكلام دا
( يكتب شنو بالله ؟؟؟ )
دحين هـُـم خلوا فيها فرقة لتعليق ؟؟؟
كل خاطر كان بريدك
إلاّ ريدك كان رسول الدهشة في كل الديار

[ود الضو]

واحشنى يا الخليت ملامحك .. فى حياتى
واحشنى يا الرسيت مراسيك .. جوة ذاتى
...
لك ان تسمع و ( تـَلْزم ) الصمت الجميل في حضرتهم عندما يتكلمون ( شجناً ) ,,
يا الرسيت مراسيك جوة ذاتي ..
وبرضو تقول لي ياخ ..
زول يقوم يمشي ويخلي ملامحه في حياتك ..
ويتكِلْ ليك مراسيه جوة ذاتك ..
---------------
جوة دي براها ليها كلام كتير وانا مافاضي ليهو هسي دي .. وبرضو واحشني ..

[ود الضو]

الا باكر لما ترجع أنا بحكى ليك عن الحصل ..
وعن بعد المسافة وقربها ..
ولمن يفارق زول عيون غاليات عليهو كتير خلاص وبحبها ..
..
الحمد لله أن هناك امل مزروع ( لقاء ) ..
ولمّا ترجع ( انا ) بحكي ليك عن الحصل عن ( ايِّ ) شيئ ..
بالتأكيد هناك كميات من الشوق الدفين كلها تظهر عند اللمحة الاولي
بعد الرجوع وما احلي الرجوع الذي يرسمه لنا لحناً واداء جميلنا ابو عركي ..
( عن بعد المسافة وقربها ) فهي بعيدة حيثما كان ( قياسها ) لان هناك مسافة
طويلة يزرعها الغياب وهو دوماً يعرف انتقاء اجود الامكنة حيث ( يزرع ) ..
وطوّالي قام عرَّج علي الحتات الضيقه ( لمن يفارق زول عيون غاليات عليهو خلاص وبحبها ) ..
الحتة دي المشاققة فيها دايرة ( طُولة روح ) وانا الايام دي روحي قصيرة لاني اعيش مثل
هذا الفراق المر في موسم جاف جداً وهواه غير نقي ..

[ود الضو]

وانت لما بتسيبنى وتسافر
خت فى بالك انو دنياى فى مدارك
وجَدْ لفافات الصبر دخنتها وحتي المقاطع فى غناى طوَّعتها
...
كدي خلونا نقيف شوية عند كلمة ( خـُتْ ) دي .. هنا معناها شنو ؟
حاجة كدا زي شنو ماعارف .. يعني هي معادلة ممكن نقول عليها لو داير تسافر دا طرفها الاول ..
ودناي في مدارك دا طرفها التاني .. وبعدين دنياي في مدارك دي زاتها مليانه ( مسئولية )
من ذاك الحبيب يعني انت لو مشيت الواغ واغ او القمر فوق برضو دنيتي حتكون
في نفس المدار ( خاصتك ) هوي الكلام دا كبار ومحشي استعارات وتوريات يعني مليان ( بلاغه )
فـُلْ وجنس الكلام دا احسن الواحد يقعد يسمع ساي ويبطل مشاققات ..
لما نوصل لنهاية الشطرة الفوق البتقول ( جد لفافات الصبر انا دخنتها )
الزول دا مافضل ليهو شيئ يقعد يحرسه حتي الصبر دخـَّن لفافاته ..

[ود الضو]

وغريبة غنت
فرحة .. لا .. لا ,,, غربة .. لا..لا
تقصد شنو ما عرفتها بتقصد شنو ؟؟؟؟
وأهى تجربة ,,,,
خطيرة جد وأجتزتها
...
تجربة خطيرة جد واجتزتها .. انا بشوف الاجتياز لمثل هذه التجارب الخطيرة صعب ( دا حسب فهمي ) ..
لكن برضو ح اقوم الف وادور واشاقق واكون معاك في رأيك ورأي الشاعر لو
قلنا كل الحاجات الحصلت كما جاءت في كلمات الاغنية بكل شجنها وشوقها وبُعد
مسافاتها وقربها وتدخين ذلك الكم من اللفافات بتاعة الصبر وفي النهاية بقوم بربط
كل الحاجات دي بـ ( الرجوع ) ..
لتكون التجربة هي ذاك الفراق المر الذي كان آخرهـ ( رجوع ) ..
نتمني ان يجتازها الجميع ...

[تغريدا]

أطل كسحابة عابرة ابتل بشحيح مائها سطح الارض
وما يزال باطنها يتوق اليها, رحل كضوء البرق لم تكد تراه الاعين بوضوح
فذهب والجميع فى دهشة وهلع. ؟؟؟ انه كرواننا الراحل المقيم الاستاذ الفنان المبدع
مصطفى سيد أحمد. لم يكن رحيل الفنان مصطفى سيد أحمد عن حياتنا مثل رحيل كل لناس
كان لرحيله معنى وطعم مختلفين تماما . أمتلا هذا الوطن ببحيرات وبرك الدموع التى ذرفت من
قبل اصحابه , عشاق فنه ومحبيه ...
جاء كحلم رائع ورحل كطيف مسرع...

[ود الضو]

جاء كحلم رائع ورحل كطيف مسرع...
-----------------------
لم اجد افضل مما إقتبست كي ارد
...
تغريدا هاك التحية اختي الكريمة
رحل مصطفي ولكنه سيظل باقٍ فينا
له الرحمه
ولك الف تحية ..

[ياسر عمر الامين]

حضور دائم ومتعة بلا إنقطاع الشفيف ود الضو

[ود الضو]

حضور دائم ومتعة بلا إنقطاع الشفيف ود الضو
---------------------
ياسر عمر
يسعد صباحاتك آآآالحبيب
مرورك يزين هذه الصفحات
دمت بخير ..