حاج نظريه ..اللهم اني صاايم

[التيمان]

ابو الرجال هييييع ..
الاربد جبل الصمد ..
التكل القديم الامو حيه وهو يتيم هيييع

تجي نصو م شهر رمضان زي ما وصانا ربنا ..
صوم وصلاه وزكاه وايمان .. ونبر والدينا ..

عاوزين نخلي رمضان الشهر ده غير ,, قولوا لي كيف؟
كيف؟ يا حاج نظريه ..

طيب :
اول شي يا ابنائي .. نبدي من السحوور ..
زكان لمن كنا قدركم كده نمشي نشتري نوبه ونشد الجلد بتاعها وكم كشكوش .. وبكون مرافق لينا ناس اكبر في السن
حاظفين للمديح و بعض من القفشات في اللفه .. فكان نبدي من اول الحله لي اخرها بالمديح وفي النهايه بنتجمع في لنص
نعمل دايره كبيره ونمدح فيها حتي اخر ربع سااعه من السحور .. وكان اهل الحي او الحله بدعمونا بالرز بي اللبن والفطير
وشي رقاق .. وعصاير .. يعني كان شي جميل بعكس الان .. يعني هسي الساعه واحده ونص تلقي كلو 3 شفه شايلين طش
ويكوركو سحووور سحووور دق دق دق سحووور كو كو كو سحوور انا مرات بكون لسه ما اتعشيت .. وغير كده ظاهره قبيحه
تلقاهم يكوركو يا مجتبي قوم اتسحر .. يا فلانه قومي اتسحري .. جمب بيتهم او في شبااك البيت .. يعني شقله غريبه ..
وغير كده شكل مع بتاعين الدكانين النايمين بره .. انا ماعارف لي كده حقوو نحاول نعيد الصوره الاولي .. ولا كيف يا ابنائي ؟
كلامك زين يا حاج نظرية ..
تيب :
ظاهره تانيه ..تلقي الشاب من ديل اول ما يقولو لي بكره رمضان فات صلح المكيف .. واشتري لي شريحه اريبا ..وصلح اللابتوب
وكشتينه وضمنه .. اول ما يكون بكره صاايم بسم الله نبدا ..
من الساعه 12 يكون اتعشي 3 مرات .. يخش علي اريبا ونسه وكلامات وحاجات تانيه حامياني .. لحدي اتنين صباحا قام مشي المطبخ كركب
شرب لي عصير وشرب لي علبتين سيجاير وكيسين تمباك ..مرق الكتشينه .. كوارك في الفريق والناس نايمه وده قيمي لالا دي بت اسوود وجوطه في اس ديناري
خربوها مشي ع الضمنه شيش وبيش .. وجهار ورق طلق جاء مارق عمك يا ولادي حرام عليكم يااخ انعل اللهم اني صايم
.. الساعه عملت كم 4 صباحا جاء البيت شغل المكيف خشي علي الفيس بووك وهاك يا ونسه وقروبات وضيفني وتعال شوف صوره دي
لحدي ما الشمش طلعت .. وقام صلي الصبح متاخر ولا لحق الصلاه في اللفه ..
جاء من هناك طفي النور وقفل عليهو الغرفه وانشاء الله ديك في ديك ومن ديك وعيك .. ما يصحي الا قريب للاذان .. يلحق سريع سريع اول حاجه
بوش بتاع التمبااك يجيب كيس كبير .. ويجي رااجع يستحمي ويصلي الظهر والعصر جمعا .. ويبدء يطلع في الفرشاات .. بالله الاذان اذن
تحلف تقول صاحي من صلاه الصبح وكان بحفر في جبال التاكا ولا تنقيب الدهب .. يشرب جردلين عصير وياكل كده لمن يفتر ..
اها عاد يا اولادي ده كلام ؟
والله شين يا حاج نظريه ..
ظاهره عجيبه شديد :
التراويح ..
الحاج يا ولدي ارح طلاه التراويح جدا اتقدم بجيك هسي .. طيب يا ولدي طلع تلفونو يابت انت وين ماشه ع الجامع طيب دسيس نتلاقي هناك ..
الو اي انا بره .. جدا اتلاقينا واتونسنا واسمرنا في ضوء القمر .. وبعدااك .. خش صلي لالا انا لاحق ناس نونو في الجبنه .
يلا تعال شووف جمبه جديده ولمه وجبنه وري سيجاره وري سفه كبي شااي وراسي مصدع وجسمي مكسر واليوم كان صعب
وقبيل في واحد دقه المساعد في الحافله عشان اليوم مسخن .. وهاك ده رقم فلانه بتسل منك وقالت بتساهر في رمضان جيب الاريبا
خلاص يلا نمشي العشاء عشان البت السمحه ست الشاي اللابسه ضيق دي عايزه تقفل .. وبتاع الشيشه بحدر لينا لانو مسكناها مسافه
طيب يلا ارحكم كده الساعه 12 تكون جاات .. ويبدا من حيث بدانا اليوم ..
اها ياربي ده كده ياهو رمضاان يا عيالي ..
والله ياحاج نظريه دييل قلبو الهوبه ..

[أمير عبداللطيف]

شكرا توم عبدالواحد ،، ومعا لصيام حقيقي وربنا يتقبل ،،

[سيف الدين الامين]

والله ما عارف اقول يديكم العافية أو يديك العافية وفي كل الحالات بقول من بدري لكل أعضاء المنتدى وأهلي أهل ود مدني وعموم الأهـل بالسودان مبـارك عليكم الشـهر وتصومو وتفطـرو على خير وربـنا يتقبل صيـامكم وقيـامكم .... رغم الصـورة السـالبة التي حملتها كلمات المشاركة وللأسف هي ما أصبح عليـه كثير من شبابنـا اليوم هداهم الله الا أن الحنين غلبني لأيام رمضـان في البلد وسط الأهل حيث تلك العادات الرائعة التي لا يتميز بهاشعب الا نحن اهل السودان والتي تجسد مبدأ التكافل والتعاضد في أبهى صوره حيث ترى الأبنـاء يفترشون الارض امام المنازل بالسجاد ليجتمع عندها الجيران كل بما جاد عليه رزقه في صورة ولا أجمل ولا أروع من صور التعاون وليمثلو بذلك محطات لعابري السبيل من الصائمين ولا انسى تجمع شباب الحي مع التباشير الاولى لبداية صوم يوم جديد وهم ينبهون أهل الحي للسحور عبر المدائح والضرب على ( النوبة ) ليقابلهم اهل الحي بود اكبر وذلك بمدهم بما بالسحور لانفسهم ... انها والله أيام لن تنسى من الذاكرة نبذل الجهد الجهيد كل فترة واخرى لتجديدها وذلك حسب ما تسمح به ظروفنا العملية خارج البلد وفي ذات الوقت نفاخر بها ونقص تفاصيلها بشئ من العزة والفخار لغيرنا من الشعوب الأخـرى فى الغربة ... مرة ثانية وتالثة وألف لكل اهل السودان وعموم المسلمين اقول رمضان كـريم وتصومو وتفطرو على خير وكل سنة والسـودان بامن وامـان.

[ahmed algam]

تومكس

بوست مية المية

وكل سنة وانتو طيبين

ورمضااااااااااااان كريم

[آلاء عبد الرحمن]

رمضان كريم
وان شاء الله كل الظواهر دي تختفي
^_^

[mahagoub]

تصومزا وتفطروا على خير
المضا لن يعود
لكن نعلم اولادنا الاهتمام بالامور الدينيه
ولو فى رمضان
وحليل زمان وايام زمان