يضربك الضريب .... شقاق العناقريب ...!!

[عبدالرحمن مدثر]

اضاءه ...

اختى التى لم تلدها امى بكل شقاوتها وطحالبها وبنات افكارها شكرا جزيلا يابحر ..


قبل النص

دى كانت ظاهره زمان شكلها هسه اختفت او اصبح فيها القليل .. ظاهره الدعاء على الاخرين .. وخاصه النساء المشهورات بها لقله حيلتهن ولانهن من يواجهن ضغط المجتمع .. ولماضه الابناء وشتارتهم .. لذلك يكن مجبرات للتنفيس عن لحظه غضب بكلمات ليست مقصوده فى ذاتها .....

[عبدالرحمن مدثر]

ان جاز التعبير يمكن ان نسميها ثقافة الكثافة !!

بمعنى ان الطفل الشقى جداً لمن خلااااص يوصل امو مرحلة من الزهج ويجيب كثافتها !!

تظهر هذه العبارة كدعوة على الابن المشاغب ,,

تجيك الطاويه حبالا ,, تجيك ام كلعلع !! النصيبة التجغمك !!

يمه ادينى سكر ؟؟ السكرة الترميك فى الشوك !!

مافى عشاء ؟؟ تتعشى قو !!





نظريه مرتبطه بالوليد صديقى .. فى رحله البحث .. عن المفرده المعاناه اللامقصوده

[عبدالرحمن مدثر]

قاموس فتحت صفحته الاستاذه منى سلمان تحاول ان تجمع اكثر عدد من دعوات الجاهليه زمان بعد ان عفى عليها الدهر واصبحت من الماضى بفضل الصحوه الدينيه ..

زى لما تقول يمه فى لحظه امك فيها خارج الشبكه بفضل تصرفاتك العرجاء ياتيك الجواب ... ابومى اليشقك .. ابومى اليبلعك .. ابومى اليشقك داك الزير امشى اشرب برااااااااااااااك

[مدنيّة]

ياقول المصريين
ادعي علي ولدي ... واكره اللي يقول آمين


-------
وصل عبدالرحمن واحنا متابعين

[عبدالرحمن مدثر]

ام جمال .. كل الجمال ..

ياخ ... انا كل مااجى اخش يقولو لى انت منو

شكل الماجستير فرمط احساسنا وحاجاتنا والذاكره الداخليه ذاتها


دخلتك حلوه ... بدعى على ولدى .. واكره اليقول آآآآمين ..


من خلالها نثبت حقيقه انها كلمات ليست كالكلمات .. مازى مابتغنى ماجده الرومى

بس هى حروف وليده اللحظه .. لاتتعدى حاله الغضب الاستثنائيه .. وان قدر لقايلها ان

يعى كل ماتحمله من مضامين ... لتبرأ منها





بالجنبه

فى ذمتى مشتاقين ليكم كووووووولكم ... افتقدت كثيرا هذا الاحساس

[ابوالنور]

ود مدثر الشوق اردب فتريته في زمن المجاعة

[مايسة]

الطحالب حايمة في الموية يا عبدوش الأيام دي

وما اجمل منى سلمان ببساطتها

حمد لله على السلامة والبركة الإنفكت :p

[مايسة]

ود مدثر الشوق اردب فتريته في زمن المجاعة


اللخو شغال في سوق العيش

[عبدالرحمن مدثر]

ومن اجل وزنه ايقاع و ( balance ) يكون للحبوبه دور كبير فى عمليه الدوزنه

احلى تربيه .. تربيه الحبوبااات .. لانها كل الحنان .. لديهن اجمل حكايه عندما ياحول كل الحب

اليك .. وتشملك بالدعوات .. وتغرقك بالهدايا .. وتدافع عنك فى كل الاحوال .. خصوصا اذا كنت مخطئا

ودعتك ... ربى يعدل طريقك ويهون فكه ضيقك ..المصطفى (ص) رفيقك .. مافى حد يعيقك

انها دعوه للحبان .. لتوثيق شى من الزمن الجميل

[عبدالرحمن مدثر]

ابوالنور نموذج فريد لتربيه الحبوباااااااااااات .. اليس كذلك يارجل وانت تفتح علينا

من خير مطمورتك البااااااسط .. وتخرج لنا من نفائسك الكنوز .. بين السحاره

وعنقريب القد الماكن داااااك المختوت فى نص البيت يحكى عن عظمه عز .. وناس بتهز

وشعور برز .. ولبن برز .. زمن كان اللبن لبن .. هسه بقى حليب .. وبقى يجلب ليك امراض ماانزل الله بها

من سلطان .. مشتاقين تكعيب .. الابس زمنا هو الكعب ..

[عبدالرحمن مدثر]

ياميساء .. كدى خلينى احكى ليك عن حاجه (حميراء ) حبوبه صديقى ودالبله لديها جناح احساس خاص فى الهدى

متى ماسنحت لى الايام بالزياره تجدى اسرع ملهوفا شغوفا لحاجه حميراء رحمه الله عليها .. عمرها كان يناهز العشرين بعد المائه

احساسها الطفولى حاضر .. سنون اللبن بدت تقوم ليها .. وتحدثنى عن المهديه .. وعن ودحبوبه .. ذاكره من التاريخ القديم فى ابهى صوره

وعن نضال جدى ودمدثر الكبير ضد الانجليز .. وانا مستمتع بها وباحساسها .. وبدعواتها التى تختمها فى كل قعده تاريخيه جميله وهى تودعنى

اييييييييييييييييييييك زمن



بالجنبه



فى دعوه قديمه .. لما تكون عندك لداحه زااااائده وينادوكى .. وتقولى شنو

تقوم تجيك صااااااااااده الدعوه


الشنينه ام قرينااااااااااااااااااااااات


بتعرفى الشنينه ام قرينااااااااااااااااااات دى شنو

[خالد علونى]

ود مدثر


الزول الشفيف الراقي
انا بقول الما ربتو حبوبتوا والله تلات ارباع عمروا دفيس

يمشي يشوف ليهو حبوبة من طرف ويلصق جمبها لامن يروي تب





تعرف بعد ما نشرت الموضوع لقين في تا زايدة في ربتو

ياخي دي عملت عمايل في الجملة


يكفينا الله شر التربت

[عبدالرحمن مدثر]

الله الله

علونى .. بين الدفيس .. وبين عيشه الدفسيبه

الموضوع محتاج لترجمه شكلو

خاصه للذين يعانوان من عاطفه الحبوبه المترفه

مشتاقين ياخ

وانا بوزع فى الشوق دا كدا يقوم يجى ناطى الجندى يكرفس شوقنا فى شوال ويحولوا

لرمضااااااااااان آآآبرى عديل .. ماشوق الشوق .. ممكن يكون اى حاجه خااااااااصه وآلابرى قالوا غالى

[مايسة]

غايتو نحن قاعديييييين
مكحلين بالشطّة ومفنجلين عيونّا قدُر ده

http://i53.tinypic.com/2q896jn.gif

عشان ما نجلِّي و لا خربشة


فسر يا يابا -

تخريمة : شــــــــنو

والحميراء ربنا يرحمها - انت يا جناي عمرك كم

[عبدالرحمن مدثر]

عندنا شارع جنب بيتنا افتتحوا قريب ماعارف انو سموا على اسم شهيد

لحدى مامسمعت ليك حوار كدا من ام مزن مع واحده من جاراتها البعاد

وهى فى طريقها الينا

- تعالو بشارع المكحل بالشطه .. بعد داك لفوا يمين تالت بيت على يمينكم ديل نحن

انا اندهشت للمكحل بالشطه .. بسال المكحل بالشطه دا وين .. لقيت الشارع البمشى بيهو طوالى

وزعلان لسسسسسه لييييه يعنى يتكحل بالشطه ... الشططططه حااااااااره ياخ

[عبدالرحمن مدثر]

تلحيقه

بخصوص العمر ... وكدا


اتغاضى عن الاجابه ... عشان مااحرجك معاااااااااااااااى :):)

[mahagoub]

الدعا ده ما خشم بيوت
لكن الله يستر ما تكون ساعة اجابه
والاولاد ما بخافوا من امهم زى ما بخافوا من ابوهم
فالام لاحول لها غير الدعاء
الله يرحم امهاتنا الماتوا والاحياء

[عبدالرحمن مدثر]

حبيبنا محجوب تسلم ياغالى

دخلتك حلوه وذى ماذكرت ان الامهات لاحول لهن ولاقوه .. دوما هن من يتصدن لكل المعاناءه

فالام رغم كل هذا هى نبع الحنان ... رغم الكلمات التى تخرج قاسيه فى بعض الاحيان الا انها

تسهر الليالى من اجل راحتنا .. تعد النجوم اذا اصابنا مكروه



بالجنبه


بالامس شاهدت على النيل الازرق .. دموع الامهات وهن فى انتظار ان يجود عليهن الزمان بطله ابن

ادمن الغربه .. شوف شكل الدمعه لما يهدها طول السهر .. ولما تنزل حرى ساخنه بين الخدود .. بين الشلوخ

هزنى صوت ام وهى تنادى جناها

ياولدى ماخلاس كفاااااااااااااااك .. الغربه شن داير منها

ياولدى انا النوم فراق عيونى بقيت من الساعه اتنين صباحا عينى مابجيها نوم

[بدر الدين احمد الطائف]

دليل على ان الدعوات تخرج من لسان الام كمتلازمه لا يقصد منها شى
ام تكورك للولد ولا البت يلافلان/نه يقوم البيكوركو ليهو يرد نعم تجيهو طوالى دعوة النعامه التزوزى بيك. مع انه جاوب بنعم..

[عبدالرحمن مدثر]

ورده الطائف .. حبيبنا بدرالدين تحياتى

انت عارف امهاتنا زمان لو حاسبونا على كل غلطه كان بنكون خالين عضام

لان شقاوتنا اكبر من حدود الاحتمال .. عشان كدا بتلجا الامهات للكلمات تعبر بها عن شكل العقاب

ولاتقصدها اكيد

[بت أم درمان]

اولا حاجة حمداً لله ان شفناك هنا من جديد يا ابو مزن

تانيا حاجة
عارف يا عبدالرحمن بي سبب الدعوى دي
وحدة طلقوها لانها دعت على بنتها

البت كانت شليقة وشقية وحركتها كتيرة
وامها خلاااااص
وصلت الحد منها
قامت ضربتها
و قالت ليها
يابتي حرقتي دمي ... الله يحرق دمك

في اللحظة دي ابو البت سمع الدعوة دي من الام

قام جاها وبعد نقاش
اطلقت الام

طبعا الاب كان سببه
ان البت ربنا وهبها ليهم بعد طول سنين من الانتظار
وما عندهم غيرها
قال تدعو عليها امها الدعوة دي وربنا يستجيب

غايتو انا ضد الدعاء على الاخرين مهما كانت الاسباب
و مهما وصلت له من درجة الزعل والتعصيب والغليان زاتو

شكرا ابو مزن

[أمير عبداللطيف]

عندما تجد بوست لودمدثر تقعد بالراحه كده وبدون ازعاج عشان تستمتع ،،
سالت واحد من ناس الضرائب قلت ليه انتو المعنيين بدعوه يضربك الضريب ؟
تسلم عبدالرحمن يامبدع ونتابع معك ،،

[عبدالرحمن مدثر]

بت ام درمان تحياتى

وسعيد بوجودى بينكم مجددا .. مداخلتك جميله عشان بتدينا رؤيه اخرى لتاثير الدعوه المجتمعى

الظاهره دى شكلها اصبحت من الماضى .. يعنى مع انتشار التعليم .. اصبح لاجود لها الا القليل

لكن بالجنبه كدا

الراجل دا داير ليهو سبب ساى ... دا ماالسبب الاساسى على اساسو يقوم بتطليق زوجته

لانها رد فعل لحاله بعينها .. بالعقل كدا العاطفه والحنان اكبر عند الام ولا الاب

الام طبعا هى من عانت .. ربت .. ورعت .. فبالتالى ليس لديه الحق فى لحظه غضب عابره

ان يحكم على موقف بعينه ... باعدام حاله شراكه كان نتاجها من احرقت دم امها .. من خلالها كانت

عفويه الكلمات لاتعنى البته ان الكلمات مقصوده

[عبدالرحمن مدثر]

امير عبدالطيف شخصيا منور والله

ورمضان قررررب ياعمك دايرين نعيد ايامنا الجميله ديك

اما بخصوص النجارين ناس الضرائب .. ديل زى ماقلت بضربو من طرف ساكت

الذ شىء .. يتلموا حولك شله عصااااااااابه كدا .. ويجيلوا النظر فى المكان ويقع المبلغ

عليك سبعه مليون .. والبلد فاااااااضيه .. بشوارعها .. وزقاقتها .. ورفوفها

ناس الضرائب ديل صعبين ياخ .. بس مرات الدعوات بتكون همس مامصرح بيها

وياما ماجووووه النفوس مافى ادعيه اييييييييييييييييييك لو ظهرت مشكله

[ودالعمدة]

الخرباش

بتعرف انو سحارتنا ملآنة بلاوى من ثقافة الكثافة :

دعوات حبوبات قديمة :
- (النعامة التزوزي بيك) .
- (أم بنتو التبنّتك ) .
- (الملالة التملّك) .
- (انت بالنيني اللى يخليك تمشي وتنيني) .
- ( تاكل الحمت رمت ) .
- ( يضربك الضريب شقاق العناقريب..
لا حنة لا ضريرة .. لا سيرة لا عديلة ..
الناس في صلاة العيد وانت في التعب الشديد) .
والدعوات الحديثة :
- تجيك الكشة (في السعودية ).
- وتجيك الضريبة ( من الضرائب ) .
- وتقيف فى الزلط و تتكلم غلط .
وقد نهى النبي صلى الله عليه وسلم عن الدعاء على الأولاد والأموال والأنفس ، خشية أن يوافق ساعة إجابة ، فقال صلى الله عليه وسلم : ( لا تَدْعُوا عَلَى أَنْفُسِكُمْ ، وَلا تَدْعُوا عَلَى أَوْلادِكُمْ ، وَلا تَدْعُوا عَلَى أَمْوَالِكُمْ ، لا تُوَافِقُوا مِنْ اللَّهِ سَاعَةً يُسْأَلُ فِيهَا عَطَاءٌ فَيَسْتَجِيبُ لَكُمْ ) رواه مسلم .
ومن رحمة الله تعالى أنه لا يستجيب دعاء الوالدين على أولادهما إذا كان في وقت الغضب والضجر.
من جوة السحارة : مبروك الماجستير ياخ

[عمر الجوكر]

لقيت موضوعك وجيتك جاري بشوق ومحبه ودمع جاري
ومستمتعين واصل

[ريمون]

عبد الرحمن مدثر .. البوست روعه والاسلوب اروع ..

[عاطف عولي]

يا خرباش واحد صاحبي أظنوا أنا قال لي تصدق لو واحد قالي يا وجيه ما بصدقوا عارف ليه؟ قال مع أنو بيقولوا القرد في عين أموا غزال امي قاعدة تقولي لي يا شين يا قرد.

ولو جيت مع أخواني داخل البيت تلاقينا في الباب وتبوس أخواني وتقول ليهم حلاة الدنيا عليهم لكن لمن يجي دوري تديني قمدة وتقولي لي ادخل يا الشين شبهك أبوك.

هي ليه بتعمل كدي تكون زعلانة من ابوه؟

[أمير عبداللطيف]

متابعين ،، عليك الله واصل ،،

[عبدالرحمن مدثر]

وانا انتمى اليك ياوطنا تفرد بالجمال وبالبهاء

ودالعمدها يااجمل سكن تحياتى ياغالى

جيتك طاعمه يابا وانت تفتح سحاره الذكريات والايام التى كانت رغم القسوه

لها قيمه .. وتتسامى باحساس اللمه المنها بتجى الزحمه وتتبخر الحاجات وتجى الكثافه


كدى خلينى النتحكر معاك ونجتر الذكريات


الجنا دة غلبني تب يتلّب من عنقريب لي عنقريب لامن يدق الدلجة وللا ينفقه ونبقى في حل و اربط

تشيلك عافيتك ياوليدي

الله يملاك عافية

الله يغتي عليكم

يافلانة أقفلي الباب الواطة مغربت الوليدات ديل ماتخلوهم في الشارع ساعة المغارب

كر علي ياود أمي ادوك عين عين ماصلت علي النبي.





بالجنبه

يباركو ليك السمح يايابا .. ان شاء الله ببركه هدا الصباح والنبى المصباح وجبريل فى مكه صاح تتعلى مراتبك وتلقى مرادك

[عبدالرحمن مدثر]

المحبوب عمر الجوكر

تحياتى وسعيد حد التخمه بهذا التواصل الجميل خصوصا لما يكون مرتبط بتداعيات زمن جميل

اى نعم فيه مافيه من قسوه الايام .. لكننا من صنعاناها بشقاوتنا ..

جميله الحياه لما تلقى قرصه اضان .. ولما تلقى دعوه مقابله مشبعه بكل التحنان تطير بك الى عنان السماء


أها ودعناك الله و الرسول وداعة تغطيك و تنجيك من كل بلاء


وباتجاه معاكس ومشاكس

غووور من هنا يا شافع بلاء يخمك تاني ما اشوفك جاري بجاي قدام
الكانون دا .

[عبدالرحمن مدثر]

تسلمى ياريمون

منكم ناخذ زاد رحلتنا ونعشم انو نكون يوماتى حضور

انا من عشاق الطرف التانى لمعادله محطتنا هنا

مابين قسوه الام الغير المقصوده

ورصيد الحبوبه الذى يملاك عافيه لامن تترع

كدى ونحن قاعدين هنا مستمتعين بالحضور التواصل

فى قصيده كدا عن حبوبه واطار لوحه جميل

يحمل توقيع

اسماء صديق

خلونا نستمتع بالاحساس ونجيكم تانى




حبوبا .. حبوبا ..
لولايا.. لولايا..
كلام يونسنا ..
قمريه قوقايه..
حجاك يدغدغنا..
حنيه وآلايه..
لهيجك السكر ..
الحان ودوبايا ..
دميعتك الجاريه ..
فى الرايحه والجايا ..
تجبر الخاطر ..
زى غيمه مطرايا ..
حضنك الدافى ..
شجيره ضلايا ...
لقيمه تسندنا ..
فى بطينه صاصايا ..
جقيمه فى جوفنا ..
تزيل عطيشتنا ..
وتروى حرايا ..
رويحتك الحلوه ..
تناجى جوايا ..
هديمك البارد ..
يغطى بردايا ..
مسيحه من ايدك ..
تزيل لمرضايا ..
بسيمتك السمحه ..
تضوى عتمايا ..
كلامك الصادق ..
يا يمه يا ضنايا ..
عطفك الزايد ..
بحسو فى حشايا ..
دخريك فى الدنيا ..
ابريق ومصلايا ..
سبيحه من سكسك ..
ودعواتك الغاليا ..
حبوبا.. حبوبا ..
لولايا.. لولايا ..
ربى يخليكى ..
وتشوفى لهنايا ..

[عبدالرحمن مدثر]

هاهااااااااااااا

عاطف عولى .. القرد فى عين امو غزاااال مقوله لاتحتاج الى برهان لانها احساس يمشى على الارض

كدى خلينى اجر الشريط بتاعى

فى يوم وانا بقرا فى صحيفه الدار (بالغلط طبعا ) لانى وجدتها قدامى يعنى مااجتهدت شديد لقناعه داخليه

بانها لايمكن ان يسموها الدار .. لان للدار قداسه الاحساس .. وحنيه اللمه .. وهى ابعد مايكون مما ذكر

اها ياعولى

وجدت ام سعيده بمعاناتها لديها تقريبا 3 اطفال .. شاءت اراده المولى ان تكون لديهم اعاقه غريبه بعض الشىء

ليون فى العظام .. لايستطيعون الحركه .. ولك ان تتخيل باقى التفاصيل ومقدار الالم

الفاجعه ان الاب رحل وترك الام لوحدها تعانى الامرين

لايمكن ان نسميه ابا اذا هج وقال لها ..

كلو منك انتى مابتعرفى الاتجيبى اولاد معولقين ....!!

القصه ولحدى هنا اكثر ايلاما

لكن تعال باب الامل لما يتفتح .. وتخرج عاطفه الامومه فى ابهى حله

الله ... الله .. الله

سعاده الام تكمن فى انها ومع كل صباح جديده كل متعنها فى انها تحمل اطفالها على ظهرها

وتذهب بهم الى المدارس .. وتنتظر متعه المتعه نهايه الدروس وهى تعود بهم الى الديار

ناس بتنطط فرحه


بالموقف دا .. هناك تاكيد دائم على ان الام هى ينبوع الحنان الدافق













تلحيقه


هو صاحبك دا يعنى شين شنأ مرررررررره

[عبدالرحمن مدثر]

امير عبداللطيف

ان شاء الله بيتك ما ينسدّا

وان شاء الله عشمانك ما صدّا


دعوه حبوباااااااااات كاربه






بالجنبه

اها الحج الاجراءات بدت .. باقى ليك الحاجه عندها النيه تزور المصطفى صلى الله عليه وسلم

[naz_imam]

عبد الرحمن مدثر ياجميل الدواخل هذا دابنا بك دائما تكون انت البؤرة لكل ماهو جميل .. واصل بدون فواصل

تخريمة: هذا البوست الرائع يفتقد الحبيب عثمان جلاله ارجوا ان اراه هنا قريبا جدا

[نزار احمد كوارتي]

والله يا عبد الرحمن بوست بطعم حُضُن حبوبه

عشان تعرف زمان الدنيا كانت عامله كيف والناس كانو عاملين كيف

انا بتزكر وانا بتشاقي وامي وابوي وحبوبتي ام ابوي راقدين في ضُل الضحا

وبشربو في الجبنه، الجماعه شابكني ليك لا بتقع، يا ود أقعُد ساي، يا جنا روق

وأقول كده أجي واقع وأمي تقول لي ود الكلب عشان تاني ما تسمع الكلام،

وابوي يضحك بي طول حِسو، وحبوبتي تقول لي أمي الله يعلم ما هو كلب ولا ولدو ولد كلب

وابوي يقول لي حبوبتي عليك الله يُمه شوفي المره دي ماعندها أدب كيف؟؟

وتقوم حبوبتي تقول ليهُ، حاشاها والله يعلم ست الأدب. وأُمي تضحك والناس كلها تضحك وانا براي الببكي من الوقعه


واصل واصل يا حبيب باقي نحن مفرجخين راجين حكاويك

[mahagoub]

الله يخلى لينا كل الحبوبات والامات
امى ربنا يرحمها
لمان تكون فى ساعة تجلى
وبعد صلاة المغرب
وانحنا ندور حواليها فى انتظار الشاى المقنن
ترفع ايديها وتدعوا لينا
لا تسيب ولى ولا شيخ
من الحديد وضرب الدبيين

[abomazeen]

بإنشراح صدر وبشاشة كلماتكم ادخل هنا
وتجدني اجلس مستمتعاً بكلام الحبوبات
وخاصة لدينا تقصير ثقافي كــبيــر
عشان كده كلامك سمح بالحييييل
تسلم إنت من كل شر يا حبيب

[مدناوية]

عبدالرحمن مدثر ..

أناقة حوار ..

رقة معاني ..

لطافة كلمات ..

تناسق جُمل ..

حديث شيق ومثير ..





يديك قددر ما يرضيك يا جناي ..

ويعليك ما يدليك ..

[تغريدا]

بوست حد الروعة والأمتاع سلمت الايادى

[نزار حسن محمد]

الله يعلى مراتبك كمان وكمان ياعبد الرحمن ود حشى بطنى
الرسول فيك شوف الدعوه دى كيف ياود مدثر
طبعاً اخوك تربية حبوبات صير
جميلاً انت ياودمدثر

[ابوالنور]

ابوالنور نموذج فريد لتربيه الحبوباااااااااااات .. اليس كذلك يارجل وانت تفتح علينا

من خير مطمورتك البااااااسط .. وتخرج لنا من نفائسك الكنوز .. بين السحاره

وعنقريب القد الماكن داااااك المختوت فى نص البيت يحكى عن عظمه عز .. وناس بتهز

وشعور برز .. ولبن برز .. زمن كان اللبن لبن .. هسه بقى حليب .. وبقى يجلب ليك امراض ماانزل الله بها

من سلطان .. مشتاقين تكعيب .. الابس زمنا هو الكعب ..
وحاة الله انا ما عجوز لكن حضرت الزمن ده
السودانيين بطبيعة خلقها فيهم الله سبحانه وتعالي لاسباب معينة وبدون اسباب .
فهم ناس يحبون الخرافات والاساطير .
ربما كان ذلك لطبيعة حياتهم البدوية قديما والله اعلم
فقديما (حبوباتنا كان بحجونا ) بمخلوقات خرافية ولكن
وحسب علمي انه لايوجد اوصاف معينة للمخلوق الخرافي يتفق عليها كل السودانيين شمالا شرقا وغربا فالبعاتى في الشمال غيره والغول في الشرق غيره في الغرب.وفاطمة السمحة في الوسط ليست كما في غيره.

[ابوالنور]

اللخو شغال في سوق العيش

يشغلك بقده ونيه قولي امين

[عبدالرحمن مدثر]

صديقى naz-imam

ياحليل زمان .. واحساس زمان .. حنيه زمان

يديك العافيه كلماتك طل .. وحضورك فل

وكلنا فى شوق لذلك الهمباتى الجميل جلاله ولحروفه السقيا

[بنت الرفاعي]

:):):):)
:):):)
:):)
:)

[عبدالرحمن مدثر]

ياجماعه .. انا كتبت كلام كتير هنا لنزار وداحمد حتى بالاماره عرجت على رزمه من حبوباتى

بالاحساس المشترك .. ناس فضلو واسع وحنيتها لما تطبك وتنسيك وعثاء السفر .. وبت الحداد الضحكتها

البديل الناجع لاى هم مصاحب

غريبه مالقيتو ... الشالو منو