ديون السودان .. و غنماية حاج الطاهر ,, وجدتها !!!

[بدرالدين أحمد موسى]

طالما البنقو ما من المخدرات .. أنا حليت ليكم مشكلة ديون السودان

ما عارف ليه إتذكرت قصة حاج الطاهر و أنا أتابع إجتماعات الديون على دولتنا الشمالية الوليدة بعد 9 يوليو 2011 . ناس يقولوا اعفو الجنوب و الشمال يشيل الديون .. و ناس يقولوا ناس الشمال لازما يسمعوا الكلام .. و ناس يقولوا ماعندنا عشان ندفع ليكم ..

البخارى و عابدين قاعدين فى بيت البخارى بيشربوا فى كريستال و بيلفوا فى البنقو البقى ما من المخدرات ( هلوسة ساى) .. المهم بعد ما سكروا , و إنبسطلوا .. نسوا إنهم ماحضروا العشا .. و بينى و بينكم السيجارة ( الخدرة) دى بتفتح الشهية .. الجماعة ضربهم الجوع , و محلات البوش شطبت .. و بقوا محتارين يعملوا شنو ..

فجأة غنماية جارهم حاج الطاهر قامت تكورك .. البخارى قال لى عابدين : بس لقيتها ليك .. غنماية حاج الطاهر دى ولدت ليها سخلة قبل شهرين و نص .. أنا أتلب الحيطة و أرفع ليك السخلة دى , نضبحها و نتعشى بيها .. و قد كان .. ضبحوا ليك السخلة قطعوها و أدوها ليك الصاج .. بعد ما أكلوا .. حفروا ليهم حفرة و دفنوا كل مخلفات الجريمة ,, و عابدين مشى بيتهم ..

10 دقايق .. عابدين جاى راجع للبخارى داقى ليهوا الباب .. : هسه يا البخارى أخوى , حاج الطاهر ده كان عرفنا سرقنا غنمايتو دى .. نقول ليهو شنو ..
البخارى يقول ليهو : يا عابدين أخوى الزول ده بيعرف من وين .. يا أنا .. يا إنت .. و نحن ما بنجيب ليهو سيرة .. أمش نوم ياخى ..

يصبر شوية .. يدق الباب يلقى ليك عابدين .. ناس الحلة كان عرفوا يقولول علينا شنو .. و نودى وشنا وين .. و الله يا البخارى أخوى إلا كان نرحل . و نفس الموال ...

البخارى لما زهج .. قال لى عابدين : أدخل يا أخى و أسمع كلامى ده كويس :
أنت يا عابدين بتموت ..؟ عابدين قال ليهو أيوه .
طيب أنا بموت؟ . عابدين قال ليهو أيوه
طيب حاج الطاهر سيد الغنماية ده بيموت ؟ قال ليهو أيوه
جميل جدا , طيب يوم القيامة : إنت بيبعتوك ؟ قال ليهو أيوه بيبعتونى
طيب . أنا بيبعتونى ؟ قال ليهوا أيوه
حاج الطاهر سيد الغنماية ده , بيبعتوه ؟ قال ليهو أيوه
حلو .. غنماية حاج الطاهر الأكلناها دى بيبعتوها ؟ قال ليهو أيوه
البخارى قال ليهو : خلاص ياخى حاج الطاهر يسوق غنمايتو و يمشى !!

و قس على ذلك !!