اذا كان عمرك اقل من 18 سنة فهذا الموضوع لا يخصك

[صالح ابوشوارب]

طبعا اذا كان عمرك اكبر من 18 سنة ارجو ان تكتب لينا ذكرياتك عن واحد من هذه الشخصيات أوالمعالم أوالآثار أوالاماكن الموجودة في مدني وارجو ان تكتب فيما لايقل عن ثلاثة اسطر حتي نعيش معاك احلي الذكريات اذا كان عندك الاستعداد ان تكتب اكثر من موضوع فارجو ان تكتب كل يوم موضوع واحد ؟؟؟

1 ــ الشيخ العليش 2ــ الشيخ شاطوط
3 ــ كبري ود قيحة 4 ــ فريق الحلبة
5 ــ تابيه 6 ــ طيارة
7 ــ سيد مصطفي 8 ــ طير البقر
9 ــ غابة امبارونة 10 ــ باشميل 11 ــ مكرم مانسي 12 ــ الناظر العمري
13 ــ الشايقية ست الفطور 14 ــ عيوشة ست الفطور
15 ــ جنينة كعكاتي 16 ــ عمك حسن جادالله
17 ــ عمك ابو ظريفة 18 ــ عمك كشك
19 ــ عوض حلاوة 20 ــ كبري حجة عشة
21 ــ عباس الهرة (سائق بص ) 22 ــ ابو شمس
23 ــ شجرة الزونيا 24 ــ قرض النصارا
25 ــ الفسيخ والموز المزوبر في فريق الحلبة
26 ــ البص السريع
27 ــ بص الصاروخ

[بابكر]

والله العظيم انا كنت شفال فى اجازة المدرسه فى البص المكتوب عليهو الصاروخ وكان سواقو ابراهيم برفس وكان فى خط الدبا غه السوق وبعرف التيمان الحلبه وكوبرى المكنه والعالى وحيدر قطامه وحركه ياعم قسم وعباس شدو ومامون قطامه والريح الليثى وترعه خيره والتاج مكى الفنان فى البطرى وجكسا بتاع ترب النصارى والتوم قرشو وود الفتلى وانا كنت من عشاق فطور الشايقيه كفايه ولا ازيد :D :D :D

[أبوريلان]

أبو شوارب
سلام
والله فعلا ذكريات لها إيقاع

بس يا أبو شوارب دا 18 سنة ولا 38 سنة ههههههههههههه

طيب 25

الموز المزوبر ( فريق الحلبة )
طبعا دى شموم يا أمير عبدالباقى دا مافريقكم ماترد على الراجل ولا عامل أضان الحامل طرشا
ما قاعد تاكل العجور بى دودو بالشطة من شموم .
والمنقة المزوبره ، طبعا شموم رقم لا ينسى فى فريق الحلبة وكل أهل المدنيين بعرفوا شموم حتى ولو لم يأكلوا من زوبارها . والفسيخ الحلو ما مسيخ .
فعلا ذكريات حلوه يا صالح وربنا يديك الصحة والعافية وترجع تشوف فريق الحلبة أصبح كيف .

[بابكر]

الشيخ العليش كان عندو ابريق وبيعمل حركات لم افهمها الاقبل فتره وهو كان رجل صالح بحق ولكن الناس لاتعرفه جيدا وكان غلبا مايتواجد بجوار جامع الحكومه والبحر
اما كبرى ودقيحه فأذكره جيدا لان فيهوسرقوا عجلتى
طير البقر ده فى سوق ام سويقو بجوار البحر بعد المدرسه الشرقيه
اما غابة امبارونه فهى محل الرحلات المحبب لنا وكانت مشهوره بالقرود وهى بجوار دردق
مكرم مانسى وعمك لاظ ديل ارمن كانوا من اكبر التجار فى مدنى
اما الشايقيه فكنت اعشق فطورها وهو له نكهه خاصه لمن تختو فى الدرج لغايه حصة الفطو ر مره شافو استاذ الريح الليثى شالو منى لى اسع انا زعلان
اما جنينة كعكاتى كنت اذهب لها واسمع محمد الامين واشرب شاى وكانت غاية فى الاناقه والجمال وبمناسبة الاناقاقه... بتعرف اناقه بتاع الاستديو .؟؟ طبعا هو الان جارى فى الحى
اما عمك حسن جاد الله فهو مشهور بالسمك وهو صاحب مطعم بجوار السكه حديد
ابو ظريفه وكشك هم ملوك الفول فى مدنى وانا كنت فى السودان الاسبوع الفات فطرت فول عند كشك
اما عوض حلاوه ده كان مسبب الرعب فى مدنى كلها وكان من اعتى المجرمين وافتكر انو مات فى السجن
اما كبرى حاجه عشه فهو فى شارع الظلط بتاع الدباغه وانا كنت كمسارى فى نفس الخط طبعا فى اجازة المدرسه
ابو شمس الخواجه بتاع البا ر مش برضو
اما شجرة الزونيافى الحى البريطانى كنا يومنا كله متشعلقين فيها وطبعا القميص يتحول لونه الى بنفسجى من الزونيا والواحد يأخد علقه تمام ورغم ذلك نعود مره اخرى
اما فريق الحلبه اذكر جيد ا زقاقاته الكثيره ذى المتاهه
اما البص السريع والله لى معه قصه لو حكيتها ليكم تموتو ا من الضحك وخلوها مستوره ياناس
اما بص الصاروخ ...... طالع فوق وانت تعرف
والله يالها من زكريات

بالمناسبه انت يا ابو شوارب انت من اولاد الارطه ((حى البوليس))

عشان درس معاوى واحد اسمو ابو شوارب ماعارف انت ولالا؟؟؟؟؟؟؟؟؟؟؟؟؟

[ضياء الدين احمد]

رغم انني من مواليد الدرجه الي ان حوش جدنا وداعة الله لم يزل في مربع 11
وكل الاجازة نقضيها هناك وكبري ودقيحه كان مقيلنا تحتو ولكن الاهم من ذلك يا ابو شوارب انت نسيت ام حجين البتقعد جنب دكان سراج وهي من الهواره ربنا ارحمها فكانت بتظبط القنقليز بالشطه وابو رجيله ( القنقليز بالسكر) وكذلك التبش يا لها من ايام لاتنسى

[ابراهيم]

يا سلااااااام يا صالح

كشك الفسيخ والموز المزوبر في فريق الحلبة ، وغابة امبارونا رغم اني من حي المكي لكن الحاجات دي حاجات راسخة فينا، وذكرياتها ليها وقع خاص اضيف ليكم خدوم ست السندوشتات ، وابو عركش ، وجزارة صلاح بشارة ، وحي الحفرة ، وجناين العمد والمعالم كتيرة ولنا عودة

[بابكر]

بالمناسبه الموضوع ده ((((((( مصيدة العجائز بتاعين المنتدى )))))) يعنى كل واحد يغرف قدر عمرو ولاشنو ياجماعه؟؟؟؟؟؟؟؟؟؟؟؟؟؟

[نيازى كشك]

بلادك حلوة ارجع ليها نار الغربة مابترحم

الزكريات صادقة ونبيلة


لقد ابكيينى ياليت ايام الطفولى تاتى من جديك
انا اسكن حى المدنين وكنت بدرس فى مرسة الاهليه ب المتوسطة
وكنت دائما عندما يفكونا البيوت بنمشى فريق الحلبة عند شموم
وناكل الموز و البرتقال والحتة المزوبرة بتقطعها لينا شموم
بالسكين وتقول لينا اكلو مافيها شى وناكل الشطة بالعجور
ومرات نصل البيت متاخرين وهاك ياضرب
والفول ومطعم عمى كشك وهو عمى

وزكريات جميلة
وكبرى حاجة عشة والعشير
واللة رجعت لينا حاجات عجيبة

[aborawan]

والله يا ناس نحنا فوق العشرين وقربنا من التلاتين بس ما عرفتا ولا زول من الناس ديل :(

دي باين عليها ضريبة التربية خارج الوطن :(

[صالح ابوشوارب]

شكرا للاخوان جميعا ومن ذكرياتكم تحصلت علي مواضيع سوف تري النور ولكن وين اولاد مدني وحكاية مطعم عم حسن جادالله البقي بجوار السكة الحديد وام سويقو الوداها جوار المدرسة الشرقية شنو يابكور الظاهر انت اتلحست واما انت يا URLELAN طلعت عجوز كنت بتاكل الزوبار ( بالمناسبة بتعرف واحد اسمه صديق زوبارة ؟ الرد بالبريد الخاص
ويا ضياء جدك الله يرحمه كان بيقعد قدام دكان النعيم وعابدين وياابراهومة نحن في انتظار ذكرياتك اما انت يانيازي لنا ذكريات مع ابراهيم ومدني كشك في مدرسة جبرونا وياابو روان انت (( الفة )) شنو وما بتعرف تابيه وما سمعت بطير البقر ولااكلت الزوونيا حياتك ضايعة المهم تابع وسوف تعرف الحكاية ثم
لنا ولنا ولنا قصص كثيرة انتظرووووووووووووووونا

[امير عبدالباقي]

فريق الحلبه ده تخصصي نبداها بعشه زوبار الله يرحمها دي كانت بتبيع العجور بالشطه وكانت معاها بتها القسيمه عندها العجور والمنقه والموز وتجي التي خطفت الشهره شموم طبعا شموم كان عندها التفاح والعنب والموز والمنقه والشطه والعجور وجنبهم علي طول ست ابوه وهجوه ديل بتاعين الخضار وجنبهم بيت عمك احمد ببيعو الربيت ايام لاتنسا .
بس اعمل حسابك ما تدخل خانه الطريفي مفهومه دي
ولنا عوده

[صالح ابوشوارب]

يا امير نسيت شموم كانت بتشيل قزازة موية ((( الصحة ))) تحت صينية الزوبار
بالله مش احسن من موية الصحة بتاعة البلد دى ؟؟
ولا انت بتشرب من التيبار ؟؟

[أبوبكرحامد]

شكراً ياصالح وشكرى للأعضاء المتداخلين .

مادامت الذكريات عن مدنى فأبدأ بمدرسة جبرونا الإبتدائية وبائعات الفطور

عيوشة وبخيتة بت ام دفرا وكذلك الرضية وهى زوجة العم رمضان فراش المدرسة

حسن جاد الله يوجد مطعمه بالسوق الكبير ملاصق لمطعم أبو ظريفة ، والأن

يجاورهم مبنى بنك الإدخار .

أبو ظريفة لديه مطعم فرعى بالسوق الصغير وأولاده إبراهيم وصفوت وعابدين

ويحيى - نسأل الله أن يتغمد برحمته من انتقل منهم للدار الآخرة ، أما ظريفة

فهى زوجة العم الماحى بلال صاحب الفرن بسوق بانت " مكانه فرن الدى حالياً"

وأولاده عادل والتجانى والطريفى ومعاوية ، وابن عمهم الطيب حسن بلال

سكرتير فريق نجوم بانت سابقاً وصاحب مناكفات وتحديات مع نجوم البيان وهو

مشجع متعصب لأهلى مدنى ولديه عبارة مشهورة بإستاد ودمدنى عندما يغضب

" الجدرى ال يبوجنك " وهو مقيم حالياً بالسعودية .

تلك خواطر سريعة ولنا عودة.

ود الماذون

[أبوبكرحامد]

السادة / أعضاء المنتدى ....................... التحايا العطرة

يخطىء البعض فى الإلمام ببعض المعلومات حول واحد من الرموز الوطنية ألا

وهو البطل / عوض حلاوة إذ يعتقد الكثيرون أنه قاطع طريق ومجرم ، وآمل أن

نسهم فى تصحيح الصورة فعوض حلاوة كافح ضد الإستعمار الإنجليزى وقد آتاه

الله بسطةً فى الجسم أخافت الإنجليز فأشاعوا أنه من عتاة المجرمين وانطلت

الحيلة على الكثيرين " لعل الصورة القريبة لذلك هى نعت الفدائيين الفلسطينيين

بالإرهابيين " .

نأمل أن نكون قد وفقنا فى رد الإعتبار لهذا البطل القومى والتكفير عن الوزر

التاريخى الذى اقترفناه فى حق الرجل فتوجب توضيح الصورة خصوصاً من

أهل مدنى " ظلم ذوى القربى أشد مضاضةً " .

مع مودتى

ود الماذون

[بابكر]

والله يا ود المأمون اول مره فى حياتى اسمع انو عوض حلاوه كان من المناضلين؟؟؟؟؟؟ ثم ثانيا عوض حلاوه ليس له بسطه فى الجسم وخلافه بل كان نحيف الجسم وانا حسب علمى المتواضع انه كان يتواجد بصفه مستمره بالحله الجديده وكان بيغدر بالناس وبالمناسبه مدنى كلها بتعرقه انه من عتاة المجرمين انا ماعارف جبت حكاية انو مناضل دى من وين لان عوض حلاوه كان فى الستينات وفى ذلك الوقت لم يكن هنالك انجليز ولانيله ............

الاخ ابو شوارب اسف للخلط فقد كانت الذكريات تتدافع يعنى مطعم حسن جاد الله بس ما انا قلت معلومات وذكريات كتيره
وبعدين نحن ولا بنعرف شموم ولا الزوبار فنحن اولاد البوليس وصراحه انا كنت بخاف من فريق الحلبه

[أبوبكرحامد]

الأخ بابكر ...............................سلامات

معلومة أن عوض حلاوة كان مناضلاً ذكرها الأستاذ فضل الله محمد فى برنامج

نيل ياليل بقناة النيل الأزرق ، كما أكدها كذلك أحد ضيوف حوار تلفزيونى

أجرى العام الماضى .

والله أعلم

ود الماذون

[أبوبكرحامد]

الأخ صالح أبو شوارب ...................... تحايا وأشواق

مادام الأمر متعلق بمعالم مدنى فأرجو إضافة الآتى :

1- بارديبس

2- أبرونجه

3- سيف طعمية

4- سلوى بوتيك

5- ود الفتلى

6- عنكاص

7- كاروشه

8- الثنائى جيركى وجبر

9- سوق الأنبياء

10- الفاتح سينما

أعتقد كفاية كده ولو وصلتنا حلول صحيحة سنوافيكم بالمزيد فى المرة القادمة

مع مودتى

ود الماذون

[بابكر]

الاخ الكريم ود المأذون والله انا مندهش لهذا الكلام لانى اعرف اسرة عوض حلاوه واعرف انو اختو كانت تتباهى بأن احوها عوض البيخوف الرجال ولم نسمع طيلة حياتنا انوعوض حلاوه من المناضلين ولا حتى من اقرب الناس له وفى المنتدى شباب مدنى كلهم بيعرفوا هذه الحقيقه
وبالمناسبه (( حلاوه )) هو اسم ام عوض
المهم ارجو ان يكون الرجل مناضلا كما قلت او كما قال مذيع النيل الازرق

وكل شى جائز فى هذا الزمان اذا كان ناس فريق الحلبه سموا فريقهم حى الاشراف يعنى من سلالة النبى عليه الصلاة والسلام