وبكيت عندما بكى الكهل !!

[ضياء الدين احمد]

اولا كل عام والجميع بخير
حقيقة لاول مره تهتز مشاعري بهذا الشكل واحس بالاضطراب وذلك إثر السهرة التلفزيونيه المقدمة بالامس من قناة النيل الازرق عن ودمدني والكاشف وذلك الحفل البهي والانيق والعفوي الذي اقيم بجوار منزل الفنان الكاشف بود ازرق ومنظر الشارع والماره وهذا الحفل لم يحدث من قبل ‘ حفل يقام في الشارع وفي الهواء الطلق دون خيمة واكثر ما هزني وجعلني ابكي دون شعور مني هو بكاء ذالك الكهل عندما شدا الفنان المبدع صديق سرحان بروائع الهرم الكاشف
فهذه هي مدني بأهلها الطيبين وأريحيتها التي لا تنضب.

[أبوبكرحامد]

عزيزنا ضياء ............................................كل سنة وانت طيب

قيل قديماً :

شكرت صنيعكم بدمع عينى

ودمع العين مقياس الشعور

الموقف أكبر من احتمالى ، فعذراً إن عجزت عن الكتابة.

[امير عبدالباقي]

فعلا كانت سهرتين وليس سهره سهره بقناه النيل الازرق وسهره بالقناه الرئسيه ولقد كان فيها حديث عذب عن محبوبتنا وابدع عصام محمد نور في الاولي واشجي صديق سرحان في الثانيه والشي الموسف كانتا في نفس الوقت نتمني اعادتها في وقت مختلف

[أبوريلان]

كاتب الرسالة الأصلية امير عبدالباقي
فعلا كانت سهرتين وليس سهره سهره بقناه النيل الازرق وسهره بالقناه الرئسيه ولقد كان فيها حديث عذب عن محبوبتنا وابدع عصام محمد نور في الاولي واشجي صديق سرحان في الثانيه والشي الموسف كانتا في نفس الوقت نتمني اعادتها في وقت مختلف

[ضياء الدين احمد]

مشكورين الاخوان علي الطله
واكيد ده شعوركم كلكم وياميرلان وامير السهره بتاعت تلفزيون امدرمان اعيدت في اليوم الثاني
وياابوبكر السهره شكلها جرستك شديد

[محسى]

جميعا بمنتدى مدنى كل عام وأنتم بخير يســـــعدنى مشاركتى لكم والتواصل معكم من خلال المنتدى0
الأخ / ضياء كانت لفتة بارعة منك أن تعرج على هذا الموضوع وتسلط الضوء على البرنامج الرايع وتركز على جزئية الكهل الذى سال دمعه كنا مجموعة من الشباب فى الغربة نشاهد البرنامج وإنفعلنا جميعا عند هذا المشهد 0
شكرا لكم 000000 محمد عثمان المحسى

[أبوبكرحامد]

عزيزنا محسى ......................... كل سنة وانت طيب

" ميسكاقنا "

مرحباً بك فى المنتدى المسمى ودمدنى وهو ملك مشاع لكل أهل السودان

فمدنى تمازجت فيها قبائل السودان فشكل هذا المزيج قوس قزح المسمى

مجازاً " ودمدنى " ، فأهلاً بك ونسعد بمشاركاتك .

شكراً لتلفزيون السودان وقناة النيل الأزرق .

ود الماذون

[أبوبكرحامد]

الغالى ضياء ..........................سلامات

والله ياضياء لاأستطيع تسمية مابى بالجرسة فقد اعتدت على الغربة منذ سنى

الدراسة الجامعية فى منتصف الثمانينيات من " القرن المنصرم- قديم جداً !! "

غير أن مابى هو أشبه بالجرح الذى شارف على الإندمال فإذا به ينزف مجدداً .

مابى ياضياء هو مااصطلح على تسميته داء الأوطان " Home Sickness" هو

داءٌ لابرء منه فيما أعلم غير العودة مجدداً لأرض الوطن .

حبذا لو تم الإتصال بالتلفزيون القومى وقناة النيل الأزرق لتسويق أشرطة هذه

السهرة دعماً لمشروع المكتبة العامة بمدينة ودمدنى .

مع حبى

ود الماذون

[ضياء الدين احمد]

مشكووووووووووور يامحسي علي شعورك النبيل وزي ما قال ابوبكر مدني حقت الجميع ونتمنى ان تتواصل معنا فاخوانا المحس ناس ظرفاء وخفيف الظل
ودمت

[ضياء الدين احمد]

الجرح البريان وكت افتح يا ابوبكر بكون المو شديد وانشاءالله ربنا اهون لينا غربتنا ولو سمحت يا ابوبكر لو ممكن تديني ايميلك لانو عندي موضوع غير قابل للنشر ح ارسلو ليك لو مافي مانع
ومشكور علي رسالتك وكل سنه وانت بألف خير

[أبوبكرحامد]

الغالى ضياء.................................. سلامات

آهٍ من الجرح القديم ............

مرحباً بك أخاً وصديقاً وشريكاً فى الهم والوطن ، وأسعد بمراسلاتك وأشكر

لك اختيارى وآمل أن أكون عند حسن الظن ولامانع لدى البتة فى تلقى أى

منتج ذهنى دون الإلتفات لمدى الإتفاق أو الإختلاف لأنه فى نظرى يضيف إلى

رصيدى المعرفى المتواضع " ليته ينكسر سور الموانع ".

عنوانى : bakryhamid@yahoo.com .

مع مودتى

ود الماذون

[خالد هاشم علي]

ياضياء . محمد مسكين لمن غنا :
من أرض المحنة من قلب الجزيرة.... كان صادق في كل كلمة غناها ونحن كنا صادقين في إحساسنا بكل كلمة.
لأننا عارفيييين كويس يعني شنو مدني ؟؟؟؟
قبل ماأسافر واجي السعودية كنت شغال فترة في الخرطوم وكنت طالع من المكتب وزهجان وقرفان وحران وكل عبر الدنيا فيني، وفجأة شفت ليك تاكسي مدني المابغباني وكان واقف في الإشارة وبدون ماأشعر لقيت ( خطاي سايقاني ليهو، ولقيت مشاعري كل دقة في قلبي بتسلم عليه) وسلمت علي صاحب التاكسي مع إننا مابنتعارف وقلت ليهو انا من مدني .وطبعا لحدي هنا وبس... يعني بمجرد ماعرف إني من مدني طلع بالعربية وجنب ونزل معاي وقعدنا نتكلمك كأننا بنعرف بعض ( وياها دي مدني).
فما بالك ياضياء ونحن نبعد مئات الأميال عن مدني آآآآآآآآآآآآآآآآآآآآآآآآآآآآآآآآآخ.
( لو ماجيتا من زي ديل كان وآسفاي ومأساتي وآذلي...)
ودمت....

[ضياء الدين احمد]

ياود هاشم نحنا ما ناسا حنان بالحيل وبكايين وقلبنا رهيف
وعنصريين رغم انها كلمه حساسه جدا لكن نحنا عنصريين بفهم تاني مختلف لمفهوم العنصريه البغيضه وربنا اديم المحبه بين الجميع

[الزمن المريح]

السلام عليكم ياشباب
( بس من غير زعل)
و الله كلنا طبعا و اقين فى حب مدنى و فاتنانا بجمالها لكن و الله الناس كمان ماتبالغ يعنى المدن الاخرى فى السودان ناسها بحبوها بشغف بنفس القدر الذى نحب به مدنى و المسألة ديه بتظهر و تنجلى عندما تعاشرهم و تعرف كم هم بحبوا مدنهم و الى اى درجة لكنى معاكم فى ان الابداع عندنا غلاب

[ضياء الدين احمد]

مشكور يازمن يامريح
وطبعا اكيد انا بتفق معاك في انو كل زول بحب بلدو وفي مثل بقول ( كل زول عاجبو الصاريهو) لكن مدني مميزه بالجد بي ناسا وب مفرداتها وبمجتمعها
لكن مش معناها نحن فوق البشر او احسن منهم ‘ بس نحنا بنحب مدني شديد وما اظن ده بنقص من قدر المدن التانيه

[الزمن المريح]

استاذ ضياء نحن من مدنى و بالتحديد من حى المدنيين (ام سويقو) و لكن سلوك ابناء مدنى فى اى مكان بكون عنيف و انا نفسى كنت بنفس القدر افعل مثل ابناء مدنى اذا اى زول تكلم عن مدنى تلقانى اتحمقت و ثار الدم و ..... لكن هناك مدن فيها ابدع غريب و ناسها بحبوها بشغف بس من غير حمق ،، مثلا ، كسلا ،، نيالا ،، عطبرة ،،
و ياريت نحن نحب مدنى بعقولنا يعنى نعمل من اجلها و من اجل انسانها و اجيالها القادمة و بالمناسبة ناس مدنى اغلبهم رحلو الخرطوم ،، و البلد اصبحت خلاء

[ضياء الدين احمد]

طبعا اصبحت خاليه من الناس السجم الحكموها
لك الشكر الزمن المريح

[114]

أنا أيضا بكيت ببكاء الكهل يا ضياء, وافتكرت اني حأكون الوحيد البكاه الكهل، لكن ببوستك ده اتضح لي انو كتيرين زيي،
ولما تجي اغنية محمد الأمين في التلفزيون او في مسجل، اولادي الصغار طوالي يقولوا دي الأغنية البتبكي بابا، لأنها ما إن تغنى في التلفزيون وإلا وجدتني أبكي رغماً عني، وبالذات عندما أتابع خلفية الأغنية وهي شوارع مدني الحلوه
الزمن المريح: لكل إنسان محبة تجاه المدينة التي ينتمي إليها، وكل انسان يحب امه، ولكن الحب يختلف من انسان لانسان، سواء حب الوطن او حب الإنسان، فأبناء مدني حبهم لمدني ينداح تلقائيا لأبناء مدني- وهنا الفرق- فقلما تجد أحدا من مدني يقابل احد ابناء مدني خارجها إلا وصار له أكثر من أخ شقيق، وتجدهم يتكاتفون بمجرد اللقاء، وأصدقك القول، انني استطيع تمييز أبناء مدني من بقية ابناء السودان أينما التقيتهم في أصقاع الأرض المختلفة، انهم مختلفون فعلاً..
ولم ولن ينكر احد ابداع المدن الأخرى، وابداع الآخرين عموما، ولا علاقة لحب ابناء مدني لمدني بإنكار ابداع المدن الآخرى، نحن نحب مدني وكفى، سواء احب الآخرين مدنهم ام لا، سواء بها إبداع أم لا، وقد سأل أحدهم استاذي (الدكتور موسى عبود) اللبناني- المحاضر بجامعات المغرب- وهو يدرس لنا قانون الجنسية، سأله الطالب لماذا لم يتجنس بالجنسية المغربية وهو يستحقها.. فأجابه:
"قد يحب الإنسان نساء كثيرات، ولكنه حتماً لن يستبدلهن بأمه"!!
فكل الناس تحب مدنها أيها الزمن المريح، ولكن اشتهر أبناء مدني وحدهم بهذا الوله الشديد لمدينتهم دون سائر المدن، أقصد ذاع صيت حب أهل مدني لمدني أكثر من بقية مدن السودان، وقد قال الحلفاويون: "كنا نعتققد أننا الأكثر تحيزاً لحلفاويتنا، ولكننا وجدنا أهل مدني فاقونا تحيزاً (لمدينتهم)..
وليس هناك حب (بحمق)، فالحب هو الحب، والحمق ليس حباً، فلماذا إذاً يحب الآخرون مدنهم بشغف ونحن نحب مدني بحمق؟؟
وهل هناك حب بعقل؟ طيب ليه بيرسموا القلب دليل الحب، لماذا لا يرسمون صورة العقل بدلاً عن القلب؟
ورحيل ناس مدني الى الخرطوم والى خارج السودان هو الذي يؤجج تلك العاطفة القوية تجاه مدني، ورحيلهم عنها لا يعني انها سيئة، ولكن البحث عن التعليم وعن الرزق ديدن كل حي، ولو رحلوا فعوداً أحمداً..

[أبوريلان]

ضياء الدين

سلام ليك مرة تانية

الأخ 114 بارك الله فيك أوفيت وكفيت ومابقدر أضيف على كلامك حرف .

[الزمن المريح]

و الله القلب دليل الحب و الحبى اعمى و الحب ما باليد و مدنى معشوقتنا التى لن نستبدلها باى مكان فى العالم ،، و نسائم حنتوب و رمال شواطيها جنائن عترة و جزيرة الفيل و ام سنط و السنيط مشاتل البحوث و بركات ،، ،، ا رشقة من ما النيل جلسة فى نجايل حدائق النيل و كل مكان جميل ياريت يعود من تانى ،، و ياريت الناس تمد الايد و تظهر الحب لمدنى بالافعال فمدنى الان قرية
تحتضر و الناس رحلت منها لطلب العيش و العيش فيها احمد و انبل و يعنى الناس تخلى اهلها و بلدها علشان الضيق ،، لماذا ،، يهرب مبدعى مدنى الى امدرمان ،،، و ناسها الى الخرطوم و لسان حالهم يقول و الله لا احب ان ابيت فى الخرطوم و احس اننى اختنق ،،، و الله الواحد عاش بره و للاسف الشديد صدم شديد فى ابناء مدنى و اقول ليكم ان مدنى علمتنا الكثير و نالت منا الهجر و النكران و الهروب و الاخوة المغتربون هل ابناؤكم يحبون مدنى مثلكم ، لا أعتقد ان ابناء مدنى هم الافضل فى السودان و الناس ياريت تفكر فى مدنى حاضرة الجزيرة مدنى الكبرى التى ينتمى لها كل ابناء الجزيرة من الجديدة الثورة و حتى فارس و ود الحداد و كل قرى الجزيرة بناسها الطيبين الذين لا يقل حبهم لمدنى عنا بل يفوقه فى كثير من الاحيان ،، فمرحبا بكم جميعا فى مدنينا الكبرى ،،، و نترك التعصب المنبوذ ،، فقد فقدت مدنى الكثير ابداعها و خصوصيتها بل لم يصبح لها خصوصية و لا يحزنون و صراحة بقت امجادنا كنا زمان و كانوا زمان و افيقو من غفلتكم يا ابنا مدنى

مالو اعياه النضال بدنى

[ضياء الدين احمد]

مشكورين الاخوان الزمن المريح وميرلان وزي ماقلت ماممكن نضيف اي كلام بعد قول الاستاذ 114 فلكم جميعا التحيه والود

[114]

و نترك التعصب المنبوذ
بل تعصبنا لمدني محمود- لو كان التعصب يحمد- لكننا نحب مدني وكفى.. ولا ندعي أن أبناء مدني هم الأفضل، ولكننا ندعي اننا نحبهم.. نحب أبناء مدني- مهما كانوا- كما تحب الأم أبناءها- مهما كانوا- هل رأيتم أم لا تحب أبناءها حتى لو كانوا فاسدين؟ هل رأيتم أحداً يكره أمه، او على أسوأ الفروض لا يحبها؟ حتماً الإجابة بالنفي، مهما كانت هذه الأم..طيبة أم شريره، جميلة أم قبيحة، نظيفة أم وسخانه.. فحبنا لها ليس بالضرورة أن يكون مقابله كره وبغض و(لاحب) للأخريات.. لا تناقض أيها الزمن المريح بين حبنا لمدنينا واحترامنا للمدن الأخرى، بين حبنا لأبناء مدني وبين احترامنا للآخرين واعترافنا لهم..
الناس ترحل من مدني منذ القدم- كما يأتيها الآخرون أيضاً منذ القدم- وليس في هذا الزمن فقط، والرحيل عن مدني لم يزدها إلا عزة ورفعة، فأهل مدني الذين اضطرتهم الظروف الى مغادرتها رفعوا شأنها حيثما حلوا وأينما أقاموا، فلو راجعت "شخصيات هامة من مدني" في موقع ود مدني لوجدت أن كثير من شخصيات السودان القومية من مدني، فلابد لكي تكون قومياً أن تعيش- ولو الى حين- في العاصمة القومية، ولا ننسى أن من أبناء مدني من صار رئيساً لدولة- بالطبع غير السودان مثل الزعيم محمد نجيب، ومثل بوكاسا، ومثل ذاك الذي ذهب لإحدى دول أمريكا اللاتينية فأصبح يوماً رئيس تلك الجمهورية، ثم عاد ومات ودفن في ود مدني (جاء ذلك في صحيفة ود مدني التي كان يرأس تحريرها المرحوم عمر) بداية التسعينات..
ومدني لم ولن تكون قرية مهما مرت بها من ظروف، فهي ثاني مدن السودان من حيث الأهمية والكثافة السكانية، وهي ما زالت مصدر السودان من السياسييين والاعلاميين والفنانين والرياضيين والأدباء والمفكرين- وستظل- ولن تحتضر أبداً مدني ما دام فيها انسانها يتنفس وفيه رمق..
والذين صدمت بهم أيها الزمن المريح في الخارج حتماً ليسوا من مدني- مدني المدينة- فأهل مدني لا يصدمون، ولو قابلك من صدمك من أبناء مدني فتأكد أنه الشاذ الذي يثبت القاعده..

[الزمن المريح]

استاذ 114 شكرا لك على الاهتمام بالموضوع و الله ما اختلفنا كثير و ياريتك كمان تقرا موضوع الاخ الغالى عيدروس (القاطعين الكبرى ) فى نفس المنتدى

و مشكور على موضوع جامعة الجزيرة و الظاهر انك خريج اقتصاد و ربنا يوفقك كمان و كمان آمين

و بالمناسبة عيدروس رد على الموضوع فى موقع مدنى ..

[ضياء الدين احمد]

سعيد جدا ان تثرو هذا البوست بهذه الكلمات الطيبه وان تكون هنالك مداخله فشكرا الاستاذ الرائع عمر وشكرا عميقا الاستاذ الزمن المريح

[114]

شكرا لك أيها الضياء، وشكرا للزمن المريح على كلماته الطيبة تجاه موضوع جامعة الجزيرة، وانا خريج كلية الحقوق- فرع العلوم السياسية من جامعة محمد الخامس بالرباط - المغرب، وعندهم السياسة والقانون والاقتصاد ثلاث شعب في كلية واحدة هي كلية الحقوق..
والاختلاف في الرأي لا يفسد للود قضية
والى مزيد من الموضوعات الساخنة، والمفيدة

[ضياء الدين احمد]

شكرا لك استاذنا عمر فبوجودك دائما نحس بقيمة موضوعاتنا ‘ ولك الود