أهدي لي زهرة في العام الجديد

[عثمان جلالة]

الأحباء أعضاء وعضوات منتديات ود مدني .. كل عام وأنتم بخير في العام الهجري الجديد 1432هـ ، وقبل الآخرين .. سنة سعيدة عليكم جميعا في العام 2011م.

بالأمس كنت في زيارة مريض في المستشفى بمدينة الرياض المملكة العربية السعودية، ولفت إنتباهي حمل البعض للزهور والورود، في زيارتهم لمرضاهم عوضا عن ما نحمله نحن عادة من حلويات أو عصائر أو أكل :) .. وطبعن مباشرة أتقمصت شخصية مهند وكده .. قلت يا ولد بمناسبة العام الهجري الجديد ده .. تدخل علي مرتك وفي أيدك بوكيه ورد ورياحين وتقول ليها كل سنة وأنتي طيبه :)

وأريتني كان لغيت الفكرة :rolleyes: أول حاجه كل المحلات الموجوده جنب المستشفى بتبيع مأكولات وعصائر وحلويات تاني حاجه كل ما أسأل واحد في محل زهور هنا ؟؟ يجاوبني لا :mad: وأحس كده إنو في نفسو قال : يا سوداني مالك ومال الزهور تسأل منها ;).

المهم ... قلت الليله لو أقلب الرياض دي كلها لااااااااازم أدخل البيت بـ زهور .. وبعد مشاوير وبحث مضني لقيت محل زهور،، قلت لصاحب المحل : دايرك تظبط لي بوكيه حق ورد علي مزاجك وما تسألني من أنا داير شنو؟؟ لأنو بصراحة دي أول مره أشتري فيها زهور:confused::(

بالله دا كلام دا ؟؟ زول يشتري زهور بعد ما يصبح عمرو أربعين سنه؟؟

صاح الواحد قاعد يجيب هدايا لأمه أو أخوانو وأخواتو ،،، وأصحابو ومرتو و أولادو لكن أصلا ما كانت يوم زهور .. تتجه أغلبها للمأكولات أو العطور أو الأكسسوارات ألخ ... هييييييييييييييه غايتو ثقافتنا في الهدايا أصلو ما فيها زهور يمكن عند الحناكيش موجوده .. حتى في غنانا دا القاعدين نرددو الشاعر مع حبيبتو في الحديقه كان جعان قال ليها "أهدي لي تفاحه بس أو برتكانه";);) مع الاعتذار لكاتب الأغنيه.

خلاصة الموضوع : كما قال الحبيب المصطفى صلى الله عليه وسلم : تهادوا تحابوا .. لكن لييييييييه نحنا في ثقافتنا كسودانيين أو عرب عموماً ... قليلا ما نهدي لبعض الزهور في المناسبات؟؟ وشنو أفضل ليك إنت يا قاريء أهدي ليك بوكيه ورد ولا حاجه متعود عليها؟؟

جعل الله كل أيامكم حب وسعادة وهدايا وعطايا من رب العباد،،، وكل سنه وإنتو طيبين :):)

[مايسة]

تحياتي جلالة وكل سنه وانت طيب الهجرية والميلادية

الزهور صااحية وانت ناايم

ثقافة الزهور دي نهائيا (البته) ما عندنا نحن كشعب سوداني -
هسه في البيوت ناادرما تلقى ليك زهووور - (اللهم الا النيم) - افتقارنا للرومانسية (شيبا وشباب) - لانو اسلوب تربيتنا من البداية تنعدم فيه لغة الزهور والطبيعة عموما -
- ماشييين المستشفي شايلين لينا عمود اكل ولا برتقال - وكانو السبب الاساسي في مرض الشخص قلة الاكل وافتقاره للفواكهة المفيدة - (فااااقد يعني) :o (وما صحي)

اللهم الا المتحنكشين او المحبين الجدد والطالعين فيها والحاسين انو الدنيا بمبي :o ولسى الدنيا ما ادتهم الوش التاني - بيهدو لبعض الدباديب والزهور الاصطناااعية -
العروس الجديدة مووضة طالعة بتمسك ليها بوكيه ورد طبيعي - ويحفو عديل عشان يلقو ليهم محل ببيع ورد طبيعي - الا يمشو العمارات -

- عدم اهمتامنا بالجانب النفسي - حتى في مقرراتنا الوزارية تندر اذا لم تنعدم فيها المواد التي تتحدث عن الطبيعة ودورها واثرها على الانسان -
- اهتمامات الشعب نفسه بالاكل طاااقية على اي مشاركة اخرى له -
- هو زااااتو في مناسبات بيحتفلو بيها :( ولا بيحتفلو اصلا بالمناسبات -

تخريمة : ما وريتنا الحصل بعد ما وديت الزهور :o

[عبدالرحمن مدثر]

ويازهرة بخلت بالاريج

الليلة مات فينى الاجيج

وفتر حنينى الكان زمان

نحن قوم ياجلالة مشاعرنا واحاسيسنا ذابلة لابنفع معاها اصيص

ولا الموية بتصحى فيها الامل .. محتاجين ل وزول ياجج فينا الحاجات الحلوة دى

لكن مع ناس اجى يابنات امى .. وكم تحت المخدة اكتر من مودة بنركز على التفاصيل آلانية

ما عندنا نظرة تفاؤل تدوم كم يوم كدا من التطلع عبر رحابات الرحيق وجمال الصورة

بخلاء نحن فى كل شىء يااااااعمك

[تغريدا]

أخى الكريم عثمان جلالة كل سنة وأنت طيب والأسرة الكريمة خصوصاً المدام وتعيش ياخوى وتهدى ليها كل جميل مفرح كان ورد ولاغيره وياأخى الكريم كما أسلف المتداخلون عاليه نحن كشعب سودانى نفتقر لثقافة الهدية والأهداء وتحديداً الزهور وشغالة تانية برضوا متعلقة بالزهور نحن أيضاً لانجيد أولانعرف التعبير عن الحب ....لك منى فائق الود والأحترام وأنا غايتو بفضل الزهور وللجميع من زهور بكل ألوان قوس قزح

[عثمان جلالة]

تحياتي جلالة وكل سنه وانت طيب الهجرية والميلادية

تخريمة : ما وريتنا الحصل بعد ما وديت الزهور :o

:):):) هههههههههه أجيك كده من الآخر رغم إني ح أتجاوز عدم جوابك لـ سؤالي الخاص بأنك ممكن تقبلي يهدو ليك زهرة بدل لاب توب مثلا ;):)

شوفي يا ستي .. أم مشمش إبتسمت وقالت شكرا زهور جميله ،،، لكن فجعتن كده استدركت وقالت بـ نظرة المحقق كونان ومعاها حدره :rolleyes::) المناسبة شنو؟؟

قلت ليها راس السنه الهجريه ،،، لأنو لو كانت بدون مناسبة توااااااااااالي ح تفتكر إنو الراجل عامل ليهو مصيبه وجاي يكفر عنها بالورود ههههههههه :o

لكن التحقيق الحقيقي لقيتو من البنات مشمش ومنه !!! ياخي ديل فتحوا معاي تحقيق طويل عريض : جبت الزهور لشنو؟؟ ولقيتها وين؟؟ ونحنا يا بابا أصلو ما شفنا المحل بتاع الزهور ؟؟ وهي أمها وين الزهور دي ؟؟ ... ولييييييييييييه تجيب لـ ماما بس ؟؟؟ .... وآخر الأسئلة بقت بكا وحردان وأنا ما بحبك يا بابا لأنك ما جبت لي زهور !!! وبعد جهد جهيد أقنعتهم بكره من الصباح كان الله حيانا أجيب لكل واحده بوكيه زهور زي حق ماما .. وما عارفني لأول مره أزور محل زهور !! ويمكن أضهب في طريقي للمحل بغية شراء عدد (2) بوكيه ورد للبنات (عليك الله بغية دي ما حلوه) :):):)

[مايسة]

:):):) هههههههههه أجيك كده من الآخر رغم إني ح أتجاوز عدم جوابك لـ سؤالي الخاص بأنك ممكن تقبلي يهدو ليك زهرة بدل لاب توب مثلا ;):)

) :):):)


صباحك ورد وجوري يا جلالة
ياخ ما جاوبته ليك بطريقة غير مباشرة بس -

شخصيا أحب الورود والزهور جدا - واحب ان يهدي لي زهرة بدل فيلا عديل خلي لاب توب :o

تخريمة : كدي انت براحة كدا الجاب ليك فكرة الزهور شنو توديها للمدام -:cool:
تكون المدام حرشت ليك العصفورتين :o عشان تعرف المغزي الاساسي من البوكيه
( بغيه) حلوة بس الاحلى منها الزهور والبوكيه الحا تجيبو للبنات (ربنا يحفظهم يا رب) :)

http://i54.tinypic.com/2crk2gl.jpg

دي بمناسبة البوست الزهري دا

تلحيقة بتاعت ود مدثر: اتخيل المنظر تشيل ليك بوكيه وتديهو لآي حد ايا كانت المناسبة - الباقين حا يقولو ليك ياخ بدل كدا كان تديهو القروش في يدو (قال ورد قال ) -
يا اخوي نحن شعب ما رومانسي نهائيا اطلاقا - وربنا يعين :cool:

[mahagoub]

الحبيب جلاله
كل عام انت وام البنات والامورتين بالف عافيه
كويس الما قالوا ليك حق الورد كان جبت بيه فواكه
وخد الورد هديه ولتكون هدايانا ورد



http://i55.tinypic.com/9hnrqh.jpg

[عثمان جلالة]

ويازهرة بخلت بالاريج

الليلة مات فينى الاجيج

وفتر حنينى الكان زمان

نحن قوم ياجلالة مشاعرنا واحاسيسنا ذابلة لابنفع معاها اصيص

ولا الموية بتصحى فيها الامل .. محتاجين ل وزول ياجج فينا الحاجات الحلوة دى

لكن مع ناس اجى يابنات امى .. وكم تحت المخدة اكتر من مودة بنركز على التفاصيل آلانية

ما عندنا نظرة تفاؤل تدوم كم يوم كدا من التطلع عبر رحابات الرحيق وجمال الصورة

بخلاء نحن فى كل شىء يااااااعمك

يااااااااا عمك :):) .. مشتاقين وبشده، أو قل بحرقه رغما عن البخل الذي نستمده من تربيتنا يوماتي رحيل

صدقت يا أبوها ... والمرجع لى ده كلو ... تربيتنا التي لم تعودنا على ذلك أو نحس أن ممارسة هذا النوع من الدفء الانساني فيه شيئا من عيب أو تنازل

ألا تتفق معي أن أجمل أنواع التنازل ... هو ما تقوم به من أجل من تحب؟؟

هل تعلم من زاويه أخرى سياسة .. أن عدم مقدرتنا على تقديم تنازلات أو البخل في التعبير عن الأحاسيس عموما هو ما سيوصلنا لأنفصال الجنوب ؟؟

لك الكثير من الود ،، دائما يا حبيب :)

[مدنيّة]

تخريمة : ما وريتنا الحصل بعد ما وديت الزهور



في يومٍ من ذات الايام
الشمار سوف يقتلك


----------------
والله ياابوها
احللللللللللللللي هدية
تدي لزول وردة
بالنسبة لي انا غايتو
عشان الاختساس وكدا
--------
كل سنة انت والاسرة بالف خير يارب

[بت أم درمان]

تطور ملحوظ لا بأس به
استمر على كدا ولا تتخاذل
في مقبل الأيام
وعقبال الباقيين لما يحذوحذوك
وما يقولو ثقافة معدومة
وتربية ما عارفة شنو
وخجل وبتاع
دا اسمو بخل
ما بقصد بخل عاطفي زي ما بتقولو
بخل جدجد
ان الزول بقول بدل ما اجيب ورد
ح يدبل وينجدع اقوم اجيب حاجة تنفع
كيلو تفاح موز منقة
وما عارفين المردود النفسي الجاي من ورا الورد

كدي أسالني انا اذا خيروني ما بين وردة وفلا بختار شنو؟

اكيييييييد ح اختار السيارة طبعا :)

[بت أم درمان]

تلـ حيقة : كل سنة وانتو بخير
تحياتنا لأم مشمش والبنات والحاجة

[عثمان جلالة]

أخى الكريم عثمان جلالة كل سنة وأنت طيب والأسرة الكريمة خصوصاً المدام وتعيش ياخوى وتهدى ليها كل جميل مفرح كان ورد ولا غيره وياأخى الكريم كما أسلف المتداخلون عاليه نحن كشعب سودانى نفتقر لثقافة الهدية والأهداء وتحديداً الزهور وشغالة تانية برضوا متعلقة بالزهور نحن أيضاً لانجيد أولانعرف التعبير عن الحب ....لك منى فائق الود والأحترام وأنا غايتو بفضل الزهور وللجميع من زهور بكل ألوان قوس قزح

العزيزة تغريد ،، لك كل الود وكل عام وأنت بألف خير .. وكتر خيرك غلى الهدايا .. ووجهة نظرك صحيحة ميه في الميه .. وكلامك عن عدم قدرتنا التعبير عن الحب ... الحديث فيه ذو شجون :):)

[عثمان جلالة]

صباحك ورد وجوري يا جلالة

يا اخوي نحن شعب ما رومانسي نهائيا اطلاقا - وربنا يعين :cool:

شكرا مايسه ع الزهور و الورود .. وبركه الاعترفت إنو كلنا رجال وحريم ما ورمانسيين :rolleyes:;);)

[عثمان جلالة]

الحبيب جلاله
كل عام انت وام البنات والامورتين بالف عافيه
كويس الما قالوا ليك حق الورد كان جبت بيه فواكه
وخد الورد هديه ولتكون هدايانا ورد



http://i55.tinypic.com/9hnrqh.jpg

الغالي المحجوب المحبوب .. إنتو يا أخوي جيل متفرد والله الجيل .. الـ ظهرت في زمنو كل أغاني الحقيبة والابداع .. وشكرا ع الزهرة .. يا أصيل .. وأهديك بمناسبة الفواكه .. تفاحه بس أو برتكانه هههههههه:):)

منور البوست يا حبيب

[الشايقية]

أحلي بوكي ورد للمدام والاولاود

http://www5.0zz0.com/2010/12/16/09/309432336.gif

[عثمان جلالة]

في يومٍ من ذات الايام
الشمار سوف يقتلك


----------------
والله ياابوها
احللللللللللللللي هدية
تدي لزول وردة
بالنسبة لي انا غايتو
عشان الاختساس وكدا
--------
كل سنة انت والاسرة بالف خير يارب



وإنتي بألف خير يا أم جمال ياااااااارب والأسرة الكريمة

ههههههههههه قلتي لي عشان الاختساس برضو ؟؟؟ ... ليك كل الورود والزهور هدية في العام الجديد وكل عام وأنتي طيبه:):)

[عثمان جلالة]

تطور ملحوظ لا بأس به
استمر على كدا ولا تتخاذل
في مقبل الأيام
وعقبال الباقيين لما يحذوحذوك
وما يقولو ثقافة معدومة
وتربية ما عارفة شنو
وخجل وبتاع
دا اسمو بخل
ما بقصد بخل عاطفي زي ما بتقولو
بخل جدجد
ان الزول بقول بدل ما اجيب ورد
ح يدبل وينجدع اقوم اجيب حاجة تنفع
كيلو تفاح موز منقة
وما عارفين المردود النفسي الجاي من ورا الورد

كدي أسالني انا اذا خيروني ما بين وردة وفلا بختار شنو؟

اكيييييييد ح اختار السيارة طبعا :)

هههههههه بت أم در .. قلتي لي ماشي كويس ؟؟ وتقدم ملحوظ هههههه .. وإن شاء الله الباقيين يحذو حذوي :rolleyes::)

ودي على وزن ... كبير الفيل ولا جراي الحصان ؟؟ ... ما بين ورده .. وفيلا ح تختاري السيارة ؟؟!!:confused:... والله حكم ع قولك .. ربنا يحقق كل أمانيك يا بت أم در .. ويديك الفي مرادك وسنه كلها زهور ورياحين وسيااااااااااااارات يااااارب:):)

[عثمان جلالة]

أحلي بوكي ورد للمدام والاولاود

http://www5.0zz0.com/2010/12/16/09/309432336.gif

يا سلااااااااااام يااااااااخ شكرا على الهديه يا شايقية تعيشي وتهدي كل جميل وزاهي ونضير

كتر خيرك بالنيابه عن المدام والبنات :)

[ود المطامير]

جلاله حبيبنا

أنا أهدى لى أى حاجه أنسند بيها

وأعتبر الزهور وصلت ;)

[سروية]

تحياااات ورد البنفسج ووسط الزهور متصور :rolleyes:

كل الاعوام وانت بخير وعافية والاسرة

عزرن :: اتيت بدون ازهارا اليك...;);):cool:

[التيمان]

ياعمك ماتونسنا ساى

اها بعد وديت الورد حصل شنو

طبعا طردوك بيهو...؟

احكى الشمار يامهند المنتدى...

والله قصيت مننا الجكس عديل على اساس انك مهند ولا على اساس انك راجل المره حلو حلاه

وبعدى ليم غنيه
عشان بريدو اديتو ورده بيضا ادانى ورده زادت على الريده لو افترقنا فى مدنى تانى نعيده

[عثمان جلالة]

جلاله حبيبنا

أنا أهدى لى أى حاجه أنسند بيها

وأعتبر الزهور وصلت ;)

ههههههههه الغالي ود المطاريش .. تقصد شنو؟؟ مخده مثلا وفيها زهور لزوم السنده وكده :):)؟؟

ذكرتني يا الحبيب .. السنده الـ كانت بتجينا في ضحوة الزراعه يا سلاااااااااام .... يااااااااااخ عصيده حااااااااره وفوقها ملحه وشطه محتاج بس تسقيها مويه من الترعه ;) .. دي السنده ولا بلاش

ملحوظه : أوع أكون ما فهمتك ياااااااااخ :confused::rolleyes:

[عثمان جلالة]

تحياااات ورد البنفسج ووسط الزهور متصور :rolleyes:

كل الاعوام وانت بخير وعافية والاسرة

عزرن :: اتيت بدون ازهارا اليك...;);):cool:

سرويه يااااااااااخ كفاية البنفسج الكتبتي بيهو دا :rolleyes::):)

بتذكر زماااااااان .. كنت بمشي الترعه .. أجيب منها الصدف .. وأجي في البيت أخت الصدف في مويه في النار وأكب عليها الجينشن البيستخدموه لحريق النار .. يسألني الله بيطلع بعدها الصدف جميل جدا ولونو بنفسجي وجميل ... شكرا للزهور والبنفسج :):)

[عثمان جلالة]

ياعمك ماتونسنا ساى

اها بعد وديت الورد حصل شنو

طبعا طردوك بيهو...؟

احكى الشمار يامهند المنتدى...

والله قصيت مننا الجكس عديل على اساس انك مهند ولا على اساس انك راجل المره حلو حلاه

وبعدى ليم غنيه
عشان بريدو اديتو ورده بيضا ادانى ورده زادت على الريده لو افترقنا فى مدنى تانى نعيده

ههههههه التيمان الحبان ... هو أنا أقدر أقص منكم حاجه ياااااااااااخ :):) ... تتذكروا يوم لاقيتكم في مدني .. وقصصكم عسكري المرور ورقة مخالفه :rolleyes::)

كان اللقاء جميل بس خربوا العسكري بالمخالفة :mad:

لو وريتوني قيمة المخالفة كانت كم ؟؟ بوريكم الحصل شنو بعد ما دخلت بالورد

تحياتي يا تيمان ونورتو البوست والله :)

[سليمان]

سلا م ومشكور على طرق هذا الموضوع
لكن كدي انت ورينه ردت فعل زوجتكم وانت حامل الورد بدل اكسسوار من الذهب او خاتم
كانت شنو



تقبل مروري

[ابو عبد الرحمن]

http://i56.tinypic.com/a5851g.jpg
المهم يا أخي عثمان ان تهدي
لمن تحب ما يفترض ان بسعد ما تريد ان تهديه
وأنا بهديك الحب ، وبهديك حجارة ،، وبالمناسبة الحجارة دي سودانية مائة
بالمية من تراب بلدي ؟؟؟ لك ولجميع الاحباب في المنتدي .............
فيها وبيها نعرف قيمة الجمال ،، فقد يكون حجراً أو اي شي تتجلي فيه مقدرات
الانسان لاسعاد من يهدأ له .... وكل عام والجميع بخير ...

[عثمان جلالة]

سلا م ومشكور على طرق هذا الموضوع
لكن كدي انت ورينه ردت فعل زوجتكم وانت حامل الورد بدل اكسسوار من الذهب او خاتم
كانت شنو



تقبل مروري

سليمان .. كل سنه وانت طيب :):) كانت مبسوطه وقالت : دي أجمل هدية .. بيني وبينك تاني الواحد ح يكتر من الورود وكده :rolleyes: واحتمال ننسى شارع الدهب زاااااتو ;)

نورت البوست يا سليمان :)

[عثمان جلالة]

http://i56.tinypic.com/a5851g.jpg
المهم يا أخي عثمان ان تهدي
لمن تحب ما يفترض ان بسعد ما تريد ان تهديه
وأنا بهديك الحب ، وبهديك حجارة ،، وبالمناسبة الحجارة دي سودانية مائة
بالمية من تراب بلدي ؟؟؟ لك ولجميع الاحباب في المنتدي .............
فيها وبيها نعرف قيمة الجمال ،، فقد يكون حجراً أو اي شي تتجلي فيه مقدرات
الانسان لاسعاد من يهدأ له .... وكل عام والجميع بخير ...

أبو عبد الرحمن .. كل سنه وانت طيب .. وشكرا على الحجار الجميلة دي .. وده أكبر دليل ع إنو المهم التعبير عن أهتمامك للبتحبو والبتعزو حتى لو بأبسط الاشياء .. وما حولنا جميل ولكن قد لا نحس به

والتحية عبرك

لحجارة بلدي

وجبال بلدي

أرض بلدي

طيبة بلدي

وحنان بلدي

ونيل بلدي

كل المنى بعام سعيد ومليء بالنجاحات :)

[همسات]

اخي عثمان جلاله
كل سنه وانت بالف خير
وكل سنه والاسره الكريمه بخير وسعاده
اعضاء المنتدي الكرام كل عام وانتم بالف خير
صدقني اخي قد تكون كلمه واحده اجمل هديه
وقيمه الهديه في بسطاتها واحساسها مهما كانت بسيطه
لك التحيه اخي علي هذا الموضوع الجميل

[عثمان جلالة]

اخي عثمان جلاله
كل سنه وانت بالف خير
وكل سنه والاسره الكريمه بخير وسعاده
اعضاء المنتدي الكرام كل عام وانتم بالف خير
صدقني اخي قد تكون كلمه واحده اجمل هديه
وقيمه الهديه في بسطاتها واحساسها مهما كانت بسيطه
لك التحيه اخي علي هذا الموضوع الجميل



أهلا همسات .. كل سنة وإنتي بألف خير ،،، وتقبلي تحيات أسرتي فردا فردا .. وصدقت زي ما قالوا أهلنا "الكلمة الطيبة ... جواز سفر لقلوب الناس"

منوره البوست والله :)

[رضا حسن محمد]

اهدى لى تفاحة بث او برتكانة

[عثمان جلالة]

اهدى لى تفاحة بث او برتكانة

هههههههههه لا أحسن اهدي ليك رحله في طيارة .. منيحه ولا مو منيحه ؟؟:o:)

الزيك مليح .. وشك صبيح .. على قول حبوباتنا :):)