عمرالماحي
26-11-2010, 08:30 AM
استراحــــــــــــة
قال: أُكل ما يعجبك.. وألبس ما يعجب الناس..
فالح.. تكون من أنت يا عبقري زمانك؟
• هناك أقاويل كثيرة قيلت زمان.. ولا ندري من هؤلاء العباقرة الذين قالوا تلك المقولات.. يعني الزول القال (أكل ما يعجبك.. وألبس ما يعجب الناس) كان في ناس سامعين كلامه ده.. وإذا كانوا فعلاً قد سمعوا هذه المقولة الشهيرة كانوا ساكتين ليش؟ هل كانوا على قناعةٍ بمقولته؟ ثم من يكون هذا العبقري الذي يدعو أمةً كاملةً لتأكل ما يعجبها وتلبس ما يعجب الناس؟ والله الراجل القال هذه المقولة لو حضر هذا الزمن لألجموه وأوسعوه ضرباً وحجّروه الكلمة.. ثم أين تكمن عبقريته؟ طيب أنا واحد من الناس لبِست ذات مرةٍ فانلة حمراء غانيّة عاجباني جداً جداً.. لاقاني واحد من الصباح قال ليّ الليلة بالأحمر زي تاكسي مدني سكت.. بعد شوية قال ليّ إنت يا ود النعمة شيوعي؟ قلت لا.. قال ليّ بتشجع الأهلي المصري؟ قلت أحبه جداً لكن فانلتي لا علاقة لها بالنادي الأهلي المصري ولا بنادي الرابطة مدني الذي لعبت له خمس سنوات.. مضى لحال سبيله فاستغربت لفياقته.. مرةً ثانية لبِست فانلة خضراء.. واحد قال ليّ إنت بتلعب في جزيرة الفيل؟ ثم أردف قائلاً: خلاص الود بشجّع الجزائر!!.
• ظللت أفكر في هذا الشعب من جهة وفي عبقري زمانو من جهةٍ ثانيةٍ.. بعد يوم يومين لبِست فانلة لونها أسود.. أول زول لاقاني قال ليّ الليلة كتلت منو؟ وحادي على منو؟.. بعد شوية نفس الزول قال ليّ اليوم مطقّم فانلة سوداء وجزمةً سوداء وكمان شنطتك سوداء.. فتأكدت بأن صاحب المقولة الشهيرة إلتقى بشلةٍ عديمة فهم تقريباً وقال ليهم مقولته الشهيرة (أكل ما يعجبك وألبس ما يعجب الناس) فصدّقوه المغفلين.. لكننا وبعد أن تعمّقنا جيداً ودرسنا مقولته بتأنٍ طلع زول (حمار) أي واللـه... والدليل ما ذكرته لكم أعلاه.. تلبس ليك قميص كاروهات ما يريحوك.. تلبس لبني.. يلاقيك واحد يقول ليك والله لونه هادئ دليل على هدوءك وبراءتك وإنت ولد شييك.
• عموماً وصلنا لقناعةٍ تامةٍ بأن نُطلق العنان لحريات الناس.. شوفوا يا ناس السودان نحنا ما عندنا علاقة مع بقية شعوب العالم.. وبالذات في مقولة عبقري زمانو ده.. فمن الآن نُعلن للجميع بأن يأكلوا ما يعجبهم ويلبسوا ما يعجبهم أيضاً وإن شاء اللـه تمشو (أم فكّو) بلا كلام فارغ!! وما الداعي الذي دعاه بأن يتدخّل في حياتنا أُكل ما يعجبك وألبس القميص الفلاني والبدلة الكحلية!! والجلابية السكروتة!! مالك ومالنا.. وإنت ذاتك جيت من وين؟؟ وحصل زول سألك من أكلك ولبسك؟ طيب نحنا أمبارح شدّينا لينا حلّة (كوارع) عجّالي صغيّر بالبرستو طلعت زي حلاوة لكوم.. وعندما حان وقت العشاء.. عندنا ود خالتنا قال لينا: العجل ده كله ما عجبكم فيهو شيء غير كورعينو ديل؟!! ما تجيبو ليكم فيلّتو مثلاً عيبوه ليّ.. المخروقة مالها.. المفتولة قالت شنو؟ وهكذا!! هناك الكثير من الأقاويل الخاطئة التي تعلّق بها الناس واقتدوا بها واتخذوها قاعدةً ثابتةً بحياتهم اليومية يعملون بها إلى أن أصبح مثلاً يُضرب للجميع فيأخذون به مأخذ الجد.. مثلاً هناك مقولة تقول: إزرع جميلاً ولو في غير موضعه.
• فلن يضيع الجميلا أينما وضع
• إن الجميل وإن طال الزمان به.
• فلن يحصده إلاّ زرعه!!
• يا ما ناس زرعت جمايل في الكثيرين.. عليّ الطلاق استكثروا عليهم حتى السلام.. وهناك من تربوا ودرسوا في حيشان رجال يأكلوا النار وماقصرّوا معاهم وبعد أن لمع نجمهم وصارت أسماءهم بأجهزة الإعلام وبلغوا في العلم أرفعه وقمم الوظائف نسوا كل شيء.. غايتو هذا الشعب طيب ودايش في ذات الوقت فنحن الآن نتمعّن في أقاويل وأمثلة كثيرة نريد أن نصل بها على إنها كلام فارغ!!.
• قال إيش (أكل ما يعجبك.. وألبس ما يعجبك الناس)
تأكل الحمِت رِمت.. وتلبس الحر.. يا قادر يا كريم
غايتو جنس فلفسة!!.
مدني/ ياسر ود النعمة
0918140837
قال: أُكل ما يعجبك.. وألبس ما يعجب الناس..
فالح.. تكون من أنت يا عبقري زمانك؟
• هناك أقاويل كثيرة قيلت زمان.. ولا ندري من هؤلاء العباقرة الذين قالوا تلك المقولات.. يعني الزول القال (أكل ما يعجبك.. وألبس ما يعجب الناس) كان في ناس سامعين كلامه ده.. وإذا كانوا فعلاً قد سمعوا هذه المقولة الشهيرة كانوا ساكتين ليش؟ هل كانوا على قناعةٍ بمقولته؟ ثم من يكون هذا العبقري الذي يدعو أمةً كاملةً لتأكل ما يعجبها وتلبس ما يعجب الناس؟ والله الراجل القال هذه المقولة لو حضر هذا الزمن لألجموه وأوسعوه ضرباً وحجّروه الكلمة.. ثم أين تكمن عبقريته؟ طيب أنا واحد من الناس لبِست ذات مرةٍ فانلة حمراء غانيّة عاجباني جداً جداً.. لاقاني واحد من الصباح قال ليّ الليلة بالأحمر زي تاكسي مدني سكت.. بعد شوية قال ليّ إنت يا ود النعمة شيوعي؟ قلت لا.. قال ليّ بتشجع الأهلي المصري؟ قلت أحبه جداً لكن فانلتي لا علاقة لها بالنادي الأهلي المصري ولا بنادي الرابطة مدني الذي لعبت له خمس سنوات.. مضى لحال سبيله فاستغربت لفياقته.. مرةً ثانية لبِست فانلة خضراء.. واحد قال ليّ إنت بتلعب في جزيرة الفيل؟ ثم أردف قائلاً: خلاص الود بشجّع الجزائر!!.
• ظللت أفكر في هذا الشعب من جهة وفي عبقري زمانو من جهةٍ ثانيةٍ.. بعد يوم يومين لبِست فانلة لونها أسود.. أول زول لاقاني قال ليّ الليلة كتلت منو؟ وحادي على منو؟.. بعد شوية نفس الزول قال ليّ اليوم مطقّم فانلة سوداء وجزمةً سوداء وكمان شنطتك سوداء.. فتأكدت بأن صاحب المقولة الشهيرة إلتقى بشلةٍ عديمة فهم تقريباً وقال ليهم مقولته الشهيرة (أكل ما يعجبك وألبس ما يعجب الناس) فصدّقوه المغفلين.. لكننا وبعد أن تعمّقنا جيداً ودرسنا مقولته بتأنٍ طلع زول (حمار) أي واللـه... والدليل ما ذكرته لكم أعلاه.. تلبس ليك قميص كاروهات ما يريحوك.. تلبس لبني.. يلاقيك واحد يقول ليك والله لونه هادئ دليل على هدوءك وبراءتك وإنت ولد شييك.
• عموماً وصلنا لقناعةٍ تامةٍ بأن نُطلق العنان لحريات الناس.. شوفوا يا ناس السودان نحنا ما عندنا علاقة مع بقية شعوب العالم.. وبالذات في مقولة عبقري زمانو ده.. فمن الآن نُعلن للجميع بأن يأكلوا ما يعجبهم ويلبسوا ما يعجبهم أيضاً وإن شاء اللـه تمشو (أم فكّو) بلا كلام فارغ!! وما الداعي الذي دعاه بأن يتدخّل في حياتنا أُكل ما يعجبك وألبس القميص الفلاني والبدلة الكحلية!! والجلابية السكروتة!! مالك ومالنا.. وإنت ذاتك جيت من وين؟؟ وحصل زول سألك من أكلك ولبسك؟ طيب نحنا أمبارح شدّينا لينا حلّة (كوارع) عجّالي صغيّر بالبرستو طلعت زي حلاوة لكوم.. وعندما حان وقت العشاء.. عندنا ود خالتنا قال لينا: العجل ده كله ما عجبكم فيهو شيء غير كورعينو ديل؟!! ما تجيبو ليكم فيلّتو مثلاً عيبوه ليّ.. المخروقة مالها.. المفتولة قالت شنو؟ وهكذا!! هناك الكثير من الأقاويل الخاطئة التي تعلّق بها الناس واقتدوا بها واتخذوها قاعدةً ثابتةً بحياتهم اليومية يعملون بها إلى أن أصبح مثلاً يُضرب للجميع فيأخذون به مأخذ الجد.. مثلاً هناك مقولة تقول: إزرع جميلاً ولو في غير موضعه.
• فلن يضيع الجميلا أينما وضع
• إن الجميل وإن طال الزمان به.
• فلن يحصده إلاّ زرعه!!
• يا ما ناس زرعت جمايل في الكثيرين.. عليّ الطلاق استكثروا عليهم حتى السلام.. وهناك من تربوا ودرسوا في حيشان رجال يأكلوا النار وماقصرّوا معاهم وبعد أن لمع نجمهم وصارت أسماءهم بأجهزة الإعلام وبلغوا في العلم أرفعه وقمم الوظائف نسوا كل شيء.. غايتو هذا الشعب طيب ودايش في ذات الوقت فنحن الآن نتمعّن في أقاويل وأمثلة كثيرة نريد أن نصل بها على إنها كلام فارغ!!.
• قال إيش (أكل ما يعجبك.. وألبس ما يعجبك الناس)
تأكل الحمِت رِمت.. وتلبس الحر.. يا قادر يا كريم
غايتو جنس فلفسة!!.
مدني/ ياسر ود النعمة
0918140837