ضيفناهذا الاسبوع

[aborawan]

اهلا وسهلا بيك اخوي خطاب على الكرسي الساخن والله يستر علينا من شناتك دي غايتو اتوكلنا على الله :D :D

مرحبا بك اخوي خطاب وانشاء الله الكرسي يكون برد وسلام عليك وغايتو بختك نسبة لظروف العيد يمكن تاخد ليك فيه 10 ايام كده ويمكن تزيد ويمكن تقل غايتو الله يعينك بس برضو احتمال تجي في صالحك لانو الاعضاء حا ينشغلو بالعيد وبرنامجو


البطاقه الشخصية

[خطاب العبيد]

التحية والتجلا لكل الاخوان فىالمنتدىالعامر
واقول الله يستر لى منكم والكرسى الساحن

الاسم : خطاب العبيد بلولة احمد ابراهيم
من مواليد ودرعية قرب المناقل
انتقلنا الى الكريبة وعمرى اربع سنوات
الدراسة :
المرحلة الابتدائية والمتوسطة بالكريبة .
والثاوى : فى مدرسة مدنى الفنية قسم الميكانيكة سيارات

بعد كده المعهد الدولى لعلو الكمبيوتر دبلوم ادراة اعمال
ثم مركز دراسات الحاسب الالى جامعة الجزيرة

ثم الى دولة قطر طوالى

الهوايات كثيره منها العشق الاول :
كرة القدم * وقراءة الشعر العربى الفصيح +قراءة القرآن * الصداقات وهلم جره .

حليا اعمل فى دولة قطر ( شركة مغلز قطر للتجارة والمقاولات )

فى شنو تانى .

[tota]

نسيت أهم حااااااااجة يا خطاب ما قلتها ،،، بس اتذكرها هي شنووووووووو!!!!!!!!!!!!!

[خطاب العبيد]

والله يابوروان الخوف من الكرسى الساخن ده مخلينىانسى تىشيء بس ذكرنى هو شنو

[عماد الصادق]

أخي خطاب العبيّد .. تحياتي
وصباحك خير .. كهذا الصباح الجميل ..
وتخيّل معي إنو كمان عيد الأضحي ..
جابو لينا قدام يوم ؟؟؟؟؟؟

واحد شين جداً .. قدّم خدمة مميزة لواحدة حاجة انبسطت منو
وقالت ليهو والله يا ولدي أنا مبسوطة منك عا الآخر ..
شغلك نضيف .. ومرّتب .. ومنظم .. وأخلاقك عالية
وما شاء الله كمان دكتور ....
أخونا الشين .. انبسط .. وانفتح .. وقال
تخيلي يا حاجة .. أنا إنسان عصامي ..
كونت نفسي بنفسي ..

زال الاندهاش من الحاجة .. وقالت ليهو:

صحي يا ولدي .. أنا ذاتي قلت كده ..
لأنو الله سبحانه وتعالى ..
ما مكن يعمل ليهو زول شين كده ؟؟؟؟؟


سؤالي ..
ما سر التسمية .. الكريبة ..؟
وعام ميلادك ..
مع التحية

[aborawan]

سلام خاص اخوي خطاب طبعا عندك وسيلة مساعده وهي الاتصال بصديق وانا غايتو حشرتا نفسي بدون اتصال عشان اساعد :):)

طبعا تقريبا والله اعلم توتا قصدها على العمر :):) حشري شديد مش كده

[waheeb]

اخونا خطاب العبيد ..

لك التحيه وانت تجلس عل الكرسي الساخن الذي نرجو ان يكون بردا وسلاما عليك باجاباتك الصريحه...

اولا اهم شئ ما قلتو ( الحاله الاجتماعيه) متزوج ولا عزابي.

ثانيا من الذي اخبرك بموقع ود مدني.


تحياتي...

[خطاب العبيد]

الاخ ابو روان لك كل التحية واذا ماساعدنى كنت بزعل منك
الاخ وهيب شكرا علىالطله الجميلة دى واتمنى من كل قلبى ان اجيب على كل الاسئلة الرائهة دى
اما بالنسبةلى سؤال الاخت روبى فى الاول كنت فاكرها ولد ولها كل الاعتذار
اما بالنسبةللاجابة فهى
انا من مواليد 72/12/76 م
والحالة الاجتماعية غير متزوج لانى شين وبس
لكن خاطب . وخطيبتى جميلة جدا لانو لمن مشيت اخطب لبست وش جميل

والاخ عماد صادق سبب تسميةالكريبة بهذا الاسم يرجع الى انه مأخوذ من أسم نبات فى كان فىالكريبة وكان اسمه الكوريب .

ولكم كل التحية والاحترام
وكل عام وانتم طيبين

[خطاب العبيد]

طبعا الاخ وهيب انا زول بتاع حب ومدنى تشهد بالكلام ده بس حب من نوع ثانى حب لمدنى وبالمناسبة فى شيء ثانى لى اخ يصغرنى وهو من دلنى على المنتدى والموقع عامة وهو مشارك بهذا المنتدى وبإسم (( المك نمر )) وهو الان يدرس صيدلة فى باكستان .
ومنذ ذلك الوقت وانا مولع بالموقع ودى مناسبة عشان اقول شيء فى نفسى
اول ما شاركته فى المنتدى ادونى طوالى رتبة ملازم اول ( عضومجتهد) وبين يوم وليلة لقيت نفسى ملازم ثانى (عضوجديد)

وكيفكم مع عيد اللللللللللللللللللللللللللللللللللللللللللللللللل لللحم

[خطاب العبيد]

طعا الدلانى على المنتدىالجميل ده اخوى الاصغر منى طزالى فهو من الموظبين على المنتدى وهو الان فى باكستان يدرس صيدلة .
وهو مشارك فى المنتدى بإسم المك نمر وهو شقيقى طوالى بس احلى منى بكثير

[أبوبكرحامد]

أخونا خطاب ......... سلامات

هل تربطك صلة قرابة بالأخ أنور حسن خالد ؟

مع تحياتى لكل الأهل بالكريبة

ود الماذون

[خطاب العبيد]

الاخ ابوبكر حامد لك كل الحب والاحترام واقول لك نعم لى علاقةتربطنىبالاخ انور حسن خالد ليس لانه من الكريبة فحسب بل لانه ذو خلق جميل ومحترم جدا وانسان قل ماتجد مثله فىهذا الزمن .
ثانيا زوجته تكون لىفى الحسبة خالتى .
وهو الان متواجد فى قطر وفريب منى أى وصية نحن حاضرين

ولك الشكر
الزول الشين

[أبوبكرحامد]

عزيزنا خطاب ...........

أنور شخص مميز فى أخلاقه وهذا ربما يفسر لنا رسوخ اسمه الثلاثى فى الذاكرة رغم مرور حوالى 16 عام على افتراقنا عقب التخرج من جمهورية مصر
بلغه تحياتى وربما أقضى إجازة العيد فى قطر وسنلتقى إنشاء الله
ود الماذون

[خطاب العبيد]

لك كل الاحترام التجلا

فعلا أنك انسان رائع واصيل فالعشرة الطيبة لا تنسى ولو طال بها الزمن وامتنى ان تقضى عطلةالعيد معنا انشاء الله لكى تكتمل الفرحة بالعيد

وهذا رقم تلفونى اول ماتوصل اتمنى ان اجد منك اتصال
5332096
خطاب العبيدر

الزول الشين

[marwa]

الاخ خطاب
اها العيد عندكم كيف وهل واجهتك اي مشاكل لمن مشيت دوله قطر

[أبوريلان]

خطاب سلام

قبل ما تمشى قطر كنت شغال شنو ووين ؟؟

إنت شين خلقة ؟؟ ولا توقيعك فقط الشين ؟؟

الكريبة ناس كلهم أهل بعض الجابك ليهم شنو هل أهلك أم الظروف هى الجابتك الكريبة ؟؟

قلت من الهوايات كرة القدم هل لعبت فى فريق الكريبة ومتى ؟؟

درست ميكانيكا سيارات وبعدها إدارة أعمال والآن ماذا تعمل بالميكانيكا أم إدارة الأعمال ولماذا ؟؟

هل مواصل الأهل بالإجازات ولا فكوا وطار؟؟

ماهو دور أبناء مدنى بقطر ؟؟

شخص لفت نظرك فى المنتدى بأسلوبه الخاص المميز وبعدين تجاوب عليه بدون لف ودوران ؟؟

بنت لفتت إنتباهك فى المنتدى بأسلوبها المميز ؟ برضو بدون لف ودوران ؟؟

[خطاب العبيد]

لكم التحية والمودة

الاخت مروى :

والله او ل مشكلة تواجهنى فى قطر هى إنى او ل مره اطلع خارج السودان ولانو طبيعة السودان غير والتعامل غير حتى الجو غير فكانت مشكلة والمشكلة الاكبر انو السودانيين الفىقطر تطبعو بطبايع اهل البلد فكانت المشكلةالاسوء وللان بعانى منها هى الغربة .

الاخ ريلان :

فاكرنى مقطوع ولا شنو انا معائلة ال حسان فى الكريبة وجدودىفيها وحبوباتى فيها .
بخصوص كرةالقدم لعبت فى نادىالتحرير ولو عاوزتتاكد اسأل عن ابو الدهب
ومنو على طول مشيت نادى الاصلاح درجة اولى بس ماكملت معاهم الموسم عشان ظزوف السفر .

بعدين من صغرىبحب افرتق الاشياء والساعات فمشيت قسم الميكانيكا فى الثانوى .

بس مانفعت او ماديتها حقها بالمعنى .
فإتجهت الى إدارةالاعمال فىالكمبيوتر .
وحاليا شغال فى شركة تابعةلوزير الخارجية السابق فى قطر مندوب بالنهار وباليل فى المكتب بتاعى .

عندك اى شيء ثانى

الزول الشين

[خطاب العبيد]

الشغل قبل السفر لقطر الحقيقة ماكنت شغال قدمت فى عدة اماكن ومالقيت اى فرصة .
اما بالنسبة للعيد فى قطر والله والعظيم مابجى قطرة امام العيد فى السودان اول عيد لى قطر كان عيد رمضان وكان مشكلة لانو صلاة العيد بعد صلاة الصبح مباشرة وبعد ماتخلص الصلاة لقيت نفسىسلمت على شخصين فقط واحد سودانى والثانى هندى

وبمناسبة الهندى عندى مشكلة كبيرة والله ومالاقى حل
اللهى انو شكلة بشبه الهمود ومره يقولو مصرى وغايتو الا امشى فى الشارع واكتب عبى صدرى سودانى

الزول الشين

[ابومرام]

اصلى من دنياك مهاجر لمواني بعاد ضفافة زادي شوقك والاماني رعشة الشوق والمسافة -- لك التحية اخي وحبيب وصديق العمر خطاب اتحفت كل المشاعر وانت تجلس على ذلك الكرسي وانشاء الله سوف يكون بردا وسلاما ولينا وعد وميلون وعد انشاء الله لو ربن مده في الاجال لك التحية وكل عام وانت بالف مليييييييييون خير 00
لينا وعد على الماسنجر انشاء الله 00!!!!

[ابراهيم]

خطاب العبيد السلام عليكم ورحمة الله وبركاته

اجارك الله في كرسيك الساخن

سؤال أول:
بمناسبة الكريبة ... انا من محبي الكريبة والله
لكن هل ترى الاسم منسجم مع المنطقة جغرافياً وايدلوجياً؟

سؤال تاني:
الايام القادمة نستقبل فيها عيد الاضحى المبارك اعاده الله علينا بالخير ففي هذا العيد بعض الناس يتلهفون للشربوت اكتر من اللحمة فما وجهة نظرك صحياً ودينياً وبيئية في الشربوت؟

سؤال ثالث:
لو قلدوك حكم السودان ما هو اول دور تقوم به؟

انا عارف اسئلتي خفيفة معليش بس عشان مستعجل شوية لكن لنا عودة انشاء الله

وليك خالص تحياتي وتقديري

[خطاب العبيد]

الاخوة الاعزاء فىالمنتدى الاخ ابو مرام
لك كل التحية والتجلا والاحترام وأعدك بأننا سوف نلتقى على الماسنجر بإذن الله وكل عاموانت بالف خير


الاخ إبراهيم
إسم الكريبة طبعا مع العصر ده مامناسب ولكن مع عراقةالمنطقة وطعنها فى القدم السحيق وحضارتها فهو مناسب جدا

السؤال الثانى
الشربوت انا اصلا مابحب الشربوت لاسباب عديدة ولكن إذا تم عمله بحيث لا يكون مسكر أو درجةالبيكربونات فيه غير عالية يعنى زى البيبسى عادى مافيه مشكلة نحنا فىالبيت بنسويه بس مش زى حق بعض الشباب قارص جد ولو شميت ساى راسك يلف .

اما بالنسبة لحكم السودان .

فده أكبر وحقيقة بتمنى من الله عز وجل إذا فرض أن أكون ظالم او مظلوم اتمنىان اكون مظلوم لأن الظلم شيء فظيع فمابالك بالالاف الذين يعيشون فى البلاد ولاأدرى عنهم وأذكر هنا قول عمر بن الخطاب (( والله لو أن بعير عثر فى أرض الشام لسأل عنها عمر لما لم أسوى لها الارض )) فمابالك بالذى فيه الحكام الان الا تشفق عليهم من الذى ينتظرهم يوم القايمة من حساب

وجزاكم الله خير على المرور
الزول الشين

[خطاب العبيد]

والله العظيم مافى زعل ولا حاجة

وهى ردود عادية وأنا قلت من صفاتى المكاواه فقط ليس الا وعلىالعموم إذا زعلت ولا حاجة آسسسسسسسسسسسسسسسسسسسسسسسف والله ماقصد شيء إنتا راجل عزيز علينا ودى من عشان إنك زعلان بس كل شخص فى المنتدى هنا عندو مكانا خاصة عندى والله .

وده لكل المنتدى انا من صفاتى المكواه بس عشان مايكون هناك اى زعل
ولك العتبى حتى ترضى الاخ ريلان والروح رياضية وبالمناسبة انا زول رياضى وروحى رياضية وطويلة سللللللللللللللللللللللللللللللللللللللللللللللللل بة

ولك الشكر اخى ريلان

الزول الشين

[سنين]

اخي خطاب العبيد

هل شعرتة بالرهبة قبل جلوسك علي الكرسي الساخن؟

وما حجمها ان وجدت؟.

[خطاب العبيد]

طبعا من الله خلقنى فى الدنيا ماحسيت بى رهبة الا من الامتحانات
والكرسى الساخن فيهو الرهبة بس شويه لا أنا أخذت الموع على إنو مجموعةأحباء يتعرفون على صديق وحبيب جديد
وشاكرك على المرور الطيب وكل عام وانتى بالف خير
ماتكترى مناللحم
الزول الشين

[امير عبدالباقي]

ود العبيد لك التحيه

سوال واحد الكريبه كانت تعتبر قريه من مدني لكن مع مرور الزمن اصبحت حي من احياء مدني هل انتقال السلخانه اثر في ذلك ؟

[خطاب العبيد]

الاخ امير عبد الباقى انه الخطأ الفادح الاول والاخير فى نقل السلخانة من مكانها القديم الى الكريبة فقد أضرت بالحى وايما ضرر وهى لم تؤثر فى نقل الكريبة من قرية الى حى بل مساهما ت أبنائها فى كل المجالات .

وكل عام وانتم بخير

الزول الشين