هل نحن شعب راقــــــــــــــــــــــــــــــــــى

[ودسمير]

من نحن صغار نسمع ياولد ... خت هدومك فى الدولاب كويس ويا ولد غسل يديك قبل ما تاكل واشياء كتيره جدا طنشناها وبمرور الزمن اصبحنا لا نبالى باشياء كتيره حتى اصبحنا كالانسان الاول عشوائية فى كل شئ فى حياتنا اليوميه .... الكلام كتير لكنى اود ان اترك مساحة للحبايب لكى يتحفونا بروائعهم فى هذا الموضوع .

هل نحن راقين ومنظمين

وحتما سنلتقى

[ابو لوزة]

والله يا ود سمير موضوعك جميل
نحن مجتمع عشوائي جداو لا نبالي باي شي
وليس عندنا اي نوع من الرقي والحضارة
والواحد مننا يمكن يوصل الي اعلي المراكز سواء اكان في
الدولة او خارجها وعندما تنظر اليه خارج نطاق عمله
سواء اكان في الشارع او البيت يبدو لك انه شخص عشوائي
وذلك من شكله الخارجي ليس هنالك ترتيب في حياتنا
وماشين كده بالبركة

[مدنيّة]

لاقتني لافتة مكتوب عليها
"هئية ترقية السلوك الحضاري"

قريتها ، تأملتها ، احترت ومشيت لحال سبيلي

-----------
شكرا ود سمير

[حنونة.]

ود سمير تحياتى والله موضوع جميل بيقولوا العافية درجات والرقى ايضاَ درجات يعنى مرات بنكون ررررراقين عندما نهتم ببعض بنخدم بعض بنفقد الناس فى السراء والضراء ونرحم الصغير ونوقر الكبير يعنى سلوكياتنا بها اشياء جميلة دون الشعوب الاخرى لكن بصراحة مرات بنكون ماررررررررررراقين نهائى لمن نضيع زمن بعض فى حاجات فارغة والتدخل فى امور الناس وكان على النظام طبعاً معدوم فى حياتنا يعنى مرات كثيرة بتبرمج حياتك على الاخرين وغصباً عنك وزى ماقال الاخ/ الفاضل ابو لوزة فعلاً ماشين بالبركة

[ممدوح أبّارو]

سلام يا ود سمير
من ناحية ما راقيين دي ما ياخد شك
نحنا شعب ماسك العصا من نصها شفت كيف ومرات من آخرها أي والله
قول لي كيف؟
الناس في دنيا الله كلها بيغسلوا يدينهم قيل الاكل بالصابون ...
نحنا بنغسلها بعد الاكل بالصابون!!!!
الناس بتساعد علي نضافة المرافق العامة ...
نحنا بحمد الله ما فضل لينا علا نشد حللنا في الاسبتالية!!!
الناس كلها حيكوماتها في خدمتها...
نحنا دوناً عن كل الخلايق في خدمة الحيكومة !!!
وعييييك

[mahagoub]

عشان تعرفنا شوفنا فى افراحنا واتراحنا
شوفنا فى تعاملنا
شوفنا فى حنيتنا
شوفنا فى اى موقع تلقانا يانا نحنا

[isamzaki1978]

نحن زى ما قال المثل
من جالس جانس ، يعنى مرات راقين شديد ومرات التانية