نشترى العلبة باغلى ثمن ...!!

[عبدالرحمن مدثر]

انها نبؤءة صغيرتى مزن ..

لثلاثة ايام متتالية تصر على الوقوع فى الخطأ

نفس الخطأ

لعله خطأ لايمثل شىء امام فداحة ما ساقنا له ساستنا

- يامزن ادوكم شنو

- ادونا نشيد العلم

- يلا قولى لى نشيد العلم ياشاطرة

وتبدا مزن فى الخرمجة .. خرمجة بنكهة طفولية خاصة

الى ان تاتى الى

نشترى المجد باغلى ثمن

احلى شىء انها تحول المجد الى العلبة ليصبح المقطع



نشترى العلبة باغلى ثمن


ونعود ونكرر

ومازال المجد عندها ... علبة

علبة ومقفولة

[معتز الريح]

كنا نرددها ..
نشتري النجده باغلى ثمن ..
------------------------------------------
ربنا يحفظها ليكم

[عبدالرحمن مدثر]

رايمون .. فتى ابنوسى الملامح .. يقطن جبل اولياء .. وماهر حد الابهار

فى تجليد البيوت والحوائط والاسطح كذلك بالسراميك ..

يتقن هذه الصنعة التى تحتاج الى ذهن .. وفن .. وروح مبدعة

قدره انه جنوبى

وكان جنوبيا هواها ..

بالامس باع بيته فى جبل اولياء

واجل كل التزاماته السيراميكية الكثيرة

- رايمون ياصديقى لماذا بعت البيت

- انا راحل خلاس

- ماشى وين .. (وتمشى وين الخطوة منك )

- ماشى الجنوب خلاس البلد دى بقت ماحقتنا

- ياخ الكلام دا بدرى عليهو شديد

- بدرى وين دايرين نلحق التسجيل واخر مدة شهر حداشر

- ياخ دا كلام سااااى .. مافى حاجة بتحصل سودان دا واحد يارايمون

- سودان خلاس بقى ماواحد نحن برانا وانتو براكم





وتركت رايمون يحزم فى حقائب سفره للديار


ورجعت الى نفس علبة مزن صغيرتى

[الجندي المجهول]

الحبيب الغالي
الله يحفظها ليك ،،،

لكن العلبة دا جابتا من وين انا والله ( خايف تكون من المدرسة) وتبقى مشكلة
ونصيحتي ليك ولكل الاسر متابعة الابناء اول بأول وبأن لا يعتمدوا على (المدرسة) خالص لا بد من المتابعة الشديدة
اسال الله ان يقر بها عينك وعين والدتها ،،،

تخريمة : زمان برضوا في نفس النشيد يقال
وهذا رمزكم يحمل العبء ويحمي ارضكم

وقد قيل الصحيحة جيشكم وليس رمزكم لان الرمز لا يحمي (والله اعلم ) اسال الناس الكبار ( ناس ود الريح ) حاضرين العلم ابو 3 الوان الله يطول في عمرهم

[بنت الرفاعي]

ومازال المجد عندها ... علبة


علبة ومقفولة




وعندنا علبة مقفولة،
تنتظر من يُعيد فتحها،
ليُعيد للوطن الوطن وعزتهُ وكرامتهُ.
أو ليس من المُفترض أن يكون الشعب ذلك الشخص؟
أم أنهم ما زالوا ينتظرون مُعجزة لذلك؟

ولسّة تايهين،
والوطنية وطنية قلبية،
فُقدت أختها الفعلية،
ونتمنى أن تعود في يوم ما.:)


و
ما زالت الأُمنيات أُمنيات
وأمنيات
وأمنيات
!!!!!
لا نعلم متى سنحاول على الأقل تحقيقها!!



لكَ أخي عبدالرحمن ولصغيرتك أجمل صباح.:)

[mohd saeed magazoub]

كنا نرددها ..
نشتري النجده باغلى ثمن ..
------------------------------------------

ربنا يحفظها ليكم

وكما كنا نقولها ايضاً

نشتري اللحمة باغلى ثمن

ربنا يحفظها يرعاها الصغيرة مزن

[moh_alnour]

كويس يا أبوها الما قالت ليك نشتري الكورة بأغلى ثمن
لأنها عااااااارفة إنو كورتنا دي ما بتُشترى بأبخس ثمن
ربنا يحفظا و يخليها ليك يا أبوها
تفحيطة : يا أبو مُزن ، رايمون صاحبك دا عاقل و قاري الواقع تماما ً

[عبدالرحمن مدثر]

ودالريح

نجدة فى زمنكم .. وزمنا كانت معقولة شوية

لكن حكاية العلبة ماقادر استوعبها

خاصة لمن تكون كمان فااااااااارغة من وحدة وهدف ومضمون

معناها ممكن وردى فى زمن استنينى داك

يغنى علبتينى وانت مصيرك فى ايدين غيرك او ايدينى

مع الاعتذار لوردى

استنيني استنيني وأنت مصيرك تستنيني ،
كلما سحابة تلاقي سحابة تنزل منك دمعة عشاني
كلما تلاقي مسافر عائد تمشي وتسالي عن عنواني
وانا عنواني عيونك أنت ياراجياني وما نسياني

[عبدالرحمن مدثر]

جندى .. صفا .. انتباه

+ فول + موز

دى تفاصيل ايام الدراسة كلها

اذن المشكلة فى الفووول

ذكرتنى نكتة واحد جنوبى كان فى الجزيرة ايام كانت الدكاكين بتولع

بحبوبة ونسينى .. فجاء لسيد الدكان .. وقرررب شوية من نقطة الضوء

وقال دايرين ... واحد فووووووووول

اها مع اخر كلمة من فول .. كانت الظلمة تعم المكان

واصبح سيد الدكان يبحث عن ضوء جديد يعم المكان

المشكلة فى الفول ياصديقى

[عبدالرحمن مدثر]

الصباح ان لاح

لافائدة فى المصباح

مرام بين مرية وروح عبقرية

وازميل فدياس .. اننا فى زمن يامرام فارقنا فن النحت

وادمنا اللهث خلف الحفر ..

نموت ونحن نبحث عن ذهب فى اصقاع الشمال ولانجده

كل من تسال عنه .. ذهب يبحث عن ذهب

والذهب الذهب يكاد عقلى يذهب

تعليق طريف قراته فى اجراس الحرية .. بيراع صحفية اظنها اسمها شاهنياز

فالذاكرة مازالت خربة

قالت


انهم يبحثون عن وحدة .... بلا ساقين



ووطن طويل القامة... حافى القدمين ... دا كان زمان

هسع اللوحة بتتغير كتير



بكون وطن دبشك كدا

[عبدالرحمن مدثر]

محمد

صاحب الصورة الرمزية المعبرة عن ثالوث القارة بتاعتنا

الخطير .. الجوع .. والفقر .. والمرض

وملامح اطفال ينتظرون سياط الجلاد

بدلا عن رصف شوارع جديدة للجمال والحب فى بلادى

وفى الزحمة

وفى زنك اللحمة

وفى كل المنحنيات

مريم محمود راحت شقيق

ووحدتنا كذلك راحت شقيق





وانا آآآآآآآآآآآآآآه ياوحدة

[عبدالرحمن مدثر]

ودالنور .. العريس

رايمون هذا لايعرف تداعيات ترسيم الحدود .. ومشاكل ابيى .. وقوات دولية مطلوب حضورها

فقط .. شاف ليهو غيمة ... وبين قوسين قيمة لئيمة

اما كورتنا فهى كالاندروس فووورة كدا وبتموت

ماكلمتك ..!!

الود اساموا قال لمن يجى السودان هو براهو بغلب المنتخب

ياللعجب

والعجب قالوا ببرطع فى شوارع بحرى

[محمد عبد الله عبدالقادر]

تعرف يا ود مدثر بتك دي مكشوف عنها الحجاب
السودان صحي بقى زي العلبه المقفولة والداير يشتري
يدفع اغلي الثمن وما معروف يمكن تطلع علبه فاااضية

[محمد الجزولى]

الجميل ود مدثر
لا اعرف لماذا خطر على بالى برنامج يقدم فى قناة الحياه اسمه لعبة الحياه
فكرة البرنامج تعتمد على الحظ والتخمين مع القليل جدا من الحدس
الرنامج عبارة عن ( علب) مقفولة زى علبة بتنا مزن دى
يقوم البنك بشرائها منك بمبالغ من المفترض انها اكبر من المبلغ الموجود فى صندوقك
المهم فكرة البرنامج طويلة هذا اختصار لها
صاحبنا ريمون ايضا باع علبتة بعد ما تيقن ان العرض الذى قدمه له البنك سوف يحقق له طموحاته
ولكن يبقي ما فى علبته مجهولا حتي اللحظه
لكن خلينا نغني مع بعض
نحن جند الله
جند الوطن
تحياتى العزيز ود مدثر

[مدنيّة]

اخشي ان يتغيير "المجد" ويصبح "علبة"
ويصبح واقعا معاشا

----------
شكرا ابومزن
شكرا مزن

[mahagoub]

العلبه حتبقى مليون علبه الحكومه استلمت السودان علبه واحده حيبقى علب كتيره