ناس نجيضون (2) [الأرشيف] - منتديات ودمدني

مشاهدة النسخة كاملة : ناس نجيضون (2)

بدرالدين أحمد موسى

24-09-2010, 03:00 AM

ننوه الى أن احداث الحلقة قد تتشابه مع تجارب مماثلة لبعض القراء كما ان الأسماء الواردة ليست بالضرورة متطابقة مع الواقع بالرغم من أن الروايات جميعها مقتبسة من تجارب حقيقية .
جميع الحقوق محفوظة .

الحلقة العاشرة

نجيضون و بالدولار

و احد من ناس نجيضون القدامى فهلوى يتحرك بين الغلابة باتقان شديد . لو موصلك بى عربيته يقول ليك بالله خلينا نغشى نغير الزيت و نكب بنزين و طبعا على حسابك . لو نزلت محل الموبايل يقول ليك بالله جيب لى معاك سكراتش . وفوق ده كله راجل ( فييز) يعنى نوع ساعتك دى جميلة . البنطلون ده مقاس كم . و الله القميص الكم ده رائع ياخى . الجوال ده نوكيا ولا موباتيل ؟ المهم فى النهاية بكون فى كامل أناقته بعد اكتمال موسم هجرة المنجضين و عودتهم من الأجازات .

صحيح انه نحن بنعتز بمجتمعنا التكافلى لكن صاحبنا أحسن منى و من كثير منكم .. ده يا راجل عنده من الممتلكات ما تنوء بمفاتحه ثلاثة أربعة من المغتربين ناس عشرة سنين فما دون .
و طبيعى خلال السنة كم مس كول على كم اتصال مدته 3 ثونى . يعنى يادوبك يقول ليك كلمنى ضرورى و يقفل الخط . و سواءا كانت مس كول أو كلمنى ضرورى فى النهاية عنده طلبات . ده ياخى بيكون عمل ليك مس كول و قبل ما ترد بيكون استلف على مكالمتك .
أهه أول ماترد عليه بيقول ليك رسل لى الفيها النصيب و أحيانا يحدد ليك المطلوب و للأمانة هو مابيطلب كثير لكن منك و من غيرك بتبقى مبلغ يسد فرقات . و ما بريحك طوالى بيقول ليك أنا اسلتلفت من فلان نقدا أو عينا . و ياريته بيعمل ليك مس كول بعد ما ترسل ليه عشان يقول ليك شكرا الأمانة وصلت .

المهم صاحبنا يوم كلمنى من القاهرة . ( أنا فلان كلمنى ضرورى ) . أنا قلت يمكن الراجل واقع ليه فى مصيبة رحت مكلمه و أيامها ديك الدقيقة للقاهرة بى 4 ريال . طبعا حكى لى عن جمال القاهرة و اعتدال الطقس بالرغم من انه صاحبنا جاء أمس بالليل وصحى كلمنى .

و الله يا حبيب تعرف السودان مابنقدر نحول منه أكثر من 200 دولار حسب تعليمات بنك السودان و أنا دلوقت محتاج لى 400 دولار. يعنى 1500 ريال بالسعودى .

أهه يا جماعة مهما كان الراجل فى قارة ثانية و ما عنده التكتح أسوى ليه شنو . ماتقول لى تدينه لأنه لوعاوز يرجعهم كان قال لى دينى . و من معرفتى بيهو دينى دى من الكلمات المحرمة لديه . المهم ما أطول عليكم أنا ما كان معاى قروش . فقمت استلفتها من الشركة على الراتب و حولتها ليه وطبعا اعتبرنها دين هالك .

و زى ما قلت ليكم فى الأول ما كلف نفسه عشان يضرب لى منها بجنيهين يقول لى شكرا القروش وصلت . الغريبة هو لى الليلة فى حالته دى و أنا فى حالتى . أسوى شنو غلبنى.

و الى اللقاء فى الحلقة القادمة .

أخوكم بدرالدين

بت أم درمان

24-09-2010, 03:17 AM

غايتو يا اخ بدرالدين
انت مستوي عديييل على نار ملهلبة مش منجض

مدنيّة

25-09-2010, 12:02 AM

محمود (أبو وضاح)

25-09-2010, 12:11 AM

وناس نجيضون ديل يا بدر التمام موجودين فى الغربة برضو بالكوم ، نرجو أن تطلعنا على حكاويهم ،

بدرالدين أحمد موسى

25-09-2010, 11:53 AM

غايتو يا اخ بدرالدين
انت مستوي عديييل على نار ملهلبة مش منجض

داب نار يا بت أم درمان .. الله لا وراك ..و شكرا على التصفح . دى جديدة !!

بدرالدين أحمد موسى

25-09-2010, 12:02 PM

عارف يابدر قبل كم يوم مشينا احنا قروب مجموعة من البنات في الشغل لوحدة زميلتنا
وزميلتنا واضعة
اها تبعا لازم نشيل معانا هدية
انا ماكنت شايلة شنطتي
الحاجة المتبعة انه وحدة بتدفع وفي نهاية المشوار الكل بحاسبها
اها طلع نصيب كل وحدة فينا مفروض تدفع 11 جنية
قلت للمفروض ادفع ليها بعد نرجع الشركة بديك ليهم

-----------
اها تاني نسيت مع زحمة الشغل مااتذكرت نهااااااااااااااااائي
اليوم التاني زولتي جاتني من الصباح
بيني وبينك انا استغربت الجية لانه ما من عوايدها "وانا ناسية موضوع ال11 جنية"
اها بعد اخدت ونستها معاي قالت لي مادفعتي ال11 جنية !
قلت ليها ياخ والله ناسية ومامتذكرة معليش انا اسفة
ومالقيت لي ضفور زاتوووووووووو ادخل فيها !

------------------
ياخ 11 جنية يسكوا فيها
تقول لي 400 دولار ما تسال فيها !

-------------
انا تبعا لهسي ممحنة في سؤال ال11 جنية دا

لكن يا مدنية .. صاحبتك دى ما نجاضة .. أنا طبعا عارف المثل المصرى بيقول ما يروحش حق وراه مطالب .. لكيييييييييييين . جنس ده مع ناس نجيضون ما بيجى ..عشان كده اعتبرتهم دين هالك ..
**********
لكييييييييييييين تانية .. ما تكلمى لى صاحبتك دى تجيب لى قروشى من نجيضون و تشيل نصهم ..

***********
لكيييييييييييييين تالته أنا خيف تبقى زى الراجل العنده ألف ريال سلف عند واحد من ناس نجيضون .. وصفو ليهو واحد شغلته متحصل ديون و بياخد 50 %.. قال ليه اذا جبت لى قروشى شيل نصهم .. بعد شهرين قابل المتحصل قال ليهول ياخى ما عملت لى حاجة . المتحصل قال ليهوا :

ياخى زولك ده عكليته خلااااااااص .. ياالله .. ياالله طلعت منوا خمسميتى !!!!

بدرالدين أحمد موسى

25-09-2010, 12:05 PM

وناس نجيضون ديل يا بدر التمام موجودين فى الغربة برضو بالكوم ، نرجو أن تطلعنا على حكاويهم ،

الله يقدرنا عليهم .. و فى منهم من ضمن الحلقات السابقة و القادمة .. انت بس ركز . وكان عرفت واحد منهم .. كتم .. ما تجيب لينا الهوا .. و شكرا على مداخلتك يا أبو وضاح

بدرالدين أحمد موسى

29-09-2010, 09:53 AM

ننوه الى أن احداث الحلقات قد تتشابه مع تجارب مماثلة لبعض القراء كما ان الأسماء الواردة فى جميع الحلقات ليست بالضرورة متطابقة مع الواقع بالرغم من أن الروايات جميعها مقتبسة من تجارب حقيقية .
جميع الحقوق محفوظة .

الحلقة 12

أخير الفول

عمنا ود بلى راجل كبير و من رواد جيل السخرية . مره ضربته ليك ملاريا ماركة أبوساطور . أخد كل أنواع العلاج ابتداءا من الروزوشين . مرورا بالكلوروكين و انتهاءا بالكينا و الحال فى حاله . جاه نسيبه الطريفى فى زيارة أول الصباح وسأل ود بلى كيف أصبحت ياحاج . فقال ليه تعبان شديد . يا ولدى انت لما كانت عندك الملاريا بلعت ليها حبوب شنو . الطريفى قال ليه بلعت ليها الفانسيدار( للعلم الفانسيدار عبارة عن 3 حبات فقط تسمى فى الجزيرة بالراجمات لأنها يارجمتك يا رجمت الملاريا ) . قال ليه سمح ياولدى جيب لى الفانسيدار ده خلينى أشوف الملاريا دى آخرها شنو .
الطريفى وهو راجع من الشغل جاب معاه الفانسيدار و قال لى حاجة حليمة مرة ود بلى . شوفى ياحاجة قبل النوم تدى حاج ود بلى ده كباية حليب بارد و بعدين يبلع الثلاث حبات ديل مرة واحدة .و بكره الصباح بيكون كويس ان شاء الله .

ثانى يوم الصباح الطريفى جاء يصبح على الحاج فتحت ليه حاجة حليمة الباب قال ليها أهه ياحاجة و دبلى أصبح كيفنو. قالت ليهو و الله ياولدى تراهو راقد فى الراكوبة . عليك أمان الله عينيه للصباح مالاقن . دخل لقى ود بلى راقد فى عنقريب بدون لحاف . لابس ليه عراقى مرفوع لى نصه . و تاكل رأسه فى يده . قال ليه ازيك ياحاج الليلة ما أحسن . ودبلى قال ليه قلت لى الحبوب دى اسمها شنو .الطريفى قال ليه اسمها الفانسيدار رايك فيها شنو . ود بلى قال ليه يشهد الله أخير الملاريا .
انا بقى فى بعد فترة الأغتراب الأول رجعت السودان و معاى مبلغ كويس لكن ناس نجيضون عذبونى وورونى الهوائل كل يوم واحد جايينى بى مشروع و هاك يامشاوير طالعين نازلين معاك مما تصبح لحد ماتمسى . وكل المشاريع فى النهاية فشلت و رجعت على الحديدة زى ما بيقولوا . يعنى أخير ملاريا ود بلى قصدى أخير قبل ما أغترب .
و لما حالتى بقت زى ناس البلد انفض السامر و لقيت رقبتى ماشى عنقالى . باقى القروش العندى فكرت أعمل لى بيها قدرة فول قدام البيت . لا ايجار ولا ضرائب و لا كراسى و لا كهرباء . و بالفعل دورت ليك فى الفول و البوش و الفتت والأمور ظبطت فى حدود الطموح .
و لأنى بقيت معلم فى الكار و أصبح عندى مبلغ ما بطال . غسلت قدرة الفول و رفعتها فى المخزن و دخلت سوق السمك فى الموردة . بديت بى قفة . أقوم من الصباح بعد صلاة الصبح أنا فى سوق السمك اشترى لى قفة و أصنفها و بعدين أبيع بالقطاعى . ما تجى الساعة عشرة الا و أنا راجع بيتى و معاى مطايب أنواع السمك للبيت .

شوية شوية رفعت رأس المال و بقيت أشتغل على قفتين ثم ثلاثة ثم أربع قفف . يعنى من واحدة الى مثنى و ثلاث و رباع . و بمرور الزمن عرفت ليك السمك ده أصلا بيجيبوه من جبل أولياء و من كوستى و اكتشفت ليك انه جهة سنار السمك ده بى تراب القروش و عرفت ليك التكاليف الفعليه عشان تجيب ليك دفار من سنار . يازول لقيت ليك القصه دى ربحها خيالى .

جمعت قرشيناتى و ادينت عليهن و عزمت على التوسع و صعود درجات السلم . و ليه لا ما أهو أنا بديت من قدرة فول وصلت أربع قفاف سمك . ايه المانع أشتغل على دفار يمكن أعملهم أربع نسوان . يوم الخميس من الصباح على السوق الشعبى . سنار . الخزان .السمك و راجع . أتاريهم تماسيح البحر قصدى السوق راصدنى و أنا ما جايب خبر .

المهم حملت ليك الدفار و دفعت ليك كاش . ما داير تبنى اسم !! و ركبت ليك مع الدفار . يوم الجمعة مع آذان الصبح أنا و دفارى فى الموردة . يازول لقيت ليك دفارى ده مافى غيره . قلت دى بشارة خير أول الواصلين يعنى منفرد بالسوق . قلت يا ولد أصله الدلالة بتبدأ بعد صلاة الصبح . أدخل صلى و تعال بى راحتك . مابقيت سر تجار !!!.
بس الأمام قال السلام عليكم . بلا تسبيح أول زول جيتك مارق . بالله بس مديت ليك رأسى من باب الجامع لسة ما مرقت و لا لبست شبشبى. خمس دفارات واقفة زى حرس الرئيس . و الجقلبة دورت . يا ناس السوق ما بيتحمل . سمح نبدأ بى دفارى عشان جيت أول واحد . قالوا لى يازول انت شن خبرتك و ثم ثانيا انت ما كنت فى قفافك دى فى زول سألك . الجابك الحتة دى شنو أهه يا أخوى طالما دخلت الحتة دى أبقى قدرها . يا أخوانا دورت الدلالة . أبو خمسة بقى بى اثنين وأبو اثنيىن بقى بى الف . و أنا لا قادر أبيع و لا قادر أشترى .
شويه شويه السوق بدأ يفضى من التجار و لسه باقى دفارين غير دفارى . أصحاب الدفارين وزعوا سمكهم بالمجان ساى .و أنا قلت أنتظر ناس القطاعى . حتى ناس القطاعى مع الملح ده شالوا حاجتم و مرقوا .
الساعة عشرة الصباح السمك ضربتوا ليك الشمس نشف و قشف و بقى زى الجركس . ما كان عندى أى حل . شلت ليك البقدر عليه ووزعت لى الحلة كلها و الباقى رقدتو فسيح . و ما تسألونى من راس المال .

ثانى يوم من الصباح قمت على المخزن و القدرة بى وين . دحين يا جماعة ما كان أخير لى الملاريا . قصدى القدرة .
و الى اللقاء فى حلقة قادمة

بدرالدين أحمد موسى

17-10-2010, 12:37 PM

ننوه الى أن احداث الحلقات قد تتشابه مع تجارب مماثلة لبعض القراء كما ان الأسماء الواردة فى جميع الحلقات ليست بالضرورة متطابقة مع الواقع بالرغم من أن الروايات جميعها مقتبسة من تجارب حقيقية .
جميع الحقوق محفوظة .

الحلقة 13

أم عشيشينة

نحن 3 مهندسين زراعيين دفعة التقينا بالدمام بحكم ظروف و نطاق عملنا فى الزراعة و متطلباتها . واحد مننا بيعمل فى محل بتاع مبيدات و مدخلات زراعية . و الثانى اشتغل بحكم تخصصه فى الأنتاج الحيوانى . أما أنا فعملت فى تنسيق الحدائق .
واحد من زملائنا بالدراسة أيام الجامعة مستقر بالسودان و اشتغل بتجارة المحاصيل . و فى مرة من الأجازات كنا ثلاثتنا فى السودان و لاقينا زميلنا تاجر المحاصيل . و من خلال الونسة شرح لينا أن تجارة المحاصيل مربحة بدرجة خيالية . و هو صادق . لكن محتاجه رأس مال .و كلما زاد رأس المال زادت الأرباح . و النظرية أصلا ما محتاجة شطارة . تشترى المحصول وقت الحصاد بتراب القروش . تخزنه لفترة من الزمن حتى يصل السعر ذروته . تبيعه و تحسب الفرق . موسم واحد تلقى نفسك من أصحاب الملايين ( بالقديم جدا )

بينى و بينكم القصة عجبتنا . و اتفقنا مع الراجل انه نرسل ليه 100 مليون جنيه بالكمال و التمام على جناح السرعة عشان يلحق الموسم و يشترى بيها عيش و لما يزيد السعر يبيعه و نقسم الربح بيناتنا الأربعة بالتساوى . يعنى مننا رأس المال و منه المجهود ( مضاربة مشروعة ) .

و رسلنا القروش و اشترينا العيش بواقع 47 ألف جنية للجوال و بقينا متابعين معاه بالجوال ( يعنى الموبايل ) مرة أنا و مرة الثانى ومرة الثالث . و ارتفع سعر العيش وصل الى 160 . قلنا ليه يازول بيع . قال لينا أصبروا شوية السعر بصل 180 – 190 .

ما مر علينا شهرين الا و سمعنا السعر نزل الى 27 . و دخل الموسم الجديد و عيشنا بقى ما مرغوب عشان بقى قديم . قلنا ليه يا أخى ما قلنا ليك بيع من الأول انت أصريت و ضيعت علينا المربح. قال يا أخواننا ما تشفقوا هسه مافى مشكلة . أنا بديهو لى أخوانى بيستعملوه تقاوى فى زراعتهم و نهاية الموسم نستلم عيش جديد و نبيعه و نديكم قروشكم و أرباحكم . أذا الكلام ده ما عاجبكم ما عندنا حل غير نبيع بى 27 و نديكم القروش و أنا ربحى متنازل عنه . عليكم الله سمعتوا ليكم بى عيش بدينوا. المهم ماكان أمامنا الا أن نقبل و ديناهم العيش .

انتهى الموسم . و أخوانه زرعوا و حصدوا . و رجعنا لى حجوة ام ضبيبينة . العيش سعره نازل و مضروب و ما بيزيد من 23 ألف جنيه . أهه ياجماعة يا تصبروا عليه يزيد سعره أو تدينوا لى أخوانى تانى و الموسم الجديد بيتصلح ان شاء الله . هل تصدقوا انه ديناه ليهم تانى و صبرنا موسم ثالث .

فى الموسم الجديد ظبطنا اجازتنا مع بيع العيش و مشينا بى نفسنا البنك و سالنا عن السعر . لقينا واحد من زملائنا فى البنك . فتحة خشمه قال لينا السعر 182 ألف جنيه للجوال . الله اكبر أصلا ما ترددنا . قلنا ليه موافقين . المطلوب شنو . قال سلمونى العيش فى مكان الأنتاج و يكون في امكانية للتخزين موقع الأنتاج . لكن التخزين ماعليكم .

جرى على صاحبنا . أهه يا أخوى نحن العيش لقينا ليهو زبون حاضر بى 182 بس ورينا ليهو وين . زولك اتململ و ضرب ليه كم موبايل و رجع قال لينا . يا أخى انتو أبدا ما محظوظين . العيش فى الدالى و المنطقة مقطوعة بسبب الخريف . السنه دى يازول قالوا ليك الخريف شادى و اللوارى البدخل ما بيمرق .
خلينا بعد ما خلص خطبته العصماء بى حلايفها و طلاقاقتها و عرفنا أنو القصة دى حتبقى حجوة أم عشيشينة . و بعد ما انتهى . ضربنا لى صاحبنا فى البنك و شرحنا ليهو الوضع . قال يا أخواننا دى ما شغلتمكم . انتو سلموا العيش لمندوب البنك فى موقع الأنتاج بالدالى و اخدوا قروشكم . كلمنا صاحبنا . تانى عمل ليهو كم مكالمة و أدانا اسم واحد و رقم موبايله .
يومين الرقم ما بيرد . و اخيرا جاءنا البيان التالى ( يعنى الخبر اليقين ) . رقم الهاتف صحيح . و الأسم صحيح و هو بالفعل من كبار تجار المحاصيل لكن ما عندوا حبة عيش واحدة لى صاحبنا ده . واحد فيهم كضاب . و دى الحقيقة الوحيدة اللى طلعنا بيها من حجوة أم عشيشينة دى .
ما دخلنا فى أى تفاصيل اضافية و ما عاوزين نعرف الكضاب منو . قلنا ليه يا فلان . يا أخى نحن الشغله دى خليناها . دحين أدينا رأس المال .
هل تصدقوا انو لى يوم الليلة و الكلام ليهو 5 سنين الزول ده بيجادعنا فى حقنا .

و الى اللقاء فى حلقة قادمة