منقول : للمغتربين فقط ..

[ايمن عبد الله]

الموضوع بصراحة عجبني .. بي كل مراحله ..

النشوفكم انتو .. بعجبكم ولا لا ..

سنوات التيه


الاغتراب... والمغتربون عالم تاني... المغترب يشيل شنطتو ويشرّق... قاصد ديار الزيت... يمشي هناك عشان ياخد لو سنتين تلاتة ويعرس ويشتري بيت وعربية... ويجي راجع يقعد عند اهلو... لكن يلقى نفسو ورط في الغربة... والزمن يجري بهنا وبهناك... مغتربين الخليج... ولقوانين دول القّطرة والعقال... يلقى نفسو لا هو خليجي ولا هو سوداني... يلقى نفسو حاجة كدا ما معروفة شنو... هناك لاهو مواطن عشان يقعد ويتوهّط سمح... وهنا يلقى نفسو مواطن مع وقف التنفيذ... ضايع... بين الاتنين يضيع هو... مغتربين السعودية حاجة تانية... حاجة تجنن الما يجن... خليط من الشعور بالدونية وشعور بالفوقية في وقت واحد... شعور بالدونية للبلاقيهو من الغربة... وبالفوقية لانو كان لما يرجع هنا بيتعامل كانو حاجة تانية وزول فريد في نوعو... يحيط به الناس من كل جانب... واول ما يفلس ويعلّم الله يبدو يسالوهو انت راجع متين؟... عشان يمشي يخم ويجي تاني... هذا المخلوق المغترب في حياته يمر باربع مراحل رئيسية هي المرحلة القردية... ثم المرحلة الحمارية... ثم المرحلة القُرادية... هذا المراحل لها التأثير في تكوينو الوجداني وسلوكو....

المرحلة القردية

تبدأ هذه المرحلة اول ما يبدا المغترب في اجراءات السفر... يبدا يحس انه اصبح جزءا من فصيلة المغتربين... ويتصرف على هذا الاساس... واول ما يقول بسم الله ويخت كراعو في قفص اغترابو... يبدا يحاكي من سبقوهو في الاغتراب... .يبدا يفكر يشتري عربية... ثم ستالايت في اوضتو براهو... ثم المتزوج يفكر يجيب مرتو بهناك ويقعد يجهز في البيت من العفش زي الجماعة القبالو بالضبط... من غرف نوم وعرف جلوس وسراير وموكيت وملايات امريكية وايطالية ولو في ملايات امم متحدة يشتريها زي الكبار والقدرو من المغتربين... ثم يبدأ في التوالد... التوالد هناك يتم في موسم معلوم ومعروف حسب خبرتي يتم اغلبه في فترة الشتاء اما فترة الصيف فهي للاجازات والعُمرة لمن لم يستطيع للاجازة سبيلا حكمة ربنا قعدت في منطقة حضرت فيها موسم توالد في اسبوع واحد كان هناك خمسة ولادات ضكور... والخمسة أي واحد فيهم ابوهو سماهو محمد ودا كان نتيجة تأثير المرحلة القردية... وقد حباني الله بان اتعرف على احد المغتربين في السعودية عندو تلاتة من الابناء يحملون اسم محمد... محمد سادة.. ثم محمد المامون..ثم محمد الامين... واقترحت عليه مساعدة مني في حل ازمة الاسامي ان يسمي الولد الجايي محمد وردي... ولو انزنق والحكاية جرت وورت معاهو يسمي البعدو محمد فرفور... العجيبة انو اسمو هو براهو محمد عثمان... المرحلة القردية مرحلة قصيرة الامد... والغربة والشغل وجهاز المغتربين وضرايبو والكفيل ما بيخلو أي مغترب يستمتع بهذه المرحلة... لهذا نجد ان المخلوق المغترب يدخل في المرحلة الحمارية سريع جدا...

المرحلة الحمارية

تتميز هذه المرحلة بالسكون والهدوء و الطاعة العمياء... وهي اطول مرحلة من مراحل تطور المغترب... ويكون المغترب فيها حمار شغل... البيت الشغل وبالعكس... ويكون عارف من تشرق الشمش هو الليلة حيسوي شنو... وقد استفاد بعض الكفلاء من هذه المرحلة ومميزاتها الحمارية... بان يطلبوا من المخلوق المغترب... ان يشتغل أي حاجة في أي وقت... ويقوم هذا المخلوق بالعمل بهمة عالية ونفس راضية ورضى عنها... كما ان بعض الذكيات من نسوان المغتربين استفادت من هذه المرحلة والطاعة بان كانت تطلب من بعلها كل ما تتمناهو وهو ما بيقول لا... يتمنى المغترب السعودي في هذه المرحلة بان ينادوهو بابي فلان... ابو محمد.. ابو عادل... ابو فاطنة... ابو نفيسة... ابو كديسة... كما وانه تبدو عليه ملامح تقالة الدم... . بدءا من الدقن المشغنفة.. وانتهاء بالنكت البايخة التي لو استمعت لواحدة منها تقوم عليهو تعضيهو في نص قنقونو ولما تمشي البيت تقفل عليك اوضة وتقعد تبكي لمن الله يغفر ليك تبكي عشان بياخة النكتة وعشان ربنا ابتلاك ببلوة وهي عظيمة الا على الخاشعين... ايضا قد حباني الله باحد النكتنجية من مغتربي المرحلة الحمارية... يحكي النكتة ويضحك فيها هو لحدي ما دموعو تجري... حتى لو حكاها عشرين مرة في الدقيقة... وكنت لما اشوفو جايي علي اسال الله سبحانه وتعالى ان يلزمني الصبر الجميل والسلوان... وان يجعل استماعي الى نكته في ميزان حسناتي... ويتميز مغترب المرحلة الحمارية بدقة وسرعة تحويل قيمة الريال الى العملة السودانية مرورا بالدولار... تتم هذه العمليات بسرعة جدا في راسو... ويديك نتيجة تحويل أي مبلغ بكل دقة وامانة حتى الكسور ما يخليها... ايضا مغترب المرحلة الحمارية يكون شغوف جدا ومعجب جدا بكفيلو... يقعد وسط الناس ولو بيتكلمو في الكورة ينط هو ويقول يا زول ها والله الكفيل كفيلي انا... وبس... ثم يحكي عن احترامو ليهو وكيف بيتعامل معاهو مع انك تكون واثقا تمام الثقة انو نضمو دا كلو اماني... واضغاث احلام... ثم تبدأ بوادر انتهاء المرحلة الحمارية تلوح في الافق وتظهر بوادر المرحلة القرادية... بان يبدأ المغترب يفكر في البديل في حالة الاستغناء عنه... والبديل داخل بلد الاغتراب.. وتظهر عليه القرادية جلية عندما يستغنى عنه فعلا...

المرحلة القُرادية

وهي مرحلة قد تطول وتقصر حسب عمر المغترب... المصّر ان يكون قُرادة للنهاية... وهي تتميز بان يقوم المغترب بالتشبث بالشغل والبقاء اطول فترة في بلد الاغتراب... يرفدوهو من شغل يشعبط في شغل تاني... يسفروهو يكون شال معاهو فيزا ويرجع تاني.. يكشوهو يرجع عُمرة او حج ويكسر ركبة هناك... لاحظت ان هذه المرحلة ليست حكرا على السوداني... ايضا هناك القراد المصري والقراد الهندي والقراد الباكستاني... ما يميز القراد السوداني انه يتكاثر ويتوالد في العائل وهو ياخد فترة طويله متشعبط في الهدف... عكس القراد المصري الذي يكون فترة تطفله قصيرة لكنها مجزية ومضرة حد الضرر ما يقيف لو حد...

المرحلة الكلبية الاستثنائية او (مرحلة كلب الحر(

وهي استثنائية لانها تتم خارج بلد الاغتراب وداخل السودان... المخلوق المغترب يقرر ان يرجع الي السودان... مصدقا نضم الحكومة في التلفزيون بان المغتربين يرجعوا والبلد محتاجة لخبراتهم وان السودان احسن بلد ممكن الواحد يستثمر اموالو فيهو... ثم تبدأ رحلة الجري... لو عندو بيت قاعد يبني فيهو يقعد يتجارا عليهو وقتو كلو ورا لواري الطوب والاسمنت... وبعد كدا يقعد يتجارا.. ثم يبدا الجري في السهلة عشان يعرف البلد والناس بتسوي في شنو؟... ويشتغل شنو؟ يجري كما يجري كلب الحر يجري عشان يشوف مدارس وجامعات لي وليداتو... ثم يستمرئ الجري قد يكون اشد عدوا من كلب الحر زاتو... ثم ... ثم بعد فترة يمشي الحج للمرة الاخيرة ثم يعمل عمليه بروستاتا... ثم يتوفاهو الله الى رحمته..

[ايمن عبد الله]

هع هع هع .. مطاميرووو جيت هنا ولا لسة انا راجيك ...هع هع ..

[ود المطامير]

هع هع هع .. مطاميرووو جيت هنا ولا لسة انا راجيك ...هع هع ..
جيت يا ود أمى

ولقيت ليك نفسى حمار حموريه بالطريقه الصاح ;)

[النويري]

والله يا أيمن أصبت كبد الحقيقة في كل ما ذكرت وجاييت راجع

[moh_alnour]

مسيرة المغترب أصبحت مثل مسيرة ساقية جحا من البحر للبحر
و المغترب تبدأ مسيرته من جهاز المغتربين إلى جهاز المغتربين و بالعكس



و أقترحت عليه مساعدة مني في حل أزمة الأسامي أن يسمي الولد الجايي محمد وردي

:o :o :o

[مايسة]

غايتو - بشتنته المغترب بشتنه

لكن دي حقيقة فعلا - وكل المراحل صحيحة -

لكن لا هناك نافع لا اغتراب ناافع - :confused:

[ايمن عبد الله]

جيت يا ود أمى

ولقيت ليك نفسى حمار حموريه بالطريقه الصاح ;)


مستنيك تصل مرحلة التيه .. وشكلك قربت يا مطاميروو

[ايمن عبد الله]

والله يا أيمن أصبت كبد الحقيقة في كل ما ذكرت وجاييت راجع


حقيقة مرة يا نويري .. للأسف ..

ومستنين العودة ..

[ايمن عبد الله]

مسيرة المغترب أصبحت مثل مسيرة ساقية جحا من البحر للبحر
و المغترب تبدأ مسيرته من جهاز المغتربين إلى جهاز المغتربين و بالعكس



:o :o :o



ولسة الناس كاسرة وما دايرة تقتنع .. الحل شنو يا محمد ؟

[ايمن عبد الله]

غايتو - بشتنته المغترب بشتنه

لكن دي حقيقة فعلا - وكل المراحل صحيحة -

لكن لا هناك نافع لا اغتراب ناافع - :confused:


نسوي شنو لكن يا ميسو ؟

لا هناك نافع ..

لا هنا نافع ..

واخف الضرر ماعرفنا وين ..

لكن اعتقد الغربة للنساء .. ما زي غربة الرجال ..


لانه المرة ممكن تتحمل اكثر من الرجل ..
لكن شينة في الناس الكبار .. العجائز ..

[ZANOON]

يانزاراحمد انت ما قريت الموضوع ولا شنو
وبالمناسبه انت في ياتو مرحله

[ZANOON]

ياابو اسيل كل سنه وانت طييييب
حقيقه ربنا يكون في العون ونسال ربنا التوفيق هنا وهناك
بالمناسبه هنا في كم مرحله ماتعادلا بالجنيه والريال

[مدناوية]

غايتو - بشتنته المغترب بشتنه

لكن دي حقيقة فعلا - وكل المراحل صحيحة -

لكن لا هناك نافع لا اغتراب ناافع - :confused:





أصبتي كبد الحقيقة ...

)لمن عجبتني روحي وأنا بتكلم باللغة العربية الفصحى(

لقيتيني كيف عليك الله ...
:cool::cool::cool:

[نزار احمد كوارتي]

يانزاراحمد انت ما قريت الموضوع ولا شنو
وبالمناسبه انت في ياتو مرحله

هههههههههههههه والله العظيم لكن ده كلام موش في الصميم
والله يا أخوي انا داير أقول مرحلتي قرديه ونطيط شديد كمان
لكن تعرف بس المخوفني شنو؟

يفكر يجيب مرتو بهناك ويقعد يجهز في البيت من العفش زي الجماعة القبالو بالضبط

بس الكلام الفوق ده

أخوك صغير وجاهل يا دووووووب سنه رابعه إغتراب وكده

[ود المطامير]

مستنيك تصل مرحلة التيه .. وشكلك قربت يا مطاميروو
القراديه
دى ما عندنا
هو قال يكشوه يرجع عمره أو حج

يعنى دى حقتكم إنتو يا ناس السعوديه ;)

[بدرالدين أحمد موسى]

يا ايمن ما عندك لينا حاجة بعد التيه .. أوع تقول لى الدلال !!

[ايمن عبد الله]

ياابو اسيل كل سنه وانت طييييب
حقيقه ربنا يكون في العون ونسال ربنا التوفيق هنا وهناك
بالمناسبه هنا في كم مرحله ماتعادلا بالجنيه والريال


اها انت قاعد وين .. النبقى ليك زي مطاميرووو .. شكلك قاعد في ..

اخمن ولا تقوووول ..

[ايمن عبد الله]

أصبتي كبد الحقيقة ...

)لمن عجبتني روحي وأنا بتكلم باللغة العربية الفصحى(

لقيتيني كيف عليك الله ...
:cool::cool::cool:




والله عن نفسي لقيتك 4 واطة عديل كده يا ام رقبة .. ده كلام شنو تتكلمي اللغة الفصحى في زمن الانفصال ..هيع هيع هيع هيع ..

البوست ده مفروض ماشي النفاج .. الله كريم ..

[ايمن عبد الله]

يا ايمن ما عندك لينا حاجة بعد التيه .. أوع تقول لى الدلال !!

بعد توقيعك ..
وصورتك الرمزية ..

والدبيب

والخضرة ..

والوجه الحسن ..

وام الحسن ..

تاني الا تمشي .. الكويت ..

سمعت ..

الكوييييييييييييييت ..

شوف ليك لوك جديد ..

[أحمد عمر ( MOODY )]

يعني يا أيمن ... الواحد ممكن يهّنق عاااااااادي
من غير ما يتحسس .. والناس بتكون عاذراهو

مشاققة : معانا رفّيس و لّلا هنّيق بس

[الجندي المجهول]

حبيبنا ايمن صباح الخير ،،،

غايتو الليلة اول مرة اضحك ضحكة لمان (جابت ليها صوت) غايتو مراحلك عجيبة وغريبة ،،

تخريمة : انت الان في ياتو مرحلة ،،،،

بالنسبة لي انا في مرحلة ( اللامرحلة) ...

[أحمد عمر ( MOODY )]

حبيبنا ايمن صباح الخير ،،،

غايتو الليلة اول مرة اضحك ضحكة لمان (جابت ليها صوت) غايتو مراحلك عجيبة وغريبة ،،

تخريمة : انت الان في ياتو مرحلة ،،،،

بالنسبة لي انا في مرحلة ( اللامرحلة) ...



الجندي الحبيب ... اللّا مرحلة دي
قبل .. ولّلا بعد عشان الإختساس ليس إلاّ :cool::cool::cool:

[نزار احمد كوارتي]

يا غربة .. يا غشاشة .. يا بكاية .. يا مستهبلة

تغرينا بي درهم قروش وراه قنطار بهدله

جيناك سنة ..

أو قول سنين بنكمله

نبني البيوت في العاصمة وبي كوم أثاث بنجمله

وكرولا حاره نرسله أصلو التنقل مشكله

ونكمل الدين بي مهل والسمحة جاهزة نحصله

غير القروش اللي للأهل عبر الشهور حا نرسلا

والباقي يدخل في البنوك ونشوف دباره نشغله

ناس فكرت تجني العلم تبدأ الدراسة تواصلا

أحلام كتيره وشيقه وآمال كبيرة نأملا

لكن حساباتنا الغلط في كل عام بنرحله

مرت سنين من العمر بنعزها وبنفضله

والحسبة وصلت طاشرات يمكن نعيش وندبلا

وتعال نحاسبك يا وهم من غير رقم أو أمثله

كان للقروش نجري ونحوش لكن تقول بنشاكلا

ما راضية تقعد في الجيوب وتقول حرامي بينشلا

لكن بترقد في الضهور بديون تقيله متلتلا

ممحوقة ما بتقضي الغرض وأقل حاجة تكملا

كملانه سفرة وحق وزن ومجاملات مستفحله

ضرائب أبعاج المشي وإلزامي حمدي نحولا

وأحلامنا صبحت زي سراب نمشي ونجري ما نحصلا

يا ريت يكون هم القروش يا غربة فيك هو المعضله

لكن تعال شوف الهموم الما إفتكرنا نقابلا

ذلة ومهانة واحتقار خلو النفوس متململة

سجنا كبير فيهو الكفيل سجان قيوده مكبله

أشغالو شاقة ومؤلمه ودايما تكون مستعجله

ما عاد يكفيها النهار تحتاج ليالي مليله

أمراض كتيره بدت معاك عايزه الفحوص مستعجله

ناس الضغط والسكري ومرض القلب مع الكلى

ومصران وقرحة وإكتئاب ونفوسنا ما متحمله

وبنينا فيك كيمان لحم تحت الهدوم متندله

وأكيد يكون أكل المعلب والمجمد عاملا

عدم الرياضة والكونديشن لابد يكون ليهم صــــــلا

وكمان تعال لمعادلة ما قدرنا أصلا نعدلا

سجن العيال جوه الشقق وفراق الأهل والعائله

جيب العيال بي جيبنا مال وجيوبنا غيرو مميله

وصغارنا صبحت بالزهج متوحشة ومتجفله

لا قادرة تلعب في خلا ولا ضل شديره يضللا

لا قادرة تدرس بي نفس من الدروس المترهله

تلقي الولد غالبو الكلام والبت كبيرة ومريله

كل الضغوط سوا ما قدرنا حتى نقللا

في كل طرف تلقي القرف تلقي الخيوط مداخله

يا غربة أديناك كتير أدينا خاطرك يسهلا

خلينا نرجع بالفضل نلحق حياتنا نعدلا

آمالنا فيك بدري إتنست إلاّ الرجول متوحله

وبقينا زي أهل القبور لا البره عارف يدخلا

لا الجوه يرجع لي ورا يحكي الحقيقة يوصلا

لكن خلاص هان الخلاص عندك نزل مهما علا

وإن شاء الله نحيا نودعك وتكوني ذكرى نغازلا

يا غربة .. يا بكاية .. يا غشاشة .. يا مستهبله

[ZANOON]

نيزو حيلك الهبشك شنو؟
بالمناسبه دا موضوع برجع ليك ليو بس مافي زعل

[نزار احمد كوارتي]

نيزو حيلك الهبشك شنو؟

يا حبيبنا هبشني الما ضراني
هسي التهبش فينا شنو كمان

بالمناسبه دا موضوع برجع ليك ليو بس مافي زعل


أرجع أرجع أرجع ورا هي يا وِليد أرجع ورا
إنته كمان بزعلو منك يا زنون أرجع ساي بس برااااااحه براحه

[الدكتور]

في مرحلة قبل المرحلة الكلبية
المرحلة التكوزينية - تتكوزن قبل ماترجع البلد عشان لو في طريقة لما ترجع تلقي ليك حاجة

[نزار احمد كوارتي]

في مرحلة قبل المرحلة الكلبية
المرحلة التكوزينية - تتكوزن قبل ماترجع البلد عشان لو في طريقة لما ترجع تلقي ليك حاجة

برافو يا دكتور دي مرحله مهمه خاااااالص ولا بد منها

[خالد عثمان]

برافو يا دكتور دي مرحله مهمه خاااااالص ولا بد منها

هههههههههه كلامك صااااااااح يا نزار بس لكن يا دكتور وين تلقي ليك حاجة ياخي ديل حتي خريطة السودان قسمو نصها

[نزار احمد كوارتي]

هههههههههه كلامك صااااااااح يا نزار بس لكن يا دكتور وين تلقي ليك حاجة ياخي ديل حتي خريطة السودان قسمو نصها

خليك زول طموح يا ابو الخلد
بنطلع لينا بي قرمه قرمتين
وبيني وبينك الناس ديل لقمتم كبييييييره كبيره

[ايمن عبد الله]

اها وهسة المرحلة دي نسميها شنو يا ربي .. سلفقا بشتنة ؟؟

[ياسر123]

التحية لك اخي ايمن

و الله دي الحقيقة عن المغترب
وتخيل كل الناس تكون حواليك فلان جا و هاك يا هدايا و انت تكون زي بيت النمل و الناس حواليك و مما تجي السودان و تحتاج ليك لي 100 جنيه مافي واحد يتجرأ و يعطيك ليها و كل النحل اللي حواليك ينفض ريشه و يطير بلا رجعة.

حال المغترب بشتنة و غربة و بهدلة و ناس حواليهو كضابين

[ايمن عبد الله]

مشكور ياسر على المرور والمشاركة الطيبة ..

لا وكمان اول ما تفلس يبدأ الناس يسألوك (راجع متين) حتى ناس بيتكم ما يطيقوك وانت مفلس .. الله يكون في العون

[ودسمير]

والله يا ابو يمن شفنا الاغتراب وكبينا الجرسه وجينا راجعين لحضن الام الدافى الذى لا يعوضه لا دولار ولا ريال .
المغترب السودان يحتاج الى الاغتراب داخل راسه ليشوف فيهو شنو ! يعنى باختصار يجلس مع نفسو حبتين ويحسبها صاح .

[ايمن عبد الله]

والله يا ابو يمن شفنا الاغتراب وكبينا الجرسه وجينا راجعين لحضن الام الدافى الذى لا يعوضه لا دولار ولا ريال .
المغترب السودان يحتاج الى الاغتراب داخل راسه ليشوف فيهو شنو ! يعنى باختصار يجلس مع نفسو حبتين ويحسبها صاح .

مشكور ود سمير على المرور والمشاركة .. وربنا يجمع شملنا ان شاء الله قريب

[ابو عبد الرحمن]

اتلموا عليك يا ايمن ناس النفاج . خلاص لحقوهو ليك أمات طه
نزار ومطاميرو ومايسة وأم هنايه ومودي مشاكل .. الله يستر
ما يودهوا ليك سلة المحزوفات .......................

[ايمن عبد الله]

اتلموا عليك يا ايمن ناس النفاج . خلاص لحقوهو ليك أمات طه
نزار ومطاميرو ومايسة وأم هنايه ومودي مشاكل .. الله يستر
ما يودهوا ليك سلة المحزوفات .......................


أحلى ناس يا ابو عبدالرحمن ناس النفاج ديل وانا ذاتي ما نفاج قديم من زمن الكافتريات .. لكن عليك الله في احلى من مطاميرووو ده

[ابو عبد الرحمن]

أحلى ناس يا ابو عبدالرحمن ناس النفاج ديل وانا ذاتي ما نفاج قديم من زمن الكافتريات .. لكن عليك الله في احلى من مطاميرووو ده
عليك الله حلاتو شنو ؟؟؟ والله غير شعرو المفلفل ده ما شايف ليهو حاجة

[ايمن عبد الله]

عليك الله حلاتو شنو ؟؟؟ والله غير شعرو المفلفل ده ما شايف ليهو حاجة


شعروا المفلفل(ده السر) ودقنو بتاعت الضلال دي ما ياها الحلاوة ذاتا يا ابو عبده لكن بس اعمل حسابك ما يقوم يجي حايم بي هنا كان جاء بي جاي مشكلة كبيرة والا يحلنا منو الحلا بلة

[ود المطامير]

اتلموا عليك يا ايمن ناس النفاج . خلاص لحقوهو ليك أمات طه
نزار ومطاميرو ومايسة وأم هنايه ومودي مشاكل .. الله يستر
ما يودهوا ليك سلة المحزوفات .......................
تلم فيك الرساله عمتى قول آميييين

والله يا فرده الرساله عمتى دى روحها محرقها
أكان قلت ليها السلام عليكم ساى أكان تانى الله يحلك منها ;)

مشتااااقين يا فرده

كدى النشوفك إنتا من ياتو مرحله ؟ ;)

[ود المطامير]

اتلموا عليك يا ايمن ناس النفاج . خلاص لحقوهو ليك أمات طه
نزار ومطاميرو ومايسة وأم هنايه ومودي مشاكل .. الله يستر
ما يودهوا ليك سلة المحزوفات .......................
هوووووووووى يا فرده
أنا هى كانت فرد مشاركه ختيتها بالجمبه وشتت ;)

[ود المطامير]

أحلى ناس يا ابو عبدالرحمن ناس النفاج ديل وانا ذاتي ما نفاج قديم من زمن الكافتريات .. لكن عليك الله في احلى من مطاميرووو ده
والله إنت الأحلى زول

غايتو شوقنا ليك وصل العضم والله

الله يخليك لى وما يحرمنى منك

[ود المطامير]

عليك الله حلاتو شنو ؟؟؟ والله غير شعرو المفلفل ده ما شايف ليهو حاجة
;););););););)

عليك النبى الجضوم دى راغب علامه عندو ذيها ؟ ;)

[ود المطامير]

شعروا المفلفل(ده السر) ودقنو بتاعت الضلال دي ما ياها الحلاوة ذاتا يا ابو عبده لكن بس اعمل حسابك ما يقوم يجي حايم بي هنا كان جاء بي جاي مشكلة كبيرة والا يحلنا منو الحلا بلة
الضُل آيا با التقع عليك الحيطه حقتو
وحاتك الدقن دى يوم عملتها الفريق جت إتكلم بيها
أهااا ... أم عمرو حلفت ستين يمين أكان أشيلها ، قالت إيه ؟ قالت بدونى عين
لكن أنا عارف هى سمعت تعليقات نسوان الفريق قالن على بقيت رهيب رهابه جد ;)

والله يا فرده .. موضوعك دا لوكان كتبتو لينا فى النفاج هسى كان عدد حلقاتو بقن
مسلسل مكسيكى عديل كدا
كان أبوعبدالرحمن عمل لينا مرحه قعونجيه بالطريقه الصاح
وكان شرحها لينا .. إنو المرحله القعونجيه هى مرحلة الدخول فى ديون وسلفيات
والنطيط ذى العبلاج فى فروع الشدر

لكن فى العام .. رغم إنو أصابعينا ماكلاتننا لكن الله غالب
وحاتك جندينا المجهول عمل موضوع أخوك جا بس قلت أبوالضبضوب
وحاتك خماهو جت ورماهو لينا فى النفاج هع هع هع ;)

[ابو عبد الرحمن]

;););););););)

عليك النبى الجضوم دى راغب علامه عندو ذيها ؟ ;)
اتخيل أول مرة اتمعن فيك شديد يا (طمره )لكن ابعاد ماشاء الله ،، اتخيل اجمل
حاجة فيك شنو ( النظرة بتاعتك ) أأخ يا النظرة والله تقول ( الموناليزا )اعاين
ليك بهنا أحلى واعاين لك بالجنبة أشفك احلى زيادة ،،،والعجب الكضوم ......
يا ايمن ويا مشرف ما تودوا البوست ده ( النفاج ) خلونا نتقلب شوية ,,,,,,,,

[ود المطامير]

اتخيل أول مرة اتمعن فيك شديد يا (طمره )لكن ابعاد ماشاء الله ،، اتخيل اجمل
حاجة فيك شنو ( النظرة بتاعتك ) أأخ يا النظرة والله تقول ( الموناليزا )اعاين
ليك بهنا أحلى واعاين لك بالجنبة أشفك احلى زيادة ،،،والعجب الكضوم ......
يا ايمن ويا مشرف ما تودوا البوست ده ( النفاج ) خلونا نتقلب شوية ,,,,,,,,
هع هع هع هع هع
;););););););)
ههههههههههههههه

شكيت محن محنك كتلتنى بالضحك
خلاص كلم المسافر ومدناويه يشترو لينا البوست دا

[صابرحسين]

هههههههههههه
والله يا أيمن مراحل جد خطيرة والله يلزمنا الصبر ...
وبوست رائع بروعة المشاركين والموضوع الذي أصابنا وإغترابنا في مقتل ...

تحياتي وتقديري

[ابو عبد الرحمن]

هع هع هع هع هع
;););););););)
ههههههههههههههه

شكيت محن محنك كتلتنى بالضحك
خلاص كلم المسافر ومدناويه يشترو لينا البوست دا
المسافر يا اخي ده اسمو المسافر يعني طوالي مسافر نلم فيهو وين
العجيب يا مطاميرو قال داير افصل النفاج ،،، ليهو 12يوم داير افصل النفاج
يعني 3شهور حا يفصل رقبتنا ....اسمع يا اخي انت ما تكلم فردتك ابو سفروق

[بنت الرفاعي]

:cool: :cool:‎
‏
المرحلة القعونجية دي ما بتكون في الثلث الأول؟! ‏‎:confused:‎


‏‎
‏

[ود المطامير]

المسافر يا اخي ده اسمو المسافر يعني طوالي مسافر نلم فيهو وين
العجيب يا مطاميرو قال داير افصل النفاج ،،، ليهو 12يوم داير افصل النفاج
يعني 3شهور حا يفصل رقبتنا ....اسمع يا اخي انت ما تكلم فردتك ابو سفروق
هع هع هع
المسافر دا نظرتو ثاغبه جدا
وهو عاوز يفصل النفاج لأنو فيهو بترول رهييييييب أبيى بس ;)

أبو سفروق مين يا فرده ؟ دا ح يطق البوست دا فى الإرشيف ما يتلقى
نكلم حبيبنا الجندى ، هييييييع ، خبره فى قلب الطربيزه ;)

[ود المطامير]

:cool: :cool:‎
‏
المرحلة القعونجية دي ما بتكون في الثلث الأول؟! ‏‎:confused:‎


‏‎
‏
;););););)

دكتوره مرام

المرحله القعونجيه دى ذى الجوكر

بتشتغل فى كل المراحل

صاح يا أبوعبدالرحمن ؟ ;)

[ابو عبد الرحمن]

;););););)

دكتوره مرام

المرحله القعونجيه دى ذى الجوكر

بتشتغل فى كل المراحل

صاح يا أبوعبدالرحمن ؟ ;)
صح لسان يا أبو عمرو ... هو انت بتقول كلام غلط ؟
اسمع يا (مطره )انت ام لسان وين ؟؟؟
ومعاها أم هنايه برضوا وين ؟؟؟؟
همسة
هو البوست ده لأسي قاعد هنا ؟؟؟

[أم يحيي]

الله يعين الاخوه المغتربين علي هذه المشاوير الكثيره

[نزار حسن محمد]

وين مشرفين العام
قرار ادارى لسنة2011م
خصم مرتب اسبوع من المشرفين الجدد
وخصم مرتب شهر للمشرف السنير
ود المطامير شيل نبلتك دى وامشى
على شجر النفاج ولا بلحقك سفروووقى

[ود المطامير]

وين مشرفين العام
قرار ادارى لسنة2011م
خصم مرتب اسبوع من المشرفين الجدد
وخصم مرتب شهر للمشرف السنير
ود المطامير شيل نبلتك دى وامشى
على شجر النفاج ولا بلحقك سفروووقى
ابوسفروق
أنا عازمنى سيد البوست
لكن ناس أبوعبدالرحمن ديل جو ضهب ساااااااى ;)

[ايمن عبد الله]

;););););););)

عليك النبى الجضوم دى راغب علامه عندو ذيها ؟ ;)


إلقاها وين بس راغب علامة .. دي جضوم (حصرياً) مطاميرووو وبس

[ايمن عبد الله]

غايتو شوقنا ليك وصل العضم والله




رمضان قرب ولا شنو ؟

[ايمن عبد الله]

هههههههههههه
والله يا أيمن مراحل جد خطيرة والله يلزمنا الصبر ...
وبوست رائع بروعة المشاركين والموضوع الذي أصابنا وإغترابنا في مقتل ...

تحياتي وتقديري

يعطيك العافية يا صابر

المشكلة بعد المراحل دي كلها تتم البحصل شنو ؟

[ايمن عبد الله]

الله يعين الاخوه المغتربين علي هذه المشاوير الكثيره

مشكورة ام يحي على المرور والمشاركة .. والله يعيننا يارب .. غربة وودار وفراق دار

[ايمن عبد الله]

وين مشرفين العام
قرار ادارى لسنة2011م
خصم مرتب اسبوع من المشرفين الجدد
وخصم مرتب شهر للمشرف السنير
ود المطامير شيل نبلتك دى وامشى
على شجر النفاج ولا بلحقك سفروووقى

هو سفروقك كان بنفع كان نفع زمااان من ايام البوستات الكانت بإسمه عشان كده شوف ليك حاجة تانية غير السفروق .. ياخ شوف ليك سيف مالو ان شاء الله ما مساوي ولا اقوم هسة اضرب لي شيكو يجيك بي منجنيق وتقول اخير لي نبلة مطاميرووو


لكن في الخصم انا معاك (ماشايفين شغلهم) اخصم ساااي ما تلاوز

[ايمن عبد الله]

ابوسفروق
أنا عازمنى سيد البوست
لكن ناس أبوعبدالرحمن ديل جو ضهب ساااااااى ;)


يازول البوست بوستك وانت اهلو وبتستاهلوا وكان ابسفروق ما عاجبو وصف لي بحر الطرمبة ياخ ابو عبد الرحمن برضو معزوم ياخ ماضهب الضهب اب عكاز ده

[ايمن عبد الله]

صح لسان يا أبو عمرو ... هو انت بتقول كلام غلط ؟
اسمع يا (مطره )انت ام لسان وين ؟؟؟
ومعاها أم هنايه برضوا وين ؟؟؟؟
همسة
هو البوست ده لأسي قاعد هنا ؟؟؟


كمااان جابت ليها مطرة النقوم امشي الفيس بوك اشوف لي حيطة اتلبد تحتها

[ايمن عبد الله]

لكن يا جماعة كدي النرجع لي موضوعنا ..

زمان المغترب كان مقدر والاغتراب كانت فرصو ضيقة جداً يعني ما اي زول بغترب زي هسة اي زول يلم ليهو ثلاثة مليون واشتري فيزا راعي ويجي جاري

زماااانك المغترب كان يسافر يقعد ليهو ثلاثة اربعة سنوات ويجي راجع البلد عربية اخر موديل وتشنيطة حدها الفؤاد والعفش والشنط ماليها حد ويوم يجي اخر ضبايح واخر تمسح وكل يوم تسمع هي فلان ود فلانة جاء من (البلد الكان فيها) واشترى قطعة الارض حقت فلان واشترى بيت فلان هي واخد دكان فلان ومزرعة فلان وايييييك يجي يلخبط الحي واقعد اها وبعد داك يقوم يشوف ليك اعنف قصة حب في الحي او المدينة واقوم امشي ليك اخطب البت وطبعا اهل البت ح يبيعو ليك القضية وادو المغترب البت بدون اي تردد والحبيب المسكين تلقى كل يوم امشي البحر اقعد ما يرجع الحي الا المغيرب وتلقا لافي في الحتات الكان بقعد فيها معاها زمان ويكتب شعر ويفلفل شعرو زي ود المطامير ويتعلم البنقو والعرقي والمريسة واخر شي ينتحر ولا يدخلو التجاني الماحي .. واخونا المغترب يعرس عرسو والبت تنسى حبيب زمااان وتعيش حياتها ..

هسة المغترب لو جاء ولافي زول بعبروا اجي وامشي زي الهواء وممكن كمان مافي زول احس بيهو اقعد شهرو ده ويشتت لانه بقى ما بقدر اقعد اكثر من شهر عشان القروش بتكمل وتاني حق التذكرة الا ادينو ده كان لقى لي زول ادينو من اصلو

عشان كده هسة انا لمن امشي اجازة ما بقول انا كنت في السعودية الا زول عارفني والله والله مرة واحد لاقاني في السوق الشعبي الخرطوم ايام كانت التأشيرة الا المغتربين الخرطوم سألني وين انت ما ظاهر قلت لي كنت في بورتسودان لي قلت كده ما عارف لكن بس قلت ..

اها النرجع لي مغترب الزمن ده قبيل قلنا مغترب زمان بخطب البت وبدو من غير تردد لانه مستقبلو ظاهر وجيد .. تعال شوف هسة البت من ما تعرفو مغترب تقول دايرة تقرأ .. وبينا وبين نفسها تقول (بري مالي بعرس مغترب) يعرسني ويمشي اقعد ليهو ثلاثة اربعة سنين وما يرسل لي ويعديها كلها كفيلي مافي ومهنتي دي والله ما بتطلع استقدام وفي واحد وعدني اغير لي المهنة لكن قال لي اصبر وانتي ذاتك اصبري شوية والغربة حاااارة وأنا مشتاق ليك والله نفسي تكوني معاي هسة واييييك جنس كضب ااااخخخخخخخخخخخخخخخخخخخخخخخخ

بتما ليكم اصبرو بس

[moh_alnour]

تعال شوف هسة البت من ما تعرفو مغترب تقول دايرة تقرأ .. وبينا وبين نفسها تقول ( بري مالي بعرس مغترب ) يعرسني ويمشي اقعد ليهو
ثلاثة اربعة سنين وما يرسل لي ويعديها كلها كفيلي مافي ومهنتي دي والله ما بتطلع استقدام وفي واحد وعدني اغير لي المهنة
لكن قال لي اصبر وانتي ذاتك اصبري شوية والغربة حاااارة وأنا مشتاق ليك والله نفسي تكوني معاي هسة واييييك جنس كضب

غايتو جنس كشف حال ، ياخ ما تسترنا شوية يا أيمن ، في داعي لي دق الصفايح دا :rolleyes:

[ايمن عبد الله]

غايتو جنس كشف حال ، ياخ ما تسترنا شوية يا أيمن ، في داعي لي دق الصفايح دا :rolleyes:


كدي خلي دق الصفائح هسة ..

شارع الكاشف ده غرب السينما الوطنية ولا شرقها ؟