السودانيون وصفة الحماقة

[عزيز عيسى]

نحن السودانيين على الرغم من أن معظمنا ذو قلب طيب، ويتعامل مع الأفراد الأخرين بود ولطف، ونتميز بحب الخير، ومساعدة الآخرين، إلا أننا أيضاً بطبعنا يغلب علينا طابع الغضب، وننفعل ونثور بسرعة لأتفه الأسباب، ونستعجل في الحكم على الأشياء من ظاهرها، كل حسب طريقته وأسلوبه الخاص، وطبيعته والبيئة التي نشأ فيها.. قد نصادف في بعض الأحيان أناساً يتصرفون معنا بحسن نية، أو بطريقة نعتبرها غير لائقة، ربما عن غير قصد، ولكن نتسرع في الحكم على طريقة تصرفهم معنا من منطلق ضيق، ونصر على حكمنا ولو كنا على خطأ ، ونعتبر التصرف الصادر منهم كنوع من الإستفزاز بالنسبة لنا. وقد نصل في كثير من الأحيان الى سوء الفهم، وتنقلب نتائجة ويحصل ما لا يحمد عقباه، وفي النهاية نندم .. لذلك يصفنا الآخرين بألحماقة المفرطة.

[عزيز عيسى]

أكيد الكثير منا صادفته العديد من المواقف العصيبة.. بالنسبة لي في بداية غربتي صادفتني بعض المواقف الحرجة، حيث إلتقيت ببعض الأشخاص كانت تصدر منهم تصرفات في تعاملهم معي بطريقة غير إرادية، أو غير مقصودة. وكنت دائماً أترجمها وأتسرع في الحكم عليها حسب طبيعتي والبيئة التي عشت فيها في وطني بأنها تصرفات غير لائقة وطريقة إستفزازية، أو نوع من السخرية والإستخفاف.. وقد يصل بي الأمر في بعض الأحيان الى درجة الغليان والغضب والثوران، وأفكر في الرد بأسوأ منها (فقط حماقة)..

[عزيز عيسى]

أذكر في مرة من المرات كنت أقود سيارتي في إحدى الطرقات المزدحمة في مدينة هيوستن، وكان خلفي رجل يقود دراجة نارية محدثاً صوتاً مزعجاً، ويبدو أنه في عجالة من أمره، حيث كان مسرعاً ويحاول بين كل تارة وأخرى تجاوزني، ويريد مني الإنحراف بسيارتي ناحية حافة الطريق حتى أفسح له المجال لكي يمر.. عندما نظرت في المرآة تفهمت إنه مسرعاً، وتبادر في ذهني ربما يكون هنالك أمر ضروري أو عاجل جعله يلجأ لهذه الطريقة في تخطي السيارات. حاولت تمريره، ونظراً لضيق الطريق لم أستطع فسح المجال أمامه. وفي النهاية زاد من سرعة دراجتة النارية وخرج من الخط متخطياً سيارتي بطريقة غير قانونية، ودخل في الخط المعاكس ثم عاد ودخل أمام سيارتي (وعمل حركة غير جميلة بأصبعه)، الأمر الذي جعلني أغضب وأثور، وزودت من سرعة سيارتي للحاق به للنيل منه والأخذ بثأري، ولكنه كان أسرع مني، راح يتخطى باقي السيارات الأخرى بنفس الأسلوب، وإختفى ولم أتمكن اللحاق به.. وفي لحظة تراجعت وهدأت من سرعة سيارتي، وبدأت ألعن في الشيطان وأفكر في تصرفي المفاجيء، لأنني خالفت أوامر المرور، وعرضت حياتي وحياة الآخرين للخطر دون أن أشعر.

[عزيز عيسى]

لقد مررت بمواقف مماثلة كثيرة ولكن وبمرور الزمن تعلمت أن النفس البشرية تتأثر بما حولها من مؤثرات سواء كانت إيجابية أو سلبية.. لذلك قصباً عني تعودت على الصبر، وتعلمت كيف أكتم غضبي وغيظي، وأبتعد عن الحماقة والعصبية الزائدة، وكيف أتعامل مع الناس بإسلوب حضاري وراقي، حيث لابد من تغيير طريقتي وسلوكي في التعامل مع الجميع.
تعلمت أن المبادرة بالسلام والإبتسامة في وجه الآخرين مع الكلمة الطيبة صدقة جارية الى يوم القيامة، دائماً تعطيان الضوء الأخضر، ولهما فوائد جمة ودور جوهري كبير إيجابي وفاعل في التأثير على نفس الشخص المتلقى لها، تجعله يتراجع ويغير من سلوكه وطريقة تعامله معك، حتى ولو كان خصم أو عدو، وتفتحان أبواب التواصل، وتحسين العلاقات الإجتماعية والمعاشرة بين الناس والأمم، وكم هما خير دليل على كسب صداقة الناس وودهم.. تعلمت كيف أبادر بتقديم الإعتذار والمسامحة، حتى وأن لم أكن أنا المخطيء.. لأن ذلك لن يقلل من شأني في شيء، بل سيعطي الشخص الآخر المخطيء في حقي إحساس الشعور بالذنب، و سيؤنبه قلبه ويعتذر.. وأعلم أن المسامح كريم.. وأن العمر قصير، والحياة تستحق أن نتعايش في سلام وأمان، وأن يحترم الكبير الصغير على حد سواء..

وكما يقول المثل: (دنيا فرندقس دردقي بشيش)..


قال الله تعالى : " (والكاظمين الغيظ‏ ‏والعافين عن الناس‏ والله يحب المحسنين)،‏ ‏[‏آل عمران‏:‏ 134‏]‏ ...
قال الله تعالي "خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ" الأعراف (199)

[سواااح]

الجميل الخواجة ..
لذلك قديما قالوا
العجلة من الشيطان
ولسانك حصانك
وقد ذكر في الكتاب الحكيم
ان الانسان خلق عجولا
لان هذه صفة البشر عموما الاستعجال
ولكن نحن كسودانيين مدينها كوز موية زيادة (يعني هي ناقصة)
ليصبح الامر حمق وهو صفة مشينة
لانها ان لم تكن في موضعها فغالبا ما ادت بنا الي احراج.

[عزيز عيسى]

ولكن نحن كسودانيين مدينها كوز موية زيادة (يعني هي ناقصة).
الزول الأنيق جدا سواااح،
عارف لما كنت عايش في السعودية مرات يصادفنا بعض السعوديين
الواحد فيهم بحاول يخفف دمو شوية يقوم ينادي يا زول يازول..
أقوم أديهو ليك حدرة ومعاها صرة وش بدون ما إتكلم معاه..
معناتها بعرفك من وين؟! حماقة ساكت.
صاحبك على طول يفهم إنو الأوضاع غير مناسبة لتخفيف الدم
ويقوم يغير من طريقة كلامه لأنه عارف السوداني أحمق وممكن
يناولو (بنية) في أى لحظة.
وكل عام وأنتم بخير.

[isamzaki1978]

عزيزى عزيز عيسى مقال ما جميل، جميل شديد ، وصحيح دا طبعنا لكن ممكن نغيرو وسيدنا رسول الله صلى الله علية وسلم قال فى معناه " انما الحلم باتحلم "
طولت البال سمحة الله عز جلالة ايدينا ليها

[نزار حسن محمد]

يالذ عزيز ازيك ياراقى
بوست فنان زى سيدو ..آها النزيدك من الشعر بيت حماقة السودانين دى كوم وحماقة الجعلين دى كوم براه اجيرك الله وانا زولا... اوصولى من المتمه
بس الحمدالله الواحد كبر وتعلمنا كتير من هذه الزائله ..والله ياخواجه لو قعدته اتذكر لى بكره ما بخلص جنس مواقف لاتحصى ولا تعد
تعرف ياخواجه وانت زولا عشت فى الخليج الخلجيون بقول لمن السودانى ايرفع اصباعه واقولك هوى يازول اعمل حسابك تانى الا اخارجوك كرعينك
بجيك صادى

[ابو الامجاد]

الاخ العزيز عزيز عيسي
لك التحية بقدر حماقتك لأني أرى وهذا رأى الخاص
أن الحماقة اكسبتنا نحن السودانين الكثير من الاحترام
والتقدير ليس لأنها قلة فهم بل لأنها من مقرونات الدم الحامي
والدم الحامي من صفات الرجوله واكبر دليل علي ذلك انظر علي العالم
كيف يرانا وانظر الي الاخوة المصريين كيف يرونهم بل كيف يعاملونهم
بالكثير من الدونية والاستخفاف وكلنا يعلم طبائع المصريين
نحمد الله علي حماقتنا
ولك خالص مودتي

[زول من مدني]

الاخ المحترم .. عزيز عيسى
تحياتي لك ولكل الاخوة المتداخلين
اتفق معك في بعض ما ذهبت اليه واختلف معك في الاتي :-
1- نجن معشر السودانيين نشتهر بالسلام حتي في كل الدول الخليجية ( وانت ادري بذلك ) ما ان يترأي لنا (جلابية وتوب ) حتي نبادر بالسلام . حتي ولو كنا علي عجل ، وما حللنا بمجلس او منزل الا وبادرنا بالسلام ، واذهب الي ابعد من ذلك وازعم اننا نمتاز بالحميمية الوقورة المتزنة .. ولي من المواقف ما يدعم هذا الزعم .
2- حميتنا التي اشتهرنا بها ( والتي اسميتها حماقة ) اراها مطلوبة ومحببة - ولا اعني بها حمية الجاهلية الاولى - وتنبع من صميم ايماننا بقيمنا التي تربينا عليها وكل ارثنا الثقافي المجتمي يحض علي تلك الحمية ، خذ اغاني الحماسة كنموذج منذ بنونة بت المك الي اخر ما غناه محجوب كبوشية ، ثم عرّج علي مسادير البطانة وقس صفات الرجولة ولاتنسى الغرب بكردفانياته ودارفورياته ستجدها كلها تحض علي الكرم والشجاعة التي مقياسها مدي تقبلنا للاساءة ( الحقارة ) والكيفية التي يهابنا بها الاعداء .
3- من قال اننا لا نسامح ولا نعتذر عن اخطائنا ؟ .. كل ذلك نفعله ولكن بطريقتنا الخاصة واسلوبنا السوداني الخالص ، الا تري كيف نوصف باننا شعب تحتل عنده ( الاجاويد) مكانة مرموقة ، وكم حادث سير بين سيارتين تضرر احدهما وبشهامة سودانية نسامح دون يرجف لنا قلب ( وسلامة ولله .. وبركة الجات في الحديد .. وطالما مافي زول اتعوق خلاص ياخ المسامح كريم وهو زاتو حيمشي يصلح عربيتو برضو .. وعلي الطلاق ما يقول كلمة ) ... اما ثقافة الاعتذار فاتفق معك انها غائبة بمعناها الدقيق .. ولكنها تكون مغلفة دوماً بجبر الخواطر او اي مبررات نصوغها لنتجنب تسميتها اعتذراً ..
وللحديث بقية .. ( وحبة تنظير كدا ) .

هذا ولك الشكر علي اثارتك لهذا الموضوع الشائك
ومحبتي

[الجندي المجهول]

كلام جميل من زول جميل ( ورمضان كريم )

[خالد أحمد الصول]

كنت أحدي المسافرين في قطار بورتسودان ... وكان الجو خانقا و الاخلاق في النخرة ... وكان القطار في طريقة الي مدينة كسلا ... صادف أن كان الكمساري يمر بنا ونحن قوفا بجانب الباب فما أن تاوق حتي قال [خلاص وصلنا الكرب] و بدون مقدمات فقد دورت معاهوا شكلة كاربة كادت أن تؤدي الي كارثة .... و بعدها عرفت أن الكرب هي إسم تلك المنطقة و علمت أنه لا يقصد وصفنا نحن بالكربة ...

[عزيز عيسى]

وصحيح دا طبعنا لكن ممكن نغيرو
الأخ العزيز عصام زكي،

أولاً أهلاً ومرحباً بك أخاً وعضواً معنا في منتديات ودمدني..
ونأمل أن يطيب لك المقام بيننا.

في الحقيقة طبعنا ماهو شين..
لكن حماقتنا النابعة من حرارة القلب أحيانا بتكون
زائدة عن اللزوم ومفروض نحاول ضبط أعصابنا قليلاً
ونتفهم قصد الآخرين قبل أن نحكم على تصرفاتهم
من أول وهلة.

[عزيز عيسى]

آها النزيدك من الشعر بيت حماقة السودانين دى كوم وحماقة الجعلين دى كوم براه اجيرك الله وانا زولا... اوصولى من المتمه
بس الحمدالله الواحد كبر وتعلمنا كتير من هذه الزائله ..والله ياخواجه لو قعدته اتذكر لى بكره ما بخلص جنس مواقف لاتحصى ولا تعد.. بجيك صادى
هلا هلا بي أبو سفروق الحبيب ود المتمة اللابس العمة وما بعرف الجمة.
حظك شايفك متجدع في مدني عند آدم شية إنت وأصحابك.
تمزمزوا بالشية وتشموا في الهمبريب.. آخخ.. كان تجيب لينا معاك شمة!:cool:

بمناسبة حماقة أهلكم الجعليين..
قالوا في مرا عندها حلة كبيرة مليانة موية خاتاها في النار تغلي..
النار زادت في المنقد ماقدرت تنزلها وقعدت تكورك..
جارها الجعلي سمع الكواريك جاء جاري مسك الحلة ونزلها على الأرض..
المرا قعدت تزغرد.. أخينا شالتو الهاشمية رفع الحلة وصب الموية على راسه. ;) ;)

خصمتك بالفكي جعل لو ما جيت حكيت لينا عن أهلنا الجعليين.

[عزيز عيسى]

لك التحية بقدر حماقتك لأني أرى وهذا رأى الخاص
أن الحماقة اكسبتنا نحن السودانين الكثير من الاحترام
والتقدير.. نحمد الله علي حماقتنا
ولك خالص مودتي
مرحباً أبو الأمجاد.. لك تحية تليق بمقامك يا راجل يا طيب..
وزيارتك لنا في هذا البوست شرفتنا كثير.

حماقتنا أحيانا تصلح مع الشعوب التي ذكرتها لأنها
بتحب الإستخفاف بنا.. وديل طبعا ما بتنفع معاهم
إلا العين الحارة وعلقة جامدة عند الضرورة إذا
تمادوا في طغيانهم وغرورهم أو كما قال واحد
أخونا سوداني (كاره الجماعة إياهم بالله واحد).
ولك من الود أخلصه.

[محمد عبد الله عبدالقادر]

عزيز العزيز سلامات
ربما كانت هذه الصفه ذا فائدة فنحن في السعودية يشبهوننا بقزازه البيبسي اذا شربتها باردة ورائقه بتمتعك وكان رجيتها بتطير ليك في وشك وتبهدلك

[ابراهيم]

يا عزيز سلامات ياخ مشتاقين كتيير
ورمضان كريم ,,, طولنا شديد من التلفونات والاخبار مقطوعة لكن انشاءالله الامور حتستقر قريب

قلت لي بتاع الموتر جاب كثافتك هههههه ناس المواتر ديل ما تسكهم يا عزيز هههههههه
انا حصل لي موقف مشابه لكن اخدت حقي بدون سك سك

اها ما جايين فانكوفر قريب؟

[ود المطامير]

حبيبنا مشتاااااقين

مره بص فريقنا جا من مدنى وكانت الدنيا صيف غائظ

قام المساعدى رمى شوال دقيق

السواق سأله بنهره كدا .... الدقيق دا حق منو ؟
الكمسارى قال ليهو ياخى حق عيسى

قام السواق نزل ولبّع ليك الكمسارى بالطريقه الصاح


وفى النهايه إتضح إنو فعلا الدقيق حق زول إسمو عيسى ;)

[الرشيد احمد]

صديقي صاحب البوست الراقي بجد كلامك فيهو كثير من الحقيقة لكن بجد وانا بقراة في البوست كنت بسأل في نفسي ياربي السودانيين ديل جابو الحماقة الشديدة دي من وين ياتري من طبيعة المناخ والاجواء الحارة التيي جعلت دمائنا حارة ونفسنا قصير في أي شئ ولا نستطيع ان نصمد في طاولة حوار إلا وبعد شوية ساد منطق البنية والشلوت .. لكن تجد تناقض غريب بعد الحماقة والدماء الحارة دي يتمتعون بحنية وطيبة عويرة وملاحظة في الاسر الممتدة من الحبوبات الي الجدود ... ولك حمقاتي اقصد تحياتي ..

[عزيز عيسى]

الأخوان الأعزاء
زول من مدني
الجندي المجهول
خالد أحمد الصول
محمد عبدالله عبدالقادر
إبراهيم
ود المطامير
الرشيد أحمد

كل عام وأنتم بألف خير وعيد سعيد
وربنا يحقق الآمال ويعيده علي الجميع
بالخير واليمن والبركات.

يا جماعة عليكم الله سامحوني وآسف جدا للتأخير في الرد..
طبعا رمضان كان دخل في العشرة الآواخر..
منها صلاة تراويح وجري وراء تقضية حوائج
العيد ويا أبوي أنا عايز لي باتا وأنا
عايز لي شدة (بكسر الشين) وأنا عايز لي كبك.
المهم إنسترنا مع الأولاد وعدنا والحمدلله.

[عزيز عيسى]

الاخ المحترم .. عزيز عيسى
تحياتي لك ولكل الاخوة المتداخلين
اتفق معك في بعض ما ذهبت اليه واختلف معك في الاتي :-
1- نجن معشر السودانيين نشتهر بالسلام حتي في كل الدول الخليجية ( وانت ادري بذلك )
حبيبنا الأخ المحترم زول من مدني،

تحياتي وكل عام وأنت وأهلنا في مدني كلهم بخير.

شوف يا زول..
كلمة شوف يا زول دي أوعك تعتبرها زعلة أو حماقة مني. ;)

لا إختلاف بيننا فيما ذهبت إليه حول إشتهارنا بالسلام وفرض
إحترامنا على الغير خاصة في دول الخليج.. أي فرد يحترمنا
والله نبادله الإحترام ونزيد.. ودائما نبادر بالسلام لأنه ذلك
نابع من طبيعتنا والأخلاق التي تربينا عليها.. وقلبنا حار
وعندنا النخوة بنساعد المحتاج ونقف مع المظلوم.. والبغلط
معانا ما بنسامحو طب..
بالنسبة لما ذكرته في الفقرة 2 من مداخلتك.. حمميتنا وطيبة
قلبنا فعلا هي التي يمتاز بها كل السودانيين.. لكن قصدي إذا
حاول أحدهم خليجي أو أي فرد من جنسية أخرى مداعبة سوداني
ليس لديه معرفة سابقة به بنية سليمة قد يفهمها السوداني
من أول وهلة كنوع من الإستخفاف أو الحقارة ولا يقبلها منه..
وكما ذكرت في مثل هذه الحالات يجب علينا أن لا نتسرع في الحكم
على الأشخاص ونفهمهم غلط ونصل الى حد الحماقة في الرد عليهم بغضب.

مشكور كثير على مداخلتك القيمة.
محبتي الأكيدة.

[عزيز عيسى]

كلام جميل من زول جميل ( ورمضان كريم )

حبيبنا جندينا المجهول،

كل سنة وإنت طيب..
رمضان عد بخير وبنقول ليك العيد مبارك
وربنا يديك الصحة والعافية ويحقق أمالك.

أشكرك على مرورك الذي زاد من سروري.. وعلى كلماتك الطيبة.
وأحييك على مواضيعك القيمة وتعليقاتك المفيدة وعلى تواجدك
المستمر بين صفحات المنتدى.

لك كل الود يا راجل يا جميل.

[عزيز عيسى]

كنت أحدي المسافرين في قطار بورتسودان ... وكان الجو خانقا و الاخلاق في النخرة ... وكان القطار في طريقة الي مدينة كسلا ... صادف أن كان الكمساري يمر بنا ونحن وقوفا بجانب الباب فما أن تاوق حتي قال [خلاص وصلنا الكرب] و بدون مقدمات فقد دورت معاهوا شكلة كاربة كادت أن تؤدي الي كارثة .... و بعدها عرفت أن الكرب هي إسم تلك المنطقة و علمت أنه لا يقصد وصفنا نحن بالكربة ...
هههههه.. يا ود الصول قول كنت زايغ من الكمساري ومسطح فوق القطر..
علشان الكمساري ما يغرمك قلت أحسن تتاوق وتشوف ليك سبب وتدور
معاهو شكلة وتخارج نفسك.. ;)

بمناسبة القطر والكمساري ذكرتني نكته..
مرا عجوزة وصلت متأخرة عند محطة القطر وما في طريقة تقطع تذكرة وركبت
القطر علشان ما يفوتها.. الكمساري معاهو واحد عسكري دخل عليهم
وبدأ يصيح تذاكر تذاكر.. ولما جاء عند المرا العجوز قال ليها يا حاجة
تذكرتك علشان يخرمها.. قالت ليهو ما عندي تذكرة..
قال ليها خلاص تدفعي حق التذكرة ومعاها غرامة 75 قرش..
دفعت ليهو جنيه..
الكمساري قال ليها يا حاجة ما عندي فكه قام كتب ليها في ظهر
التذكرة الباقي 25 قرش وقال ليها لما تصلي تمشي عند شباك المحطة تستلمي
باقي قروشك..
الحاجة مسكت التذكرة قلبتها وقالت للكمساري إنت لما طلبت مني حق التذكرة
والغرامة أنا كتبت ليك؟ يا ولد بطل الإستهبال والمسخرة أديني قروشي على
داير المليم.
العسكري تدخل علشان يحل المشكلة قال للمرا العجوز: الزول دا مضمون يا حاجة.
المرا العجوز قالت للعسكري: هو كان مضمون إنت مباريهو ليه؟

أها دي ذاتها البقولوا عليها الحماقة.

[عزيز عيسى]

عزيز العزيز سلامات
ربما كانت هذه الصفه ذا فائدة فنحن في السعودية يشبهوننا بقزازه البيبسي اذا شربتها باردة ورائقه بتمتعك وكان رجيتها بتطير ليك في وشك وتبهدلك

الأخ العزيز محمد عبدالله عبدالقادر،

هههههههه.. والله لكن تشبيه مبالغة! ;)
يا سلام عليك.. غيتو دي أحسن صفة تنطبق علينا نحن كسودانيين..
السوداني تجيهو بالطيب يعاملك بأطيب منه..
تعكر صفاهو ما بتفرق معاهو بيتحامق وممكن يخسرك على طول.

[عزيز عيسى]

يا عزيز سلامات ياخ مشتاقين كتيير
ورمضان كريم ,,, طولنا شديد من التلفونات والاخبار مقطوعة لكن انشاءالله الامور حتستقر قريب

قلت لي بتاع الموتر جاب كثافتك هههههه ناس المواتر ديل ما تسكهم يا عزيز هههههههه
انا حصل لي موقف مشابه لكن اخدت حقي بدون سك سك

اها ما جايين فانكوفر قريب؟

يا برهوته يا حبيب،

ياخي كل عام وأنتم بخير..
يشهد الله إتصلت بيك قلت أعيد عليك وما لقيتك
وتركت رسالة. أمشي فتش جوالك.

بتاع الموتر جاب كثافتي لأنه مد لي أصبعه..أخوك من الزعلة
خلاني طاير وأكباس مثله بين العربات قلت ألحقو أكسر
فيهو ضلعة على الأقل.. لكن ود الذين سبقني..
شفت الحماقة عايزه توديني وين؟

لو جيت على كندا يمكن أزور مدينة تورنتو وليس فانكوفر
لأنها بعيدة شديد.. طبعا حأديك خبر قبل وصولي.

أمبارح كان معاي واحد صديقنا هنا في هيوستن..
قال لي إتصلت على والدتي (وهي إمرأة كبيرة في السن عجوز)
علشان أعيد عليها.. قالت لي الصباح (مسكلت ليك)..
قال ليها: يا أمي يعني شنو مسكلتي لي..
قالت ليهو: أجي يا ولدي ما بتعرف المسكلة؟
طبعا قعدت أضحك لمان دموعي جرن..
قال لي: عليك دينك شوف ناس السودان حتى الكلام إختلف..
ياخي لحدي الآن أنا ما فهم يعني شنو مسكلت ليك ولا المسكلة.
قلت ليهو: ياخي إنت طاشي شبكة.
الراجل قرب يموت من الضحك.

[عزيز عيسى]

قام المساعدى رمى شوال دقيق

السواق سأله بنهره كدا .... الدقيق دا حق منو ؟
الكمسارى قال ليهو ياخى حق عيسى ;)
حبيبنا عروة،

العيد مبارك.. وكل سنه وإنت وأسرتك طيبين.

عارف حماقه ساي قال للسواق الكيس حق عيسى!
ومعاها إشارة باليد والأصابع مفتوحة دلالة على إنه زهجان.
هو الحمد لله ما قال للسواق حق موسى!
كان كسرو ليك تاني.

إنت عارف الكمساري دا أهم زول في البص..
وبيعتبر المسؤول الأول من كل كبيرة وصغيرة
تحدث داخل وخارج البص.
السواق ينهر فيهو.. يا ولد أمشي جيب المنفلة
ودور اللوري.. والركاب ينهرو فيهو..
فوتني محطتي الله لا كسبك.. وأديني باقي
الفكة بتاعتي.. يعني بصراحة وش القباحة كله
واقع عليهو المسكين.. ودائما مجبور يتحمل
ويرد على الناس بأدب حسب مزاجهم أو حسب
ما هم عايزين.

[عزيز عيسى]

صديقي صاحب البوست الراقي بجد كلامك فيهو كثير من الحقيقة لكن بجد وانا بقراة في البوست كنت بسأل في نفسي ياربي السودانيين ديل جابو الحماقة الشديدة دي من وين؟
الأخ الرشيد.. ألف مرحب بيك بين أخوانك وأخواتك
وكل سنة وإنت طيب ويعود علينا وعليكم بالخير واليمن
والبركات.

أخوي الرشيد سؤالك عن الحماقة حقتنا دي جات من وين وجيه جدا..
وكمان زيد عليها (الكتاحة) العجيبة ديك إحتمال تكون برضو سبب. ;)
في رأيي نشوف لينا واحد (قافلا) معاهو نستشيرو في المسألة دي!


واحد أخونا إتصل بالسودان سأل واحد صحبو قال ليهو:
الجو عندكم كيف اليومين ديل؟
رد عليه صاحبو: والله أمبارح الجو كان حر شديد..
لكن اليوم جاتنا كتاحة بردت علينا الجو!!! ;)

مشكور كثير على مرورك الذي أسعدني.

[ضياء الدين احمد]

الاخ العزيز عزيز عيسي والله مشتاقين الواحد الاقي الناس السمحين بعد غيبة طويله والله الحماقة غير الضغط والسكري
ماكسبنا منها حاجه وربنا اهدي النفوس

[بنت الرفاعي]

لك التحية أخي عزيز عيسى.:)
س:
هل توجد حماقة منطقية؟؟!!:confused:

[خالد الماحي]

الاخ عزيز الموضوع جميل ودمو خفيف بس.. نحن السودانيين بنستعمل لفظ الحماقه بمعني ( سرعة الغضب والرد السريع الغير مدروس ) مش كده والحمدلله المعني الحقيقي للحماقه بعيد من ذلك وربنا يبعدنا جميعا عنها .....،،،،،

الحماقة مأخوذة من حمقت السوق.. اى كسدت..فالأحمق كاسد الرأي فلا يشاور ولايؤخذ رأيه في اي من امور الدنيا او الدين.

والحمق غير الجنون..فالأحمق قصده الصواب ولكن طريقته ووسيلته في ابداء رأيه او اظهار مشاعره او التعبير بكلماته تكون غريبه او خاطئه.

عكس المجنون. فالجنون عباره عن خلل في المقصود وفي الوسيلة معا.. الاحمق مقصوده صحيح وطريقته في الوصول الى مقصوده غالبا ماتكون شاذه اوو على الاقل غريبه.

اما الجنون فأصل رأيه فاسد.. وافعاله خارجة تماما عن المنطق والحكمة.

والحمق..صفة اصليه في بعض الناس حتى انه قيل:لو بلغك ان غنيا إفتقر فصدق وفقيرا استغنى فصدق.. وان احيا مات فصدق ..ولكن لو بلغوك ان احمق استفاد عقلا فلا تصدق..وفي ذلك قيل.

لكل داء دواء يستطب به *** الا الحماقة اعيت من يداويها

وقيل ايضا ان سيدنا المسيح عليه السلام شفى الاكمة والابرص، واحيا الموتى بإذن الله تعالى الا الاحمق .. فما كان له عنده ـ عليه السلام - دواء!!!