المساعد الشخصي الرقمي

مشاهدة النسخة كاملة : اسبوع جديد مع عضو جديد في الكرسي الساخن


aborawan
07-01-2005, 09:07 PM
من كتاباتك ومن مشاركتك ادركنا بانك تملك روح مرحه جدا اضافه الى كم هائل من الثقافه فمرحباً بك اخي وحبيبي عماد الصادق ( ابواشواق ) وانت تحل ضيفا على الكرسي هذا الاسبوع

زي كل مره نبدا بتعريف بالبطاقة الشخصية
أبوريلان
07-01-2005, 09:10 PM
أهلين بالعمدة وفى إنتظار وصولك .
عماد الصادق
08-01-2005, 01:33 AM
الأعزاء ..
شكراً للمقدمة.. وأتمنى أن أكون عند حسن ظنكم بي

من مواليد 1958
في قرية شرق سنار تسمى .. كساب الدناقلة ..
درست الابتدائية حتى الصف الثالث

ثم لظروف عمل الوالد .. رحلنا سنار المدينة
ودرست باقي المرحلة الابتدائية حتى صف رابع ؟؟؟؟
ثم الوسطى بسنار الشعبية ..
قلبوا السلم التعليمي .. واصلنا سادسة وأولى عام بالكاكي ..

في الصف الثاني العام .. نقلوني لمدني ..

درست ثاني وثالث بمدرسة ابوزيد .. وامتحنت للعالي في عام 1974

بعد دالك الثانوي العالي .. بالمؤتمر مدني

بعد داك .. دراسة بعهد المواصلات السلكية بمصر

سنة 1981 كنت جاهز لدخول المرحلة العملية

بدأت بوكالة السودان للأنباء الخرطوم .. تسعة شهور بس

ثم إلى بنك فيصل .. ولمدة 13 عام بين الخرطوم .. وبورتسودان .. ومدني .. وأخيرا سنار

ثم الصالح العام ؟؟؟؟؟؟؟؟

ثم السعودية في أواخر عام 1996

ومازلت

متزوج ولي إبنة وحيدة .. الله يخليها .. هي الآن في الصف الثاني متوسط

مستقرين حاليا بمدينة جدة

الحالة العامة:
صالح للعمل .. بس العمر الافتراضي .. يعني ..
الراس عاوز صيانة عمرة كاملة .. الله يديكم الصحة ..
وترانا ماشين .. والحمدلله ..
aborawan
08-01-2005, 03:41 AM
لك التحية عزيزي ونورتا الكرسي

بدأت بوكالة السودان للأنباء الخرطوم .. تسعة شهور بس

ثم إلى بنك فيصل .. ولمدة 13 عام بين الخرطوم .. وبورتسودان .. ومدني .. وأخيرا سنار

ثم الصالح العام ؟؟؟؟؟؟؟؟

الصالح العام ساي كده ولا في سبب ؟؟؟؟؟ :D:D
عماد الصادق
08-01-2005, 05:20 AM
تعرف يا أبوروان .. لمّن تم نقلي لبورسودان
عرفت منهم بأني في الخرطوم كنت بتاع مشاكل؟؟
ولمّن ظهر الصالح العام .. كما يسمونه ..
كنت متوقع نفسي أول واحد ..

وعلى كل .. طيلة ال13 عام .. كنت بلا لون سياسي
وغير محزّب .. وما زلت .. وده برضو سبب..
عمك تنقو
08-01-2005, 05:55 AM
العزيز عماد

يا ابن الماء والخضرة والوجه الحسن

في كساب لي أصدقاء وبالتحديد ( عائلة شاشوق ) وبالتحديد أكثر صلاح شاشوق 00
ويا ابن سنار المدينة والخزان لي سؤال واحد بس :

ماذا استفادت حكومة السودان من احالة الناس ( للصالح العام )
وهل هناك بالفعل صالح عام !
أبوريلان
08-01-2005, 06:01 AM
الأخ عماد الصادق أتمنى أن يكون الكرسى بردا وسلاما عليك وربنا يحفظ ليك بت ويديك العافية وطولت العمر .
ذكرت أنك بانكر وأحلت للصالح العام رب ضاره نافعه. اليوم خميس والأسرة عندها زيارات ومشواير وأنت مستعجل وعند عمل سورتنق وجت فرق جنيه وقدر ما جردت وراجعت لم تجد الفرق وأذن المغرب ولم تجد الفرق صف شعورك فى تلك الأثناء ؟؟
عماد الصادق
08-01-2005, 07:50 AM
عمي تنقو .. الك التحية ولكل محبي
الخضرة والماء والوجه الحسن ....
ناس شاشوق بعرفهم ..
وهم من كساب الجعليين .. وأنا من كساب الدناقلة
بعدين بخصوص الصالح العام .. تأثيره على العبدلله
إنو خلاهو يفكر في الاغتراب .. آخر الأبواب ..
واستفادت الحكومة من الأتاوات المفروضة على
الذين اغتربوا رغم أنفهم ..؟؟؟ وحتى الآن مالاقين المقابل ..

Myrelan
حليل زمن البنك .. والسورتنج .. والشغل في السودان
كلو .. حلو ..
إذا حصل الفرق .. طبعا المشاوير كلها إتلغت ..
لكن فرقك لذيذ .. لأنو راوند فقر ٌRound Figure

مع التحية
marwa
08-01-2005, 09:50 AM
الاخ عماد
كيف كانت الغربه معاك
admin
08-01-2005, 08:21 PM
اهلا وسهلا بك ياعم عماد :D :D
اول شئ وين في جدة؟ وهل مازلت في النظام المصرفي؟
بنك فيصل الاسلامي او مجموعة مؤسسات فيصل الاسلاميه هي صاحبة السبق في اسلمة الانظمة المصرفية في العالم الاسلامي اجمع.. ويبدو انك شهدت بدايات ذلك العهد .. وكون ان اسلمة المصارف مازالت حتى يومنا هذا تواجهة الكثير من العوائق والاقاويل .. وسؤالي هنا عن الممارسات المحاسبية المتبعة وقتها هل كانت تتم وفق معايير محاسبية معينة؟ وما هي الجهة التى كانت تحدد نوع الممارسة المحاسبية؟ هل تعتقد ان العقود الاسلامية من مرابحة وسلم ومضاربة وغيرها يمكن ان تكون بدائل استثمارية وتمويلية منافسة للعقود التقليدية؟ وهل فعلا الممارسات المسمية اسلامية كانت اسلامية 100%؟

امتحان محاسبة عديل كدا:D :D
عماد الصادق
08-01-2005, 10:04 PM
الإبنة مروة ..
ما زلت أعيشها.. كون أني بعيد عن الوطن ..
الغربة بالنسبة إلي .. مرحلة اللاوزن ..

زي الواحد في حلبة سباق
زي الزول الطلع فجرية .. كايس الرزق .. ولسه مارجع للبيت والدفو
زي الكابوس .. متين تصحي .. وتتفك
مافي استقرار ..

ولا .. حتى .. طعم للفول بزيت السمسم والشمار

وأظن أن هذا قليل من كثير ..


أما أيها الإبن العزيز .. Admin
:rolleyes:
الذي دخل سنار .. من بوابة سوق السمك .. وبيني وبينك
حتى سمك سنار له طعم خاص ..
أنا في جدة في حي مشرفة 1 .. خلف سوق الحرامية بتاع الجوالات ..
وآخر عهدي بالمجال المصرفي .. بنك فيصل
في شوارع كلها جبال ..

أما عن أسئلتك .. إمتحان عديل .. وما أظن إجاباتي تغطي ..
وأنا ما اشتغلت في قسم الاستثمار نهائي ..


طبعا في السودان كان بنك فيصل رائداً في أسلمة العمليات المصرفية
سبقه في ذلك بنك فيصل المصري ..
لو الناس .. الموظفين .. والعملاء طبقوا القواعد وفق المعايير التي وضعت
فهي صحيحة ومبرئة اللذمة ..

يعني مثلاً نظام المرابحة .. مرات نجد أن العميل بيستلم قيمة البضاعة نقداً
والعملية بتكون شكلية .. وأكيد هذا تلاعب أو تحايل .. ومرفوض

يعني في صيغ المرابحة .. مفروض البنك يتملك البضاعة .. بمعني تواجدها
في حوزة البنك .. بعد دالك يتم بيعها للعميل بعد وضع هامش مرابحة مقابل
تقسيطها .. والله أعلم
ياخي كده كفى .. وأحكي ليك الواقعة دي بمناسبة المرابحات..
في سنار .. كنت مراقبا للفرع .. ورئيس قسم الاستثمار كان في إجازة
في تنفيذ إحدى العمليات المصدقة .. جاء العميل وكان باقي تجهيز الشيك
قيمة البضاعة وكانت عبارة من ملح طعام..
قلت للعميل .. وين البضاعة موجودة .. قال في السوق هنا عند واحد تاجر بتاع ملح
قلت ليهو خلاص يلاك سوا نشوف البضاعة ..
وساقني ليك للتاجر بتاع الملح ..
الكمية كانت كبيرة ..
والتاجر طلع الوالد .. وأنا عارف إنو ماعندو البضاعة دي ..
قمت سألت الحاج .. ياحاج وين البضاعة ..
طبعا الوالد .. ضحك .. وعرف إنو الموضوع انتهى ..
وفركشنا ليهو العملية ..

وفي النهاية .. سؤالك داير ليهو زول متخصص .. وأنا بتاع فول ..
لكم التحية
admin
09-01-2005, 01:05 AM
شكرا على الاجابات يا عمدة .. هو بالله داك سوق السمك .. الصراحة وقتها مشيت سنار لسبب اغرب من ذلك .. مشيت اشتري اسبيرات عربات اتخيل (مشيت مع شباب يعملون في هذا المجال).. يعني الحته الشفتها كانت المنطقة الصناعية .. وازيدك من الشعر بيت كان وقتها في عز الخريف .. وعلى ما اذكر الشئ الوحيد الكان جاف من مياه المطر هو خط السكة حديد .. ففعلا انا شفتا الجانب السئ من سنار وفي الوقت السئ كمان
خطاب العبيد
09-01-2005, 06:15 AM
الاخ العزيز أبو روان أتمنى أن تكون قد إطلعت على الرسالة الخاصة التى قمت بإرسالها لك فيها إعتذارى لك لعدممعرفتى بطلبك لى بالجلوس على الكرسى الساخن الا اليوم 9/1/2005 ولك كل الشكر والتقدير والاحترام أخى المشرف العام على المنتدى
الزول الشين
ابومرام
09-01-2005, 07:39 AM
اخي عمده ليك مليون تحية وتحية وربنا يجعل الكرسي سلما وبردا مع الايام الكلها برد عموما ليك التحية والاسئلة خليها في المرة الجاية والاسئلةالخاصةخليها على الماسنجر عشان تكون مباشرة ربنا يديك الصحة والعافية ويخلي ليك اشواق ويديها الصحة والعافية
ولك التحية!!!!!!!!!!!
ابراهيم
09-01-2005, 12:15 PM
الخال العزيز عمدة لك التحية والاحترام

وكل سنة وانت طيب بمناسبة اعياد كتير فاتت واعياد جايات

اليوم هو توقيع اتفاقية السلام بين الحكومة والحركة الشعبية نسأل الله ان يتم على اكمل وجه وبنوايا حسنة وسؤالي هو:

فما هي تطلعاتك ورؤاك المستقبلية لهذه الاتفاقية؟

ما هو اجمل بيت شعر سمعته؟

رايك في شباب اليوم؟

ما الذي تفكر به دوماً؟


لك التحية ابو اشواق
عماد الصادق
09-01-2005, 10:50 PM
الزول السمح ..
الشكر والتقدير .. محل احترام
من المشرف العام ..
وحظينا نحن بالطلة البهية ..
ولك التحية


أبو مرام .. العزيز
مشتاقين ..
وبمناسبة البرد .. السنة دي .. الإحرامات غير .......
عاوز أهاتفك .. لكن رقمك طايح .. رسلو


إبن أختي العزيز .. أبراهيم
بخصوص الاتفاقية .. بنظر إليها .. أنها إيجابية
وحيث أني أحب التغيير .. عايش بعد التوقيع
في جو تفاؤلي .. بأن يكون هناك رخاء .. وازدهار ..
وبرضو خايف .. لأن الذين كانو وراء الاتفاقية .. ما أظنهم ..
بل وأجزم بأن لهم مآرب .. الله يسترنا ..
يعني الواحد بتوقع إنها بداية لإنقسام السودان .. إلى دولتين
لعل وعسى .. نستفيد ما كنا نصرفه في الحروب .. أن ينصب في العمران ..
ولا نخاف .. كون أننا نشهد أن لا إله إلا الله .. وأن محمدا رسول الله .. يقيناً

في مجال الشعر .. غير ذواق للشعر
ولسه في الذاكرة ..

هذا صبي هائم تحت الظلام .. هيام حائر
أبلى الشقاء جديده فتقلمت منه الأظافر ...
واللحن .. على أنغام جانوار ....
ميري مهابه سدارا هيهي .. سدارا هيهي .. سدارا هيهي.....

شباب اليوم ..
باختصار .. بفكر في نفسه .. أكثر مما حوله ...

دوماً سارح .. هناك في البلد
هاجسي ضل في الديار ..
يعني .. كيف أطلع من الجو اللي أنا فيهو الآن !!!!!!!!!!

مع التحيات الزاكيات
أبوبكرحامد
10-01-2005, 05:13 AM
حضرة العمدة .................. سلاماااااااااات

ياريت لو وصفت لينا شعورك عند قدومك مدنى للمرة الأولى ؟؟

وماهى الأشياء التى لفتت إنتباهك فى مدنى ؟؟؟؟؟؟

مع مودتى

ود الماذون
waheeb
10-01-2005, 06:10 AM
العم العزيز ...

لك التحيه وانت تقدم بثبات في الكرسي الساخن..

سؤالي ليك كم كان اول مرتب ليك... وما هو شعورك وقتها؟

من هو اول انسان اخبرك بانك احلت الي الصالح العام ورد فعلك كان شنو؟

مع تحياتي ليك عزيزنا أبو أشواق...
المخلصة
10-01-2005, 02:22 PM
الأخ الفاضل / عماد الصادق
السلام عليك ورحمه من الله تعالى وبركاته
أسئلتي ليك هي :

س1: ماذا تعني لك هذه الأسماء
aborawan
ابراهيم
myrelan
أبوبكرحامد
waheeb

س2: هل إنت ضد أو مع المجاملة ،،، ولماذا ؟

دُمت في رعاية الله
عماد الصادق
11-01-2005, 02:04 AM
الأخ العزيز جداً .. الأستاذ أبوبكر ..
لحظة قدومي مدني للمرة الأولى ..
أول حاجة ماقادر أحدد المرة الأولى دي في حد ذاتها ..
نخليها لمن تم نقلي في الثانوي العام ..
أولاً كنت بتحايل على الأهل بسنار كثير عشان ينقلوني مدني ..
ولقيت الفرصة في أنني كنت مريض بالربو ..
وهي حساسية عجيبة ..
أول ما تجيني .. يودوني كساب .. قرية شرق سنار .. مسقط رأسي
أو المهم يطلعوني بره سنار .. الحساسية تروح ...
وفي سنار كنت محروم حتى من ممارسة الكورة
لأنو أي تعب .. أو إرهاق .. أو كتاحة ساي ممكن تقوّم عليك نفسك ؟؟
أما في مدني فهي غير .. أمارس كل النشاطات .. وأقابل كل الكتاحات ..
عشان كده نقلوني مدني ..
شعوري كنت فرحان جداً جدأ .. لدرجة أني فور أن تلقيت تلفون من خالي
الأستاذ مصطفى الفضلي .. الله يرحمه .. ومن المدرسة .. وبلبس المدرسة
بتذكر أنا دخلت البيت .. وكان الزمن داك في العشير .. وراكب عجلتي ..
وبلبس المدرسة .. ؟؟؟؟؟؟



كل شئ في مدني له طعم خاص ..
شجر الزونيا جنب حديقة وقيع الله ..
السينما .............
أكثر ما لفت نظري .. جو دار الرياضة بمدني ..
الكورة لها طعم لذيذ وفريد ...... زماااااااااااان ..............
عماد الصادق
11-01-2005, 02:14 AM
طبعا كلكم عملتوني عمكم .. ما علينا ...
نتماشي مع الوضع الجديد ..
والله أنا متوقع ناس كتيرين ..
الدواء وكباية الموية تحت السرير
والعشاء زبادي ..

ونقول .. إبني العزيز وهيب
أول مرتب على ما أذكر 89 جنيه
في وكالة السودان للأنباء

الشعور بأول مرتب ..
شعور مهيب .. يا وهيب
يعني الشعور بأنك انتقلت من مرحلة لمرحلة
يعني خلاص بقيت رااااااجل ..
عماد الصادق
11-01-2005, 02:26 AM
الأخ وهيب .. مرة أخرى
الإجابة عن السؤال الثاني ..
الشخص الذي أخبرني .. زميل
جد ما قادر أذكر إسمه .. وصورته واضحة في مخيلتي...

رغم أني كنت متوقع ذلك ..
لكن الشعور كان سئ جداً جداً ..
بتكون في وضع لا يحسد عليه ..
التصرف الوحيد في تلك اللحظة
إنك تتخارج وتنسحب .. في التو واللحظة ..
ضياء الدين احمد
11-01-2005, 11:32 AM
الاخ عمده لك التحيه .
ود العجوز ‘ تكتوك ‘ حي الجنه ‘ المزاد والمؤسسة بتاعت التسالي
ماذا يعنوا لك ؟
عماد الصادق
11-01-2005, 10:02 PM
الأخت المخلصة
الأسماء اللي ذكرتيها .. أسماء كلها لها وقع رنان
في المنتدى .. يديهم العافية
تعني لي أنه ما زال في الإمكان إنك تلاقي ليك ضل ترتاح فيهو .. وبيهو
رغم هجير هذه الأيام .. ... ....

أنا ضد المجاملة .. لأنها بتكون على حساب (صاحب حق )‍‍‍.....
مع التحية ..
عماد الصادق
11-01-2005, 10:11 PM
الأخ ضياء الدين ..
باين عليك بتمشي سنار كتير ..
ودالعجوز .. فنقوقه سوق ساد ثم باد ..
تكتوك حي نمبر ون ..
حي الجنينة .. راقد على منظر خلاب .. ممكن يكون منتجع عديل كده ...
المزاد .. أكبر حي .. بيتنا هسه فيهو ..

أما المؤسسة .. الله يرحمها .. تساليها بلغ من الشهرة ما بلغ ..
لكن هسه .. مش زي زمان ..
ابومرام
12-01-2005, 08:31 AM
لما تعبري بالشوارع شوي كيف الناس تصراع ناس ؟؟ وناس ؟؟
سؤالي ليك ( طبعا انك قلت من مواليد بعد الاستقلال طبعا مافي حاجة اسمعا جكس ان صحت التسمية ولا ولا ؟؟ شعورك وانت تتلقى رسالة او تحية او موعد او او او او او من ام اشواق ) ؟؟ حبيبي عمده وكم تمنيت ان اكون في سعة من الوقت وشي من قلةالزحمة لكن تاتي الرياح بما لاتشتهي السفن وانت تسجي المنتدى بابداعتك وانامل من ذهب ونتشرف ان نراك ونتمنى من المشرف ان يضعك في وضع اخر بعد الكرسي بل في لمسات فنية لانك بوتقة من الابداع على الرغم من عدم الاطلاع على كل المواضيع التي طرحت اليك لك التحية والتجل !!!!!
بابكر
12-01-2005, 07:51 PM
الاخ الوفى عماد ابو اشواق لك منى التحيه والتقدير لسخصك الرائع وقد استمتعت ايما استمتاع لردودك العذبه العفويه والتى تدل على صفاء نفسك ونقاء معدنك وقد اعجبتنى صراحتك اتنمنى لك من كل قلبى التوفيق والسداد ,,,,,,,

وهاك اسئلتى........

ماذا يعنى لك فرح ود تكتوك

,,,,,,,,,, خزان سنار

,,,,,,,,,,محمد صالح مهرج السينما

,,,,,,,,, عوض البيج سواق التاكسى

,,,,,,,, نبيل غالى

+++++++++++
هل حققت طموحاتك ؟؟؟؟

وهل انت سعيد الان؟؟؟؟

واخيرا ارجو الا اكون قد اثقلت عليك

لك شكرى
عماد الصادق
12-01-2005, 10:14 PM
أبومرام .. بابكر الأعزاء ..
أخجلتمونا بكلمات الثناء .. والنقاء .. والوفاء ..
ونتمنى وأتمنى أن أكون عند حسن الظن دوماً ..
ولو أنني أدري .. وأدري جيداً أنني لا أرقى لذلك ..
زمااااان كنت متصالح مع نفسي ..
هسه طوالي شكَل .. الوش بقى مكرفس .. مش من الكُبُر ..
ما علينا ..

بعدين يا أبومرام .. الجكس (لو أني فهمت سؤالك ؟)
الجكس زمننا والزمن اللي قبلنا .. والزمن اللي هسه نحن فيهو..
وحتى تقوم الساعة .. ياهو الجكس ..

وشعوري يا أبومرام .. لا يوصف .. سعادة .. لا عارف يضحك .. ولا عارف يضحك
بس بسابق في الزمن .. لمن يجي الميعاد ..
في زمًّنا.. يعني زي شعور زول
لقى ليهو كرسي في المواصلات الزحمة..
أو كبّ بنزين ..
أو اشتري رغيف ..
أو عمل تأشيرة عمرة ....
أو بين مدني والخرطوم .. حجز مقعد في مواصلات الجزيرة ....
لكن شعوري .. لا لا .. أكثر من كده ..

والله المناظر دي لو لقت ليها واحد مبدع .. يطلع حتة دعاية ..

العزيز بابكر ..
فرح ودتكتوك .. رمز
زي مدني السني .. في مدني
خزان سنار .. بعد صناعته للكهرباء .. وربط الشرق بالغرب
بالسكة حديد .. وحليل السكة الحديد ..
نوارة سنار .. وحتى الآن لم يستغل كمكان سياحي بحسب
جمال وروعة المنظر ..
يعني ممكن نتغنى .. ونترنم .. لو شفت مرة .. خزان سنار .. يغالبك حنين طول السنين..

محمد صالح .. الله يرحمه ويغفر إلينا وإليه ..
مين القال عليهو مهرج سينما .. حاشا ..
كان بوزع ثقافة .. جرايد .. وإنت فوق .. فوق
لمّن محمد صالح يتكرم .. ويجيب ليك جريدتك اليومية ..؟؟

عوض البيج .. إسمه اقترن بالتاكسي ..
وفي التاكسي .. البيجو ..
وما عارف بيج دي دلع للبيجو ؟؟؟

نبيل غالي جرس ..
إسمه كجده .. جرس
إنه علم .. رابطة سنار الأدبية ..
إبداع ..

وعن الطموح .. ما حأعرف إني حققته ولاَ لا
لأنو بعد الموت ..
طموحي كله .. حُسن الخاتمة .. وأن يرضى الله عني ..

وأنا سعيد .. لا ... أنا عماد الصادق

مع تحياتي وحبي
ابومرام
12-01-2005, 11:42 PM
لمن اتى الحديث بانك قمة في الابدع والثقافة كان اكيد واكيد
تم التاكيد ياشباب من الابداع
تحيات