خربشات على جدار الواقع الخيالى

[بدرالدين أحمد موسى]

عريسنا ساير البحر يا عديله .. قطع جرايد النخل الليلة زينة
السيرة مرقت عصر يا عديلة ..

العريس ماشى ليك قدام السيرة و الوزراء مايدوك الدرب شئ ماشين مع العريس و شئ قداموا و جماعة الجكس ديل وفد مؤخرة وكلام دقاق و جرايد و مسلسلات . و أخوان العروس مكابرين الراجل و أخوهم الكبير لا تعرفوا حمش و لا خايف من مرته . يكحل بى قعر العين . و الجكس اشى أحمر و اشى أخضر و اشى جينز و اشى كلام كبير ما نقدروش نقولوا .. و فقوسة شايله ليك الدلوكة و حنان مشكلة شغالة طق طق بالشتم و لا شغالين ليك بالأذان .

أصله العائلة دى ما بتعرس لى أى واحد منهم كان ما جرتقوه و وزروهوا البحر و عزم ليهو الشيخ . الجنس اللطيف سيرة البحر دى عجبتم و العريس و أصحابوا عاوزين يخلصوا و يشوفوا ليهم قعده و لا بتاعة . العريس قال لى أخته . شنو ياجماعة القصة دى ما خلاص ؟؟ قالت ليه كدى أصبر . هسه نحن كرعينك ما شطفناهم . قال ليها . هوى أنا ماكلمتك؟؟ . كله الا تقولى لى ملص الجزمة و الشراب و الحركات بتاعتكم دى .. كفاية الحنة !! . انتهت السيرة و الجماعة رجعوا . لكن اتنين مجكسين فى نهاية السيرة عملوا زوغبير . دخلوا ليهم جحر و لبدوا فيهو .. صاحبى و هو مارق لقى ليهو نبتة لون زهرتها بنفسجى . قرض ليهو منها كم كضم .. أتاريها شجرة خشخاش !!!

أول ما السيرة طلعت القيف جماعتك مرقو قعدوا ليك مع البحر . منزلين كرعينهم فى الموية . و صاحبك وقع ليك فى الجكس جرايد ..
و هم فى قعدتم دى جات ليك بطه عايمة . قال ليها تعرفى يا عسل . الظاهر الحتة دى ما غريقة . عاينى البطة دى عايمة المويه تحت رقبتها !!! . شوية كده نزلت ليك مطرة . سحب ليك الجكس بتاعتو و أقرب جحر لبد ليك فيهو . قال ليها الحمد لله السوانا نمل .. و لقينا لينا جحر نتلمه فيهو .. هسه السمك ده يمشى وين من المطرة دى .. و نواصل

[الباشا السوداني]

و هم فى قعدتم دى جات ليك بطه عايمة . قال ليها تعرفى يا عسل . الظاهر الحتة دى ما غريقة . عاينى البطة دى عايمة المويه تحت رقبتها !!! . شوية كده نزلت ليك مطرة . سحب ليك الجكس بتاعتو و أقرب جحر لبد ليك فيهو . قال ليها الحمد لله السوانا نمل .. و لقينا لينا جحر نتلمه فيهو .. هسه السمك ده يمشى وين من المطرة دى .. و نواصل



انت واصل ونحن بنواصل الاجدجد السمك بمشي وين لمة المطرة تصب

[بدرالدين أحمد موسى]

انت واصل ونحن بنواصل الاجدجد السمك بمشي وين لمة المطرة تصب

تعرف يا باشا .. القرنتية من أغرب مخلوقات النيل ... بالرغم من الموية الكثيرة العايشه فيها دى .. لما تصب مطرة .. تطلع جسمها و تفتح خشمها الكبير داك تتلقى قطرات المطر..شفت الطمع ده !!!!

[ابو الامجاد]

يا سلام يا بدرالدين زكرتني قصيدة قرنتية للمبدع هاشم صديق

[بدرالدين أحمد موسى]

يا سلام يا بدرالدين زكرتني قصيدة قرنتية للمبدع هاشم صديق

و سنة سنة .. خلاص وصلنا

[بدرالدين أحمد موسى]

وقفت المطرة مرقوا ليك النملتين .. قال ليها تعرفى يا منقه .. قبيلة النمل دى ربنا ميزها بالتكافل و النظام .. نلملم فى العيش السنة كلها نحن شغالين و لما يجى الشتاء ما عندنا أى مشكلة .. نرطب فى جحورنا دى و اللى ربنا غضبان عليهو يجينا .. و حاتك ننجموا ليك نجام . لمان يفهم حاجة ... !!

قالت ليهو يا حبيب .. الحفلة دى مابتكون بدت .. يلا نمشى .. العريس ده قالوا جايب الشيلة 4 حبات عيش ..و كم حبة سمسم .. لكن قالوا ليك الريحة دى 6 قزازات حامض النمليك .. قال ليها عليك الله هسه نحن ما أخير من البشر .. مصعبين القصة .. يطلع ليهم واحد يقول ليك أصله العرس بالفاتحة ياناس ما حلال ...؟؟؟ الحفله كلها يقولوا ليهو حلال ..و أول ما تجى تخطب ليك واحدة . تقوم أمها تقول ليك عاوزة الحاجات تكون 12 / 12 و المهر مابعرف ليك كم مليون و العرس فى الصالة و شهر العسل ما بعرف ليك وين و لازم تسجل للبت فيلا بى اسمها .. لمان بناتهم عنسوا .. هسه أنا بمشى راسى عديل لى أبوك و اديهوا ليك قرضة من الخشخاش دة أخليهوا ليك يبقى ماذون يعقد لينا طوالى ... و هم مارقين ليك من البحر لقوا ليهم باعوضتين مجكسين . سلموا عليهم و طلعوا ..

و نواصل مع قصة البواعيض ...

[مدنيّة]

مع البواعيض والنجاض داك قلمك يابدر ماشاء الله عليه

واصل يامبدع وانا مواصلين متابعة

[محب]

تسلم يا مبدع
واصل ما تعمل فواصل
لكن انت السمك دا لمن المطرة تصب بمشي وين
ما قلت لي ؟؟؟

[abomazeen]

لا حول ولا قوة إلا بالله العلي العظيم

نملكم ده بجكس في الرمضان اللهم إني صايييم

[بدرالدين أحمد موسى]

مع البواعيض والنجاض داك قلمك يابدر ماشاء الله عليه

واصل يامبدع وانا مواصلين متابعة

ده من ذوقك يا مدنية .. و شكرا للمتابعة

[بدرالدين أحمد موسى]

تسلم يا مبدع
واصل ما تعمل فواصل
لكن انت السمك دا لمن المطرة تصب بمشي وين
ما قلت لي ؟؟؟

ده من ذوقك يل محب ..
هو السمك ما عنده مشكلة .. بس النمل قرض ليه كضمين من الخشخاش !

[بدرالدين أحمد موسى]

لا حول ولا قوة إلا بالله العلي العظيم

نملكم ده بجكس في الرمضان اللهم إني صايييم



مش يمكن بعد المغرب .. دى فيها حاجة !!!!

[بدرالدين أحمد موسى]

الباعوضتين عاملين ليك عرض بهلوانى . تجيهوا من هنا يلف ليها بى هناك .. الظاهر رايحه ليهم أضان زول .. مكوفرين... ليهم كم يوم مالقوا ليهم زول يزنوا فى أضانه و على العليهم ما لاقين ليهم دم يمصوهوا ..

تعرفى يا فردة .. نحن سبب واحد يخلينا نفارق البلد دى مافى .. ياخى ديل بشر من الصباح شاى بى لبن و سكر زيادة و العجب كان لقيتى ليك ناس مرطبين . النوع اللى بيعمل ليك اللقيمات بالطشت داك ..و السكر يسحنوا ليك نااااعم . قبل ما تختى خشمك تلقاهوا ذاب .. و بعد داك يجيبوا ليك اللحمة و الدجاج و السمك و الخضار .. اليوم كلوا هم شغالين طحن.. شئ فول و فسيخ .. و شئ صينية سمك ..و شئ ضلع .. و ألذ حاجة يلموا ليك البواقى كلها فى كيس .. قال ايه ينتظروا بيهو جماعة النفايات ... عليك أمان الله لما يجوك جماعة النفايات نحن و الذباب و باقى الحشرات نكون بقينا امبراطوريات ... و كما ن عليهم دم ... تمص ما تدى الجنبك !!! و العجب كان جوهم مغتربين .. النوع الضاربين التفاح و المطايب.. عاد ده مابيكون مولد !!! المصيبة بعد ده كلوا يقولوا ليك عاوزين نقضى على الأمراض .. و نكافح البعوض ... جنس كضب !!

الأسبوع الفات ده .. مشيت ليك المستشفى .. و حاتك لقيت لى بركة بتاعت مويه أكبر من الفوله .. و بينى وبينك كنت عاوز أعملها ليك مفاجأة لكن ما مشكلة .. انت ما حبيبتى و زوجة المستقبل .أنا قررت أعمل عش الزوجية هناك . المستشفى ده فيهو كل المطايب . و حتى الناس ما تفتشى عليهم . بيجوك براااهم ..

هوووى أنا عارفاك عينك زايغة . عاوز تسكنى مع العالم ديل ؟؟.. يعنى أنا ألم فيك وين .. أنا غايتو عاوزاك تأجر لى شقة مفروشة .. ان شاء الله تسويها لى جنب الأبحاث .. وكان ماعجبتنا و لا ضايقونا ناس الرش .. نغيب كم يوم و نرجع تانى .. هم زاتم ناس الرش ديل بيرشوا بالمواسم .. أهه نحن لما يرشوا نرحل .. يفوتوا نجى راجعين .. لا تنقل عفش و لا تكاليف ...

كدى دة موضوع بيتدبر .. لكن عليك النبى عاينى للفيران ديل .. نفايات ساى سمينين و أمينين ...
و نواصل مع الفيران

[بدرالدين أحمد موسى]

يا أختى مسئولة من الخير ناسك خليتيهم مالك ..؟؟؟؟
و الله الناس ديل تعيسين نهائى وشكلهم ربنا غضبان عليهم .. أول حاجة أنا قبلت أقعد فى بيت الناس ديل ولدهم بتاع الأمجاد ده ما بجيب حاجة فى البيت ده غير الفول و العدس و ياكلوا ليك الفول ده ما بيخلوا فتفاته .. أما العدس ده يقلبوا كلوا فى الصحن .. يفتو ليكك العيش ده . عليك أمان الله الصحن ماداير ليهو غسيل . يرفعوهوا طوالى فى السرير .. ياخى ديل قشر البصل اللى بيسوا بيهو العدس ده بيبخروا بيهوا البيت .. قال ايه بيطرد الذباب !! هو وينوا الذباب . و يجى لى شنو !!! أهه أنا بقيت عايشه على دولابهم ده .. كل يوم آكل فى الخشب ده لمان سوى لى يابوسة .. اليوم داك كمان أكلت لى خشبة الظاهر فها عقده شربانه بوهية .. دى كمان سوت لى مغص .. تلاته يوم ما أكلت .. و على العليهم .. اليوم داك جاهم حرامى .. داير يسرق شنوا ما بعرفه .. و أنا لابدة تحت الدولاب شايفه ليك الحرامى ده لافى جوه البيت بى بطاريته .. و لما مالقى حاجة .. شال المكواة القديمة حقت الفحم ديك .. الله لا يوفقه .. كب لى الرماد فى راسى و تلب الحيطة و جرى ..

مشيت لى الناس المغندلين جيرانهم باللفة بتاعت المكوجى قلت ألقى لى معاهم ان شاء الله شهر ... دخلت ليك بالمجرى .. الساعة الما تلم ليك فينى كلبه والده ليها 8 جريوات . بى دربى رحت جارية أتلفت .. و تلاقينى ليك كديسة الظاهر عليها مكوفرة .. الساعة الماهمرت ليك فينى .. أنا أجرى و هى تجرى ... و تحت برميل الزبالة .. رقدت شوية . أشوف ليك الدبيب بيملص فى قميصه .. يا بوليييييييس .. الليلة دى مصيبة شنو . و الله بس مرقنى كرعينى .. اتسحبت براحه .. و بى تحت كرعين الغنمايات ديل .. جيت عليكم طوالى و غدا نواصل مع الغنمايات

[بنت الرفاعي]

المصيبة بعد ده كلوا يقولوا ليك عاوزين نقضى على الأمراض .. و نكافح البعوض ... جنس كضب !!

الأسبوع الفات ده .. مشيت ليك المستشفى .. و حاتك لقيت لى بركة بتاعت مويه أكبر من الفوله .. و بينى وبينك كنت عاوز أعملها ليك مفاجأة لكن ما مشكلة .. انت ما حبيبتى و زوجة المستقبل .أنا قررت أعمل عش الزوجية هناك . المستشفى ده فيهو كل المطايب . و حتى الناس ما تفتشى عليهم . بيجوك براااهم ..



الله يعين.

لك أنقى التحايا أخي بدر الدين.:)

[بدرالدين أحمد موسى]

مشاركة الأصلية كتبت بواسطة بدرالدين أحمد موسى
المصيبة بعد ده كلوا يقولوا ليك عاوزين نقضى على الأمراض .. و نكافح البعوض ... جنس كضب !!

الأسبوع الفات ده .. مشيت ليك المستشفى .. و حاتك لقيت لى بركة بتاعت مويه أكبر من الفوله .. و بينى وبينك كنت عاوز أعملها ليك مفاجأة لكن ما مشكلة .. انت ما حبيبتى و زوجة المستقبل .أنا قررت أعمل عش الزوجية هناك . المستشفى ده فيهو كل المطايب . و حتى الناس ما تفتشى عليهم . بيجوك براااهم ..


الله يعين.

لك أنقى التحايا أخي بدر الدين.:)

و تقولى لى يا مرام أسباب تلوث المياه شنو !!! تحياتى .

[بدرالدين أحمد موسى]

الغنمايات فى لحظة صفاء

ياختى تيمانك وينهم
قالت ليها .. أسكتى ساى يا بت أمى أنا حسرتى عليهم ما بتتوصف .. واحد منهم كان مربرب الجماعة القاعده معاهم جوهم ضيوف من سنار . واحد من الضيوف قال ليهم و الله لحم العتوت ده أحلى من الخروف .. راجل المره ما صدق .. طوالى حلف طلاق بالتلاته الا يضبحوه . و حاتك قدام عينى ضبحوهو ورضرضو عضيماتو و أدوهو الصاج . زول واحد ساى كدى راعى لى مشاعرى مافى . و الثانى سارح معاى بالخلاء جرى منى على غنم الراعى التانى و هديك القضية لى يوم الليلة مدورة . لكن كان شفتيهو من مساككة المحاكم انقسم النص . غايتو الله يصبرنى ساكت على مغايس البشر ديل .

و الله البشر ديل يا خيتى صحى ربنا ميزهم بالعقل لكن ماعندهم أى رحمة . و حاتك يا الغالية . بتى جابت تيمان من حر ماحلوين تبلعيهم بى كدارينهم . يجيبوهم للبت من الصباح . بس يمصوا ليهم رضعة . طوالى يسحبوهم و يلقوا ليك الكورة . يحلبوا اللبن ده ما يخلوا الحبة . بتى مسكينة اليوم كله تاكل و تشرب عشان ترضع وليداتها .. و هم ولا هاميهم .. اللبن ده سوا ليك منوا الشاى و الجبنة و الباقى يروبوهو ..

و الله ياخيتى قصة بتك دى أرحم من صاحبتى مسكينة . عامله تفتيحه أبت تطلع اللبن . و حاتك سبعة يوم ..ضرعها حجر . و دوها البيطرى لى ولد خريج جديد من الجامعات المالية البلد دى . أداهم دواء كدى حجر الضرع الثانى . مسكوها ضبحوها و أكلوها و لى الجلد ده ما خلوهو عملوا منو فروة صلاة . و الكدارين رموهم لى الكلب . و الولد أدوهوا للراعى مع الغنم . هداك تراهوا مرضان و ضعفان . اهه عليك الرسول الناس ديل قلبهم فيهو رحمة .

و الله يا خيتى كلامك صحى . نحن سيدنا ده هسه فى داعى يكوينا بالنار فى مخروقاتنا ديل . هسه كان ربط لينا خيط فى رقبتنا دى و لا كان حلق لينا ساى ما كان أخير . وحاتك غنمايتو البيضاء قال عشان ما تتلخبط مع غنم جيرانوا جاب ليهو حديده كواها بيها فى مخروقتها .تراها هاديك علامة قدر ده بس تقولى قناة الجزيرة .. و بعد ده كله تجى أمك تقول ليك ها الحمارة دى ماتعاينى قدامك .
و . نواصل ... مع الحمير

[بدرالدين أحمد موسى]

أربعة واقفين ليك فى نص الزريبة ياكلوا و ينططوا و يهنقو .نزلت ليك عليهم مطرة تقيلة. أسيادهم دخلول ليك السراير و المراتب و السروج و خلوا ليك الحمير ديل دقتهم ليك المطرة عاصرين ضنبهم من البرد . واحد منهم وقع من طولوا . حمار ساى جاب خبروا مافى .أتاريهو مسكين قرصتة عقرب ..

واحد من الحمير قال ليهم يا جماعة انتو البشر ديل كان سووا لينا راكوبة و الا قفص زى حق الجداد دة كان بيكلفهم شنوا . الثانى قال ليهو يا أخوى الجداد بيبيض انته بتسوى شنو . ياها الرملة البتشيلها فى ضهرك دى .. اليوم كله تكورك زى المجنون . و بعدين جلدك التخين ده زاتوا المطرة بتسوى ليهوا شنوا .. قال ليهوا يا أخى انت أصلك ما بتمشى الا بالضرب عشان كدى جلدك تخين . نحن غايتو فى البلد دى نقعد نحفت كدى لمان نموت وكان كبرنا و بقينا مابنقدر على الأحمال يضربونا رصاص . كان متنا موت الله ساى يرمونا فى الخلا .. فى بلدات تانية يعظمونا ليك جنس عظمة يضبحونا و ياكلونا شئ فخدة و شى مفروم و شى كستليته . ما أصله نحن فينا نسبة عالية من البروتين .

و بلدان تانية ليه . هنا فى بلدنا دى و الله يجوك الحرامية الجزارين الساكنين جنب الترعة . يسرقوك و يضبحوك يقطعوك مع البقر و يبيعوك زول واحد يجيب خبرك مافى . وكان على ناس الصحة و البطرى و الله ختمهم دى ساهل .. أغمتو لى سيد الختم ساى يا أخوى .. و أزيدك من الشعر بيت . جيراننا فى البلد الثانى داك يفرموا ليك لحمنا ده و يببيعوهوا كفتة و كباب . ما تسمع لى زعتر ملك الكفتة و عمى جميل الكبابجى . كله من لحمنا .. و طازج.

المطرة و قفت و الجدادة جات ناطة ... وغدا نواصل مع الجداد

[بدرالدين أحمد موسى]

كتيبة الجداد جاية ماشة جوة الحوش نكشت ليك الزبالة بى الكرعين وو سخت ليك الدنيا كلها . واحدة خنقتا ليك قشرة بصلة و قامت تحفت .. أخواتها كل واحدة جرت فى جيهة . جات الحاجة مرقت ليك القشرة من الدجاجة .

شوية اتلملموا تانى , نفس الوضع . تشتيت و كواريك و ازعاج . انت اسمعى مالك بتخنقك قشرة البصلة .. عاملها فيها حنكوشة . ما انت ياما بلعتى عرق الورق و الملوخية و حاجات تانية مافى داعى أجيبها قدام الجداد ..

يا ختى فضلت خيرك . عاجبانى انت يوم جو يسرقوك . غشوك بى المصران
. تتذكرى لمان جاء الحرامى رمى ليك مصران الدجاجة و أنت ما صدقت خبر لميتى فيهو . و أول ما نفخ فى المصران بطنك بقت قدر ده . باعوك فى السوق و بقيتى ليك بيت و قعدتى معانا فى الكر ده .

يا بنات خليكم من الحكى الفاضى . هو أصلهم البشر ديل قالوا ليكم بيربوك حبا فيكن . و الله كان ما البيض البترموهوا ده كل يوم زول واحد بيجيب خبركم مافى . و اليومين ديل شايفاهم خلوا الجداد البلدى و بقوا يسووا ليك الجدادة فى 45 يوم . و أما الجداد البياض ده الليل ده ما بيخلوهوا ينوموا لحد ما بقى البيض ما عنده طعم . كله من طمع البنى آدم . و الغريبة يوم قالوا جات انفلونزا الطيور . ى أضانى دى سامعاهم قالوا بطلوا أكل الجداد و جنى الجداد و الخبيز البيسوهو بى جنى الجداد .. وده كلوا كوم . كان يوم لمت فيكن صبره تعدمكن الحبة . و الله يستركن من الدبايب و العقارب . بس فالحات لى فى الجراد ... وبكرة نواصل مع الجراد

[بدرالدين أحمد موسى]

موسم الجراد

ياختى و الله موسم الخريف فى البلد دى أحلى حاجة زول واحد من البشر ديل شغال بى المجارى و الخيران مافى . و الحشائش دى على قفا من يشيل . تذكرى السنة الفاتت يوم جينا أسراب من جهة ليبيا . يا خى دا كان مولد . السرب اللى جاء بى ورانا ما لقى حاجة . قالوا ليك كم من ألف دخلوهم العناية المركزة قالوا عندهم فقر دم .
****
و الله أنا سمعت تحت تحت قالوا ناس البلد دى مجهزين نفسهم للرش لمكافحتنا .. و الله قالول ليك ناس مكافحة الجراد استوردوا مبيدات الرش و جهزوا الطيارات ..
*****
يا بت اسالينا نحن المستوطنين. خبرة فى البلد دى .. كل سنو تلفزيونهم شغال .. مكافحة الجراد .. رش المحاصيل .. محاصرة هجرة الجراد .. أول أيام كنا خافين زيكم كدى لكن بمرور الزمن . عرفنا ليك القصة كلام فارغ ... أولا للأستهلاك المحلى و تلميع الصورة التقول عندهم انتخابات ... و ثانيا .. لأنو ناس المشتروات مابيدققوا فى المواصفات .. و ما تسألينى أكثر من كده عشان ما تجيبى لى الهوا . و ثالثا كان لقيتى ليك مسئول ثورى و جاب المبيدات تطلع منتهية الصلاحية .. و مال قالوا ليك نحن مركلسين فى البلد دى لى شنو ...
*****
يا اخواتى حبوبة دى بتتكلم صاح . و الله أنا فاتحة النت .. لقيت ليك جيراننا البيقطعوا ليهم البحر ديل فى الخليج مطرة ما عندهم لكن مخازنهم مليانة بالمبيدات .. أخير لينا هنا فى البلد دى بى شمسها القريبة من الرأس دى ... لكن خلوا بالكم من الصغيرات ديل .. الحيطة البى هناك دى فيها ضب ربيان .. الوليدات ديل خليهم يعملوا حسابهم ما يقربوا من اللمبة . و كان ناموا ينوموا بى عين واحدة و نواصل مع الضبان ..

[تغريدا]

أخوى بدر الدين أحمد موسى مساك الله بالخيروالله لكن خربشتك عاملة زى رحلة أبن بطوطة فيها كل الأجناس والخامات والنوعيات والجماعات وأجمل حاجة أنها خربشة لذيذة خفيفة مهضومة مابتعمل غثيان ولامغص تخلى الروح خفيفة مفرفشة وأصل وفى أنتظار باقى الخربشة