خواجات .. أنجاز .. لحدي الأندهاش

[Badri]

الصورة الرمزية التي أخترتها في خلفيتها طائرةعمودية - الجبر (chopper )- بتعطيش الجيم وفتح الباء - من نوع ( بوما ).. آى بوما عديل كدا .. وهي صناعة ألمانية ليست ماية بالمية ..
فالمكنة فرنسية مصنعه في حلة صغيرة حدودية مع أسبانيا .. زي الحوش كدا ..
( مع الأعتذار لي ناس الحوش الغرض التشبيه من حيث عدد السكان والحجم )

[Badri]

الجبر دي بتنقل العمال والمهندسين يوميا .. توديهم الصباح وترجعهم نهاية اليوم ..
السعر بالساعة زي ما تقول كدا ب 2000 دولار ..

الطاقم بيتكون من 8 أفراد بيعملو وردتين
كل وردية 4 أفراد كابتن ومساعدو وملاح ومكنيكي ..
والآخير دا دايما بيكون فرنسي والأول ألماني طبعا عارفين السبب شنو ..
الغريبة كل زول متعصب لثقافتو بتفاهمو كيف ما عارف ..
المهم ..

[Badri]

الطيار الأول ما كنت بريدو أصلو ..
كل ما أقول ليهو أهبط في الحتة الفلانية يقعد يقول لي أنا (ماسايق تاكسي )
من اليوم داك بقيت أكجنو ..
وهاك يا نقة بالألماني ما عارفو بقول في شنو ..
أصلو أخوكم مسطح في الألماني لكن من اليوم داك قلت مش الألماني دا ألا اتعلمو
علشان أعرف الزول دا بقول في شنو ..

[Badri]

الطيارالتاني ( روبرت ) النمساوي ( التيم ليدر) القائد بتاع المجموعة ..
يجيد 4 لغات ما شاءالله عليهو وهوصاحبي وبعزو وود أصول ..
لأنو ما عندو حركات الخواجات ديك ..
بقول ليهو أهبض بي في أي حتة ببهض بي من غير أي نقة وزعل ،
مش كدة وبس دا دايما عندو حلول وخطط بديلة ..

[Badri]

أستلمت أميل قبل 3 أو 4 سنوات ،
ما بذكر أصلو أخوكم ذاكرتو تعبانة ما عارف مالا -- :cool::cool::p:p
الأميل بقول ( في أثناء محاولة الجبر الأقلاع تعطلت وحصل حريق جزئي في الماكينة ،
علي أثرها توقف العمل ، عليه نرجو من سيادتكم التحقق من مدي تأثر سير العمل بعطل الجبر )

[Badri]

قلنا كويس ( لجنة تقصي حقائق يعني :o:D)
مافي مشكلة نمشي نشوف الحاصل شنو ..
أها يا جماعة الحتة دي وين ..
طلعت المنطقة بين ولاية واراب والوحدة في حتة كدة أسمها ( مانكن )
علشان ما تقولو لي مانكن دي وين جنب (رياك أو ميوم) ..
وعلشان ما تقولو لي (رياك وميوم ) دي وين .. شرق (تورلي ) وشمال (ماريال باي) وغرب ( بانتيو )
أها عرفتوها.. :confused::confused::p

[سواااح]

العزيز بدري ..

تخريمة خارج النص
الكلب الفي الصورة
الجنسية والتبعية لي وين؟؟

[Badri]

قبل ما أبدأ التحقيق كان لازم أطلع علي حاجتين

الكونتراكت (العقد) بين شركة الأمتياز والشركة المخدمة المستخدمة الجبر
والكونتراكت (العقد)بين شركة الأمتياز والشركة المالكة للجبر
لقيت في فقرة كدا بتقول
أنو في حالة توقف العمل لأسباب تخص شركة الأمتياز لازم تتدفع شركة الأمتياز للشركة المخدمة كل التكاليف في ذلك اليوم الي حين أستأناف العمل
وفي حالة توقف العمل بسبب الشركة المالكة للجبر لازم تدفع الشركة المالكة للجبر لشركة الأمتياز كل تكاليف اليوم المتوقف الي حين أستأناف العمل
والتي بدورها ستدفع للشركة المخدمة كل التكاليف الي حين أستأناف العمل
البالغة 25000 دولار يوميا كل دولار ينطح دولار
ودولار ينطح دولار .. دي من عندي أنا
عارف قلوتية بس .. دايرة بابا فزاري .. ما علينا

[ahmed algam]

ود البدري

حيرتنا اديل كده


اها كمل ياشاب متابعين معاك

[Badri]

مكررر مكررر

[Badri]

العزيز بدري ..

تخريمة خارج النص
الكلب الفي الصورة
الجنسية والتبعية لي وين؟؟


سواااح أخوي أزيك
الكلب دا حيرني
صاحبي جلبرتو الفرنسي الواقف جنبي في الصورة تعبان يربي فيهو سااااكت
في النهاية جاهو أنفصام في الشخصية
مرة يقول (هوووووووو)بالألماني ومرة يقول (هوووووووو) بالفرنسي ;);)

[Badri]

ود البدري

حيرتنا اديل كده


اها كمل ياشاب متابعين معاك

علقم سلامات

دا أنا الحيرتي مافكت للحظة

[Badri]

أها يا جماعة مشينا الحتة الجبيل قلناها ..
علشان نبدأ التحقيق ونشوف الحاصل شنو
ودخلنا في أجتماع مغلق مع الطياريين والمكنيكية
قلت ( لروبرت) صاحبي عاوزين الطيارين والمكنيكية البقية ما عاوزنهم
( لقيتا فرصة أتفسح في الخواجات شوية ););)
قلت لأخوانا الخواجات طبعا أنتو عارفين الكونتراكت (العقد)بقول شنو ،
أنا هنا جيت علشان أعرف الحاصل شنو وأحدد المسؤلية بتاعت منو
والحلول من أجل أستأناف العمل
بدأ روبرت يشرح لي في الحاصل وأسباب الحريق ،
وبعد عجن وعك ثم عك وعجن ونقاش طوييييييييييييييييييل قبلنا ( الجستفكيشن ) بتاعو

[Badri]

جينا للسؤال المهم بتين بتصلحو العطل
الميكانيكي جلبرتو الفرنسي المعاي في الصورة علي يميني
رأيو العطل دا كبير ما بتنفع معاهو أي صيانة لازم نغير المكنة بمكنة جديدة
طيب يا جلبرتو الكلام لقاية هنا حلو ولذيذ
بتين بتغيرو الماكنة
رد يا مستر بدري (و مستر دي عجبتني شديد خلاص );)
الماكنة تحتاج لي 48 ساعة وحنغيرها في حتتنا دي
أخوكم ضرب أخماس في أسداس كويس 48 ساعة ما كتيرة

[Badri]

بعدها عقب جلبرتو موافق علي كلامي المكنة هي الآن الآن موجودة في فرنسا و48 ساعة دي مناسبة

طبعا أخوكم هنا نطط عيونو قدر الريال .. وراسو كبر قدر البطيخة .. وشعر راسو قام صوفة صوفة
الحتة دي بالذات ما ركبت ليهو في راسو ، يعني شنو الآن في فرنسا
وحتصل هنا وتغيرو لينا المكنة الجديدة بالمكنة القديمة ، والجبر تطير في 48 ساعة
زي الحلاوة

ألتفت لي صاحبي روبرت وقلت ليهو
أنت يا روبرت جلبرتو دا بهظر معانا ولا شنو ، قولو لينا كلام نهضمو ولا أنتو يالخواجات بقيتو بياعين كلام برضو

[ابو الامجاد]

انت يا اخوي شغال في unamis ولا شنو

[مدنيّة]

بدري اها تم لينا الحصل شنو مع جلبرتو ياخ
والمكنة غيروها ولا ال48 ساعة لسة ماتمت

[النويري]

الجبر دي بتنقل العمال والمهندسين يوميا .. توديهم الصباح وترجعهم نهاية اليوم ..
السعر بالساعة زي ما تقول كدا ب 2000 دولار ..

الطاقم بيتكون من 8 أفراد بيعملو وردتين
كل وردية 4 أفراد كابتن ومساعدو وملاح ومكنيكي ..
والآخير دا دايما بيكون فرنسي والأول ألماني طبعا عارفين السبب شنو ..
الغريبة كل زول متعصب لثقافتو بتفاهمو كيف ما عارف ..
المهم ..

يا بدري يا تو عمال ويا تو مهندسين ديل متفهمنا حاجة الكلام دا في مناطق بترول ولا في تصنيع حربي ولا شنو بالظبط ولا ديل عمال السكة رماد ولا ديل جماعة السي أي إيه

تخريمة : أول مرة أشوف لي عمال بنقلوهم بي طيارة ديل عمال شركة ناسا ولا شنو وبيعملوا شنو

[Badri]

انت يا اخوي شغال في unamis ولا شنو






سلامات ابو الامجاد
رمضان كريييم

الجماعة ديل زرتهم في نيالا ، اسكت ساكت
بعاين ليهم عشرة عشرة ، بالرغم من أنو حالتهم تحنن

[Badri]

تخريمة : أول مرة أشوف لي عمال بنقلوهم بي طيارة ديل عمال شركة ناسا ولا شنو وبيعملوا شنو


النويري سلامات

ورمضان كريييم

ما بننقلهم بالطيارة وبس ،
ديل جايبين ليهم خواجة كدا .. (استرالي ) ..
علشان يعلمهم يركبو الطيارة كيف وينزلو كيف ،
ما حأقول لييك بياخد كم في اليوم علشان ما تقع داييخ ;);)

[Badri]

بدري اها تم لينا الحصل شنو مع جلبرتو ياخ
والمكنة غيروها ولا ال48 ساعة لسة ماتمت

مدنية أزيك


معليش أصلو كنت مزنووووق علي قدر حرف الواو ما يشيل
لكن ح نشوف الخواجات ديل بقو قدر كلامهم ولا هبوب ساااكت

[مدنيّة]

مدنية أزيك


معليش أصلو كنت مزنووووق علي قدر حرف الواو ما يشيل
لكن ح نشوف الخواجات ديل بقو قدر كلامهم ولا هبوب ساااكت

ح نشوف متين يابدري ياخ ؟!!
عليك الله شوفنا هسسسسسسسسسي دي

--------------
رمضان كريم تصوم وتفطر علي الف خير يارب

[Badri]

أخوكم بعد ما سمع الكلام كلو والخطة بتاعتهم البتقول علي لسان روبرت

المكنة من فرنسا الي مطار الخرطوم
من مطار الخرطوم الي مطار هجليج
من مطار هجليج الي مانكن حوالي 200 كلم من هجليج الي الجنوب
ودا كلو حنحاول نعملو في 36 ساعة الأولي
و10 ساعات الباقية نركب الماكنة الجديدة
و لغاية ما تصل المكنة الجديدة حنفك القديمة من الجبر حتي تكون جاهزة لتركيب الجديدة

هسي واحد بتاع حساب يجي ناطي ويقول لي في ساعتين ناقصات ودوهم ويين

الساعتين دييل للتيست ، يعني عاوزننا يركبو المكنة بي جاي نركب نحن بي جاي طوالي

[Badri]

وقبل ما أشمت في الخواجات أصلو مرت 40 ساعة ولا حس ولا خبر
حوالي منتصف الليل كدا أسمع ليك صوت جلبرتو الطخين يكورك
( مستر بدرخي بلكنة فرنسية )
وأنا طبعا مما أسمع كلمة مستر دي بتكيف قمت تترب نطيط من السرير
مالك في شنو
عم جلبرتو رد لي حبيت أبلغك أنو أستلمنا أميل بقول المكنة وصلت مطار الخرطوم
وح تشحن لي مطار هجليج بكرة الصباح

[Badri]

علي الرغم من وصول المكنة متأخرة تم تركيبها في زمن قياسي
حوالي يوم واحد من السادسة صباحا الي الثامنة مساء
في ساعات عمل متواصلة دون أنقطاع
واليوم داك الخواجات وشهم بقة زي الفشفاش






للحناكيش

الفشفاش : حاجة كدا في الخروف لونها أحمر بتنفس بيها بعملو بيها المرارة
المرارة : خليط من الفشفاش والكبدة والكرشة تؤكل نية مع البصل والشطة

[Badri]

بعد مرور عام من الأحداث السابقة

[مدنيّة]

يعني يامستر بدرخي
عملوا القالوه بحذافيره ؟!!

------------------
جد الخواجات ديل عندهم احترام للزمن ماعادي

[Badri]

شاءت الأقدار أنو ( الجبر ) تنقلب في حتتها الواقفة فيها نتيجة هواء شديد
وتدش دش حتة حتة

[Badri]

يعني يامستر بدرخي
عملوا القالوه بحذافيره ؟!!

------------------
جد الخواجات ديل عندهم احترام للزمن ماعادي



شايفك فطنتي للنقطة المهمة في الموضوع كلو

الزمن

والأمم تتقدم بالزمن لاشئ غيره

[مدنيّة]

شاءت الأقدار أنو ( الجبر ) تنقلب في حتتها الواقفة فيها نتيجة هواء شديد
وتدش دش حتة حتة

هسي يامستر مابالغت
متابعين الجبر وحساب المثلثات دا معك بالساعة
تجي تقلبها لينا ببساطة كدا !!! :(

[ابو الامجاد]

سلامات ابو الامجاد
رمضان كريييم

الجماعة ديل زرتهم في نيالا ، اسكت ساكت
بعاين ليهم عشرة عشرة ، بالرغم من أنو حالتهم تحنن

العزيز بدري
يا اخوي الفي نيالا ديل unamiD و unamis ديل في الجنوب

[Badri]

هسي يامستر مابالغت
متابعين الجبر وحساب المثلثات دا معك بالساعة
تجي تقلبها لينا ببساطة كدا !!! :(




يا مدام ;) ;) مدنية
دا كلو كوم ونقل الجبر بعد ما أدشدشت حتة حتة
وفكها صامولة صامولة كوم تاني
دا دايرو لي مع الجبر وحساب المثلثات تفاضل وتكامل وكيمياء كمان
والكيمياء دي كرهتي في الدنيا :p

والصور في الطريق اليكم

[Badri]

العزيز بدري
يا اخوي الفي نيالا ديل unamiD و unamis ديل في الجنوب



غايتو تجيفو للزول في حلقو

الفي الجنوب دي ما UNAMIS دي UNMIS
United Nations Missions in Sudan (UNMIS
لكن الفي دارفور دي UNAMID
United Nations Africa Missions in Darfur (UNAMID

لكن لقيتك حكاك جنس حك

[مدنيّة]

يا مدام ;) ;) مدنية
دا كلو كوم ونقل الجبر بعد ما أدشدشت حتة حتة
وفكها صامولة صامولة كوم تاني
دا دايرو لي مع الجبر وحساب المثلثات تفاضل وتكامل وكيمياء كمان
والكيمياء دي كرهتي في الدنيا :p

والصور في الطريق اليكم


الصراحة يامستر
انا الخواجات ديل بتكيف منهم اددددددددددديل كدا في حاجات كتيرة جدا
مفروض تكون فينا
لكن للاسف ماعندنا احنا وعندهم هم عشان كدا مافي تريقة نلحقهم او حتي نقرب ليهم


---------------------
منتظرين الصور وباقي التفاضل والتكامل

[بنت الرفاعي]

في البداية اعتقدت الكلام ده خارج السودان!!!


متابعين معاك أخي بدري.:)

[ابو الامجاد]

غايتو تجيفو للزول في حلقو

الفي الجنوب دي ما UNAMIS دي UNMIS
United Nations Missions in Sudan (UNMIS
لكن الفي دارفور دي UNAMID
United Nations Africa Missions in Darfur (UNAMID

لكن لقيتك حكاك جنس حك

الاخ بدري
عزراً اذا رأيت اننا اثقلنا عليك
وما اظن اننا نحتاج لتوضيح في الفرق ما بين UNMIS و UNAMID
وهي United Nations African Missions in Darfu(Not) united nations africa missions in darfur
The African Union/UN Hybrid operation in Darfur, referred to by its acronym UNAMID, was established on 31 July 2007 with the adoption of Security Council resolution

[Badri]

الاخ بدري
عزراً اذا رأيت اننا اثقلنا عليك




علي العكس تماما فأنا مستمتع بالنقاش معك
لأنه في نظري هذه أهم أهداف المنتديات ( تبادل المعلومات )
Repair ، Shoot ، Pass Information



تحياتي

[ابو الامجاد]

علي العكس تماما فأنا مستمتع بالنقاش معك
لأنه في نظري هذه أهم أهداف المنتديات ( تبادل المعلومات )
Repair ، Shoot ، Pass Information



تحياتي

مافي مشكلة يا الحبيب
وصدقني مستفيدين منك