الود عبودى .. كلام عيال ..

[أشرف صلاح السعيد]

الود عبودى عمرو ستة سنوات و زيادة من النص .. مرات تحسو شافع زيو زى شفع الناس و مرات يحيرك تقول عليهو حكيم من حكماء الزمان .. مرة يمنطقك لمان يغيظك ومرة يغيظك لأنو ما عندو منطق ..

[أشرف صلاح السعيد]

بينما كان الأب يقرأ بأحد الكتب سمع صراخ صغيره محمد ثم ..

عبودى : أنا ما قلت ليك تسيب قلة الأدب دى .. شفتا أنا كل ما تعمل حاجة غلط حأضربك .. مفهوم الكلام دا ولا ما مفهوم ؟؟..

أم عبودى : يا ولد أنا ما قلت ليك ما تضرب أخوك مية مرة " حاسباهم ولا كيف؟؟"..

عبودى : أنا مش أخوهو الكبير ؟؟.. و الكبير بيضرب الصغير لما يعمل غلط ؟؟..

أم عبودى : ما تضربو لما يعمل غلط .. تجى تورينى ولا تكلم أبوك .. مش تضربو إنتا ..

عبودى : أنا بابا قال ليا لو فى زول ضربك تضربو وما تخليو .. و عبودى أبيت أديهو لعبتى قام عضانى و خربشنى فى وشى .. شوفى العضه أهندى و الخربشة هنا ..

يستمع الأب للحوار الدائر بين عبودى و أمه و الهوا الجابو عبودى ليهو عند إشارته فى محضر التحقيقات لاسم الأب المحرض برد الضربة بضربة و تحقيق مبدأ السن بالسن و العين بالعين و نسبة لعدم توفر السنون بكثرة لدى الطفلين الله يستر القصة ما تبقى عين بعين و فى الحالتين هو الضايع ..

أم عبودى : يا أبو عبودى .. يا أبوعبودى .. تعال شوف ولدك الوصيتو يضرب الناس دا عمل فى أخو شنو ..

أبوعبودى : فى شنو ؟؟.. حمودى ضرب عبودى و عبودى ضرب حمودى وين المشكلة ؟؟.. و بعدين عبودى ما قال ليك إنو أخوهو هو البدا يعنى يسيبو يحقر بيو ؟؟..

عبودى : عاين يا بابا حمودى عضانى فى يدى وبعدا خربشنى فى وشى هنا .. و بعدين إنتا مش قلتا ليا الصغيرونى لازم يحترم الكبير ؟؟.. حمودى دا أصلو ما بيحترمنى مش لازم أأدبو ؟؟..

ألحقو أبوعبودى كيف يتخارج من مأزقه ..
أدونا الحلول ..

[مايسة]

ألحقو أبوعبودى كيف يتخارج من مأزقه ..
أدونا الحلول ..



صباحك خير - استاذ أشرف

طبعا حكاية الآباء - لمن ينظرو لأطفالهم ويحاولو يتفشو - مشكلة صرااحة

غايتو أبو عبودي دا حقو يصلحة شوية لعبودي لانو بعد شوية عبودي حا يطيح فيهو هو زاااتو - وحا يقول ليهو انت مش قلته لي اي حد يضربك اضربو -

يعدلها يقول ليهو - يا عبودي اخوك الصغير دا خلي بالك منو - وراعيهو - ولو غلط فيك براااحة فهمو انو دا عيب - لكن اذا في حد تاني ضربو طوااالي اضربو - ووريهو العين الحمرا كمان :)

[أشرف صلاح السعيد]

صباحك خير - استاذ أشرف

طبعا حكاية الآباء - لمن ينظرو لأطفالهم ويحاولو يتفشو - مشكلة صرااحة

غايتو أبو عبودي دا حقو يصلحة شوية لعبودي لانو بعد شوية عبودي حا يطيح فيهو هو زاااتو - وحا يقول ليهو انت مش قلته لي اي حد يضربك اضربو -

يعدلها يقول ليهو - يا عبودي اخوك الصغير دا خلي بالك منو - وراعيهو - ولو غلط فيك براااحة فهمو انو دا عيب - لكن اذا في حد تاني ضربو طوااالي اضربو - ووريهو العين الحمرا كمان :)
سلام و صباحاتك خير أستاذة مايسة " العين بالعين و السن بالسن و البادئ أجمل "..
كلامك جميل .. بس عبودى دا يا دوب عمرو ستة وكسور .. و بيكون عايز يتكوبر و كدا و بعدين حكاية فصل العلاقة بينو و بين اخوه و بينو وبين الغريب بتكون شوية صعبة .. بس فعلا مسألة إعطائه فكرة إنو هو المسؤل عن حماية اخو بترضى مسألة إنو الأكبر .. ودا جانب مهم لابد من الأباء زرعه بالصغير الأكبر ..
والله يستر أبوعبودى ما يتكسر من الشافع بالمستقبل ..
مروراتك جد مهمة و مثرية ..

[ابوالنور]

عاين

تتبطح في السرير علي بطنك وتقول منو فيكم البعصر ل بابا ظهرو بسرععععععععععععة
منور يا ابو عبودي وحاة الله

[بنت الرفاعي]

أحلى شيء كلام العيال، وبالذات لما يقولوا كلام غير متوقع في سنهم!!!.
وإن شاءالله نرجع للبوست ده تاني:)

[عاطف عولي]

مالم يا ركشة بشبهوا لي شفع المغتربين؟

جاي عليك برواقة بس قلت اخت طوبتي لزوم الحجز وراجي عبودي يسخن شوية

[معتز الريح]

شلاقة الشفع أجمل شلاقة ..
ولهم أفعال تحير ..
------------------------------
بتذكر ود اختي كان صغير جداً ولكنه فصيح ..
في أحد أيام المظاهرات أمام بيتهم في مدني
والجماعة حارقين اللساتك والدخان في السنة ..
وبوكس الأمن جاء وقف والناس جرت ..
وصادف مرور أخونا (قري مان)
وكان بشاكل ود أختي ده مشاكسة شديدة ..
فلما شافو صرخ باعلى صوتو لي بتاع الأمن ..
يا جنابو ده الحرق اللستك وأشار لقري مان ..
وطفل صغير ما بشكو أنو بكذب ..
فاتخيل موقف قري مان ..
---------------------------------------
كلو هين .. بس كعب الشافع البشلت ..

[أشرف صلاح السعيد]

عاين

تتبطح في السرير علي بطنك وتقول منو فيكم البعصر ل بابا ظهرو بسرععععععععععععة
منور يا ابو عبودي وحاة الله
سلام شديد يا ابوالنور ..
يا حليل زمن الشفع البعصرو ملح .. هسع تهبش الشافع يجيب ليك قوات خفظ حقوق الشفع الدولية أو تدخل معاهو فى ترضيات ..
وين ناسك الرقاصين ديلك ؟؟.. شايفك جاى بجيتارك ناوى علينا ولا شنو ؟؟..
المنتديات منورة بأهلا يا حبيب ..

[أشرف صلاح السعيد]

أحلى شيء كلام العيال، وبالذات لما يقولوا كلام غير متوقع في سنهم!!!.
وإن شاءالله نرجع للبوست ده تاني:)


أهلين مرام ..
و الله كلام الشفع ما بناباهو إن كان ما تعسفى .. بس مرات كدا بيفكو درابات بتجيب هوا و بيعمل غبار و بدخلك مع الآخرين فى خانة ضيقة و أقلاها يقولو " دا ما كلام شفع ما بكون سمعو من الكبار ووصوهو بيو"..
فى انتظار جيتك و يكفيك شر زرزرة الشفع و مطباتم ..

[أشرف صلاح السعيد]

مالم يا ركشة بشبهوا لي شفع المغتربين؟

جاي عليك برواقة بس قلت اخت طوبتي لزوم الحجز وراجي عبودي يسخن شوية
شفع المغتربين ما لديحين و قليصين زى شفع الداخل ديل يا زول راس مالم بلى استيشن و كم سى دى .. بس ما تسوقم معاك السوبر ماركت بيخربو الجيب ..
الطوبة ياتا القبل الكيس المتكول فيهو الحجر ولا القدام العصايا يا ود عولى؟؟..

[أشرف صلاح السعيد]

شلاقة الشفع أجمل شلاقة ..
ولهم أفعال تحير ..
------------------------------
بتذكر ود اختي كان صغير جداً ولكنه فصيح ..
في أحد أيام المظاهرات أمام بيتهم في مدني
والجماعة حارقين اللساتك والدخان في السنة ..
وبوكس الأمن جاء وقف والناس جرت ..
وصادف مرور أخونا (قري مان)
وكان بشاكل ود أختي ده مشاكسة شديدة ..
فلما شافو صرخ باعلى صوتو لي بتاع الأمن ..
يا جنابو ده الحرق اللستك وأشار لقري مان ..
وطفل صغير ما بشكو أنو بكذب ..
فاتخيل موقف قري مان ..
---------------------------------------
كلو هين .. بس كعب الشافع البشلت ..
تعرف يا معتز قصتك دى زكرتنى بت اخوى كان نازل معاهم عم لينا و معذبا ليك مراسيل و كان بجدد فى اقامتو بعد ما طوفت .. مرة عذبا شديد قالت ليو : أحسن ليك بجيب ليك ناس الجوازات وكان عمرها اقل من ستة سنين .. جد شفع الزمن ديل محن .. هسع عمنا دا ما بيقول سمعتو من الكبار ؟؟..
زارنا الخير يا عز ..

[محمد الجزولى]

تعرف يا باش مهندس الآن صارت هنالك مدارس ومعاهد تدرس كيفية تربية الأبناء لان التربية ليست بالأمر الهين ( فأطفال اليوم شباب الغد صناع المستقبل)
يجب على الأب عدم اللجوء لصيغة الأمر والنصح المباشر وإنما إتباع اسلوب الإيحاء والتحبيب للطفل

ابو عبودى ده حقو يقعد كده براحه ويفهم عبودى ده إن أخيه الأصغر يحبه جدا وما خربشته له إلا تعبير عن حبه له بس تعبير( شفع صغار) وان عليه أن يحب أخيه الصغير وذلك بقبول خربشته وعضاته
تحياتى لك اخى اشرف

[أشرف صلاح السعيد]

تعرف يا باش مهندس الآن صارت هنالك مدارس ومعاهد تدرس كيفية تربية الأبناء لان التربية ليست بالأمر الهين ( فأطفال اليوم شباب الغد صناع المستقبل)
يجب على الأب عدم اللجوء لصيغة الأمر والنصح المباشر وإنما إتباع اسلوب الإيحاء والتحبيب للطفل

ابو عبودى ده حقو يقعد كده براحه ويفهم عبودى ده إن أخيه الأصغر يحبه جدا وما خربشته له إلا تعبير عن حبه له بس تعبير( شفع صغار) وان عليه أن يحب أخيه الصغير وذلك بقبول خربشته وعضاته
تحياتى لك اخى اشرف

الحبيب موجه التعاسات لمن يستحقها ود الجزولى سلام ..
تعرف يا جزولى بحتار فى ناس زمان شديد خلاص .. لا كان عندهم مدارس تخصصية و معظمهم لم يكمل حتى تعليمو وتلاقيهم أساتذة فى تربية الأطفال و التعامل معاهم .. المحنة كانت سر نجاحاتهم و كذلك طولة البال ما زى ناس الزمن الحاضر ..
نعم علينا أن نسأل أهل الذكر فيما استصعب علينا فهمه .. ولعلى وأم العيال قد إستفدنا كثيرا من إختصاصية بشئون الطفولة فى غرس محبة بكرنا لأخيه .. فقد كانت زوجتى دوما تضع يد الصغير ببطنها و تعرفه بأن أخيه فيها ذلك الأخ الذى سيأتى إن شاء الله و سيشاركه فى اللعب و بأنه سيكون اخيه الاكبر المسؤل عن حمايته وعن الاهتمام به .. وقد نجحت الفكرة .. بس الود مجننا بمسألة اخوه الكبير وبيمارس ذلك الحق ولكن بتوجيهات امه ..
بس كمان الشافع الصغير جنو مداوسات و المداوسة عندو لعب .. شوفتا الحالة دى ..

[أحمد عمر ( MOODY )]

الحبيب باشمهندس / أشرف


الله يكون في العون .... و يحفظ أولادنا و أولاد المسلمين من الزمن العايشين فيهو ده
ومن الجاي و ما عارفين ذاتو حدّو وين ... !!!

أنا عندي بنتين .. الكبيرة عُلا ( 3 سنوات ) ما دخلت المدرسة ... و مُدّخِلانا معاها مدرسة
و الصغيرووووونة عليا ( سنة وااااااحدة ) .... و دي رجّعتنا الخلوة

[ود المطامير]

تعرف يا معتز قصتك دى زكرتنى بت اخوى كان نازل معاهم عم لينا و معذبا ليك مراسيل و كان بجدد فى اقامتو بعد ما طوفت .. مرة عذبا شديد قالت ليو : أحسن ليك بجيب ليك ناس الجوازات وكان عمرها اقل من ستة سنين .. جد شفع الزمن ديل محن .. هسع عمنا دا ما بيقول سمعتو من الكبار ؟؟..
زارنا الخير يا عز ..

هع هع هع
والله يا الحبيب ما قادر أقيف من الضحك

موضوع رائع يا رائع

[أشرف صلاح السعيد]

الحبيب باشمهندس / أشرف


الله يكون في العون .... و يحفظ أولادنا و أولاد المسلمين من الزمن العايشين فيهو ده
ومن الجاي و ما عارفين ذاتو حدّو وين ... !!!

أنا عندي بنتين .. الكبيرة عُلا ( 3 سنوات ) ما دخلت المدرسة ... و مُدّخِلانا معاها مدرسة
و الصغيرووووونة عليا ( سنة وااااااحدة ) .... و دي رجّعتنا الخلوة

سلام كبير يا مودى ..
الله يحفظ بناتك و يجعلهن من الصالحات و عاليات بعوالى الجنان .. وجميع بنات و أبناء المسلمين ..
يا اخى البنات ديل مكسرنى كسير شديد خلاص و حاسس لو الله رزقنى ببنوتات عليك أمان الله الضكرين المعاى المخلين أمهم متحسسة و زى الساكنة ببيت عزابة إلا يدفعو معاى الايجار عشان سكنتم هههههههه..
تصدق أمى اسما علِّيا " الله يستر تانى ينادونى بود عليا".. يااخى ما بقينا أهل ..

[أشرف صلاح السعيد]

هع هع هع
والله يا الحبيب ما قادر أقيف من الضحك

موضوع رائع يا رائع

سلام و حبابك ود المطامير ..
يا زول لا تقيف ما خدين منها شنو ..
الروعة إنتا مكملا علا ما تخلعنا بهع هع هع دى يااخ ..

[أشرف صلاح السعيد]

مشهد 2 ..

الود عبودى البحب التكبر أمو ضغطتو فى القراية ضغطت البريستو لما فى حشاها " العجب أكان كانت ضلعة ..يا دين النبى" .. بالله الولية شادا الشافع شدا التقول بيدخل هارفرد من بعد قريد ون " سنة أولى بس نظام فلفسة و بوبار و كدا " .. يا اخى أمو دى من شدة ما ما كارباهو الود لما يجى يصحو من النوم تلاقيو بحل ليهو فى مسألة ماث " برضو فلفسة وكدا" صعبة صعوبية لمان يبرجس بيها .. أها أبو عبودى جا مارى و لقى ليك عبودى دا بيفاصل فى والدتو و كدا ..

الأم : يا ولد خلاص قربتا تخلص .. حأمليك بس خمسين كلمة " أنا دبرستا خليهو المسكين" ..

عبودى : يا ماما يدى إتكسرت .. أنا كتبتا هندرد " الشافع برضو متفلفس " كلمة .. يا خى تعبتا " والله ياخى دى كان كنتا قلتها للحاجة أمان ما كنتا إتهريت تقرص " ..

الأب : يا مرة الود دا ما عملتى ليهو كساح وشلل أطفال ياخ .. أرحمى شوية .. أديهو بريك " شرحو " خليهو اليرتاح شوية .. هو شنو هو دا بالشهادة يا اخ ما قرينا قدر دا ..

الأم : سمعو لسه سمعو كويس .. وقت بتخاف على ولدك كدا تعال قريو إنتا .. ولا بس حنية وز حنية بلا بز ..

عبودى : بابا عليك الله قرينى إنتا .. ماما دى جنها تدقنى فى القراية " جنها مرة واحدة أمان زمنكم ما زمن رخصة "..

الأب : يعنى الواحد شغل برا البيت و شغل جوا البيت يا ود خلى أمك تدرسك أنا ما فاضى ليك ..

الأم : بس فاضى للتحشر " ماليهو حق الود فى اللماضة؟؟ " .. أصلك لا تجدع و لا تلقط الحجار " هى دى مذاكرة ولا تفلع !!"..

عبودى : كملو شكلتكم إنتو و أنا بآخد بريك بس براحة عشان حمودى نايم ..

[بنت الرفاعي]

عبودى : كملو شكلتكم إنتو و أنا بآخد بريك بس براحة عشان حمودى نايم ..


قبل ما أنتبه أنها عبودي إفتكرتها أبو عبودي ولما رجعت ليها ولقيتها عبودي ما قدرت أضحك من الضحك:d
ماشاءالله الله يحفظو لأهلو.;)

[أشرف صلاح السعيد]

قبل ما أنتبه أنها عبودي إفتكرتها أبو عبودي ولما رجعت ليها ولقيتها عبودي ما قدرت أضحك من الضحك:d
ماشاءالله الله يحفظو لأهلو.;)
سلام يا مرام " سجع جد "..
و يحفظك وكل البهموك ..
إنتى فى عبودى و لا فى هجمتى .. رديت عليك ببوست الأمهات و لكن وبس خلصت لقيتك رادا بجاى و بنفس التوقيت 10:25 يا اخى معقول !!..
شوفتى عبودى دا تفتيحة كيف ؟؟..

[بنت الرفاعي]

سلام يا مرام " سجع جد "..
و يحفظك وكل البهموك ..
إنتى فى عبودى و لا فى هجمتى .. رديت عليك ببوست الأمهات و لكن وبس خلصت لقيتك رادا بجاى و بنفس التوقيت 10:25 يا اخى معقول !!..
شوفتى عبودى دا تفتيحة كيف ؟؟..


وعليكم السلام ورحمة الله وبركاته.:)
:D :D :D

آمييين يارب وجمعاً.

سبحان الله!! أنا ما انتبهت للزمن لكن عجبتني طريقة رصّة الأسامي في البوستين لما طلعت من هنا ;)، يبدو لي بفارق ثواني بس!!!:):rolleyes::)

عبودي ماشاءالله،
كنت بحاول أتذكر في أطفالنا الفصيحين وقصصهم، أها إتذكرت عندنا خالتنا عندها بنتها ماشاءالله وتبارك الإله، حالياً بتكون أكبر من عبودي بسنتين، لكن لما كانت قدر عبودي وأصغر ماشاءالله عليها فصاحة (ومازالت) حالياً بتذكر ليها موقف واحد:
مرّة أمها شاكلتها بكل بساطة ردت عليها:
إنتِ ما أدبتيني!!! :confused:

[أشرف صلاح السعيد]

وعليكم السلام ورحمة الله وبركاته.:)
:D :D :D

آمييين يارب وجمعاً.

سبحان الله!! أنا ما انتبهت للزمن لكن عجبتني طريقة رصّة الأسامي في البوستين لما طلعت من هنا ;)، يبدو لي بفارق ثواني بس!!!:):rolleyes::)

عبودي ماشاءالله،
كنت بحاول أتذكر في أطفالنا الفصيحين وقصصهم، أها إتذكرت عندنا خالتنا عندها بنتها ماشاءالله وتبارك الإله، حالياً بتكون أكبر من عبودي بسنتين، لكن لما كانت قدر عبودي وأصغر ماشاءالله عليها فصاحة (ومازالت) حالياً بتذكر ليها موقف واحد:
مرّة أمها شاكلتها بكل بساطة ردت عليها:
إنتِ ما أدبتيني!!! :confused:
سلام مرام ..
و الله بت خالتك المنطق عندها لكن .. الشفع ديل واحد من اتنين يا مدهشين يا فقاعين مرارات ..
الله يستر و يحفظ اطفال المسلمين و يطرح فيهم البركات و الخير ..

[أشرف صلاح السعيد]

3 ..

عبودى طلق مرحلة يختار ريالين أو تلاتا ريال بدل الخمسة الصم بالتلاتا .. الود ما بقى فى أولى و بقى يمشى دكان المدرسة و يشترى براهو و كدا .. غايتو امو دى بنت بالقروش الإستملحتا من الود عبودى بمرحلة جهله بالعملة الحرة بيوت عدييل كدا.. نفسى أعرف سر تسمية الريال و الدولار بالعملة الحرة شنو .. جنيهنا دا متين يطلع من عبوديتو دى يا ربى ؟؟.. النرجع لموضوعنا .. أم عبودى كانت بتبيع ليهو الريالين الفكة بفئات الخمسة و العشرة الصم " ربا عديييل كدا ".. لكن و ما ربك بظلام للعبيد و ها هو البطل عبودى يدخل عالم البنكوت و أمو يتقطع ليها فى راسا حتةً حتة ..

عبودى : ماما أنا عايز المية ريال الأدانى ليها بابا لما جبت فُل مارك فى السينس ..
أم عبودى : يا ولد المية دى بتلد ؟؟.. أنا ما اشتريت ليك بيها سى ديهات للبلاى استيشن و شرايط للقيم بوى ؟؟..
عبودى : إشتريتى ليا بالمية كلها ؟؟.. أنا قلت ليك تشترى ليا بيها كلها ؟؟.. إنتى إشتريتى ليا و لحمودى مش حمودى بيلعب بيهم معاى .. يعنى فيفتى فيفتى .. و لأنو حمودى ما عندو قروش يعنى إنتى إشتريتى ليهو و دفعتى ليهو إنتى بالله ما حنك و منطق ؟؟..
أم عبودى : أها و خير يا طير " عاملة رايحة " ..
عبودى : هو حمودى دا ولدك بس ؟؟.. أنا ما كمان ولدك ..وزى ما دفعتى ليهو تدفعى ليا " وضع العدو بخانة اليك"..
أم عبودى : بس إنتا قلت ليا أشترى ليك الأسطوانات من قروشك " عودة لمربع النقاش الاول "..
عبودى : طيب ليه بتقولى ليا لعب حمودى معاك و أنا الدافع حق الأشرطة ..
أم عبودى : حمودى دا مش أخوك و إنتا أخو الكبير ؟؟..
عبودى : وحمودى دا ما ولدك و إنتى أكبر مننا الإتنين " اها شنو ليها تانى؟"؟؟..
أم عبودى : حلاص حمودى دا تانى ما تلعبو معاك " صحى القروش بتخلى الناس تبيع بعض وحتى اولادا" ..
عبودى : يا سلام .. و اللعب الكتيير اللعبو داك شنو ؟؟.. ماما بالله أدينى المية ريال بتاعتى ..
أم عبودى : يا ولد طير ميتك شلتها و كملت زماان ..
عبودى : بابا بابا ..
أبو عبودى : فى شنو يا ولد ؟؟..
عبودى : ماما شالت المية الأديتنى ليها و أبت تدينى ليها " فتنة "..
أبو عبودى : يا مرة ما عيب عليك تاكلى قروش الأطفال ؟؟..
أم عبودى : إنتا هسى عرفت القصة شنو داخل شمال طواالى كدا ..
أبو عبودى : طالما القصة فيها قروش فقطع شك ضربتيها يا و لية .. و إنتا يا شافع أنا ما قلت ليك خلى المية ريال معاى أحفظا ليك من بير أم جُب دى ..
عبودى : ما أنا مسكتك المية الأدتنى ليها ماما عشان ما فيكم واحد ياكل مية التانى ..
أم عبودى : خلاص شيل هسى المية بتاعتك العند بابا و أنا بديك ميتك المرة الجاية ..
وطبعا عبودى شال منى المية مية مرة و عوّض ريالتو السابقة و اللاحقة من أمو كمان القايلاهو بنسى زى زماان ..
مفكر الود حمودى ما أدخلو المدرسة عشان ما يعرف درب القرش ..لأنو حمودى و عبودى و أمهم بتبقى قاااسية بالحيل ..

[مايسة]

هههههه

عبودي ربنا يحفظو تفتيحة

رسائلك الداخل القصة استاذ اشرف - حقيقية جدا -

واصل ومتابعين :)

[أشرف صلاح السعيد]

هههههه

عبودي ربنا يحفظو تفتيحة

رسائلك الداخل القصة استاذ اشرف - حقيقية جدا -

واصل ومتابعين :)
وقتين الرسائل البينية وااضحة وضحى لينا إنت فى ياتو جهة .. زى الماما ولا عبودى ؟؟.. أكيد ما حمودى .. ههههههه

[مايسة]

وقتين الرسائل البينية وااضحة وضحى لينا إنت فى ياتو جهة .. زى الماما ولا عبودى ؟؟.. أكيد ما حمودى .. ههههههه


ماما - ماما :)

[بنت الرفاعي]

ولد الجيران بعد ما دخلوه الروضة، بيمشي بالباص، أها الظاهر شاف أصحابو أهلهم يوصلوهم ويسوقوهم بالسيارات، قال لأمو لييه ما تودوني بالسيارة؟؟
سبحان الله على نيتو بقوا يودوهو ويجيبوهو بالسيارة، يوم صحى من الصباح قال لأمو أنا ما ماشي بالسيارة، قالت ليهو ماشي بالباص؟؟؟
قال ليها لا ماشي بالطيّارة!!!!:confused::D:D

[مدنيّة]

ولد اخوي "عمره 6 سنوات" يااشرف قال لامه
لية الواحد ما يجي يقعد مع امه وابوه ويبيع بيته ؟!!
امه قالت ليه : يعني انت عايز تجيب مرتك واولادك يقعدوا معانا وتبيع بيتك ؟
قال ليها ولشنوووووووووو الواحد يجيب ليه "ناس" يصرف عليه قروش اكل وشراب ومدارس ودكاترة ؟!!



----------------
الحوار تبعا من المستقبل وكدا

[محمد علي شقدي]

والله يا اشرف تربيه الشفع في الغربه صعبه بالحيل

[عزيز عيسى]

أشرف يا لذيذ..
والله موضوعك جميل وأخوك بحب قصص الأطفال ومقالبهم خاصة لما
يصلوا مرحلة من العمر ما بين 5 الى 6 سنوات.
إبني سامي عمره كان حوالي 5 سنوات عندما كنا في السعودية مدينة جدة..
عندنا واحد صاحبنا عندو إبنه إسمه محمد..
الجماعة ديل كلما يجوا يزورونا ومع فتحة الباب وإنشغالهم معنا
في السلام فجأة نسمع ولدهم يبكي..
أبوه يقول ليهو يا ولد مالك بتبكي؟.. يقول سامي ضربني.
الراجل إتغاظ شديد كل مرة سامي حاقر بولدو محمد وضاربه..
في يوم من الأيام صاحبي جاءنا من غير عادته وكان دائما بيتصل بالتلفون
قبل ما يجوا علينا.. أها فتحت الباب وسلمت عليهم وقلت ليهم إتفضلوا..
الراجل كان ماسك ولدو من إيدو وبعاين يشوف سامي وين؟
جلس وبرضو كان ماسك ولدو بالقرب منه وبيتكلم معاهو كلام
بصوت خافت.. ثم قال ليهو أمشي ألعب مع سامي.
بعد شوية أسمع ليك الراجل يقول لولدو.. محمد كع.. يا محمد كع..
وولدو واقف قدام سامي يعاين لأبوه وسامي بسمع الكلام..
غايتو بدون ما يشعر ولدو سامي يروح رافع يدو ويدي ليك الولد
أم دلدوم في وشو ومعاها قولة كع.
الولد قعد يبكي وأبوه يشيل وينبذ في ولدو ويقول ليهو:
يا خواف يا جبان بعد شوية قعد يضحك وأنحنا بنعاين ما فاهمين حاجة.. :confused:
قلت ليهو فهمنا الحكاية شنو؟
قال لي: والله جاينكم مخصوص بدون ما نتصل عليكم..
لكن ولدي دا بدرب فيهو اليوم كلو وبقول ليهو:
يا محمد لما ندخل بيت ناس سامي أقول ليك كع..
إنت على طول تلصق لي سامي بنيه في وشو
علشان نخلص حقنا ونخوفو.
لكن الحكاية إنقلبت.

[أشرف صلاح السعيد]

ماما - ماما :)
برضو أخير من بابا البكملو قروشو بعد ما غسل العدة ..
غايتو الله لا يسلط فيك جنس عبودى يا مايسة ..

[أشرف صلاح السعيد]

ولد الجيران بعد ما دخلوه الروضة، بيمشي بالباص، أها الظاهر شاف أصحابو أهلهم يوصلوهم ويسوقوهم بالسيارات، قال لأمو لييه ما تودوني بالسيارة؟؟
سبحان الله على نيتو بقوا يودوهو ويجيبوهو بالسيارة، يوم صحى من الصباح قال لأمو أنا ما ماشي بالسيارة، قالت ليهو ماشي بالباص؟؟؟
قال ليها لا ماشي بالطيّارة!!!!:confused::D:D
ود جيرانكم دا من أبوحمد ولا شنو .. بس أوعك يكون جد جد قاصد الطيارة و خسمتك ما تقولى لى لا قاصد القطر ..

[أشرف صلاح السعيد]

ولد اخوي "عمره 6 سنوات" يااشرف قال لامه
لية الواحد ما يجي يقعد مع امه وابوه ويبيع بيته ؟!!
امه قالت ليه : يعني انت عايز تجيب مرتك واولادك يقعدوا معانا وتبيع بيتك ؟
قال ليها ولشنوووووووووو الواحد يجيب ليه "ناس" يصرف عليه قروش اكل وشراب ومدارس ودكاترة ؟!!



----------------
الحوار تبعا من المستقبل وكدا
يااخى الولد دا تفتيحة جد و لدرجة قف تأمل زااتا .. و لو إستمرا بإسلوبو دا مؤكد حياخد جائزة نوبل فى الجلدنة و الأوسكار عن فلم " البخل و أنا " ..
يااخى دا شافع فوق العادة .. أهلو ما بيسلفونى ليو يدينى دروس و يدربنى ؟؟.. و أكيد بحقو عشان زااتو ما يستأذن من أهلو و ألاقيو مستنينى فى البيت لما أرجع ..

[أشرف صلاح السعيد]

والله يا اشرف تربيه الشفع في الغربه صعبه بالحيل
يعنى يا شقدى يا اخوى ساهلة جوا ؟؟.. عليك أمان الله أكان هنا وووب أكان هناك وووب .. سيبا سااكت بس .. ديل هم البربو فينا ..

[أشرف صلاح السعيد]

أشرف يا لذيذ..
والله موضوعك جميل وأخوك بحب قصص الأطفال ومقالبهم خاصة لما
يصلوا مرحلة من العمر ما بين 5 الى 6 سنوات.
إبني سامي عمره كان حوالي 5 سنوات عندما كنا في السعودية مدينة جدة..
عندنا واحد صاحبنا عندو إبنه إسمه محمد..
الجماعة ديل كلما يجوا يزورونا ومع فتحة الباب وإنشغالهم معنا
في السلام فجأة نسمع ولدهم يبكي..
أبوه يقول ليهو يا ولد مالك بتبكي؟.. يقول سامي ضربني.
الراجل إتغاظ شديد كل مرة سامي حاقر بولدو محمد وضاربه..
في يوم من الأيام صاحبي جاءنا من غير عادته وكان دائما بيتصل بالتلفون
قبل ما يجوا علينا.. أها فتحت الباب وسلمت عليهم وقلت ليهم إتفضلوا..
الراجل كان ماسك ولدو من إيدو وبعاين يشوف سامي وين؟
جلس وبرضو كان ماسك ولدو بالقرب منه وبيتكلم معاهو كلام
بصوت خافت.. ثم قال ليهو أمشي ألعب مع سامي.
بعد شوية أسمع ليك الراجل يقول لولدو.. محمد كع.. يا محمد كع..
وولدو واقف قدام سامي يعاين لأبوه وسامي بسمع الكلام..
غايتو بدون ما يشعر ولدو سامي يروح رافع يدو ويدي ليك الولد
أم دلدوم في وشو ومعاها قولة كع.
الولد قعد يبكي وأبوه يشيل وينبذ في ولدو ويقول ليهو:
يا خواف يا جبان بعد شوية قعد يضحك وأنحنا بنعاين ما فاهمين حاجة.. :confused:
قلت ليهو فهمنا الحكاية شنو؟
قال لي: والله جاينكم مخصوص بدون ما نتصل عليكم..
لكن ولدي دا بدرب فيهو اليوم كلو وبقول ليهو:
يا محمد لما ندخل بيت ناس سامي أقول ليك كع..
إنت على طول تلصق لي سامي بنيه في وشو
علشان نخلص حقنا ونخوفو.
لكن الحكاية إنقلبت.
سلام يا عزيز و يا مرحبا بالخواجة ..
و الله أكان كنا عارفين العيال سيرتم بتجيبك يا خواجة عزيز كان الواحد نزل ليو بوست حضانات و روضات ..
قلت ليا أبو محمد عامل كوتش ملاكمة ؟؟.. عافى منو سامى القلب السحر على الساحر ..
يااخى مسألة دق الشفع للشفع دى بتدخل الناس فى أضافرينا لما يكون عندهم شافع جنو مداوسات وشكااال .. تلقى الأبو يعتذر بعد كل أم دلدم و لا صرخة للشافع الزاير و الأم فى نص هدوما و يا ولد عيب و يا بابا دا ما أخوك .. بس يا اخوى من غير أى تحضر و لا تجمل الواحد لما يكون ولدو الحقاار بيكون حالو أحسن من حال الولدو المحقور ..