الامثال السودانيه

[ودسمير]

العوده للجزور شى رائع ..
اتمنى من احباب المنتدى ان يتحفونا بالامثال السودانيه وقصة مضربها .. وكل منا يجيب العندو والسمعو واكثر امثالنا ..

وحتما سنلتقى

[الجندي المجهول]

ود سمير حبيبنا صباحك خير
بصراحة انحنا عندنا امثال جميلة وقصصها اجمل خاصة تلك التي اطلقها الشيخ فرح ود تكتوك ومنها عن الكذب والمثل بيقول
الصدق كان ما نجاك الكذب ما بنجيك ..
وقصتها ...
يقال ان هنالك مجموعة من الرجال كانت تلاحق رجلاً فوصل الرجل إلى المكان الذي يجلس فيه الشيخ فرح ود تكتوك واخبره بان هنالك رجال يلاحقونه فقال له اختبئ خلف ذلك الكوم من القش ففعل الرجل ذلك وبعد برهة من الزمن وصلت تلك تلك المجموعة من الرجال وسالوا الشيخ فرح عن ذلك الرجال فاشار لهم بأنه داخل هذه الكومة من القش فضحك الرجال واستخفوا بكلام الشيخ كيف لرجل ان يكون داخل هذه الكومة وانصرفوا إلى حال سبيلهم ،، وبعدها خرج الرجل وهو منزعج ويوقل للشيخ انا استجرت بك لتخبئني كيف تخبرهم بمكاني فقال له الشيخ فرح ود تكتوك الصدق كان ما نجاك الكذب ما بنجيك ....
مع خالص محبتي ،،،

[BIT WAD AZRAG]

سرارة اللعوت تتلاقى يوم الموت

[BIT WAD AZRAG]

الله يغني المساكين في المجانين

[BIT WAD AZRAG]

آخرة الجزا أزى

[الفخيييم]

الله يغني المساكين في المجانين
والله مجانين الزمن ده ما بيدقسو!!!
المساكين ديل الا جامع الحكومة
وده لو ما جا ودحلال شربهم عصير!!!

[BIT WAD AZRAG]

سلامات أخوي هو لكن كان عصير ولارز بي لبن

[الفخيييم]

سلامات أخوي هو لكن كان عصير ولارز بي لبن
عصير ياخ رز ده ولا في الاحلام
ضربوا العضة واصر الا يشربوا العصير
وده كان بطعم الحنظل قضي علي
الاخضر واليابس والمظاهرات قامت!!!

[الجندي المجهول]

والله يا الفخيييييييييييم ويا بت ود ازرق موتوني بالضحك وذكرتوني المحتال الذي قام بتخدير الجماعة

غايتو الموضوع دا في مصر ما حصل ؟

انحنا ماشين بالمقولة البتقول نبدأ من حيث توقف الاخرين ..

والجااي أحلى


تخريمة : امسك لي وانا اقطع ليك

لحن الختام : العفش داخل البص على مسؤولية صاحبه

[BIT WAD AZRAG]

إنت حافظ القصة قدر دا قسم ليك معاه ولاحاجة هههههههههه

[الفخيييم]

إنت حافظ القصة قدر دا قسم ليك معاه ولاحاجة هههههههههه
عارفة الزول ده بالعملة دي
كشف المستور والجماعه
طلعوا متمسكنين ما مساكين
ومن ديك ولحدي هسي عندك
حاجة ديوان الزكاة عدل احسن
من النصابين الحايمين لكن ربنا
جاب ليهم نصاب بمواصفات عالمية!!!


تخريمة: يقسم لي اصلو هو نهب
حصة بترول كلها ملاليم..

[الفخيييم]

والله يا الفخيييييييييييم ويا بت ود ازرق موتوني بالضحك وذكرتوني المحتال الذي قام بتخدير الجماعة

غايتو الموضوع دا في مصر ما حصل ؟

انحنا ماشين بالمقولة البتقول نبدأ من حيث توقف الاخرين ..

والجااي أحلى


تخريمة : امسك لي وانا اقطع ليك

لحن الختام : العفش داخل البص على مسؤولية صاحبه
طيب دي بداية كويسة من حيث
انتهي غيرنا معناها نحن مواكبين..

العفش واقطع ليك دي امثال لكن؟؟؟
طيب هاك دي بكره الركوب مجان
بس ما تقولي سواق في خط المزاد!!!

[ودسمير]

انحنا دافنينو سوا :
قيل ان اخوين كانت ظروفهم الماليه كويسه ودارت عليهم الايام ولم يتبقى لهم سو حمارهم !وبرضو مات الحمار !!! ففكرو ان يدفنو الحمار ويعملم عليه قبه 0ضريح ) وفعلا بدا الناس يزورو الضريح معتقدين ان شيخا واصل مدفنون وكبر مكان الزياره واصبح الناس ياتون بالاف وكثر مال الاخوين وبعد سنوات كثيره فكر احد الاخوين ان يستولى على كل شى طمعا فقال لاخيه والله يا اخوى شيخنا امبارح جانى فى النوم وقال لى بالحرف الواحد خلى اخوك يذهب الى جهة الشرق وبعيدا جدا فنهالك رزق وفير !! وهنا قال له اخيه بعد ان سمع الكلام ياخوى : انحنا شيخنا ده دافنينو سوا

وحتما سنلتقى

[الجندي المجهول]

انحنا دافنينو سوا :
قيل ان اخوين كانت ظروفهم الماليه كويسه ودارت عليهم الايام ولم يتبقى لهم سو حمارهم !وبرضو مات الحمار !!! ففكرو ان يدفنو الحمار ويعملم عليه قبه 0ضريح ) وفعلا بدا الناس يزورو الضريح معتقدين ان شيخا واصل مدفنون وكبر مكان الزياره واصبح الناس ياتون بالاف وكثر مال الاخوين وبعد سنوات كثيره فكر احد الاخوين ان يستولى على كل شى طمعا فقال لاخيه والله يا اخوى شيخنا امبارح جانى فى النوم وقال لى بالحرف الواحد خلى اخوك يذهب الى جهة الشرق وبعيدا جدا فنهالك رزق وفير !! وهنا قال له اخيه بعد ان سمع الكلام ياخوى : انحنا شيخنا ده دافنينو سوا

وحتما سنلتقى

هههههههههههههههههههههه
يا ود سمير يجازي محنك دا كلام شنو والله بالغته عديل

[مدناوية]

سلامات أخوي هو لكن كان عصير ولارز بي لبن




أنا زاتي سمعته قالو رز بي لبن ...

[BIT WAD AZRAG]

الفلهمة العورا وشيل البطارية في القمرا

[BIT WAD AZRAG]

حكم اب تكو لي مرتو

[BIT WAD AZRAG]

المابتعرف ما تدوها تغرف ياغرقت الكاس ياجوعت الناس

[محمد علي شقدي]

سيد جنقور في الفاشر ولا عند راي

[محمد علي شقدي]

ام كدكايتي ولا صلمباي زول

دي امثال من دارفور

[خالد أحمد الصول]

حكم اب تكو لي مرتو

عندما تود أنثي طائر أب تكو أن تحضن بيضها يقوم الذكر بنتف جميع ريش الانثي يدخلها في كوه و يقفل عليها إلا من فتحه صغيرة تخرج منقارها ... و طوال هذه الفترة يقوم الذكر بواجب إطعام الانثي و سقيتها حتي يفقس البيض فيقوم بفتح الكوه و يكون آنذاك قد نمي ريشها و صار جميلا جدا ... و بتصرف الذكر هذا يعتقد الناس أنه ظالم و قاسي و يقوم بهضم حقوق المرأه بينما في الواقع هو عطوف حنين يؤدي كل أعباؤه و أعباء زوجته التي فرقها تماما لرعاية أطفالها

[BIT WAD AZRAG]

تسلم استاذ خالد على قصة المثل الرائعة

[BIT WAD AZRAG]

الصقر ان وقع كترت البتابت

[BIT WAD AZRAG]

التور ان وقع بتكتر سكاكينه

[BIT WAD AZRAG]

فلان دا كلامه زي طق العصا في الركب

[بابكر]

الصقر ان وقع كترت البتابت

الصقر إن وقع كترة البتابت عيب !!!أى إن الشخص الكبير عندما يقع فلا داعى للجزع إنما عليه الثبات

[واحد من الناس]

والله يا بت ودأزرق المثل بتاع التور ده ألذ مثل !!!

[ابووضاح]

الطير ان مرق لابد يعود لي ماتا والسر مامرق ان سيد مافتا

[ابووضاح]

الفي والدك بقالدك
والتسوي كريت في القرض تلقي في جِلدا

[ابووضاح]

ان بخلت عليك تقطع سلاسلا الحداد وان جادت عليك بخيط العنكبوت تنقاد

[ابووضاح]

ابيت بي ظلها فتها كلها
يحكي ان رجلاً فقيرا كان يجلس تحت ظل مبني جميل مظل
فاتي صاحب المبني وقام بطرده وبعد فترة اتي الفقير بجوار المبني
فوجد صاحب المبني توفي فذكر هذا المثل .

[سموحة]

جد مشكور ودسمير .......... الامثال الشعبية حلوه

ولك كل احترام ...........

ههههههههههاك ده

الا عندو القلم بيكتب نفسوس شقي

[ودسمير]

والله يعنى اب تكو ده كان مظلوم ساى

مشكور يا ود الصول

[BIT WAD AZRAG]

المابعرفك بجهلك

[BIT WAD AZRAG]

الجاتك في مالك سامحتك

[BIT WAD AZRAG]

لا بجدع لابجيب الحجار

[BIT WAD AZRAG]

حقي بسوي سميح وحق الناس بسوي شتيح

[BIT WAD AZRAG]

الفي والدك بقالدك

[ود المطامير]

الطيور على أشكالها تقع

يعنى الزول بقع على الزول اللى بيشبه

ولأ شنو يا أستاذنا ود الصول