ذكريات فى مدنى

[mutasim]

ذكريات من مدنى

حفل غنائى بالسينما الوطنيه

فى عام 1969او 1970 كانت فى حفله فى السينما وطبعا الحفله فى السينما بتكون مقلوبه ناس درجه ثالثه بكونوا قريبن للمسرح ودرجه اولى فى اللوج بعيدين
شارك فى الحفله الفنان حمد الريح والزمن داك كان فى قمة مجده ومعاه الفنان احمد فرح رحمة الله عليه وسيد خليفه عليه الرحمه والاستاذ هبوبه وده موضوعنا الاستاذ هبوبه كان ممثل ويقدم لقطات تمثيليه فى الفواصل وكان ضخم جدا والمسرح عالى وماقدر اطلع المسرح وقدر ماالناس حاولوا يطلعوا ما قدروا وبعدين عدد كبير من الجمهور مشوا يساعدوا وقدروا يرفعوه وكل السينما كانت بتردد اووب اووب ارفع وطبعا كلهم ناس الشعب واغلبهم مشاغبين وكانوا لما يقربوا يرفعوا ارجعوا تانى ويعاودوا الكره عدة مرات اخيرا رفعوا وقدم وصلتوا ولما انتهى وعايز انزل المشاغبين كلهم جروا عشان ينزلوا فرفض انزل وقال ادونى كرسى وظل جالس الى ان انتهت الحفله لكن المشاغبين كانوا منتظرين ينزلوه فرفض واخيرا تم طردهم من السينما والى الان مش عارفين كيف نزل الراجل
الاستاذ هبوبه اختفى الان انشاءالله يكون بخير

دى واحده من الذكريات نرجو المشاركه

[ود الجعلي]

واصل يا استاذنا ذكرياتك الجميلة المعتقة التي تؤرخ للفترة بالمعايشة وياحبذا للتعرض لكل الجوانب والاستفاضة في ذلك

[mutasim]

الاخ ود الجعلى تحياتى
حبيت بالبوست ده اطلع الزكريات الجميله فى مدنى واظن كل واحد عنده زكريات يلا شاركونا

[ABUZAID]

ذكريات من مدنى

حفل غنائى بالسينما الوطنيه

فى عام 1969او 1970 كانت فى حفله فى السينما وطبعا الحفله فى السينما بتكون مقلوبه ناس درجه ثالثه بكونوا قريبن للمسرح ودرجه اولى فى اللوج بعيدين
شارك فى الحفله الفنان حمد الريح والزمن داك كان فى قمة مجده ومعاه الفنان احمد فرح رحمة الله عليه وسيد خليفه عليه الرحمه والاستاذ هبوبه وده موضوعنا الاستاذ هبوبه كان ممثل ويقدم لقطات تمثيليه فى الفواصل وكان ضخم جدا والمسرح عالى وماقدر اطلع المسرح وقدر ماالناس حاولوا يطلعوا ما قدروا وبعدين عدد كبير من الجمهور مشوا يساعدوا وقدروا يرفعوه وكل السينما كانت بتردد اووب اووب ارفع وطبعا كلهم ناس الشعب واغلبهم مشاغبين وكانوا لما يقربوا يرفعوا ارجعوا تانى ويعاودوا الكره عدة مرات اخيرا رفعوا وقدم وصلتوا ولما انتهى وعايز انزل المشاغبين كلهم جروا عشان ينزلوا فرفض انزل وقال ادونى كرسى وظل جالس الى ان انتهت الحفله لكن المشاغبين كانوا منتظرين ينزلوه فرفض واخيرا تم طردهم من السينما والى الان مش عارفين كيف نزل الراجل
الاستاذ هبوبه اختفى الان انشاءالله يكون بخير

دى واحده من الذكريات نرجو المشاركه



حبيبنا الغالي
الاستاذ mutasim

زمان كانت السينما ليها مذاق خاص
واهو بتقول حفل في سينما

حسه ياخوي غير الافلام الهندية وناس جاتندارا وماعارف مين مافي
وناهي ناهي


واصبحت السينما مقام لفئة معينة من المجتمع

فاختلفت المفاهيم

ولعل الذكريات اصبحت تمثل هاجسا في الغربة
فالحنين يبلغ اوجه لما تجي سيرة

قبل يومين في النيل الازرق جابو ثلاثي الجزيرة

سنوات وسنوات . . .
وفجأة تخلد في نفسك اغاني قديمة لم تسمعها من زمن

قلتي لي مدني الجميلة
مدني يا اجمل خبر

تتمنى لو ما جنبك زول . . . .



تحياااااااااااااتي

[mutasim]

عزيزناابوزيد مشكور على المشاركه
لكن والله مدنى زمان كان ليها طعم جميل وكانت نضيفه كنا بنعرف كل الناس حتى المتشردين والسينما كانت قمة الرفاهيه حتى لو الفلم بايخ ودايما بتحصل مواقف جميله داخل السينما والشعب كانت محببه لاهل مدنى دايما تلاقى كبار اللاعبين فى الشعب امثال الاسيد والفاضل سانتو ومحجوب الله جابو وكل الشخصيات المعروفه وكل واحد عنده مكان مفضل دايما بجلس عليه , مره كان الفلم بايخ وفى اثنين واحد فى اللوج والتانى فى الشعب وكانوا بتونسوا بصوت عالى وونستهم جميله ومضحكه فكانوا فلم .

[محمد الجزولى]

الجميل mutasim

الذكريات طاعمه ولذيذه
وصراحة اى شئ مربوط بالماضى يكون ذو شجون
واصل ذكرياتك اخى معتصم حتى نتعرف على جوانب اخرى من هذه المدينه الوطن

[mutasim]

الجميل mutasim

الذكريات طاعمه ولذيذه
وصراحة اى شئ مربوط بالماضى يكون ذو شجون
واصل ذكرياتك اخى معتصم حتى نتعرف على جوانب اخرى من هذه المدينه الوطن

الاخ محمد الجزولى تحياتى
مشكور على المرور الذكريات جميله وانا عايز المشاركه من الاعضاء اى ذكرى والجماعه العجايز دفعتى ديل يلا ادونا ذكرياتكم

[نزار حسن محمد]

ياسلام على الناس المعتقين برائحة ست الدائن امثال استاذنا معتصم
وياسلام على رجع الصدى العاد لى حكايات وردده
تعرف يامعتصم الواحد ما عارق ابداء من وين ولا وين
لكن خلنى ادخل على حسب الحظه شخصيات لايمكن ان ننساه
المكان سور حديقة وقيع الله حيث بائعات الكسره وبعض الخضرجيه ..وبائعى الكتب القديمه
وهناك على الناصيه محلات محمدين لليمون البارد .. ومحلات ود رمضان للعجلات والتاجير
هنا اذكر شخصية سامبا((المنقولى)) ومداعبته مع بائعات الكسره وعند ظهور ود الفتلى تبداء
المناوشات الفكاهية ..وتراء الجميع يضحكون من اعماق القلب ...

[خالد أحمد الصول]

ما أحلي الزكريات و ما أحلي المدينة القديمة
تذكرت أيام السينما المتجولة ... كانت تقدم عروضها مرتين في الاسبوع في داخلية الممرضات القريبة من منازلنا ... وكنا نهاجر لها هجرة فنجلس في رأس الحيطة نشاهد الممرضات مصطفات في كراسي بأدب تام يشاهدون العرض و كن لا يلتفت الي الحيطة لمراقبة الجالسين فيها ... كان يعاوننا الكبار في الصعود فوق الحائط و نكون سكوتا نستمتع باأفلام المقدمة حتي لا يقومون بطردنا فنخسر هذا اليوم الترفيهي ... و كان أقرب دكان لمنازلنا هو كنتين اليماني (بقاش)

[mutasim]

تحياتى الاخ نزار
ومشكور وشرفنا مرورك وذكرتنا حاجات كثيره زقاق العجلاتيه ومحمد بتاع الليمون , العجلاتيه ديل كنا بناجر منهم العجلات وماممكن نرجع العجله فى الزمن المحدد وكنا بنقيف بعيد ونقول للعجلاتى ياعم امسك عجلتك اقول لينا جيبه هنا طبعنا البتاخر بدوه ضربه بجنزير العجله وكنا نقول ليه امسك ونرجعه لوراء وقدام وهو يكورك ياولد لا لا ونفكها ليك قصاده بالله يطير ليك فيها ذى حارس المرمى ونحن جرى لكن كنا بننسى ونرجع ناجر تانى

وحديقة وقيع الله سموها على الماحفظ سليمان وقيع الله رحمة الله عليه يوم اتوفى كان زواج خالى ميرغنى احمد ميرغنى الشقيق الاكبر لبروفسر عمر احمد ميرغنى ومزيكه شرطة النيل الازرق بقيادة كودى كانت شغاله فى العرس وجاهم واحد فجاءه ولموا عدتهم وطلعوا بعدين عرفنا بوفاة المحافظ .

[mutasim]

حبيبنا ود الصول تحياتنا ليك
الممرضات ديل مسكاين كانن مقفولات فى الداخليه وممنوعات من الخروج كويس كانت بتجيهم سينما
السينما المتجوله كانت بتجينا فى جزيرة الفيل فى الستينات وكان يوم تجى السينما ده يوم عيد وكان عمنا موسى من ناس دردق بعمل فى الاعلام وهو المسول من السينما بس افلامهم كلها تور الجر والبعيو وحفلات فى الاذاعه لاكننا بنكون مبسوطين جدا وانا كان مزاجى اعاين للمكنه بتاعت السينما اكثر من الفلم .

[ابوالنور]

يا حليل شارع الجمهورية وايام شارع الجمهورية

[mutasim]

ابو النورت تحياتى

شارع الجمهوريه فى اولخر الستينات كان حكايه وبالاخص باليل كل المحلات تعمل والاغاريق كانو عندهم مزاج يتمشو فى الشارع باليل والحريم يحملوا اطفالهم فى عربات والشارع كان نظيف , تعال شوفوا الان باليل كله مظلم تخاف تمشى فيه .

[ود إدريس]

أنا بتذكر الشعير والتمرهندي الكنا بنشربوا في دكان حاج حمزة (جوار منزل جدي محمد سليمان الدمياطي) ، وبتذكر النسوان الكانو بسوا العشاء تحت انوار العواميد (الذ حاجة سلطة الاسود وسلطة الروب) ـ برضو بتذكر انو كان في أقاشي بين سينما الوطنية والجزارة القديييييمة (في زول بتذكرا كانت وين؟) ـ ، مركز الشباب ـ باصات شندي فوق ، الموقف القديم بتاع الباصات في السوق الكبير ، أها دا ذكرني أكشاك التوتو كورة . بتذكر مكتبة مضوي والفجر لأني كنت من عشاق الكتب وطبعا سوق الحرامية كان ليهو النصيب الأكبر (سوق الكتب المستعملة : ها ها ها جنب حديقة وقيع الله) / شارع النيل كان فيهو مصاطب من الأسمنت وكانت عالية .. بتذكر باصات الوطنية (كانت احسن باصات في ايامنا) وبتذكر السكة حديد في ايام عزها ، ياما سافرنا بيها للخرطوم وللأبيض . بتذكر غابة أم بارونة أيام عزها وكنا بنعمل كل المناسبات فيها خصوصاً الفيها ضبيحة وكانت ملياااااانة حيوانات .. وطبعا جنينة نسابتنا ناس ابوزيد كان ليها نصيب من الضبايح برضو (عادل ابوزيد وشجر المنقة والليمون) .. أم سنط بقا بتذكري بجناين ناس أبوشوارب (وين أستاذ أسامة؟) .. وناس أسامة أبوشوارب بيرجعوني للدرجة وميدان الشهداء ودا برضو بيلففنا على مدرسة السني الأصلية بداخلياتها الكانت حية ومنها تطلع على المزاد بس ماتنسى انو سباق الخيل قريب من مدرسة السني (يعني ما بعيد شديد لو مشيت على التدريب المهني) المهم تصل السوق الجديد (عارف خلف الله والمواتر السوزوكي) ويجيك الاستاد ووراهو مخازن الراسمالية المقابلة لمدرسة الصناعية . أنا شكلي داير ألف مدني كلها بي عجلة في ساعتين . كدي النخلي حبة لي بكرة ولي باقي الشباب او الشياب الذينا . ودعناكم الله .

[mutasim]

ودادريس تحياتى
مشكور ياخى بالمشاركه الجميله ومنتظرين منك الكثير , ياخى ذكرتنا الموقف القديم بتاع المواصلات اللى كان مكان البنوك الان وممتد الى المستشفى ومن يوم اتنقل الموقف انتهى شارع الجمهوريه لان السوق تحول مع الموقف ودى عاده عندنا مش عارف ليه , بتذكر مره فى اواسط الستينات كانت المواصلات لدردق والجزيرة خط واحد بسعر قرش ونص وكانت ذى الدلاله مافى كبسنجى وممكن ينزلوا السعر وفى تنافس بين العربات الصغيرة (التيمس ) والبصات الكبيره ومره ناس التيمس نزلوا السعر لقرش وفى سواق من جزيرة الفيل بسوق بص كبير وما لقى زباين قام نادى بتعريفه وماعندو بلاش البص اتملا لى عينو الركاب كلهم شباب ودور بيهم ولما وصل الترعه بتاعت الرى هسى الترعه دى ماموجوده كانت بتجى من ترعة بركات وبتسقى كل حدايق بيوت الحى السودانى اتصلتوا عليها ولغوها وعملوا بياره بدلها لاكن مانجحت وانتهت البيوت , نرجع لموضوعنا اخونا وقف فى الترعه ونزل وجاء للركاب وقال ليهم قرش ونص والمابدفع بطمسه فى الترعه نسيت اقول انه مريض نفسيا وقوى جدا , الجماعه كلهم دفعوا القرش ونصف من غير اى احتجاج بل كانو مبسوطين وضحكوا فى مقلب احمد السواق.

[mutasim]

سباحه
مره كان فى سباق سباحه من ام سنط الى مدنى نهاية السباق أمام وزارة الشباب او مركز الشرطة
ويشترك فى السباق كيبجاب وسارة جادالله وفضل وجون من جنوب السودان ومتسابقة قبطية نسيت اسمها ومن مدنى محمد ودالنقاش وعدد من المتسابقين واذكر بينهم متسابق فاقد لاحد رجليه
وكان فاروق النقاش رحمة الله عليه رئيس اتحاد السباحه وصرح كثير قبل السباق بتحدى كيجاب بواسطة شقيقه محمد رحمة الله عليه .
وكنت منتدب فى وزارة الشباب وعملت فى لجنة السباق وفى الاسعافات واليوم القبل السباق وجدنا ان كل العمل علينا اختفوا ناس اتحاد السباحه اذكر احمد سينما رحمة الله عليه كان يدير بوفيه نادى الجزيرة وجانا فى الوزارة ليعرف الطلبات وزعل وفات لكن رجعوه وكتبو ليه الطلبات هى سندوتشات وشاى وقهوه لفطور الصباح فى موقع السباق وذهبنا للمستشفى شخصى ومصطفى كرار رحمة الله عليه لاحظ ان مصطفى كرار ليس عضو فى الاتحاد ولكن حضر وجلس معانا كل اليوم وهو يعمل وينظم مشينا المستشفى لطلب معدات اسعاف ولما دخلنا على مكتب مدير المستشفى وهو دكتور فراج اول ما شافنا قال لدرش عارفكم جاين لشنو معدات للسباق المهم وفر لينا المعدات وتحمس د خالد الكومى وقال انا بجى معاكم قلنا ليه مرحبا بنمر عليك الصباح بدرى وكان الاخ على قريش رحمة الله عليه متحرك ذى النحله وفضى بيته لبعض الضيوف من الخرطوم , المهم اليوم اللى قبل السباق جانا بص من الرى حوالى الثانيه صباحا وبدا يجمع فى الناس مشينا لدكتور خالد الكومى ثلاثه صباحا فقال انا هسه جاى من بيت عرس فقلنا ليه مافى طريق المهم ركب معانا وغشينا حسين البخيت خرج مسرع معانا رحمة الله عليه وبعدها مشينا نادى الجزيرة واخدنا السباحين وكان فى برد وصلنا ام سنط والشمس لم تطلع السندوتشات بعضها فسد ماعدا سندوتشات المربى وانا اتمليت شاى لكن ادبنى ادب ,
وابتدا السباق بنزول سباحين الخرطوم ماعدا كيجاب نزل بعد مده قدمهم شويه وقبل السباق سارة جادالله كانت بردانه اديناها بطانيه وكان معاه والديها مرافقين لها , ونزل كيجاب وتحركنا معاهم بلنشين وبعض الزوارق وبدات الشمس تطلع وكانت حكايه جميله الى ان وصلنا قرب العريباب نزل سباحين مدنى ويعتبروا هواه لكن لما مشينا شويه تعبنا كلنا بسبب امتلاء المثانه وانا تجرست ود خالد يقول لى امشى موخرة الزورق كل ما امشى اللاقى السباحه القبطيه جنبى بعدين الجماعه كلهم قالوا لسواق اللنشق ياخى وقف ونزلنا فى الشاطى الشرقى كل اللنش نزل وكان معانا الصحفى ابوشنب وماسك المكرفون ويذيع المهم كيجاب كسحهم كلهم ووصل الاول بعده ساره وجون وقع فى شبكة صيادين اخرته للمركز الرابع والقبطيه المركز الثالث ,
ولما نزلنا من اللنش وجدنا كل مدنى فى شارع النيل واتزكر د عوض القون كان بنظم فى الناس ود النقاش افتكر جاء بعد المحترفين مباشرة ووزع الجوائز المحافظ كرار .

المجهود ده قامت به ادارة الرياضه بوزارة الشباب وكان على راسها المرحوم بخيت عبدالرحمن والمرحوم محمد عبدالله مشرف الرياضه ومحمد عبدالله كان نشط وهو الذى أسس جميع الاتحادات بمجهود منه اتحاد الدراجات والجودو والكراتيه والسباحه ونظم البطولات وسجل اتحاد الكراتيه بمدنى فى اتحاد الدول العربيه قبل ناس العاصمة وعملت ضجه انشاءالله نجد فرصه نتكلم عنه وهو من اولاد العشير .

[ودسمير]

لك التحايا - الغريب انو زولنا اسمو( هبوبه) زكرتنى بالسينما فى ودمدنى وياحليل السينما خاصة سينما الخواجه التى الان اصبحت من الاطلال لا دايراين الجماعه يكسروها ويستفيدو من موقعها الممتاز جدا ولا عايزين يرجوعها تانى !! ونقول للزمان ارجع يازمان

[mutasim]

ود سمير تحياتى
مشكور على المرور والتعليق الجميل , السينما الخواجه كلنا متاثرين لحالها لاننا عندنا فيها ذكريات وهى كانت من مراكز الثقافه فى مدنى.

[mutasim]

سباق دراجات

الزكريات بقت كلها سباقات لكن ده اخر سباق .

سباق دراجات من الحصاحيصا الى مدنى اشترك فيه الجنس اللطيف .
اتحاد الدراجات كونه الاخ محمد عبدالله واعطى رئاسته للمرحوم على جميل وبعد التكوين دعوا لسباق الحصاحيصا مدنى سباق مفتوح وباى دراجه , وتم اختيارى فى الاسعافات مع د.خالد الكومى وحسين البخيت
يوم السباق مره على المرحوم على جميل فى الصباح بدرى ومشينا جمعنا فريقنا وتحركنا من امام وزارة الشباب مع المتسابقين فى سيارات تيبر شاحنات وسيارة شرطه وانزلنا البنات فى فداسى هى نقطة بداية السباق لهم وصلنا الحصاحيصا ومن امام مصنع الصداقه كانت بداية السباق , فى عدد كبير من الدراجات اتكسرت فى الشاحنه لم يشتركوا وبقية الدراجات اغلبها قديمه لكن عدد المشتركين كان كبير وعند بداية السباق حصل تصادم بين بعض التسابقين مما ادى الى تلف بعض الدراجات وفى واحد بدل بدال واحد بس والبدال انكسر كلهم رفعوهم مع دراجاتهم فى الشاحنه اما البقيه فواصلوا وكان مفروض يكون فى مراقب يعطى اشارة البدايه للبنات ولكنهم تحركوا لما عرفوا الاولاد قربو ا يصلوا فداسى وسير السباق بشارع القبه لما وصلنا اول الشارع وجدنا كل اهل الحى فى الشارع ووصلت المتسابقه اولا وكان معانا سائق من فريق القبه اسمه يوسف لما وصل الشارع الناس كانو بصفقوا ليه المهم سباق كان قاسى وطويل والمشتركين كلهم هواه لكن تم بخير وهو اول واخر نشاط لهم وين الاتحادات دى الان

[mutasim]

اذكر مره فى حالة ولاده متعسره لاحدى المواطنات وقرروا يعملوا ليها عملية قيصريه وطلبوا من اهلها توفير زجاجتين دم لكن كانت فصيلتها نادره هى -o ولم يجدوا متبرع والحاله كانت صعبه اخيرا اهتدى زوجها لفكرة ومشى السينما الوطنيه مع نهاية الفلم وكان فلم الخطايا وفيه نفس المشهد مشهد ولاده قيصريه للبطله , الراجل طلب بواسطة المكرفون من الحضور التبرع لزوجته بعد نهاية الفلم الدور الثانى طبعا السينما كلها مشت بنك الدم عدد كبير اخيرا وجدوا واحد لايق اخذوا منه زجاجه حلت المشكله

[ودسمير]

الزكريات كثيره يا معتصم فى مدنى تحتاج لمجلدات. من الذكريات ايضا ام بارونا ويا حليلها من منا كان لا يعرفها كانت حديقه لا تخطئها العين من الاشجار والحيوان خاصة القرود موقعها الجميل جعلها كلحن اجمل ، كنا نذهب اليها فى الرحلات ونقضى اليوم باكمله ونتمنى ان لا ياتى المغرب !!! والان ااااه من الان

[مدنيّة]

اذكر مره فى حالة ولاده متعسره لاحدى المواطنات وقرروا يعملوا ليها عملية قيصريه وطلبوا من اهلها توفير زجاجتين دم لكن كانت فصيلتها نادره هى -o ولم يجدوا متبرع والحاله كانت صعبه اخيرا اهتدى زوجها لفكرة ومشى السينما الوطنيه مع نهاية الفلم وكان فلم الخطايا وفيه نفس المشهد مشهد ولاده قيصريه للبطله , الراجل طلب بواسطة المكرفون من الحضور التبرع لزوجته بعد نهاية الفلم الدور الثانى طبعا السينما كلها مشت بنك الدم عدد كبير اخيرا وجدوا واحد لايق اخذوا منه زجاجه حلت المشكله

سبحان الله

والله حاجة جميلة اننا نحس بالم بعض
ونساعد بعض علي تجاوز الالم دا


مشكور استاذ معتصم

[mutasim]

الزكريات كثيره يا معتصم فى مدنى تحتاج لمجلدات. من الذكريات ايضا ام بارونا ويا حليلها من منا كان لا يعرفها كانت حديقه لا تخطئها العين من الاشجار والحيوان خاصة القرود موقعها الجميل جعلها كلحن اجمل ، كنا نذهب اليها فى الرحلات ونقضى اليوم باكمله ونتمنى ان لا ياتى المغرب !!! والان ااااه من الان

ود سمير تحياتى
امبارونه فيها ذكريات جميله طبعا امبارونه قريبه لينا وقبل ما ادخلوا فيها التعديلات الموجوده الان كانت افضل كانت كثيفة الاشجار ويوجد مستطيل اشجار نيم وسط الغابه هو مكان الرحلات وكل يوم جمعه بها رحلات وايام شم النسيم بتكون مليانه اقباط والقرود كميه كبيره وكانوا فى ناس متخصصين فى صيد القرود , لكن لما جو يطوروها قطعوا كميه كبيره من الاشجار وقفلوا اشجار النيم , نتمنى ان ترجع امبارونه جميله .

[mutasim]

سبحان الله

والله حاجة جميلة اننا نحس بالم بعض
ونساعد بعض علي تجاوز الالم

مشكور استاذ معتصم

الاخت العزيزه مدنيه تحياتى وحمدالله على السلامه

افرحتنا مشاركتك الجميله الشعب السودانى به صفات نادره لاتوجد فى بقية الشعوب ودائما بقدموا المساعده اذا تاكدوا من الامر
تحياتى

[محمد الجزولى]

اذكر مره فى حالة ولاده متعسره لاحدى المواطنات وقرروا يعملوا ليها عملية قيصريه وطلبوا من اهلها توفير زجاجتين دم لكن كانت فصيلتها نادره هى -o ولم يجدوا متبرع والحاله كانت صعبه اخيرا اهتدى زوجها لفكرة ومشى السينما الوطنيه مع نهاية الفلم وكان فلم الخطايا وفيه نفس المشهد مشهد ولاده قيصريه للبطله , الراجل طلب بواسطة المكرفون من الحضور التبرع لزوجته بعد نهاية الفلم الدور الثانى طبعا السينما كلها مشت بنك الدم عدد كبير اخيرا وجدوا واحد لايق اخذوا منه زجاجه حلت المشكله

يا سلام يا معتصم
زمن جميل وناس تعطى بدون مقابل
تابع اخى معتصم ونحن جلوس هنا مستمتعين بهذه الذكريات

[mutasim]

الاخ محمد الجزولى اجمل تحياتى
مشكور لمشاركتك ياحليل داك الزمن , يلا ادينا ذكرى من ذكرياتك .

[ودسمير]

فى موفق جميل ايم الزمن الجميل حكاه لى شخص اثق فيه كثيرا فقال لى يوم مشيت مستشفى مدنى وفجاه لقيت ماعندى ولا قرش وعايز ارجع البيت جاتنى شحاذه وقالت لى لله يا ولدى فقلت ليها والله يا خاله انا ماعندى حق الرجعه للبيت فقالت لى اصبر شويه وما تتحرك من مكانك وبعد دقائق جابت لى حق المواصلات يعتى شخذت لــــــــــــــــــــــــــــــــى

[mutasim]

الاخ ودسمير تحياتى
نوع الشحادين ديل ماموجود الان , زمان كان فى شحاد فى شارع اتجاه واحد فى نهاية اليوم بدخل دكان بحسب قروشه واولاد صاحب الدكان بحسبو ليه وبديهم , فيوم سالته قلت ليه انا عايز اشتغل معاكم عاين وبعدين قال لى غير هدومك ؟؟

[mutasim]

فى السبعينيات كانت تحدث حواث كثيرة من البصات السفريه واغلبها من بصات الركبى والسبب طيش السائقين .
مره حصل حادث لبص الركبى بالقرب من مدنى حوالى الساعه الثانيه ظهرا وطبعا مافى اسعافات تم نقل المصابين بواسطة سيارات المواطنيين وكانت فى اخطاء كثيره فى طريقة النقل وصلت الحالات المستشفى وكان معظم الاطباء والتمريض انتهى عملهم فبعضهم رجع والاصابات مبالغ فيها فيها عدد من حالات الوفاة والعمل كان جايط وغير منظم لكن عملنا مجهودنا واذكر فى راجل كبير عمره حوالى خمسه وستون عاما كانت مسافره معه بنته وهى فى عمر سبعه سنوات تقريبا وبعد الكشف عليها اتضح انها مصابه بكسر فى العامود الفقرى ومتوفيه ولما تاكد من وفاتها كان ثابت جدا فحملها على كتفه وغطاها بطرحتها وبعد ما تحرك خطوتين وقف والتفت الينا وقال والله ماعندى غيرها , لكن منو مننا مانزلت دموعه اخذها وذهب وظلت الذكرى معنا .

[ودسمير]

من الاشياء التى لا تمحى من الزاكره الدورة الرياضيه للمرحوم الرياضى المعروف ( ابو ليلى ) التى كانت تقام بميدان بانت والتنافس كان بين فرق الاحياء وكانت مباريات قويه جدا واكاد اجزم بانها كانت اقوى من الدورى الممتاز حاليا . وانا كنت ممن احضور كل المباريات خاصة ان دكان والدى سمير على صالح ( الترزى ) بفتح فى ميدان بانت . واجمل مافى ميدان بانت ازيار المويه( موجوده حتى الان ) .
ويا حليل زمن :
اللبن صافى
والدواء الشافى
والريال كافى
والغش مافى
والفرح طافى

ولنا عوده

[mutasim]

تحياتى ودسمير
ياخى ذكرتنا المرحوم ابوليلى ملك الشباب رحمة الله عليه كان راجل نشط جدا فى مجال الرياضه ورحل وهو فى عز الشباب , كمان عرفنا والدك عم سمير انشاءالله يكون بخير

[mutasim]

عرضت احدى القنوات الفضائيه فلم عن المغنى الامريكى الاعمى رى جارلس .
وطبعا رى جارلس لينا معاه ذكريات فى اواخر الستينات كانت السينما الوطنيه لديها اسطوانات له وتم عرض فلم له قام بتمثيله بنفسه وكانت الاغنيه الشهيره ( هيت ذا رود جاك ) لها شعبيه كبيره بالمدينه وما ننسى اغنية ( ان شين ماى هارت ) واغنية ( وهت يو ساى ) وفيها مقطع جميل بقول فيه اووو اههههههه اوم اه اوم اه والله ذكريات جميله والفلم امس اعاد لينا تلك الزكريات وكانت فرقة جاز البوليس بتعرض اغانيه فى تلك الفترة
شفتوا مدنى كيف كانت مواكبه , طبعا السينما الوطنيه كانت تابعه لشركه سودانيه وكان همهم التثقيف واكثر افلامهم من روائع القصص , بحاول انزل اغانى رى جارلس
http://www.youtube.com/watch?v=Q8Tiz6INF7I[URL=]

[mutasim]

العمدة
العمدة ده لقب للشخص البخاف من زوجته وفى جماعه فى مدنى هم اللى ابتكروا اللقب هم مجموعة اهل واصدقاء منتشرين بكل احياء مدنى ولما يلتقوا بتندرو بى مواقفهم وكل واحد عامل نفسه مش عمده وزوجاتهم بشاركنهم فى الموضوع , فمره كنت معزوم معاى المدام حفلة شاى بحى الدباغه ولما نزلنا من العربيه حاولت اساعدها بحمل الشنطه الى ان تعدل ثوبها فرفضت وقالت لى بضحكوا عليك ماسمعت كلامها وعملت نفسى مش خايف منهم لكن ياريتنى لو سمعت كلامها لليوم مسمنى شايل الشنطه , لكن يوم بالصدفه قبضت ليك شيخهم قاعد اقطع فى باميه ومغطى صلعته بتوب لكن امانه ماوقع معاى العمده لما شافنى قعد اقول لى الباميه بتخرب المره قطعت وفترت وهى كانت واقفه ماتت بالضحك , نوادرهم كثيره مابنقدر نذكرها كلها لكنهم مجموعه لطيفه وكانوا بجتمعوا كل جمعه ببيت لكن الامور اختلفت الان , ياحليل ايام مدنى

[بدر الدين احمد الطائف]

الحبيب معتصم سلامات
والله كل ما اتخيل منظر هبوبه والجمهور بكورك اموت من الضحك.
وطبعا الجمهور المشاغب دائما بيكون فاكهة التجمعات العامه ذى السينما والاستاد والمسرح بس بيكون جمهور مشاغب فى حدود الادب واللياقه.
ذكريات جمليه ولطيفة وفى انتظار المزيد.

[ايمن عبد الله]

الخال العزيز معتصم
كيف احوالك اتمنى انك تكون بخير

لمن شعرت بالبوست ده قلت لازم اخش وطبعا نحن ما قدركم لكن عاشرنا ناس
تجي بي شارع الحرية تلاقي الصادق ابو العافية وعمك حسان قاعدين في قهوة ابو لبدة البقت هسة مطعم نسبة لهجرها من الاخ جمال ابو لبدة وتجد الوضع مختلف من الان لان المنطقة كانت محببة من مطعم كشك ولي بنك الادخار حاليا والله كانت لنا ايام هناك يا سلااااااااااااااااااااام يا خال وهسة بقى جمالا في الاقاشي اخر مرة مشيت لقيتا كلها اقاشي والاقاشي طبعا حبيب وبنحبن لانو حلو يا خال
المهم ادينا تلفونك انا 0562140100 اتمنى اسمع صوتك

[ايمن عبد الله]

انا قاعد يا ابو لينا لو حبيت تتصل اتصل

[mutasim]

الحبيب معتصم سلامات
والله كل ما اتخيل منظر هبوبه والجمهور بكورك اموت من الضحك.
وطبعا الجمهور المشاغب دائما بيكون فاكهة التجمعات العامه ذى السينما والاستاد والمسرح بس بيكون جمهور مشاغب فى حدود الادب واللياقه.
ذكريات جمليه ولطيفة وفى انتظار المزيد.

الاخ بدرالدين لك اجمل التحايا
مشكور على المرور والله فعلا منظر استاذ هبوبه كان بضحك لان الراجل حجمه كبير جدا ولونه ابيض ولما الجماعه رفعوه بقى ذى الراقد فى ايديهم ولعبو بيه تمام لما رفعوه .

[mutasim]

الاخ ايمن وينك اتصلت بيك وما بترد
ومشكور على المشاركه ومنتظرين المزيد من ذكرياتك

[بنت الرفاعي]

ما أجمل الذكريات وما أشقاها أحياناً, فهي تعطينا شعور السعادة بجمال ما عشناه في أحد الأيام, وتعطينا إحساس الحزن بما نفتقده في هذه الأيام.
لكم التحايا العاطرة أخي معتصم وبقية أصحاب الذكريات.:)

[الجندي المجهول]

حبيبنا الغالي
الاستاذ mutasim

زمان كانت السينما ليها مذاق خاص
واهو بتقول حفل في سينما

حسه ياخوي غير الافلام الهندية وناس جاتندارا وماعارف مين مافي
وناهي ناهي


واصبحت السينما مقام لفئة معينة من المجتمع

فاختلفت المفاهيم

ولعل الذكريات اصبحت تمثل هاجسا في الغربة
فالحنين يبلغ اوجه لما تجي سيرة

قبل يومين في النيل الازرق جابو ثلاثي الجزيرة

سنوات وسنوات . . .
وفجأة تخلد في نفسك اغاني قديمة لم تسمعها من زمن

قلتي لي مدني الجميلة
مدني يا اجمل خبر

تتمنى لو ما جنبك زول . . . .



تحياااااااااااااتي




والله يا استاذ معتصم موضوعك جميل وذكرياتك اجمل

تخريمة : ابو زيد يا اخوي ليك كم ما دخلت سينما جتندرا دا كان زمان
دا عهد سونيل شتي وشاروخان ومادهوري وكرشنا كابور وجوني ليفر وسنوي دول وبوبي دول

لقيتني كيف ؟؟

[محمد حسين (المميز)]

الاستاذ معتصـم

حقيقي بوست مميـز بما يحمل من ذكريات ومعاني

فعلا لو وضعنا مقارنه بين ماكان بالأمس ومايدور اليوم

من عادات واخلاق وصفات وتسامح

لوجدنا ان الفرق شاسع

ولكن هل تغير الزمن فعـلا:confused:

ام تغير الناس:confused:


شكرا لك الاستاذ معتصم على هذا البوست

[mutasim]

الاخ المميز تحياتى

مشكور على تعليقك المميز اظن والله تغير الزمن والناس هاجروا والهجره كان ليها دور كبير فى مجتمع المدينه ياخى فى ناس الواحد ماشافهم من ثلاثين سنه واكثر ربنا يلم شملنا

[mutasim]

تحياتى للجميع

من الذكريات الطريفه

مره كان فى مهرجان بدار الرياضه لالعاب القوى
وكان المرحوم حيدر حسين (قطامه) مشارك بعمل والكلام ده قبل مايعمل فرقته وفى عدد من المشاركين منهم استاذ بمدرسة مدنى الثانويه كان بلف السيخ على يده , المهم حيدر جاء داخل الميدان ومعه جحش وكان منظره عجيب مع الجحش وجلس فى الارض بالقرب من فريق الاسعاف منتظر دوره وكل الناس كانت متشوقه تشوفه حايعمل شنو مع الجحش , والجحش فلت من حيدر وجرى داخل الميدان وحيدر جارى وراءه والناس تكورك وبعد جهد مسك الجحش بطريقه بهلوانيه ورجع منتظر دوره ولما جاء دوره وقف قبالة المقصوره وادخل راسه تحت الجحش وحاول يرفعه والجحش يفرفر والناس تضحك حاول عدة مرات واخيرا رفع الجحش مع التصفيق ولما جا ينزل الجحش رمى ليك من فوق يعنى خلاص مهمتك انتهت

[mutasim]

ما أجمل الذكريات وما أشقاها أحياناً, فهي تعطينا شعور السعادة بجمال ما عشناه في أحد الأيام, وتعطينا إحساس الحزن بما نفتقده في هذه الأيام.
لكم التحايا العاطرة أخي معتصم وبقية أصحاب الذكريات.:)



الاخت مرام تحياتى
ارجو ان تعزرينى عن التاخير فى الرد
والله فعلا الذكريات بتعطى شعور السعاده اذا كانت حلوه او مره ودائما الواحد بضحك على نفسه من بعض المواقف المرت عليه مشكورة بنتنا

[ايمن عبد الله]

الاخ ايمن وينك اتصلت بيك وما بترد
ومشكور على المشاركه ومنتظرين المزيد من ذكرياتك

والله صاح لقيت كم رقم لكن كنت نايم والله وماعرفت رقمك ياتو فيهم ارجو اعادة الاتصال

[ايمن عبد الله]

من ماكنت صغير ابوي بسوقني معاهو الدكان من دون اخواني واجمل شي كان في الدكان الفطور الجماعي مع شلة من اصحاب الوالد ومهم العتالي والسواق وصاحب الكارة لكن ناس رائعين واحلى شي الفول برسلوني طبعا كل شوية

وبكون مبسوط وانا امشي اخدمهم وطبعا لمن القى فراغ بقوم امشي كشك محمد علي بتاع الليمون اشرب ليمون وارجع امشي جنب حديقة وقيع الله محل الكتب الارضية لي فايز و محمد عز الدين وكنا طبعا بنلعب الشطرنج مع صابر وبية فايز والابنوسي فرانكو الذي افتخر بصداقته دوما وكنا خصوما لداد لكن القلب ابيض وقمت بتعريفه بناس الاسماعيلي ناس عربوبة والطيب الرشيد ودكتور بدر وكان بجي يلعب معانا ويلتخ الدنيا كلها وامشي لانه كان لعبو نظيف وكان كلمته دايما كسير بي كسير

[خالد أحمد الصول]

ما أحلي الزكريات و ما أحلي المدينة القديمة
تذكرت أيام السينما المتجولة ... كانت تقدم عروضها مرتين في الاسبوع في داخلية الممرضات القريبة من منازلنا ... وكنا نهاجر لها هجرة فنجلس في رأس الحيطة نشاهد الممرضات مصطفات في كراسي بأدب تام يشاهدون العرض و كن لا يلتفت الي الحيطة لمراقبة الجالسين فيها ... كان يعاوننا الكبار في الصعود فوق الحائط و نكون سكوتا نستمتع باأفلام المقدمة حتي لا يقومون بطردنا فنخسر هذا اليوم الترفيهي ... و كان أقرب دكان لمنازلنا هو كنتين اليماني (بقاش)

بقاش هذا يمني حضر السودان في الزمن الجميل و أفتتح له كنتينا يبيع فيه البقالة بالقطاعي حيث يمكن أن تشتري صابونة صافي أو نصف صابونه غسيل أ نصف كل شي حسب ما تملك كما أنه أشتهر ببيع الفول المصري الذي كان من أجمل وجبات الافطار و برع في تعبئة زجاجات البيبس كولا بعد نظافتها بعصير الليمون البارد و يسد الزجاجة بفله من الفلين و تباع مبردة ... أتذكر أن صديقنا وكان من ابناء قبيلة النوبة قد أرسلته والدته لشراء زيت من كنتين بقاش فما كان منه إلا أن إشتري زيتا بتعريفة و ليمون بااارد بالاخري و عند وصوله للمنزل أستغربت والدته من أن الزيت قليل جدا و عند سؤالها له أجابها بأن الزيت شربو الهواء ... فقاده الي كنتين اليماني و نحن خلفه سيره عظيمة و أخبرها بقاش أن إبنها أشتري زيت و عصير ليمون فأرجعناه الي منزله بزفة معتبرة ذكرنا فيها عملية إحتياله ... نواصل

[mutasim]

السيره

زمان كان اخر يوم فى احتفال الزواج بعملوا سيره بالعربات وبتلف مدنى كلها ولازم السيره تجى جزيرة الفيل للجناين والعريس يقطع فرع نخيل طبعا العروس معاه وفى فسحه قدام الجنينه بقيفوا فيها ويغنوا بالدلوكه وبعدها برجعوا وفى اليوم الواحد بتجى كم سيره , وفى شباب من جزيرة الفيل بنتظروا السيرات وهججو معاهم لكن فى واحد كان بركب مع اى سيره وامشى يحضر الحفله وين ماالسيره توديه بمش مره فى الدباغه ومره القسم الاول مره الكريبه المهم لما تنتهى الحفله بمسك الشارع وجرى للجزيرة مابقيف ابدا لانه خواف قال مره لاقاه واحد فى الحى السودانى وقال ليه اقيف يازول قال اول مره اعرف ان الحتات دى بترجف بقصد ركبتيه .

[ايمن عبد الله]

من احلى الطرايف الحصلت في مدني

احتلال القسم الشرقي من قبل ابراهيم سفندريو

يا ريت العارف عنها شي يقول

حسب الحكاية انه ابراهيم جاء لقا العسكر نيام وقام شال بنادقهم ودخلهم الحراسة ودق لي الاوسط الكان بسمو الاساس وقال ليهم تعالو استلمو القسم

[سواااح]

عزيزي معتصم ..

انا الانسان بلا ذكري بقايا انسان

[mutasim]

حبيبنا سوااح تحياتى
وين ذكرياتك ادينا شويه

[mutasim]

مظاهرة
فى عام 1971 حصل انقلاب 19 يوليو بقيادة هاشم العطاء والانقلاب ده مقلب كل الناس وعمل بهدله
المهم الانقلاب استمر ثلاثه ايام وفى اليوم الثالث هاشم العطاء اذاع بيان وقال فى تدخل اجنبى وطلب من الناس يطلعوا الشارع وطلعت مظاهره كبيره فى مدنى ,كان فى مظاهرات مويده فى اليومين الاوائل لكن اغلبهم من اليساريين فقط اما مظاهرت اليوم الثالث فكانت كبيره ومشينا فيها رغم انى كنت صغير السن والمظاهره وصلت السوق الجديد وبعضهم كان يهتف الى الخرطوم ياثوار وفجاءه طلعت مظاهره ثانيه كبيره مرحبه بعودة النميرى فعرفنا ان النميرى رجع ولما التقن المظاهرتين كل الجماعه قلبوا ودخلوا مظاهرت المايويين وبقوا يهتفوا معهم ؟
طبعا تانى يوم بدات الاعتقالات واى واحد عنده مشكله مع احد بلغ عنه انه شيوعى والناس اتبهدلوا وظلوا سنين فى المعتقل من غير محاكمات وطبعا فقدوا وطايفهم .

[رامى طلبه]

الاخ معتصم ... دائما الذكريات صادقه وجميله ؟؟؟ ارجعتنا الى الزمن الجميل ... ونحن فى انتظار المزيد والمزيد وكتر الله خيرك ..

[mutasim]

الاخ معتصم ... دائما الذكريات صادقه وجميله ؟؟؟ ارجعتنا الى الزمن الجميل ... ونحن فى انتظار المزيد والمزيد وكتر الله خيرك ..

الاخ العزيز رامى نحياتى ليك غيبه
اولا انا اسف لانى تاخرت فى الرد والسبب اليومين ديل مزنوقين شويه مع الايام الصحيه العالميه
الزكريات جميله ومدنى ملايانه زكريات ومواقف جميله حصلت فيها بس شاركونا الذكريات

[هيثم صديق]

مشكورعلي هذا الموضوع الجميل والذكري العطرة و نرجو أن كلمنا عن الفطاحلة والشخصيات البارزة في شتي المجالاة وخصوصاً في الفكاه

[114]

المعتصم الرائع

شكرا للذكريات الجميلة دي في مدني الجميلة

أول مرة اعرف انو الفنان احمد فرح مات.. اسأل الله له الرحمة هو والفنان سيد خليفه

قرأت بعض الذكريات الحلوه، ومدني ذكرياتها دائما حلوه خاصة للمخضرمين امثالك وامثالي..

اعتبر ده مرور بس، وسأشارك بذكريات لاحقاً بمشيئة الله

[mutasim]

الاخ هيثم تحياتى
مشكور وانشاءالله نواصل ونرجو ان تشاركنا بذكرياتك

[mutasim]

الاخ عمر 114 تحياتى لك

مشكور على المرور بس لازم تشارك ذكرياتك الرائعه , الفنان احمد فرح توفى قل اكثر من عشرين سنه رحمة الله عليه , انا عندى شوية ذكريات عن المدرسة وبص المدرسه انشاءالله انزلها قريب تحياتى

[ودالعمدة]

اخى الكريم معتصم

قصة الذكريات فى مدنى يمكن عمل مجلدات ومؤلفات عنها
عن كل شارع وكل حارة وكل بيت بل كل فرد فى مدنى
لك التحية وأنت تنبش فينا هذه الأحاسيس المعتقة ...
معالم يذكرها الناس :- جنينة كعكاتى ( مسك الختام الآن )
ومكتبة البلدية والهيلاهوب وباصات المؤسسة والصاروخ والسريع
بين مدنى والخرطوم ، ولى ذكريات كثيرة فى نادى الخريجين
حيث كنا نمارس لعبة الشطرنج ومعى الاصدقاء حسن وداعة
ومحمد احمد سلمان والمرحوم آدم النور .. وبين الفينة والأخرى
نفاجأ بخبطة جامدة على طاولة ( الضمنة ) المجاورة وصياح
المرحوم السر كلودة ( ميطى بلاطة اسفلتاتة ) ...
وذكريات العمل فى مؤسسة أعمال الرى حيث فوجئ الموظفين
مرة بوجود أصلة فى حديقة المؤسسة ، وساعة الافطار حيث
نشرب الشاى ومعى الزين نورالدايم ومصطفى حسين الزبير
فى محطة البحوث الهيدروليكية ونحن نستمع للنجم أحمد حامد
وذكريات الملاعب مع الأهلى والاتحاد وأيام النيل فى مجدهـ .
وأذكر من الفنانين عبدالرحمن خواجة الذى يقلد عثمان حسين
لدرجة الاتقان ومصطفى أبو الجيش وغيرهم ...
وحتى عربة الجيش الانجليزى القديمة التى كان يوزع بها
الاغريقى (نسيت اسمه) عصير الليمونادة على الدكاكين ..

أخى معتصم .. تحياتى واحتراماتى

[mutasim]

الاخ ود العمده تحياتى
اولا انت الظاهر عليك من دورنا او اكبر البتزكر عربية الاغريقى انا مابتزكرها
الذكريات كثيرة كما ذكرت وكل واحد ليه ذكريات معينه عالفه فى ذاكرته والذكريات جميله واصل معانا
وما كنت عارف ان السر كلوده رحل عن دنيانا رحمة الله عليه
واصلة الرى البلعت الكلب سمعنا بيها
تحياتى لك

[ايمن عبد الله]

ود العمدة جيتني في مقتل
نادي الخريجين آه لهذا الزمن الجميل

بداية تعلمي للشطرنج كانت في جانب حديقة وقيع الله مع فرانكو وفايز جوار محمد عز الدين الذي كان يكتفي بالفرجة فقط برعت في لعب الشطرنج مما دعا ادارة نادي الاسماعيلي لتقديمي مرتين قبل الهجرة الى تمثيل النادي في عدة بطولات كانت الاولى في نادي الزهرة في رمضان عام 1996 عندما لعبت ثالث اشواطي مع البطل السابق للدورة واستطعت ان اخرجه من الدور الاول .. لكن اتنحست وخرجت من الدور البعدو طوالي حتى هو قال لي طلعتني ساي وكان ممكن اواصل احسن منك .. الغريبة الطلعني كان احوص .. وبقت نادرة لي هسة ... بقولو لي ياخي انت غلبك احوص

[mutasim]

الاخ ياسر الشايقى نقل فكرة البوست لموقع جزيرة الفيل وذكر انها فكرة منقوله من موقع ودمدنى كماذكر اسمى ورديت عليهم بانى سوف اشارك معهم فى ذكريات جزيرة الفيل مع مواصلتنا فى موقع مدنينا

[mutasim]

السلام ناس مدنى
حبينا نعود للذكريات المره دى مع الفتوة عوض بصبيص
فى اواخر الستينات كانت فى مبارة بين الاتحاد والمريخ وناس الاتحاد كانوا معسكرين فى النادى ولما ناس المريخ وصلوا مدنى وكانوا بجو ببصات الجريف لان لونها احمر وقاموا لفوا شوارع مدنى ويهتفوا ومشوا نادى الاتحاد وشغالين تهديد والمريخ كان فى القمه المهم عملوا حرب اعصاب .
وكان فى لاعب جديد فى صفوف الاتحاد وهو بابونى وبلعب فى النص واخد خانة خالد ابو لبده وخالد مش عاجبه الكلام ده ولما بدات المبارة اصيب بابونى اصابه بسيطه وطلع للعلاج قام خالد ابو لبده جرى دخل الميدان لما نادوه قال ليهم ده مات مابقدر العب المهم خالد دخل الملعب ومن اول كره من وسط الملعب احرز هدف واتبعه بالثانى المهم المبارة انتهت 3/5 لصالح الاتحاد وناس مدنى فاروا فوره شديده وقطعوا علم المريخ ومشوا مكان الاعبين فى لاعب المريخ الكبتن عبدالله عباس (العمده) ركب فى البص بقدام ووضع يده على الباب وجاء عوص بصبيص ونطه بكل قوته ومسك يد عبدالله عباس واتعلق فيها عايز يكسرها وعبدالله عباس يكورك وناس المريخ كلهم ماسكين يد عبدالله عباس وبصبيص ميت فيها قدر ماضربوه برضه متعلق فيها فى الاخر فكوه ناس مدنى ,, طبعا شباب الزمن ده مابعرفوا عبدالله عباس كان لاعب كبير وكابتن فريق المريخ , وطبعا ناس الاتحاد كانوا متخصصين فى المريخ .
تحياتى

[محمود (أبو وضاح)]

وين يا كوبروس يا فردة يا حليل زمان وأيام مدنى الجميلة بكل ذكرياتها وشخصياتها ولياليها الشجية ، ليتها تعود بكل ذلك الحنين يا معتصم ، مركز شباب مدنى ، مسرح الجزيرة ، السينما الوطنية ، سينما خواجه ، حلويات سنترال ، فول أبو ظريفة ، فول كشك ، فول آدم بنادى الخريجين ، سمك عمك حسن جاد الله ، أما عن ذكريات ود عمنا ود الصول والسينما المتجولة فلها ذكرياتها بكل أحياء مدنى ، وعمك موسى - الله يرحمه - مشهور جدا وهو أحد أعمدة وزارة الاعلام الذين رحلوا - رغم أنه السائق - إلا أن شهرته بكل الولاية فاقت الآفاق وعرفه كل الناس صغيرهم وكبيرهم فى ذلك الوقت ، أعدتنا لماضى تليد عريق وشفيف أيضا ، لك التحية والتجلة وكل الود.

[mutasim]

تحياتى اخ محمود مشكور على التعليق نحن ياخى ذكرياتنا مع بعض ماكثيره فى مركز الشباب ايام مجده انشاء الله نكتب عنها ...
وين يا كوبروس يا فردة يا حليل زمان وأيام مدنى الجميلة بكل ذكرياتها وشخصياتها ولياليها الشجية ، ليتها تعود بكل ذلك الحنين يا معتصم ، مركز شباب مدنى ، مسرح الجزيرة ، السينما الوطنية ، سينما خواجه ، حلويات سنترال ، فول أبو ظريفة ، فول كشك ، فول آدم بنادى الخريجين ، سمك عمك حسن جاد الله ، أما عن ذكريات ود عمنا ود الصول والسينما المتجولة فلها ذكرياتها بكل أحياء مدنى ، وعمك موسى - الله يرحمه - مشهور جدا وهو أحد أعمدة وزارة الاعلام الذين رحلوا - رغم أنها السائق - إلا أن شهرته بكل الولاية فاقت الآفاق وعرفه كل الناس صغيرهم وكبيرهم فى ذلك الوقت ، أعدتنا لماضى تليد عريق وشفيف أيضا ، لك التحية والتجلة وكل الود.

[محمود (أبو وضاح)]

يا ريت عشان نوثق لتلك الأيام ، وخاصة عطاء ووفاء وجهد ومجهود أستاذ الأجيال (المرحوم/محجوب عبدالمجيد) ، والذين عملوا بصمت من اداريين ولاعبين وفنانين وأهل الحى كذلك ، ثم انتقالنا بعد تأسيس إتحاد فنانى الجزيرة للغناء والموسيقى ، وذكريات المرحوم/حسن الباشا ، والمرحوم/ فابيرا ، وعمك فرح ، وكل الأخوة العازفين ، الرشيد ، يوسف وعزالدين فضل الله ، عبدالعزيز بيز ، عبدالعزيز كيرتس ، محمد نور الهادى ، عبدالله فرج ، المرضى ، عبدالعظيم (أكورديون) ، مليجى وأبنائه فايز وعصام وجمال ،

[فنجاط]

صوره حديثه للسينما الوطنية من الداخل

[mutasim]

الاخ فنجاط تحياتى
والله صورة جميلة وتثير الشجون ذكريات ياخى

[ahmed algam]

:( :( :(

:(:(

:(

[أم سماح]

يا ريت عشان نوثق لتلك الأيام ، وخاصة عطاء ووفاء وجهد ومجهود أستاذ الأجيال (المرحوم/محجوب عبدالمجيد) ، والذين عملوا بصمت من اداريين ولاعبين وفنانين وأهل الحى كذلك ، ثم انتقالنا بعد تأسيس إتحاد فنانى الجزيرة للغناء والموسيقى ، وذكريات المرحوم/حسن الباشا ، والمرحوم/ فابيرا ، وعمك فرح ، وكل الأخوة العازفين ، الرشيد ، يوسف وعزالدين فضل الله ، عبدالعزيز بيز ، عبدالعزيز كيرتس ، محمد نور الهادى ، عبدالله فرج ، المرضى ، عبدالعظيم (أكورديون) ، مليجى وأبنائه فايز وعصام وجمال ،
يا حليل زمان وأيام زمان
حفلات أبو الكيلك وتحيز ناس دردق له وأغنية التحسر
ورحم الله فابيرا فقد كانت له أنامل متفردة فى الايقاع وصوت عجيب

[mutasim]

يا حليل زمان وأيام زمان
حفلات أبو الكيلك وتحيز ناس دردق له وأغنية التحسر
ورحم الله فابيرا فقد كانت له أنامل متفردة فى الايقاع وصوت عجيب

السلام
ام سماح اظنك من جيلنا اللى متذكره الزمن الجميل واغنية التحسر تحياتى لك وللاخ ابو الكيلك

[samia]

تُشكر أخ معتصم علي هذا الكلام الطيب وأصالة الناس في ذلك الزمن الجميل ،، والله وبالجد تمنينا ذلك يعود،، ربنا يهدى المسلميــــن

[أم سماح]

السلام
ام سماح اظنك من جيلنا اللى متذكره الزمن الجميل واغنية التحسر تحياتى لك وللاخ ابو الكيلك

يا شيخ حرام عليك .. القال ليك منو من جيلكم
نحن شن جابنا لجيلكم وعليك الله تانى ظن ليك ظنا عديل

[محمود (أبو وضاح)]

مشكورة الأخت أم سماح والأخوة الأفاضل أهل المنتدى ، لازلنا نحلم أن تكون مدينتنا أجمل المدن وأفضلها ثقافة وفنا وهل يسعفنا الزمن أن نكون حضورا لنشهد عودتها الى تلك الأيام ، حلمنا مشروعا لنعيد لها ألقها وبريقها ورونقها بفضل أهلها الأماجد ولكم خالص ودى وتحياتى.
محمود ابوالكيلك

[mutasim]

ذكرياتى فى اكتوبر1964
كنت فى سنة ثالثة ابتدائى بمدرسة جزيرة الفيل (مدنى) عندما اندلعت الثورة والمظاهرات كانت بوسط البلد شاركت بها كل المدارس ونقابات العمال واخيرا كل الشعب ماعدا مدرستنا الناظر رفض اقفال المدرسة رغم امتعاض بعض المعلمين ,
وفى يوم دعينا لطابور طابور طابور كل المدرسة وقفت طابور ووقف الناظر والمعلمين فى البرنده وجاء استاذ وسالنا ليه الطابور قلنا ليه عايزين نمشى المظاهرة وكنا مصرين رغم صغر سننا فرفض وقال انتو صغار لكن مادخلنا الفصول والساعه 12 ظهر طلعنا نجوب شوارع الجزيرة مظاهرة ونهتف بعد ماتعلمنا بعض الهتافات وهى

لن تحكمنا حكومة سكينة العملته فينا.
فشرة فول ولا المقبول.
طلعت طلعت تطلع روحه
وبعدها اهتم بينا استاذ ثائر معروف وهو السر محمد فضل :ان شخص مثقف جدا وهو استاذ الفنان محمد الامين بمدرسة البندر ومن علمه العزف على العود واستاذ الفنان راشد دياب وكان مسمى راشد راشد الفنان كان متوقع ان يصبح فنان وفعلا ,
وبدا يعلمنا الاناشيد بواسطة العود اناشيد الاستقلال وبعدها اصبح الصبح يومى .
واثناء المظاهرات اصيب مواطن بطلقة واستشهد وحمل المتظاهرون قميصة فى المظاهرة ممازاد قوتها اعتقد ان اسمه ابوعبيده رحمة الله عليهم جميعا شهداء اكتوبر ..