ركن نقاش بعنوان : تخيل كيف يكون الحال لو ما كنت سوداني

[عاطف عولي]

كنت ح تلتزم بالمواعيد - كنت ح تدفع فاتورة المحامي أو الطبيب قريبك - كنت قاضيت المهندس اللي خرب ليك بيتك - كنت عملت مشروعك بنفسك دون محاكاة - كنت بدأت دوامك في الموعد المحدد - كنت ح تنطق حرف أل (ق ) و أل ( غ ) كما ينبغي وما كنت ح تقول للتسعة تزعة - كنت بطلت تسف سعوط- كنت صرت متخصص وعالم في مجالك - كنت ح تلبس شيك جدا عند خروجك أمام التلفاز وأجهزة الإعلام - كنت تتحدث بطلاقة وانسيابية بدون أ أ أ أ أ أ– ولو ما كنت سوداني كنت عرفت إن بالدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك و درست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالذات يعنى اخنق فطس.. كنت ح تتصل بالتلفون قبل زيارة أحد في منزله بدري شويه, مش و أنت في خشم الباب ده طبعا لو اتصلت وما جيت داخل ذي قدر الله بدون حتي ماتدق الباب وتدقوا ليه؟؟مش في سلك تجروا وتدخل!!بدون مراعاة لحرمة البيت ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي أولادك ورافع لي ناس البيت الضغط والسكري....كنت ح تتوقع يحصل شنو لما ترقد طفلك الصغير بدون بالمبرز في سرير في بيت ناس!!وأولادك الأكبر شوية يعملوا شنو في نباتات وإزهار الناس التعبانين عليها وزارعنها وراوينها بي دم قلبهم ..والطامة ألكبري لو كان عندهم حوض سمك ...
و كنت ح تتردد في أخذهم معاك المرة الجاية لنفس البيت, علشان يبهدلوه مرة ثانية...كنت ح تتردد في إعطاء رقم تلفون أو عنوان شخص ما.. دون إذنه أو حتي سؤاله إذا كان عندو رغبة يتواصل مع الناس ديل أو مفهمهم انو ما عندوا تلفون من اصلو بدل تورطوا وتحرجو كده!!!.وكنت امتنعت عن السماح بجلوس طفلك الرضيع في المقعد الأمامي على حجر والده أو والدته ولمن يحصل حادث الحبيب يأكلها لا لذنب جناه سوي انو اهلو سودانيين!!...كنت ح تترد في زيارة شخص ما.. أنصاص الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملوا ليك العشاء علي أمل انك تمشي وتخليهم ينوموا وأنت برضو قاعد تبرأ فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!!ولو ما كنت سوداني...كنت ح تخلي الصغار في البيت عندما تكون المناسبة مناسبة كبار..-كنت اتونست بصوت معقول, خصوصا' عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الأخر ساكت...كنت امتنعت عن التدخين في منزل شخص أخر, أو على الأقل استأذنت قبل ما تولع...كنت ترددت في إرسال حاجات وزنها خمسة كيلو و ما فوق مع كل من تسمع بأنه ماشي السودان...كنت رجعت القروش الاستلفتها في وقتها, أو في الحقيقة رجعتها و بس..كنت امتنعت عن زيارة احدهم في مكتبه , للونسه أو مناقشة أمور لا صله لها بالعمل كنت خجلت من عدد المس كولات التي تعملها, مش كمان تقول 'شنو يا فردة, خمسه مسكولات ما ترد عليها؟ و الله إلفيك أتعرفت'.....كنت ح تقعد في صالون الناس بدل تلوص في البيت كلو..كنت ح تبطل التحشر في خصوصيات الناس وتعمل الحالة واحدة وتدي نفسك الحق تسأل اى سؤال يخطر في مخك( لو كان في يعنى) ..كنت ما ح تمشي مستشفى الولادة وتقعد تحقن النسوان ألفى العنبر كلهم والله عيب كبير يا سودانيين أصلا ما شفت غيركم بتحاوم في عنابر الولادة وكمان معاها هرجلة وإزعاج ..أصلا انتو البوديكم شنو مستشفي الولادة؟؟ عشان تودو نسوانكم اوكي آمنا بالله طيب اقعدوا في الاستقبال لازمته شنو الحوامه في العنابر يعني حبكت تباركوا للام استنوا لمن تطلع في البيت أما لو كانت أختك أو زوجة أخوك يا ريت الزيارة تكون من طرف الاوضة وتتوكل علي الله ... ولو ما كنت سوداني كنت بطلت تطلع بالعراقي والسروال والسفنجه وراسك مكشوف وصوتك يجيب الطاش..لو ما كنت سوداني ما كنت أكلت ميراث إخوانك الصغار واستوليت على بيت أبوك لي يوم يبعثون عشان بس أنت الكبير!!ولو ما كنت سوداني كنت ابتكرت في خريطة بيتك بدل تشف حقت صاحبك بالكربون وكنت استثمرت في حاجة غير الركشة !! ومحلات الاتصالات !!لو ما كنت سوداااااااااااني ما كنت سوقت معاك كتيبة وأنت ماشى المطار وما كنت عملت الضوضاء والغوغاء العجيبة البتعملوها في المطارات ولابسين الجلاليب والبراطيش ورأسكم كاشف وفي أحسن الأحوال لابسين طاقية ويوم تحبو تقشرو تلبسوا مركوب نمر يقزز .. ونسوانكم معنكشات بى دهب البيت كلو ولابسين الأحمر والأخضر والترتر وزفة ألوان ما شوفناها حتي في اعتي صحن سلطة ده غير شباشب الظار البرتقالي والليموني وهلمجرا وشفعكم يكوركوا ويتساككوا ده غير التحنيس والدناءة عشان يمشوا ليك الوزن !!! ولو ما كنتو سودانيين كنت قعدتوا محترمين في الطيارة وما قرفتوا المضيفات بي الطلبات والأصوات والمشية والجيه والهمجية وبكاء الشفع والشنط والكراتين والصفائح الداخلين بيها الطيارة والأصوات العالية والجلاليب الشربانه وما كان نسوانكم غيروا التياب في الطيارة وما كنتوا فكيتوا الأحزمة ووقفتوا قبل الطيارة تنزل..لو ما كنت سوداني ما كان ممكن تدخل في زول شمال وتقول ليهو راتبك كم؟؟؟؟ولو ما كنت سوداني ما كان ممكن تفكر انك تمشى عرس بتاع ناس وتكيف بكل بجاحة تصور العروس بى موبايلك وأنت ما بتقرب للعروس ولا حتى بى حواء وآدم بدون ما تسأل نفسك منو؟ الاداك الحق ده في اختراق خصوصيات الناس ومنو السمح ليك تدخل وتتعشى وتصور!!!! ..ولو ما كنت سوداني ما كنت طلعت من شغلك ولمدة تلاتة أيام وسبت المراجعين يتبهدلوا عشان حبوبة جار جاركم ماتت عن عمر يناهز المية وشوية والبكا جاى خبر من الشمالية.. والمراجعين برضو لو ما كانوا سودانيين ما كان سكتوا عن حقهم وكل يوم يمشوا ويجو المؤسسة عشان موضوع تافه ما بياخد اكتر من عشرة دقائق!!! لو ما كنت سوداني كنت استفدت من غربتك وأمنت مستقبل أولادك وقدمت استقالتك ورجعت بلدك بي كرعينك مش بالصندوق..لو ما كنت سوداني ما كان كل يوم جاييك تلفون رسل وجيب وحول عشان هم يقعدوا يأكلوا في حقك لا شغل لا مشغلة ويشتغلوا ليه؟؟كفاية عندهم سوداني مغفل زيهم يرسل بدون تفكير ..ولو ما كنت سوداني مستحيييييييييييييييل تدى أخوك يبنى ليك بيتك وترجع بعد خمسة سنين تلقاه لسه ما حفر الساس ولو سألتو عن القروش الحولتها طول السنين دي يزعل منك ويخاصمك ويعملها حكاية طويلة وعريضة ولو ما كان اهلك زااااتهم سودانيين ما كان غلطوك وطلعوك أنت الكعب!!وجبروك تسكت عن حقك وطلعت من الموضوع بي أزمة نفسية!! صدقني لو ما كنت سوداني كانت حياتك مشت بى أريحية ونظام ورااااااااحة كانت مجاملاتك ح تكون حلوة وفى حدود المعقول بدل كل يوم جاري ولاهث من بيت لي بيت في الفارغة والمليانة!!..كنت نمت لما تحب وتصحي لمن تحب..كنت أنت القررت مشروع زواجك بمن تحب بدل القبيلة كلها تقرر معاك..ويجزموا بأغلظ الإيمان انو فلانة هي البتناسبك !!!عرفوا احتياجاتك كيف؟؟ميولك كيف؟؟طلبك كيف؟؟ أنا ما عارف!!!!!. كنت سميت أولادك الأسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبوا الأم ابسط الحقوق انها تسمي الكائن الكانت شايلاو تسعة شهور وتعبانه فيهو ده!!! .كنت استمتعت بإجازتك وبى وقتك وحياتك بدل كل واحد يديك الفتوى ألفى دماغوا..لو ما كنت سوداني كنت حتكون سيد نفسك وووووووووووووووووووووووووووووووووووووو.

**********************

الرجاء إضافة وجهة نظرك....


كنت حسنت أسلوبك شويه ..وقلت كلام حلو (إضافة ومشاركة)

الله لو ماااااااااااااااكنت سوداني (أمنية عزيزة)

كنت ارتحت من المجاملات التلفت أعصابي دي (أحلام يقظة)

كنت خليت أسلوب الأمر والنهى (مشاركة)


كنت اهتميت بى أولادك اكتر من الضيوف يا زول "إضافة"

كنت استمتعت بى ماهيتي برااااااااااااااااااااااااااااااااااااااااااااي " واحد موجوع"

علي الطلاق بالتلاتة لو ما كنت سوداني كنت رجعت السودان !!!!!!!!! "أفهموها براكم"

لو ما كنت قشرا ني ما كان ضغطي ارتفع من مناظر القشرانيين المبهدلين البشوفهم في الشارع (واحد قرفان)

لو ما كنت سوداني كنت ارتحت من القناة السودانية المشغلاها مرتي ليل ونهار وكنت ارتحت من الألوان النارية بتاعت المذيعات واهم حاجة كنت ارتحت من المذيع الاسمو اساااااااااامة الخليفة((واحد مستاءءءءءء من تلفزيون السودان))

يا أبو الشباب أسامة الخليفة برااااااو؟؟؟وإيمان ......... ((استغفر الله العظيم)) وغيرهم وغيرهم والهبل بتاعين فرق الكوميديا القائمين ليهم في عباطة جديدة ديل والأماكن الاعبط البصوروا فيها والوساخة وعربات الكارو والركشات ووووووووووووووووووووووووووووووووو الوجع كتيييييير((واحد ممغوس))


كنت ح أنوم في سريري!!!ما تستغربوا !!! طول الوقت كان معانا ضيوف مأخدين سريري "واحد مغيوظ"

كنت..... ولأ مافي داعي.(واحد خواف)

كنت ح تهتم بمظهرك وأنت حايم في الشارع مبهدل ومنظرك لا يوحى لأي شخص باحترامك "إضافة"


تلفزيون السودان وإذاعة امدرمان,معظم فناني السودان
هلال مريخ ,السعوط,السوق للشعبي , االعراقى مع السروال,
الحاجات دى بتجيب لي الطمام .نسيت أهم شئ :الكوز المعفن دا بجيب الطراش زاتو





(الأخ السودانى الكريم..... لو تذكرت أي عيب فينا أرجو إضافته مشكوراً لا لكي نفضح أنفسـنا و لكن لكي نرى أنفسـنا
بوضـوح و شـفافية )



الفكرة بريدية محسنة مع التصرف

[تغريد]

لو ما كنت سودانية كنت ح أرجع البيت وجريدتي مطبقة بي عناية في محلها بدونما جاري في المواصلات يقراها ويكرفسها وكمان يدي فردة جريدة ليي جاروا عشان يشوف اخبار الرياضة

[حاتم مرزوق]

الأخ الحبيب عاطف عولي

لك التحية،

قرأت الموضوع مرتين علي أمل ان أجد فيه بعض التجني ولكن ... لم اجد سواء الحقيقة المرة التي يجب تقبلها ومواجهتها بكل شجاعة وبدون ان زعل ...

مررت علي كل مشهد من هذه المشاهد ووجدته اما انه يطابق حالي او حال من أعرفه خصوصاً مسألة الميراث الذي (يحنط) لأجيال وأجيال قادمة.. دون ان يعطي كل ذي حق حقه بحجة ان هذا بيت الأسرة متناسين الشرع تماماً حتي اصبح الموضوع من المواضيع مخجلة الطرح.

ما يسمي (بالأتكالية) .. طالما ان هناك من يدفع فلا داعي ان نعمل .. والغريب في الأمر الشُكر ... نحن احسن من نشكر انفسنا :

نحن احسن ناس بنتكلم انجليزي
واشجع ناس
واكرم ناس
والعب ناس في الكورة
وجامعة الخرطوم احسن جامعة في العالم

وتبخيس حاجات الناس

اي شهادة من روسيا يجب تعديلها ... روسيا وين ونحنا وين؟

و موضوع الأستدانة دا براهو عايز بوست.. اياك ان تطالب بأرجاع الدين ...

كل هذه الأشياء يجب تغييرها ..

والموضوع فعلاً جدير بالمناقشة.

[الملكة اسماء ( ام محمد )]

تعرفوا ........

شجاعة انكم تناقشوا عيوبنا قدام العالم كله ...

لكن سؤال :
هل في غيرنا عنده القدرة على الكلام في ( اوجاع وطنيته ؟)

والا في اسواء مننا ,لكن شغالين بنظام ( ماتخلي جارك يسمع وصيتك لولدك )!!!

[تغريد]

مساؤينا كتييرة
ولما نعاين لي عيوبنا بقصد تسليط الضوء ومعالجة الموضوع يبقي دا نوع من الرقية الواقعية لانفسنا فيكون الشخص هو الذي يعالج نفسه بنفسه

[عاطف عولي]

نشكر اصحاب المداخلات في ركن النقاش.

د. تغريد.


أ. حاتم مرزوق.


أ. أسماء.

والفرص مفتوحة للنقاش.

[حاتم مرزوق]

يجب ان لا ندفن رؤوسنا في الرمال ودس العيوب لا يحل المشكلة بل مواجهتها بكل صراحة ووضوح وفي الضؤ والا كيف يعلم الناس بمساويهم.

الحمد لله انها سلوكيات تحتاج الي تغيير والمعروف عنا من امانة وصلة للأرحام وتواضع وقناعة يوازن بين كفتي الميزان ولكننا نريدها راجحة بعون الله.

[عوض صقير]

لو ما كنت سودانى


كنت ح أستغرب جداً لبلد تصبح مصدرة للبترول
ومواطنها يزداد فقراً وسوءاً يوم بعد يوم .....



لو ما كنت سودانى

كنت طالبت بشدة بتفعيل قانون من أين لك هذا ....

[أبوريلان]

حقائق تغيظ يا عاطف لكن نقول شنو ده قدرنا سودانيين حتي النخاع .

لو ماكنت سوداني ما بسافر بسودانير وأتمرمط بمطارات العالم .
لوماكنت سوداني ما بسافر السعودية عُمرة وزوقة .
لوما كنت سوداني ما بشتري فيزا بمهنة تربية مواشي .
لو ماكنت سوداني كنت أعمل تجديد الجواز كل 10 سنوات .


شكراً يا عولي .

[درديري كباشي]

قصدك شنو يعني يا (عوض ) يعني ننتحر نريحك مننا ولا كيف ..

هو انت شايل مننا الكلام دا كله وكاتم ..


والله اول مرة اعرف انه نحن غياظين للدرجة دي

وزي ما قال حاتم انا كمان حاولت امسك واحدة واغالطك فيها او اقول ليك ما كل الناس كدا لكن ما لقيت ....

لكن موضوع بمواصفات سلك العدة

تعالوا بس نكرش يا لمعناها يا قديناها مرة واحدة

[عوض صقير]

قصدك شنو يعني يا (عوض ) يعني ننتحر نريحك مننا ولا كيف ..

هو انت شايل مننا الكلام دا كله وكاتم ..





تقول شنو يا أبو الدر يا أخوى .... نحن ما شعب طييييييييييييييييييييييييب شديد
( الـ غ ن م ا ي ة تأكل عشانا ..... والآن ا غ ن م ا ي ة ذاتها بعد التقدم الأقتصادى أصبحت لا عشاء ولا غداء ! ) ......

[مايسة]

لو ما كنت سوداني

ما كان جاء واحد فلسطيني ولا غيرو قال ليك انتو السودانيين هبل - من طيبتكم

مش دي حاجة غريبة يا جماعة - زمن تبدلت فيهو المفاهيم - الطيبة بقت هبالة :confused:

[مجاهد النور محمد]

لقد قرات هذا الموضوع الذي اراة لا يعبر عن انتقاد بل النظر الي النصف الفارغ من الكوب , الاخوة في المنتدي لكم التحية لا ادعي باننا شعب كامل الدسم ولكن عندنا قيم اهم بكتير من القلتو مع العلم انو الكلام دة مابيشمل كل السودانيين
واقول لكم
لو ماكنت سوداني ماكنت حاارد علي كلامكم دة ولو ماكنت سوداني ماكان لقيت اهل الحلة والفريق والجيران واخيرا الاهل في الشدائد والمحن قبل الافراح ولو ماكنت سوداني كان ضاعت مني شهامتي ولو ماكنت سوداني كان مالقيت في رمضان ناس الحلة كلوم فاطرين علي الظلط ولو ماكنت سوداني ما كان بقيت المامون علي بنوت فريقو
انا الدود ان كمن للزول بعيقو
وانا المامون علي بنوت فريقو
لو ماكنت سوداني كان كان مشيت وراسي لي تحت من الانكسارة لو ماكنت سوداني كان عرفت معني العيشة من دون تكافل اجتماعي لو ماكنت سوداني كان نسيت اهلي وامي وابوي وخالاتي وعماتي واقتصرت ماهيتي علي براي ولو ما كنت سوداني كان ماعرفت النفاج
ود باب السنط والدكة والنفاج
والحوش الكبير والساكنين افواج
واللمة التي ربت جنا المحتاج
والنار الدغش والريكة جنب الصاج
ولو ماكنت سوداني كان خونت اخوي ود امي وابوي علي عرضي وكان وكان وكان وكاااااااااااااااااان ولو ماكنت سوداني كان حاجات كتيييييييييييييييييييييييييرة وحاجاااااااااااااااااااااااااااااات
وتصووووووووووووووووور كيف يكون الحال
لو ماكنت سوداني واهل الحارة ديل اهلي
وكان ماجيت من زي ديلا وآآآآآآآآآآآآآسفايا
وآآآآآآآآآآآآآآآمأساتي وآآآآآآآآآآآآذلي
ولي عودة للموضوع

[بنت الرفاعي]

عفوا هل كل الشعب السوداني يتصف بهذه الصفات ؟؟؟:confused::eek: بالتأكيد لا !!:rolleyes:

ولو ما كنت سودانية كنت حأتمنى لو أكون سودانية
ولو ما كنت بنتو كنت حأتمنى لو أكون بنتو وأنا زي ما أنا :)



وتصووووووووووووووووور كيف يكون الحال
لو ماكنت سوداني وأهل الحارة ديل أهلي
وكان ماجيتَ من زي ديلا واااااااااااااااااا أسفايا
واااااااااااااااا مأساتي وااااااااااااااااااا ذلي





ومهما كانت سلبيات مجتمعنا ما بتكون أكثر من تلك التي في بقية المجتمعات .
ولكن هل لتلك السلبيات أن تصبح إيجابية ذات يوم ؟؟!!!!:)

[عاطف عولي]

الإيجابيات مسلمات

النقد الذاتي للنفس.

ما لمقصود به؟

جاوب عليه المتدخلين.

نحو الامام نسير لابد ان نقول لي الاعور يا اعور وان نتوقف بشكل دائم امام المرايا عشان ما ينطبق علينا مثل ( الجمل ما بعرف عوجة رقبتوا)

تعتز بسودانيتنا ولا ندعي الكمال.

ننقد ذاتنا وما ندي فرصة للاخرين بنقدنا.

مجرد راي

[محمد حسين (المميز)]

:rolleyes::rolleyes::rolleyes:


رغم العملتيهـو فينــا:o


وفي النهـايه ما برضى فيك يابلــد:):)

[مجاهد النور محمد]

اتمنى و افتخر باننى سودانى لكى اعالج كل المفاهيم الخاطئه التى تسببتم فيها رغما عن ارائكم المحرجه والمخجله عن الهويه السودانيه التى نعتز بها عند سماع اى مدح عن السودانيين وماتبقى شئون بيت داخلى فى طريقها للزوال 00 اضافه



لو ما كنت سوداني : ما كنت قريت الكلام دا، و كنت بقيت أناني و كذاب و نصاب و بخيل وجبان ، وكنت عمري ما مشيت السودان تاني، وما كنت بنيت بيت في السودان، وما كنت حاولت اظهر بأحسن مظهر لعكس صورة أفضل عن السودانيين، و ما كنت قريت عن أعلام سودانيين زي (الياس باشا، و محمد احمد المحجوب، و الطيب صالح، ومحجوب عبيد، و محمد عبد الحي، و عبد الله الطيب، و محمد الأمين، ومصطفى سيد احمد، وووووووو من اللي ما سمعنا عنهم وما تعبنا نفسنا نعرفهم و نستفيد من العملوا لينا)، لو ما كنت سوداني ما كان بديت بالتغيير من نفسي، و ما كنت التزمت بكل الصفات الجيدة ( عكس الصفات أعلاه )، وما كنت استحملت واحد فيه صفه من الصفات دي و بيعمل التصرفات دي،لو ما كنت سوداني ما كان لقيت ناس تفطر الصايم في الشارع و تفتح بيوتا في العيد لكل الغاشي و الماشي، لو ما كنت سوداني ما كنت لقيت أهل الحلة كلهم صغير و كبير و مرة و راجل واقفين معاك في وقت الحزن قبل وقت الفرح، لو ما كنت سوداني ... ما كانت بلدك اكبر بلد عربي و أفريقي، وما حيكون عندك مليون ميل مربع اغلبا صالح للزراعة، و لا حيكون عندك نيلين و لا مقرن، ولا كان حتقدر تزرع شجرة في أي مكان و تلقاها مثمرة و بتكبر من غير ما تتعب فيها،

ولو ما كنت سوداني... ما كان حيكون في بلدك بترول ولا يورانيوم و لا دهب و لا كمية كبيرة من المياه، و لا أراضي زراعية ( ممكن تقول من غير فايدة !!!!!!! بس أتذكر دا معناهو انو العيب فينا نحنا ما في السودان !!!!!!!!) لأنو في دول كثير بقت من الدول الكبرى بي اقل من كده !!!!!!

لو ما كنت سوداني.... كان اتبريت من جنسيتي، وما كان سمعت كلام كل الناس الغير السودانيين وهم يشكروا في طيبت السودانيين، وصدق السودانيين، و أمانة السودانيين، وحبهم للسودانيين ( و كل اللي عاش في السعودية، الأردن، مصر، أي دول عربية أكيد حس بي مشاعر الشعوب دي تجاهنا)، لو ما كان في سودانيين ممتازين على مر التاريخ ما كان دي صورتنا بره، لو ما كنت سوداني...... أكيد ما كان طلبت من كل اللى حيقرا المداخلة دي يبدأ بالتغيير من نفسه، و يبطل نقد للآخرين بينما هو محتاج لي نقد ذاتي وتغيير داخلي، و يبدأ فورا يبطل أي عادة غلط ( ويا ريت لو يكون السعوط أول حاجه ) و بالمناسبة كل الصفات السيئة دي ما محتاجه إمكانيات و لا محتاجة لي حكومة و لا دوله تغيرها ...... و ما حتقدر أي حكومة تعمل كده مهما بلغت من قوة و تنظيم.........

محتاجه بس لي التزام داخلي، واحترام للنفس، و ضمير صاحي، واهتمام بالتفاصيل، وحبة ذوق و تقدير لظروف و مشاعر الآخرين، و احترام قيمة الوقت وقدسية وقت العمل بالذات.

مع احترامي و تقديري لكل السودان الوطن، و السوداني العزيز ( رغم الوضع الحالي، اللي حيتغير إن شاء الله ).

[محمد الجزولى]

العزيز عاطف عولى
لك التحيه والاشواق الكتار
بالجد اعتز بسودانيتى وبشده
ولكن فعلا اننا شعب نحتاج الكثير والكثير للنهوض بالسودان ..
واسمح لى والاخ مجاهد ان استعير عباراته الاخيره
( محتاجه بس لي التزام داخلي، واحترام للنفس، و ضمير صاحي، واهتمام بالتفاصيل، وحبة ذوق و تقدير لظروف و مشاعر الآخرين، و احترام قيمة الوقت وقدسية وقت العمل بالذات.)
عليك الله تانى فضل شنو؟؟؟؟

[MASS77]

انتو الما سودانيين ديل الجابم المنتدي شنو
بعدين اعتز واتشرف باني سوداني
ومتاكد كل العلقو بي الكلام الغريب ده بره السودان مغتربين او جوه ومعارضين
يا اخوان الفهم ماكده السودان ده الخلاكم تتفلسفو عليو علمكم وطلعكم لي بره اريتكم لو كنتو فلسطينيين او صوماليين او حبش كان عرفتو الفرق السودان ياهو بلدنا ووطنا البي اسمك كتبنا ورطنا
احبك
مهما قلتو ما بتغيرو بعدين الما عاجباهو البلد دي اللخليهاوالبره ما يجيها
والله حرام عليكم

[عاطف عولي]

سوداني الجوا وجداني بريدوا

ما بفرط فيه تاني وما ببيعو لامريكاني بريدوا.


معليش اخوانا ماس ومجاهد كل الدخلوا سودانيين حتي النخاع ويموتون عشقآ في وطنهم وكيانهم والموضوع ببساطة شديدة نقوم بنقد ذاتنا ونحن نحاول رسم الصورة المثلي لكل سوداني نتفق معكم في كل اليجابيات التي ذكرت.
ولا نستطيع ان ننكر ان هناك سلبيات والغريق قدام.

لكم كل الود علي مداخلاتكم التي ولا شك تثري النقاش

[محمد حسين (المميز)]

سوداني الجوا وجداني بريدوا

ما بفرط فيه تاني وما ببيعو لامريكاني بريدوا.


معليش اخوانا ماس ومجاهد كل الدخلوا سودانيين حتي النخاع ويموتون عشقآ في وطنهم وكيانهم والموضوع ببساطة شديدة نقوم بنقد ذاتنا ونحن نحاول رسم الصورة المثلي لكل سوداني نتفق معكم في كل اليجابيات التي ذكرت.
ولا نستطيع ان ننكر ان هناك سلبيات والغريق قدام.

لكم كل الود علي مداخلاتكم التي ولا شك تثري النقاش




ياســـــــــلام عالكــــلام

أكتفي بما ذكـر الاخ عاطف

ردا على الاخوه ماس ومجـاهد

[ميزو]

انــــــــــا سوداني

[عاطف عولي]

انــــــــــا سوداني



وسوداني انا