ضيفتنا هذه الاسبوع المتألقه (( ميدو ))

[aborawan]

هي عضوة تألقت من خلال مواضيعها رغم قصر المدة الزمنية التي التحقت فيها بالمنتدى ونجدها دائمة متابعه لمعظم المواضيع في المنتدى فمرحباً بك وسهلاً

اختي المتألقة ( ميدو )




كما هي العادة في البداية تعريف بالبطاقة الشخصية

[مزوني]

اولا نرحب بالاخت ميدو
ومادام انها لسه ما ردت على السؤال
نديها فرصة شوية
مع اني حااكون منتظرها بفارغ الصبر
لأني ساكن في مايو ومتواجد بها حاليا

[medo]

الاسم\ ميدو وبس
العمر\ 18سنه
المهنه\ طالبه جامعيه
السكن\ الخرطوم وحاليا مقيمه في السعوديه
الهوايه\Reading&drawing&miusc

[زيكو منيب]

الاخت ميدو برحب بيك و بسالك

ما هي الكلية التي تدرسينها؟ ...

و ما رايك بالجامعة بصفة عامة ؟

[ابو الدهب]

لماذا ميدو بلتحديد وهوعلي ما اعتقد اسم دلع للأولاد

يعني اسمك مشفر وللحجب

وفي اي كلية تدرسي والدفعة كم

اعزريني لأني مفوت كما قلت

وتحيااااااااااتي

[medo]

تحيه طيبه اخي الكريم
انا بدرس هندسه حاسوب
اما عن سؤال راي في الجامعه فاالجامعه عباره عن مجتمع كبير متعدد الاشكال ومتنوع المواهب والثقافات ولها دور كبير في تقدم المجتمع والارتقاء به\\\\\\

[medo]

اشكرك اخي علي السؤالين اولا اسم ميدو ينفع اولاد وبنات وانا من ماكنت صغيره بنادوني باالاسم ده وعن اسمي الحقيقي سبب احتفظ به لنفسي \المعذره\
2\ السوال التاني
انا بدرس هندسه حاسوب سنه اولي ------------

[aborawan]

غاليتي ميدو يديك العافية وبماانك عايشة في السعودية وبتدرسي في السودان
اين اكثر مكان تجدين فيه نفسك ؟ السعودية ولا السودان ؟؟

ومارايك في المجتمع هنا والمجتمع في السودان ؟؟؟

[ahsar1970]

الأخت/ ميدو

التحية لك وأنت ما زلت صامدة في الكرسي

دعيني اخمن اسمك أولا"

مودة ؟ ولا أنا غلطان
سؤالي هو :-

كما ذكرت بأنك عشت معظم سنبن عمرك في بلاد الغربة ، هل وجدت أي اختلاف بين الحياة في السودان وهناك؟ :

[حلوه واموره]

مرحبا بك اختي ميدو على الكرسي

حدثينا عن بعض المواقف الطريفه التي حصلت لك وانتي في الجامعه

وهل انتي اخترتي انك تدرسي هندسة حاسوب ام لم تختاريها بنفسك

وشكرا

[medo]

شكرا ابو روان
سؤالك بجاوب عليهو بردين اولا اجد نفسي في السعوديه لاني عشت اجمل ايام طفولتي في السعوديه =-----
واجد نفسي في السودان لوجود الاخوان والاهل ولانو وطني الغالي وطبعا دراستي هناك----------
-------------------------------------------------
اما عن سؤال المجتمع هنا في السعوديه علي حسب ماتكيف نفسك معاهو كاكل مجتمع جديد اوبيئه حديثه بالنسبه ليك يعني ممكن اكون عادي معاك وممكن اكون ممل بالنسبه ليك-

---------------------اما السودان فمجتمع جميل ومسالم ومترابط وبسرعه لوكنت جديد بتتاقلم معاهو وفي النهايه هو وطنك العزيز الجميل بي خضرتوواشجارو وناسو واهلنا الطيبين:)

[medo]

شكرا اشر
انت امكن قربته لي اسمي واصل علي التخمين وانشاء تصل--------
الحياه في السعوديه مختلفه تماما عن الحياه في السودان والاتنين فيها السلبيات والاجابيات معا-----------

[medo]

شكرا علي سوالك الحلو والامور زيك

اما عن الطرائف فكثيره وحااقوله لما اذكره فيمابعد

وبي خصوص الهندسه فاكانت رغبتي وخالي مهندس شجعني عليها اكتر ولان الحاسوب هولغه العصر واي حاجه بقت باالكمبيوتر والانوممتع وبوسع الافاق والمعرفه والذاكره ودي السبب في دخولي المجال ده وحبي ليهوووووو----------------------------------------




:) :) :)

[aborawan]

يلا يا ميدو المشرف العام في منتديات ودمدني سلمك زمام الامور في المنتدى لمدة 24 ساعة وليك حرية التغيير والاختيار على كيف كيفك يا ريت نعرف الاشياء الممكن تعمليها وانتي صاحبة الامر في كل شئ ؟؟؟



برضو ادوك وردة وقالو ليك اهديها لعضو من المنتدى منو في رايك بستاهل انو تتهدي ليه وردة ميدو دي ؟؟؟ ( اوعا من الزوغان ولا الدبلوماسية :D كل الناس هنا حبايب عارفين:):) )

[ابومرام]

الف مرحب بيك اختنا ** ميدو**
نحن الغياب اصبح لينا شي طيبعي لكن نقول الحمد لله
سؤال بسيييييييييييييييييييييط جدا
شنو رايك واني تتقلدين احدى المناصب التالية :_
وزيرة تربيةوتعليم :::::::
وزيرة ثروة حيوانية ::
ولاية الجزيرة ::
رئيسة اتحاده المراة:
مديرة الخطوط الجوية السودانية
مديرة سوداتل ولاية الجزيرة
ولكي تحاتي وربنا يعينك على الجماعة

[medo]

اولا شكرا علي الثقه ابوروان--------

ثانيا\افتكر انو مافي حاجه ناقصه المنتدي عشان اعملها والمشرفين كفوا وفوا ولهم منا جميعا الشكر الجزيل--


والورده اهديها الي الغاليه روان- :D :D

[medo]

لك الشكر ابومرام
ثانيا بالله ده سؤال بسيط جايب لي سوال مركب من سته اسئله
1\مااخلي خروف اطلع من البلد لو ما الناس اتكفوا-
2\ارجع مشروع الجزيره زي ما كان زمان----
3\نتضامن جميعا من اجل السلام في السودان===
4\اغير الوان الاصفر الشين ده واغير الطاقم كلو وخاصه المضيفات= :mad:
5\اوزع موبايل لكل مواطن في الجزيره ==========:cool: ;) :p

[أبوريلان]

الأخت مياده

أولا أرحب بيك فى منتداك منتدى مدنى الناس الحنان وآسف لظروف خارجه عن إرادتى جاء الترحيب متأخر لعدم دخولى المنتدى منذ شهور .

ثانيا : أتمنى أن يكون الكرسى بردا وسلاما عليك ، وما شاء الله عليك حتى اللحظة متفوقه على الكرسى .

ثالثا : سؤالى ليك : لو كنتى فى إجازة دراسية وأكيد طبعا بتقضيها مع الأسرة فى المملكة وكانت إجازة صغيره إجازة عيد مثلا وفى أول أيام الدراسة عندك إمتحان مهم جدا جدا وأنتى فى السعودية ولم تجدى حجز على أى خطوط سفر عدا السودانية وتم الحجز على الخطوط السودانية يوم الجمعة والإمتحان يوم الأحد وجاء يوم الجمعة وقام الأهل بالذهاب معك للمطار للوداع وعند دخولك الصالة شاهدتى على الشاشة تأخر السودانية ويحدد الزمن فى وقت لاحق ...... صفى شعورك فى تلك اللحظة ؟

:D :D :D

[ابومرام]

ميده ليك الف تحية وشايفك صامده مع الكرسي الظاهر الشباب دائما في الخارج ومع الامتحانات عموما 00
ميدو طبعا نحن فارقنا السودان من فترة او من كم سنة لكن نظرة السودانين للاغتراب اصبحت بدل مغترب اصبحت متغرب رايك شنو في العريس المغترب وانتي انسانة مواصلة بين السودان والممكلة ليك انتي شخصيا 00 ولو طلب يديك مغترب حاتقولي شنو 00

[ابراهيم]

اول تحياتي ليك الأخت ميدو
واتمني ليك قضاء وقت ممتع في الكرسي الساخن

سؤالى يمكن فيه حبة شلاقة لكن ماتهربي منو ...

لكل منا أميرة أحلام وكما لكل منكن فارس أحلام

س سوال ؟ ماهو فارس احلمك وماهى الموصفات


لك التحية والاحترام
;) ;) ;)

[medo]

اولا شكرا myrelan
:)
طبعا انا الحمدلله ماعمري سافرته بي الخطوط السودانيه
ولو لاسمح الله وسافرته وحصل الموقف معاي حا ازعل واضيق شويه لكن
ماحا استغرب حاجه ذي دي من الخطوط السودانيه لانها\\متعوده دائما\\ علي
انها تخالف مواعيده واما عن الاختبار فاحااكون من بدري مذاكرة ليهو يعني حتي لو وصلته يوم الامتحان لو امكن حاامتحن مع دفعتي ولو مافي طريقه خالص للامتحان طبعا حااشيل الماده ملحق-------------------------:)

[medo]

تحيه طيبه اخي ابو مرام:)
اما عن سؤالك راي في العريس المغترب انا شخصيا ما عندي فرق كبير بين عريس مغترب ولا ما مغترب لانو في ناس في السودان وضعهم احسن من المغتربين وما اي واحد مغترب وضعوا بكون كويس بد ليل انو في ناس بغتربوا بي السنين وبكونوا ماعملوا اي حاجه ولاحققوا هدف يعني ضيعوا السنيين من
غير فائده :confused: :confused:

[medo]

اولا \تحياتي اخي الكريم ابراهيم وشكرا علي السؤال:)

انا زي اي بنت بتمني الانسان المثالي في الدين والدنيا والاخلاق الحسنه والتعليم والحاله الماديه ----------------------
وفي النهايه الكمال لله وحده وكل شي قسمه ونصيب -

[خالد حمد موسى]

الاخت الغاليه ميدوأتمنى أن يكون الكرسى بردا وسلاما عليك


سوالي ليك ماهي هواياتك وماهوفنانك المفضل


وبيت شعروحكمه نالو اعجابك ولك الود والاحترااام........

[خطاب العبيد]

الزول الشين اصلو ماعندو حظ ؟؟؟؟؟

المهم ألف مرحب بيك فى المنتدى بتاعنا وأنا عضو جديد لسه برلوم يعنى بس برضو شين ولازم ألقى حل فى المشكلة والبمناسبة انا بعد شناتى دى أخصائى فى الكمبيوتر بس جديد على المنتدى

الزول الشين خطاب العبيد أبو الدهب 2

[medo]

شكرا اخي خالد حمد موسي علي السؤال والمرور

هواياتي طبعا في البطاقه الشخصيه
احب اسمع لي مصطفي -وردي-ابوعركي
بيت شعر
نعيب زمننا والعيب فينا
وما لزمانناعيب سوانا

الحكمه هي
لسان العاقل وراءقلبه وقلب الاحمق وراء لسانه

تحياتي

[medo]

اخي خطاب العبيد للك التحيه والاحترام
انت قلته الزول الشين اصلو ماعندو حظ
وانا بقول ليك الشين شين بي طبعوا
والجمال الحقيقي في الروح

[عمك تنقو]

شكرا ليك ميدو علي هذه الروح الطيبة والسمحة سماحة أهلنا في الجزيرة

عليك الله يا ميدو يا بتي رايك شنو في الحاجات دي في مدني وفي كلمات موجزة :

طبعا مايو مافيها باعوض 00 عشان كده ما عندكم ملاريا ؟

رأيك في ملارية ود مدني شنو ؟

شارع الدكاترة ؟
الأجزخانات ؟

سوق الملجة زمان وأسع ؟

جامعة الجزيرة ؟

كبري حنتوب ؟

منتدي ود مدني 00 الناقصو شنو ؟

معليش يل بتي 00 كترت عليك 00