المسلسل اليومي ،، يوميات البلووووله !!

[وليد عمر سعيد]

الحلقه الاولى .. ورحلت الخرتووم



--------------------------------------------------------------------------------

حاجه الرضيه
الجلسه كانت فى منتهى السريه أنتصف الليل
حاجه الرضيه تخاطب بعلها : شوف يا البلوله أخوى أمة محمد دى كلها رحلت الخرتوم والساساق ده حار عليك

ركوب الحافلات هده حيلك الأصلو مهدود وأنا تقرص العقارب كتر على بالحيل دحين كان بتسمع كلامى من باكر نشيل عفشنا ونرحل أنا أرتاح من القريص وأنت ترتاح من الساساق الهدا حيلك ونسكن داك يا البيت سراميكو راس الخيمه أكان سالومى والعقارب كان بدورن أشوفن التزحلق على الجليد اليلحقنى هناك .
يبتسم البلوله أبتسامه تهكميه أها لكن يا الرضيه العتان السخيلات الجداد السواسيو نوديهن وين الشقيات ؟
شوف ياراجل عتانك وسخيلاتك شوف ليهن صرفه لكن جدادى قسمت بى ربى أكان أختو فى البلكونه مانى مخلياهو بى وراى .
عصرا بدرى حضر الدفار المودعين والمودعات لا لا دخلو السراير أول حاجه ياجماعه لا لا أحسن الدولاب الكراتين ياجماعه فيهن العده بتتكسر البنابر الجركانات ما تنسوهن الشوالات الخماره الصاج نملية العده الكوانين العفش الهتش أصحاب الأقتراحات والقرارات الفوريه ألتفو حول الدفار مختار الممسوخ ( بالله التقول ماشه الدوحه )
الرضيه تصيح ( جدادى ده بفطس يا أولاد علقوهو بى بره ديكى بركبو معاى بى قدام )
الدفار ينهب الأرض نهبا وأحلام المدينه التى تنام على مخدات الطرب تداعب خيال الرضيه والتى تخرج رأسها بين الفينة والأخرى لتطمئن على الفراريج والدجاج أما السيد الديك فقد أستكان تمام لولا أن حرارة ماكينة الدفار سرت فى ريشه مما جعله يخرج بعض الفضلات السائله شعرت بها الرضيه وهى تلتصق بين أصابع قدمها اليمنى لكنها سكتت عليها خوفا من البلوله أن ينفجر فيها أمام سائق الدفار مما يقلل من شأنها وهى التى كانت تتحدث طيلة الطريق بأنها من عائله محترمه جدا وأن أصلها كان من قلب أمدرمان لكن ظروف عمل والدها جعلته يهاجر ألى الريف ( وسمحه المقدره وقبح الله الفقر ) كانت هى حكمتها المفضله تقولها عندما ترى شيئا جميلا. وصل الدفار ألى المكان المشهود .
المدينة كعادتها ساهره ساحره ساهيه لاهيه .
فتحت سوسن شباكها وأزاحت الستائر عندما شعرت بأن هنالك حركه غير عاديه بالقرب من منزلها ماما ماما أسرعى تعالى شوفى جونا أهل عوض . عوض مين يابت ؟ عوض بتاع الجركانه يا ماما .
الرضيه وبعد نزولها مباشرة من الدفار وصاحت بأعلى صوتها
( سجم خشمى يا البلوله البيت نعلو مو ياهو ده ؟ ) أيوه ياهو يا الرضيه عاوزانى أوديك المنشيه ؟ أستهدى بالله و العافيه درجات كدى أول حاجه نزلو البرميل النباصر ليكم المويه .
ديك الرضيه وبعد أطلاق صراحه من التكتفه نظر ألى السماء فوجدها مبيضه من سطوع أنوار المدينه فظن بأن الفجر قد طلع وبرغم الأنهاك الذى أصابه من وعثاء السفر وحرارة ماكينة الدفار والتى مازالت تسرى فى جسده ألا أنه أستجمع كل ماتبقى له من طاقه ووضعها فى حنجرته الخائرة القوى وأطلق صيحة ذات مسارين الأولى كانت للفجر الكاذب والثانيه تقول بأن مستوطن جديد قد وصل ألى هذه المستوطنه . سمع ديك سوسن الدلعجى فنظر ألى ساعته مندهشا صوت غريب وتوقيت أغرب ولابد من أن هنالك أنقلاب فى المدينه.
قفذ ديك سوسن الجدار ليستبين من الأمر وقفذة أخرى ألى مكان الصياح وهو ينظر شذرا ألى المستوطن الجديد والذى بادره فورا أعلم جيدا ياديك المدينه بأنك تريد أن تقول لى قولتكم المأثوره ( كلو ديكا فى بلدو عوعاى والبلد دى مى بلدك لم حسيسك ده عليك ) هذه المقوله ياديك المدينه أصبحت من المقولات المنسوخه فبفضل هذه الشبكه العنكبوتيه أستطيع أن أعوعى هنا وأسمع كل الديكه فى أستكهولم بل وأطربهم كمان وأنا من هنا أحذرك أيها الديك المتمدن من شيئ واحد ألا وهو سرقة الأصوات صوتى المبيحيح المو عاجبك ده باكر بتقوم تنزلو فى سي ديهات وتتدعى بأنو ده صوتك لكن خبراء الأصوات حيكتشفو المسأله وتبقى فضيحتك بى جلاجل فغر ديك سوسن فاهه وبقزه واحده وجد نفسه أمام سوسن ( تعرفى ياسوسن الناس الجو ديل ديكن مو ساهل والله عليهو جنس لماضه أمال الرضيه والبلوله حيكونو كيف )

[مبارك عمر عباس]

عارف ياوليد بعد ماالجماعة ديل باعو مشروع الجزيرة قصتك دي سوف تصبح حقيقة

وربنا يستر
تحياتي وكل عام انت والاهل بكل خير.
في انتظار باقي الحلقات.

[moh_alnour]

الأخ : وليد عمر سعيد
مرحب بهذه العودة القوية و مرحب بهذه البوستات الجميلة و التي تحمل في طياتها سُخرية القدر من واقعنا الذي أحتار معه القدر
ظاهرة ترييف المُدن و أرتباطها بمصطلح التهميش الذي أطل علينا في السنوات السابقة
و أيضا ً توطين التعليم و الصحة و المؤسسات المالية و الخدمية و فرص العمل في العاصمة
جعل الجميع في موسم هجرة إلى البندر في ظاهرة تستحق أن نفرد لها عدد من البوستات
لعلنا نفلح في تحريك هذه البركة الساكنة من خلال تسليط الضوء على هذه الظاهرة التي جعلت من الريف قُرى أشباح بعد أن هجرها الجميع
في إنتظار يوميات البلولة لنتعرف على ما فعلت به المدينة و ما فعل هو في المدينة التي أصبحت مثل كرش الفيل


و سمحه المقدره وقبح الله الفقر
:) :p :)
سمح العلم سمحة الشهادة و سمحة الترطيبة

[وليد عمر سعيد]

الاعزاء ..

مبارك عمر عباس ،،

ومحمد النور ،،

لكم الشكر على مروركم العطر ..

واتمنى ان تنال باقي الحلقات اعجابكم ايضا ..

فلنتابع ..............

[وليد عمر سعيد]

الحلقه الثانية .. (حاجه الرضيه وفجر جديد )



--------------------------------------------------------------------------------


فتحت حاجه الرضيه جفنين متثاقلين بعد أن وصل الى أذنيها صوت غريب رافعت رأسها ثم نظرت لتجد البلوله يتوضاء للفجر فسألته 0 ده حس شنو كرركرر ده ؟ أبتسم البلوله وهو يقول .ديل الرقشات يا الرضيه الناس الحوالينا ديل كلهم شبهيت اتلاقيت يعنى ذينا كده مستوطنين جدد الجاى من قرقيزيا والجايي من الشيشان شويتين شويتين لامن صحتن أتصلحت الزول البى قفانا ده كان عندو كارو ببيع بيها الخدار هسع راكب أتوس. كدى قومى سوى لينا القهوه .
تفقد ديك الرضيه دجاجاته الثلاث وأطمئن عليهن وهو يقول فى سره مثنى و ثلاث ورباع كان الله مده فى العمر والصحه اتصلحت ياربى فى البلد دى فى فرصه ؟ أكان مايقوم ديك سوسن الوجيه ده يغرى ليهو واحده من الفراريج ديل ويقلعا منى لكن بينى وبينك ده ديك حنكوشه ساكت ذى ستو أنا البقلع منو والبلوله يقوم يعرس سوسن ذاتا . نظر ديك الرضيه ألى سيدته وهو يقول والله ياحاجه الرضيه سويتيها فى رقبتك براك أمانه البلد دى ما فيها أفلام . طرق خفيف على الباب نهض البلوله دخلت نعمات وهى تحمل ثيرمس الشاى صباح الخير وان شاءالله الدار مرحبا بيكم . نعمات أمراءه فى منتصف العمر عليها مسحة من الجمال لاتخفى على العين رسمت على فمها أبتسامه حلوه حينما سلمت على الرضيه وجلست بجانبها وهى تضع الثيرمس على الأرض بداء الضجر واضحا على الرضيه وهى تقول فى سرها ( نسوان المدن شكيتكن على الله شوفن ياخياتنى المره القاهره دى وكمان داخلا بى طرحتا ومتجهله ياربى عندها راجل مانى شايفا لى حنه فى كرعيها ولاشيتا آخر ) أبتسمت نعمات وهى تقول للرضيه لو محتاجين لى أى حاجه أنا جارتكم القصادكم طوالى وسوسن بتى اليومين ديل مزنوقه لأنها ممتحنه الشهاده كان ممكن تجى تساعدك .
بعد خروج نعمات أخرجت الرضيه زفره جهنميه وخرج الشرر من عينيها وهى تقول عاين لى هنا يالبلوله المره دى بتعرفا من متين وعندها راجل ولا ماعندها
يالرضيه قولى بسم الله الجن مالو ركبك دى مره محترمه أنا عارف جنك بركبك لامن تشوفى ليك مره سمحه لاعمنو ! بعدها سكت البلوله حينما أعادت الرضيه السؤال بس بدورك تورينى عندها راجل ولا ماعندها ؟ ياوليه بطلى جنك ده نعمات دى قنعت من الرجال بعد وفاة راجلا وشغاله فى السوق مع الرجال عندها بوتيك بتعرفى البوتيك يالرضيه . والله فى الحقيقه ماكى غلطانه غلطان أنا الجبتك الخرطوم بتولعى لى فى النيران من أول يوم يا الرضيه الله يكفينا شرك ياعقرب الدفاين.

[أشرف صلاح السعيد]

متابعة للحلقة الاولى..
اخى وليد حجزت مقعدى بالصفوف الامامية ..
وكل عام انت والاهل جميعا كما تحبون ويرضى الله..

[وليد عمر سعيد]

الباشمهندس .. اشرف ركشه

والله شرف لينا انو البوست نال متابعتك ..

وعمنا البلوله قدر يجذبك وتابعتنا ..

ودعنا نرى مروركم مرارا ..

متابعه شيقه اتمناها لكم .......................

[وليد عمر سعيد]

الحلقه الثالثه .. ( الرضيه والحرب القادمه )


--------------------------------------------------------------------------------



بعد خروج نعمات تملكت الرضيه الهواجس والأفكار الشريره وهى تقول فى سرها (المره دى شكيتا على الله كان مسخت على رحولى ياربى البلوله بعرفا من زمان وهى اللقت ليهو البيت ده وسكنتو جمبها مالكن يانسوان الخرتوم خليتن الغنا فى المغترب وود الغرب وبقى غناكن راجل المره المِر يايمه اللحقكن أمي ديك شحدت ربى عليكن ) ديك الرضيه يقترب أكثر وأكثر من الرضيه ويرمقها بنظرة الحيره ويقول الرضيه خليك عاقله وأنعلى أبليس وأطردى هذه الأفكار الشيطانيه من دماغك وأوعك تمشى تعلنى أى نوع من الحروب على البلوله وأنتى عارفه مقدراتك وأسلحتك الأسلحه دى كان زمان . أسلحتك التقليديه كانو أخوانك وديل البلوله دمرن ليك عشان عندو القرش أما أسلحتك الفتاكه جمالك وأنوثتك وفتنتك ديل الزمن أمانه ماعمل فيهم عمايل ونزعن منك نزع أذا يالرضيه لقد أصبحتى مجرده من كل أنواع الأسلحه الممكن تقاتلى بيها البلوله . نظرت الرضيه ألى ديكها وهى تقول سجم خشمى ديكى أبقى بفهم أكتر منى أكان كدى أشوف لى طريقه تانيه .
أحد عفاريت الرضيه والذى عنده علم من تكتيك النساء همس فى أذانها
( شوفى يالرضيه أنا أديك خطه ثعلب الصحراء ما فكر فيها )
بعد أن سحبت الرضيه نفسا طويلا قالت لعفريتها ( أها قول يا الفالح )
تبسم عفريتها ولمعت عيناه وهو يقول ( تصاحبى نعمات صحبه شديده وتاكلى معاها الملح والملاح والسلطه كمان ) وكدى تقدرى تضمنى نعمات والخاين الله يخونو .
راقت الفكره للرضيه وتبسمت وربتت على كتف عفريتها وهى تقول عفيت منك .
والله أصاحبا ليك جنس صحوبيه وكان دارتنى أمشى معاها للبوتيك هولا علا أمش
أمسح ليها الترابيز أطبق ليها الفساتين وأستقبل ليها الزباين سكرتيره يعنى قالتها بجديه وهى تنظر ألى وجهها فى المرايه .
ضحك الديك بأعلى صوته وهو يقول والله أول مره أسمع لى بى سكرتيره أسما الرضيه بتعرفى كومبيوتر يا الرضيه
وأطلق صيحة تعلن أنفراج أول أزمه بين الشريكين وهو يقول أها أنا البفك لى أزمتى منو أنتهرته الرضيه وهى تقول
( أزمة شنو أنت العندك كمان يا معولق ياهن ديل قدامك تلاته فراريج الله يقدرك على عيشتن أمرق كابس ليهن كان مايلم فيك ديك سوسن يمعط ليك رقيبتك دى )
حضر البلوله آخر النهار وعكس ما كان يتوقع شاهد وجه الرضيه متهللا ومبتسما فبادرته قبل السلام ( تعرف يا البلوله والله نعمات دى مره طيبه خلاص)
جاتك تانى يا الرضيه ؟ أبدا ياها جية الصباح . ذهل البلوله وهو يقول فى سره ( معنات كدى الموضوع ده فيهو سر ) أما أن يكون هذا الديك قد أدار حوارا مع الرضيه أو أن يكون أحد عفاريتها الذين أعرفهم جيدا قد أوحى أليها شيئا ما.

[moh_alnour]

تسجيل حضور و متابعة

[ابوخالد]

متابعين أيها العملاق فى دنيا الحكاوى

وليد عمر سعيد

عيدية ولا أحلى ,,,

قصة جميلة ,,, واصل ,,

http://di0r.jeeran.com/3eed-S3eed2007.gif

وكل عام والجميع بألف خير

[أشرف صلاح السعيد]

ديك كايس التربيعة..
الرضية ام اسلحة مفقودة وبس لسان..
ام سوسن الشديدة ..
البلولة أمانة ما عملتها فى نفسك..رضية وعفاريتا ابات تخصصات وديك نسونجى قصدى دجاجنجى أمان ما جاك بلا..

اخى وليد كل الاعوام انت والاهل جميعا كما تتمنون..

[وليد عمر سعيد]

تسجيل حضور و متابعة

الحبيب .. محمد النور ..

وأسجل لك صوت تقدير لمتابعتكم لنا .......

ودمتم ،،،

[وليد عمر سعيد]

متابعين أيها العملاق فى دنيا الحكاوى

وليد عمر سعيد

عيدية ولا أحلى ,,,

قصة جميلة ,,, واصل ,,

http://di0r.jeeran.com/3eed-s3eed2007.gif

وكل عام والجميع بألف خير


مهندس الكلمة الجميلة ..

وصاحب الركن الابداعي المتفرد ..

ليس لي ان اقول .. ادامكم لنا الله ..

وكل عام وانت الخير لكل عيد ،،

[وليد عمر سعيد]

الحلقه الرابعه .. (( حاجه الرضيه أستايل ))


--------------------------------------------------------------------------------

دخل البلولة مجهدا .
كدى أدخل عشان ترتاح شويه على بال ما أجهز ليك الغدا ( شي عجيب الرضيه دى قطع شك مى براها ) قالها البلوله أول مره وطيلة حياته مع الرضيه يسمع فيها كلاما ناعما وبهذه اللهجه ( قطع شك الشغله دى فيها اٍنا وكأنما وكيف) بعد أن تناول البلوله غداءه سمع أيضا ولأول مره الرضيه تقول عن أذنك يا البلوله أنا طالعه لى جارتى نعمات . الديك الراقد تحت الأزيار مستمتع بقطرات الماء النازفه تبلل ريشه وحلقه فى هذا النهار رمق الرضيه وهو يقول على وين يالشقيه . ده مو وكت مرقه الناس هسع فى قيلوله خليك حضاريه يالرضيه . طرقت الرضيه باب نعمات خرجت سوسن سلام مرحبا ياخاله أتفضلى . أنتى بت نعمات ؟ .أيوه . ما شاء الله عينى
بارده وينى أمك ؟ والله ماما نايمه هسع وبتصحى الساعه سبعه عشان بتمشى البوتيك بتاع العمارات الساعه تمانيه لكن ممكن نصحيها ليك طالما أول مره تجينا ياخاله . جلست نعمات قبالة الرضيه وهى ترتدى قميصا أطاح بعقل الرضيه وجعلها تنسى لماذا قد أتت ألى هنا وأرتجفت حتى أنسكب منها كأس عصيرها على السجاد . معليش معليش يا يا أختى بسيطه . قولى لى أن شاء الله البلد تكون عجبتك ؟
كيفن ما بتعجب بلدا فيها ناس سمحين ذيك كده . أبتسمت نعمات وهى تقول فى سرها يبدو أن الرضيه دى ( بتاعة بويه سادولين ) أشكرك يا الرضيه . أنتهزت الرضيه فرصة الأطراء وقالت والله يانعمات بدور أمشى معاك البوتيك حقك لزوم أفرق وممكن الواحده تتعرف على طبيعة العمل وصداقات مع الزباين .
البوتيك حقى يا الرضيه الناس البجو فيهو ناس يعنى كده أستايل وبى صراحه كدى قالتها وهى تهز رجلها هزا خفيفا أذا عاوزه تمشى معاى أول حاجه تمشى تعملى ساونا وصبغة شعر وميكب أب وتغيرى ملابسك دى قالتها ثم دلفت الى الحمام ياسوسن جيبى لى خالتك الشاى
الرضيه تحدث نفسها (ياربى كلام نعمات ده هول تعجيز ؟ الساونا بسويها والصبغه عاد ديك يا الألون المى خمج والميك أب ودالكلب أمككو ليكن جنس تمكك وقسمت بى ربى أبقى ليها ذى أى عارضة أزياء فى التلفزيون ويانى المكنكشه فيك يانعمات .
رجعت الرضيه الى البيت تسبقها أحلام المكوجيه ( شوف يا البلوله أخوى أقعد جمبى هنا النحدسك وما تتحوسد على ساكت أنا من باكر دى ماشا أعمل ساونا وصبغة شعر وميك أب وأطلعلك بكره حاجه بريستيج. ذهل البلوله أيما ذهلوله ووضع كلتا يديه على رأسه وأخرج عينيه من جحريها . الرضيه قولى بسم الله وأستغفرى أنتى دقشك جان فى مرقتك دى؟ .
ساونة شنو وصبغة شنو وميكب شنو ؟ الرضيه أنتى لى هسع كرعيك بى شوكن الليل كلو تنخبى فيهن وأصبعك الكبير ده فيهو نبت ونوع شعرك ده ما بصبغوهو ده ببهوهو بالفرشه وقالت ميك أب الميك أب ده مابمشى فى الزول الماكل الويك أب أستهدى بالله يا الرضيه وما تسوى لينا فضايح أمانه ما جبتيها ضقلا أتلولح والله أنتى كان الله مد فى أيامك فى البلد دى عل تقولى دايره تمشى معاها صالة البلياردو
بتعرفى تلعبى البلياردو يا الرضيه .

[وليد عمر سعيد]

البلولة أمانة ما عملتها فى نفسك..

..

الرائع .. ابو صلاح

" هو اللي اختار دنيتو .. وهو المخير في اختيارو "

[معتصم عيدروس]

[/size]


[/size]

يا ود أبونا كلامك سمح بالحيل ..
كلام الديوك دا ما ساهل .. واصل ...

[محمد الواثق]

متابعة لمدونتك قمة في الروعة يا وليد واقرب الي الحقيقة في سردك
قصة ممتازة في ترغب لاحداثها
لا للتعليق مكان هنا سنتابعك بصمت
وموفق بأذن الله لك مني اجمل تحية

[وليد عمر سعيد]

[quote
يا ود أبونا كلامك سمح بالحيل ..
كلام الديوك دا ما ساهل .. واصل ...

استاذي المتالق .. عيدروس

مروركم وتوقيع أسمكم .. متابعين .. بل معجبين ايضا .. لهو بالنسبة لي

تزامنا مع حلول العيد السعيد .. بمثابة ( عيدية ) رائعه ..

اتمنى ان تسحرونا بمروركم مرة اخرى ..

وكل سنة وانت طيب .. ومحبوبتنا ( ودمدني ) .. طييييييبه !!

[وليد عمر سعيد]

متابعة لمدونتك قمة في الروعة يا وليد واقرب الي الحقيقة في سردك
قصة ممتازة في ترغب لاحداثها
لا للتعليق مكان هنا سنتابعك بصمت
وموفق بأذن الله لك مني اجمل تحية


شقيقي و الحبيب الى نفسي جدا .. محمد الواثق ..

كما قلت اخي .. لابد ان اسعى واجتهد .. ارضاءا بل اكراما لكل الاعزاء

الذين تفضلوا علي بجزء من زمنهم لمتابعة هذا السيناريو .. بل واعطوني دافعا كبير ..

ماهو جزاءهم .....؟؟


" ويا انت .. صمتك جميل زي بسمتك "

[وليد عمر سعيد]

تشاهدون بعد قليل ... على قناة منتديات ودمدني ......




الحلقه الخامسة من المسلسل اليومي .. يوميات البلوووله !!



متابعه شيقه نتمناها لكم ،،

[وليد عمر سعيد]

الحلقه الخامسة .. (( الرضيه والحداثه ))



--------------------------------------------------------------------------------



سحب البلوله بهدؤ كرسى البلاستيك وأتجه به نحو الباب قاصدا الشارع هربا من الرضيه وما طراء على ذهنيتها من أفكار جديده ومستحدثه خاصه بعد عودتها من منزل نعمات . البلوله اعتبرها لوثه حضاريه عابره ستذول أحدثتها تلك الزياره التاريخيه التى قامت بها الرضيه لمنزل نعمات وما رأته من أساس فاخر وديكور وما سمعته من نعمات بالحديث عن الناس الأستايل والحريم البريستيج والساونا والميك أب مما جعل عقلها القروى البسيط لم يستوعب كل هذا الزخم الحضارى . ألتفتت الرضيه لتجد أن البلوله قد أخذ كرسيه وأتجه نحو باب الشارع فجن جنونها ( على وين يا البلوله أوعك تكون داير تقعد فى الشارع متل الاولاد الصعاليق البشاغلو البنات ( وأنت شنبك بقى واحد فول وأتنين جبنه !)
ياوليه قولى بسم الله أنا داير أشم هوا ومخنوق منك عديل كده( تعال راجع ياراجل أنا دايره أقلى ليك بن ظريف يا الحبيب وفى مواضيع لازم نناقشا بى رواقه بس خليك ريلاكس وتكون روحك رياضيه وتاخد ودى معاى فيها كمان )
تعجب البلوله من التغيرات التى طراءت على الرضيه وطريقة تفكيرها فى أدارة الحوار معه وجذبه ألى طاولةالمفاوضات ! شيئ غريب المره دى يوم واحد فى الخرطوم وقعده واحده مع نعمات غيرت طريقتا أت يا البلوله ليك أربعه سنين وياكا البلوله ذاتك وبعد كده لازم تراجع حساباتك.
كان الديك يتابع الحوار بين الرضيه والبلوله فى أندهاش وهو يقول فى سره المره دى الله يكفينا شرها شكلت ومن الأن خطوره على البلوله شخصيا أمال أنا مصيرى شنو حيكون دى والله مستعده بعد ما تتعولم أنها تفرط فينى وبرغم أننى كنت بالنسبة لها أشكل أحد الثوابت والمرتكزات الأساسيه ولكن وبنفس الكيفيه والتى تغيرت بها الرضيه على أن أكون حذرا وأن أتخذ ضربة أستباقيه ( قبال ما الفاس يقع فى الراس) على أن أقوم بزياره لى ديك سوسن لأن فى حياته سر . سيدته نعمات أرمله لازوج لها برغم أنها جميله ويمكن لها أن تتزوج اليوم . وديكها الوسيم ديك أعزب ( ياربى يكون مجاملا فى الموضوع ده . برضو فى أحتمال يكون فراريجو من الجماعه الياهن مغتغتات وكده ) ضحك الديك ضحكه قويه حتى سال لعابه مما لفتت أنتباه الرضيه فأنتهرته ( كر ها طير من هنا الفجه منضفاها هسع وبندور نشرب فيها القهوه ما توسخا لينا ) نظر الديك ألى الرضيه بأذدراء وهو يقول فى سره ( هلا هلا بت الكلب الشعيريه نسيتى الجيتى مجلبطاهو فى كرعيك يا الرضيه )
وضعت الرضيه عدة القهوه بعد أن فرشت الأسره ورتبتها بطريقه جميله ووضعت البخور على النار وبدأت قلى البن والبلوله ينظر بأعجاب على هذا البروتوكول الجديد الذى أبتدعته الرضيه . ( قطع شك أنا حلمان ياتن الوليه دى طقاها جان )

[محمد الواثق]

ولي اقوليك حاجة احنا متابعين بكل احساسيسنا
واااااااااااااااصل

[moh_alnour]

تسجيل حضور و متابعة دائمة جعلتني أتحسر على نفاذ الفرص الثلاث الممنوحة لي لترشيح نجم الشهر
فهذا الحوار الشيق الجميل في هذا البوست و الذي أقحمت فيه الديك يستحق أن نتوجه نجما ً للشهر
أحتراماتي أخي وليد أبوقرط

[وليد عمر سعيد]

ولي اقوليك حاجة احنا متابعين بكل احساسيسنا
واااااااااااااااصل



اخووووي ..... الله يخليك لينا



................



" ويا انت .. إحساس جميل زيك .. مالقيت في دنيا الناس ساكت شبه زيك "

[وليد عمر سعيد]

تسجيل حضور و متابعة دائمة جعلتني أتحسر على نفاذ الفرص الثلاث الممنوحة لي لترشيح نجم الشهر
فهذا الحوار الشيق الجميل في هذا البوست و الذي أقحمت فيه الديك يستحق أن نتوجه نجما ً للشهر
أحتراماتي أخي وليد أبوقرط



المايسترو .. محمد النور

قد اصبح بالفعل نجما .. بحضورك انت وكل العمالقه المتابعين معانا .. بالنسبة لي قد اصبح بدرا .. ينقصه فقط مروركم الدائم .. حتى يكتمل نوره وضياءه ..

[وليد عمر سعيد]

لم يسلم البلووووله .. من الزيارة التاريخيه لحاجة الرضيه لجارتها




الجديدة نعمات .. وما سوف يعنكس على البلوله من نتائج الزيارة ..




تشاهدونه بعد قليل ... ابقوا معنا ........

[بنت الرفاعي]

كل عام و أنت بألف خير أخونا وليد :)
ماشاءالله على قصتك التي كادت أن تحاكي الواقع ,
واصل ونحن متابعين .

[وليد عمر سعيد]

الحلقه السادسة ... (( حاجه الرضيه والقرارات الخطيره ))


--------------------------------------------------------------------------------



جلس البلوله بجانب الرضيه جلسه تاريخيه لم يشهد لها الزمان مثيل .كان لنكهة قهوة الرضيه فى هذا اليوم طعم خاص تهللت لها أسارير البلوله وهو يسأل . حاجه جميله يا الرضيه دى فيها شنو ؟ فيها مستكه يا البلوله ومن الضهر كنت مكفيه الفناجين فى التلاجه عشان تحافظ على نكهة المستكه ضبعا البروده بتحافظ على النكهه . حديث الرضيه أذهل البلوله وجعل منه أمى بل متخلف أمام أمره أصبحت فى نظره أمراه عصريه مابين يوم وليله ( أكيد يا أنا حصلت لى حاجه يا الرضيه دى نزل عليها جن ومن كوكب بعيد ) أبتسمت الرضيه أبتسامه لم يجد لها البلوله أى تفسير فى قواميس الأبتسامات وهى تقول شوف يا البلوله أخوى أنت عارف أنتقالنا من القريه الى المدينه ليس بالغايه لكنه وسيله لتحقيق مجموعه من الأهداف المشتركه وعلينا أن نرسم الخطط لتحقيق هذه الأهداف والأهداف نفسها يا البلوله أخوى تنقسم ألى قسمين منها قصيرة الأجل ومنها طويلة الأجل ( الرضيه الرضيه أنتى بتقولى فى شنو يا الرضيه أختى أنا عليك أمان الله مانى فاهم الحبه الرضيه أختى أمكن أنتى محمومه وبتهضربى يا الرضيه أوديك الدكتور يا الرضيه)
ضحكت الرضيه ضحكه عاليه وهى تربت على كتف البلوله حمت شنو وهضريب شنو ودكتور شنو يا البلوله أسمع باقى حديثى . الأهداف قصيرة المدى يمكن تحقيقها بأستثمارت صغيره وسريعة العائد أما الأهداف الكبيره يمكننا أن نحصل على تمويل من جهات مموله كما تفعل نعمات الأن . تنحنح البلوله وجمع كل ماتبقى له من شجاعه ورجوله حيث أنه شعر ولأول مره بأن عقل الرضيه الذى يسخر منه دائما سوف يحوله ألى رجل مهزوم وهو الرجل صاحب كلمة ( المره كان فاس ما بتكسر الراس) أنا عارفك الكلام القلتيهو ده طالع من نعمات ونعمات دى راجلا الله يرحمو كان راجل دلدول ساكت كانت خاتاهو تحت جزمتا وقاهراهو وبتذلو لامن جابت ليهو الضغط والزهايمر آخر عمرو قعد يرجف ورقبتو بقت تتلولح متل صبابة الطاحونه وسفرتو ليك الآخره بى أول طياره أنا ياختى مانى مسافر ليك الدنيا دى ولفت عليها تب دحين يا أختى دى كوسيها عند الغافل أنا ماببقى ليك دلدول متل المرحوم راجل نعمات ومانى مستعجل على الأخره والدلدول فى قاموسنا نحنا سماسرة العربات ذى المبارى الجماعه هن يسو افتح الله يستر الله وفى الاخر البعصروها ليهو يمسكا وماهو عارف الشغله تمت كيف وعاوز أقول ليك كلاما أسمعيهو اخير ليك تنفشخى فى الواطه دى ياتن أعمل فيكى هجمه مرتده البتفكرى فيهو ده يا الرضيه أسمو القفز بالزانه وأنتى ما عاملا ليهو تمارين ولا عندك ليهو لياقه تقومى تقعى وتكسرى مخاريقك يا الشقيه
وتدخلينا فى حكاية جبص ومسامير وبلالى ركب .
سمع الديك حديث البلوله مع الرضيه فصفق بجناحيه وأطلق صيحة التأيد للبلوله ثم نظر نظرة الشامت ألى الرضيه وهو يقول الرضيه ما أخير ليك تنفشخى فى الواطه. ولكن هل ستستسلم الرضيه .

[وليد عمر سعيد]

كل عام و أنت بألف خير أخونا وليد :)
ماشاءالله على قصتك التي كادت أن تحاكي الواقع ,
واصل ونحن متابعين .

moram ... مرقت على الجيران :p

ياستنا وانت بخير وسعادة .. زي سعاتي بانضمامك لركب المتابعين لعمنا البلوووله وحرمة حاجه الرضيه .. والبطل القادم بقوة ( الديك ) ..

ياخي .. خليك قريبه .. راجع ليكم بحلقه شيقه ..

[درديري كباشي]

تعرف يا وليد انا قمت من الكرسي الساخن نظام امتغى وكدا وقلت احوم شوية في المنتدى واطلق رجلي من القعدة الطويلة واعرف الحاصل شنو .. وقفت عند هذه التحفة الرائعة والتي فيها كل شئ جميل عرفه الانسان ظليت ساعة كاملة اقراها من اولها واتفاجا بانها وقفت لاعلق صوابعي طمعا في المزيد . وانت هنا خالط الواقعية بهجرة البلولة واسرته للعاصمة .. ومدخل معها اللا واقعية بحوار الديك والعفاريت مع الرضية .. بالاضافة للهجات الريفية مع العاصمية خلقت نوع من الفنتازيا المدهشة ... كلام جميل وابداع لامتناهي .

واصل يا ولدنا وانت زدتنا طمانينة بان حواء السودانية لم تعقر بعد الطيب صالح

[مدنيّة]

وليد يامبدع

كل سنة وانت بالف خير يارب

تسجيل حضور ومتابعة

[أشرف صلاح السعيد]

اخى وليد كل عام انت والاهل بكل الخير وكما تتمنون..
الرغبة فى التغيير والإستعداد له من السمات الإيجابية والصحية جدا للإرتقاء والمحافظة على الجمال بنا وبمن وما حاولنا..أدوات التغيير قد تكون أبسط مما يعتقد العديد منا ولكن تملكها بلاوعى وتسريع التغيير أكثر مما ينبغى له مردودات عكسية وقد تكون ضارة أكثر من بقاء الوضع كما كان عليه..
بالقصة رمزيات عالية وقيمة ومهمة ومفيدة..
التقليدية ومصادماتها للتحديث أو التغيير رغم السعى إليه بقصد أو دون قصد ولكن خوفها من تفلت زمام الأمور المسلمة حسب منهاجيتها وخوفها من كسر القوالب القديمة دون موضوعية..
إنشداهت البسطاء لا الأغبياء بجديد الآخر والعمل على التقمص السريع دون الغوص المتعمق واستخلاص الاسباب والمسببات وامكانية ملائمة ما للآخر لنا..
الصراع المفتعل ما بين ذكر وانثى رغم وجود المرجعية الواضحة "الدين" والتغاطى او الإغفال عن تفهم الواجب والحق بالمفهوم الصحيح لترك مساحة لكسب مكتسبات غير مبررة..
واصل من غير فواصل وفى خطراتك..قصدى فى خطرات البلولة والرضية والديك الدجاجنجى وتغيرات مرحلة ما بعد موسم الهجرة الى المدينة..

[مدناوية]

وليد أبو قرط ..

كل سنة وإنت طيب .. وربنا يحقق الأماني


قمة الروعة والإستمتاع بالمتابعة ..


واصل .. نحن منتظرين

[وليد عمر سعيد]

تعرف يا وليد انا قمت من الكرسي الساخن نظام امتغى وكدا وقلت احوم شوية في المنتدى واطلق رجلي من القعدة الطويلة واعرف الحاصل شنو .. وقفت عند هذه التحفة الرائعة والتي فيها كل شئ جميل عرفه الانسان ظليت ساعة كاملة اقراها من اولها واتفاجا بانها وقفت لاعلق صوابعي طمعا في المزيد . وانت هنا خالط الواقعية بهجرة البلولة واسرته للعاصمة .. ومدخل معها اللا واقعية بحوار الديك والعفاريت مع الرضية .. بالاضافة للهجات الريفية مع العاصمية خلقت نوع من الفنتازيا المدهشة ... كلام جميل وابداع لامتناهي .

واصل يا ولدنا وانت زدتنا طمانينة بان حواء السودانية لم تعقر بعد الطيب صالح


دريري كباشي ..

لك التحية .. جيتنا زاااايغ موش .. قادي سلك .. امانه ماقعدتو حاااارة .. :p :p

ياخوي حبابك الفين .. في دار عمنا البلوله ..

بس كتر الزوغات .. والطلات ..

[وليد عمر سعيد]

وليد يامبدع

كل سنة وانت بالف خير يارب

تسجيل حضور ومتابعة

عمتي .. صعبتيها .. مدني في ساعه ونص .. بس بيني وبينك .. الcity مغريه .. :)

ياستي ربنا يديك خيرها .. ويكفيك شرها ..

ماتنقطعي مننا .. اللحمه اخدتك مننا :D

وكل سنه وانتي وجمال ..واخوات جمال .. وابو جمال .. بكل الجمال !!

[وليد عمر سعيد]

اخى وليد كل عام انت والاهل بكل الخير وكما تتمنون..
واصل من غير فواصل وفى خطراتك..قصدى فى خطرات البلولة والرضية والديك الدجاجنجى وتغيرات مرحلة ما بعد موسم الهجرة الى المدينة..

اشرف صلاح السعيد ..

هذا البوست هو قطره .. من بحر ابداعاتكم التي اضافت الكثير للمنتدي ..

وايد على ايد .. تجدع بعيييد ..

لكم احتراماتي ،،

[وليد عمر سعيد]

وليد أبو قرط ..

كل سنة وإنت طيب .. وربنا يحقق الأماني


قمة الروعة والإستمتاع بالمتابعة ..


واصل .. نحن منتظرين




مدناويه ،،

حمدلله ع الشوفه .. وكل الامنيات .. بدوم الصحه والعافيه .. والطلات ..

الروعه .. انتم من رسمها ..
ومتعتي .. مستمده من وجودكم .. ومتابعتكم .. ل عمنا البلوله !

فقط .. كترو الجيات ..

[وليد عمر سعيد]

الحلقه السابعة .. (( الضربة الأستباقيه ))

--------------------------------------------------------------------------------


كان الديك ينظر بأعجاب ألى البلوله وهو يرمى بكل أسلحته فى معركته الحاسمه مع الرضيه وكان يتهيأ للقفز والصياح معلنا لأهل الحى بأن الرضيه قد هزمت شر هزيمه بأسلحة البلوله الفتاكه .
نظرت الرضيه ألى الديك وابتسمت أبتسامة السخريه وهى تقول أصبر أيها اللميض وأن المعركه ماذالت فى بداياتها ثم ألتفت ألى البلوله قائله بأستفزاز ( أها يا الفالح كلامك كمل ؟ ) تنحنح البلوله وهو يعلم بأن المعركه قد أخذت منحى جديد ويجب عليه أن يخرج سلاحا جديدا غير تقليدى . (شوفى يالرضيه شغلة الدخول للسوق دى أنتى ما عندك ليها أى مؤهلات وأنتى ما ذى نعمات وماتغشى روحك ساكت . ضحكت الرضيه بصوت عال وهى تقول ( سجم خشمك نعمات مؤهلاتا شنو ؟ مى خريجة ثانوى بس. لا لا يا الرضيه أنا بقصد مواصفات أيوه مواصفات ياالرضيه ماشاء الله نعمات بى لغة الكرين بوضى وطبلون ولساتك وماكينه ولساتك . . وديل كلهن يالرضيه ماعندك فيهن التكتحه يعنى أنتى بالنسبه ليها كونسول قديم وقفوهو جمب الكامرى . دى بتوقع شيكاتا بالأنجليزى يالرضيه وبتتكلم عن البورصه وأسعار العملات الرضيه أختى ألزمى حدك ومدى كريعاتك ديل قدر هبابك. تبسمت الرضيه . وكل ملامح وجها تدل على عدم أستسلامها مما جعل الديك يقول فى سره الرضيه دى باين عليها عندها سلاح خطير تخبئه وسوف تخرجه فى اللحظه المناسبه( الله يستر عليك يا البلوله الرضيه دى بتلحقك هيروشيما) شوف ياالبلوله وقبل على جاى و ماتنسا تاريخك زمان فى الحله أنت كنت شنو ماكنت مبارى عبدالرسول أب زنقله من ضل لى ضل وجيت الخرطوم دى بى لورى حاج الماحى وحق الركوب ما كان عندك وباريت سماسرة العربات ومجدوع فى بيت العزابه نايم ليك فوق كرتونه أنت لو بتفتكر أنو ده نجاح أنا حأوريك نجاح الرضيه بت فضل الله . مسخره والله قال نعمات بتوقع شيكات بالأنجليزى قسمت بى ربى أنا أوقعا ليك بالفرنساوى مى ياها الكلوجه دى وبكره أبقى سيدة أعمال وعينك تشوف . أقر البلوله فى نفسه بالهزيمه لكنه لم يظهرها وهو يقول متماسكا ( الرضيه أختى أنا والله خايف عليك من سجن الشيكات أسألينى منو أنا وده شيتا ما بتقدرى عليهو ). نظرت الرضيه ألى البلوله وهى تقول متهكمه ومالن الشيكات ياالبلوله العربيه الراكباها نعمات دى ماك جايبا ليها انت بالشيكات وقابض عمولتا يا البلوله وده سبب العلاقه البينك وبينا يا البلوله ومن ديك وعيك سويت ليك معاها صحبه . ألتفتت الرضيه نحو الديك فلم تجده لقد أنسحب الديك وهو يقول والله فعلا دى مره خطيره جدا وأنا والبلوله طلعنا دلاديل ساكت. لم يفق البلوله من صدمة الهزيمه ألا على صوت سيارة نعمات وهى تقف أمام الباب يلا يا الرضيه أتأخرنا على المواعيد قفذ البلوله وهو يقول على وين يالرضيه ؟ أبتسمت وهى تقول عندنا مواعيد يا البلوله أنا ونعمات لو سمحت دخل معاك العده وطلع الفرش أحتمال نتأخر شويه بعد أذنك يا بلبل .
نظر الديك ألى البلوله وهو يضحك قائلا لايق عليك أسم بلبل يابلبل .

[معتصم عيدروس]

والله يا وليد الرضية دي شكلها حا تودي الراجل دا التوج..

[وليد عمر سعيد]

يانى حميده الزمان

--------------------------------------------------------------------------------


(يانى حميده الزمان ماتغير فينى شى)
داجى بالليل والنهار وما فترت من المشى
يمه بس خانى الزمان والعقيل متطرطشى

غربه طالت وحاله مالت والعمير روح ختر
غربه غول وماكله فول يمه بس شيلى الصبر
غربه كربه وحافره تربه وحالنا بس حال الشدر
(ويانى حميده الزمان وما تغير فينى شى)

****************

يمه طاريك الوليد وطارى لى ناس الفريق
فيهو ناس مهضومة جداً وفيهو ناس ما فاكه ريق
وفيهو ناس قشت عيونا هامه من حق الدقيق

وياحلليلك يا الفريق ماخلاص ضاعت ملامحك
وانت ياحميد وليدى بدعو ليك ربك يسامحك
ولما ترجع ليهو تانى مابتلقى الكان بصابحك

شالن الموت من زمان كلهن سكنو الترب
والدرافين الصغار والفى المدارس كبرو تب
فيهن الدخل الحكومه وفيهن الفات اغترب

***************

وانت ياحميد وليدى غربتك والله مى غربه نصاح
باقى لى نسيته امك شايله همك للصباح
وديك اخياتك حزانه كملو البكى والنواح

***************

يمه اقيفى داير اصارحك بالكلام الكاتمو من زمنا طويل
نخدم الليل والنهار والحقوق قام بيها سيل
حاجه سموها الكفيل
لابيشبع لابيرتع ومادى خرطومو الطويل

ونحن فى نظرو وحاتك مانساوى فتله بس من خيط عقالو
وساعة يزعل يدى شلوت بى نعالو
يلا روحو جاتكو داهيه يا(-----) مافى داعى خلاص تعالو
سوو شاى بس بى سرعه والله لا وراك فعالو

*****************


(ويانى حميده الزمان ماتغير فينى شى)
يمه طاريها البيوت ما نسيتا وطارى ناسا
طارى للفازعه الوقود داجه حافيه وشايله فاسا
وطارى للتكل القديم وديكا حارسات العواسا
وطارى للزير المندى عمرو ما عرف اليباسا
تحتو نقاعا مطرقع انتى سميتيهو طاسا
فوقو سوسيوا بيشرب جاكى فتران من كواسا
القديديم بى عجينو والكريعات بى سبيبا
شوف مدرع فيها طينو حبه لولى وحبه ماسا

***************

ومانى ناسى يمه والله ريحه البن العجيبه فى العصارى
واى زول رامياهو قلوه عض هدمو وجاكى جارى
راسو سخن وعادمو دخن بس تقول بص البرارى

****************

يمه بس مشتاق شديد ومشتهى القعده الحداكى
فوق عنيقريبا قديم مو موسر والجدادات التكاكى
والترانيم القديمه مارقه منك ذى تكنك فى صباك

****************

ياحليل شفع فريقنا يمه طيفن جانى فى عز المنام
بى عراريقن حفايا والزناقيل ذى تقول فرخ الحمام
دردقو اللستك تكاسى او برينسه ياسلام

****************

وياسلام وكتين يغنو ذى حنين صوت السواقى
والترابله معاهو ترقص وشنقت ديك الطواقى
لازم ارجع ليك يمه العمير كان فيهو باقى
غربتى المسحت ملامحى وبرضو اقول الحى بلاقى
وبرضو أقول الحى بلاقى وبرضو أقول الحى بلاقى

[وليد عمر سعيد]

نعود بعد قليل .. في احداث النيو لوك لحاجه الرضيه ..




ودهشة .. بلبل .. :p




خليكم قريبين .......

[محمد الواثق]

نعود بعد قليل .. في احداث النيو لوك لحاجه الرضيه ..




ودهشة .. بلبل .. :p




خليكم قريبين .......


ونحن اقرب ما نكون واصل

[وليد عمر سعيد]

والله يا وليد الرضية دي شكلها حا تودي الراجل دا التوج..

مرحبا .. بي طلتك لينا تاني .. استاذنا معتصم ..

والله على قولتك .. لكن الرضيه براها ..

الرضيه .. وديك الرضيه .. وآآآآآآآوك ......

كدي خليك قريييييب ،،

[وليد عمر سعيد]

ونحن اقرب ما نكون واصل


صحبي الوحيد ..






" ويا انت .. تكفي نفسي ديمه فاقداك "

[وليد عمر سعيد]

الحلقه الثامنه .. (( الأسلحه المحرمه ))


--------------------------------------------------------------------------------



كان الديك فى قمة التأثر لهزيمة البلوله بهذه الطريقه الدراميه وندم على ترديد كلمة يابلبل لكنه أختزنها كخميره لفكره ربما أحتاج أليها مستقبلا . تقدم الديك نحو البلوله والبلوله يضع يديه على رأسه من هول الهزيمه الماحقه . ويقول فى نفسه ( أنا مانى مصدق الرضيه دى قطع شك ركبا جان أحمر ) أحمر شنو ده بكون تركوازى عديل.
تقدم الديك حتى كاد أن يلتصق بالبلوله ( أياك والأستسلام أيها الرجل الهمام ويجب عليك الرد بسلاح أخطر من سلاح الرضيه . لكن ياسيد الديك الرضيه مافضلت لى سلاح ! أبتسم الديك أبتسامه تنم عن المكر والدهاء وهو يقول شوف يا البلوله أخوى نوع الرضيه دى أنا بعرفا كويس وربيان معاها من ما كنت سوى سيو وفى الأصل أنا راميانى حديه . البلوله أسمعنى كويس وما تعترض على أى كلام أقولو ليك. أتفضل ياسيد الديك . تقوم من مكانك ده هسع يا البلوله وعلى طول على محلات الساونا وبعدها على أفخم بوتيك بنطلون جينز وحزام النوع الذى اللباب حق السرج وتى شيرت النوع أبونيران داك وفيهو صورة بوب مارلى وبوب مارلى ده ذاتو فى الأصل كان أسمو البلوله لكنو بعد ما أغترب لقى أنو الأسم ده ما أستايل قام على طول حولو لى بوب يعنى ماتتعقد وكده وكون ريلاكس خالص وده السلاح بتاعك ضد الرضيه . أندهش البلوله ونهض واقفا وهو يصيح رافعا طاقيته من رأسه لكن ياسيدالديك ياديك الصلعه دى أوديها وين ؟ ضحك الديك قائلا يا البلوله ما تبقى غبى الصلعه الأن موضه فى هذا العصر كل الحراس الأمنيين لرؤساء الدول والشخصيات الهامه أنت مابتشوف القنوات الفضائيه أنظرليهم حالقين صلعه تلمع ونظارات سوداء الواحد ذى تمثال الشمع وأنت ما شاء الله بعد تعمل العمايل دى كلها وتركب النظارات السوداء ممكن ناس الفريق هنا يتهوك أنك واحد من ناس بلاك ووتر . لكن ياسيد الديك أنا عاوز أفهم أنت الأفكار دى جبتها من وين ؟ ضحك الديك قائلا يا البلوله أخوى أنت يومك كلو من دلاله لى دلاله والرضيه عاداها لى تخفس للبيوت وأنا لقيت روحى فاضى وعملت صحوبيه شديده مع ديك سوسن شفت الديك الأملس ده طلع ديك شفت وأبن ستين فتله وعارف كل صغيره وكبيره فى حلتنا دى تعرف يا البلوله أنو نعمات دى أسمها الحقيقى النعمه وأول ما جات البلد دى وهى عروس صاحبت ليك البنات الهاى هاى وبتها سوسن دى ذاتا علاقاتا محدوده ومع بنات الذوات كدى بعد ماتغيب الشمس والله بجنها جنس بنات تحلف تقول خواجيات وأضانك ماتسمع ألا ( واوو ) أها لكن الشقيه الرضيه دى أسما ده بتغيرو وببقى شنو فكرك ؟ شوف يا البلوله أذ خطتنا دى نجحت وكسبنا المعركه مع الرضيه الرضيه حتتنازل عن كل تلك التطلعات وعليك أمان الله من باكر تبقى مرت بيت تفرك وتعوس بس . لكن ياسيد الديك تفتكر الشغله دى ما عاوزا ليها حبة أنجليزى كده لزوم تمامة جرتق . ضحك الديك من كلمة تمامة جرتق . ياسيد البلوله أرجوك أفهمنى أنت ما مطلوب منك الكلام خالص وهذه واحده من مواصفات الحراس الأمنين الواحد بكون متبوم ومبحلق عينيهو وعليك أمان الله فى ناس فى حلتنا دى بوم ساكت أشتغلو فى الامن عشان مبومين بس البلد دى أسألنى منها أنا الديك ده ..

[معتصم عيدروس]

مرحبا .. بي طلتك لينا تاني .. استاذنا معتصم ..

والله على قولتك .. لكن الرضيه براها ..

الرضيه .. وديك الرضيه .. وآآآآآآآوك ......

كدي خليك قريييييب ،،

ولدنا وليد .. المشكلة كمان أنا خايف البلولة ذاتو يضيع جماعة تانيين..غايتو البلولة والرضية والديك .. الله يدي العافية
لا نريد استباق السرد الجميل .. سننتظر لنرى كيف سيكون المآل لكل هذا

[مبارك عمر عباس]

قمة الروعة والإستمتاع بالمتابعة

[وليد عمر سعيد]

ولدنا وليد .. المشكلة كمان أنا خايف البلولة ذاتو يضيع جماعة تانيين..غايتو البلولة والرضية والديك .. الله يدي العافية
لا نريد استباق السرد الجميل .. سننتظر لنرى كيف سيكون المآل لكل هذا

مساء الخيرااات .. معتصم ودعيدروس

والله جنس خمج .. اسره روحه ودمها ........

ولا اقول ليك خلينا نتابع ،، :)

[وليد عمر سعيد]

قمة الروعة والإستمتاع بالمتابعة


كل المنى ....

وكل الأماني مدونه ،،

تعزف نغم بي عيد جديد ...

عليك يكون صحه وهنا ،،




تخريمة : ياخ والله مشتاق لي عزوز شديد ،، ياخ قول ليها وشك كعب !!

[وليد عمر سعيد]

البلوله ،، في ذهول ...



الرضيه ،، وفرحة الرحول ...



الديك ،، والمصير المجهول ......



Next ......

المسلسل اليومي ........ يوميات البلووووله

[وليد عمر سعيد]

الحلقه التاسعة .. (( الجانى منك ))



--------------------------------------------------------------------------------



والله ياسيد الديك الأفكار الذى دى ما تطلع أبدا من ديك وأنا بديت أشك فيك .
قالها البلوله وهو يحدق فى ديك الرضيه محدثا نفسه . أنا البلوله دخلت البلد دى وعامل الولد تفتيحه يطلع ديك الرضيه أفهم منى ياربى ده يكون من شنو؟ أمكن من قروش السمسره حرام ؟ لا لا ما أظن لأنهن عرق لسان .
كان الديك ساعتها ينظر ألى البلوله وهو يبتسم قائلا . ياسيد بلبل ماتعقد الأمور وتدخلنا فى فتاوى ساكت عرق اللسان ما حرام أهو شوف المحامين ديل قروشن كلها مى عرق لسان ؟
نحن الأن ياسيد البلوله بنسابق فى الزمن وكسب المعركه مع الرضيه عامل الزمن فيهو شيئ أساسى .
قبل أن يكمل الديك جملته كان صوت سيارة نعمات وهى تقف أمام باب البلوله نزلت الرضيه وهى تتحدث بصوت عال( قلتى لى يانعمات الورق بتاع قريتر نايل أخليهو معاى )
أخرج الديك عينيه من رأسه مندهشا . سامع يا البلوله الرضيه قالت شنو لى نعمات ماقلت ليك عامل الزمن أصبح مهم وأنت قاعد تكوس فى الفتاوى قروش السمسره حرام أم حلال ؟ البلوله يا أخوى أستعجل الرضيه دى طالما بقت تتعامل مع شركات البترول أنت رحت فيها وأنا بى وراك ..

دخلت الرضيه وهى تحمل فى يدها اليمنى شنطة يد مذهبه يتدلى منها سلل به مجموعه من النجمات الفضيه وفى يدها اليمنى كيس يبدو من شكله أنه آت من أحد محلات الأطعمه الراقيه .
مساء الخير ياشباب قالتها بطريقه أستايل .
ضحك الديك وهو ينظر ألى البلوله ( بقينا شباب يابلبل )
نظرت الرضيه ألى البلوله وهى تناوله الكيس أمسك يابلبل حاجه خفيفه قبل ما أغير ملابسى أنت والديك جهزو العشاء .

دخل البلوله ألى المطبخ وتبعه الديك وبدأو فى أخراج محتويات الكيس البلوله ينظر ألى الديك والديك ينظر ألى البلوله . ده جنسو شنو يا البلوله ؟ دى أسمها فطاير ياغبى . طيب الشى التانى ده أسمو شنو ؟ أكان ماخاف من الكضب يا البلوله أخوى مره ديك سوسن ضوقنى ليهو قال لى ده أسمو الهوت دوق لكن يا البلوله أخوى أسمعنى تلحق لامن تاكل الهوت دوق ده معناتو أنك أقريت بالهزيمه والأنسحاب من المعركه ودى معناها نهايتك يابطل.

[moh_alnour]

غايتو يا ولي ( دي على وزن بلبل :p ) الرضية دي شكلها كدا ح تجيبا ضقلا يكركب ;)
تسجيل حضور و متابعة يا لذيذ يا رايق

[مدناوية]

يديك العافية يا وليد ..

متابعة وإستمتاع ..

[عبدالرحمن مدثر]

تسجيل حضور ومتابعة

ومتعة حقيقية بتسلسل الاحداث

واصل ياوليد

[معتصم عيدروس]

[quote=وبوب مارلى ده ذاتو فى الأصل كان أسمو البلوله لكنو بعد ما أغترب لقى أنو الأسم ده ما أستايل قام على طول حولو لى بوب quote]
والله يا وليد شكلي كل مرة حا اجي ناطي ليك باقتباس .. شيل شيلتك أو قلل من الرمزية التقيلة دي..

[وليد عمر سعيد]

الاحباب الاعزاء ..

اعتذرعن عدم الدخول منذ صباح الامس .. بسبب وفاة زميلة عزيزة بالجامعة .. في مشهد ادمع له كل من صافحها فقط .. فالكل يشهد لها بالطيبه ونقاء السريره ..

اسألكم بالله .. ان تسالوا للمرحومة ..( د. عسجد ) ..

الرحمة .. والمغفرة .. والثبات

ولوالدتها .. الصبر .. فقد اصابها انهيار عصبي حاد .. حيث ان والد المرحومة ايضا قد فارق الحياة بفترة بسيطة .. عانت المرحومة لاكثر من شهرين المرض وهي طريحة الفراش بالسلاح الطبي ..
مع العلم انه تبقى عام واحد على تخريجها .. دكتورة بقسم المختبرات الطبية .. ولكن ارادة المولى عزوجل ..
نسال الله عز وجل ان يرحمها ويغفرلها ويتقبلها .. وان يسكنها اعلى منازل الجنان .. وان يلزم آلها وزويها ووالدتها وواخوانها الصغار وزملائها الصبر والسلوان ..

هو وحده القادر على ذلك .. وانا لله وانا اليه راجعون ..

[معتصم عيدروس]

اللهم أرحمها رحمة واسعة وألهم آلها وذويها الصبر وحسن العزاء
"إنا لله وإنا اليه راجعون"

[مبارك عمر عباس]

اللهم ارحمها رحمه واسعة وتغمدها برحمتك ,

اللهم أرحمها فوق الأرض وتحت الأرض ويوم العرض عليك ,

اللهم قها عذابك يوم تبعث عبادك ,

اللهم أنزل نورا من نورك عليها ,

اللهم نور لها قبرها ووسع مدخله وأنس وحشته ,

اللهم وأرحم غربتها وشيبتها ,

اللهم أجعل قبرها روضه من رياض الجنه لاحفره من حفر النار,

اللهم اغفر لها وارحمها , واعف عنها وأكرم نزلها

اللهم يمن كتابها , وهون حسابها , ولين ترابها ,

وألهمها حسن جوابها , وطيب ثراها وأكرم مثواها واجعل الجنة مستقرها ومأواها

اللهم الهم زويها الصبر والسلوان

إنا لله وإنا اليه راجعون.

[وليد عمر سعيد]

الاجلاء ..

استاذ/ معتصم عيدروس

الباشمهندس/ مبارك عمر عباس

اللهم آمين ..

بارك الله فيكم ..

واطال الله في اعماركم ..

ومتعكم الله بصحتكم وعافيتكم ..

[وليد عمر سعيد]

غايتو يا ولي ( دي على وزن بلبل :p ) الرضية دي شكلها كدا ح تجيبا ضقلا يكركب ;)
تسجيل حضور و متابعة يا لذيذ يا رايق

ود النور ..

والله بركة الشفناك طيب مع السيول دي ..:rolleyes:

يا سيدي منور والله ..

وبلبل .. بلبل .. بس الرضيه مامعنا .. اكون بلبل with out الرضية ..:p:p

لكم كل الود ..

[وليد عمر سعيد]

يديك العافية يا وليد ..

متابعة وإستمتاع ..





مدناوية ..

تحياتي لك .. ولهذا المرور الانيق ..

وبكره وارغو .. قصدي بلبل في لقاء باصداء جديده ..:)

كوني قريبه ..

[وليد عمر سعيد]

تسجيل حضور ومتابعة

ومتعة حقيقية بتسلسل الاحداث

واصل ياوليد



المبدع .. المسكون بالابداع ,,

ابو مزن ..

ياخي اهلا .. سلام .. مرحب بيك ..

منور دار عمنا البلوله .. ومنورنا ..

بس ماتحاربنا .. ابقى واصل .. وفي انتظار طلة اخرى أجمل وأجمل ..

[وليد عمر سعيد]

والله يا وليد شكلي كل مرة حا اجي ناطي ليك باقتباس .. شيل شيلتك أو قلل من الرمزية التقيلة دي..

نحنا لاقين نورك وين يا استاذ ..

وكان الرمزية بتكتر الجيات .. يادوووووووب الكترناها ..

حاعمل ليك توصية شديده .. ;)

كن بخير دائماً وابداً ..

[وليد عمر سعيد]

أيها الاحباب ..

غدا نلتقي بعون الله .. في حلقه جديده ..

وكان المريخ بكرة غلب ...... دا .. حيكون في مولد غريب ..

وكان .......... لا لا .. الله لايقولا ..

كدي لكل حدثٍ .. حديث ..

فتكم بي عافيتكم ..

[وليد عمر سعيد]

الحلقة العاشرة .. (( وقرار التخلص من الديك ))


--------------------------------------------------------------------------------


آثار الهزيمة على عينى ووجه البلوله وهو يبتلع الفطائر العجيبه لم تخطئها عينى الديك وهو ينظر بحسره للسيد البلوله هنا نظرية من لايملك قوته لا يملك قراره قالها الديك بصوت أشبه بالهمس . أنتهرته الرضيه بتنطن بتقول فى شنو يا ديك يا عجوز ؟ لا لا قلت الله أديك العافيه يانعمات . شوف ياديك تاكل وتصم خشمك بس ولازم تعرف انت وغيرك أنو الفطاير دى ما جايباها نعمات وتانى مره ما تتحشر لأنى حأقوم أعاقبك العقاب الما حتتصورو . جمع الديك كل شجاعته فى رأسه الصغير وتوقف عن البلع قائلا وحتعملى لى شنو يا الرضيه بت فضليه ؟ تعرف أول حاجه يا ديك يا عجوز مش رايحه أبيعك لأنى ما محتاجه لى تمنك وتانى حاجه أنت أصبحت مستهلك تعرف معنى مستهلك شنو يا أبو الديوكوك يعنى غير أنك تعوعى تانى ماعندك أى دور أيجابى دى برضو أشرحا ليك وله أخلى البلوله يفهمك ليها والبقو يعوعو ساكت فى البلد دى كتار لكن لماضتك هى البتجيب ليك الذله . بالله يا البلوله بكره البت بتاعة الغسيل لمن تجى خليها تشيل معاها الديك ده توديهو مايو توديهو السلمه توديهو عيد حسين المهم لما أجى راجعه البيت فى المساء ما ألقاهو هنا . قرار خطير أتخذته الرضيه بالتخلص من الديك الذى رافقها فى رحلتها ألى المدينه حينما وضعته بين قدميها فأخرج فضلاته على أصابعها كيف تثنى للرضيه أن تتخذ مثل هذا القرار ربته منذ أن كان سوسيوا صغيرا عندما رمته الحدئة فى أحد أزقة القريه . أخرجت الرضيه من حقيبتها بعض المجلات الأجنبيه يبدو أنها مجلات للأزياء وصيحات الموضه وبدأت فى تصفحها وتركت البلوله والديك المفترى عليه فى حيرة من الأمر فجأة ألتفتت نحو البلوله قائله بالله يا البلوله برضو ما تنسى البت بتاعة الغسيل خليها مع الديك تشيل التياب والفساتين القديمه دى بقت موضه قديمه. أنتهاء صلاحية الديك وأتخاذ القرار بالتخلص منه هل هو مقدمه لقرارات أصعب . قالها البلوله فى سره فكم من مره قد سمع وهو يحتسى القهوه فى دلالة العربات وما روته له خدوم من قصص غريبه بعد عملية النزوح وأنبهار بعض النازحات من مناطق الفقر ألى المدينه ومحاولة التشكل مع الواقع الجديد خدوم نفسها بائعة الشاى مرت بكثير من مراحل التطور كانت تجلس زبائنها فى البدايه على حجاره وبعض من بطاريات العربات القديمه خدوم الأن لديها كراسى وترابيز بلاستيك أنيقه خدوم عرفت المساحيق والكريمات ألى وجهها سبيلا وصار دخان الطلح ونقش الحناء بأشكال جميله واحدا من وسائل جلب البلوله وأصدقائه من سماسرة العربات ألى هذا المكان أذا ما الذى يمنع الرضيه من التخلص من ثيابها وفساتينا القديمه طالما أن نعمات ترتدى الأسكيرت والبلوزه والطرحه الخفيفه لزوم الدخول ألى مكاتب المؤسسات والشركات والمنظمات التى تعج بها هذه المدينه. نظرت الرضيه ألى الديك وصديقه البلوله فوجدتهما ساهيين حاولت تجاهلهم بتصفحها لمجلات الموضه والتى أهدتها لها نعمات . يا الرضيه رايك شنو الخميس الجاى نمشى الحله عشان فى بكيات كتيره بتلزمنا نعزى فيها . قالها البلوله بعد أن بلع ريقه وهو متشكك من موافقة الرضيه على الأقتراح .وضعت الرضيه المجله جانبا وهى تقول ياخوى شوف ليك شغله تانيه أنا بكيات الحله من لازماتنى بنات خالى أحمد عملت ليهن تلفون تانى يوم وعزيتن وأنا ما فاضيه كل ما مات زول فى الحله أتخمخم وأمشى ليهو لأنو عندى ألتزامات شغل وهن مقدرين ظروفى . نظر الديك ألى الرضيه وهو يقول فى سره هلا هلا يا الرضيه زمان ما تسمعى ليك حس سكليبه تلفحى تويبك الياهو وتقومى جاريه بى فردة سفنجه .

[محمد الواثق]

نسأل الله عز وجل لها الرحمة والمغفرة الواسعة .
اللهم ابدلها دارا خيرا من دارها واهلا خيرا من اهلها وادخلها الجنة واعذها من فتنة القبر و من عذاب القبر
ولله مرجعنا جميعا وأسأل الله ان يكون مرضها رحمة ورفع درجه لها في مكانها التي تسكنه الأن
وان يريها مقعدها من الجنة
اللهم آمين

[الزونية]

أخ وليد ..السرد الأنيق والراقي.. خلانا متابعين..
متابعيين.
واصل..



والرحمة والمغفرة للدكتورة عسجد وربنا يتقبلها قبول حسن..
ويشفي والدتها

[محمد الواثق]

كل التمنيات للزعيم بالفوز وتفاؤل كبير واكيد بالتوفيق

[وليد عمر سعيد]

الاخت الزونيه ..

وشقيقي العزيز محمد الواثق ..

لكم امتناني على مشاعركم النبيلة .. التي تدل على دواخلكم العطرة..

لكم دعواتي بحياة فريدة ناجحة .. وباعمار مديدة ..

[وليد عمر سعيد]

أخ وليد ..السرد الأنيق والراقي.. خلانا متابعين..
متابعيين.
واصل..





باقات من الشكر لكي الاخت الزونية ..

على هذا المرور البنفسجي ..

الذي اضاف للبوست عبق آخر ..

هلا رايناك ثانية اختي ؟؟

[وليد عمر سعيد]

كل التمنيات للزعيم بالفوز وتفاؤل كبير واكيد بالتوفيق

قلتها بالامس في ردي على الاخت مدناوية ..

وبالفعل وارغو عمل عمايل ..

وانتصر مريخ العزة ..

واثبت من هو الاجدر بكل الالقاب االمحلية ..






" ويا انت .. ماتحرمنا جمال .. جمال جياتك "

[وليد عمر سعيد]

--------------------------------------------------------------------------------

تثائبت الرضيه وهى تقول أنا داخله غرفتى أنوم لمن الساعه تسعه تجى صحونى عشان معزومين أنا ونعمات عشا فى النادى العائلى . قال الديك فى سره سنه يا راس السنه طيب وكت أصلو نادى عائلى ما تسوقينا معاك أنا وأخوى البلوله ده ما نحن عايلتك ودخلينا معاك عالم البريستيج الدخلتيهو بى كيعانك العراض ديل يا الرضيه بت فضليه . قالها الديك برغم الأسى الذى يعتره والخوف من المجهول القادم والمصير القاتم الذى ينتظره أذا ما نفذت الرضيه تهديدها وأتخذت قرار الطرد والأبعاد ألى أحزمة الفقر (قالت مايو والسلمه وعد حسين .وياربى المناطق دى جداده بكون كيف برغم أتهام الرضيه لى بأننى مستهلك ومنتهى الصلاحيه وليس لى أى دور أيجابى غير العوعاى ) صاح البلوله فى الديك هوى آ المتره أب ريالتن سايله مقهى وين تطير عيشتك . ضحك الديك نظر البلوله أليه متحسرا وهو يقول حقيقه شر البلية مايضحك لكن بدور أسألك ياديك عشان تشرح لى بعض من كلام الرضيه باقى أنت ديك مثقف وبتخش الانترنت طوالى الرضيه دى بتقصد شنو بأنو أنك ما عندك دور أيجابى وأنك مستهلك ؟ دى يا البلوله يا أخوى عوزا ليها قعده لانو شرحها حيطول ويطول ويطول يلا نطلع لينا كراسى بره الحوش لحدى ما تجى مواعيد صحيان البرنسيسه الرضيه نكون حللنا كلام الرضيه ونشوف المعالجات البتحفظ لينا حقوقنا فى البلد دى قبال ما الفاس يقع فى الراس عامل راسك الكلو حرامات وطلاقات فى الهوا ساكت سنه يا العموله . هاك قريتر نايل دى .

[مدنيّة]

شنو ياوليد شيل الحال الاسفيري دا ياخ :mad:


جد ياوليد البوست دا بشد القارئ وكلنا متابعنه
بث خليك قريب وماتطول الغيبة

[الزونية]

صحبي الوحيد ..






" ويا انت .. تكفي نفسي ديمه فاقداك "..


قعدت مدة
أنظر لهذه الكلمات البسيطة
ولكنها بحجم كل الحب الموجود في الكون..
ولا أخفي سراً إن مابها من حميمية مشاعر أبكاني..

حفظكم الله لبعضكما..

[محمد الواثق]

..


قعدت مدة
أنظر لهذه الكلمات البسيطة
ولكنها بحجم كل الحب الموجود في الكون..
ولا أخفي سراً إن مابها من حميمية مشاعر أبكاني..

حفظكم الله لبعضكما..


الزونية لا اخفيك سرا اني تجمعني بوليد علاقة ودودة للغاية اسأل الله ان يديمها .

لك اختي ولجمال مشاعرك النقية والنبيلة تحايا اشجيها بدعوات صادقات بأن يجمعك الله بمن تحبي ويجعلك دائما الي جوارهم وينعم عليكم بمديد خيراتة ونعمة انه سميعٌ مجيب


ربنا يخليك يا الزونية كما انتي هكذا اثيرا يحمل كل هذا الود والطيبة

[وليد عمر سعيد]

..


قعدت مدة
أنظر لهذه الكلمات البسيطة
ولكنها بحجم كل الحب الموجود في الكون..
ولا أخفي سراً إن مابها من حميمية مشاعر أبكاني..

حفظكم الله لبعضكما..



الاخت الزونية ..

لك كل الود .. على هذه المشاعرالصادقه والنبيلة والرائعة في آن واحد ..

اما محمد الواثق .. حكاية ..

مش بقولو " حمادة سُكر زيادة " ..

انا بقول ليك بإيجاز شديد .. محمد الواثق قبيلة عربية أصيلة متمثلة في رجل ..

اليس في كل قبيلة شيخ مصدر حكمة وتوجية لافراد القبيلة .. محمد هو ذاك الحكيم ..

اليس فيها عابدٌٌ زاهد .. هو ذاك ..

اليس فيها من هو اهل للكرم .. محمد ابوالكرم ..

اليس فيها من هو شهم وفارس شجاع .. هو الواثق ..

وفيها من يخلص في عمله وهميم لمصالح الغير .. محمد يتفانا في ذلك ..

اليس فيها طفل وديع .. كل البراءة الطفولية متمثلة فية ..

اليس فيها ام حنينه وطيبة .. يحمل صفاتها ..

اليس فيها شاب وسيم .. محمد بنبخرو عديل ..:)

والله اختي الزونية .. هذه الحقيقه .. هذه صفاته .. ربنا يحفظو ويحفظك .
واسمحي لي ان اشكر بل احيي اثنين ..

الوالد ( ...... ) الباب مفتوح على مابداخل الاقواس لاختيار من هذا القبيل .. الغالي .. العزيز .. الرائع ..الخ

فقد عجزت والله على اختيار الكلمة المعبرة .. او انا في الحقيقه دون المستوى او التعبير عن هرم كبير بكل ماتحمل الكلمة من معنى .. احيية على هذا الغرس الطيب الذي غرسه بداخله .. منذ ان أذن في أذنيه عندما كان في المهد صغيراً ..

والوالدة الحبيبة .. التي راعت .. وحافظت .. وسقت هذا الغرس الطيب بما تحملة هذه الام الحنونه ..
حتى كان هذا الشاب .. احدى الثمار الطيبة .

فلكم اثنينكم كل الحب .. والشكر .. والامتنان .. على ماقدمتوه لنا .. اطال الله في اعماركم .. ومتعكم الله بالصحة والعافية .

عذرا اذا كنت قد اطلت عليكم بالكلام ..

تقبلي شكري على مشاعرك النبيلة ثانية اختي الزونية ..

وختاماً .. بقول لي الواثق ..





" يا انت .. البطن الجابتك والله مابتندم "

[moh_alnour]

أسألكم بالله أن تسألوا للمرحومة ( د. عسجد )
الرحمة .. و المغفرة .. و الثبات

لها الرحمة و المغفرة و لذويها الصبر و حُسن العزاء و لوالدتها صادق الدعوات بالصبر و الشفاء و الثبات
اللهم إن كانت مُحسنة فزِد في إحسانها و إن كانت مُسيئة فتجاوز عن سيئاتها
اللهم تثبتها بالقول الثابت تحت الأرض و يوم العرض
إنا لله و إنا إليه راجعون
و لك أخي وليد و لمحمد الواثق ( و الذي تشرفت بزيارته لي في مدينة جدة ) أطيب الأمنيات بدوام الصحة و العافية و أدام الله الود و المحبة بينكم كأسرة مترابطة

[وليد عمر سعيد]

شنو ياوليد شيل الحال الاسفيري دا ياخ :mad:


جد ياوليد البوست دا بشد القارئ وكلنا متابعنه
بث خليك قريب وماتطول الغيبة

ما كشف حال ياعمتو ..

ماعايز اكبر .. بس عايز اصغر روحي ..


تحياتي ............

[وليد عمر سعيد]

لها الرحمة و المغفرة و لذويها الصبر و حُسن العزاء و لوالدتها صادق الدعوات بالصبر و الشفاء و الثبات
اللهم إن كانت مُحسنة فزِد في إحسانها و إن كانت مُسيئة فتجاوز عن سيئاتها
اللهم تثبتها بالقول الثابت يوم تحت الأرض و يوم العرض
إنا لله و إنا إليه راجعون
و لك أخي وليد و لمحمد الواثق ( و الذي تشرفت بزيارته لي في مدينة جدة ) أطيب الأمنيات بدوام الصحة و العافية و أدام الله الود و المحبة بينكم كأسرة مترابطة


اللهم آمين ..
بارك الله فيك ..




وياريت الفرصة تسنح .. وونتشرف بي لقياك .. ونتعرف عليك من قريب .. يالذيذ انت ..

دمت بخير ،، حبيبنا ودالنور ...

[وليد عمر سعيد]

عودة بعد قليل ..



لعمنا بلبل ،،




انتظرونا ...........

[وليد عمر سعيد]

--------------------------------------------------------------------------------



يمكن أن يكلم الديك نفسه حينما يشعر بأن الخطر يتهدد وجوده فى هذه البيئة الجديده لأن المسأله أصبحت بالنسبة له وجود أو عدمه . أما أن يتحدث البلوله مع نفسه بطريقه خطابيه موجها حديثه للرضيه الغير موجوده الأن داخل المنزل هذا هو ما أدهش الديك وجعله فى حيره من أمره . أخفى الديك نفسه تحت السرير كى لا يقطع للبلوله ذلك الحديث والذى يسمعه لأول مره كان حديث البلوله أشبه بالمحاضره القيمه ذات الدلالات العميقه وكأن الذى يلقيها ليس هو البلوله وأنما هو أستاذ فى علم الفلسفه . لقد أصبحتى معى يا سيدتى شبه المؤسسه الأقتصاديه لا أحاسيس ولا مشاعر لقد سلبت منك المدينه كل الذى يجذبنى أليك وأستبدلتى حتى عطرك البلدى المعهود والذى كان يلون أرجلك بلون الشفق أستبدلتيه بالبرفان ومزيلات العرق الذى لا يجلب الفراشات عطره لأنه عطر مصنوع مثله وأبتسامة أهل هذه المدينة التى جلبتنى وأغرتنى ثم أغوتك ببهرجاتها الزائفه كان عطرك فى السابق هو عطر العود كما أسلفت يشتم أهل الحى عبقه بعد غروب الشمس وكانت أبتسامتك أكثر أشراقا حينما تصحين فى الصباح الباكر وكنت أصحو على حركة يدك تتفقدنى أن كنت مازلت بجانبك الأن أختلف كل شيئ كل شيئ صارت يدك الأن عندما تصحين من النوم تتفقد جهاز الموبايل تحت وسادتك أن كانت قد جاءت فيه رساله ليلا وأنت تنامين فى غرفتك الخاصه لوحدك سؤالى هل سلبتك سنين العمر منى أم أن حركة المال فى يديك هى السبب ؟ أم أن شمس أنوثتك قد بدأت فى الأفول وبدأت سن اليأس تدق على بابك ؟ أم أن قواى أنا قد خارت ؟ هذه أفتراضات ولكن الجواب يبقى عندك أنتى وحدك هنالك مسألة لابد من حسمها فلن يظل الواضع هكذا كما تظنين . كان الديك مذهولا وهو يسمع البلوله يتحدث بهذه اللغة وبهذه الجراءة وهو يقول ما الذى جرى للبلوله السمسارى البسيط وأى عفريت من عفاريت الجن قد أوحى أليه أن يتفوه بمثل هذا الحديث . أنه الصراع المرير الذى يعانيه البلوله فى دلالة العربات بعد أن تنكر له الرفاق أمثال محمود الزرافه ومبارك أب شلعه أحضروه للدلاله وهو يمتلك بوكسى موديل جديد وبدأو فى زحلقته تدريجيا ألى ان أوصلوه ألى رتبة سمسارى يحلف بالزور كى يحصل على حق كيس الخضار والأن أصبح محاصرا بأنفلات الرضيه وسيطرتها على الوضع فى المنزل وتركها واجباتها كزوجه وكأنثى تناست أن لها زوج . الديك يعلم كل ذلك لكن لا حيلة له هو أيضا مهدد بالطرد والرمى خارج المنزل منزل الأيجار الذى قامت الرضيه بعمل بعض الأصلاحات عليه كى يتناسب مع مستواها الأجتماعى الجديد طالما أن صديقتها نعمات تمتلك سيارة أتوس أرجوانية اللون تقف بها أحيانا أمام باب منزلها المؤجر . توقف البلوله عن الحديث فجأة حينما رأى الديك تحت السرير مذهولا.

[مدناوية]

رحم الله الدكتورة عسجد .. وأسكنها فسيح جناته ..


*********


ربنا يديم المودة بينك أخي وليد ومحمد الواثق

ونحن زاتنا حنبخر أخونا محمد الواثق من العين ..

لأنو الصفات دي نادراً تلقاها في شباب زمنا دا ..

ربنا يحفظكم ويغطيكم من العين



***************


الله يكفينا شر تطور الرضية ..

واصل خلينا نشوف أخرتها شنو ..

متابعين بكل ما لدينا من طاقة ..

[محمد الواثق]

رحم الله الدكتورة عسجد .. وأسكنها فسيح جناته ..


*********


ربنا يديم المودة بينك أخي وليد ومحمد الواثق

ونحن زاتنا حنبخر أخونا محمد الواثق من العين ..

لأنو الصفات دي نادراً تلقاها في شباب زمنا دا ..

ربنا يحفظكم ويغطيكم من العين



***************


الله يكفينا شر تطور الرضية ..

واصل خلينا نشوف أخرتها شنو ..

متابعين بكل ما لدينا من طاقة ..




اللهم آميـــن

شكرا وكلك زوق


يامدناوية الرضية آخرته وضحت الصوت اسي عند البلولة النشوفة برفعوا ولا بطلع قاعد كنب سااااااااااااي
هو بيني وبينك لو ختة الديك دة العوجة ما بتجيوا


بس الديك شفاتي وحريف
واصل يا وليد ياخ الاحداث سخنت

[وليد عمر سعيد]

رحم الله الدكتورة عسجد .. وأسكنها فسيح جناته ..


*********


ربنا يديم المودة بينك أخي وليد ومحمد الواثق

ونحن زاتنا حنبخر أخونا محمد الواثق من العين ..

لأنو الصفات دي نادراً تلقاها في شباب زمنا دا ..

ربنا يحفظكم ويغطيكم من العين



***************


الله يكفينا شر تطور الرضية ..

واصل خلينا نشوف أخرتها شنو ..

متابعين بكل ما لدينا من طاقة ..



اللهم آمين ..

تسلمي يامدناوية .. على هذه الدعوات الصادقات ..

والمرور البنفسجي هذا ..:)

الرضية هلوست بي الراجل .. عايزة تجننو ..:cool:

كدي نشوف .. :rolleyes:

خليك قريبة ...

[وليد عمر سعيد]

اللهم آميـــن

شكرا وكلك زوق


يامدناوية الرضية آخرته وضحت الصوت اسي عند البلولة النشوفة برفعوا ولا بطلع قاعد كنب سااااااااااااي
هو بيني وبينك لو ختة الديك دة العوجة ما بتجيوا


بس الديك شفاتي وحريف
واصل يا وليد ياخ الاحداث سخنت


اخوي ..

خليك قريب .. فاصل اعلاني بسيط ..

ونرجع ليكم ..

اوعه ايدك من الرمودكنترول ...



" ويا انت .. مشتاق لي شوفتك لي زمن "

[وليد عمر سعيد]

--------------------------------------------------------------------------------



البلوله يحدث نفسه والديك أيضا يحدث نفسه فقط الرضيه نفسها الأمارة التى تحدثها بالأنطلاق ألى مدارات شاهقه من مدارات الثراء السريع فى هذه المدينه الملعونه تأسيا بنعمات صديقتها والتى رمتها الأقدار بأن تسكن بجوارها وهى الأن تجلس بجوارها فى مقعد سيارتها وهى تطالع أيقاع الحياة المتسارع فعلا يالرضيه كنتى ضايعه فى الحله .
البنات الفى الشوارع فاكات شعرن الطرح الخفاف بألوانها الجميله ( يالرضيه ماتجيبى ليك منهن تلاته أربعه وتفكى شعرك لكن هو وينو الشعر يا الرضيه )) كانت هى نفس الرضيه التى كانت تحدثها حينما كانت تنظر من خلال زجاج سيارة نعمات لأحدى الفتيات والتى كانت تقود سياره فارهه توقفت عند شارة المرور كان زجاج سيارتها مغلق ولكن أنبعاث هواء التكييف والذى كان يحرك بعض من خصلات شعر الفتاة . نبهتها نعمات وهى تضحك سارحه وين يالرضيه عجبتك سيارة البنيه ؟ ضحكت الرضيه وهى تقول الاتنين السياره وست السياره .
فى الجانب الآخر وبعد أن أستمع الديك لمحاضرة البلوله المدهشه بداء الديك يترنم بلحن جميل ( الروح تروح ما مشكله . لاتغيب شمس لا يهل قمر ما مشكله يبقى السحاب من غير مطر ما مشكله . يرمونى فى نص البحر لايجيبو لى الناس خبر ما مشكله . المشكله جيتك هنا هى المشكله ورينى حل للمشكله . أندهش البلوله حتى خرجت أعينه من أجحارها . شكيتك على الله يالديك جبت الكلام ده من وين ؟ ضحك الديك وهو يقول . ياسيد دى نغمه مركباها الرضيه فى الموبايل بتاعا وأنا من كترة تكرارا حفظتها عديل كده . الرضيه دى ياسيد بلبل أمراءة متطلعه جدا وأصبحت الأن توصف بالبرستيج تعرف معنى برستيج يابلبل ؟ الموبايل بتاعا الأن عارفو يابلبل ؟ آخر موديل وأنت ماذلت عندك تلاتين عشره مقايطو من ست شاى والخوازيق راكباك حتى فى الموبايلات من يوم دخلت دلالة العربات وكل يوم خازوقك بيكبر ويكبر والخوازيق أنواع يا بلبل أخوى ويتخوزق أحدكم بقدر ذكائه وأكثر الناس تخوزقا الأذكياء فالمتفولحون ثم الامثل فالأمثل ودى حكمة ربنا يا البلوله أخوى وكدى عاين البلد دى كلها وشوف الخازوق القاعده فوقو أكبر خازوق فى الدنيا ناجرنو وين ؟ مو معروف جابو وقعدو فوقا . فغر البلولة فاه وهو يقول أنت ما ديك عادى أبدا وأكيد مخالتك شيى؟

[moh_alnour]

وكدى عاين البلد دى كلها وشوف الخازوق القاعده فوقو أكبر خازوق فى الدنيا ناجرنو وين ؟
مو معروف جابو وقعدو فوقا . فغر البلولة فاه وهو يقول أنت ما ديك عادى أبدا وأكيد مخالتك شيى ؟


يا ريس ما تخلينا في خاذوق البلولة دا أحسن :eek: و الله تباري لي ديك الرضية دا يجيبا ليك ضقلا يكركب ;)

[مدناوية]

--------------------------------------------------------------------------------
فغر البلولة فاه وهو يقول أنت ما ديك عادى أبدا وأكيد مخالتك شيى؟





عاد كان الديك دا ديك عادي تبقى مصيبة ..


:p:p:p:p


والله ضحكتنا يا وليد ..

يديك العافية .. ويديك الفي مرادك


واصل ونحن متابعين

[وليد عمر سعيد]

[COLOR="Black"]


[SIZE="4"]يا ريس ما تخلينا في خاذوق البلولة دا أحسن :eek: و الله تباري لي ديك الرضية دا يجيبا ليك ضقلا يكركب ;)

ياحبيبنا ...

انا زاتي قلت دي كتاحة عجاجه قااااااااايم ..


جريت جري الحق تسجيل الانتخابات اول امس ...:cool:


عشان مايفهمونا غلط ..... ولا شنو ؟ ;) :p

[وليد عمر سعيد]

عاد كان الديك دا ديك عادي تبقى مصيبة ..


:p:p:p:p


والله ضحكتنا يا وليد ..

يديك العافية .. ويديك الفي مرادك


واصل ونحن متابعين


عادي بالزبادي ...

بس شقي ومجنون ..;)


اللهم آمين يارايعه انتي ،، وليك كمان يارب ..


تسلمي كتير اختي مدناوية ..

[وليد عمر سعيد]

لحظات انيقة ،، جميلة ،، رائعه ،، موسيقية ..

عزفت الحاناً من عبير مروركم ..

تردد حروف اسمائكم انشودة ..

قضيناها سويا ،،

٭٭٭٭٭٭

بكم ازدان سماء هذا البوست بريقاًً ..

نجوما تتلألأ في اعماق قلوبنا ..

٭٭٭٭٭٭٭٭

والان يعزف الزمان لحن الختام ،،

حتماً ،، لنا لقاء ..

وحتى آخر الانفاس ..

حتما ،، سنجتمع بشوق جديد ..

فقط .. كونوا في نفس المكان وفي ذاك الزمان ..

[وليد عمر سعيد]

الحلقة الأخيرة من المسلسل اليومي ..



( يوميات البلولة )





" قريباً "



.
.
.
.
.
.
.
.
.
.
.
.
.
.
.
.

[محمد الواثق]

الحلقة الأخيرة من المسلسل اليومي ..



( يوميات البلولة )





" قريباً "



.
.
.
.
.
.
.
.
.
.
.
.
.
.
.
.



ولي احنا ورا هنا الكراسي الفوق حاجزين

[مدناوية]

اللهم آمين يارايعه انتي ،، وليك كمان يارب ..


تسلمي كتير اختي مدناوية ..



الروعة إقتبستها من جمال روحك ..

تسلم ويسلم شبابك .. يا زينة الشباب ..

[الزونية]

واصل يارائع...
منتظرين

[وليد عمر سعيد]

ولي احنا ورا هنا الكراسي الفوق حاجزين


ياباشا ..

مكانك محفوظ .. في عيونا ،، وجوه قلوبنا ..

بس ابقى طالي علينا ..







" ويا انت .. حرف اسمك جمال الفال ،، وراحة البال ،، وهجعة زول بعد ترحال "

[وليد عمر سعيد]

الروعة إقتبستها من جمال روحك ..

تسلم ويسلم شبابك .. يا زينة الشباب ..



بالجد يامدناوية ماعارف أقول ليك شنو ..( وش خجلان شديد )

والله لو قلت ليك ،، لدرجة ندمت انها ماطويلة المسلسل ،،

والحلقة الاخيرة جاهزة بس ماهاين علي انهي اللمة الحلوة دي ..

لكن الجاية مسلسل تركي بس ( مهند ونور ) ، ( عاصي ) ، ( مسلسل مكسيكي ) .. بس ما تنتهي اللمة الحلوة دي ..


كوني بخير دائماً وابداً ..

[بنت الرفاعي]

ياربي الحلقة الأخيرة دي بتكون كيف ؟؟؟!!!

[وليد عمر سعيد]

واصل يارائع...
منتظرين


الزونية ..

تسلمي كتير ..

وقريباً جدا .. بس خليك قريبة ..

[وليد عمر سعيد]

ياربي الحلقة الأخيرة دي بتكون كيف ؟؟؟!!!

moram ..

انتي وين .. والله فقدناك ..:rolleyes:

الاخيرة دي طين وماطين ..

عجيبة عدييييييييييييل ..

بس خليك معانا الليلة ..

وماتنقطعي مننا ..

[بنت الرفاعي]

moram ..

انتي وين .. والله فقدناك ..:rolleyes:

الاخيرة دي طين وماطين ..

عجيبة عدييييييييييييل ..

بس خليك معانا الليلة ..

وماتنقطعي مننا ..

طوّالي موجودة ومتابعة ( مع إني مابحب أتابع المسلسلات اليومية ذات الحلقات المتصلة ببعضها ) وأصلي ما إنقطعتَ :rolleyes:;)
ومازلنا منتظرين :)

[moh_alnour]

يا ربي الحلقة الأخيرة دي بتكون كيف ؟؟؟!!!

أتوقع أن يكون موضوعها موسم الهجرة إلى الريف ( أي هجرة عكسية ) بعد قرار شُجاع يتخذه البلولة للمحافظة على سفينته من الغرق
و أهلنا قالوا ( العرجة لي مُراحا )
أتمنى من قلبي أن يأتي اليوم الذي نشهد فيه هجرة عكسية من الخرطوم إلى الجزيرة و الشمالية و مدني و الغرب الحبيب
و أن نرى مشاريع تنموية و خِدمية في كافة مُدن السودان تجعل من مناطق السودان الأخرى مناطق أستقرار و جذب
همسة : معليش يا وِلي لو شطحتا شوية في البوست فلا نملك غير الدعوات فأنا أحزن جدا ً عندما أسمع عبارة ( ناس فلان رحلوا الخرطوم )

[وليد عمر سعيد]

طوّالي موجودة ومتابعة ( مع إني مابحب أتابع المسلسلات اليومية ذات الحلقات المتصلة ببعضها ) وأصلي ما إنقطعتَ :rolleyes:;)
ومازلنا منتظرين :)


انشاء الله والله دايما تكوني مجودة ..

وامورك ومزاجياتك عال العال ..


اها بس مايكون وجودك صامت .. وتلبسي طاقية الاخفى ..:p:)

اعملي حركة في شكل وردة ..:cool:

وورينا ..........

[وليد عمر سعيد]

أتوقع أن يكون موضوعها موسم الهجرة إلى الريف ( أي هجرة عكسية ) بعد قرار شُجاع يتخذه البلولة للمحافظة على سفينته من الغرق
و أهلنا قالوا ( العرجة لي مُراحا )
أتمنى من قلبي أن يأتي اليوم الذي نشهد فيه هجرة عكسية من الخرطوم إلى الجزيرة و الشمالية و مدني و الغرب الحبيب
و أن نرى مشاريع تنموية و خِدمية في كافة مُدن السودان تجعل من مناطق السودان الأخرى مناطق أستقرار و جذب
همسة : معليش يا وِلي لو شطحتا شوية في البوست فلا نملك غير الدعوات فأنا أحزن جدا ً عندما أسمع عبارة ( ناس فلان رحلوا الخرطوم )

كلنا والله نتشارك هذا المُنى ..

ولكن ... ماذا نفعل لنوقف هذا النزوح ..

صدقني ليو اثارة سلبية شديد ..

امكن واحده من اثاره السلبية .. حنشوفها في الحلقة الاخيرة ..

الله غالب اخوي محمد ..

[وليد عمر سعيد]

الحلقة الاخيرة ..




من المسلسل اليومي .. يوميات البلولة ..

(( واللي اتبلبل بعووووووم ))



بعد قليل .......

[وليد عمر سعيد]

-------------------------------------------------------------------

ومين قال ليك أنا ديك عادى يا البلوله كل الحاصل كانت لدى تطلعات وأحلام تبخرت كذرات الماء من على سطح هذه المدينه الغريبة التشكيل ليلها ليس كنهارها يابلبل.أن دورى كمؤذن قد شطب تماما هنا ففى قاموس هذه المدينه لا توجد وظائف لمؤذنين أمثالى أذا ماذا تبقى لى غير أن أعاشردجاجه أو دجاجات غير موجودات أصلا هنا فكل دجاجات هذه المدينه عازبات محبوسات فى الأقفاص لا بعولة لهن ويبضن من غير أزواج لقد أبادو الذكور لأنها لادور لها ولاحوجة لها أيضا أسمعنى جيدا ياصديقى بلبل أنا وأنت والرضيه حينما كان اللورى متجه بنا ألى هذه المدينه كان كل واحد فينا يرسم صورا فى الخيال وكيف ستكون حياتنا الجديده أنت فعلا قد سبقتنا ألى هنا ولكن أنا والرضيه كنا نختلف عنك قليل. أنا الأن مصدوم والرضيه مبهوره وغير مصدقه ومتأسفه على سنوات العمر التى قضتها فى القريه عواسة كسره وشراب جبنه فى ضل الضحى أنت أغرتك الدلاله حينما سلبوك البوكسى وضحكو عليك حينما أركبوك فىى الكريسيدا وفور جلوسك خلف الدركسون أنتابك شيئ من الأنتفاخ الفشوشى( الفشوشى دى حلوه يابلبل ) ذلك حينما بدأت تنظر ألى لفة عمامتك المشغوله من خلال المرايه الداخليه للكريسيدا والتى كانت بدية لخوازيقك المتتاليه كنت تعتقد يابلبل بأن ركوبك فى الكريسيدا سيجعلك فى مصاف رجال الأعمال فى هذه المدينه الملعونه ومادفع لك من فرق فى المقايضه يا بلبل أشتريت به ملابس وعطور لزوم أن تستكمل وهما شخصية رجال الأعمال . كان كل ذلك وهما وحلما تبخر بسرعه بعدها لم تتماسك يابلبل وأبلغ دليل على عدم تماسكك أنك لم تستطع أتخاذ أى قرار أو حتى مواجهة مع الرضيه المنطلقه ألى عالم الثراء بسرعه صاروخيه . بلبل ياصديقى العزيز هنالك ظرف قدرى قد جمعنا أنا وأنت فى هذا المكان أنا سوف أغادره وهذا شيئ حتمى أن تذبحنى الرضيه وتستفيد من لحمى لا أعتقد لأن الرضيه التى أصبحت تتناول عشائها من ماكدونالد وكنتاكى قطعا سوف تتأفف حتى من النظر ألى لحمى لذا فأن مسألة نفيى ألى أطراف المدينه وارد جدا فلقد حلمت كما حلمت الرضيه معى ذات يوم أن تجد لى بعض الدجاجات الكويتيه كى أتبعلها كان ذلك حينما كانت تربطنى على سياج اللورى الذى أتى بنا ألى هنا الأن كبرت أحلامها وتبخرت أحلامى ألى الأبد هى الأن تبحث عن مهندس ليرسم لها خرطة لقطعتها فى كافورى أما انا فلا دجاجة كويتيه بيضاء تونس وحشتى وأقضى معها باقى عمرى ولاحتى بلوبلو بلديه مظعمته امشى أمامها وأرمى لها ما ألتقطه من خشاش الأرض تطيعنى حين آمرها بالمجيئ ألى حين أحتاجها مشكلتك أنت يا البلوله أنك لم تعرف سر النساء حتى الأن لأنك لم تدخل النت ولم تقراء ماكتب عنهن أضعت مالك فى الدلاله وأضعت وقتك مع ستات الشاى لم تطلع على ماكتب فيهن من حكم وأشعار وقصص تثير الخيال حيث قال أحدهم فيهن . (أن أبيض شعر المرء أو قل ماله فليس له فى ودهن نصيب) وأنت يابلوله أخوى الأتنين دقشنك . راسك بقى حواشة قطن وجيبك قد سكنه العنكبوت أنا ياسيد بلبل مصيرى قاتم وتحددت معالمه ولكن مصيرك أنت قد يكون أشد قتامة أن لم تنتبه وتنحنى لهذه العاصفه بل عليك بالتسليم بالأمر الواقع وأمامك خياران لا ثالث لهما . ذعر البلولة من حديث الديك قبل أن يكمل الديك حديثه فأنتهره البلوله ( أسكت ياديك يا أبورياله كمان دى آخرتا نوعك ده يورينى الخيارات كمان ) أنا البلوله ود فضل المولى تنصحنى أنت وأبقى كمان تحت رحمة الرضيه قال خيارين قال . صمت الديك وصمت البلوله حينها كان صوت سيارة نعمات قد أعلن وصولها هى والرضيه . دلفت الرضيه يسبقها عطرها الى داخل الدار وبادرت البلوله بالسؤال قبل السلام خبارك يالبلوله الليله جيت البيت بدرى كده؟ لم يجب البلوله فأردفت متبسمه الليله ستات الشاى عندكم قفلن بدرى وله شنو؟ ضحك الديك عندما سمع جملة الرضيه الأخيره وهو يقول فى سره ماقلنا ليك يابلبل المره دى بقى عندها لاب توب وبتخش النت كمان وأنت مدفون فى الدلاله دى بيعه فيها فرقه ودى بتلحس سيدا المرقه . جمع البلولة بعض من شجاعته قائلا يا وليه ستات شاى شنو أنا ماطلعت الليله من البيت حتى حق مواصلات ماعندى. نظرت الرضيه ألى البلوله وهى تقول طيب وينن أصحابك ناس أب شنب وأب ضنب ومحمود الزرافه خلاص خوة فرتق بعد لحسو العندك كلها فكوك عكس الهواء يا البلوله . كان لحظتها الديك ينظر بعينيه الخرزيتين ألى البلوله ولسان حاله يقول بالله هسع مين فينا أبورياله . قال أبو رياله قال . ثم أختفى حتى لاتفرغ عليه الرضيه باقى الرصاص أما البلوله فقد ساعد الرضيه فى حمل بعض الأكياس متوجها بها نحوالمطبخ وهو يدندن الروح تروح ما مشكله . ينسى الفراش عطر الربيع ما مشكله . ينسى الوديع زولو الوديع ما مشكله . الشارى لو فكر يبيع ولو ضاعت الأعمار تضيع ما مشكله. المشكله شوتك بقت هى المشكله . ورينى حل للمشكله .قهقه الديك وهو يقول أيوه لازم تعمل كده يا أبو رياله لأنو فى تقديرى الشوته حتكون بالبوز ..

. .

[moh_alnour]

خذلتني يا وليد في النهاية دي
أتوقعتك ح تنتصر لينا في نهاية القصة لكن شكلك كدا ح تشمت فينا الجندر ;)
هذا زمانك يا مهازل فأمرحي :(
و لكن المؤكد هو أن من لا يملك قوته لا يملك قراره و قوامة الرجل في بيته بالإنفاق

[وليد عمر سعيد]

خذلتني يا وليد في النهاية دي
أتوقعتك ح تنتصر لينا في نهاية القصة لكن شكلك كدا ح تشمت فينا الجندر ;)
هذا زمانك يا مهازل فأمرحي :(
و لكن المؤكد هو أن من لا يملك قوته لا يملك قراره و قوامة الرجل في بيته بالإنفاق


وبقت النهاية المحزنة ..:cool:

دي النهاية المتوقعة .. قولي كيف ؟؟

البلولة قِِِبل ياكل " فطيرة الهوت دوق " .. وقالها له الديك حينها : من لايملك قوته لا يملك قراره .

وهلم جره ....

قِبل يتقال ليو بلبل .. وهو مادفعني لاكتب عنوان الحلقة الاخيرة .. (( اللي إتبلبل بعووووم ))

ولا رايك شنو ؟؟

[معتصم عيدروس]

يعني في النهاية البلولة استسلم..

اعتقد انو القصة ما انتهت .. بس انت ضقت ذرعاً من الالتزام والتفكير ..

سننتظر الجزء الثاني .. ومؤكد انو الديك حا يكون طلع من الفيلم .. وحتى البلولة في النهاية برضو حا يطلع .. دا احساسي .. انت رايك شنو؟

[الزونية]

لك التحية وليد..والقصة رائعة..ولكن الكثيرون لم يتوقعو هكذا نهاية..
كانت النهاية المحتملة للرضية بأن تلعب المدينة بها لعبتها لإندفاعها ..
وخوضها في مدنية لا تعرف لها سبيل..
أما البلولة فكان مستسلم من البداية..
وأصبح غير ممتلك لقوته ولا لقراره...
وبقت النهاية المحزنة..

[وليد عمر سعيد]

يعني في النهاية البلولة استسلم..

اعتقد انو القصة ما انتهت .. بس انت ضقت ذرعاً من الالتزام والتفكير ..

سننتظر الجزء الثاني .. ومؤكد انو الديك حا يكون طلع من الفيلم .. وحتى البلولة في النهاية برضو حا يطلع .. دا احساسي .. انت رايك شنو؟



والله يا استاذ شغلتكم دي قاسية عديل ..:cool:

لكن دي النهاية ..

اصبح حال الرضية .. حالها حال جارتها نعمات .. فنعمات كان اسمها الحقيقي النعمه .. عندما جاءت الى الخرطوم .. وكانت قصتها مشابهه تماما للرضية ..

والبلولة الذي ضحك في يوم على زوج نعمات .. ونعته " بالدلدول " . اصبح هو الآخر .. بلبل دلدول الرضية ..
والديك العجيب .. الى اطراف المدينة ..

الرضية عملتها شييييييييييييييييينه .. :p

[وليد عمر سعيد]

لك التحية وليد..والقصة رائعة..ولكن الكثيرون لم يتوقعو هكذا نهاية..
كانت النهاية المحتملة للرضية بأن تلعب المدينة بها لعبتها لإندفاعها ..
وخوضها في مدنية لا تعرف لها سبيل..
أما البلولة فكان مستسلم من البداية..
وأصبح غير ممتلك لقوته ولا لقراره...
وبقت النهاية المحزنة..


المرهفة .. زونية ..

روعة القصة .. اتت بمتابعتكم .. وتواصلكم .. وتزيينكم لها بمروركم المتفرد .. غرستم بداخلها .. ورودا .. حتى فاح شذى عبيره .. ليكسبها من هذا العبير كاساًً .. من دنه العطر ..

ولكن .. قال الزمان كلمته ..

وبالفعل .. بقت النهاية المحزنه ..

كل الود .. اختي الزونية ..



*تخريمة : هسي حبوبة دي الدخلها في النص شنووو :cool:

[بنت الرفاعي]

انشاء الله والله دايما تكوني مجودة ..

وامورك ومزاجياتك عال العال ..


اها بس مايكون وجودك صامت .. وتلبسي طاقية الاخفى ..:p:)
ياهو ذااااااتو ;):p:p

اعملي حركة في شكل وردة ..:cool:
:):):):)

وورينا ..........

إن شاءالله , و الحمدلله لحد الآن مزاجياتي عال العال .:)

[بنت الرفاعي]

نهاية متوقعة لأنه من سيّاق القصة الرضيّة مخها إتغسل ببوهية التمدن والتحضر ولكن بطريقة وصورة خاطئة, و إتكبرت على حالها , ممكن كان نسميه تطور في حال إنها ما إتكبرت وما إتنكرت لأصلها , لكن إتخلفت في خضم التطور , وحبذت إنها تكون زي بعض الناس اللي بيبقو من دون أصل للفخر به .

[هبوية]

الأستاذ / وليد عمر سعيد السلام عليكم ، الكتابه بالغة الدارجه من أصعب أنواع الكتابات ويعتبر الكاتب بهذه اللغه من الافزاز والاخيار ويعتبر رمز من رموز فن الروايه أوالقصة القصيره ، أعجبني التسلل في الحكايه ، وأختيار الموضوع . وتسلسله بطريقه مدوسه وحتي طريقت السرد، وايصال مفهوم القصة بطريقه بسيطه جداً . أتمني من قلمك ان يكثر ويبدع أكثر ويمتعنا بالجديد والمفيد.

[محمد الواثق]

وليد ابدعت وانت تقود احداثيات هذا المسلسل الجميل بكل جدارة
ولكن يسبقني اليك سؤال هل كانت هناك اسباب وراء انقطاع بنات افكارك ام هي فعلا الظروف التي دعتك للتوقف فجأة وبدون تسلسل .كما فعلت الظروف بمن ماوراء النهر و القوقاز
ام هكذا نحن نقف ولانواصل الترحال استقر بهم الحال وقفت حال البلولة بمن يرعي اين ما استقرت بها وللهاء هجاءات كثيرة نسير بها عند بوست قادم يحمعنا قريبا بأذن الله ولضيق الوقت سيصبح العام القادم موعداًُ لنا



ارشح من هنا هذا البوست الرائع
لجائزة افضل موضع لنهاية العام
ان اجيز استثنائة لولجة عند اوآخر الشهر



ويا انت مهما الظروف تقسى
ارسى ومعاك انسى

[مدناوية]

نهاية مأساوية يا وليد ..

لكن كانت مناسبة لأحداث القصة ..


الله يجازيك يالرضية ..

ضيعتي بلبل والديك ..

[مدناوية]

كنت متابعة جيدة للقصة ..

ما تحرمنا من كتاباتك ..




فتك بصحة وعافية ،،

[telecom]

المبدع وليد سعدت كثيرا بقراءة يوميات البلولة وهى بالجد قصة من الواقع
دا حال القروى البسيط لما يدخل المدينة ويصطدم بالواقع المرير ربنا يعين
امتعتنا .......... واسعدتنا................ ونحن ننهل من ابداعك الواقعى الرائع
وهذه هى النهايات الحقيقية للقصص المماثلة.......وفقنا الله واياك..........
وما تنقطع منتظرين ابداعاتك يا رائع

[الزونية]

المرهفة .. زونية ..

روعة القصة .. اتت بمتابعتكم .. وتواصلكم .. وتزيينكم لها بمروركم المتفرد .. غرستم بداخلها .. ورودا .. حتى فاح شذى عبيره .. ليكسبها من هذا العبير كاساًً .. من دنه العطر ..

ولكن .. قال الزمان كلمته ..

وبالفعل .. بقت النهاية المحزنه ..

كل الود .. اختي الزونية ..



*تخريمة : هسي حبوبة دي الدخلها في النص شنووو :cool:...



والله ضحكتني ياوليد الله إديك العافية....

القصة رائعة..أها منتظرين القادم...
نخلي الكراسي محلها؟؟:):)