انا والسني ونساء خارج الشبكة [الأرشيف]

درديري كباشي

09-11-2009, 07:48 AM

بالامس جمعتني مكالمة تلفونية مع استاذنا محمد السني دفع الله استمرت قرابة الساعة . كان حوارنا يدور حول الشخصية الدرامية في مجتمعنا السوداني .. والشخصية الدرامية هو شخص له مواصفات تجعله محور لحديث الناس ومجالسهم.. يستمعون لكلامه بتشوق يتسيد المجالس .. يحكوا عنه اذا غاب .. وعادة يكون شخص لطيف و( لذيذ ) ولا يشترط انه يكون ممثل انما الابداع فيه فطري وغير مصطنع.. اذا كان الشخصية الدرامية شخصية جادة و يجبر الناس على الاستماع له صاغرين هذا ما يعرف بالكاريزما .. وليس هو موضع حوارنا .. انما كان هؤلاء اللطفاء .. وليس بالضرورة ان يكون الشخص اللطيف عاقلا .. ممكن يكون مجنون صاحب تعليقات ساخره ونكات يتشوق الناس لحضوره .. تطرقنا لامثلة من هذا النوع الى ان وصل بنا الحوار الى نساء خارج الشبكة .. وهن نساء فقدن زينة العقل ولكن كان جنهن مميزا فيه كثير من العجائب .. اوردت انا من عندي امثلة من كسلا وهن من ساحكي عنهن الان .. وكذلك سياتي السني بنمازجه المتفرقة ..
والشئ الذي يحير في النساء هو سؤال يطرح نفسه هل الجنون يضيف قدرات خارقة اضافية للانسان .. لان بعض المجانين ياتون بتصرفات لا يستطيع ان يؤديها العاقل .. اذكر مثال في كسلا كان هناك شاب مجنون اسمه ناصر اذا سالته في اي وقت عن الساعة نظر الى الشمس بعين نصف مغمضة وقال لك الساعة بالظبط كم تكون ، واذا وجدت فرق تاكد ان ساعتك غير مظبوطة .. والذي يحير ايضا في المجانين انه لا يوجد مجنونان يتفقان في الصفات والتصرفات .. كل مجنون له تصرفات تختلف عن الاخرين وحتى ان صنفه الاطباء حسب تصنيفهم لامراض الجنون مثل المنخوليا والفصام وغيرها .. انا شخصيا عن تجربة واحتكاك لم اصادف مجنونين لهم نفس التصرف .
والسؤال هو لماذا لكل مجنون صفات خاصة به انا اعتقد لان مقومات العقل كلها تدور حول محور واحد وهو الحق والناس كلهم يجمعون على الحق وحتى ان تنكروا له .. والحق يشمل الحب والجمال والعدل والمساوة والشجاعة وكل الصفات الايجابية التي تزين عقل الانسان .. وكل الناس مجمعين حولها .. لذلك العقلاء متشابهون في تصرفاتهم .. اما المجانين لانهم ليس لديهم معيار واحد ليقيسوا به . .فلذلك قد يرى المجنون ان التخلص من الملابس والعري التام هو قمة الستر والحشمة..
الموضوع الفلسفي حول الجنون والعقل قد يطول .. دعونا نحصر الحوار حول النمازج .. انا في الاول ساقدم ثلاثة شخصيات عايشتهن في كسلا وهن حليمة وخديجة والثالثة اثيوبية لا اعرف اسمها لكن دعونا نسميها اببا . ومن ثم ننتظر شخصيات السني...

مدنيّة

09-11-2009, 08:03 AM

والسؤال هو لماذا لكل مجنون صفات خاصة به ؟؟..

ياعمو ديرديري
شخشيا لما اجن ح اجاوب عن السؤال دا بصورة مستفيضة :cool:

همسة : ممكن تقبلوني معاكم في شبكتكم الطاشة دي ؟؟ :(

درديري كباشي

09-11-2009, 08:08 AM

كنت ايامي الطالب بالجامعة اقضي الاجازة بالعمل في المكتبة مع الوالد بسوق كسلا وكانت حليمة و كذلك خديجة ( ساتي لها لاحقا ) .
كانت حليمة وهي من اصول ارترية امراه كبيرة في السن عمرها قارب الستين عاما او فوف ذلك ... هذه الحليمة لاتسكت ابدا فهي في حالة حكي مستمر .. مرات ترطن بلغة التقري ومرات تتحدث عربي .. لو كنت سارح تحس كانه مجموعة من النساء ماشات مع بعض ..

وفي ذات الوقت و الغريب في حليمة انها ماكانت تمد يدها قط او تشحذ انما كانت تقف فقط قرب باب المكتبة وهي مواصلة في ونستها .. وعندما يمد لها الوالد او اي من الحضور الصدقة تتناولها وهي مواصلة في حديثها مع رفقائها المختفين عنا نحن على الاقل ..

مره انا بالصدفة اكتشفت ملكة عجيبة جدا حيرتني انا وكذلك حيرة استاذنا السني عندما حكيتها له .. وهي ان لحليمة قدرة خارقة على نسج وتاليف القصص بصورة تجعل اسامة انور عكاشة يحسدها . لدرجة يمكن تقدم لها مجرد اسم فقط لاغير وهي تنسج حوله قصة محبكة تماما كانها تعرفه فعلا ...

بدات الصدفة كذلك دعونا نحكيها في شكل حوار ..

انا : حليمة انتي سعدية اخبارها شنو ؟؟
هي : سعدية ما شاء الله عرسوها وطلعت زي القمر وسفروها السعودية وهسع يمكن امها تسافر ليها لانه قالوا حامل و و و و .
انا : وعمر عمل شنو ؟؟
عمر: عمر الله يلعنو قال عاوز يطلق فاطمة وهي ما عملت ليه حاجة بس قالت ليه وديني حلفا لامي .. وقال ليها اوديك مطلقة .. وهو راجع من هناك واللوري بتاعه انقلب بيه يستاهل و و و و و ..
وهي تكون مواصلة لو لم اقطع انا حديثها بسؤال ثاني عن شخص آخر ..

اكتشفت انا انه حليمة شخصية ممتعة جدا .. وكنت اقدمها لزملائي الذي كانوا يزوروني في المكتبة ..

ولكن الشئ الذي يحير فعلا انا حاليا بكتب في قصتها اعصر زهني حتى اتذكر مواقف مشابهة واتوقف .. لكن هي شخصيا لم تكن تتوقف ابدا بل كانت تواصل في الحكي اذا خلصت اسئلتي الوهمية .. وتواصل تحكي عن احداث آخر سؤال طرحته لها ..
هي : عثمان سيد البيت قاليه تفضي البيت لانه تم ستة شهور ما دفع الاجار ودخل جوة البيت وجاب عصاية وضرب سيد البيت لامن كببه الدم والشرطة جات اخذته وودته الحراصة وهسع هو قاعد في السجن ويدور في الوساطات عشان سيد البيت يسامحه .. وسيد البيت قال ما يسامحه الا جرحه يبرى .. والراجل عندو سكري والجرح ابى يبرى والجماعة قالوا لعثمان عمك دا يمكن سنة جرحه ما يبرى . ووووو الخ. ( و دي مني انا لانه حليمة لاتسكت )

درديري كباشي

09-11-2009, 08:11 AM

ياعمو ديرديري
شخشيا لما اجن ح اجاوب عن السؤال دا بصورة مستفيضة :cool:

همسة : ممكن تقبلوني معاكم في شبكتكم الطاشة دي ؟؟ :(

براك جيتي نحن بس ظبطنا الدش وهو التقط الموجات المشابهة ..

وانت الشخص الوحيد القادر يجاوب على السؤال اعلاه ونحن في الانتظار

مدنيّة

09-11-2009, 08:27 AM

براك جيتي نحن بس ظبطنا الدش وهو التقط الموجات المشابهة ..

وانت الشخص الوحيد القادر يجاوب على السؤال اعلاه ونحن في الانتظار

هههههههههههههه
الله يديك العافية يادرديري
جد ضحكتني من جوووووووة قلبي

لكن يادرديري
اشمعن حصرتوا الكلام في "المجنونات" فقط
الفهم شنووووو

درديري كباشي

09-11-2009, 10:25 AM

هههههههههههههه
الله يديك العافية يادرديري
جد ضحكتني من جوووووووة قلبي

لكن يادرديري
اشمعن حصرتوا الكلام في "المجنونات" فقط
الفهم شنووووو

مدنية مازمبي بطل افريقيا والهلال بطل السودان

فهمتي حاجة ولا نغير اتجاه الطبق ثاني

درديري كباشي

09-11-2009, 10:39 AM

خديجة .. كانت تجي في السوق وتلف المحلات .. عندها جولة صباحية في وقت معين لاتتاخر عنه ابدا .. والغريبة عندها في السوق محلات معينة .. لاتشحذ بصورة عشوائية مثل باقي الشحاذين .. ولاتتناول الصدقة من اي حد بل عندها افراد معينين .. وكان من ضمن قائمتها .. الوالد رحمه الله .. وكانت تسميه موسى ... تجد ناس كثيرين جالسين في الصالة .. وهي واقفة على الركن وتطلق عبارتها ( موسى جيب الكرامه ) واذا كان هو مشغول تنتظره .. ولو حاول شخص آخر من الموجودين دفع مبلغ لها تنظر له باحتقار وتعالي ولا تعبره ولا تاخذ فلوسه حتى يحس بالحرج ويرجعه .. وهي طريقتها كانها بتجمع في ايجار او مشاركة بتاعة صرفة ( صندوق )....
ومن السلوكيات الغريبة في خديجة انها ما كانت تسمح لاحد انه يعبر من امامها قط في شكل تقاطع .. بمعنى لو هي جات ماشة ولاحظت انه شخص سيقطع امامها تجري تسبقه حتى يقطع من خلفها وتفوت له هذه الفرصة.. وانا عندي معها موقف .. مره ارسلني الوالد للقهوة لاحضر شاي لاحد الضيوف .. وانا ذاهب للقهوة لمحت بقعر عيني خديجة ماره .. وقررت ان اقطع التيار الخديجي اليوم مهما كلفني الامر .. ووطيت راسي الى الارض وصرت امشي بسرعة وانا انظر بقعر عيني انه خديجة تمشي موازية لي بنفس السرعة .. وكل ما انا ازيد في السرعة هي تزيد حتى .. جريت واكتشفت انها تجري ايضا .. وانفجر رواد القهوة بالضحك بعد ان رفعت راسي ووجدت الكل ينظر الينا .. خجلت بعد ذلك وقفت واستلمت وانتصرت خديجة

محمد السني دفع الله

09-11-2009, 10:51 AM

اقول شكراً
ما بتكفي على هاتفك الممراح حلوة الممراح دي مش؟
والله اسعدتنا بي طلتك الصوتية وشخصياتك الجنونية
وشايف مدنية فرحانة بيهم
عارف المشكلة يا درديري
انو الناس المجانيين ديل بكونوا شايفننا نحن ــالعقلنا ما حلو !!!
شفت كيف !
وصحي منو البحدد ده مجنون وده ما مجنون
الدكتور ؟ هو دكاترة الجن زاتم لامسن راس السوط تلقاهم مهبوشين شوية
ولا ده في الدراما النمطية .؟؟ لكن لمن تدخل عيادة نفسيات وتعاين للناس
ما بتفرز الزول النصيح من النص نص ولا المفوت عديل وخاصة لو قعد الدكتور بينهم
المهم الحكاية دي تحديدة صعب .
مرة اتذكر شيخنا وابونا البرعي بحكي انو جاهو شاب واخوه قال ليهو :
الشاب : ابوي الشيخ اخوي ده يعني عايزنو يطيب بقى كلامو ما ياهو وطوالي بدخلنا في المشاكل كده شوف علاجو ..
وقبل ما يتكلم ابونا الشيخ نط الشاب التاني وقال :
ش 2 : ابوي الشيخ اخوي ده طوالي كده كل ما نوديهو نعلاجوا يقعد يحكي للحكما انو هو النصيح ونحن المرضانيين واهو ده حالوا .
سكت الشيخ وقال ليهم اقعدوا وخلاهم جنبوا ، وحوا بنات للشيخ واول ما قعدن الشيخ سألن : من وين يا بناتي ؟ ردت واحدة . من بري ابوي الشيخ
طوالي العقلو ما حلو قال ليهن :
ســـــنــــة يــا بـــري !!!
وطبعا الشيخ عرف زولو ...
نحن نعرف ،،، نحن مع ديل ولا ديل كيف ؟؟
وجاييك لي نفيسة ست العرسان ؟؟

بنت الرفاعي

09-11-2009, 10:53 AM

و آمنة وين ؟؟؟؟؟

محمد السني دفع الله

09-11-2009, 10:59 AM

قلنا مدنية عاقلة
نطت لينا مرام
تقول لينا ،،
امنة وين ؟
امنة منو ؟؟
منو الجاب سيرة امنة ؟
وامنة ياتي
اها
امنه !!!
شوفت يا استاذ درديري
جابت ليها واحدة فاطة سطر ...

درديري كباشي

09-11-2009, 11:02 AM

قلنا مدنية عاقلة
نطت لينا مرام
تقول لينا ،،
امنة وين ؟
امنة منو ؟؟
منو الجاب سيرة امنة ؟
وامنة ياتي
اها
امنه !!!
شوفت يا استاذ درديري
جابت ليها واحدة فاطة سطر ...

خلي بالك الحكاية حا تستمر ما حتقيف على ناس نفيسة وخديجة

بنت الرفاعي

09-11-2009, 11:06 AM

قلنا مدنية عاقلة
نطت لينا مرام
تقول لينا ،،
امنة وين ؟
امنة منو ؟؟
منو الجاب سيرة امنة ؟
وامنة ياتي
اها
امنه !!!
شوفت يا استاذ درديري
جابت ليها واحدة فاطة سطر ...

:p:p:p:p:p:p:p

آمنة دي بسأل منها أخونا درديري :rolleyes:

عارف في الدنيا دي مرّات لازم الواحد يفط سطر , لأنو في ناس بيكرهوك العقل , فلازم مرّات حبة جنون .:rolleyes:;)

لك باقة ورد مع كل الإحترام والتقدير .:)

بنت الرفاعي

09-11-2009, 11:07 AM

خلي بالك الحكاية حا تستمر ما حتقيف على ناس نفيسة وخديجة

:p:p:p:p:p:p:p
:p:p:p:p:p:p:p

محمد السني دفع الله

09-11-2009, 11:18 AM

اها يامرام النحكي ليك حكاية نفيسة
بعدين انت احكي لينا حكاية امنة
امنة دي منو ؟
ما علينا
من قمنا شوفنا تفيسة زولة عادية زيها وزي اي انسانه رقيقة وعطوفة
بس لمن البحر يزيد تتبدل وتتغير هاك يالمكياج وبتلبس ليها توب ابيض نضيف
وبتكب ليها فتيل كا مل بتاع ريحه البتلقى قدامه كافن كافي ولا فلور دامور ولا الصاروخ ولا الببغاوات السبعة ولا بت السودان المهم حاجة سموها ريحة بتكبها في جسمها
وبتقيف نص الشارع وهاك يا عزايم وهاك يا ترحيب
نفيسة :: اتفضلوا اتفضلوا لي جوة الرسول تخشوا ياولد امشي لي عمك برعي
خلي يجيب صواني الباسطة الليلة العشاء كوكتيل اتفضلوا ود احمد خش لي جوة
اهل العريس هسي جايين ياجماعة ما تخوشوا لي جوة ,,
بطل هزارك البايخ ده اي عروس وعيني قاهرة بعزم بي نفسي كده سيب الهزار وخش اشرب البارد قزازة واحدة عارفاك نفسك ساقطة وبطيني قزازة واحدة
( واثناء العزيمة العارفين القصة بتابعوها في حكايتا وبخشوا البيت وبطلعوا بالباب التاني ))
وتفضل هي تعزم وراجية العريس الجاي على حصان ابيض وسيرة واهل

شيخ الدين

09-11-2009, 12:53 PM

الحبيب السني ود دفع الله الفكرة جميل وانت والكباشي ثنائي غير شكل في العمل الارتجالي انا دقري جاء علي بالي عايلة خمسه نجوم وراجل وست ساتات اي فكرة الكومديا التلفزيونية الامريكية الخفيفة . دقري ركبت المشاهد وبتعرف نحنا جاهزين بالتصوير والمونتاج. انتمنا ان تستمر تجربة لاتجال وبعدها معالجة السناريو وان سيد العارفين. بس المشكلة في المنتدي نعمل شنو مع ناس التصوير حرام النحت حرام اصبح انتحت اصنام والتصوير هذه الصور تخدش الحياه ما ادري شو . علي كل حال يا سيدي خير واتمنا ان يكتمل مشروع السناريو الارتجالي لانه بداية عن جد بتجنن وبناتنا تلفون.

التيمان

09-11-2009, 01:01 PM

يا اخوانا فى زول جاى بموتر بجاى

اه ما شوفتو .. يديكم العافيه

شكرا والله مستعجل ..

moh_alnour

09-11-2009, 03:57 PM

تحياتي للجميع
أضم صوتي لصوت الأخت مدنية و أتساءل لماذا تحديدا ً ( نساء خارج الشبكة ) ؟
هل عنوان البوست مُقتبس من أسم المسرحية ؟

وصحي منو البحدد ده مجنون وده ما مجنون

لذلك يقولون أن الفرق بين العقل و الجنون خيط رفيع جدا ً

أشرف صلاح السعيد

09-11-2009, 07:35 PM

الاساتذة ود السنى وابو الدر سلام..
الجن النسائى ثرثار والجن الرجالى صامت "نظرية جديدة لنج"..وطبعا لكل نظرية شواذ..
والملاحظ أن أظرف المجانين هم من نوعية خاطف لونين "ناس البدورو فجأة ديلك"..تلاقى الواحدة منهن فى احلى حالاتها وفجأة ياالمطرة كبى..أنا شخصيا بخاف من المجنونات خوف مأصل ومفصل لأنى جربتا جنهن..
مرة جابو لينا قريبتنا من الخرطوم عايزين يودها قال ود الابيض..يا زول الشابة ديك سكتنى ليك مرة سكة لهسى نفسى قايم منها..
المرة التانية فى بت فى التسعينات بتكون لافة فى السوق ومرة قاعدين فى صيدلية السلامة شلة وفجأة البت تقيف فى باب الصيدلية وجدعتنا بحجر وهمى "يدها فاضية" وعليكم امان الله الشباب جميعا كانو انبطاح ارضا "هتكت كل وقاراتنا"..ونفس البت دى مرة بموقف الحافلات كان فى راجل شايل ليو كيس خضار وطالع الحافلة..رجل فى الارض ورجل فى الحافلة وتجيك البت من وراو وتهمزو "وعينك ما تشوف الا النور"..والله الراجل الوقور حننى حنينة بسبب البت الجنينة "لكن الضحك والله ما قدرت اكتمو"..
واصلو كدى خلونا نشوف ناس حليمة ونفيسة حتودونا بيهم وين..
وآمنة مرام بتاعت الدرديرى الافتكرا ود السنى بتاعتو والماعارفين لهسى هى بتاعت مرام ولا مرام سمعتا عند الدرديرى ولا الدرديرى السمعا من مرام ولا ود السنى هى آمنتو وعايز يثبت بيها مرام فاطة بيها السطر ولا السطر اساسا مفطوط ومرام عايزة تفطفط بيو الدرديرى قام فط بيو السطر ود السنى ..هسى الساعة بتكون كم؟..

درديري كباشي

09-11-2009, 08:09 PM

سلام لكل الجميلين الالتحقوا بهذا البوست شيخ الدين ومحمد نور وابو الشوش .. والتيمان رغما عن انهم طاشين شبكة جو طافشين ..

بالنسبة لاسم البوست يا محمد نور انا اخترته ( الغريبة لامن ذكرته للسني في التلفون ما نبهني انه اسم مسرحية ) اسم لاذق في ذهني مش عارف التقطته من وين والله ما عارف انه في مسرحية اسمها كدا .. احتمال يكون شفت ليها دعاية .. لاني قبل ما اكتب العنوان بحثت في المنتدى عن الاسم قلت احتمال يكون اسم بوست سابق .

وبالنسبة للنساء تحديدا دون الرجال كماذكر ابو الشوش انه النساء دائما جنهن حواري يعني فيه ثرثره يعني المراه بتجن من لسانها .. اما جن الرجال فغالبا صماتا ومصحوبا بعنف .. وان كان هنالك عدة مواقف لمجانين رجال سنعود لها في بوست منفصل .. انا شخصيا كتبت بوست قبل عدة سنوات اسمه سياحة في عالم المجانين . وذكرت امثله كثيرة لمجانين رجال لنا معهم مواقف وبعضها افلام رعب ايضا .

ومرام عشان ما نتهمها بحكاية آمنة انا جيت ابرئها .. واحتمال تكون هي قاصدة .. في لقاء معي بمنتى الازاعة السودانية ( البوست مثبت الان هناك ) سالني احدهم وهو تحديدا دكتور احمد .. ( رص لي مجموعة من اسماء النساء والاسامي القديمة وطلب مني ان اكتب حول هذه الاسماء ما يجول بخاطري فكان من ضمن الاسماء خديجة وامنة .. وانا كتبت عن امنة قصة الشخصية التي سميتها الان حليمة . وهي المراه الحكاية صاحبة الروايات المترجلة .. والتي كما قلنا ( تدردق لها اي اسم تطحنه وتحوله الى قصة لانهاية لها الا بعد التقاط اسم جديد )

محمد السني دفع الله

09-11-2009, 08:55 PM

خلينا من النسوان البرة الشبكة
وهو فعلا هي مسرحية
للكاتب المسرحي الفذ عادل ابراهيم محمد خير
واخراج المبدع الفنان عماد الدين ابراهيم
ومن بطولة نادية بابكر الممثلة المتميزة
لكن ما مشكلة لانو العنوان بوصلنا لي ـ التجاني الماحي ــ
انا مافي شئ بجنني زي لخبطة الكيمان
هسي يا اشرف صلاح
البوست ده فاتحو الدرديري
في داعي تجيب اسمي في الاول
ليه يعني يعني احترام وكده وانو انا الكبير
يكبر فهمك
مالك ياخي ، وتعال القال ليك انا اكبر منو منو ؟
وانت كنت شغال في مصلحة المساحة ؟ ولا الإحصاء !!
لمن تكتبني اتنا في الاول ؟
شوفت اوريك الليلة الجن الما بتعرفوا ،، ياخي ناس عجيبة كيف ! الواحد عامل فيها محترم وبحترم الناس يقوم يكتبك انت اول ..ليه.؟ يعني شايف علي شنو !!هسي عليك الله عاين لي دقن درديري البيضه زي مشروع الجزيرة الكان زمان في . وانا لي هسه لاشنب ولا دقن وشعري اسود من حنة التاج . ودهنو (دابرا ) هندي بس تقول شامي كابور . تكتبني انا اول ليه؟
هو الجن ده قايلنو شنو نطيط عيون وكترة كلام .ز لالا الجن مشهد فردي ينفرد كل مجنون مع مشاهده الفردية وبسرح فيها
وانا مشهدي اليوم اشرف صلاح يكتبني اول ليه القال ليهو انا اكبر من الدرديري منو؟
بتعرف الطلع لي شهادة الميلاد بتاعتي
البحلك منو ؟ وده برضو نوع من الجن وسيدو بقولوا عليهو ( عكليتا ) والعكاليت نوع من البشر جنو مشاتر اها انا من العكاليت
يا اشرف قبال ما نمشي للنساء البرة الشبكة
شوف لازم تجاوب على السؤال
منو الاكبر في نظرك انا ولا الدرديري ولا ابو القدح

عبدالله محمد العقاد

09-11-2009, 10:06 PM

الاحبة ابو الدر محمد السني دفع الله و اشرف السعيد

اها رايك في الترتيب استاذنا محمد السني

انا كان طرحت فكرة للاخ دريري و هي انكم الثلاثة ان تقوموا بكتابة كوميديا

و ذلك لما لمسناه من قدرارت الاخ كباشي في السيناريو والحوار و الانتقال السريع والجميل إلى جوانب كثيرة من القصة اللي دائما بيكون بيسرد فيها و قلت للاخ كباشي ما شالله عندك مقدرات على امتاعنا بالمشاهدة من خلال كتاباتك
يعني انت بتكون بتقرا لكباشي فبتلقي كباشي انتقل من منظر إلى منظر و قبل ما يدخل في المنظر الجديد بيوصف لك كل تفاصيل المنظر الجديد قبل بداية السرد

و الاخ اشرف لما لمسناه منه برضو في قدراته و مثال الركشة

و بوجود الاستاذ محمد السني تكتمل الموهبة مع الدراسة والخبرة

و زي ما قلت للاخ ابو الدر حاولوا يا جماعة اكتبوا لينا كوميديا راقية تخرجنا من دائرة ( عوارة ) الدراما السودانية و الكوميديا المفتعلة و منها المنظر الثابت المرة الي دائما ( بتكورك )

و يا ريت تبدوا لينا في كتابة ثلاثون حلقة و اكيد الاخ محمد السني بعلاقته بشباب فرقة الاصدقاء يمكن ان تمثل عن طريق فرقة الاصدقاء على الاقل تكون عندنا حاجة سودانية نشاهدها في رمضان بدل طاش ما طاش و مسرحيات طارق العلي و عبدالرضا حسين
و نحن زي ما بيعملوا ناس طاش ما طاش بيطلبوا افكار من الجمهور و هم بعد داك بيحولوا الفكرة إلى كوميديا ، كل الاعضاء ممكن يزودكم بالافكار و عليكم السيناريوهات و الحوارات

رايكم

أبوريلان

09-11-2009, 10:36 PM

الجنون فنون

أولاً تحيات للأخوان درديري كباشي والأستاذ السني دفع الله
طبعاً قدمت الدرديري علي السني عشان ما ينطط لي عيونو ويعمل لي فاصل جنوني زي ما عملو لي أشرف
لكن بيني وبينك يا ود السني مش لو تعمل حنة التاج في راسك وتحلق دقنك أنت أكبر من الدرديري بالجمع والإجازات .

تحيات لكل المتداخلين من المجانين والعاقلين

أنا دخلت هنا غلط لكن خفت من المرقة يا أستاذ
لكن دايركم تفلسفو لي المقولة الفوق دي ( الجنون فنون ) وأنا بؤمن بيها تماماً ، ومن حُبي للمجانين لما كنت شغال في أمدرمان كان معظم أصاحبي من مستشفي التيجاني الماحي ، ما تمشي بعيد بخيالك ( موظفين ) وما بدخل عنبر المجنونات خالص ولا بقرب ليهو ، أها منتظركم يا شباب .

درديري كباشي

10-11-2009, 01:19 AM

سلام العقاد وابو ريلان نورتو البوست والله بس لكن زحو بعيد الصبغة ما ترشكم .. عشان انا عاوز افتح خرطوش في عمنا بتاع حنة التاج دا ..

اتاريييه نحن كل ما يجي السني داخل المنتدى نقيف له قيام وهو يطنش عامل فيها ما شايفنا ... انا اقول الراجل متواضع .. وقلنا نعمل ليه جائزة باسمه قال لا لا لا لاالجائزة تكون باسم مش عارف مين كدا راجل اكبر منو ..

اتاري هو شغال قرف في حنة التاج الجميلة بيسالوني عليها ديمة ..

وصيغة ميسو .. ونحن حنعمل ليها دعاية في ركشة اشرف تقول ..

ميسو تخلي كل الناس يصغرو يصغرو ..

و كان لينا نحن هيييع ما بنخاف من الشيب علي باليمين الشيبة كان وقعت في الواطة دي نرفعها ونلصقها في راسنا ونقول لها راس بيحملك بلانا ما في .. تقولي شنو وتقولي منو نحن الساس ونحن الراس ( ابو شيب ) ..

بعدين يا اخوي انت بتمثل في المسرح من زمن المسرح كان اسود وابيض .. انا غايتو لي يوم الليلة بتذكر انه مسرحية نقابة المنتحرين دي كانت اسود وابيض ومحطة التلفزيون الاهلية كانت اسود وابيض .. بس ما متاكد انتو كنتو اسود وابيض ولا تلفزيونا ..

هسع طلعتونا برة شبكة الحريم الطالعات اصلا من الشبكة ديل .. نحن معانا الوالدة هنا بالرياض والطريف في الامر دار حوار في البيت بانه انا شكلي اصبح كبير . والحاجة طبعا ما رضت وقالت هي يمين درديري دا في ناس نداتو لا يوم الليلة ما عرسوا .. وام العيال اتغاظت وقالت ليها يمكن هم رافضين الزواج .. وانا مستغرب في شئ زوجاتنا لا يرضون لنا الكبر ولا الصغر .. لانه في منتدى تاني البنات شابكني ( يا عمو ... زي مدنية ) وام العيال ما عاجبها هذا الوصف ومتغاظة منهن .. يعني لا عايزين لنا الكبر ولا الصغر ...

تذكرت نكتة الراجل المشيب زينا كدا لكن داك من نوع (واحد فول واربعة جبنة ).. تزوج بنت صغيرة عمر عشرينات فوق زوجته الكبيرة .. بعد فترة اصحابه لاحظوا ليه انه شعره بقى مظعمط ( زي الجداده الداقنها اخواتها ) سالوه يا اخينا الحاصل شنو وحكاية الظعمطة دي جات من وين ؟؟ قال ليهم .. اسوي شنو اكون بايت مع الصغيرة الليل كله شغالة تمعط في الشعر الابيض .. وابيت مع الكبيرة تشتغل معيط في الشعر الاسود .

درديري كباشي

10-11-2009, 01:52 AM

عدنا الى شبكة المجنونات .

المجنونة الحبشية والتي افترضنا انه اسمها اببا .. لها جن يجنن عديل .. اول شئ انها في حالة بكا وعويل مستمر ..

وغالبا ما تكون شايلة سوط من شجر النيم ( وتمحط نفسها ) ساقها او ظهرها وتبدا تصرخ وتجعر .. وتجعر بمعنى الصوت يكثر فيه حرف العين يعني ( وا ع ع ع ع ع ع عاي واع ع ع ع اي) وكل ما تحس بانها هدات تروح ضاربه نفسها بالسوط لتدخل في نوبة البكاء والجعري من جديد ... احد معارفها او من يفهم لغتها قال انها تعاقب نفسها لانها كان عندها طفل صغير فرطت فيه لا ادري مات او خطف ... لانها قبل الضرب مرات تبدا ترطن بلغة التقرنجه كلام من يفهم اللغة يقول انه فيه توبيخ لنفسها يعني مثلي ( ابذي ذولخوا تعستي مش عارف فقراي) وطاخ تواصل في الضرب .

وكذلك واحدة ثانية سنعود لها .

أشرف صلاح السعيد

10-11-2009, 02:27 AM

الاخوة الاعزاء "وقتين الاستذة وتقدم الاسماء جابلو رايش" جميعا عوافى..
لكن شوفو الفكرة التحت دى "والله بعد دا الا النقنقة تبقى فى الدبابير"..

**************************************الاستاذ ابو الدر

************************* و
الاستاذ ود السنى

أها يا ود السنى اتعكلت لى فى دى..

والله خليتونى أتذكر جن الفنانات العربيات باحد الاقطار المجاورة "شفتو التمويه-يقومو الجماعة يزعلو وما يدونا تأشيرة"..واحدة اسما عايزا و الاول فى الاعلانات "الأفيش"والتانية الا اسما هى الاول..
وهنا ماسورة فتحت عشان ليه الاسم هو الاول "الناس فى بلدى يصنعون الحب"..
عودة للبوست:

عطيّات أم "....." وكل نقطة بحرف الحرف الاخير تاء والاول جيم وماقبل الاخير الف والثانى عين والوسط باء "أها بعد دا العرفو براو اتشوبر وانا برا"..

تلك المجنونة الممتلئة الجثة والحاملة لكل الدلاقين "كأغطية" وكثير من الكراكيب "لا ادرى لماذا" مجنونة هادئة ومقلة للحديث..ترد حينما يثيرها البعض فتنفجر كالعاصفة..لا أدرى أحية هى أم ميتة..وعلى كل فليرحمها ربى حيةً كانت ام ميتة..
تلك العطيات لفتنى فيها وزنها الزائد فمعظم المجانين يتسمون بالنحافة وكذلك الجادون بالحياة..لم أقابل بحياتى رجل أو إمرأة سمينة غير باش او باشة..ومعظم ذوى القلوب السوداء تجدهم نحفاء وبالتأكيد لكل قاعدة شواذ "شوفو هسى جن النظريات دى ..ابو الضرب زاتو"..
عطيات دى هسى ما عاقلة كيفن دبة كدا وتخينة ومجنونة؟؟!!قال مجنونة قال..

المكاشفى

10-11-2009, 02:46 AM

نادية بابكر الممثلة المتميزة

آه يالسنى من ناديه احمد بابكر
فى رأيى من اخطر الممثلات السودانيات مثاله عديل
واتمنى من الله ان يجمعنى معا فى عمل فنى

اها يالدرديرى سلام النسوان بى شبكتهن الطاشه دى
طششننا معاهن وتقولى بحشر

اما عن كوم الطاشات المن كسلا ديل لاقتنى فيهن واحده
فصيحه شديد الا من لكنه خفيفه الغالب عليها حرف العين
لدلاله امهريتها حبشيه اريتريه لا اى اريتريه
هى سمراء قصيره القامه سمينه تحمد سيدها تفك شعرها مشقوق
وطوالى معها ادوات التسريح وزى ماسردت حكى متواصل لاتفتر
ارتجال منقطع النظير تبدأ من صفحه اتناشر وتواصل وباين انها تألف
الاماكن التى تتردد عليها يحفظونها عن ظهر قلب ويعرفون مفاتيحها
للتدوير وكنت آن ذاك فى قسم شرطه مرور بحرى ايام الحادث بتاعى
ودخلت افطر فى البوفيه الملحق بالقسم ووجدها ماسكه المجلس
دقاقه بس لاتفتر يدوها القروش باليمين وتفرقهن بالشمال كريمه جنس كرم
سقت نص البوفيه بارد وحلفت على بالتكتلها اشرب بارد وشابكانى حبيبى
والعرس وشهر العسل ... وهنا ابوى جعلى وامى ارتريه وتانى ابوها شايقى
وهى سودانيه والخونه باعوها ومرات تبكى هي هي من غير دموع
وفى نص البكيه عته ما عديتو بارد لي (انت ما اديتو البارد ليى)
وهدا الحال وربنا يشفى يا ابو الدر

تقبل مرورى

okasha

10-11-2009, 02:46 AM

توووووووووووش خشينا

فتحنا ضلفة من شباك الجيران قام جاناهوا بارد مسكنا التلفون رسلنا رسالة

مسكلت لينا علانة الما بتغباكم ديك

قمنا مشينا السوق واشترينا لينا خروف الشافو كلو قال دا حمل

ضبحناهو جخخخخ

وبالجلد عملن فروة ختيناها فى الزاوية الفى طرف الشارع ومشينا تانى فتحنا ضلفة

هوووووى سلام عليكم نحنا جينا وسايقين لينا ركشة و معانا واحد بتاع مرور

درديري كباشي

10-11-2009, 09:27 AM

المكاشفي واشرف بتاع عطيات ام مش عارف ايه .. وعكاشة الظاهر عليه فك الشريحة وجانا داخل من غير شبكة ..

المكاشفي الارتريين مروا بظروف قاسية وهي حروب التسعينات لذلك معظم مجانين كسلا من اصول ارترية .

واذكر في كسلا كان في واحدة مسمية نفسها ليلى علوي . وتحرص على المكياج بكثافة شديدة لدرجة انه ممكن تختم بها ورقة بيضاء .. وهي كانت نحيفة وقصيرة قزمة .. لذلك كانت تلبس حذاء عالي وتحشي صدرها بالورق حتى تملا الفراغات .. والطريف تكون ماشة في الشارع .. وهي بعد كل هذا المجهود هي من تغازل الشباب ..( وييين يا عسل انت ... شنو يا شباب .. ووووو الخ ) واذا اتلحت واحد وحبته الا يسافر يخلي البلد لانها ممكن تجيك في البيت ( ما مجنونة )..

محمد السني دفع الله

10-11-2009, 08:54 PM

الجن بداوا
لكن الحسادة
شنو الجابت ليها صبغة
منو البعمل الصبغة
والله كلام
اسأل الوالدة ربنا يديها طول العمر والسعادة
قول ليها السني ده وبالمناسبة انا اسمي محمد السني ابوي دفع الله
يعني ما ود السني ود دفع الله ابوالسباع كان شغال في بركات بالصباح مراقب مالي وبالليل شغال في شسينما الخواجة
اها اسأل الوالدة انا امي ست ستونة الله يرحمة اول داية وزائرة صحية وبتاعة تمريض
في مدني وطوالي حتقول ليك بالله السني ولدها .. جاهل وصغير اصلوا يالدريري السني ده صغير اصغر منكم بي كتير
ياجماعة ما قادر اقيف الليلة وووب
يا جماعة نرجع لي قصصنا
نسوان برة الشبكة

درديري كباشي

11-11-2009, 01:01 AM

درديري كباشي

11-11-2009, 01:14 AM

أشرف صلاح السعيد

11-11-2009, 03:39 AM

قبل ما يعود عمنا السني من جديد

بحكي ليكم يا مظاليم الهوى عن قصة المراه المهببة ..

والمراه المهببة انا اعتقد والله اعلم انه عبارة فلان مهبب او فلانة مهببة يرجع الفضل في هذا الاسم لها وهو اشارة الى انه الشخص عقله ما مظبوط ..

وهي كانت امراه اثيوبية ايضا وحتى في شكلها كانت تمشط شعرها بالطريقة الحبشية وهي انه ترجع الشعر كله للخلف بحيث تبرز الجبهة فقط
وتترك الجزء الخلفي منفوش مع لبستهم البيضاء المكشكشة والتي تعرف ( بالزوريا) .. والطريف انها كانت تبدا مشوراها من اول الشارع وتنشر طرحتها بيديها الاثنين كانها تريد ان تجففها .. وتمشي بهذا الوضع مسافات طويلة وهي تهمس وتهب في الطرحة ثم تقف وتنزل يدها ترتاح شوية وتواصل مشوارها المهبب من جديد ..

سالنا الذين يعرفونها من بلادها .. قيل انه هي كانت تنشر في ملابس الغسيل وفجاها زوجها داخلا على البيت وفي يده عرو سة جديدة (لنج ) فاجاها بها في الوقت الذي كانت هي فيه تجفف في طرحتها ومنذ ذلك اليوم هي لا زالت تهبهب في الطرحة ..

الطريف في الامر انه ناس الحي عندنا اتخذوها مثلا الرجال لمكاواة زوجاتهم يقول لها ( اصبري كان ما خليتك تهببي في الشارع ) بمعنى تهديدا بالزواج عليها ..

ولذلك انا اعتقد انها هي مصدر عبارة مهبب .

يعملوها المجانين عشان يجننو بيها العاقلين..
والله يا ابو الدر جن التهبهب دا جديد لنج على..الحمد لله الزولا دى ما كانت بتلقط فى حواجبا كان عليك امان الله كملت حواجبا وقبلت على نسوان الشارع..
اتخيل معاى كدا واحدة دخل عليها زوجها بعروس كرت كرتونة وهى بتنفخ فى الحليب عشان بزة الشافع..دى كانت يا انقطع نفسا وماتت بعد كم يوم ولا اتعاقدت مع محلات العيد ميلاد تنفخ البلونات..ولو نفسا قوى مع البناشر ولا تمشى هولندا تدور ليها طاحونة هوائية ..
يااخى فى ناس كان رجال ولا نسوان اعصابن خفيفة خلاص والجن محمدن محمدن لرهافتم..
يااخى المهببة دى الناس ديلك لو عدلو طريقة تهبيبة من افقى الى رأسى ممكن تفيدم فى تلويح الاعلام..واوعك تسألنى ياتو ناس لأنى زاتى احترت فى العلمين..

عبدالله محمد العقاد

11-11-2009, 08:01 AM

سالنا الذين يعرفونها من بلادها .. قيل انه هي كانت تنشر في ملابس الغسيل وفجاها زوجها داخلا على البيت وفي يده عرو سة جديدة (لنج ) فاجاها بها في الوقت الذي كانت هي فيه تجفف في طرحتها ومنذ ذلك اليوم هي لا زالت تهبهب في الطرحة ..

.

ههههههههههههههههههه

مبدع ابو الدر لكن عليك الله ابو الدر دي حقيقة و لا نجرة منك

لانه فيها لمحة اخراجية ناقصة بس الموسيقى التصويرية

درديري كباشي

12-11-2009, 11:06 PM

يعملوها المجانين عشان يجننو بيها العاقلين..
والله يا ابو الدر جن التهبهب دا جديد لنج على..الحمد لله الزولا دى ما كانت بتلقط فى حواجبا كان عليك امان الله كملت حواجبا وقبلت على نسوان الشارع..
اتخيل معاى كدا واحدة دخل عليها زوجها بعروس كرت كرتونة وهى بتنفخ فى الحليب عشان بزة الشافع..دى كانت يا انقطع نفسا وماتت بعد كم يوم ولا اتعاقدت مع محلات العيد ميلاد تنفخ البلونات..ولو نفسا قوى مع البناشر ولا تمشى هولندا تدور ليها طاحونة هوائية ..
يااخى فى ناس كان رجال ولا نسوان اعصابن خفيفة خلاص والجن محمدن محمدن لرهافتم..
يااخى المهببة دى الناس ديلك لو عدلو طريقة تهبيبة من افقى الى رأسى ممكن تفيدم فى تلويح الاعلام..واوعك تسألنى ياتو ناس لأنى زاتى احترت فى العلمين..

ابو الشوش عشان تعرف انه الموضوع ما هين عند الحريم ..

انت ما سمعت قصة المره الجاها خبر انه الراجل عرس بعد عيد الضحية قالت يروح في ستين داهية ونحن الحمد لله طهرنا خروفنا وضبحنا الولد ولا شغالين بيه .