شفقــــــــــــه

[درديري كباشي]

شفقة
كو كو كو كو .. يدق باب الشارع بعنف ..
الحاجة نفيسة : يا ولد يا سجم ما سامع الباب دا يدق قوم افتحه تقوم قيامتك ..
عمر: يمه ما تفتحه بتك المنبطحة طول اليوم دي انا ما شايفني قعد اغسل ..
يقوم عمر على مضض يفتح الباب .. من على الباب ؟؟
الطارق : انا خالد .. حسام اخوي غرق في البحر والجنازة الساعة اتناشر .. امي بتقول ليكم حصلوا ..
الحاجة نفيسه رغما عن سماعها للخبر الا انها ارادت تشكك .. قال شنو الولد الشفقان دا وجرى قبل ما نفهم منه حاجة ..
عمر : قال يا يمه حسام غرق وجنازته الساعة اتناشر وكلام زي كدا .
الحاجة : سجمي يا ولد وليه سبتو يجري قبل ما تفهم منه حاجة ..طيب جيب موبايلك نتصل يمكن نفهم حاجة من اهله .
عمر : يمه انتي عارفه ما عندي رصيد الصباح قلت ليك عاوز اشتري سكراتش قلتي ما عندك قروش ..
الحاجة : طيب الحل شنو نقعد شفقانين ومتوترين كده ..
بعد قليل يطرق الباب بشده .. يفتحه عمر وتدخل امراتان مفزوعات ايضا .
هما حاجة السرة وحاجة خضرة ..
حاجة السرة : الخبر دا صحي ياحاجة نفيسه نحن جايين نتاكد منك؟؟
حاجة نفيسة : يا تو خبر يا اخواتي ..
حاجة خضرة .. جانا خالد ود ستنا الشفقان داك دق الباب وقال حسام اخوه غرق وجنازة وكلام زي دا قبل ما نتفاهم معاه جرى ركب الحافلة اها جينا نتاكد منك قبل ما نروح قلنا نتاكد احسن .
حاجة نفيسة : يا اخواتي نحن زيكم كدا وقف في الباب وقال نفس الكلام دا ..
حاجة السرة : ان بقى كدا الكلام دا ما بينفع رسلي ولدك ينادي عثمان بتاع الامجاد نلحق الناس ديل هسع ..
حاجة نفيسة : امشي يا عمر يا ولدي شوف عمك عثمان امجاد كان في قوله تعال ودينا حي الثورة لناس عمك عوض سريع يا ولدي ..
بعد نصف ساعة تتحرك سيارة امجاد ناحية بيت حاج عوض بحي الثورة فيها حاجة نفيسه مع ولدها وبنتها والحاجتين الاخرتين .اول ما تقترب السيارة من البيت المعني يلاحظ التمام الناس حول البيت وفي ظل الشجر واما الباب .
حاجة نفيسة تبدأ في النواح :
الليلة ووب يا حسام الصغير لا تحننت لا اجرتقت لا ضقت العرس
الليلة ووب علي امك ووب على ابوك الفراحنين بشبابك الليلة عين وصابتك .
قبل ما تواصل في النواح ويبدا رفيقاتها تقطع نواحها بنتها سوسن : هوي يا يمه اسكتي ياهودا حسام ذاتو الناس بيسلموا عليه ..
جاجة نفيسه : سجمي المرحوم ذاتو ..
سوسن : هوي يا يمه هو انتي متين عملتيه المرحوم .
حاجة خضرة : سجمي نان طيب الغرق منو وجنازته جايبنها الساعة اتناشر ..
تقف السيارة وينزل عمر مسرعا يسلم على بن عمته حسام ليفهم منه القصة ..
حسام :
الحكاية وما فيها يا عمر كنا بنسبح في النيل انا والشلة وكان معانا خالد اخوي .. وانا فعلا غرقت .. لكن الاخوان خرجوني واغمى علي وعملوا لي تنفس صناعي .. لكن خالد اخوي زي ما انت عارف هو شفقان جرى البيت وكلم امي ..وامي كمان رسلتوا قالت ليه اجري كلم ناس خالك وعماتك عشان يجو يحضروا الجنازه .. وهو ما قصر في خلال ساعة كان مكلم البلد كلها وطبعا كل ناس في اهلنا كلموا جيرانهم .. وانا لي ساعة بتلقى التعازي في نفسي واحكي في نفس القصة ...
وفي زاوية اخرى يصل مجموعة من الشباب في سيارة بوكس يحضر فيها مجموعة من الشباب ويدور بينهم حوار ..
واحد فيهم يبدا النقاش : ياهو دا ذاتو حسام ارح نمشي عليه نعزيه..
الثاني : نعزيه في منو ؟؟
الاول : مانعزيه في حسام ؟؟؟
الثاني : حانعزي حسام في حسام .؟؟؟.
الاول متراجعا بعد ان كان مندفعا .. دا كلام شنو يا اخوان طيب المات منو ..؟؟؟
الثاني : دا كله من شفقتك قبل ما تتاكد من خبر تخلعنا كله مره ..
يتبع

[العاقب مصباح]

والله يا درديرى دى الشفقة ولا بلاش

حكاية الفراش دى حصلت عندنا

عندنا زول كان فى الخرطوم شهد (( موقعة)) المرتزقة

وجاء واحد اكد ليهم انو فلان دا مات وشبع موت


الجماعة فرشو وصدقوا

وفى النهاية صاحبنا جاء ليهو فى لورى بيشبه لورى اشرف السعيد


وكله من الشفقة

سلامات يا زول يا رائع

[العاقب مصباح]

شفقة النسوان بصراحة شئ يحير

كان ساى شافت ليها زول وقع تقول ليك :- مااااااااااااات الليلة ووووب

عندنا زول شليق برضو

شليق فى روحه لكن

كان راكب ليهو فى حمار لا مؤاخذة

ووقع

صاحبنا اتمدد فى الارض وقعد ينطق فى الشهادة

دى شفقة ولا يأس ولا رجاء

[درديري كباشي]

والله يا درديرى دى الشفقة ولا بلاش

حكاية الفراش دى حصلت عندنا

عندنا زول كان فى الخرطوم شهد (( موقعة)) المرتزقة

وجاء واحد اكد ليهم انو فلان دا مات وشبع موت


الجماعة فرشو وصدقوا

وفى النهاية صاحبنا جاء ليهو فى لورى بيشبه لورى اشرف السعيد


وكله من الشفقة

سلامات يا زول يا رائع


واحكي لك واحده يا عقبة ..

ايامنا كنا طلبه كان في واحد في حلتنا تابع جماعة البلاغ الذين يسافرون حول دول العالم الاسلامي ويسكنون في المساجد ويدعون الى الله .. اسمه محمد علي .. في احد الرحلات جاء خبره لاهله انهم هم في باكستنان عابرين احدى الصحاري ضلوا الطريق وماتوا جميعا.. ونحن كنا في اجازة حضرنا الفراش وقضيناه مع الاهل .. وبعد ذلك فتحت الجامعة وسافرنا ..
بعد ما رجعنا من الجامعة في الاجازة التاليه اتضح من ورانا انه خبر محمد علي لم يكن صحيحا انه تشابه اسماء والرجل رجع لبيتهم بدون ما يكون نحن عندنا اي فكرة عن هذه العودة .. وبالصدفة زميلي الاخر يلاقي محمد علي راسا براس في احد الزقاقات ..ويبدا يناديه باسمه . ادريس ادريس .....
ادريس: منو المرحوم؟؟
محمد علي : ايوا انا المرحوم ..
وصاحبنا ينطلق جاريا لو لا انه اخوانه شرحوا له الموقف ورجع واعتذر للمرحوم

[درديري كباشي]

عدنا .
يدخل الحاجات عند حوش النساء ويبدو على حاجة نفيسة الغضب لانها صرفت نواح على الفاضي وانكشفت مفرداتها .. اذا انها ركزت على موت حسام قبل ان يتذوق العرس مما فضح دواخلها في انها كانت ترسم حوله لابنتها سوسن .ز وهي تعرف انه ابن اخيها لكن امه ( المعصعصه ) كما توصفها لا تطيقها منذ ان كانت عروس بل قبل ان يخطبها اخوها لانها كانت تخطب له اخرى وهي صديقتها .. انكشاف داخلها في هذا اليوم اشعل فيها نار الغيظ .. لذلك دخلت على زوجة اخيها اولا لتؤدبها على التسرع وتتهمها بتمني الموت للولد حتى تداري حقيقة غضبها .
المراتين الاخرتين وان كن يتصنعن الحزن الممزوج بالفرح الا انهن كن يكتمن ضحكا وشماتة على صديقتهن التي كشفت اوراقها قبل ان تتاكد من الخبر ولذلك اسررن هذا الامر الذي سياتي يومه دون ادنى شك .
في حوش النساء ام حسام تجلس في عنقريب وسط الحوش وتلاحظ دخول حماتها وترى الغضب في عينيها ولذلك تبادرها ..
ام حسام : الليلة يا نفيسة اختي الخلعة الانخلعتها .. ولدي البكر يجيني خبروا وانا قاعدة اعوس .. بدون ما احس طلعت في صاج الكسرة برجلي وجريت في نص الحوش .
خضرة : حمد لله على سلامته وبركة النجى الليلة حسام اتولد من جديد ..
ام حسام : صحي يا خضرة ياختي حسام الليلة اتولد من جديد وانا لازم اعرس له واضوقه العرس علي فرحتي بعودته دي ( محاولة مباغتة حاجة نفيسة وامتصاص غضبها وقتل ( الدش ) في يدها كما يقول لاعبي الضمنه . وتنجح فعلا ..
لانه حاجة نفيسه تحتضنها وتدخل معها في موجة بكاء لتمتزج دموع الفرح بالحزن بالغضب بكله .
نعود الى مسرح الرجال لنجد انه اول ظاهره انه بطل القصة الحقيقي اختفى وهو خالد شفقة المتسرع الذي حول بيتهم الى بيت عزاء ليترك اخاه يتلقى العزاء في نفسه هو ووالدهما . والجميع يسالون ..
( انتو وين خالد .. خلعنا واختفى ويين ..؟؟)

[محمد السني دفع الله]

منتظرين
خالد شفقا
مجبتي ابدية

[أشرف صلاح السعيد]

حبيبنا االدر سلام اكوام..
لكن بعادك طال بعااادك طااال..

الشفقة دى فيلم كبير خلاص..ومنها شفقة بت إحيمر ودى فى قعدة خاصة كدا بندردش فيها..تعرف يا ابو الدر انحناشعب معطمنا شفقانين ..تجينا حيكومة عايزنها فيومين تلبسنا قطر..وألذ شى عندنا "الشفقة المتتالية " ودى يا سيدى شفقة واحدة لكنها زى المسلسل..كل يوم عايزين نحل نفس المشكلة وبسرعة..كل يوم عايزين البلد تكون تمام والشفقة زاتا والقصة ليها عشرون عام "اى شى على قولك بنسيسو"..
وألذ المواقف بتلاقيها فى الشفقة الكلامية .. "بالله شوف شنات كبارتو" ..
واصل يااخوى الموضوع لذيذ وادبنا ما عندك "وياما فى الجراب يا حاوى"..
وعلى فكرة وصونى اقول ليك تجيب صاحبك الفنان معاك لكن مرض الولد نسانى كل شى..شفت الشفقة ؟؟..

[درديري كباشي]

منتظرين
خالد شفقا
مجبتي ابدية

سلام يا كبير

( مقاما ليس سنا ما تخافش)
وحمد لله على السلامة

شفقتنا عليك وانت عارفنا نحن اهل شفقة ..

لو جيت لناس البيت وقلت ليهم يا يمه السني .. تلقاها شهقت ووضعت يدها في صدرها وقالت ليك سجمي مالو ؟؟؟

تقول ليها قالوا عرس في مرتو .. هنا تلاقي الشفقة قلبت مائة وثمانين درجة تقول اريته كان غرق .

[بت أم درمان]

كان ساى شافت ليها زول وقع تقول ليك :- مااااااااااااات الليلة ووووب







والله صدقت دي حركات النسوان
الوقع تلقاهو نسى الوقعة
واتخلع من الكواريك والووووب
الله يهديهم بس

بقولو الشفقة قللت النفقة
بس ما عارفة القصة بالظبط
بتاعت النفقة دي
اهو مثل بسمعه
مشكور يا درديري يا مبدع

[درديري كباشي]

حبيبنا االدر سلام اكوام..
لكن بعادك طال بعااادك طااال..

الشفقة دى فيلم كبير خلاص..ومنها شفقة بت إحيمر ودى فى قعدة خاصة كدا بندردش فيها..تعرف يا ابو الدر انحناشعب معطمنا شفقانين ..تجينا حيكومة عايزنها فيومين تلبسنا قطر..وألذ شى عندنا "الشفقة المتتالية " ودى يا سيدى شفقة واحدة لكنها زى المسلسل..كل يوم عايزين نحل نفس المشكلة وبسرعة..كل يوم عايزين البلد تكون تمام والشفقة زاتا والقصة ليها عشرون عام "اى شى على قولك بنسيسو"..
وألذ المواقف بتلاقيها فى الشفقة الكلامية .. "بالله شوف شنات كبارتو" ..
واصل يااخوى الموضوع لذيذ وادبنا ما عندك "وياما فى الجراب يا حاوى"..
وعلى فكرة وصونى اقول ليك تجيب صاحبك الفنان معاك لكن مرض الولد نسانى كل شى..شفت الشفقة ؟؟..


اولا يا ابو الشوش وقبل كل شئ كفارة لمحمد وانشاء الله الموضوع طلع شفقة منكم وماعنده حاجة خالص .

وعلي رايك نحن حتى في الكورة نجيب مدرب جديد عايزين فريقنا بناسه المكعكعين ديل يغلب لينا غانا ومالي ونتاهل لكاس العالم ..

[درديري كباشي]

[/center]


والله صدقت دي حركات النسوان
الوقع تلقاهو نسى الوقعة
واتخلع من الكواريك والووووب
الله يهديهم بس

بقولو الشفقة قللت النفقة
بس ما عارفة القصة بالظبط
بتاعت النفقة دي
اهو مثل بسمعه
مشكور يا درديري يا مبدع


نشكرك يا بت امدرمان على الاطلالة ونسال الله ان يرزقنا المهلة وينجينا من الشفقة .

[moh_alnour]

نسال الله ان يرزقنا المهلة و ينجينا من الشفقة

اللهم آمين
العارف قصة ( الشفقة القطعت النفقة ) دي يحكيها لينا :cool:

[النويري]

تحية لكل المشاركين والتحية لأبو الدر

تحية خاصة لود السني والسني طمني

أشرف طبعاً سلطة الأسود تاعباهو لدرجة إنو الخل طفح الله يكون في عونك

أبو الدر الشفقة مشكلة خصوصا ً في موضوع الغرق وعندي قصة عن الشفقة برضوا

قال ليك كان في واحد من الذين يفترشون الحصا ويلتحفون السماء يعني تقدر تقول دباب المهم الشاب كان في الجنوب أيام الجنوب مسخن طبعاً نحنا زغنا وما مشينا أدينا الإلزامية في الفترة ديك سلفقة ساكت كدا لأنو الجنوب كان مولع وقضيناها كده لف ودوران ، المهم الشاب دا جات إرسالية من جوبا إنو إستشهد وجانا الوالي والزمرة المعاهو ومنسقية الخدمة وبكاسي وجابو سكر ودقيق وزيت وجو معاهم ساون يعني الجماعة جاهزين بداؤ الله أكبر الله أكبر الله أكبر والجو بيقة كأننا في معركة القادسية المهم تحدث منسق الخدمة عن الشهادة وعن الدور الذي تلعبة المنسقية وكلام فارق كتير وبعدها قال للحضور أنا أمس حلمت بالشهيد (فلان) في الجنة وبدأ التكبير والتهليل وبدون ما أطول عليك بعد أسبوعين جاء أخونا الشهيد راجع وسط دهشة الحضور إتخيل النصب وصل ياتو مرحة يا أبو الدر والله خفنا على أمه من الرجعة لكن الحمد لله مرت على خير

مع خالص التقدير والإحترام،،،

[أبوريلان]

تحية لكل المشاركين والتحية لأبو الدر

تحية خاصة لود السني والسني طمني

أشرف طبعاً سلطة الأسود تاعباهو لدرجة إنو الخل طفح الله يكون في عونك

أبو الدر الشفقة مشكلة خصوصا ً في موضوع الغرق وعندي قصة عن الشفقة برضوا

قال ليك كان في واحد من الذين يفترشون الحصا ويلتحفون السماء يعني تقدر تقول دباب المهم الشاب كان في الجنوب أيام الجنوب مسخن طبعاً نحنا زغنا وما مشينا أدينا الإلزامية في الفترة ديك سلفقة ساكت كدا لأنو الجنوب كان مولع وقضيناها كده لف ودوران ، المهم الشاب دا جات إرسالية من جوبا إنو إستشهد وجانا الوالي والزمرة المعاهو ومنسقية الخدمة وبكاسي وجابو سكر ودقيق وزيت وجو معاهم ساون يعني الجماعة جاهزين بداؤ الله أكبر الله أكبر الله أكبر والجو بيقة كأننا في معركة القادسية المهم تحدث منسق الخدمة عن الشهادة وعن الدور الذي تلعبة المنسقية وكلام فارق كتير وبعدها قال للحضور أنا أمس حلمت بالشهيد (فلان) في الجنة وبدأ التكبير والتهليل وبدون ما أطول عليك بعد أسبوعين جاء أخونا الشهيد راجع وسط دهشة الحضور إتخيل النصب وصل ياتو مرحة يا أبو الدر والله خفنا على أمه من الرجعة لكن الحمد لله مرت على خير

مع خالص التقدير والإحترام،،،


النويري
الحادثة حصلت عندنا مدني في حي ديم أزهري لوكنت قاصدها هي والآن الشهيد دكتور عضام .


الدرديري
سلام
شفقة بت حريكه الجو ...............................
النقاط دي أسألني منها .

[درديري كباشي]

غايتو يا اولاد مدني طلع عندكم كثرة شفقات امس في الاستراحة اشرف حكى لي عن الشفقة بتاعته... طلعت منطقه عكسرية ممنوع الاقتراب او التصوير ..

وفي انتظار شفقاتكم يا ابو النور وابو عبد الرحمن والنويري ما تطلع عسكرية برضو ..

[عبدالله محمد العقاد]

الغالي ابو الدر

اولا ملاحظة و اتمنى اكون مخطي فيها بوستاتك قلت كثير ياريت اعرف السبب

و بدون مجاملة انت سينارست ممتاز ماشالله عندك مقدره على تنويع تابلوهاتك الجمالية و الانتقال في ذات الوقت للكثير من الجوانب التي تعطي القاري متعة المشاهدة من خلال القراءة

و يبدو لي ممكن تبدا لينا و الاخ اشرف في كتابة سيناريوهات تخرجنا شوية من حالة ( عوارة ) الدراما السودانية
و يبدو في وجود الاخ محمد السني دفع الله ممكن فعلا تقدموا شي ممتاز و ممكن تكونوا كتاب لفرقة الاصدقاء المسرحية و ان تقدموا اعمالكم في رمضان القادم و ننافس بيكم الدراما الكويتية و السعودية و بالذات ( طاش ما طاش )
اتمنى تناقش الاح اشرف و الاخ محمد السني دفع الله و نحن معاكم متابعين و ندعوا لكم ... موفقين ان شالله

[درديري كباشي]

الغالي ابو الدر

اولا ملاحظة و اتمنى اكون مخطي فيها بوستاتك قلت كثير ياريت اعرف السبب

و بدون مجاملة انت سينارست ممتاز ماشالله عندك مقدره على تنويع تابلوهاتك الجمالية و الانتقال في ذات الوقت للكثير من الجوانب التي تعطي القاري متعة المشاهدة من خلال القراءة

و يبدو لي ممكن تبدا لينا و الاخ اشرف في كتابة سيناريوهات تخرجنا شوية من حالة ( عوارة ) الدراما السودانية
و يبدو في وجود الاخ محمد السني دفع الله ممكن فعلا تقدموا شي ممتاز و ممكن تكونوا كتاب لفرقة الاصدقاء المسرحية و ان تقدموا اعمالكم في رمضان القادم و ننافس بيكم الدراما الكويتية و السعودية و بالذات ( طاش ما طاش )
اتمنى تناقش الاح اشرف و الاخ محمد السني دفع الله و نحن معاكم متابعين و ندعوا لكم ... موفقين ان شالله


العقاد
تعرف دي جرعة معنوية ادتنا مناعة ضد انفلونزا الخنازير زاتها ..

نشكرك على ملاحظة الغياب .. حقيقة وعكة صحبة وغبت من العمل اسبوعا كاملا

لكن الحمدلله بدا تشاش الصورة يتجمع ..

[مدنيّة]

شفقة شديدة يا"عمو" ديرديري "ياخ شوف لينا اختصار ياخ :mad: "

[درديري كباشي]

شفقة شديدة يا"عمو" ديرديري "ياخ شوف لينا اختصار ياخ :mad: "

قصدك شنو انا كلام الحبوبات دا ما قعد بفهمو بعض مرات .....

على راي الشاعر :


قمر السبوع الداير الليلة عبه وساير ...في امل تاني باقيلك بعد امل عطبرة .

[عوض الكريم الخواض]

درديرى كباشى ...

نحنا غايتو سمعنا بى شفقة بت حامد ...
والشفقة تطير تقع فى البير ...
أها بت حامد يوم (دُخلتا ) ... وقبل العقد ... لامن سمعت اللستك بتاع العربية طرشق ...

( قعدت تزغرد ) :eek::eek:

واصل يا مبدع .