المساعد الشخصي الرقمي

مشاهدة النسخة كاملة : تعالوووو... نطك الحنك


نزار حسن محمد
27-10-2009, 11:38 PM
بالله عليكم الله ده اسمه كلام
ياخوانا منوا الشاهد سهرة برنامج اغانى واغاني الاخيره بالنادى الالماني بالخرطوم
الرسول فيكم شوفتو ليكم زول شين ولا وحده اضانه زرقه ولاواحده لابس مما نزرع
ياحليلك يامحمد احمد وياحليلك يافاطمه ..انتو سهرات ذى دى مابدعوكم ليها ديل سهرات
الصفوه ..
جنس سماحه رجال ونسوان وشبان وشابات حتى الاطفال ما بشبه اطفال محمد احمد
ياخى ديل طلعوا مع الفنانين وقعدوا اغينوا كانو قاعدين فى العذبه اليلتوم ..غايتوا
الله يلزمنا الصبر ...
ناس اناناس وناس ذى الناس..

اها نطلع من برنامج اغانى واغانى ...
قالوووا جهاز الامن الجديد بعد تعين العميد صلاح مافضل شايقى مااشتغل فوقه
كى كده للجعلين ديلك حميهم نائب الرئيس ..وديل حاميهم الرئيس ..عجبي

اهأ ناس الشرطه قالوا دايرين اسحبوا الحصانه من مستر ياسر ... عشان اقدموه للمحاكمه .. اخر الاخبار قالووو الجماعه كتلوا الموضوع علي كده
عشان مستر ياسر طلع كلامه صحى ..

كدى باخد لفه وبجيكم افضفض شويه تعالووو
صابرحسين
27-10-2009, 11:56 PM
هههههههههههههه

أنت عارف يانزار أخوي ذكرتني بموضوع ناس النادي الألماني ديل واحد صاحبنا كان في بارتي ومتشنط وقابض الجوء و الناس زي ناسك ديل وهو الوحيد المختلف زي الشامة والخلق كلهم كهارب مولعة ، وفجأة دخلنا نحن وكنا ستة بس زولك زعل وطلع وخلى كل شي وقال لينا أن كنت لوحدي وقابض الجوء الزول الوحيد المميز ، وبمجرد دخولكم اصبحت بلا معنى وبعد شوية الشتيمة بتحصل .........
نزار حسن محمد
28-10-2009, 12:09 AM
هههههههههههههه

أنت عارف يانزار أخوي ذكرتني بموضوع ناس النادي الألماني ديل واحد صاحبنا كان في بارتي ومتشنط وقابض الجوء و الناس زي ناسك ديل وهو الوحيد المختلف زي الشامة والخلق كلهم كهارب مولعة ، وفجأة دخلنا نحن وكنا ستة بس زولك زعل وطلع وخلى كل شي وقال لينا أن كنت لوحدي وقابض الجوء الزول الوحيد المميز ، وبمجرد دخولكم اصبحت بلا معنى وبعد شوية الشتيمة بتحصل .........

تعرف ياصابر
ناس ام سنط مشهورين بلبس احدث ما تنتجه الموضه ..آها مره كدى مشينا عرس وكان بالفنان زيدان ابراهيم ومعنا اصحبنا اربعه لابسين اجمل ماعندهم بالله
دخلتنا كدى الحفله بقينا نفتش على اصحابنا ما لقيناهم اخر الحفله لقناهم مصنقرين فوق البوكسى والبرد نافخم سالنهم انتوامشيتوا وين ياخوانا .. نط واحد وقال انا لوعارفكم انتو ماشين باريس ما كنت باريتكم من البدايه قال بالله عينته لنفسى شفت بنطلونى كشه وقميصى ذى المطلعنه من خشم بقره ..وتانى توبه لحبوبه:p
المسافر
28-10-2009, 12:23 AM
والله مع الكريمات الحايمة بأشكالها وأنواعها
ومع ( السيلكون ) الراقدة ده بقينا ما بنفرز
نزار حسن محمد
28-10-2009, 12:28 AM
والله مع الكريمات الحايمة بأشكالها وأنواعها
ومع ( السيلكون ) الراقدة ده بقينا ما بنفرز

ياكوجاك ..الله يجازى محنك
لكن تعرف ياخالد الااناناس الكان فى السهره دى
صدقنى ما بستعملوا الكريمات ( والسيلكون)
ديل بستعملوا دم محمد احمد المسكين
ابوالنور
28-10-2009, 12:56 AM
ديل بستعملوا دم محمد احمد المسكين
شكلي ح اجي راجع تصدق
سيد البلد
28-10-2009, 12:58 AM
ياكوجاك ..الله يجازى محنك
لكن تعرف ياخالد الااناناس الكان فى السهره دى
صدقنى ما بستعملوا الكريمات ( والسيلكون)
ديل بستعملوا دم محمد احمد المسكين



زي وضو " حسن خوجلي " يعني ؟
عوض صقير
28-10-2009, 01:26 AM
حنكك ده يا ود حسن مكلف جداً

عاوز ليهو بدلة فل سوت وريحة من النوع داك ....

وجيب مليان ......

وحاجات تانية حامية أبو النور .....
nehroo
28-10-2009, 02:30 AM
أنت اااا ود حسن أخوي النادي الألماني ده وييييييين ؟؟
في بلاد برة ؟؟؟



بجيك راجع اازوووووووول ..
كدي بس النبيع تمنة لبني دي ..
بنت الرفاعي
28-10-2009, 03:36 AM
هو يا أخوي إسمو النادي الألماني , يعني حتتوقع شنو مثلا ؟؟؟!!!
بنت الرفاعي
28-10-2009, 03:36 AM
ياكوجاك ..الله يجازى محنك
لكن تعرف ياخالد الااناناس الكان فى السهره دى
صدقنى ما بستعملوا الكريمات ( والسيلكون)
ديل بستعملوا دم محمد احمد المسكين

قصدك هم ولّا اللي مخلفنهم ؟؟!!!
صابرحسين
28-10-2009, 07:08 AM
اها نطلع من برنامج اغانى واغانى ...
قالوووا جهاز الامن الجديد بعد تعين العميد صلاح مافضل شايقى مااشتغل فوقه
كى كده للجعلين ديلك حميهم نائب الرئيس ..وديل حاميهم الرئيس ..عجبي

فعلاً ظاهرة عجيبة وما تنسى جماعة سلفا وجماعة مني يعني العاصمة كلها تحت الحماية وبمجرد القبض على أحد رعايا هذه الجماعات تجد القسم محاصر ولدواعي أمنية ومن أجل السلام بإسم السلام يتم إطلاق سراحه والعاقبة عندكم في المسرات ، والبقية التي لا تنتمي قانون الأمن لهم بالمرصاد ولا بد من الضرب بيد من حديد لكل من لم يجد أحد يحميه .... الله كريم .......

اهأ ناس الشرطه قالوا دايرين اسحبوا الحصانه من مستر ياسر ... عشان اقدموه للمحاكمه .. اخر الاخبار قالووو الجماعه كتلوا الموضوع علي كده
عشان مستر ياسر طلع كلامه صحى ..

مستر ياسر يفهم اللعبة جيداً ، وكثيراً كان يتحدى وهذا ما أخاف الشرطة من السير في القضية التي أساءة لهذا الجهاز الحساس .... يعني لا تستطيع أن تقول الحقيقة وأنت خارج حكومة الوحدة الوطنية ..... ابسفروق أخوي الحنك معاك جميل ومواضيعك دسمه وأنا ممنوع من الدسم كفايه لحدي هنا ........
رضا حسن محمد
28-10-2009, 11:46 PM
يا ابو النيز
طولت ما سلفتنى
أشرف صلاح السعيد
29-10-2009, 12:31 AM
اخى نزار سلامى وتحياتى..
بالنسبة لسماحة الرجال والنسوان والجنيات الصغار فدى ما عندنا فيها راى وخلقة الله..
و قصة النادى الألمانى دى والناس تمشى تسهر فيو فدى ناس الله فاتحا عليهم ما عرفو يطيّرو قريشاتم فى شى مفيد والرزق بيد الله ودى برضو ما عندنا فيها راى الا اذا ثبت لينا انهم بتاجرو بقوت الغبش..
أما تلفزيون رسالتو تكون عكس الناس السمحين ويورى اننا شعب ساكى الطرب وعندنا نوادى شى ألمانى وشى أمريكانى وشى كيف كدا ما بعرف فدى كبيرة وشينة..عايزين يجارو موضة الفضائيات المليانة الوان وربات وناس بيض عشان يثبتو اننا متحضرين فدا التخلف البيمشى بكدرو..عايزين يوسعو الفجوة بين شرايح المجتمع وبين القلة العندها حق السهر والغبش المالاقين حق الكِسر فدى اشنة من الشينة..

اما مسألة جعل وشوايقة ودينكا ونوير ..يا زول انتا مالك داير تجبلنا الهوا..غايتو انا فى رأيى المسعلة توكيد لمشاركة الجميع ويااخى اهديل الشوايقة دخلو والدناقلة بعد المرحوم الزبير هسى بيجو ..وأوع تقول ليى الشرق ما عندهم مشاركة ولا الغرب بزعل منك..وأكان اهلنا ناس الجزيرة.. ديل ناس قبب سااكت وزهد..وناس مدنى ديل شعوعيين وبتاعين مشاكل أكانت عندهم حنتوب زمااان وودرت يجيبولكم حنتابة تانى من وين..يااخ ماتظلم الناس..والناس ديل ما بتاعين هوليلا بتاعين تهليل وهلولويا..

والمستر ياسر دا منو؟أهااا ..يااخى الزول عشان من مدنى ..شنو العنصرة دى..وبعدين سعادة اللواء ياسر هو لواء فى ياتو جيش ومن ياتو كلية حربية اتخرج؟؟؟
هوووى يا ناس دا طك حنك ساااكت ما تقولو سياسة تجيبولنا الكفوة..
هيثم بابكر
29-10-2009, 01:13 AM
والله ياابوسفروق نضميك سمح وحكيك حلو ،، وذكرتني دكان ود البصير باذاعة امدرمان ،،، النجيك للنادي الالماني دا ،، في طريقة ندخلو ساكت انشاء الله الناكل سندوتش شاورما بس نكون دخلنا والله العضوية مقفولة لاجل غير مسمى والدخول للاعضاء فقط ،، والله غايتو حكم ،، وتلفزيون النيل الازرق دا غايتو نفسي اعرف بجيبو المذيعات السمحات ديل من وين ،، والظاهر دا بقى ديدنهم سماحة نظافة تعيين طوالي ،،،،

وحكاية الشايقي والجعلي والله غايتو السودان دا كانت قامت الكعة الصومال بس ،، الفترة الفاتت دي العنصرية بقت من غير مدسة والتحييز والتحزب ،، كل قبيلة ، وكل منطقة ،، والله غايتو الله يجنبنا الفتن ،،،

والله بروف ياسر دا حيرنا ماعارفنو عاوز شنو ،،، غايتو قدر ماجيبتو بي جاي بيجاي ماعرفت الفي راسو شنو كل يوم بقصة جديدة وبفتنة جديدة ،، اها هسي لو حصل الانفصال لاقدر الله حايدوهو الجنسية ياربي ،،،، ونواصل
نزار حسن محمد
29-10-2009, 01:15 AM
شكلي ح اجي راجع تصدق

ابوالنور ..كيفنك يالخزين ..
انشاءالله خلاص راسك انعدل ..بعد الفلقه ..
واخوانك التيمان ماقصرو وزعه النشره عبر الفضائيات
والحمد لله ..الجاتك فى زميلتك سامحتك
تعال راجع ساكت
العرجه لمراحه;)
نزار حسن محمد
29-10-2009, 01:31 AM
الحبان
سيد البلد ياحليلو، حبيبنا الخلوق عوض صقير ، نهرو الفنان الفارقنى وذادنى جنان ، مرام ست البنات ، صابر ياصابر عبر السنين، رضا الجدنا جرى من الكديسه ، اشرف حكيم واديب الكلمه الراقيه ، هيثم بابكر الحنين الزول الظريف ،
كتر الف خيركم على طق الحنك ...
الكمبيوتر عامل لى قام اتعزز اليمون قدر ما اكتب رد افصل التقول عنده عضويه فى النادى الالمانى
بجيكم برواقه كده عشان نفيتو ..
لكم الود يا احباب
اخوكم ابوسفروووق
بت مارنجان
29-10-2009, 09:50 AM
وياحليلك يافاطمه ..



يعني اقع البحر ولا قصدك شنو ياابو النيز :o:o:o
moh_alnour
29-10-2009, 03:59 PM
يا حليلك يا محمد احمد ويا حليلك يا فاطمه

يا حليلكم يا ناس بركات الما بتعرفوا السيريلاك
ديل أولاد عوائل و عندهم فايل ;)
هييييي يكا ، هوا هوا هوا
أبعد من الهوا يا أخو رضا ود حسن القال جدو كتل الأسد ، قال طق حنك قال ;)
نزار حسن محمد
31-10-2009, 06:18 PM
يعني اقع البحر ولا قصدك شنو ياابو النيز :o:o:o

انتى يافاطمه السمحه
سمحه سماحت اهلى الغبش
وسمحه بخلقتك واخلاقك ..
الله يحفظك ويبعدك من عينة
ناس النادى الالماني;)
نزار حسن محمد
31-10-2009, 06:32 PM
يا حليلكم يا ناس بركات الما بتعرفوا السيريلاك
ديل أولاد عوائل و عندهم فايل ;)
هييييي يكا ، هوا هوا هوا
أبعد من الهوا يا أخو رضا ود حسن القال جدو كتل الأسد ، قال طق حنك قال ;)

حباب عريسنا
حباب ناس جزيرة الفيل
يابوي ياحليل العوائل
وبعدين انت عوا ئل الزمن ده انقلبو حلب ولا الحاصل شنوا
اى سمحين سمحين علا كلهم حلبه ..وديل نحن ما بنعترف
بيهم نحن كان ما شفنا قام اتعزز اليمون ولا بنعين للحمريطين
ويازول حباب الهواء علا بندوره من نادى جزيرة الفيل
نادى الامانى بتاع الساعه كم ..;)
نزار حسن محمد
31-10-2009, 07:09 PM
زي وضو " حسن خوجلي " يعني ؟

سيد البلد ياحليلو

النصيحه حسين خوجلى زول جزيره ساى
و الخرطوم بتخرب الطبع فى اغلب الاحيان
علا ناس النادى المانى ديل لاشيتن شفتوا قبل
ده ولا سمعتوا.. يازول جنس سماحه حلا وحلا
نزار حسن محمد
31-10-2009, 07:13 PM
حنكك ده يا ود حسن مكلف جداً

عاوز ليهو بدلة فل سوت وريحة من النوع داك ....

وجيب مليان ......

وحاجات تانية حامية أبو النور .....

اى والله صدقت ياوعوض
تعرف جلسة النادى الا لمانى
دى ذكرتنى ايام البارتيات
بتاعة اخونا شريف الدرجه
ياحلينا منها الزيله ياعوض
نزار حسن محمد
31-10-2009, 07:17 PM
أنت اااا ود حسن أخوي النادي الألماني ده وييييييين ؟؟
في بلاد برة ؟؟؟



بجيك راجع اازوووووووول ..
كدي بس النبيع تمنة لبني دي ..
الفنان نهرو
بيع التمنه وخلى الباقى لاخوك
بدوره رووووب رايب
كان نقدر نفهم حاجه
فى جنس البنشوفوو اليومين ديل
نزار حسن محمد
31-10-2009, 07:20 PM
هو يا أخوي إسمو النادي الألماني , يعني حتتوقع شنو مثلا ؟؟؟!!!

صدقتى يامرام
علا يعنى ناس بت مرنجان ما سودانين ومرام وهلم جرا
ديل ليهم الله وعيشة السوق ..
غايتو ..على قول مدنيه ..جنس غايتو
saleh farah
31-10-2009, 07:32 PM
نزار قول ماشاء الله
الله يزيد البلد حلاوه عشان القلوب تصفا
ظاهرة الجمال ظاهرة صحية والحمد لله التقاطيع السودانيه من ما خلقلت البسيطه موجوده
بس الثقافة زادت الجمال الق
الناس بقت مفتحه يانزار ويسن عايزه جكه
صدقنى الجمال مطلوب فى كل خطاوي حياتنا اليوميه
من صحية الصباح وشوفة بنات المدارس زى الزهور ماليات الشوارع جمال
وفى المواصلات وجوا المكاتب وفى العصريه لما تجى ماشى وتلاقى ناس الدور التانى
مش السينما
قصدى الناس البدرسو بالمساء
وفى الحفلات يانزار ، الجمال بسبق الاغانى فى الحفلات
والله يزيد بناتنا ووليداتنا تألق وتأنق
وصدقنى الاندية فى السودان مفتوحه للجميع
بس نحن ما عندنا ثقافة الاندية والاشتراك فيها
اما الجيل الحالى
فهو جيل اللا مستحيل
اما الباقى يا اخوى اعتبرنى ماقريتو
نزار حسن محمد
31-10-2009, 07:35 PM
اها نطلع من برنامج اغانى واغانى ...
قالوووا جهاز الامن الجديد بعد تعين العميد صلاح مافضل شايقى مااشتغل فوقه
كى كده للجعلين ديلك حميهم نائب الرئيس ..وديل حاميهم الرئيس ..عجبي

فعلاً ظاهرة عجيبة وما تنسى جماعة سلفا وجماعة مني يعني العاصمة كلها تحت الحماية وبمجرد القبض على أحد رعايا هذه الجماعات تجد القسم محاصر ولدواعي أمنية ومن أجل السلام بإسم السلام يتم إطلاق سراحه والعاقبة عندكم في المسرات ، والبقية التي لا تنتمي قانون الأمن لهم بالمرصاد ولا بد من الضرب بيد من حديد لكل من لم يجد أحد يحميه .... الله كريم .......

اهأ ناس الشرطه قالوا دايرين اسحبوا الحصانه من مستر ياسر ... عشان اقدموه للمحاكمه .. اخر الاخبار قالووو الجماعه كتلوا الموضوع علي كده
عشان مستر ياسر طلع كلامه صحى ..

مستر ياسر يفهم اللعبة جيداً ، وكثيراً كان يتحدى وهذا ما أخاف الشرطة من السير في القضية التي أساءة لهذا الجهاز الحساس .... يعني لا تستطيع أن تقول الحقيقة وأنت خارج حكومة الوحدة الوطنية ..... ابسفروق أخوي الحنك معاك جميل ومواضيعك دسمه وأنا ممنوع من الدسم كفايه لحدي هنا ........

صابر كيفنك يالحبيب
اليوم من الصباح اذاعة لندن تلعلع وسلفا بوصى فى الجنوبين اصوتو للانفصال
شفت اخرة ناس مستر ياسر ..!!
لكن مستر ياسر ذى ما قلت فهم اللعبه من بدرى
والفى يده القلم ما بكتب لنفسه شقى ولا ماكدى
يازول تعال واصل طق الحنك شايلن منها شنوا
الزائله دى ..
تعال الكل فى انتظارك
نزار حسن محمد
31-10-2009, 07:46 PM
يا ابو النيز
طولت ما سلفتنى

رضا ..انا سمعت تحت تحت قالوا بدور تشترى قطعة الادمن
صحى اتفقت معاه بسعر عروس زنداويه مع شويه مطر
ومليون جنيه ...:(
نزار حسن محمد
31-10-2009, 08:39 PM
اخى نزار سلامى وتحياتى..
بالنسبة لسماحة الرجال والنسوان والجنيات الصغار فدى ما عندنا فيها راى وخلقة الله..
و قصة النادى الألمانى دى والناس تمشى تسهر فيو فدى ناس الله فاتحا عليهم ما عرفو يطيّرو قريشاتم فى شى مفيد والرزق بيد الله ودى برضو ما عندنا فيها راى الا اذا ثبت لينا انهم بتاجرو بقوت الغبش..أما تلفزيون رسالتو تكون عكس الناس السمحين ويورى اننا شعب ساكى الطرب وعندنا نوادى شى ألمانى وشى أمريكانى وشى كيف كدا ما بعرف فدى كبيرة وشينة..عايزين يجارو موضة الفضائيات المليانة الوان وربات وناس بيض عشان يثبتو اننا متحضرين فدا التخلف البيمشى بكدرو..عايزين يوسعو الفجوة بين شرايح المجتمع وبين القلة العندها حق السهر والغبش المالاقين حق الكِسر فدى اشنة من الشينة..
اما مسألة جعل وشوايقة ودينكا ونوير ..يا زول انتا مالك داير تجبلنا الهوا..غايتو انا فى رأيى المسعلة توكيد لمشاركة الجميع ويااخى اهديل الشوايقة دخلو والدناقلة بعد المرحوم الزبير هسى بيجو ..وأوع تقول ليى الشرق ما عندهم مشاركة ولا الغرب بزعل منك..وأكان اهلنا ناس الجزيرة.. ديل ناس قبب سااكت وزهد..وناس مدنى ديل شعوعيين وبتاعين مشاكل أكانت عندهم حنتوب زمااان وودرت يجيبولكم حنتابة تانى من وين..يااخ ماتظلم الناس..والناس ديل ما بتاعين هوليلا بتاعين تهليل وهلولويا..

والمستر ياسر دا منو؟أهااا ..يااخى الزول عشان من مدنى ..شنو العنصرة دى..وبعدين سعادة اللواء ياسر هو لواء فى ياتو جيش ومن ياتو كلية حربية اتخرج؟؟؟
هوووى يا ناس دا طك حنك ساااكت ما تقولو سياسة تجيبولنا الكفوة..

الحبيب اشرف حبابك الف يازول ياسمح
يازول انت فسر وانا ما بقصر
عليك الاخوه يا اشرف هى التفرقه دى كيفنها يعنى السهر كلها عينة افراح وحلا وشذى
آها ناس بت مرنجان ديل اقعو البحر .. وعليك امان الله يا اشرف ماتشوف السمحه دى كان قعدته مع اى واحده فيهم تلقها بتتكلام لبناني وكمان ما معترفه بالتلفزيون بتاع بلدنا
وذى ماقلت ناس التلفزيون عينة فاطمه وكلتوم ما بدوروهم بدوره عينة شذي وحلا
وكمان ناس الجزيره يازول ناس قبب سااكت ..
يازول والله طق الحنك معاك ليه طعم تانى خليك قريب يالحبيب
نزار حسن محمد
31-10-2009, 09:15 PM
والله ياابوسفروق نضميك سمح وحكيك حلو ،، وذكرتني دكان ود البصير باذاعة امدرمان ،،، النجيك للنادي الالماني دا ،، في طريقة ندخلو ساكت انشاء الله الناكل سندوتش شاورما بس نكون دخلنا والله العضوية مقفولة لاجل غير مسمى والدخول للاعضاء فقط ،، والله غايتو حكم ،، وتلفزيون النيل الازرق دا غايتو نفسي اعرف بجيبو المذيعات السمحات ديل من وين ،، والظاهر دا بقى ديدنهم سماحة نظافة تعيين طوالي ،،،،

وحكاية الشايقي والجعلي والله غايتو السودان دا كانت قامت الكعة الصومال بس ،، الفترة الفاتت دي العنصرية بقت من غير مدسة والتحييز والتحزب ،، كل قبيلة ، وكل منطقة ،، والله غايتو الله يجنبنا الفتن ،،،

والله بروف ياسر دا حيرنا ماعارفنو عاوز شنو ،،، غايتو قدر ماجيبتو بي جاي بيجاي ماعرفت الفي راسو شنو كل يوم بقصة جديدة وبفتنة جديدة ،، اها هسي لو حصل الانفصال لاقدر الله حايدوهو الجنسية ياربي ،،،، ونواصل

حباب هيثمنا..
يابوى صدقنى لو ادونا بطاقه فخريه مابندور النادى الالمانى ..نحن ناس ضمنه ووست ساكت جنبك كباية شاى تساوى الدنيا وما فيها وكيس صعوط اخليك تشوف الدنيا ورديه
وعليها الصيد ورد وقيبل مقرن الخرتوم حليل اهلي
اطمئن ياهيثم نحن باذن واحد احد ما بنبقى ذى الصومال نحن شعب ساعة الجد مافى اوعى متيل اهل بلدى مصلحة محمد احمد هى البتسود ..
اها مستر ياسر جماعته اعلانه الانفصال عينك ياتاجر .. ونشوف بكره شنوا راى ناس اريج نسمات الشمال.
نزار حسن محمد
31-10-2009, 09:47 PM
نزار قول ماشاء الله
الله يزيد البلد حلاوه عشان القلوب تصفا
ظاهرة الجمال ظاهرة صحية والحمد لله التقاطيع السودانيه من ما خلقلت البسيطه موجوده
بس الثقافة زادت الجمال الق
الناس بقت مفتحه يانزار ويسن عايزه جكه
صدقنى الجمال مطلوب فى كل خطاوي حياتنا اليوميه
من صحية الصباح وشوفة بنات المدارس زى الزهور ماليات الشوارع جمال
وفى المواصلات وجوا المكاتب وفى العصريه لما تجى ماشى وتلاقى ناس الدور التانى
مش السينما
قصدى الناس البدرسو بالمساء
وفى الحفلات يانزار ، الجمال بسبق الاغانى فى الحفلات
والله يزيد بناتنا ووليداتنا تألق وتأنق
وصدقنى الاندية فى السودان مفتوحه للجميع
بس نحن ما عندنا ثقافة الاندية والاشتراك فيها
اما الجيل الحالى
فهو جيل اللا مستحيل
اما الباقى يا اخوى اعتبرنى ماقريتو

مشاءالله ياود فرح وعليك امان الله السماحه بندوره وبنريده علا سمحة فاطمه السمحه
اما الشوفته يوم السهره دى يازول ديل علا سودانين بالدس لابشبهونا ولا بنشبهم
اما موضوع الناس بقت مفتحه دى صدقته فيها وذى ما بقوله التيمان مفتحين لمن غلط
لكن ياود فرح ياخوى باقى الكلام دا هو بيت القصيد والبلد يازول عليك امان الله بقى فيها حرية صحافه تعال يا زول ياجميل ياحلو طق الحنك ساى
صابرحسين
31-10-2009, 10:42 PM
صابر كيفنك يالحبيب
اليوم من الصباح اذاعة لندن تلعلع وسلفا بوصى فى الجنوبين اصوتو للانفصال
شفت اخرة ناس مستر ياسر ..!!
لكن مستر ياسر ذى ما قلت فهم اللعبه من بدرى
والفى يده القلم ما بكتب لنفسه شقى ولا ماكدى
يازول تعال واصل طق الحنك شايلن منها شنوا
الزائله دى ..
تعال الكل فى انتظارك

والله اشتقنا لسفروقك الذي كان يقف بجانب الحق ويتم قبوله بكل صدر رحب مما يؤكد حسن نواياكم ......

أما بالنسبة للعم سلفا كير مهما لعلع للإنفصال جماعة المؤتمر الوطني ممكن يأتوا بجنوبيين من الصين ويصوتوا للوحدة الجذابة إذا ارادوا ذلك ...... فيجب عليه أن يفكر جيداً في مكانتهم وسط الجنوبيين ويعمل على كسبهم بمزيد من التنمية حتى يحقق ما يريد ، لأن كلامه بدون عمل ملموس على أرض الواقع يعتبر في مصلحة الوحدة التي نتمناها جميعاً فالمؤتمر ذاهب والحركة ذاهبة والوطن العزيز الغالي هو الذي يبقى ........

لكن بيني وبينك بعد ناس مستر ياسر لما يطلعوا جوازات من حكومة الجنوب ويكونوا جنوبيين بالتجنس نحن إلا نغني بعدك الفريق أصبح خلاء ...... ومافي زول بيقول بِغم وجلد الحريم يكون في الأسواق ...... الله لا جاب الإنفصال يا أخوي نزار قول آمين ....
نزار حسن محمد
01-11-2009, 01:35 AM
والله اشتقنا لسفروقك الذي كان يقف بجانب الحق ويتم قبوله بكل صدر رحب مما يؤكد حسن نواياكم ......

أما بالنسبة للعم سلفا كير مهما لعلع للإنفصال جماعة المؤتمر الوطني ممكن يأتوا بجنوبيين من الصين ويصوتوا للوحدة الجذابة إذا ارادوا ذلك ...... فيجب عليه أن يفكر جيداً في مكانتهم وسط الجنوبيين ويعمل على كسبهم بمزيد من التنمية حتى يحقق ما يريد ، لأن كلامه بدون عمل ملموس على أرض الواقع يعتبر في مصلحة الوحدة التي نتمناها جميعاً فالمؤتمر ذاهب والحركة ذاهبة والوطن العزيز الغالي هو الذي يبقى ........

لكن بيني وبينك بعد ناس مستر ياسر لما يطلعوا جوازات من حكومة الجنوب ويكونوا جنوبيين بالتجنس نحن إلا نغني بعدك الفريق أصبح خلاء ...... ومافي زول بيقول بِغم وجلد الحريم يكون في الأسواق ...... الله لا جاب الإنفصال يا أخوي نزار قول آمين ....

حرآآآآآآآآآم ياصابر طق الحنك عندك ..وحديثك بس قعدة النيل فى العصارى
لكن يازول الله يكضب الشينه الناس ديل شكلهم عايزين الانفصال قبل يومين عمله استطلاع مع الاخوه الجنوبين عن نفس الموضوع والاغلبيه قالت عايز ه خوه فرتق
والحديث بقى فى الشمال خليهم انفصله لكن ذى ما قلت الباقى باقى هو الوطن
والغريبه ياصابر قبل كم يوم سلفا كير كان فى مصر وبصم بالعشره انه مافى انفصال
ياربى المبعوث الامريكى يكون جاب الاملاءات بالفاكس قبل مايصل ولا الحاصل شنوا
غايتو ربك اجيب العواقب سليمه..
اما صديقنا منقو اقصد "مستر ياسر " سمعت تحت تحت قالوا عنده جواز امريكى عددديل
غايتوا انحن مصنقرين هنا لو سمعت طق حنك تعال نحن فى انتظارك
بنت الرفاعي
01-11-2009, 02:24 AM
صدقتى يامرام
علا يعنى ناس بت مرنجان ما سودانين ومرام وهلم جرا
ديل ليهم الله وعيشة السوق ..
غايتو ..على قول مدنيه ..جنس غايتو

عارف بتعجبني القنوات السودانية لما تجيب بناتنا السمحات ديل , لأنو في باقي الدول متخيلين إنو السودانيين طاقاهم شنا ما بتتقابل , ياخي ديل يكرهوا الواحد لما يعرفوهوا سوداني , وبالذات زمان قبل ما القنوات دي تطلع ويشوفوا الناس السمحين ديل , قايلين السودان كلها سُمر , يعني زينا و زيكم مافي , وده طبعا كلو من الإعلام السابق وبعض الحالي , ما عندهم موضوع غير الحروب في السودان , علشان كدة السمحين ديل بفرح بيهم شدييييد , وبالمناسبة بنات الجزيرة أغلبهم جميلات ولكن ................!:)
نزار حسن محمد
01-11-2009, 07:56 PM
عارف بتعجبني القنوات السودانية لما تجيب بناتنا السمحات ديل , لأنو في باقي الدول متخيلين إنو السودانيين طاقاهم شنا ما بتتقابل , ياخي ديل يكرهوا الواحد لما يعرفوهوا سوداني , وبالذات زمان قبل ما القنوات دي تطلع ويشوفوا الناس السمحين ديل , قايلين السودان كلها شُمر , يعني زينا و زيكم مافي , وده طبعا كلو من الإعلام السابق وبعض الحالي , ما عندهم موضوع غير الحروب في السودان , علشان كدة السمحين ديل بفرح بيهم شدييييد , وبالمناسبة بنات الجزيرة أغلبهم جميلات ولكن ................!:)

حلـــــوه جميله وزيك وين.. ويـــن
يابت بلدى
وفى الكـــون كلـــــه مافي مثيل
يابت بلدى
يابــت بلــــدى يافخــــر اوطــانى
يابت بلدى
طبعــك هــادى اصيــل ورزيـــن
يابت بلدى
يابــت بلـــدى يابلـــدى
نزار حسن محمد
01-11-2009, 10:31 PM
مواصله فى طق الحنك

ياخوانا ناس المؤتمر الشعبى ديل ما دايرين اجيبوها البر ..
امبارح سلفاكير طالب سكان الجنوب بالتصويت للانفصال
واليوم المتحدث باسم الحركه اكــــد ما ذهب اليه سلفاكير
والموضوع كله صباح ماشى لتقسيم اوصال الوطن
شن الراى يا اهل السوراى
*
امبارح عبر بريدى استلمت احدث ما وصل اليه الغناء الهابط
فنانه بتغنى اغنيه اسمها غررررز والله كلام يشيب له راس
الرضيع والمصيبه من شدة الهجيج لمن كمبيوترى دستر
*
بالامس بداء التسجيل للانتخابات التى سوف تجرى فى شهر
مايـو وبارك الله فى ناس القنصليه ارسلو لنا مسج بذلك.
*
الخبر الجميل بان شوارع ودمدنى قالووو ماشاءالله وعينه بارده
وكمان قالووو اطرف الطريق بقت اشجار نخيل عقبال ما يهتمه
بانسان الجزيره ..خير اللهم اجعله خير.
بت مارنجان
01-11-2009, 11:12 PM
انتى يافاطمه السمحه
سمحه سماحت اهلى الغبش
وسمحه بخلقتك واخلاقك ..
الله يحفظك ويبعدك من عينة
ناس النادى الالماني;)

ياسلام عليك ياود حسن السغير رفعت معنويات الواحد من الصباح كدة ....
نحنا غايتو النادي الالماني دة بنجي مارين جمبو ساي تلفحنا منو هبا
بااااااااااااااااااردة تنعشك وتبقي ماشي بي شارعك :p
روبش
02-11-2009, 12:35 AM
بالله عليكم الله ده اسمه كلام
ياخوانا منوا الشاهد سهرة برنامج اغانى واغاني الاخيره بالنادى الالماني بالخرطوم
الرسول فيكم شوفتو ليكم زول شين ولا وحده اضانه زرقه ولاواحده لابس مما نزرع
ياحليلك يامحمد احمد وياحليلك يافاطمه ..انتو سهرات ذى دى مابدعوكم ليها ديل سهرات
الصفوه ..
جنس سماحه رجال ونسوان وشبان وشابات حتى الاطفال ما بشبه اطفال محمد احمد
ياخى ديل طلعوا مع الفنانين وقعدوا اغينوا كانو قاعدين فى العذبه اليلتوم ..غايتوا
الله يلزمنا الصبر ...
ناس اناناس وناس ذى الناس..




والله يا نزار اخوي شاهدت الحلقة ومعي وزارة الداخلية لكن عملت نايم من الشفتو وما قلت اي كلام
روبش
02-11-2009, 12:37 AM
مواصله فى طق الحنك

ياخوانا ناس المؤتمر الشعبى ديل ما دايرين اجيبوها البر ..
امبارح سلفاكير طالب سكان الجنوب بالتصويت للانفصال
واليوم المتحدث باسم الحركه اكــــد ما ذهب اليه سلفاكير
والموضوع كله صباح ماشى لتقسيم اوصال الوطن
شن الراى يا اهل السوراى
*
امبارح عبر بريدى استلمت احدث ما وصل اليه الغناء الهابط
فنانه بتغنى اغنيه اسمها غررررز والله كلام يشيب له راس
الرضيع والمصيبه من شدة الهجيج لمن كمبيوترى دستر
*
بالامس بداء التسجيل للانتخابات التى سوف تجرى فى شهر
مايـو وبارك الله فى ناس القنصليه ارسلو لنا مسج بذلك.
*
الخبر الجميل بان شوارع ودمدنى قالووو ماشاءالله وعينه بارده
وكمان قالووو اطرف الطريق بقت اشجار نخيل عقبال ما يهتمه
بانسان الجزيره ..خير اللهم اجعله خير.

دحين يا نزار اخوي كنت ماشي كويس بديت تنطط مالك .. عايز تجيب لموضوعك ده الهوى
نزار حسن محمد
02-11-2009, 12:42 AM
ياسلام عليك ياود حسن السغير رفعت معنويات الواحد من الصباح كدة ....
نحنا غايتو النادي الالماني دة بنجي مارين جمبو ساي تلفحنا منو هبا
بااااااااااااااااااردة تنعشك وتبقي ماشي بي شارعك :p

ست البنات بتنا بت مارنجان..
الله اجازى محنك قلتى شنوا تلفحك هبا مرطبه
اها اخوك عنده حساسيه من الانديه الافرنجيه
نحن ناس اندية العمال والله الواحد اتونس واضحك
لمن مصارينه تتمطى وناكل داك يالبوش ونلحس
ايدنا ونحبس بكباية شاى ونقنطر السفه ونــقول
لناس النادى الالمانى يادنيا ما فيك الا.. انـــا..
شفتى كيف
نزار حسن محمد
02-11-2009, 12:49 AM
والله يا نزار اخوي شاهدت الحلقة ومعي وزارة الداخلية لكن عملت نايم من الشفتو وما قلت اي كلام

حبيب الكل سيد البلد روبش ...
تعرف الحال من بعضو انا وزارة الداخليه كل ما يجبه واحده سمحه نعين لى جوه عينى
وانا اتكشم ساى ..اها لمن لقتم كلهم سمحات قالت لى هوووى يا راجل انت ما خلاص
السهر قدد عينك امشى اندمس نوم قلته ليها لكن ما افراح لسع ما غنت ..اكان قفلت التلفزيون ..وحاة الهلال ياروبش تمت السهر فى اعادة البرنامج يوم السبت...
افـــــــــــو ..انا الصعب .. المتكل بالشعيب
نزار حسن محمد
02-11-2009, 12:52 AM
والله يا نزار اخوي شاهدت الحلقة ومعي وزارة الداخلية لكن عملت نايم من الشفتو وما قلت اي كلام

حبيب الكل سيد البلد روبش ...
تعرف الحال من بعضو انا وزارة الداخليه كل ما يجبه واحده سمحه تــعين لى جوه عينى
وانا اتكشم ساى ..اها لمن لقتم كلهم سمحات قالت لى هوووى يا راجل انت ما خلاص
السهر قدد عينك امشى اندمس نوم قلته ليها لكن ما افراح لسع ما غنت ..اكان قفلت التلفزيون ..وحاة الهلال ياروبش تمت السهر فى اعادة البرنامج يوم السبت...
افـــــــــــو ..انا الصعب .. المتكل بالشعيب
نزار حسن محمد
02-11-2009, 01:01 AM
دحين يا نزار اخوي كنت ماشي كويس بديت تنطط مالك .. عايز تجيب لموضوعك ده الهوى

تعرف ياروبش ذكرتنى نكتت الراجل مرتو لقته بقنطر فى السفه قالت ليه هى انت بتسف
قال ليها اى وبطلاق كمان ..اكان قالت ليه هى حلاة السفه فى خشيمك ..
فدحين يابوى نحن السودانين بنحب طق الحنك والحمدالله خلاص قالوو فى حرية صحافه
والكلام الفوق ده كله حاصل ... والله يبعد عنا مقص الرقابه قول امين
رضا حسن محمد
02-11-2009, 11:44 AM
افراح تشبه الناقة المرقت من بحر الحصاحيصا
اموت ركن
moh_alnour
02-11-2009, 04:18 PM
فنانه بتغنى اغنيه اسمها غررررز و الله كلام يشيب له راس الرضيع و المصيبه من شدة الهجيج لمن كمبيوترى دستر

:) :) :)

إن شاء الله تكون شاهدتا حلقة مراجعات أمس مع الأستاذ ( الطيب مصطفى ) بقناة النيل الأزرق و حديثه عن الإنفصال
الواحد بدأ يحس أنو الإنفصال أصبح واقع يجب علينا التكيف معه من الأن



ياسلام عليك يا ود حسن السغير رفعت معنويات الواحد من الصباح كدا :p

شكلك كدا يا فاطمة رتبتي أولاد حسن الجدهم كتل الأسد تنازليا ً و ح تخلي ( رضا و هبار و غسان ) يزعلوا منك ;)



أفراح تشبه الناقة المرقت من بحر الحصاحيصا ، أموت ركن

;) تقرير مشاركة سيئة ;)
خالد 000 ابقرجة
02-11-2009, 07:49 PM
اب سفرووووووق 000


ياخي حنكك سنين 000

وقطع زي سكين 000

يشيل من السمين 000

ويشبع المسكين 000


حنك جزارة يا عمك 000

عارف 000

النادي الألماني ده ما عاجبني 000

بحب النادي الياباني 000

عشان حبوبتي من زمااااااااااااااااان عضو فيهو 000

كل يوم شابكانا ( الياباني والتاباني ) 000 الله ارحما واغفر ليها 000

أها يا ود حسن 000

حالنا بقي حال الياباني والتاباني 000

بس برضو حبوبتي كان عندها حكمة حلوة 000

لمن الحمي ام برد تجينا بالليل 000

وتشيل معانا الليل كوووووولو مكمدات 000

بتقول قولتا المشهورة 000

أصبر يا ولدي 000

هسي دي الشمس بتطلع 000

باقي النهار فكي 000

دحين يا اب سفروق يا خوي خلينا نصبر نفسنا بي شمس امكن تتطلع 000

عشان النهار الفكي اصلح حالنا 000

بجيك صاد يا اب سفروق 000

لأنو ونستك حلوة 000

وبتصفي النفس 000

زي الشاي باللبن 000

لمن التفل يقعد في المصفي 000

أديك كباية ؟؟؟؟؟
نزار حسن محمد
02-11-2009, 08:46 PM
افراح تشبه الناقة المرقت من بحر الحصاحيصا
اموت ركن

انت يا عبد الرضى حكايتك شنوا مع "حسن عيسى" الحصاحيصا ..
كدى عليك افراح تعال احكى لى يوم رجعت من الحصاحيصا حفيان
صابرحسين
02-11-2009, 08:56 PM
[QUOTE=نزار حسن محمد;431658]مواصله فى طق الحنك

ياخوانا ناس المؤتمر الشعبى ديل ما دايرين اجيبوها البر ..
امبارح سلفاكير طالب سكان الجنوب بالتصويت للانفصال
واليوم المتحدث باسم الحركه اكــــد ما ذهب اليه سلفاكير
والموضوع كله صباح ماشى لتقسيم اوصال الوطن
شن الراى يا اهل السوراى
*
[SIZE="5"][COLOR="Red"]أنت عارف يا اخوي أبسفروق ناس الشعبي قلبهم محروق بعد الطلاق والخلاف الشهير بين الشيخ والحيران الذين ظهرت لهم أنياب ومخالب ، فلذلك تصريحاتهم وقراراتهم لا تجد الصدى الكبير بين كثير من الناس لأن الاغلب الأعم من الأحياء من أبناء البلد يعلمون جيداً سر العلاقة ما بين الشيخ والحيران والتسويه بإيدك يغلب أجاويدك ........ وكل شي لله ....
أما ناس الحركة وحديثهم عن الإنفصال يعطيني إحساس بإن الحركة بتجهز في فاتورة كبيرة من هذه الفرقعات الإعلامية ، لأن أمر الإنفصال ليس بالشي السهل ويجب التحضير له منذ البداية والعمل على تماسك شعب الجنوب ودحر القبلية والفرقة بين الجنوبيين ومؤتمر جوبا مثال لهذه الفرقة الداخلية للجنوبيين ، فلذلك وكما عودتنا الحركة في إظهار أنها هي الند القوي للمؤتمر وهي التي تحمل معاول التغيير والسودان الجديد الذي يسع الجميع ، تفاجئنا دائماً بقرارات مخزية وعكس توقعات الجميع والحالة التي حدثت مع التجمع مثال وأضح ...والسؤال هل الحركة جاهزة لهذا الإنفصال بكل تعقيداته ومشاكله ؟ أم أن المسألة ضغط سياسي بأسلوب جديد لتنفيذ أجندة سياسية مع الشريك الذي أعطاهم وأجزل في العطاء .....
نزار حسن محمد
02-11-2009, 09:02 PM
اب سفرووووووق 000


ياخي حنكك سنين 000

وقطع زي سكين 000

يشيل من السمين 000

ويشبع المسكين 000


حنك جزارة يا عمك 000

عارف 000

النادي الألماني ده ما عاجبني 000

بحب النادي الياباني 000

عشان حبوبتي من زمااااااااااااااااان عضو فيهو 000

كل يوم شابكانا ( الياباني والتاباني ) 000 الله ارحما واغفر ليها 000

أها يا ود حسن 000

حالنا بقي حال الياباني والتاباني 000

بس برضو حبوبتي كان عندها حكمة حلوة 000

لمن الحمي ام برد تجينا بالليل 000

وتشيل معانا الليل كوووووولو مكمدات 000

بتقول قولتا المشهورة 000

أصبر يا ولدي 000

هسي دي الشمس بتطلع 000

باقي النهار فكي 000

دحين يا اب سفروق يا خوي خلينا نصبر نفسنا بي شمس امكن تتطلع 000

عشان النهار الفكي اصلح حالنا 000

بجيك صاد يا اب سفروق 000

لأنو ونستك حلوة 000

وبتصفي النفس 000

زي الشاي باللبن 000

لمن التفل يقعد في المصفي 000

أديك كباية ؟؟؟؟؟

ابوقرجه على وزن ابونقطه
ونستك طاعمه ولذيذه ذى الموز ابو نقطه
ربى يرحم حبوبتك ... يازول ديل ما ناس الحكمه
ماقصروا معانا فى كل شى ..
وانا من ضمن اعضاء نادى التابانى
اتحد كل العرب لو اعرفه كلمة التابانى
خلى العرب هسى الرسول فيك
بنات النادى الالمانى ديل بعرفه
القرقريبه والا المحراكه .
لكن النصيحه لى الله سمحات جنس
سماحه ذكرونى ايامى الفى الدويم..
آها يالحبيب خالد نحن صابرين والله يلزمنا
الصبر كمان وكمان ..وفى انتظار شمس باكر
كملنا الصبر كله..
ياسلام عليك فى وصفك للشاى باللبن
ياحليل شاى المغربيه مع ناس مدنيه وعلويه
يازول خصمتك بالرسول ماتغيب
نزار حسن محمد
02-11-2009, 09:17 PM
[quote=نزار حسن محمد;431658]مواصله فى طق الحنك

ياخوانا ناس المؤتمر الشعبى ديل ما دايرين اجيبوها البر ..
امبارح سلفاكير طالب سكان الجنوب بالتصويت للانفصال
واليوم المتحدث باسم الحركه اكــــد ما ذهب اليه سلفاكير
والموضوع كله صباح ماشى لتقسيم اوصال الوطن
شن الراى يا اهل السوراى
*
[size="5"][color="red"]أنت عارف يا اخوي أبسفروق ناس الشعبي قلبهم محروق بعد الطلاق والخلاف الشهير بين الشيخ والحيران الذين ظهرت لهم أنياب ومخالب ، فلذلك تصريحاتهم وقراراتهم لا تجد الصدى الكبير بين كثير من الناس لأن الاغلب الأعم من الأحياء من أبناء البلد يعلمون جيداً سر العلاقة ما بين الشيخ والحيران والتسويه بإيدك يغلب أجاويدك ........ وكل شي لله ....
أما ناس الحركة وحديثهم عن الإنفصال يعطيني إحساس بإن الحركة بتجهز في فاتورة كبيرة من هذه الفرقعات الإعلامية ، لأن أمر الإنفصال ليس بالشي السهل ويجب التحضير له منذ البداية والعمل على تماسك شعب الجنوب ودحر القبلية والفرقة بين الجنوبيين ومؤتمر جوبا مثال لهذه الفرقة الداخلية للجنوبيين ، فلذلك وكما عودتنا الحركة في إظهار أنها هي الند القوي للمؤتمر وهي التي تحمل معاول التغيير والسودان الجديد الذي يسع الجميع ، تفاجئنا دائماً بقرارات مخزية وعكس توقعات الجميع والحالة التي حدثت مع التجمع مثال وأضح ...والسؤال هل الحركة جاهزة لهذا الإنفصال بكل تعقيداته ومشاكله ؟ أم أن المسألة ضغط سياسي بأسلوب جديد لتنفيذ أجندة سياسية مع الشريك الذي أعطاهم وأجزل في العطاء .....

الحبيب صابر الصابر
كتر الف خيرك على هذا التحليل الموضوعى
وانا اتفق معك جملةً وتفصيلاً ..
قبل فتره حضر عندنا هنا فى وزارة الاشغال
بدبى وفد من 200 موظف جنوبى قالوو عايزين
يعرفه تجربة بناء البنيه التحتيه لدولة الامارات!
ومنذا ذلك الوقت وانا اتوقع هذا التصريح من
ناس الحركه الشعبيه
و المشكله وين ياصابر... اخوانا المصريين
خائفين من هذا الانفصال ..غايتو ا انا لو شاورونى
بقول ليهم جيبو جيشكم وخلوه فى الحدود الجديده
ونحن قادرين علي نفسنا
ولكن خوفى ان يتجزاء السودان الى ما تصبوا اليه
الدول المعاديه ..
غايتوا قالووو حبل الصبر بفضل وافيض
ماتغيب يالحبيب
نزار حسن محمد
02-11-2009, 09:30 PM
:) :) :)

إن شاء الله تكون شاهدتا حلقة مراجعات أمس مع الأستاذ ( الطيب مصطفى ) بقناة النيل الأزرق و حديثه عن الإنفصال
الواحد بدأ يحس أنو الإنفصال أصبح واقع يجب علينا التكيف معه من الأن



شكلك كدا يا فاطمة رتبتي أولاد حسن الجدهم كتل الأسد تنازليا ً و ح تخلي ( رضا و هبار و غسان ) يزعلوا منك ;)



;) تقرير مشاركة سيئة ;)

عريسنا الاسمرانى فلان الفلانى
شاهدته حلقة الجعلي الثائر الطيب مصطفي .. لكن تقيمى لحديثه دعايه انتخابيه اكثر من واقع ملموس...والله يكذب الشينه
محمد نور الرسول فيك تعرف لى سر كلمة السغير دى شنوا شبكتا فينى بتنا بت مرنجان اكيد طبخوها هى ورضا والله بقيت ذى الااطرش فى الزفه :rolleyes:
اما اخى الجدو فرتق صوف من الاسد اسالنى دبل ياتو يوم كان مشاركته ما .....
آها ياعريس قالووو خلاص مع فرحة نادى جزيرة الفيل بالصعود حتفرحنا معاك بداك يالعرس
والفنانه افراح;) ...جيت لينا بعريسنا
صابرحسين
03-11-2009, 10:59 PM
[quote=صابرحسين;432329]

الحبيب صابر الصابر
كتر الف خيرك على هذا التحليل الموضوعى
وانا اتفق معك جملةً وتفصيلاً ..
قبل فتره حضر عندنا هنا فى وزارة الاشغال
بدبى وفد من 200 موظف جنوبى قالوو عايزين
يعرفه تجربة بناء البنيه التحتيه لدولة الامارات!
ومنذا ذلك الوقت وانا اتوقع هذا التصريح من
ناس الحركه الشعبيه
و المشكله وين ياصابر... اخوانا المصريين
خائفين من هذا الانفصال ..غايتو ا انا لو شاورونى
بقول ليهم جيبو جيشكم وخلوه فى الحدود الجديده
ونحن قادرين علي نفسنا
ولكن خوفى ان يتجزاء السودان الى ما تصبوا اليه
الدول المعاديه ..
غايتوا قالووو حبل الصبر بفضل وافيض
ماتغيب يالحبيب

الله يكضب الشينة أخي نزار ومتغيرات السياسة تجعلك لا تستطيع أن تبني على آي تصريح أو آي فعل لأن المفاجأت كثيرة وما يقال غالباً يكون من أجل الإستهلاك السياسي ، ومثال على ذلك أن حكومة الوحدة الوطنية بشقيها تتغزل في إتفاقية نيفاشا لدرجة أن آي من الشريكين يقبل آي نقد وحينما يأتي الكلام عن نيفاشا والكيكة التي قسمت بينهم يبدأ الدفاع المستميت ، وفي النهاية سوف يدفع الثمن مواطني الجنوب والشمال المكتوين بهذه السياسات منذ التوقيع على هذه الإتفاقية التي تحمل في دواخلها متناقضات كثيرة من ضمنها هذا الإستفتاء ، وكان الأجدى أن يتم الإتفاق وفي كل الأحوال أن يكون السودان بلد موحد قوي مبني على العدل والمساواة بين جميع أبناء شعبه.......

أنت عارف بالنسبة للمصرين أنا أتوقع جاء عمنا سلفا داخل وبعد التحية وكيف الحال والأولاد إنشاء الله طيبين وأنشاء بس ما تعبتوا من السفر ، وكل ما يحاول سلفا يقول حاجة عمنا حسني يغير الموضوع ويتكلم عن المرحوم جون قرن وعن المرحوم نميري ، لآنها ورطة إذا أيد الإنفصال فقد الشمال وإذا لم يؤيد فقد الجنوب وفي كل الأحوال المصريين يلعبون على كل الحبال ويطلع الكل راضي عنهم والقضية الفلسطينية مثال واضح ..... يعني سلفا طلع من مصر ولم يعرف رأي الحكومة المصرية أكبر بلد عربي وافريقي به حرية تعبير وفي نفس الوقت الحكومة تتطنش .... وقد يكون إرهاصات حلايب وإدعاء بعض الكتاب المصريين بأن سواكن وبورتسودان تاريخياً يتبعون لمصر شجع الحركة الشعبية لزيارة مصر وإعلان نيتهم في الإنفصال مما يفرح مصر ، ولكن الفرعون حريف وعارف بكره ينصلح الشريكين ويطلع هو الغلطان .........
نزار حسن محمد
03-11-2009, 11:52 PM
[quote=نزار حسن محمد;432339]

الله يكضب الشينة أخي نزار ومتغيرات السياسة تجعلك لا تستطيع أن تبني على آي تصريح أو آي فعل لأن المفاجأت كثيرة وما يقال غالباً يكون من أجل الإستهلاك السياسي ، ومثال على ذلك أن حكومة الوحدة الوطنية بشقيها تتغزل في إتفاقية نيفاشا لدرجة أن آي من الشريكين يقبل آي نقد وحينما يأتي الكلام عن نيفاشا والكيكة التي قسمت بينهم يبدأ الدفاع المستميت ، وفي النهاية سوف يدفع الثمن مواطني الجنوب والشمال المكتوين بهذه السياسات منذ التوقيع على هذه الإتفاقية التي تحمل في دواخلها متناقضات كثيرة من ضمنها هذا الإستفتاء ، وكان الأجدى أن يتم الإتفاق وفي كل الأحوال أن يكون السودان بلد موحد قوي مبني على العدل والمساواة بين جميع أبناء شعبه.......

أنت عارف بالنسبة للمصرين أنا أتوقع جاء عمنا سلفا داخل وبعد التحية وكيف الحال والأولاد إنشاء الله طيبين وأنشاء بس ما تعبتوا من السفر ، وكل ما يحاول سلفا يقول حاجة عمنا حسني يغير الموضوع ويتكلم عن المرحوم جون قرن وعن المرحوم نميري ، لآنها ورطة إذا أيد الإنفصال فقد الشمال وإذا لم يؤيد فقد الجنوب وفي كل الأحوال المصريين يلعبون على كل الحبال ويطلع الكل راضي عنهم والقضية الفلسطينية مثال واضح ..... يعني سلفا طلع من مصر ولم يعرف رأي الحكومة المصرية أكبر بلد عربي وافريقي به حرية تعبير وفي نفس الوقت الحكومة تتطنش .... وقد يكون إرهاصات حلايب وإدعاء بعض الكتاب المصريين بأن سواكن وبورتسودان تاريخياً يتبعون لمصر شجع الحركة الشعبية لزيارة مصر وإعلان نيتهم في الإنفصال مما يفرح مصر ، ولكن الفرعون حريف وعارف بكره ينصلح الشريكين ويطلع هو الغلطان .........

صابر ..نهارك قشطه على قول المصريين
تعرف داير اطق معاك الحنك لكن جانى تلفون
من وزارة الداخليه حقتى
وهى الان بالمستشفى فى حالة وضوع
خلال هذه الايام ..
دعواتكم معنا يالحبان
وبجيكم برواقه
روبش
04-11-2009, 12:45 AM
[quote=صابرحسين;433301]

صابر ..نهارك قشطه على قول المصريين
تعرف داير اطق معاك الحنك لكن جانى تلفون
من وزارة الداخليه حقتى
وهى الان بالمستشفى فى حالة وضوع
خلال هذه الايام ..
دعواتكم معنا يالحبان
وبجيكم برواقه

مبرووووووووووووووووووووووووك مقدما يا نزار ...
صابرحسين
04-11-2009, 05:34 AM
[quote=صابرحسين;433301]

صابر ..نهارك قشطه على قول المصريين
تعرف داير اطق معاك الحنك لكن جانى تلفون
من وزارة الداخليه حقتى
وهى الان بالمستشفى فى حالة وضوع
خلال هذه الايام ..
دعواتكم معنا يالحبان
وبجيكم برواقه

ألف مبروك مقدماً
وربنا يكتب سلامة المدام
وأسأله تعالى أن يرزقكم الزرية الصالحة وأن يسهل أمر وضوعها

آمين آمين آمين
بنت الرفاعي
04-11-2009, 07:19 AM
ألف ألف مبروك .:)
بت مارنجان
04-11-2009, 07:24 AM
ربنا يسهل يانزار ويحلكم بالسلامة