يـــــــــــــــــــــا راجل

[عباس الدسيس]

بطولات افريقيه اندية تصرف فلوس بالملايين شيء وارقو الحارقو شيء سا سا سادومبا فنان عندوا فيديو كليب جديد حفلات ومهرجانات ... الشريف مبسوط مني عشان فني... نجوم الغد بعد ما كملوا اليوم ماشين للغد... فكرك تاني الاولاد بعاينوا لي القراية ام دق احسن الواحد اطلع لاعب كوره أو فنان باقصر الطرق اكون عندوا بودي قارد حكاية البودي قارد دي لو بقي مدير بنك ما إلم فيها كده نقترح للسادة المسؤلين في دولة (In gas ) الحرقونا... اقتراحات مفيده تمشيا مع روح العصر والكسب السريع ... المنهج التعليمي من عدل فيهوا محي الدين صابر زمن نميري تاني ما رفع راسو لذلك يتم الغاء المواد الحالية والاستعاضه عنها بمواد جديده فلسفيه ورياضيه وغنائيه كما تضاف بعض المواد للجنس اللطيف كمادة التجميل واستعمال المساحيق احسن من الواحده تكون قاعده تقرأ لما تحصل علي الشهادة ما تعرف تعمل بيها شنو.... واحد حبيبنا وصديقنا كان معانا في الغربة هنا قرر امشي السودان نهائي حاولنا قلنا ليهوا يا راجل بلغة المزيع محمد سليمان عندما سأل احد المستضيفين في برنامجه الشهير بالتلفزيون عن اذكي رئيس في العالم له اسهامات دوليه في تطوير بلده.... الخ اخونا قال ليهو نميري ردت الفعل كانت اندهاشه من مقدم البرنامج .... يا راجل.... حبيبنا نزل السودان بي السيارة الكورلا اخر موديل وقريشات لتأسيس الحياة بعد عشره شهور اتصل عشان نشتري ليهو فيزا جانا راجع تاني يحكي في احوال السودان بطريقة بداية الكلام في المقال اعلاه سالناهوا وين العربية الجديده والقروش عن القروش قال الله اخلف لاكن العربية السماسره سكوني فيها عملت لي بقالة قالوا لي ندخلك في اوتوس فرق المبلغ احسن ليك تدخلوا في البقالة من الاتوس نزلوني لي رقشه من رقشه لي موتر فيسبا اخر شيء صفت علي مكنة تصوير بايظه خليتا هناك في السودان من وصلت مكنة التصوير الجماعه بقوا كان لاقوني في الشارع ازوغوا من.... وجيت بعد ده يا جماعه نقبل وين والله كان نبقي زي المرأة القالوا في عمان زوجها راجع نهائي السودان جهز نفسوا قطع التذاكر عمل الخروج النهائي وقت جاء مواعيد السفر الزوجه ما لقوها في البيت اخونا بدل امشي الطياره قعد افتش لي زوجتوا لقوها بعد كم يوم مدسيه مع صاحبتها قالت اي شيء ولا الرجوع نبقي في زي ده ... ولا احسن نبقي زي حكاية الرجل الزوجتوا حامل قالوا ليهوا الدكاتره انشاءالله بتجيب تيمان قال مره واحده اتنين احسن حاجه الواحد اجيب ليهم حبوب الادب والاخلاق عشان لما اطلعوا اكونوا اولاد مأدبين بعد تسعه اشهر الزوجه لم تلد بعد الشهر العاشر عملوا ليها فتح بطن لقوا التيمان كل واحد اقول للتاني لا انت اتفضل اول .... اها اي واحد اقول ليك ما ماشي تقعد تقول ليهوا بعد ما تمشي انت اول.... وافضل حاجة لينا مناسبة حكاية الكتكوت الكان برقص في الشارع رقص خليع شافوا ديك قال ليهو انت ما عندك اهل ربوك قال ليهوا لا انا تفقيس مكائن ... يلا احسن نكون تفقيس مكائن ونرقص هنا والبرقص ما بغطي دقنوا ..............والسلام

[أشرف صلاح السعيد]

حبيبنا الدسيس بركة الجيت بركة الجيت آيى دا الشغل دا الشغل "شوفتا سلام مكائن التفقيس"..
ليك وحشة والله..
انا بقى عندى صاحبى كنا بنقول متين حنرجع نهائى وكلنا استنظرنا ..القال بعد سنة وبعد سنتين وهو يراقب فينا وقمنا سألناهو : أها يا معاذ وانت متين مفكر فى الرجعة؟..قال لينا : انتو مجانين ولا شنو ؟..والله انا لغاية مايقولو دا آآخر ريال قاعد هنا.. آآخر ريال شنو والله بعد ما تكمل الريالات بشتغل هنا وبشيل حقى بلح وأكان البلح خلص بقول ليهم ماعندكم أى مشكلة ادونى حقى ساسوى..زولك دا بخت مرتو لا محتاجة تتدسدس ولا تتجارا مؤبدة هنا..
زولك التانى كان قاضى بالسودان واخد اجازة خصما على المرتب وجا السعودية..وفى يوم قاعد مع الدينصورات ناس تلتين واربعين سنة من اهلنا الرطانة ..قامو الجماعة سألوهو: اها يا مولانا شنو خططك؟..وهو كان راجل انصار سنة "بضم السين" رد عليهم : والله انا بس سنتين اتم بنا البيت بالسودان وبرجع..واحد حرقو كلام مولانا فرد عليو : أليا التلاق بالتلاتا فى السنتين دول لو قدرت تتم جلابتك اللى لابسا دى تكون راجل..
يااخوى اصواتنا ما بتأهلنا للفن ومانا حرفة ما كان قدامنا الا نهتف ولا نغترب وزى ما انتا شايف..
كورة شنو يااخوى الفى السودان وياتو غنا ..لا عندنا دا ولا دى وسيبا ساااكت..
لكن مرة الراجل الادست شكيت محنا عملتا شينة ..
لك كل الود ومشتاقين يا دسيس..

[درديري كباشي]

يا رااااااااااااااااااااااااااااااااااجل

انت مصر على الخلطات العباسية دي .... عباس مواضيعك وطريقتك فريدة من نوعها .. ورغما عن انه الواحد بعد ما يخلص من قراية الموضوع يحس بلفة راس ... بس لفة راس لذيذة ممتعة مثل ما يستمتع الصغار بالمراجيح ..
على كل حال مرحب بلفة الراس من عندك ... ودور بينا البلد دا احرق الجازلين بالبابور جاز

[صلاح ودالطاهر]

عباس السفاره في العماره

[درديري كباشي]

عباس السفاره في العماره

تتصور يا ابوصلاح نسيت اساله من الموضوع ؟؟ .. قلت لي كبس ليك

[عباس الدسيس]

الحبيب العزيز ابو الشوش ياخي انا امشي واخليكم وين يا حلوين دائما لما نكتب موضوع بتجيب تعليق احلي منوا عشان كده بنكشكشك بي ريسان المواضيع يا ابو الشوش ....... احسن لينا نقعد نلقط السوس مما نسوس المعيشه في بلدا بقينا لو مشينا ليها زي الطرش ... الف شكر علي الاضافة الثرة مع خالص تقديري

[العاقب مصباح]

حمد الله على السلامة الرائع عباس الدسيس

ونورت بيتك ومنتداك

[عباس الدسيس]

حبيبنا ابو الدر مما يسعدنا طلتك الحلوة علي كتاباتنا رغم عن تواضعها امام كتابات شخصكم الغالي الف شكر علي المرور

[عباس الدسيس]

ود الطاهر اللذيذ سلامات تسلم انت ومن زيارة السفاره لي تجديد الجوازات شايف ابو الدر دخل الموضوع طيب انا حا اعمل ليك بوست خاص الكبسه بالمندي ههههههههه الف شكر علي مرورك يا مربي الاجيال مع خالص تقديري

[عباس الدسيس]

العزيز العاقب مصباح الله اسلمك ونورتنا انت بي طلتك البهية والجميلة يا اروع زول لك مني فائق التقدير والاحترام

[العاقب مصباح]

جميل جدا كالعادة يا عباس ود الشريف الدسيس

ربنا يرد غربة الجميع

رغم الحال المائل

والمتمايل

والمتنيل ستين نيلة

المرة فى قصة الدسيس حالفة تنزل السودان

وانصارى السنة بضم السين فى قصة اشرف السعيد الجماعة ما طمنوهو وخلوهو معلق تعليقة حبل غسيل

اها يا جماعة رسونا على بر

والله بقيتوها لينا اضيق من فرص صعود الهلال

خايف الرائع درديرى يجينا بى قصة تالتة يخلينا فى الجو

لا نلم فى البلح ولا الساسوى

الله يقطع سنين الان غاز

رائع يا دسيس

ورائعون الحاضرون

[مدنيّة]

دسيس شنو يعني

ماتراعي لينا :cool:





همسة : نورت المنتدي

[moh_alnour]

قلنا ليهوا يا راجل بلغة المذيع محمد سليمان عندما سأل أحد المستضيفين في برنامجه الشهير بالتلفزيون عن أذكي رئيس في العالم
له اسهامات دوليه في تطوير بلده .... الخ
أخونا قال ليهو نميري ردت الفعل كانت اندهاشه من مقدم البرنامج .... يا راجل ....

ود الدسيس : وينك ( يــــا راجـــــل )
عُدت و عادت معاك البوستات التي تزرع الإبتسامة في شفاهنا
رمية تماس : زعل أم العروس الرجعت الشيلة يا ود الدسيس ;) غايتو يا ناس الرياض قربتوا تدخلوا الغابة ;)




واحد حرقو كلام مولانا فرد عليو : أليا التلاق بالتلاتا فى السنتين دول لو قدرت تتم جلابتك اللى لابسا دى تكون راجل

طبعا ً يا أشرف أخوك قال نفس كلام القاضي دا و الجماعة لحدي الأن ماسكنها لي زِلة
وعلى قول أهلي الرطانة أصعب حاجة في الغربة العشرة سنة الأولى
أنا غايتو الوداعية قالت لي هي 5 و 2 بس ما عارفة الخمسة بي وين و الأتنين بي وين :eek: شكلها كدا قاصدة الأهلة :eek:

[ابوخالد]

بركة الجيت .. بركة الجيت ...آآآآآآي

منقة إنت وبسكويت ...

ود الدسيس ...

دائمآ .. عودتك تحمل الجديد والجديد المفتخر ...

صديقي ... صاحب النمط البسيط الممتنع ...

مُترجم الآهه في دواخلنا ... ومحطم حصون

الحياة الأسرية .. الغائص في حياة كلٌ منا ...

اليوم تتطل علينا بطعم جديد .. ولون جديد .. وطعم

آخر ...

متعة في السرد القصصي ... جاذب لكل الألوان ...

تتخلل تلك الإبداعات بعض القفشات (محدقات مخللة)

التي تُضفي علي الجمال .. جَمالٌ من نوع آخر ...

تتمازج فية الحقيقة بالدعابة الساخرة ...

أخي ...

إسلوبك به الكثير والكثير من المتعة .. والمتعة المحببة

للنفس ...

فلا تبخل علينا ...

تجدنا دومآ في الإنتظار ... علي نار ...

يا حبيبي ...

[عباس الدسيس]

العزيز العاقب الف مرحب بيك مره ثانية ورائع انت بي حضورك مرة اخري الف شكر

[عباس الدسيس]

مدنية تقصدي وارقوا وسادمبا ولا الشهادة البختوها في الرف ارسي علي بر ..... بعمل ليك بوست خاص بي غلب الهلال اليوم عشانك والدرديري

[أبو جودي]

لك التحية أخونا عباس الدسيس ،،، واستمتعنا كثير ،،،، وجيتك وفي انتظار عينيك كملته الصبر كله ،،،،،،

[أبوريلان]

المتمكن عباس الدسيس ، ما تأول متمكن
البوست له طعم خاص
يذكرني بأقاشي عمك
محمد في الدباغة
الله يرحمه .

[محمد عبد الله عبدالقادر]

ود الدسيس يا دسيس
سلامات العوده والعود احمد
وطلت الابتسامه في غير مكان الابتسام
وعود لينا يا ليل الفرح
وبالله يا الطير المهاجر زمن الخريف....
والغربه قسايه ....
والقروش سمحه
والشغل شديد
والراحه نعمة



اهلاً بعودتك وبجيك راجع النشرب قهوتي دي

[بدر الدين احمد الطائف]

عباس الدسيس يا حبيب ليك وحشه والله
اها النخوض مع الخائضين واشاركك فى كلامك ده
فى اتنين من الشباب فتح الله عليهم بالمال الوفير وقرروا انهم يسافروا البلد نهائى وقطعى.
كل واحد منهم لديه من الافكار الاستثماريه ما يخليك تقتنع برجوعه وتقول ليهو والله يازول احسن ليك سافر ونحن وراك لما ربنا يفتح علينا .(طبعا انا ما كنت مقتنع بالافكار دى عن تجربه)
اها قعدنا مع الجماعه ديل فى الحرم الشريف ده يا جماعه اصبروا شويه ما تستعجلوا خلوها خروج وعوده والجماعه حلفوا بالتقطعهم نهائى ما راجعييين.
ما اطول عليك يا عباس اخوى
والله بعد صلاة الجمعه الفاتت ديك القى ليك واحد من جماعتى الما بيغبونى طالع من الحرم
واول ما شافنى عمل فيها زايغ منى لكن انا ما اديته فرصه مسكته ليك يا زول جيت كيف ومتين وجيت مالك .
اكتشفته انه تحت تحت عمل خروج وعوده وبلع كلامه الاول داك.
وصاحبنا التانى عمل تاشيره جديده وعلى وصول فى الايام القادمه وده بالذات انا بنتظره فى المطار الا يجى كدارى.
راى............ انا لست ضد العوده الى الوطن ولكن متفق مع عباس الى ان ينصلح الحال
والرجوع بحسابات مظبوته.
مشكور اخوى عباس على طوله البال معاى.

[عباس الدسيس]

حبيبنا محمد النور ابو النسب الف شكر علي المرور شيلتكم مرجوعه في مسماها ... في السعوديه دي كان نخش في غابة اسمنت

العزيز الباشمهندس ابو خالد لك الف شكر بعدين احنا نفوتكم وين يا حلوين ولك الشكر ايضا للاضافة الجميله والتي تشبه جمال روحك مع خالص شكري


ود الاستاذ (( ياسر عبدالرحمن)) ما جبتا لينا اخبار الدباغة وفريق فلاته علي العموم انا نازل اجازه اول نوفمبر لو عندك وصية


الحبيب محمد عبدالقادر سعيد والله بصحبتكم علي فنجان القهوه وسعيد ايضا علي مروركم الكريم الف شكر

العزيز بدرالدين الطائف ياخي احنا لاقينك شنو حكاية طول البال دي الف شكر علي المرور والمداخله التي بروعة شخصكم الكريم