جمال الماحي يتنحى عن منصبه كرئيس للجالية السودانية في هيوستن ثم يتسيك ثم يتجرس

[عزيز عيسى]

تنحى الأستاذ جمال الماحي عن منصبه كرئيس للجالية السودانية بمدينة هيوستن ولاية تكساس
الأمريكية .. وبعد إنتهاء الإجتماع التأسيسي للجمعية العمومية وإختيار لجنة جديدة لقيادة
شئوون الجالية إنفض المشاركين الأعضاء وغادروا المكان ولكن أستاذنا جمال الماحي قرر
الإحتفال بطريقته الخاصة بمناسبة إنتهاء فترة رئاسته للجالية قرر أن يلعب الوست على
الرغم من سوء الأحوال الجوية وهطول الأمطار بغزارة.
وقد نصحة صديقنا الدكتور أحمد الصائم بأن يعدل عن رأيه نسبة ال أن الجو والوقت لا يسمحان بلعب
الورق والوست ولكن أستاذنا جمال الماحي أصر وألح على رأيه وقد سار الركب الى مقهى كبير
يقع وسط مدينة هيوستن يدعي مقهى رنوش.. وبعد لعب الوست وعند آخر توزيعه للورق كانت الطامة
الكبرى حيث نال أستاذنا جمال وزميله أحمد ود الحاج سيك أمام جمهور غفير من المشاهدين السودانيين
والأجانب الأمر الذي جعل أستاذنا جمال يتجرس ويصيح بأعلى صوته غير راض عن (السيك)..
وقد كانت تنحية وسيك ثم جرسة في يوم واحد.
اللهم لا شماته.

[أشرف صلاح السعيد]

ا
اخى عزيز كل الاعزام انت والاهل جميعا كما تتمنون..
تعرف زولكم دا شكلو كان عندو صلاحيات كبيرة ومؤثرة على الجالية والناس كانت هارشة منو..بس صاحبك تنحى بجاى ورقدو ليو فى اللفة..
تعرف ملاحظ مسألة السيك دى زى نداهة يوسف إدريس..بتجذب زباينا جذب وتلاقيهم فى أغلب الأحيان هم البصرو على الوست وإن لم تهيأ الاجواء للعب..وسيك"seek" زاتا لو لاحظت ليها بالانجليزية بتعنى الرغبة فى الشى ..والرغبة دايما بتكون مرتبطة ببلوة ..يااخوى الاوقف بقيت بهضرب سااى..تكون ريحة الحاجات الاصفريكا الفى المقهى الأمريكانى جات مع موضوع السيك؟؟
بس فضحتا ود الماحى فضيحة وأثيريا وقول ليو غايتو لو جيت إجازة السودان بتلقى ضابط الجوازات البدق تأشيرة الدخول حيقول ليهو مسيك وجاى إجازة كمان..

[ابوالنور]

قلت سيك يا خواجة سيك كيف يعني والتسميات والقبول وشكل المراقات والمقصات والدفر
والحجات دي كلها لازم تتوسق

نسيتيني زاتو ابارك ليك العيد يا خواجة
كل سنة وانت طيب ياخي

[عوض الكريم الخواض]

هي ... :confused:

هو بلاي فى سودانيين بتنحوا عن الرئاسة ... :eek::eek:

يمين دا تجيبوا لينا ... الا كان نبقيهو رئيس على السودان بي سيكو دا . :cool::cool:

[أشرف صلاح السعيد]

هي ... :confused:

هو بلاي فى سودانيين بتنحوا عن الرئاسة ... :eek::eek:

يمين دا تجيبوا لينا ... الا كان نبقيهو رئيس على السودان بي سيكو دا . :cool::cool:


ود الخواض الرائع عوافى..
وقت المسعلة جابتلها رئاسة أفيدكم علماً وأحيطكم نبأً بأنى قد تنحيت عن رئاسة رابطة الطلاب السودانيين بالجامعة الأمريكية بعد ترشيحى لدورتين متتاليتين وما إتسيكتا كمان ميّزة فوق الكوم..أها شنو ياأخوى تنحيات الطلبة محسوبة ولا كيف؟..الله فيك أحسبا لانو عندى ارض بدور ابنيها وبتنحى بعدا طوااالى..الرئاسة مبروكة على ود الماحى بس شوف ليا وزارة الاستثمار ابات عقالات ديل يدهم سخية فى التسهيلات..
حبيبنا عزيز عذرا ولكن المسعلة فيها مصلحة ولو ظبطت بعينك وساطة ساااكت سفيرنا فى امريكا وحرم اعمللك السفارة فى هيوستن كمان..

[عوض الكريم الخواض]

ود الخواض الرائع عوافى..
وقت المسعلة جابتلها رئاسة أفيدكم علماً وأحيطكم نبأً بأنى قد تنحيت عن رئاسة رابطة الطلاب السودانيين بالجامعة الأمريكية بعد ترشيحى لدورتين متتاليتين وما إتسيكتا كمان ميّزة فوق الكوم..أها شنو ياأخوى تنحيات الطلبة محسوبة ولا كيف؟..الله فيك أحسبا لانو عندى ارض بدور ابنيها وبتنحى بعدا طوااالى..الرئاسة مبروكة على ود الماحى بس شوف ليا وزارة الاستثمار ابات عقالات ديل يدهم سخية فى التسهيلات..
حبيبنا عزيز عذرا ولكن المسعلة فيها مصلحة ولو ظبطت بعينك وساطة ساااكت سفيرنا فى امريكا وحرم اعمللك السفارة فى هيوستن كمان..

ابشر يا اشرف .......
اي زول بتنحى وبستقيل دا زولنا ......;);)
حتى لو كان رئيس شعبة العواطلية بحي الترطيبة فى المدينة النائمة .....
بس أهم حاجة عدم ( الكنكشة فى الرئاسة ) ....... :mad::mad:

اعفى لينا يا خواجة وسلم على صاحبك المسيك وبلغوا تقديرنا واحترامنا

والبكنكش ما معانا . :cool::cool:

[عزيز عيسى]

عارف يا أشرف يا أخوي ود الماحي دا لسانه طويل شديد..
وساليهو ليل نهار.. تصدق حتى زوجته أم عياله ما بتسلم
من لسانه.. نوع مكاواة ما أنزل الله بها من سلطان.
الزول دا قبل الإجتماع شابكنا ليك لازم نلعب وست
وبعد الإجتماع حلف ستين يمين نمشي على المقهى
نتم اللعب هناك.. أنا وزميلي الدكتور أحمد الصائم
هديناهو وقلنا ليهو يا زول المطرة خلينا نمشي على
أهلنا ونلملم عيالنا وأنت ذاتك أمشي لم عيالك وأمشي
على بيتك.. لكن قوة الراس شن نسويلها زولك رفض
كلو كلو وقال يفك البايظ (يتخلص من زوجته المسكينة
والأولاد).. دكتور الصائم قال لي زولك دا طالما أصر
بالطريقة دي غايتو أنا شامي فيه ريحة سيك..
وأهو الحصل حصل وحياتك عند آخر توزيعه
بنقول ليهو يا جمال ياخي في طولك في عرضك خلينا
نمشي رفض والتوزيعة الأخيرة كانت فيها سيك الموسم ولو
شفت الكواريك في المفهى قربت تجيب ناس الشرطة
بس تقول مظاهرات.
لكن بيني وبينك يستاهل لأنه لما مشى على البحرين
عامل لناس ود المأذون أحرف واحد ويشيل ويغلب فيهم
ويجي هنا يحكي لينا سويت وسويت.. كنا مصدقين لكن
طلع إشاعة ساكت.

[عزيز عيسى]

قلت سيك يا خواجة سيك كيف يعني والتسميات والقبول وشكل المراقات والمقصات والدفر
والحجات دي كلها لازم تتوسق

نسيتيني زاتو ابارك ليك العيد يا خواجة
كل سنة وانت طيب ياخي

ود النور وإنت طيب ياخي،
صاحبك ود الماحي أخبار السيك ملت الدنيا كلها من أولها لي آخرها..
الحصل هو وزع الورق والقبول كان حقي.. زميله سمى مربوطة
وزميلي سم عشرة ولما جاء دوره قال باس pass أها أنا قلت لي
زميلي ألعب.. وقع الأتو كلو مع زميلي والباقي معاي وهم ما عندهم
ولا واحد.. وبدأ التسنفك بعد شوية قعد يقدم في الأعذار ويتصبب
عرقا ويقول يا جماعة إنتو التسمية دي كانت كيف منو الوزع الورق
مع إنو هو نفسه الوزع الورق.. لما الحكاية بقت على أربعة أيادي
قعد يتململ في قعدته ويعاين مره لزميله ومره لي وأنا ساكت
ما قلت أي حاجة.. كان في واحد من الجماعة الشمو ريحة السيك
واقف خلفي وعرف إنه باقي السناير كلها عندي وبدأ يتلفت ويعاين
لحال جمال دلالة على إنه السيك محمدك يا جمال.
ما نشعر إلا وجمال يقول: يا جماعة أنحنا ما قلنا الوست ما فيهو
كلام وراح مسك الورق ودكاهو وتعال شوف الكواريك.. الناس كلها
كانت بتصيح وهو يخرخر ويتجرس. المهم سيروا الرئيس لغاية الشارع.
غايتو حالة ما بترضاها لعدوك.

[hadi salih]

يا عزيز سلامات يعنى بقيتو تمشوا رنوش والله حاجة جديدة وكفارة لود الماحى ما رضيناها ليهو لكن الورق كده ما بدى حريف زى ما الكورة ما بتدى حريف

[عزيز عيسى]

هي ... :confused:
هو بلاي فى سودانيين بتنحوا عن الرئاسة ... :eek::eek:
يمين دا تجيبوا لينا ... الا كان نبقيهو رئيس على السودان بي سيكو دا . :cool::cool:

عوض الكريم عليك الله رئيس تنحى عن منصبه وفي يوم
إحتفاله بالتنحية أدوهو سيك تسوا بيه شنو في السودان؟!
يا خي دا أخباره حتى لو مشيت في سودانيزأونلاين تلقاها بهناك.
وحكمة ربنا قبل الإجتماع الراس كان خنفسان..
وبعد الوست حلقنا ليهو و الراس بقى دلجة.

http://www.sudaneseonline.com/uploadpic/Sep09upload/jamal.jpg

[عزيز عيسى]

ود الخواض الرائع عوافى..
بس شوف ليا وزارة الاستثمار ابات عقالات ديل يدهم سخية فى التسهيلات..
حبيبنا عزيز عذرا ولكن المسعلة فيها مصلحة ولو ظبطت بعينك وساطة ساااكت سفيرنا فى امريكا وحرم اعمللك السفارة فى هيوستن كمان..
وحرم تعملنا قهوة خاصة لود الماحي علشان يلعب فيها الوست لغاية ما يلقى ليهو واحد كيشة ذي ود المأذون يتفشى فيهو.

[معتز الريح]

الظاهر لمان كان رئيس ..
الجماعة بجاملوهو ..

----------------------------
السُلطه حلوه ياعزيز العزيز ..

[عزيز عيسى]

خواجة وسلم على صاحبك المسيك وبلغوا تقديرنا واحترامنا
والبكنكش ما معانا . :cool::cool:

يا زول أخد راحتك ساكت أنحنا هدفنا نعمل سيرا عديل
لأنه شايل حالنا. وقلنا نفضحه عالميا.. وحيظهر تحت أي لحظة علشان يدافع
عن نفسه. غايتو لحدي الآن الأخبار وصلت الحصاحيصا لكن ما عارف
وصلت الجنيد أم لا.. ولو بتعرف ليك واحد في موقف الحصاحيصا ماشي على
الجنيد خليهو يوصل الوصية ويكلم ناس الجنيد كلهم.
والله يكضب الشينة.

[عزيز عيسى]

يا عزيز سلامات يعنى بقيتو تمشوا رنوش والله حاجة جديدة وكفارة لود الماحى ما رضيناها ليهو لكن الورق كده ما بدى حريف زى ما الكورة ما بتدى حريف
والله يا أبو صفيه فاتك مولد لكن.. تصدق عرفت إسم ومحل مقهى رنوش
قبل أسبوع واحد فقط طول المدة الطويلة دي كلها.. حتى الإسم مرات
أجد فيه صعوبه إني إتذكره ولو لاحظت في سودانيزأولاين كتبت إسم
المقهى فنوش.. وإنت عارف أخوك القهاوي دي مكجنة بي الله واحد
وما بحب أجلس فيها وبتضايق من الدخان.
لأول مرة أدخل مقهى رنوش مشيت بدعوة وكان معانا الدكتور الصائم
وجمال والمهندس أحمد زروق ووالده الباشمهندس سيد زروق
ومجموعة كبيرة من شلة ناس هيوستن. في الحقيقة جلسنا في
الحديقة وإنت عارف طبعا المقهى عائلي وإتونسنا وقضينا وقت
ظريف.. لكن بيني وبينك تاني ما حأمشي هناك علشان الحكاية
ما تتكرر مرات ومرات وننسطل بدخان الشيشة.
وصحبك ود الماحي كفارتك بنوصلها ليهو.. قال حريف قال..
أها ما جايين علينا قريب؟

[عزيز عيسى]

الظاهر لمان كان رئيس ..
الجماعة بجاملوهو ..

----------------------------
السُلطه حلوه ياعزيز العزيز ..

أيامك باسطة يا معتز وكيف حالك مشتاقين والله.

عارف صحبك ود الماحي عندنا هنا في ناس بحترموه شديد
ودائما ينادوهو يقولوا ليهو يا ريس يا ريس.. لكن بعد السنفكة
حيبقى إسمه الريس سيك.
ذكرتني نكتة بيحكيها جمال نفسه..
قالوا في واحد أيام حكم النميري دائما قابضنو سكران
وناس الشرطة يرموه في السجن وينفذوا فيه الأحكام
الشرعية بالجلد.. يوم أنقلبت الحكومة صاحبك
مشى سكر لط وراح على مركز الشرطة وقال للضابط
أمسك سجل عندك سكران شارب كذا وكذا وإيه رأيك
كمان شيوعي. :)

---------------------------------
السُلطة دائما تفرض على الناس إحترامها.

[moh_alnour]

و الله يا ود الماحي ما رضيناها ليك ميتة وخراب ديار و كشف حال
غايتو أحمد ربك الخواجة عزيز اللذيذ برضو مستور حال
غايتو الخبر دا كان وصل عشوشة و لا إبراهيم جاري في كندا ما حصاحيصا غرقت ;)

[عوض صقير]

عزيز دنيانا

يعنى سيك ود الماحى منقولة على الهواء مباشرة

زى سيك جماعة الأرباب

لكن ود الماحى معزور لأن سيكه خارج ملعبه
أما ناس الأرباب كانت حقتهم مخجلة تب وفى عقر دارهم



أما قصة التنحى عن الرئاسة ..
الظاهر عليه جاى يلحق الأنتخابات فى بلده

[أبوبكرحامد]

وحرم تعملنا قهوة خاصة لود الماحي علشان يلعب فيها الوست لغاية ما يلقى ليهو واحد كيشة ذي ود المأذون يتفشى فيهو.

أول بى التبادى ياخواجه كلو سنة وانت طيب ، إنعاد عليك بالصحة والعافية.

ياخوى إسألنى الله جيمى يوم جانا فى البحرين لعبنا زملان ودقِّينا الجماعة دق العيش ، بعدين ياخى دى غلطة زميلو ، معقولة ياخى زول إسمّى مربوطة واتسنفك ، ده رابطا بى دبارة :):):):):)

ذكرتنى حكاية كان بحكيها واحد زميلنا فى الزقازيق من أولاد أبوجبيهة ، قال واحد بلدياتم جاتوا التسمية باصين فى أول توزيعة ، زول متقندف فى الفارغة خلف كريعاتو وشفط نفس من سيجارتو البرنجية وقال:

مريبيطة عشان ماتندكّا

صاحب القبول لعب ، أنقر الجماعة ما اتسنفكوا :mad::mad::mad::mad::mad:

حبيبنا ود الماحى حرّم ريِّس وفخرى وحريف ، علا لسانك جاب ليك الهوا

ياخواجه تحياتى لاتحد لدكتور أحمد الصايم وشقيقه جيمى الذى قضينا معه أوقات طيبة بفرجينيا .

خارج النص:
حقوا نعمل توضيحات لى مصطلحات الويست عشان الجنس الناعم والآدمن ما إطشّوا شبكة

[أبوريلان]

الخواجة عزيز اللذيذ
كل سنة وأنت والأولاد بخير وصحة وينعاد عليك باليمن والبركات

لقيتك شمتاااااان شديد في ود الماحي ، ياخي حراااام عليك الراجل صديقك
بقيتو زي الهلال والمريخ
ولقيت ليك فرصة في ود الماحي الجريح زي هلال السودان تقوم تبشع بيهو بالأثير وفي كل المنتديات كمان !!
قايتوا الليلة قول إنشاء الله ما يدخل أبو شوارب ويقوم يعمل بيها رسالة في الجوال لكل ناس مدني بالرياض .

[عثمان جلالة]

والله ما غريبه على كل الرائعين اليومين ديل يا حبيبنا عزيز ... تنحيهو "جمال الماحي" عن الرئاسة والسيك الأخدو وهزيمه الهلال :p:p تحياتي لكم من على البعد،،،، ودايما نلقاكم تامين ولامين :):)

[أبو جودي]

أخي عزيز ،،، كل سنة وأنت طيب ،،، وبعدين أخوك ده الأخد السيك ،،، عليك الله يا عزيز صاحبك ده شكله ما أظنه لعب في نادي العمال ،،، وأظن أتعلمه في الغربة ،،، ولكن معليش الحرفا برضو بياخدوها ،،،،
تحياتي لأخي هاشم ،،،، وما تقوموا تدوهو سيك زي صاحبنا ،،، أصلو كان زميل السر عجوز ،،،،،،،،،،،،،،،، لك التحية أخي

[درديري كباشي]

عزيز كيفك يا عزيز وتحياتنا لكل مغتربي امريكا
قصتك ذكرتني واحد صاحبنا تلقى دعوى من صاحبه نقيب في الجيش للعب الكتشينة في نادي الضباط وكانت اللعبة ( حريق )
قال في الاول انا جلست بره والطاولة كان فيها عقيد ومقدم وصاحبي النقيب ومعهم ملازم اول .. قال لسوء الحظ انه العقيد كان يسار صاحبه النقيب .. وقال انا في التوزيعه الاولى جلست بره ..
وقال بعد شوية صاحبي النقيب صرخ باعلى صوته ( خمسيييييين ) جاري العقيد .. وقال العقيد بصوت اعلى ( ما خمسييييييين ) .. قال صاحبي رخى شوية وحب يشرح ( سعادتك كيف ما خمسين ما الاربعة دي شغالة هنا وربطت الستة مع الخمسة ) العقيد ( قلت ليك ما خمسين ) بصوت اعلى .. قال لي صاحبي النقيب براحة لم اوراقه من الطاولة ورجع البايظ وجر تاني من جديد .. قال لي انا طوالي لبست نعلاتي ووقفت ..
الجماعة شنو يا شيخنا ما تنتظر دورك ... لا لا لا اسف اتذكرت انه مودي الوالدة العياده عن اذنكم ..
قال صاحبي النقيب راح يقدمني وسالني في الطريق . شنو انسحبت مالك ..
قلت ليه يا اخوي الخمسين البتتلغي بقرار جمهوري دي ما بتنفع معاي شوفو ليكم عسكري يخمسها ليكم انا تاني عمري ما بجي هنا ..

[أبو جودي]

"]أخي عزيز ،،، واخي درديري ،،، مع زكراك أخي درديري زكرتني بنكته ظريفة خالص ،،، من زمن الجاهلية ،،، أيام زمان في نادي الأتحاد مدني ،،،، وطبعاً ديل أسايد اللعبة دي وحكاويهم كثيرة :
وبدون ذكر أسماء ،،، قالوا في واحد من أهلنا ناس الأتحاد وهو موظف ،،، وكانوا قاعدين بيلعبوا بوكر والزمن داك كان التعصب شديد ،،، وكان في الطربيزة مع الجماعة خواجة لاعب شديد ومحظوظ حظ قريب ،،، أهه قبل ليك على صاحبنا ،،،، صاحبنا يجيب ثمانية ويكون طبعاً فرحان شديد ،،، يقوم يقول لي صاحبك الخواجة أهه أكشف أنت الخواجة يقول ليه له أنت وصاحبنا طوالي يضعها ليك ثمانية ويفجأ بأن الخواجة يصحيه ويقول ليه تسعة ،،،
صاحبنا الموظف خلاص اتخرت كل الماهية وفضل فيها آخر رمق ،،، قام ختاها للخواجة ،،، ووزعت الكروت ،، أهه قام صاحبنا صحى الخواجه الخواجه قال ليه لا أفتح أنت وأصر انه يكون في الآخر ،،، وطبعاً الخواجه على طول ختاه ليه في الطاولة تسعة ،،،
بعد ده أخونا الموظف فقد أعصابه وقال للخواجه
أهه يا خواجة أنا عندي سبعة ،،،، وبعدين يا خواجة أنحنا عندنا قانون هنا ،،،، لمن تكون بتلاعب موظف ،،، والدنيا آخر شهر ،،، وتكون الليلة الوقفة وصابحة العيد ،،، عندنا السبعة بتاكل التسعة ،،،،، "رجاله ساي"،،،،،،،،،،،،،،[/center]

[نزار حسن محمد]

ياسلام الان اشتم رئحة الذنبق والعنبر فى هذا المكان
قبل ما اقراء بقية المشاركات يدى جرت على الكيبورد

عزيز الغريبه اذاعة البى بى سى مانقلت هذا الخبر
لكن هو ابومازن مدى الناس فرصه ..
ود الماحى عاد نقول شنوا ..
والله ما رضينها لك
ولكن صاحب السيك برى حتى يترافع عن السيك
هسي يا ود الماحى تودى وجهك وين من
ناس الجنيد ..
بعدين يابوى الف حمدالله على السلامه
انك اتفكت من المسعوليه ...
ومنتظرين منك الرد ..السد الرد الرد

[عزيز عيسى]

غايتو الخبر دا كان وصل عشوشة و لا إبراهيم جاري في كندا ما حصاحيصا غرقت ;)
يا ود النور غايتو عشوشة عاملة سادة أضانة واحدة
بطينة والثانية بعجينة.. أما جارك إبراهيم السقط كتلو.
والخبر حصاحيصا غرقت والجنيد إتماصت في السكر. ;) :)

[عزيز عيسى]

عزيز دنيانا
يعنى سيك ود الماحى منقولة على الهواء مباشرة
عوض صقير كيف حالك ياخ..
منقولة على الهواء مباشرة على كافة وسائل الإعلام
وإيه رأيك كمان مترجمة بالأردو ذاتو.

لكن ود الماحى معزور لأن سيكه خارج ملعبه
أما ناس الأرباب كانت حقتهم مخجلة تب وفى عقر دارهم
أما قصة التنحى عن الرئاسة ..
الظاهر عليه جاى يلحق الأنتخابات فى بلده
يازول كلو حاجة ولا تشمت في هلالنا..
تصدق يا عوض بشجع الهلال لكن ما بعرف
إسم أي لاعب.. إنت الأرباب دا مقصود بيهو
الزول الغنيان داك الإسمو صلاح إدريس
ولا واحد تاني محتحت ذي كدا.
بالنسبة لجمال أنا ذاتي قلت الزول فك
الجالية على الهواء وجاري يلحق الإنتخابات..
ولو رشح نفسه وما فاز إن شاء الله يقلبها
ويعيني سفير في واشنطن برضو قبلان..

[عزيز عيسى]

ياخوى إسألنى الله جيمى يوم جانا فى البحرين لعبنا زملان ودقِّينا الجماعة دق العيش ، بعدين ياخى دى غلطة زميلو ،
وإنت طيب يا ود المأذون وربنا يحقق الأمال ويعيده علينا وعليكم
بالخير والصحة والبركات.
دقيتوا الجماعة دق عيش.. غايتو أشك في ذلك..
إحتمال حصل العكس وكمان ضروكم. ;)
أها كمان عايزين تتسلبطوا وترموها في زميلو الضحية؟!
دي كانت غلطة جمال وقال دقس.
وبعدين من ناحية حريف دي هو حريف وكمان بشرط
الورق في الجلد.. تصدق مشرط لينا يمكن ثلاثة أو أربعة كروت.
وبعد دا كلو إتسيك.
تحياتك موصولة لصحبك الدكتور أحمد الصائم واليومين دي
هو ذاتو شمتان على ود الماحي ويوزع الخبر يمين وشمال
حتى ناس أيوا ستي وصل ليهم الخبر.
غايتو لو بتعرف مصطلحات تساعد الجكس يفهم السيك والتسنفك
ما في مانع لكن أحسن نعلمهم لعب الوست أول.
ههههههه قلت لي الراجل قال مريبيطة وإتسنفك؟!
الله يجازي محنك يا ود المأذون! :) ;)

[عزيز عيسى]

الخواجة عزيز اللذيذ
كل سنة وأنت والأولاد بخير وصحة وينعاد عليك باليمن والبركات

لقيتك شمتاااااان شديد في ود الماحي ، ياخي حراااام عليك الراجل صديقك
بقيتو زي الهلال والمريخ
ولقيت ليك فرصة في ود الماحي الجريح زي هلال السودان تقوم تبشع بيهو بالأثير وفي كل المنتديات كمان !!
قايتوا الليلة قول إنشاء الله ما يدخل أبو شوارب ويقوم يعمل بيها رسالة في الجوال لكل ناس مدني بالرياض .
أبوريلان العزيز مشتاقين والله،
وكيف حالك والأسرة وبنقول آمين علينا وعليكم يا رب..
وكل عام وأنتم بخير..
تصدق ما عارف ود الماحي إذا كان بشجع الهلال أم المريخ؟
لكن لو طلع مريخابي ذيك وذي مدّنية تكون دي العوجة ذاتها.
ولو أبوشوارب هلالابي قول ليهو وزع الخبر
على مستوى جده والخبر والدمام وحتى الربع الخالي
وبلاد اليمن السعيد.

[عزيز عيسى]

والله ما غريبه على كل الرائعين اليومين ديل يا حبيبنا عزيز ... تنحيهو "جمال الماحي" عن الرئاسة والسيك الأخدو وهزيمه الهلال :p:p تحياتي لكم من على البعد،،،، ودايما نلقاكم تامين ولامين :):)
جلالة يا جميل،
ود الماحي تنحى ثم تسيك ثم تجرس..
أصبحت مضرب مثل متناول اليومين ديل عندنا هنا في هيوستن.
وزميلي حالف يحتفل بالمناسبة دي.
لكن بيني وبينك هزيمة الهلال 5 - 1 ما عجبتني؟
ياخي خمسة حته واحدة كدا؟
والله قربوا يتسيكوا ذاتو.. ;)
يا حليل ناس صحبي علي قاقرين.

[عزيز عيسى]

أخي عزيز ،،، كل سنة وأنت طيب ،،، وبعدين أخوك ده الأخد السيك ،،، عليك الله يا عزيز صاحبك ده شكله ما أظنه لعب في نادي العمال ،،، وأظن أتعلمه في الغربة ،،، ولكن معليش الحرفا برضو بياخدوها ،،،،
تحياتي لأخي هاشم ،،،، وما تقوموا تدوهو سيك زي صاحبنا ،،، أصلو كان زميل السر عجوز ،،،،،،،،،،،،،،،، لك التحية أخي
العزيز أبو جودي،
وأنت والأسرة طيبين وينعاد علينا وعليكم بالخير واليمن والبركات..
ود الماحي دا عايزين نرسلو يأخذ كورس وست مخصوص في نادي العمال
ويجلس يشاهد فقط بجوار خلف الله محمد الحسين ومحي الدين خليفة لما
يعلبوا الوست ضد صلاح عثمان الطاهر أو أزهري الجاك أو الصادق حسن علي
أخو السر عجوز علشان يستمتع ويشوف اللعب والحرفنة كيف ويأمن.
صحبك هاشم عبدالعزيز لو لعب مع الجماعة وست لازم يزاملني
أو يزامل زميلي دكتور أحمد الصائم علشان أعداؤنا ود الماحي
وزميلو ما يغلبوه ويرجع أبوظبي مهزوم مدحور ومجرجر كرعينو
والسر عجوز ما يشمت عليهو ويقول ليهو ليه لعبت بدوني..

[عزيز عيسى]

قال صاحبي النقيب راح يقدمني وسالني في الطريق . شنو انسحبت مالك ..
قلت ليه يا اخوي الخمسين البتتلغي بقرار جمهوري دي ما بتنفع معاي شوفو ليكم عسكري يخمسها ليكم انا تاني عمري ما بجي هنا ..
يا الدرديري كيف حالك وإن شاء الله الأمور ماشه معاك ذي الألسطة..
يا ربي ألسطة دي معناها شنو؟
عارف يا الدريري إثنين أصلو ما تأمنهم الشرطي لأنه ما بيعرف الخوة
وممكن في أي لحظة يقول ليك (أركب) يأخذك على المركز ويرميك
في الحراسة لو إختلفت معاهو.
والعسكري بتاع (الديش) ممكن لسبب بسيط جدا يديك أوامر ويوقفك
طابور إنتباه من صباح الرحمن لغاية المساء لو كنت أقل رتبة منه.
غايتو أنا لو من صاحبك أدخل التجنيد مخصوص وأقوم أقلب الحكومة
ذاتها. :) ;)
شكرا على الإبتسامة يا زول يا رائع.

[عزيز عيسى]

أهه يا خواجة أنا عندي سبعة ،،،، وبعدين يا خواجة أنحنا عندنا قانون هنا ،،،، لمن تكون بتلاعب موظف ،،، والدنيا آخر شهر ،،، وتكون الليلة الوقفة وصابحة العيد ،،، عندنا السبعة بتاكل التسعة ،،،،، "رجاله ساي"،،،،،،،،،،،،،،
أها يا أبو جودي من الكلام اللي تحته خط يبقى
الخواجة دا أنا صاحب التسعة.. والثاني دا تبقى
إنت صاحب السبعة وما تفتكرني خواجة داقس
أنا خواجة تفتيحة..
بطل خرخرة ولو عايز أخر يدك بنديك. :)
يازول ناس مدني دائما لذيذين في النكات.

[عزيز عيسى]

ياسلام الان اشتم رئحة الذنبق والعنبر فى هذا المكان
هوي يا أبو سفروق بطل (فلفسة) وشيل نخرتك وأمشي شمشم بعيد..
بلا شامي لي ريحة بنزين ولا سبيرتو ما عارف.. :)
قال ريحة ذنبق وعنبر.. يازول إتكلم معانا بالسوداني
الفصيح وقول شامي لي ريحة نبق وعنبر دي
قاصد بيها عنبر شيخ العرب؟
أنحنا غايتو شمينا ريحة السيك ونخرتنا صدقت
في ذلك وود الماحي أتحمد بيها.


عزيز الغريبه اذاعة البى بى سى مانقلت هذا الخبر
لكن هو ابومازن مدى الناس فرصه ..
ود الماحى عاد نقول شنوا ..
والله ما رضينها لك
ولكن صاحب السيك برى حتى يترافع عن السيك
هسي يا ود الماحى تودى وجهك وين من
ناس الجنيد ..
بعدين يابوى الف حمدالله على السلامه
انك اتفكت من المسعوليه ...
ومنتظرين منك الرد ..السد الرد الرد
يا أبوسفروق إنت الظاهر عليك ما متابع الأخبار..
أخبار السيك وصلت الجنيد وضواحيها
و كبري رفاعة الجديد قالوا أتهز وكان بيقول (سيك.. سيك)
بعد سماعه لخبر السيك.. لووول.