مواقف صعبه

[بابكر]

يتعرض الانسان لمواقف كثيره منها الطريفه ومنها المحرجه ومنها الخطره
فماذا تفعل اذا قابلك انسان وسلم عليك بحراره شديده ثم قال لك ... انت ماعرفتنى ..ولا شنو؟؟؟
ماذا سوف يكون ردك عليه ؟
اذا قلت له ايوه عرفتك ... حيقول ليك طيب انا منو ؟؟
او تكون راكب فى الباص وماعندك غير حق المواصلات تقوم تركب بنت من حلتكم وعندما يأتى الكمسارى ليخلص ... تقوم تقول ليها ماتدفعى اناحأدفع ليهو والحكايه تجوط معاك
اوتكون ماشى مشوار مهم جدا يقوم يلا قيك واحد بتعرفو تقوم تقول ليهو اتفضل اشرب معانا الشاى فى البيت يقوم يقول ليك يلا

ارجو من الاخوه ان يحكوا لنا ما مر بهم من مواقف طريفه او محرجه او مواقف صعبه لتعم الفائده

[aborawan]

من المواقف المضحكة المرت بي انا شخصياً انو الوالد قرر اننا نزل السودان نهائي وكان الكلام ده في التسعينات تقريبا 94 المهم نزلت طبعاً المدرسة وبتذكر كان اجباري على الطالب لبس الرداء ( الشورت ) المهم انا الحكاية دي ما ركبت لي في راسي وبقيت اجي بالبنطلون لحدى باب المدرسة بقلعوا وبدخل بالرداء عادي واحنا طالعين نفس الشئ بلبس البنطلون عند باب الخروج مرة اتفق علي بعض الزملاء ودسوا منى البنطلون وبتذكر وقتها كانت فسحة الفطور المهم ما قدرت اطلع من المدرسة وخليت الفطور وبعد انتهت الحصص الشباب ما طلعوا البنطلون وما قدرت اطلع امش البيت الا بعد حبوبة حست انى اتاخرت وجات المدرسه تفقدني وطلعت من المدرسة وانا مدسي مع حبوبة في التوب :D:D طبعاً بعد اليوم داك غبتا من المدرسة 13يوم بي سبب الملاريا اللمت فيني وكان سبب في عدول الوالد عن الخروج النهائي الذ حاجة في الموضوع المدير سألني وليه يعني انتا ما بتطلع بالرداء ساي قلت ليه عيب يا استاذ اطلع بالرداء لانو ما بغتي حدود العورة والركبة كلها بتكون بره :):) طبعا عملوها ضحكة الايام ديك لحدى ما الله اراد اننا نرجع البلد دي تاني

[ضياء الدين احمد]

من المواقف المحرجه جدا المريت بيها كنت راكب في المواصلات بعدين جاء الكمساري اكشكش قمت دفعت وقلت ليهو اتنين انا والاخت القاعده هناك بس تنقال من العدو اختنا قامت شبت فيني قدام الناس كلهم تدفع لي ليه انا بعرفك من وين عشان انت تدفع لي ‘ اسمع بالله ( ده للكمساري ) رجّع ليهو قروشو وحاتكم الكمساري رجع لي القروش والناس طبعا اعاينو لي وانا بقيت زي الضب
لابد جنس لبده والعرق اكب المهم جات المحطه وانا نزلت وهي نزلت بعدي والحافله مشت بس قلت لازم اتفشي حقي منها قمت وقفتها وسألتها من الولده والوالد وناس بيتم فردا فردا وسريع جدا حسيت بانها عاوزه تنهار من الخجل
وسألتني: انت منو
مامهم تعرفي
ياخي انا آسفه جدا
بعد شنو
بالله عليك انت منو
انا ضياء الدين وكذا---- كذا ------كذا
ختت ايدا في راسا وياخ ماكنت تقول
وهو انتي اديتيني فرصه افتح خشمي
المهم اتأسفت كتير جدا وانا ما ريحتها فهمتها انو طريقتها غلط حتي لو انا ما عندي بيها معرفه المفروض تقول شكرا او تسكت لكن مش تبهدلني قدام الخلق
ومشكووووووووووور يابابكر علي الفكره

[ابو الدهب]

والله المواقف الطريفة كثيرة
بحكي ليكم حكاية طريفة بس ضيااااااااااء من اقول ابو الدهب طلع غبي

في المواصلات انا ومعي ابن خالتي اكبر مني بشهور في المواصلات
وكانت في بنت قدامنا وود خالتي يمسك بجريدة يقرأفيها وما منتبه
والبنت جميلة وعينة زايغة وانا قلت اتصيد العيون العسلية دي وهاااااات
يا غزل وابن خاتي يقول شفت الخبر دا وانا ما استمعت له انا مع
الغزال مالي ومال الخبر وينتبه ابن خالتي للبنت ويقول لي بتغازل في البنت دي انت ماعارفها دي اخت منو قلت ليه لا قال دي اخت فريد
صديقي وانا اقول جد كلامك دا جد ياه فريد دا من اعز الاصدقاء واخذ منو الجريدة وانا مستحي منها وعيني في الجريدة ما تنزل منها وألتفت لي ابن خالتي شغال غزل مع البنت وقلت ليه ليه تغازل اخت فريد فيقول هي لا اخته ولا قريبته وانا ما اعرفها بس عجبتني البنت وقلت انا اولي وهاااااااات يا بوكس في البص لي ابن خالتي

طويلة اسف جداً جدً جداً

[بابكر]

مره عندما كنت صغير رسلونى اجيب رغيف لقيت اولاد بيلعبو كوره طلعت قميصى ولعبت معاهم ونسيت المرسال وامن تذكرت لم اجد الفلوس وطبعا رجعت البيت متأخر ويومها اخذت علقه لازلت اتذكرها حتى الان;) :p

[زيكو منيب]

مرة من المرات واحد من معارفنا اتصل علينا في التلفون فصوتي انا وصت اخوي الكبير زي بعض .. المهم فاتكلم معاي على اني انا الاخ الكبير و انا ماشي معاه في الكلام فقام قال لي انت منو بالضبط اضريت اكدب عليه ... و تاني قلت ليه انا منو .....