حكاوي حبوبات

[طارق جبريل]

اها نقعد نعيد في بوستاتنا نسوي شنو عاد... نشيل حالنا

(1) عرس نفيسي



- طارق آآآولدي قوماك دلني لا تحت جنب جدودك في شجرة ناس ود جبارة
- سمح قوماكي
- أدني عكازي
واندلينا لاااا تحت عند بير ود جبارة
- عوض السيد: اهلا بالمرة القاهري
- مافي زولا قاهر قدركم الله لا تكسبكم
- طارق امشي املالي حقتي دي صعوط من دكان العوضابي وجيبلي معاك سيجاري ألت برنجي
- ود جبارة: انت لليلي تسفي وتسجري دحين مو حجيتي
- أيي حجيت واسجر واسف التمباك عندك مانع
- ود جبار (يضحك): اصلك من يومك قاهري وماك نصيحي
.....
مشيت علي دكان العوضابي وخليتم
خمسة رجال وامرأة... شيوخ على حافة القبر
يقضون جل وقتهم في اجترار ذكريات صباهم
يحكون عن أيام مضت منذ زمن بعيد
لا يتحرجون في الكلام ولا ينتبه لحديثهم أحد
يلقون الكلام على عواهنه لا يعنيهم من محيطهم
غير طفل يرسلونه حيث يريدون او امرأة تأتيهم بالطعام
.....
جبت الغرد أليل نفيسي كان اسمعلك:
- عوض السيد (ميت من الضحك): الرسول آآنفيسي عرستي ود عمنا دة كيفن
- كدي خلني اللسف واسجر
- رابح: أصلك من يومك علي الرجال
- جيت يا عوض السيد مندلي لااا تحت شايلالي حرف أليل قراصي لي ابوي
وجنب البير أكان القالك ود الطيب طالع وفي ايدو برسيم
سلم علي وقلتلو: انت يا ود الطيب بقيت تحد زي النسوان كمان
مرتك ماتت ليها سنين وانت لليلي مابي العرس
- عوض السيد: الله يقلعك آآآبتتقدري
- ود ناس الطيب: عندك لي عروس آآآنفيسي
- انا مالي آآآبتعرس
- تعرسيني آنفيسي
- ان بقيت دايرني بكلم ابوي الكلام لا يبقى فسو ساكت
- خلاص ان بقيتي قابلابي عوجة تب مافي
- عوض السيد: الله لا تكسبك يا مقطوعة الطاري
- نفيسي: اندليت علي ابوي تحت يا عوض السيد ولقيتو يحفرلو تحت تمرة
وقلتلو: ابوي ود ناس الطيب دة قال دايرني دحين نجض معاهو الكلام في صلاة العشاء
- جدنا بغداد: انت نان بقيتي للعرس
- نفيسي: كدي يابا شوف فهموا شنو انا هيني
- رابح: آآآبتستحي من يومك
- نفيسي: وحاتك آآآرابح العشي بقالي طويل خلاص وبقيت اتاوق علي جية ابوي من الجامع... ووكتين جاء ما قالي شي اتعشى ورقد نام... وانا الوردي مسكتني
- وراسي بقى يودي ويجيب يا ربي ابوي اباهو ولا السجمان ما فتح الكلام معاهو
- صبحت الدني وانا اوجوج من هني لا هني علي الجدادي الدايري ترمي البيض
- اندليت لا عند ابوي ما شفتو... شويتين اشوفه شايل طوريتو وجايي من لااافووووق
- حدرتلو زين وطلعت لي اهلي...
- الواطة مغربت وانا اتاوق لي طلعة ود الطيب لامن شفتو طالع علي بيتم
- لفحتة طرحتي ومشيت عليه قبل لا يمسك كُشر الباب:
- انت آآآود الطيب تكذب علي وتخليني أكلم ابوي وما تكلموا
- ود الطيب: والله آآنفيسي غلبني اقوله خجل منو... يقول شنو انا بقابلك من وراهو عاد
- الخجل اليقطع مصارينك وحات النبي ما تمشي قدامي هسي ليهو علي اكورك ألم عليك خلق الله هني واقولهم ود الطيب يجرجر فيني من طرحتي
- عوض السيد (ضاحكا بشدة): نجيضي الله يقلعك... أهاااا
- نفيسي: وحاتك ود الطيب قلع عيونه وبقى يرجف وشبكني: آآآنفيسي بمشي معاكي بس لا تضيعيني... وقلتلو ان بقيت راجل ما تجي انا سابقاك للبيت
- ود جبارة: الخرابة آآآبتعرفي الخوف
- نفيسي: جملة الايمان يا ود جبارة جاء وراي ودقة الباب وطلعتلو وقالي ابوك في... وانا اكورك بي طول حسي: أييي يا ود الطيب ابوي لا جوة... فشان ابوي يسمعني
- دخلتو علي ابوي ومشيت علي الطاقة اتصنت في كلامو
- عوض السيد: أها شن قال؟؟؟؟
- نفيسي: اسمع فيهو يقول لي ابوي يا عم بغداد انا جاييك في غرد خير
- رابح: أها يا خرابي
- نفيسي: المهم يا رابح كلم ابوي وانا بقيت اوجوج من هني لاهني
- وازازي بين الطاقي والتكل تقول بطني ماشي (عندي اسهال) لامن مشى لي اهلو..
- وابوي ناداني وقالي رأيك شنو
- عوض السيد: أها شن قلتي يا خرابة
- وحاتك يا عوض السيد بقيت ازغرد لامن ابوي نهرني...وعرسته
- الجميع يضحكون: الله لا تكسبك ماك نصيحي

[ابوالنور]

يا سلااااااااااااااااااااام يا دكتور البركة في الشوفة وحاة الله النبي فوقك اكان ما عدت لينا حكاية الود الحبيبوكل سنة وانت طيب وربنا يحقق امانيك قول امين

[طارق جبريل]

يا سلااااااااااااااااااااام يا دكتور البركة في الشوفة وحاة الله النبي فوقك اكان ما عدت لينا حكاية الود الحبيبوكل سنة وانت طيب وربنا يحقق امانيك قول امين

غالي والطلب رخيص يا حبيبنا

[محمد زين العابدين]

ما اجمل مفرداتك ودجبريل حين تنسل في روعه و سهوله وبساطه وتغزل معاني لقصص جميله واقعيه لحياه نعيشها .







حارنك نحن ودايرنك

[صلاح ودالطاهر]

ودجبرين يا خي انت فنان ومبدع واصل ما تتاخر

[طارق جبريل]

ما اجمل مفرداتك ودجبريل حين تنسل في روعه و سهوله وبساطه وتغزل معاني لقصص جميله واقعيه لحياه نعيشها .







حارنك نحن ودايرنك

محمد زين الله يجبر بي خاطرك ياخي

[طارق جبريل]

ودجبرين يا خي انت فنان ومبدع واصل ما تتاخر

صلاح ايها الجميل
هذا كتير علي يعلم الله
اشكر لك لطفك

[طارق جبريل]

(2) بت جعفر في (((الغاغة)))


- ابراهيم: عمتي لا تخفسيلك خفسي بعدين بجي اوديكم عرس الزين في القاعة
- سمح آآآولدي الله يعدل ختوتك
- انت ان جيت آآآطارق ولدي.. الزين دة هوول منو واكنها الغاغة دي شًنها
- ايي الشي ماهو عرسا بالجد الشي في السينما
- ايي اخوك قالي عرس الزين تقولي سينما
- عمتي بعدين بتفهمي لامن نمشي هسي عندي تمرين اللحلو قبل ما يجي ابراهيم
- سمح انا زاتي بقيت ازوزي اللاخدلي غمدي
..................
- يلا عمتي قومي البسي توبك النمشي نحضر عرس الزين
- سمح كدي النصلي المغرب وآخدلي سفي ونمشي
- طيب يكون الباقين جهزوا
وصلنا القاعة ونحن داخلين عمتي شافتلها واحدا لابسلوا بدلة بنية
- عمتي: انت آآآطارق الخرابة اللابس بني علي الكُرجي (طائر بني) ياهو العريس الزين...
- عمتي قلتلك قبيل الشي سينما
- نان العريس الغبيان دة مالو مدردر الناس في الحتي البعيدي دي اصلو جنب بيتهم مافي فسحي يسولون فيها صيوان ويعلقولم فيها السعون فشان ألمي البارد (الموية)
- والله يا عمتي انت حجتك كتيري خلاص لامن ندخل وبتفهمي
- أي كدي انت مالك حديثك بقى مسيخ كدي
دخلنا القاعة والانوار منورة والسجاد والموكيت احمر والدنيي هايصي نسوان ورجال وشباب وهيلمانة....
- عمتي وااااااااسجمي انت ناس العرس ديل جابوا الرتاين السمحات ديل من وين.. الله يعلم من ولدوني ما شفتلي رتاين متل ديل في بلدنا
- عمتي الشي ماهن رتاين الشي انوار بالكهرباء
- دة الكلام باقيلي العريس اهلو منغنغين وشامين عافتم.. واكنو شنو الشي الناعم الاحمر العلي القرمصيص والناس ماشيت فوقه بي نعالهم دة..
- دة موكيت وسجاد آآآعمتي ماهو قرمصيص
- يعلم الله يا ولدي انا بي حموريتو دي قايلاهو قرمصيص... والناس ديل مالو عرسهم كُتور كدي النسوان منجعصات في وسط الرجال كدي...
- انت لليلي ماك دايري تقتنعي الشي ماهو عرسا بالجد
شويتين قعدنا في الكراسي قامت عمتي لكزتني:
- ان جيت مالم ما قدمولن شي الناس ديل لا مويتا باردي لا كعكايات نتصبربهن لامن يختوا عشاهن..
- سمح يا عمتي اصبري بعد شويي بتفهمي الحاصل شنو وفي الاستراحي بنجيبلك الاكل
شويتين طفوا الا نوار والفليم بدا وعمتي تنقنق من الرتاين الانطفن ديل..
لكزتها: فهمتي
- شيتكم دة لا بيتفهم لاني فارزاهو... نسوان منجعصات وسط الرجال ورتاين يبقن وتاني ينطفن وتلفزيون كبير قدر الديوان
- انا قبيل ما قلتلك الشي سينمي انا قعدتي تقوليلي كلامك مسيخ
شويتين الفيلم بدا وجات لقطة فيها ممثلة بتدخن...
- هي سووووووووووووود علي.. ودي مِني دي يا دا المنطلقي دي وتدخن قدام خلق الله كدي
- عمتي الشي تمثيل قلنالك
- حتى ان بقى تمثيل دا منو الراجل الدِلِق دة المخلي مرتو تدخن قدام خلق الله كدي... شوفلي سفي انا اتكهربت خلاص... شفت الراجل اب فقهي القدامنا دة شفتو قبيل مرقلو حُقة ألت صعوط..
اديناها سفي وتاني رجعت تربرب:
- انت دة منو البوم الفي التلفزيون عامل سيقانو علي السنبريي كدي (تقصد علي مهدي في شخصية الزين)
- دة الزين بطل الفيلم الدايرين يعرسولوا
- تدفني يا طارق... الولد العوير دة ديارين يعرسولوا البت السمحي دي (تحية زروق)
- أييي يا عمتي
- الله بيسألني ناس الخرطوم ديل ماهن نصاح... كيفن ولدا عوير متل دة يعرسولي بنيتا سمحي زي دي
- الله اداهو نسويلوا شنو
انتهي الفيلم وطلعنا ولليلي هي تنقنق:
والله سوات التاباني والياباني.. هسي اخوك جايبنا من البيت للحتي البعيدي فشان نشوف الولد البهيمي دة... باقيلي دفعلو قروشا كتار
- اي قروش قدر الفني
- والله ماهو نصيح.. ان كان سوالنا بيهن كرِقي في حوش ابوك دة ما كان اخير

[صلاح ودالطاهر]

- والله ماهو نصيح.. ان كان سوالنا بيهن كرِقي في حوش ابوك دة ما كان اخير



صدقت عمتنا كان سواهن في كرقي كان احسن ولا شال عويشي كان احسن
************************************************** **
ودجبرين كان ادوك فريد دور عليك الله تعال ولو بالخصم عليك الله تعال وما تتاخر *************
******************************************
وذي ما قالت والدتنا عافيه ليك من شيل حكري ولبن شطري عافيه ليك عفواً يتقيك ويوقيك ويديك لمن يرضيك

[moh_alnour]

و ينك يا دكترة ؟
و الله يا ود جبرين حكاويك لا تُمل
نتمنى أن تعود أكثر قوة و عزيمة كما عهدناك سابقا ً
همسة : ما زلنا ننتظر قصة البت الشديدة الحبت ليها طُلبة بناي

[ابوخالد]

- ح- شيتكم دة لا بيتفهم لاني فارزاهو... نسوان منجعصات وسط الرجال ورتاين يبقن وتاني ينطفن وتلفزيون كبير قدر الديوان


والله روعة ...


رتاين مزاجا عالى ..... وتلقاهم مولعات لى هسى .....:rolleyes::rolleyes::rolleyes:



تى ان بقى تمثيل دا منو الراجل الدِلِق دة المخلي مرتو تدخن قدام خلق الله كدي... شوفلي سفي انا اتكهربت خلاص... شفت الراجل اب فقهي القدامنا دة شفتو قبيل مرقلو حُقة ألت صعوط..

وأنا كمان ....




- والله ماهو نصيح.. ان كان سوالنا بيهن كرِقي في حوش ابوك دة ما كان اخير


والله غلبتنى .... أفصح أبن ....




لك الروعة أخى طارق ...



**************
طارق ... والجَمال... مروا من هنا...

[أشرف صلاح السعيد]

اها نقعد نعيد في بوستاتنا نسوي شنو عاد... نشيل حالنا

(1) عرس نفيسي



- طارق آآآولدي قوماك دلني لا تحت جنب جدودك في شجرة ناس ود جبارة
- سمح قوماكي
- أدني عكازي
واندلينا لاااا تحت عند بير ود جبارة
- عوض السيد: اهلا بالمرة القاهري
- مافي زولا قاهر قدركم الله لا تكسبكم
- طارق امشي املالي حقتي دي صعوط من دكان العوضابي وجيبلي معاك سيجاري ألت برنجي
- ود جبارة: انت لليلي تسفي وتسجري دحين مو حجيتي
- أيي حجيت واسجر واسف التمباك عندك مانع
- ود جبار (يضحك): اصلك من يومك قاهري وماك نصيحي
.....
مشيت علي دكان العوضابي وخليتم
خمسة رجال وامرأة... شيوخ على حافة القبر
يقضون جل وقتهم في اجترار ذكريات صباهم
يحكون عن أيام مضت منذ زمن بعيد
لا يتحرجون في الكلام ولا ينتبه لحديثهم أحد
يلقون الكلام على عواهنه لا يعنيهم من محيطهم
غير طفل يرسلونه حيث يريدون او امرأة تأتيهم بالطعام
.....
جبت الغرد أليل نفيسي كان اسمعلك:
- عوض السيد (ميت من الضحك): الرسول آآنفيسي عرستي ود عمنا دة كيفن
- كدي خلني اللسف واسجر
- رابح: أصلك من يومك علي الرجال
- جيت يا عوض السيد مندلي لااا تحت شايلالي حرف أليل قراصي لي ابوي
وجنب البير أكان القالك ود الطيب طالع وفي ايدو برسيم
سلم علي وقلتلو: انت يا ود الطيب بقيت تحد زي النسوان كمان
مرتك ماتت ليها سنين وانت لليلي مابي العرس
- عوض السيد: الله يقلعك آآآبتتقدري
- ود ناس الطيب: عندك لي عروس آآآنفيسي
- انا مالي آآآبتعرس
- تعرسيني آنفيسي
- ان بقيت دايرني بكلم ابوي الكلام لا يبقى فسو ساكت
- خلاص ان بقيتي قابلابي عوجة تب مافي
- عوض السيد: الله لا تكسبك يا مقطوعة الطاري
- نفيسي: اندليت علي ابوي تحت يا عوض السيد ولقيتو يحفرلو تحت تمرة
وقلتلو: ابوي ود ناس الطيب دة قال دايرني دحين نجض معاهو الكلام في صلاة العشاء
- جدنا بغداد: انت نان بقيتي للعرس
- نفيسي: كدي يابا شوف فهموا شنو انا هيني
- رابح: آآآبتستحي من يومك
- نفيسي: وحاتك آآآرابح العشي بقالي طويل خلاص وبقيت اتاوق علي جية ابوي من الجامع... ووكتين جاء ما قالي شي اتعشى ورقد نام... وانا الوردي مسكتني
- وراسي بقى يودي ويجيب يا ربي ابوي اباهو ولا السجمان ما فتح الكلام معاهو
- صبحت الدني وانا اوجوج من هني لا هني علي الجدادي الدايري ترمي البيض
- اندليت لا عند ابوي ما شفتو... شويتين اشوفه شايل طوريتو وجايي من لااافووووق
- حدرتلو زين وطلعت لي اهلي...
- الواطة مغربت وانا اتاوق لي طلعة ود الطيب لامن شفتو طالع علي بيتم
- لفحتة طرحتي ومشيت عليه قبل لا يمسك كُشر الباب:
- انت آآآود الطيب تكذب علي وتخليني أكلم ابوي وما تكلموا
- ود الطيب: والله آآنفيسي غلبني اقوله خجل منو... يقول شنو انا بقابلك من وراهو عاد
- الخجل اليقطع مصارينك وحات النبي ما تمشي قدامي هسي ليهو علي اكورك ألم عليك خلق الله هني واقولهم ود الطيب يجرجر فيني من طرحتي
- عوض السيد (ضاحكا بشدة): نجيضي الله يقلعك... أهاااا
- نفيسي: وحاتك ود الطيب قلع عيونه وبقى يرجف وشبكني: آآآنفيسي بمشي معاكي بس لا تضيعيني... وقلتلو ان بقيت راجل ما تجي انا سابقاك للبيت
- ود جبارة: الخرابة آآآبتعرفي الخوف
- نفيسي: جملة الايمان يا ود جبارة جاء وراي ودقة الباب وطلعتلو وقالي ابوك في... وانا اكورك بي طول حسي: أييي يا ود الطيب ابوي لا جوة... فشان ابوي يسمعني
- دخلتو علي ابوي ومشيت علي الطاقة اتصنت في كلامو
- عوض السيد: أها شن قال؟؟؟؟
- نفيسي: اسمع فيهو يقول لي ابوي يا عم بغداد انا جاييك في غرد خير
- رابح: أها يا خرابي
- نفيسي: المهم يا رابح كلم ابوي وانا بقيت اوجوج من هني لاهني
- وازازي بين الطاقي والتكل تقول بطني ماشي (عندي اسهال) لامن مشى لي اهلو..
- وابوي ناداني وقالي رأيك شنو
- عوض السيد: أها شن قلتي يا خرابة
- وحاتك يا عوض السيد بقيت ازغرد لامن ابوي نهرني...وعرسته
- الجميع يضحكون: الله لا تكسبك ماك نصيحي



اخى طارق تحياتى..
قصاص حتى الثمالة..قصاص بمعنى حاكى وبمعنى متابع للأتر..فحكيك فيه اتقان وتكنيك محترف والسيناريو غير مبتور ولا متكلف..اما الاتر جد وصلت بيو تب فى التقاط حوارات وإن شاهدت بعض وبعض قليل منها الا بتتابع اتر الفكرة وصلت للقصة كاملة ومكملة..
نفيسة بت بغداد كنت فاكر تحررها بعد أن ضربت السنون قدما حواليها ولكنها القروية الجريئة الواضحة ..شخصية لم ألتقيها برحلتى الحياتية ولكنى إلتقيتها بك..جراءة المرأة عادة عندنا تظهر بعد قطع عمار فى الإنجاب وبعد سنين مابعد لا تصديقها بوداع مراحل الاخصاب..فالحبوبات معظمهن يدخن عتيقات..لا أدرى هذه القوة والندية للرجل تأتيهن حكمة وتقداما بالسن ام بعد موت انجذاب الجنس للجنس جنسيا؟..ولعل اديبنا الراحل السامق الطيب صالح لفت انتباهنا لنفس فكرة المرأة الجريئة كبرا فى شخصية بت مجدوب وإن كان بشخصيتها وسلوكياتها مايشين..
تقبلنى متابع لكل أتر حكيك ولك الشكر لإبداعك..

[أشرف صلاح السعيد]

بت جعفر قصة وإدهاشة سرد بلغة اهلنا الحنان..
التدخين سرا للنساء الصغيرات وعلنا مع بعض التحفظ للمسنات..منطق غريب وإن أقر به جل المجتمع وخصوصا النسائى..لا أدرى أجد كثيرا وقوع الظلم على المرأة مصدره مرأة..التدخين كريه للرجال والنساء سواء ولكن أقل قبولا وبكتيير للمرأة..مالمنطق؟؟؟ الحدود الشرعية بالإسلام واحدة للذكر والأنثى لأن الخطأ واحد ..السرقة سرقة وقطع اليد للجنسين..الزنا زنا وشريكين والحد واحد سواء محصنين او غير..الشرقية ولعل السودانية أزيد بمسائل التفرقة بين ذكر وأنثى..
عجبنى جدا عدم تغير لهجة الشاب المتعلم مع عمته واسترساله فى الحديث معها بلغة وطنهم ..
بالقصة أفكار ومقارنات جميلة وإن لم تصرح بها علانية..
القرية / المدينة
الاختلاط..التقدم التكنلوجى..طريقة اللبس ..
جيل اليوم / جيل الامس
ازدواجية المعيّار..التدخل بشؤون الاخرين ..اسقاط الاحكام..اختلاف الاهتمامات..
قصة فيها الكثير من الفكر ونقاط نقاش كل نقطة تحتاج لسمنارات وندوات ونقاشات..

[طارق جبريل]

صدقت عمتنا كان سواهن في كرقي كان احسن ولا شال عويشي كان احسن
************************************************** **
ودجبرين كان ادوك فريد دور عليك الله تعال ولو بالخصم عليك الله تعال وما تتاخر *************
******************************************
وذي ما قالت والدتنا عافيه ليك من شيل حكري ولبن شطري عافيه ليك عفواً يتقيك ويوقيك ويديك لمن يرضيك

صلاح كيفنك ابوي
يا سيدي مانعنا منكم الشديد القوي بس

[طارق جبريل]

و ينك يا دكترة ؟
و الله يا ود جبرين حكاويك لا تُمل
نتمنى أن تعود أكثر قوة و عزيمة كما عهدناك سابقا ً
همسة : ما زلنا ننتظر قصة البت الشديدة الحبت ليها طُلبة بناي

محمد يا حبيبنا
كدي بس قول يا لطيف

[طارق جبريل]

- ح- شيتكم دة لا بيتفهم لاني فارزاهو... نسوان منجعصات وسط الرجال ورتاين يبقن وتاني ينطفن وتلفزيون كبير قدر الديوان


والله روعة ...


رتاين مزاجا عالى ..... وتلقاهم مولعات لى هسى .....:rolleyes::rolleyes::rolleyes:



تى ان بقى تمثيل دا منو الراجل الدِلِق دة المخلي مرتو تدخن قدام خلق الله كدي... شوفلي سفي انا اتكهربت خلاص... شفت الراجل اب فقهي القدامنا دة شفتو قبيل مرقلو حُقة ألت صعوط..

وأنا كمان ....




- والله ماهو نصيح.. ان كان سوالنا بيهن كرِقي في حوش ابوك دة ما كان اخير


والله غلبتنى .... أفصح أبن ....




لك الروعة أخى طارق ...



**************
طارق ... والجَمال... مروا من هنا...
الكَرِقي يا خالد بالشايقي يعني الراكوبة
تسلم يا سيدي

[طارق جبريل]

اخى طارق تحياتى..
قصاص حتى الثمالة..قصاص بمعنى حاكى وبمعنى متابع للأتر..فحكيك فيه اتقان وتكنيك محترف والسيناريو غير مبتور ولا متكلف..اما الاتر جد وصلت بيو تب فى التقاط حوارات وإن شاهدت بعض وبعض قليل منها الا بتتابع اتر الفكرة وصلت للقصة كاملة ومكملة..
نفيسة بت بغداد كنت فاكر تحررها بعد أن ضربت السنون قدما حواليها ولكنها القروية الجريئة الواضحة ..شخصية لم ألتقيها برحلتى الحياتية ولكنى إلتقيتها بك..جراءة المرأة عادة عندنا تظهر بعد قطع عمار فى الإنجاب وبعد سنين مابعد لا تصديقها بوداع مراحل الاخصاب..فالحبوبات معظمهن يدخن عتيقات..لا أدرى هذه القوة والندية للرجل تأتيهن حكمة وتقداما بالسن ام بعد موت انجذاب الجنس للجنس جنسيا؟..ولعل اديبنا الراحل السامق الطيب صالح لفت انتباهنا لنفس فكرة المرأة الجريئة كبرا فى شخصية بت مجدوب وإن كان بشخصيتها وسلوكياتها مايشين..
تقبلنى متابع لكل أتر حكيك ولك الشكر لإبداعك..

اشرف كيفنك ابوي
يا عزيزي اعطيتني اكثر من ما استحق
الامر برمته لا يعدو أن يكون سوى نقل لبعض حياة البسطاء من بلادي
اشكر لك لُطف كلماتك

[طارق جبريل]

بت جعفر قصة وإدهاشة سرد بلغة اهلنا الحنان..
التدخين سرا للنساء الصغيرات وعلنا مع بعض التحفظ للمسنات..منطق غريب وإن أقر به جل المجتمع وخصوصا النسائى..لا أدرى أجد كثيرا وقوع الظلم على المرأة مصدره مرأة..التدخين كريه للرجال والنساء سواء ولكن أقل قبولا وبكتيير للمرأة..مالمنطق؟؟؟ الحدود الشرعية بالإسلام واحدة للذكر والأنثى لأن الخطأ واحد ..السرقة سرقة وقطع اليد للجنسين..الزنا زنا وشريكين والحد واحد سواء محصنين او غير..الشرقية ولعل السودانية أزيد بمسائل التفرقة بين ذكر وأنثى..
عجبنى جدا عدم تغير لهجة الشاب المتعلم مع عمته واسترساله فى الحديث معها بلغة وطنهم ..
بالقصة أفكار ومقارنات جميلة وإن لم تصرح بها علانية..
القرية / المدينة
الاختلاط..التقدم التكنلوجى..طريقة اللبس ..
جيل اليوم / جيل الامس
ازدواجية المعيّار..التدخل بشؤون الاخرين ..اسقاط الاحكام..اختلاف الاهتمامات..
قصة فيها الكثير من الفكر ونقاط نقاش كل نقطة تحتاج لسمنارات وندوات ونقاشات..

الدخان القاصدو هنا يا اشرف هو دخان الطلح
هههههههههههههههههههههه

[abomazeen]

أخونا طارق جبريل ... لكم التحايا وجل التقدير
صراحة أعجتـني جداً جداً طريق السيناريو المحبوك بطعم اللغة السهلة
السهولة والحلاوة في توصيل الفكرة والطريقة السلسة فيها ... فلا تبخل يا أديب يا جميل
فراينا جماليات وعبارات استطعنا الإندماج في الطــرح بعمق الفكرة وسهولة الإيقــاع المتوازن

[امال مالك]

اخى صالح جبريل
كل عام وانت بخير

الله عليك كم اسعدتنى ونسة الحبو بات نحنا محتاجين لى مثل هذه السناريوهات الجميله
ولك من التحايا

[ابوالنور]

يا دكتور كل سنة وانت طيب والبركة الشفناك طيب

[طارق جبريل]

أخونا طارق جبريل ... لكم التحايا وجل التقدير
صراحة أعجتـني جداً جداً طريق السيناريو المحبوك بطعم اللغة السهلة
السهولة والحلاوة في توصيل الفكرة والطريقة السلسة فيها ... فلا تبخل يا أديب يا جميل
فراينا جماليات وعبارات استطعنا الإندماج في الطــرح بعمق الفكرة وسهولة الإيقــاع المتوازن



ابو مازن كيفنك ياخي
وتسلم على الكلمات الطيبات

[طارق جبريل]

اخى صالح جبريل
كل عام وانت بخير

الله عليك كم اسعدتنى ونسة الحبو بات نحنا محتاجين لى مثل هذه السناريوهات الجميله
ولك من التحايا

امال كيفنك
اول شي صالح دي جبتيها من وين
ههههههههههه
تسلمي يا سيتي

[طارق جبريل]

يا دكتور كل سنة وانت طيب والبركة الشفناك طيب

ابو النور كيفنك
يا زول نرانا دايشين في الدنيا دي

[طارق جبريل]

(3) الطيب ود موسى وود مدلهم


- تعرف يا طارق ولدي عمك ود مدلهم دة كان مصيبة الله يرحمه
- كيفن يا عمي
- انا وهو كنا شغالين في الصنادل البتمشي بين كريمة ودنقلا
- اها
- ويا ولدي حياتنا كلها عديناها مع التمُر
- كيفن يا عمي
- النهار كله نحفر تحته ووكتين تليل نصلي عشان ونطلع علي حريم العرقي
- هههههههههههه اصلو تربكم دة يا عمي جنو جغمي
- ايي يا ولدي ان بيقنا ما جغمنا آآآبنرتاح
- دحين عمي وداعة الطلع فيكم زي جدي
- أيي عمك وداعة رحمة الله عليه كان جنو قرآن زي جدك
- هي لكن يا عمي انت جدي دة موش كان بيأم الناس في الخلوة
- ايييي
- نان كيفن كنتوا بتجغموا وانتو اولاده
- يا زول الجغمي دة ماهو دايرلو سبب كدي خلني اللحكيلك قصة ود مدلهم
- اها
- يوم سافرنا في الصندل لي ضنقلة والدنيي كانت برد شديد خلاص
- ايي برد الشماليي كعب
- يمين يا ولدي برد ان طلعت اصبعك ينقطع... المهم ود مدلهم جاني في الصندل كان عندنا فيهو اوضة ننوم فيها
قالي قوماك نشوفلنا عرقي في البلد الفقر دي...
اها قمنا لقيلانا اندايي كدي وكنا شايلننا قريب فروت... وحاتك يا ولدي ود مدلهم دة كبا العرقي في كوريي وبقى يعصري
فيها القريب دة... والخرابة قوي يمين قشر القريب بي منجل ما تطلع منه نقطايي..
سكرنا زين وشلنالنا نص في قزازي وجينا راجعين نغني في الطريق
- اها
- قام يا ولدي علي التعترنا قابلنا ليك بوليس اصلي زي لياقتو (من لايووق) ما شفتها
- وداكم الحراصة
- قعدنا يا ولدي نحنس فيهو... ابى كله كله... اديناهو جنيه.. حرن كله كله... قلنالو خلاص شيل النص دة عليه العوض ومنه العوض
اصلو ابى يتفاهم كله كله... اها قام عمك ود مدلهم قالي تكفتو ولا اكفتو انا
- لا حولاااااا يا عمي دايرين تكتلو الزول
- نان يا ولدي ما جننا جن.. قلت لي ود مدلهم ان بقيت كفتو انت بيموت خلني النكفتو انا
- اها وكفتو
- لا جينا جنبب بيت كدي ونسمع ليك الناس يتونسوا بالحيطة... قام عمك ود مدلهم شالو ورماهو ليهم بي فوق الحيطة
- ههههههههههه يا عمي دة شغل مجانين دة
- نان منو القالك نحن نصاح... النصيبة يا ولدي قام لاقانا واحدا تاتي ليهو تفي كدي
- بوليس تاني
- ايي ليهو تفي كدي علي الاشميق... برضو يا ولدي محنا محاين
- اها وساقكم للنقطة
- لا ما شهدناهو
- كيفن؟؟؟؟؟
- ود مدلهم قالي المرة بكفتو... مسك القزازي الفيها النص وقشطو في كتفو
وكان اسمعلك يا ولدي كررررررررر في ترقوة الراجل وبدا يكورك
- هههههههههه غمتو يعني
- ايي يا ولدي لامن حنيت عليهو
- اها وشن سويتو تاني
- قمنا جارين علي صندلنا وفي الصباح قالولنا لقولم بوليس غمران وعضامو راقدات خل
- اها شن حصل
- يا زول الصندل قام في نفس اليوم وتاني ما جبنالو خبر




رحمة الله عليهم الاتنين

[امال مالك]

امال كيفنك
اول شي صالح دي جبتيها من وين
ههههههههههه
تسلمي يا سيتي

اخى طار ق جبريل
ناسف انا اظنى بقيت حبوبه وبعيد عنك النظر ضعف
لا بس انا شدانى الكلام الشيق
لك التحيه

[الفخيييم]

طارق تسلم كتير والله
ياخ انت رائع بشكل
سرد جميل يعبر عن اصالتك
يا ريت ناس ياي يكونو فهمو حاجة
طائشة الضفائر والشلوخ والهيبة
مافي اروع من كده تسلم تاني والله

[مدناوية]

ود جبرين ..

سعيدين بي طلتك وإبداعك ..

واصل ونحن متابعين ..

[حنونة.]

الأخ / طارق جبريل تسلم ياسيدى على هذا السرد الجميل
اعجبتنى قصة (الغاغة) تجسيد جميل للاحداث وروعة الاندهاش