أب دبره [الأرشيف] - منتديات ودمدني

عثمان جلالة

06-09-2009, 11:27 PM

هو نوع من أنواع الحمير "شيال تقيله" وقليل حيلة .. ومنهك وحيلو مهدود على طول لدرجة عندو دبره في ضهرو.:cool::cool:

حمار بشيلوهو كتير لـ درجة إنو ظهرو أتفسخ أو أنسلخ من كثرة الأحمال والأهوال والسياط، التي تلهب ظهره كل يوم .... (1):mad::mad:

أعجبتي موضوعية حلقة "ناس" والتي تبث على قناة النيل الأزرق ... وقد ذكر "المستكاوي" سر العلاقة الكبيرة بينه وبين الحمير ... حتى أنه قام بدراسات مستفيضة عن الحمير ... وأنه يستطيع أن يقيم سلوك مدينة كاملة بما فيها من بشر ... عبر بوابة حميرها !!!! (2):rolleyes::rolleyes::rolleyes::)

القصة الخرافية المتداولة عن الثلاثي المسافر الحمار والكلب والغنماية ... ركبو العربية ... الحمار دفع حق التذكرة كاملة "لا داير من الكمساري ولا الكمساري داير منو" الغنماية زااااااااااغت من الكمساري .. والكلب داير ليهو باقي من الكمساري ... علاقة مستمرة في تفسير ظاهرة

سك الكلب الدائم للعربية

وزوغان الغنمايه

ووقوف الحمار في نص الشارع كده بس "حمره عين وزنديه" (3);)

علما بأن شعار حزب أوباما الحاكم في الولايات المتحدة الأمريكية هو الحمار :rolleyes:

أما الإستحمار أيها السادة ... بعيدا عن المطبخ "طبعن" هو الاستغفال والاستلاب .. وهو ما نمارسه نحن من غربه وتغرب ... وروتين يومي قاتل يجعلك أحيانا تتحسس "الدبره":p

المهم ما علينا

الداير أقولو ليكم ... أنا أمي الله يديها العافية .. لامن تكون مبسوطة مني بتقول لي يا أب دبر .. واللقب هنا يشير لرمزيتين لجدنا الرجل القامة أب دبر ... وهو رجل شهم وكريم ويعطي بلا حدود ... والثانية هي الحمار شيال التقيله .. الـ ما بكل ولا بمل .. ولا بقول كفاااااااااااااااي أو الرووووووووووووووب.:mad:

داير أقول شنو ؟؟؟

كامل تضامني مع كل حمير الأرض:cool::cool::cool:

وعندي سؤال مهم جداً .. رأيكم شنو ؟؟؟ الحمار مش مظلوم بالله؟؟؟:confused::confused::rolleyes:

ابراهيم

07-09-2009, 12:00 AM

النور محمد يوسف

07-09-2009, 12:08 AM

نزار حسن محمد

07-09-2009, 12:39 AM

اى والله يا ود جلاله
سرحنا معاك قى ظلال اب دبره ...
لكن بينى وبينك كدى يوم جاى من مدنى وماشى على بركات نص الليل وفجاء كدى القاء ابو دبره واقف فى نص الزلط بالله لمن زوقته كدى وكفته بالرفرف اكان اشوفه لك فى نص الترعه
علا العربيه اسكت ساى اتقول ضربه مجروس ...
غايتو الله اجازى محنك ضحكتنى وانا صائم ...
آها يابوى ودعتك الله

أبوعمرو

07-09-2009, 12:49 AM

حمار الدويم
(هذا الحمار المسكين (يشد) من النجمة لتوزيع اللبن... وبعد طلوع الشمس (يشد) علي برميل المويه لنقل الماء بين الاحياء حتي الساعة 12 ظ (مواعيد قفل البيارة) بعد ذلك (يشد) علي قليبه التراب حتي الساعة الرابعه عصرا وعند العصر الي الحواشات لجلب (القش) للبهائم ليعود في المساء لتوزيع اللبن بين الاحياء.........
هذا الحمار الشقي حاول الفرار مرارا إلا انه فشل لعدم وجود الوقت ... وحانت له فرصه واحده عندما كان علي ظهر البنطون ... ويحكي الحاضرون أن هذا الحمار بكامل عتاده قفز من البنطون الي البحر منتحرا ومنهيا لهذا العذاب)
...........
آهـ يا عثمان دا حمار خالي دبر؟
آكان ضرب الدم بكون بكسي 78

عثمان جلالة

07-09-2009, 01:30 AM

انت قصدك حمار الوادي
ولا الحمار المكادي
غايتو في الحالتين مظلوم جنس ظلم ...
وانا ما عارف الزول لمن يقولو ليو يا حمار بزعل ليييه؟

الحمار يا جلالة ضكران وشيال تقيلة واي حاجة
لكن بس مشكلتو عويروصوتو شين
وبرفس
لو صلح التلاتة حاجات دي يبقى مية مية
وانا بتضامن معاك تضامن كلي ...
ولو قلت نعمل حزب نسميه الحزب الحماري يكون مية مية

يا جلالة مشتاقين كتيير والله

:p:p:):D

برهوته والله مرورك زي شراب المويه يااااااااااخ .. فيهو إحساس بالطراوه .. بعدين إنت داير تجرد الحمار من أهم ميزه عندو وهي الرفس ... برضو أحسن يرفس من يقوم ينتحر :rolleyes: وفكرة الحزب الحمااااري دي ممتازه جداً ... و ح يكون حزب فعلا همو الشعب كلو ومصلحتو ... ده حزب ممكن يشيل هموم الناس كلهم .. وح يعمل في صمت لأنو لو إتكلم صوتو شين :rolleyes:

لك الود يا برهوته ... والشوق بحر والله :)

ابوخالد

07-09-2009, 01:46 AM

mutasim

07-09-2009, 08:53 AM

والله موضوع شيق وانا دائما بعتبر الحمار زكى ونوع زكاءه مثل البنغلاديشى يعمل العايزه ولا يهمه وجلده بتحمل الضرب والحكايه دى ماشه معاه بنغالى

درديري كباشي

07-09-2009, 10:55 AM

سلام يا استاذنا ابو عفان

انا امس فعلا حضرت سهرة الحمير هذه ( عفوا بلا مؤاخذه ) اقصد السهرة التي كانت تدور حول الحمير .. ولكن كان تركيزي مشتت بين المنتدى والسهرة ما ركزت لكن كل ما اتلفت وجدت الجماعة جايبين سيرة الحمار ... وواحد قال انه الحمار المكادي بيذكره بالمواطن السوداني ( شوفوا المصائب يعني هو نحن ناقصين مع احترامنا للحمير طبعا)
بس عندي نقطة لماذا ربطت سيرة الحمار بعبارة بلا مؤاخذه ... اشمعنى الحمار يعني ؟؟؟؟
وكويس انك صنعت لنا عصيرا من هذه السهرة الحمارية .....

وتنقطع السهرة كل مرة بدعاية اما دعاية زيت ترفع لك الكلسترول قبل ما تذوق ... او خديجة وقعت من البلكونة ..ورغما عن اني مش عارف العلاقة بين وقعت خديجة والبوهية موضوع الاعلان ؟؟؟؟
بجي تاني

أشرف صلاح السعيد

07-09-2009, 12:11 PM

عوافى اخى عثمان ورمضان كريم..
هو فى ظلم اكتر من قول "ياحمار للزول المقصر والمابفهم" والله الحمير مظلومة ومع سبق الاصرار والترصد..
مش كدا وبس دا حتى نسبا مع الحصان مااترحم..حصل سمعت ليك زول بنبز زول وقال ليو "ياحصان"؟..النبز بس واقع فى الحمار ونصو الفى البغل..مع انهم الاتنين ليهم جمائل منذ قدم الزمن مع الانسان ..
وبمناسبة الحمير كان عندى صاحبى اياما ديك كنت شغال فى تنفيذ مشاريع بكنانة وصاحبى كان رائد فى الجيش فى وحدة كنانة..اها كنا ماشين مدنى ومرينا بقرية الحمير مربوطة جنب بعض وكلهم صاحين الا فى حمار نعسان جد مرة يغمض ومرة يصحصح..صاحبى الضابط كان شغال فترة فى الاستخبارات..قام عاين للحمار النعسان وقال ليا: تعرف صاحب الحمار النعسان داك مهرب بتاع سكر..قلت ليو عرفت كيف؟..قال ليا ماشايف الحمير كلها مصحصحة الا الحمار داك؟ ماطول الليل شغالين بيو تهريب قطعو ليو نومتو بالليل بيكمل فيها هسى..
من يوما عرفت الحمار فعلا ممكن تعرف بيو كتير من المعلومات عن صاحبو ..

سامية عباس

07-09-2009, 09:20 PM

والله الحمار مظلوم ظلم الحسن والحسين

وياريت حالو كان من حال كديسة لندن ......كان وقف الامم المتحدة دي على رجل واحدة

ورجعت ليه حقوقو عيانا بيانا بس ما بتدي حريف

ظلموه وحملوه ما لا يطيق

ظلموه ووصفوه بالغباء...... ويقال عنه انه من ثالث اذكي الحيوانات على الارض

( والعهدة على الراوي)

ظلموه وضربوه رغم حمله الثقيل وهو صابر محتسب

كلما ضاق صدر صاحبة اتسع صدره رحابة وتسامحا

وظلموني الناس وتجنو علي ( مع الاعتذار للاغنية )

وحقيقة كلمة حمار اذا اخذناها من جابنها المضئ ابدا ما اساءة ولا احتقار فالحمار

رمز لقوة التحمل والصبر والعمل بلا كلل ولا ملل .

وحباب عثمان شيال التقيلة .

تخريمة :
عجبتني في الحلقة حكاية قرضة مصاص العرديب ....... طبعا النوع ده من الناس موجود بكثرة وماعندهم شغلة غير

يمص العرديب ويحبطك

المكاشفى

07-09-2009, 10:49 PM

ابو المشكاة رمضان كريم ياراجل
وبوستك عسل واجمل مافيهو حاجتين
الاولى رجع القامه عمنا ابو محمد النور محمديوسف
حمدا لله على سلامته ومايشوف شر
والتانيه دى بقى هيج فينا شجونا كنت اكتمها عفا
وازكر وادى النيل هيمانا (وادى النيل ده كنار الحله)
اسمو وادى النيل واسمو ودع امك وهو مرتع للحمير
والدبره دى ياجلاله ما تعمل ليها الكربون بتاع حجر البطاريه

,وانا اليومين دى فى بلد الحمير
شمال كردفان شخشيا

والصور جايه كدى ياجلاله النمشى ليك على مطار المحطه
والنجى جهز سرجك وبردعتك واللبد ولا بتركب عرى ساى
ياجلاله

مدنيّة

07-09-2009, 10:53 PM

كامل تضامني مع الحمير

همسة : ياجلالة لما الحاجة الله يديها العافية تكون زعلانة منك بتقول ليك يامنو ؟؟!! :cool:

المكاشفى

08-09-2009, 12:56 AM

ام جمال سلامات يا خيتى ؟؟؟؟؟؟؟

عثمان جلالة

08-09-2009, 01:09 AM

والله ياعثمان عشان عارفنك شيال تقيلة وهميم وبتحس بالوجيعة كنا ننتظر جيتك ولامن تغيب لاي ظرف بنعرف ان عثمان قدامو حاجةً مانعاهو عشان عارفين عثمان شايل همومنا كلنا

الغنماية زائغة والكلب جاري يطارد حقوقه ...بس الحمار في الحالة دي والله يحسدوا عليها

ياخ دا ماااا في جنة عديل كدا ....واقف صامد لا يتحرك عشان ما مديون

والله تاريهو الحمار دا ما هين

الله يكفيهو شر الحاسدين ...مافيش زيو ابدا ....دا عملة نادرة

يعني ما شغال بقنوت رمضان الايام دي : اللهم اقض ديون المديونين

تلقاهو ولا بيقول آمين

طبعا في ناس كتيرة لامن يجي هذا الدعاء تبدع حناجرهم مجلجلة في عنان السماء

آآآآآآآآآآمييييييييين

عثمان سرحت معك ...وافكر في دبرتك دي ...خاصة بيك انت ام بالشعب كلهم

طبعا عاوزين نوتر املاك الشعب

دبرة كل الناس

هي في الحقيقة يا النور "دبرة كل الناس" .. الموظف والعامل والمغترب ... والطالب ... والمزارع .. والمتزوج .. يعني كل الاشكال والألوان .. وطبعا ضحكتني جدا بقصة الحمار الما مديون دي :p
حتى في الصلاه ما بقول آآآآآآآآآآمين في دعوة حل الدين :rolleyes::rolleyes:
ههههههههههههه "كل إناء بما فيه ينضح" :p:p
ياااااااخي وتروني ليك ... تخيل .. تمشي المدن في السودان كلو تفتش لعلاقة الناس والحمير :rolleyes:

حتى في القصص العالمية .. كان مثال العدل ... إنو حتى "الحمار" قدر يوصل شكوتو
الله يوصل لينا شكوتنا نحنا:rolleyes:
الحديث ذو شجون ... خليك متابع بس :):):)

عزيز عيسى

08-09-2009, 08:00 AM

أب دبرة ظهر يادوب الحكاية إحلوت..
ياخي والله مشتاقين ليك ولحكاويك الجميلة.

هو فعلا الحمير ديل الواحد بحن عليهم..
ومسألة الرفق بالحيوان دي ذي الكانو ما بتنطبق عليهم أو
ذي الكانهم ليسوا من فصيلة الحيوانات..
بعد الإعمال الشاقة من حمل أثقال وتعتل الحمار لن يسعد
بالراحة أبدا.. حتى لو أراد الحمار يستمتع بمشية في الفريق
لا يسلم من قولة (عرد).. حتى الأطفال (يتشعبطوا) على
ظهره.. يعني يقبل على وين؟
عندنا في مدني عما لينا عنده حمارة (دحشة) يوميا يركب دحشته
ومشي على الأنادي.. يربط الدحشة في المربط ويدخل الإنداية ويسكر (أم دقوقة).
وبعد ما يسكر (لط) ست الإنداية تنادي النصاح من مرتادي الأنداية بأن
يساعدوها في حمل عمك ووضعه على ظهر الدحشة و(يمحطوها) سوط.
تبدأ الدحشة في السير ومركوب عمك (يكر) في الواطة وهو نائم..
والحكمة إنه الدحشة تسير في إتجاه البيت..
وعندما تصل أمام البيت تبدأ الدحشة في النهيق وكأن لسان حالها يقول:
يا جماعة الخير عليكم الله تعالوا نزلوا مني المصيبة دي!
عندما يسمع أبناء عمك نهيق الدحشة يعرفون بأن والدهم في
إنتظارهم بالخارج..
يخرجوا إليه وينزلوه من على ظهر الدحشة ويرموه على العنقريب..
بعد شوية الدحشة تهنق بطريقة مخالفة للأولى.. يمكن تفسيرها
بأنها فرحانة.

عزيز عيسى

08-09-2009, 08:06 AM

هاك دي برضو..
واحد صاحبي الآن يقيم في واشنطن العاصمة..
في مرة من ذات المرارير كنا ماشين مع بعض في الشارع..
بعد شوية أشوف ليك الزول بدأ يسرع ويمشي بطريقة
غريبة.. قلت ليه يا زول مالك طاير كدا الحصل شنو؟
قعد يضحك وقال لي.. دي قصة طويلة..
حكي لي قال لما كان صغير كان عنده كحكة (كتكوتة)..
واحدة جارتهم وصت أهله قالت ليهم مافيش علاج غير
الولد تشربوه لبن الحمارة.
مشوا حلبوا الحمارة وجابوا اللبن دافيء وشربوني ليهو..
أها من ديك ولحدي الآن ما بعرف أمشي ساي بقيت (أفنجط). :)

عثمان جلالة

09-09-2009, 01:09 AM

:p
اى والله يا ود جلاله
سرحنا معاك قى ظلال اب دبره ...
لكن بينى وبينك كدى يوم جاى من مدنى وماشى على بركات نص الليل وفجاء كدى القاء ابو دبره واقف فى نص الزلط بالله لمن زوقته كدى وكفته بالرفرف اكان اشوفه لك فى نص الترعه
علا العربيه اسكت ساى اتقول ضربه مجروس ...
غايتو الله اجازى محنك ضحكتنى وانا صائم ...
آها يابوى ودعتك الله

قااااالو يا أبوها "اللهم إني صائم" الحمير الـ بتلقاهن في شارع بركات مدني ديل ولا حمير ولا حاجه .. ديل "بسم الله الرحمن الرحيم":p:p

عندنا جدا لينا "الله يرحمه" .. مشى الأندايه سكر ووقف لط .. وجااااااااا ماشي يدوبي ساااااااااااي فجعتن كده لقى ليك حمار أبيض ما شاء الله حصان بس :rolleyes: من طوله وقوته .. وفوق ضهرو سماحة سرج .. وقف بس قدامو ودنقر "الحمار" يعني أركب الندويك بيتكم ... أها جدنا رفع كرعو .. وقال بسم الله ... كاااااااان إلقى روحو واقع في بعر بقر في نص الشارع :):):):) ........ أها أنت قلت بسم الله قبل ما تضرب الحمار :rolleyes:

بدر الدين محمد

09-09-2009, 02:05 AM

http://wh-em.com/mbsm-7r/img/27.jpg

المكاشفى

09-09-2009, 05:37 AM

ابدبر شيال التقيله
كدى شوف الاناقه دى
http://www.picamatic.com/show/2009/09/09/06/34/5023014_bigthumb.jpg (http://www.picamatic.com/view/5023014_Picture_072/)

حمير تحلف تقول من دنقلا

المكاشفى

09-09-2009, 05:38 AM

عندهم حفله

http://www.picamatic.com/show/2009/09/09/06/35/5023020_bigthumb.jpg (http://www.picamatic.com/view/5023020_Picture_078/)

المكاشفى

09-09-2009, 05:41 AM

والعجيبه كمان؟؟؟؟؟؟؟؟؟

http://img102.herosh.com/2009/09/09/958048351.jpg

ود الجعلي

09-09-2009, 07:11 AM

جلالة

حبيت اسلم عليك ورمضان كريم والومك على انك المرة الفاتت قلت لي بجيك بعد الفطور وما جيت " بقصد في البوست السابق"

عموما والله العظيم ماعندي فهم في موضوعك ده عشان كده ما عندي اي تعليق عليهو

وسلامي للابنة "منة" يحفظها ليك ربي

خالد 000 ابقرجة

11-09-2009, 04:01 AM

كامل تضامني مع الحمير

همسة : ياجلالة لما الحاجة الله يديها العافية تكون زعلانة منك بتقول ليك يامنو ؟؟!! :cool:

أب دبر برضو بس برمزية واحدة بس :p:p:p

أبو مشمش
بقولوا للزول المعجزة بصنع من الفسيخ شربات
الليلة مع عصير الحمير بتاع كباشي
لقيت معجزتك من نوع تاني

حصل حمارة عارت بيك ؟؟؟
ولا فنجطت قدامك ؟؟؟

أها تشبيه المواطن السوداني بالحمار المكادي دي خلتني أفكر
لو كوووولنا اتحسسنا دبرتنا 000 وفنجطتنا 000 ونفذنا ( عيرة الحمير ) 000

فكرك بحصل شنو 000
باقي ليك في حمار مننا باقي فيهو نفس للفنجطة ؟؟؟

عندي ليك اقتراح
طالما في تعاطف هنا ما تجي نأسس جميعة حقوق الحمير 000
امكن تلقي تعاطف من جهاز شئون الـ 0000

البقي ماشي ورانا زي التقول نحنا كماسرة

عثمان جلالة

12-09-2009, 02:52 AM

حمار الدويم
آهـ يا عثمان دا حمار خالي دبر؟
آكان ضرب الدم بكون بكسي 78

:p:p:p:p:p:D:D:):);):rolleyes:

الله يجازي محنك يا أبو عمرو ... خلتيني أضحك براااااااااااااي :p تتجازى :p حمار خالي دبر هههههههههههههه

همسه :

أها الليله "دبرة الغلب" كيف معاكم :cool::cool::):p

المكاشفى

12-09-2009, 04:43 AM

:p:p:p:p:p:d:d:):);):rolleyes:

أها الليله "دبرة الغلب" كيف معاكم :cool::cool::):p

دى بقى دايره دباره ياجلاله ياخوى

كدى خلينا فى حميرنا ديل

عثمان جلالة

13-09-2009, 11:58 PM

حالى حال واحد بيحكى حال إخوانه المحتارين

فى الرد ....

حقيقى الكلام إتحبس ... .. ياربى من شنو ..؟؟؟؟

والله ما عارف ....

لكن إمكن الحروف أكبر من سطورنا المتواضعة .......

أو كما قال أحد الرائعون :

إمكن شعرك ده ما عندنا ليهو رقبة ......

ولكن ...

أيها السامق دومآ فوق هامات الكلام ...

لك منى كل ودٍ وإحترام ....

مرحبا بأبو خالد ... أسعدني تجوالك البهي في هذا البوست :p عندك ليهو رقبه ونص ... وهو سؤال يتبادر لذهن المشاهد للناس وتصرفاتهم .. وهذا المستكاوي .. الذي أصبحت عادته ... تفقد الحمير في المدن والقرى .. والحكم على الناس حسب طريقة معاملتهم لها !!! يااااااااااااااخ الحمير دي مظلومه ظلم الحسن والحسين :p:p
أنتظر عودتك بتعليق على ما شاهدته أنت .. منور والله :)

عثمان جلالة

15-09-2009, 11:17 PM

عفواً أحبتي الكرام
أعتذر عن تاخري في الرد على مشاركتكم هنا ... لظروف العمل ورمضان:p وعذرا ولكن سأعود للرد على مداخلاتكم بإذن الله، عقب عطلة عيد الفطر المبارك، أعاده الله علينا وعليكم باليمن والخير والبركات.

وكل عام وأنتم بخير،،،، :):):)

ام عسجد

15-09-2009, 11:51 PM

طبعا بالمناسبة الحمار ديا كائن لازم ينحنوا له احتراما . . اولاً هو الرفيق الدائم للانسان حامل المشقة والمستأنس والصبور . . كما قدس الرومان ايضاً الحمار وكما إقترن بالنسبة لليونانين بإله الخمرة ديونيسوس .....
للحمار شهرة بعناده، غير دقيقة، لأن الحمار يستعمل حدسه الطبيعي للبقاء، فمن الصعب إرغام أو تهديد الحمار على فعل شيء ما ضد رغبته.

الدراسات العلمية القليلة جدا حوله، يظهر الحمار فيها، ذكيا، حذرا، حميميا، لعوبا، ومتعلما متحمسا، ما يجعلهم أصدقاء الأحصنة لطبيعتهم الهادئة مقابل عصبية الأخيرة، وبالتجربة، إذا وضع مهر جوار حمار وحصان، فسيتوجه للحمار بعد أن يبتعد عن أمه الفرس.

تكفي ثقة الحمار بصاحبه، لكي يكون المعين المخلص، كما تسمح بريطانيا ببقاء الحمار، فقط من بين الحيوانات، طليقا في حدائقها.

وذكر فى القرآن فى اكثر من موضوع في سورة لقمان: { وَٱقْصِدْ فِي مَشْيِكَ وَٱغْضُضْ مِن صَوْتِكَ إِنَّ أَنكَرَ ٱلأَصْوَاتِ لَصَوْتُ ٱلْحَمِيرِ ) ........
وفي قوله أيضا: كمثل الحمار يحمل أسفارا.
أيضا حمار العزيز، الذي ورد ذكره في سورة البقرة حيث اماته الله وفقا للقران. وفي موضع اخر اهدى المقوقس رسول الإسلام يعفور الذي مات في الطريق أثناء حجة الوداع.

ومن الحمير الشهيرة غير حمار العزيز عندنا حمار الحكيم وعلي ما اعتقد اشهر حمار بالسودان هو حمار كلتوم ست اللبن الذي لم ينجو من طائرات العدو وحماركم دا ياعثمان ههه