بعشومياتــــــــــــــــــــــ ....

[أشرف صلاح السعيد]

هى أسرة من أب وأم وبعشوم وعشوشة..
تحكى حوارات ومشاهدات طفل /أسرة /مجتمع وشارع..
الطفل لبنة تلقن حينا وتتوّه حينا ونتعلم منها كثير من الأحيان..
تفضلوا للمتابعة والنقاش..
موقف رقم 1


بعشوم : أبوى فى زول عايزك برة.
أبو بعشوم :أمشى قول ليهو أبوى نايم.
بعشوم : بس أنتا هندا صاحى!!
أبو بعشوم - غاضباً: يا ود سيب اللماضة وأمشى قول ليهو أبوى نايم.
بعشوم : يعنى أكضب؟ أبوى إنتا ما قلت لينا البيكضب بودو النار؟
أبو بعشوم : ده ما كضب أنا تعبان يللا أمشى قوام وسيب الغلبة.
بعشوم :يعنى التعبان لما يكضب ما حرام؟
أبو بعشوم :يا سجم ده وقت لماطتك دى؟ طير من وشى .. يا عشوشة تعالى.
عشوشة: سنو يا أبوى؟
أبو بعشوم :أمشى برة فى راجل واقف قولى ليو أبوى نايم.
عشوشة:هو إسمو منو؟
أبو بعشوم :يا شافعة مالك ومال إسمو دايرة تطلعى ليو بطاقة؟ أمشى قولى ليو القلتو ليك.
عشوشة: أبوى نسيت ، قلت لى أقول ليهو سنو؟
أبو بعشوم :يابت إنتى مخك وين؟ قولى للراجل البرة أبوى نااااااااااايم.
عشوشة:طيب.
بعشوم:عشوشة إنتى عايزة تروحى النار؟
عشوشة:لا.
أبو بعشوم :يا ولد إنتا لا ترحم ولا تخلى ربك يرحم؟ النار الإتشوشوك ، طير من قدامى بلا يخمك.
عشوشة: أبوى لييى يودونى النال ؟ أنا ما عملت حاجة.
أبو بعشوم :ما حيودوكى النار.. يللا أمشى .
وبعد برهة تعود عشوشة
عشوشة:أبوى اللاجل فاااات.
أبو بعشوم :أحسن..هو دا وقت زيارة!! ناس ما بتحس صحيح.
بعشوم من بعيد: الكضاب بودوهو النار .. الكضاب بيودوهو النار...............

مسابقة القصة:
السؤال : عرفت من القصة:
1/ عشوشة لجنة.
2/بعشوم غياظ..
3/أبو بعشوم كذاب.
4/الناس شترا ومابتعرف أوقات الزيارة المناسبة.
5/الآباء يربون أبناءهم بمعايير مزدوجة.
6/أم بعشوم عاملة أضان جلد ورايحة.
7/كل ماسبق ذكره .

[ود الجعلي]

والله بعشوم بجيب الدغيت ............يخي والله ولد لميط لماطة وقطيم قطامة


والله انا اتنرفزت خليك من ابوهو ........... الله يطولك ياروح ...... غايتو بعشوم ده لوجمبي كت خبتو باي حاجة قدامي في راسو الكبير ده ...المليان قوب وكلام فاضي..... بلا يخومو ويخم ابوهو الكضاب

[أشرف صلاح السعيد]

والله بعشوم بجيب الدغيت ............يخي والله ولد لميط لماطة وقطيم قطامة


والله انا اتنرفزت خليك من ابوهو ........... الله يطولك ياروح ...... غايتو بعشوم ده لوجمبي كت خبتو باي حاجة قدامي في راسو الكبير ده ...المليان قوب وكلام فاضي..... بلا يخومو ويخم ابوهو الكضاب

ودالجعلى سلام..
يااخوى بعشوم دا ماوليد صغير ..الذنب ذنب ابو الماعرف يربيو ولا ماكدا؟
والله بقرا فى تعليقك وميت على نفسى من الضحك..شكلك جنك وجن الشفع اللمضة..
ورمضان كريم عليك..

[نبض المشاعر رووونة]

والله بعشوم دا ولد تمااااااااااام
خلى ابوه يغلي غلي

[فراس]

اشرف ياوجيه
انا بعشوم دا كيفني جدا وكلامو كلو صاح دا ماغياظ
يعني والده بربي فيه علي الكذب ولا شنو
همسه بس
بتعرف البعشوم الحقيقي :eek:
تسلم

[أشرف صلاح السعيد]

والله بعشوم دا ولد تمااااااااااام
خلى ابوه يغلي غلي

مراحب اختنا نبض المشاعر رووونة..
بس الشافع بدعوتك الصريحة لغليان ابوه ممكن ياخد ليهو كسرة وجلدة سمحة..
خليك محضر خير وماتحرشى الولد تضيعيو..
ورمضان كريم عليك..

[أشرف صلاح السعيد]

اشرف ياوجيه
انا بعشوم دا كيفني جدا وكلامو كلو صاح دا ماغياظ
يعني والده بربي فيه علي الكذب ولا شنو
همسه بس
بتعرف البعشوم الحقيقي :eek:
تسلم

والله يافراس بتفق معاك كلام الشافع صاح رغم لماضتو..
البعشوم هو حيوان ويقال انو المرفعين او الضبع..بس اسم الولد ماجاى من مسمى الحيوان وانما من وجود الاسم حقيقة ببعض القبائل السودانية بالجنوب..
فراس يااخوى شنو القصة والتفتيش دا ؟اخوك قايلو حنيكيش ولا شنو؟

[ابوخالد]

أشرف ياهندسة ...

كبسولة واقعية جدآ ... وده شى حاصل فى السودان ...
لكن طبعآ فى السودان قصة الزيارة
ليها مواعيد وبرستيج غير مطروحة إلا فى نطاق محدود ...
وهو كتيرة من الضيف كونه يقيف فى الباب ..
والله مرات تكون جاى من السفر ... ويادوب
الشنط ما وزعتا كويس تلقا واقف ليك فى رأسك
من الصباح .... والا تكون عايز تعمل قيلولة
متعود عليها فى الغربة .... تلقا الضيف وقف ليك وراء شباك اللوضة
ويطقطق ليك فى الشباك ....
دى ما حالة تخلى أبو بعشوم يفقد أعصابو ...
ويقول إنو التعبان بيجوز ليهو الكضيب ...


بعشوم :يعنى التعبان لما يكضب ما حرام؟

[أشرف صلاح السعيد]

أشرف ياهندسة ...

كبسولة واقعية جدآ ... وده شى حاصل فى السودان ...
لكن طبعآ فى السودان قصة الزيارة
ليها مواعيد وبرستيج غير مطروحة إلا فى نطاق محدود ...
وهو كتيرة من الضيف كونه يقيف فى الباب ..
والله مرات تكون جاى من السفر ... ويادوب
الشنط ما وزعتا كويس تلقا واقف ليك فى رأسك
من الصباح .... والا تكون عايز تعمل قيلولة
متعود عليها فى الغربة .... تلقا الضيف وقف ليك وراء شباك اللوضة
ويطقطق ليك فى الشباك ....
دى ما حالة تخلى أبو بعشوم يفقد أعصابو ...
ويقول إنو التعبان بيجوز ليهو الكضيب ...


بعشوم :يعنى التعبان لما يكضب ما حرام؟

ابوخالد سلام..
والله عدم اخد مواعيد للزيارات دى مشكلة..والمشكلة الاكبر لما تناقشا يطلع ليك واحد يقول ليك: احنا شعب بسيط ومافى داعى للتعقيد..ياهو من ما قمنا الناس بتتزاور من غير سابق مواعيد وهو شنو دا عايزين تبقونا خواجات؟
بالله عليك شوف الهبل دا..اذا كان بالشرع هناك ثلاثة خلوات بتحرم على ناس البيت الواحد مايقربوها(من بعد صلاة العشاء،وقبل الفجر ووقت القيلولة بعد صلاة الظهر)..زى دا تقول ليو شنو!!!يااخى آيى انا خواجة وماتجينى الا لما تستأذن هو انا الله خلقنى ليك؟والغريب فى الامر فى ناس لما تعتذر ليها انك عندك مواعيد عشان مايجو ويؤجلة زيارتم لوقت تانى بيزعلو..يعنى مواعيد الدكتور البتلم فيها قبل اسبوعين تخليها عشان خاطر عيونم ..دا كلام دا!!
يااخى عدم الخصوصية بقت عندنا زى الشى السمح الناس بتفتخر بيو..وتلاقى الناس توشك داخلا غرفة النوم ويتبطحو كمان فى السرير عشان يتونسو..أحيّيا من الهبل بغض النظر عن نياتو..
ابوخالد مالك يااخى خليتنى انداح؟
ارجع ليك تانى..بغض النظر عن الاسباب مامفروض نربى اولادنا بمعيير مزدوجة ..الكذب هو الكذب تحت اى مبرر..ولايجوز الكذب الا بثلاثة مواضع:
1/ اصلاح ذات البين.
2/ الزوج لزوجته والعكس لزيادة الالفة بينهم "انتى احلى مرة فى الكون وانتى جمالك دا فى زيو" من هذا القبيل بس مااكتر عشان ماتعملوها فتوة وتسوقوا فيها..
3/ فى الحرب.
ويديك كل العوافى ويكفيك شر ثقالة الزوار والزائرين..

[درديري كباشي]

كبسولة معتبرة من الملتي فايتمين يا ابو صلاح


وتقول لي الدكاتره براهم يا ود الدكتور

طيب الزيارة نفسها بعد ما تحدد ليها مواعيد يعني مثلا نحن جاينكم يوم الخميس الجاي ما قي ظروف طارئة تحصل تلقي هذه المواعيد ...الولد جرح يد بقزازة او اي شئ آخر .. تصبح المسالة ليست في المواعيد المسبقة لانه هذه لا توجد لها ضمانات انما في اوقات الزيارة التي ذكرت في صورة النور كما ذكرت انت .

[أشرف صلاح السعيد]

كبسولة معتبرة من الملتي فايتمين يا ابو صلاح


وتقول لي الدكاتره براهم يا ود الدكتور

طيب الزيارة نفسها بعد ما تحدد ليها مواعيد يعني مثلا نحن جاينكم يوم الخميس الجاي ما قي ظروف طارئة تحصل تلقي هذه المواعيد ...الولد جرح يد بقزازة او اي شئ آخر .. تصبح المسالة ليست في المواعيد المسبقة لانه هذه لا توجد لها ضمانات انما في اوقات الزيارة التي ذكرت في صورة النور كما ذكرت انت .

ياابوالدر ياخى ماسمعتا بفقه الضرورة؟ للضرورة أحكام إستثنائية..يعنى المحدد معاك مواعيد ولا قدر الله الولد أصيب بتديهو سلك تفهمو الوضع وهو زاتو بتلاقيو جاك فى المستشفى ولا ماكدا؟
بس الناس ماتخلى حياتا كلها ضروريات والباب الفاتح 24 ساعة هو بيت دا ولا تكية؟
الخصوصية لابد تكون موجودة وتحترم حتى فى غير الحرمات الثلاثة ..
ياخى مرورك ماعيد ..وشنو اخبار الحجوزات؟

[ابوخالد]

ياابوالدر ياخى ماسمعتا بفقه الضرورة؟ للضرورة أحكام إستثنائية..يعنى المحدد معاك مواعيد ولا قدر الله الولد أصيب بتديهو سلك تفهمو الوضع وهو زاتو بتلاقيو جاك فى المستشفى ولا ماكدا؟
بس الناس ماتخلى حياتا كلها ضروريات والباب الفاتح 24 ساعة هو بيت دا ولا تكية؟
الخصوصية لابد تكون موجودة وتحترم حتى فى غير الحرمات الثلاثة ..
ياخى مرورك ماعيد ..وشنو اخبار الحجوزات؟



حجوزااااااااااااااااااااااااااااااااااات .....
حجوزات شنو يا أبو الشباب .....................
أنساااااااااااااا
الناس ديل إنحرفوا عديل كده ..... سهر .... ولعب سك سك ....
ورش بموية التيبار ..... على عين عينك يا تاجر ....
فى ذقاقات المحطات .....

هو بيفكر يحول للعيال مدارسهم للسودان ....
قال حجوزات قال ....
.
.
.
.
.
.
وبرضو المفكرة لقيتا فى بيتى يا أبوالدر ....
مافى عوجة تب ....

[بدر الدين احمد الطائف]

سلام لكل الموجودين وتحية خاصة حبيبنا اشرف
تعرف الحكاية دى ممكن تحصل لاى واحد مننا ونتعامل معاها بنفس الاسلوب وما بيكون عندنا اي احساس باننا بنكضب .
لكن انا عندى سوال قصة انه باب البيت يكون مفتوح ومرة الجيران وولد الجيران وبت الجيران يجوا داخلين تووش كدة عندكم ولا ما عندكم.





ام بعشوم عاملة نايمة

[خالد 000 ابقرجة]

الرائع أبو الشوش 000
جميل هذا التشريح الدقيق 000 ( فينو ) 000
تحليل انشائي كامل لمنشأتنا الاجتماعية 000
ودوما براعة التحليل 000
عندما تكون في الموقع 000
ودون توفر أدوات 000
الا أدوات مهندس متمكن يسبك لهيب الشمس ابداعه علي هدااااوة000

من تحت النضارة
بعشوم ده
لماضتو دي مااااا غريبة علي 000
بتشبه لماضة البرلوم الغلب السناير 000
وفيها ريحة صفات وراثية 000

هسي في زول قال ليك انتا كضاب ؟؟؟ :p:p:p







7/كل ماسبق ذكره .




خارج النص
بما اني الوحيد الجاوب 000
أبقي فزتا بي جائزة البوست 000
صااااااااااااااااح 000
بس أوعك تملحني زي ما أبو النور ملح المسافر والجندي في نجومية الشهر 000

[وجدي عوض الجيد]

والله عرفت منها
انك زول لزيز يا اشرف صلاح

[الملكة اسماء ( ام محمد )]

من تحت النضارة
بعشوم ده
لماضتو دي مااااا غريبة علي 000
بتشبه لماضة البرلوم الغلب السناير 000
وفيها ريحة صفات وراثية 000


:):):):):):)

[الملكة اسماء ( ام محمد )]

تسجيل حضور
بجيكم برواقة
ومقدما اجابة ابقرجة ..مكرر:)

[أشرف صلاح السعيد]

حجوزااااااااااااااااااااااااااااااااااات .....
حجوزات شنو يا أبو الشباب .....................
أنساااااااااااااا
الناس ديل إنحرفوا عديل كده ..... سهر .... ولعب سك سك ....
ورش بموية التيبار ..... على عين عينك يا تاجر ....
فى ذقاقات المحطات .....

هو بيفكر يحول للعيال مدارسهم للسودان ....
قال حجوزات قال ....
.
.
.
.
.
.
وبرضو المفكرة لقيتا فى بيتى يا أبوالدر ....
مافى عوجة تب ....

ابوخالد عوافى..
أفصح أبن فك الشمار مفصلا حتى نستبين..

[أشرف صلاح السعيد]

سلام لكل الموجودين وتحية خاصة حبيبنا اشرف
تعرف الحكاية دى ممكن تحصل لاى واحد مننا ونتعامل معاها بنفس الاسلوب وما بيكون عندنا اي احساس باننا بنكضب .
لكن انا عندى سوال قصة انه باب البيت يكون مفتوح ومرة الجيران وولد الجيران وبت الجيران يجوا داخلين تووش كدة عندكم ولا ما عندكم.





ام بعشوم عاملة نايمة

حبيبنا بدر الدين سلام..
ماانحنا شعب طيب وبسيط حتى الغلط مابيكون مع سبق الاصرار والترصد ..
والله الباب المفتوح ماعيزنو يتقفل ..بس يتخبط ويكون معاو إذن بالدخول..ممكن واحد من ناس البيت يكون عورة صغرى ولا حتى كبرى..وبعدين التوش دى مامشكلة كبيرة وبتدخل فى حق الله..
عادتنا مابتكون سمحة الا اذاإتأطرت وكان الدين ليها حدود..

[أشرف صلاح السعيد]

الرائع أبو الشوش 000
جميل هذا التشريح الدقيق 000 ( فينو ) 000
تحليل انشائي كامل لمنشأتنا الاجتماعية 000
ودوما براعة التحليل 000
عندما تكون في الموقع 000
ودون توفر أدوات 000
الا أدوات مهندس متمكن يسبك لهيب الشمس ابداعه علي هدااااوة000

من تحت النضارة
بعشوم ده
لماضتو دي مااااا غريبة علي 000
بتشبه لماضة البرلوم الغلب السناير 000
وفيها ريحة صفات وراثية 000

هسي في زول قال ليك انتا كضاب ؟؟؟ :p:p:p





خارج النص
بما اني الوحيد الجاوب 000
أبقي فزتا بي جائزة البوست 000
صااااااااااااااااح 000
بس أوعك تملحني زي ما أبو النور ملح المسافر والجندي في نجومية الشهر 000



أبو آية سلامات..
كلامك دايما فى خير وطيبة ياابن الطيب والطيبين..
لعل اللماضة لا تذهب ماوراءها من دعوة وتأصيل فكرة أو قيم إستهونا بها كثيرا..
إجابتك صحيحة بكل تأكيد والجائزة وعيك بتهديو للماقرا بين السطور..
زوغة:
انا قلت سؤال..بس دحين جبتا سيرة جائزة؟

[أشرف صلاح السعيد]

والله عرفت منها
انك زول لزيز يا اشرف صلاح

اللذيذ اخونا مجدى بشوف اللذة وكل إناء بما فيه ينضح..
رمضان كريم..

[أشرف صلاح السعيد]

تسجيل حضور
بجيكم برواقة
ومقدما اجابة ابقرجة ..مكرر:)

قبلنا الاجابة طالما اخذت الجمال من اب قرجة..

[أشرف صلاح السعيد]

بعشوميات 2..

بعشوم يلعب بالحوش مع عشوشة حجلة ويعدى أبوهم..
أبو بعشوم : ده شنو البتعمل فيوده !! تلعب لعب البنات؟ إنت ياود بت؟
بعشوم : دى هسع دى لعبة بنات ؟
أبو بعشوم : آييا لعب بنات، قال ما لعب بنات قال!
بعشوم : كيفن يعنى لعب بنات؟ وهو فى لعب للبنات ولعب للأولاد.
أبو بعشوم : لعب الأولاد الكورة مش الحجلة.
بعشوم : ابوى هسع دى لمن العب الحجلة شنو البى يحصل؟ ببقى بت؟ طيب امبارح عشوشة ما لعبت معاى كورة ؟
أبو بعشوم : يا ولد أفهم فى لعب للبنات بس وفى لعب للاولاد بس؟
أبو بعشوم : طيب يا ابوى وشليل حقت الاولاد ولا البنات؟
أبو بعشوم : بتاعت .. بتاعت آآآآآ الاولاد.
بعشوم : طيييييييب ليى امى وعشوشة لعبوها معانا يوم دااااااك؟
أبو بعشوم : يا ولد سيب اللماضة و الحجلة دى ما تلعبا تانى مفهوم ولا ما مفهوم؟
عشوشة : ابوى يعنى العب بلاى الحجلة كيف؟
أبو بعشوم : العبيها براك زى البنات.
أم بعشوم : يلا االغدا ..

سؤال القصة : ما الذى نستتدل عليه من الحكاية؟
1/ ابو بعشوم ما عندو موضوع وفاكيها فى الشفع؟
2/ للصغار يمكن اللعب حتى سن معينة وبعدين كل جنس يشوف البناسبو؟
3/ أبو بعشوم يربى اولاده بمعايير مزدوجة؟
4/ ام بعشوم اخيراً ظهرت بالقصة؟

[الملكة اسماء ( ام محمد )]

سؤال القصة : ما الذى نستتدل عليه من الحكاية؟
1/ ابو بعشوم ما عندو موضوع وفاكيها فى الشفع؟
2/ للصغار يمكن اللعب حتى سن معينة وبعدين كل جنس يشوف البناسبو؟
3/ أبو بعشوم يربى اولاده بمعايير مزدوجة؟
4/ ام بعشوم اخيراً ظهرت بالقصة؟


كل ماذُكر صحيح :)

[أشرف صلاح السعيد]

كل ماذُكر صحيح :)

هيى مانسيت الخيار دا!!
والله إجابتك نموذجية ..بس ماتعملى لى زى اب قرجة وتطمعى فى هدية..
ملكة القلوب لكى كل التحايا لمتابعتك الكريمة..شكرا لك..

[ابراهيم]

اشرف سلامات يا بركة
ياخي بعشوم دة لايوق وغياظ جنس غيظ:mad:
دة شافع مستحيل ...
شافع زي دة قابلني مرة راجعين من صلاة العيد وغشينا بعض الجيران نعيد عليهم .. اتشربك فيني يا عمو اديني خمسمية جنيه
وانا ما شايل معاي ولا خمسة قروش والشافع بقى يبكي وامو تحنسو ... وانا ما عرفت ابكي ولا اضحك ولا احنس مع امو ...
والحيرني وغايظني اكتر
كنا خمس اشخاص .. الشافع عزلني انا ...
في قلبي قلت لييو دة وقت خمسمية جنيه؟
الخوخة التقوم ليك في شلالفيك؟
دخلني مدرسة بقيت لو ماشي الحمام بشيل محفظتي معاي
انا خوفي دة يكون بعشوم زولك دة ذاتو ممثل شخصيتين:D

[أبو جودي]

والله يا اشرف بقيت مشهور وعملته ليك ،،، حبايب كتتتار ،،، ده ما حسد ،،،،، وشنو قصت البعاشيم ،،، البعشوم زمان كان بخوفونا بيه لمن كنا صغار ،،، بيقولوا لينا ما يأكلك البعشوم ،،،، أظنه يا اشرف أنت البعشوووووووووووووووووم ذاتو ،،،،

[أبو حمزة]

أخي هندسة: في بعشوم (1) وجدنا التربية غير السليمة من جانب أبي بعشوم.. فهو:
ينشئهم على (الكذب) وهذا أخطر ما في الأمر.. إذ أن المؤمن لا يكذب..وصدقني نحن كثيراً ما نكذب على الأطفال ظناً منا بأنهم لا يعوون الأمر.. لا.. وألف لا.. فهذا يأثر عليهم سلباً ..
وتنبني عليه شخصياتهم..
وتأثر على فهمهم ..
وسوف يصير من الصعب التخلُّص منه في المستقبل..
( وأخطر ما يواجه الطفل التناقض) وقديماً قيل:

لا تنهَ عن خلقٍ وتأتيَ مثلهَُ ** عارٌ عليكَ إذا فعلتَ عظيمُ

[شيخ الحارة]

رمضان كريم

راوي البعشوميات

الكذب ماسمح!!
واللجنة سمحة!!!
والحجلة لعبة بنات!!

لاكن شليل اللعبوها دي لعبوها كيف؟؟؟؟

[أشرف صلاح السعيد]

اشرف سلامات يا بركة
ياخي بعشوم دة لايوق وغياظ جنس غيظ:mad:
دة شافع مستحيل ...
شافع زي دة قابلني مرة راجعين من صلاة العيد وغشينا بعض الجيران نعيد عليهم .. اتشربك فيني يا عمو اديني خمسمية جنيه
وانا ما شايل معاي ولا خمسة قروش والشافع بقى يبكي وامو تحنسو ... وانا ما عرفت ابكي ولا اضحك ولا احنس مع امو ...
والحيرني وغايظني اكتر
كنا خمس اشخاص .. الشافع عزلني انا ...
في قلبي قلت لييو دة وقت خمسمية جنيه؟
الخوخة التقوم ليك في شلالفيك؟
دخلني مدرسة بقيت لو ماشي الحمام بشيل محفظتي معاي
انا خوفي دة يكون بعشوم زولك دة ذاتو ممثل شخصيتين:d

اخونا ابراهيم سلام ورمضان كريم عليك..
الله يديك العافية بس ماوريتنا اتخارجتا من الشافع كيف؟..
يااخى بعشومنا الهنا دا شافع ابوه زاتو عايز تربية وتوجيه ويمكن محو أمية..الشافع حيطلع مالايووق كيف..
أها العيد على الابواب كشكش جيبك والخمسمياية لو اديتا لشافع هسى مابتحلك ويمكن يحدر ليك بسببا..
هو بقينا مانعيد على الناس من هين..ههههههههههههه

[أشرف صلاح السعيد]

والله يا اشرف بقيت مشهور وعملته ليك ،،، حبايب كتتتار ،،، ده ما حسد ،،،،، وشنو قصت البعاشيم ،،، البعشوم زمان كان بخوفونا بيه لمن كنا صغار ،،، بيقولوا لينا ما يأكلك البعشوم ،،،، أظنه يا اشرف أنت البعشوووووووووووووووووم ذاتو ،،،،


عوافى حبيبنا ابوجودى..
والله الشهرا مابدورا تب..بعد شوية يقعدو يفلونى ليك..عندنا جارنا دكتور خالد الكومى راجل لذيذ جدا..فى واحد من الاعياد كنا مجموعة شباب متلمين فى بيتو بنعيد عليو ..وكنا بنتكلم عن السياسة وكدا..وفجأة قال لينا: شوفو ياشباب اوعو تخشو تقيل جوه السياسة تقوم تصدق مع واحد منكم ويبقى شى..والله الناس تنكت ليو جنس تنكيت واذا كان اتولد بسبحتو يقول ليك فلان دا زمااان ماكان بتاع طشمة "وماخفية كان أعظم" ..
اما بالنسبة لبعشوم ماهو زاتو البعبع للسلوكيات الطائشة من الكبار والغير مدروسة..
وتعرف بعد شوية حأعمل ليا جيش بعاشيم ورا الكبار يمكن ان ينصلح الحال..

[أشرف صلاح السعيد]

أخي هندسة: في بعشوم (1) وجدنا التربية غير السليمة من جانب أبي بعشوم.. فهو:
ينشئهم على (الكذب) وهذا أخطر ما في الأمر.. إذ أن المؤمن لا يكذب..وصدقني نحن كثيراً ما نكذب على الأطفال ظناً منا بأنهم لا يعوون الأمر.. لا.. وألف لا.. فهذا يأثر عليهم سلباً ..
وتنبني عليه شخصياتهم..
وتأثر على فهمهم ..
وسوف يصير من الصعب التخلُّص منه في المستقبل..
( وأخطر ما يواجه الطفل التناقض) وقديماً قيل:

لا تنهَ عن خلقٍ وتأتيَ مثلهَُ ** عارٌ عليكَ إذا فعلتَ عظيمُ

اخى أبو حمزة "والله قعدت ساعة اكتب ابو ولا ابى " عوافى وسلام..
مشكلتنا فى اول تعامل لينا مع طفل الكثير بيمد يدو فاضية للطفل عشان يغريو ويجيو يعنى كضب من قولت تيت أى منذ البدء..وقد نهى الرسول صلى الله عليه وسلم عن ذلك فهو كذب..
بالتأكيد علينا أن نربى الأطفال على مرجعية واحدة بعيدة عن التناقضات وازدواجية المعيار..

[أشرف صلاح السعيد]

رمضان كريم

راوي البعشوميات

الكذب ماسمح!!
واللجنة سمحة!!!
والحجلة لعبة بنات!!

لاكن شليل اللعبوها دي لعبوها كيف؟؟؟؟

الله اكرم ياشيخ الحارة ويجعلنا جميعا من عتقاء الشهر الفضيل..

والله كلامك معظمو سمح..بس أسألنى دبل بل تربل شليل لعبوها كيف؟؟؟

مشاققة:
انا كنت حريف فى الحجلة والله هسى قام ليا شنب وعندى عيال..

[أشرف صلاح السعيد]

بعشوميات 3..

بعشوم قاشر قشرة شديدة ببدلته العسكرية ذات النجوم الثلاث التى أهدتها له خالته علوية لما جاءت من السعودية لمناسبة زواج شقيقتها الصغرى،أما عشوشة ولا سندريلا بفستانها الأبيض المكشكش والمطرز، ولكن كل الشترة كانت بالأحذية لأن علوية نست أو تناست جلبها كهداي مكملة للشياكة، ولندع الأحذية جانباً حتى لا أجرح شعور بعشوم وأخته المصون عشوشة.
بعشوم : أبوى عليك الله إشترى لى مسدس عشان أبقى ضابط جد جد.

أبو بعشوم: هو إنتا يا ولد ماشى حفلة ولا ماشى ليك كمين؟يا ولدى مسدس شنو فى السخانة دى!

بعشوم:أبوى عليك الله..عليك الله جيب لى مسدس.

أبو بعشوم:يا ولد أجيبو ليك من وين؟ لو نفضونى ما بينزل منى قرش، وأنا زاتى ما عارف خالتك دى الهداها للبدلة دى شنو! لو جابت ليك جزمة ما كان أخير؟

أم بعشوم : ما بسألك يا راجل عاد ده كلام شنو ده، سجمى يا يمة يعنى كنا نقول للمرة معليش ما عايزين البدلة أدينا بدلا جزمة؟!

أبو بعشوم:يا زولة لا بدلة ولا جزمة ، كان أخير ما تجيب أى شى وما تشبك فينى البلوة ده.

أم بعشوم: عليكم الله شوفو الراجل ده، ده جزات المعروف، بدل ما نقول كتر خيرا الإتذكرتنا وجابت لعيالنا هدايا.

أبو بعشوم:هدايا ! هدايا شنو والله المغتربين ديل بيجيبو لينا فى الجنجخيس ساكت، إنت قايلا البدلة دى وفستان بتك ده بى كم يعنى؟تلاقيها جايباو من حراج المرحوم كان قدرك.

أم بعشوم:إن شاء الله بشلن (حليل أيام الشلن)‘ ما هدية شنو إنتا مشاركن ولا شنو؟

أبو بعشوم:دافعى كويس ، ليه ما بتدافعى ، حرم الهدايا دى لو كانت جابتا واحدة من أخواتى كان شفنا العجب وما قعتينا فى الواطة.

أم بعشوم:والله قصة ! هم أخواتك شن جيبن؟ والله مما دخلت علىّ ما شفت واحدة من أخواتك داخلا علينا وفى إيدا كيس ملح، قال أخواتى يا راجل أسكت أخير ليك وما تقلب علىّ المواجع.

أبو بعشوم:عليكم الله شوفو المرة دى، مواجع والله المواجع ما شفتها إلا لما عرستك يا نحس.

أم بعشوم:دى آخرتا يا راجل أنا نحس؟ والله ما قاعدا ليك فى البيت ده سانية وأمشى شوف ليك مرة ما نحس عشان تعجبك وتعجب أخواتك.

أبو بعشوم:قطر عجيب يودى ما يجيب، الباب يفوت جمل و لو ما كفاك نطى بالحيطة، مرة فقُر.

أم بعشوم:يلا يا أولاد أمرقو قدامى، ده ما ما جديد عليو عايز إمسخ لىّ عرس أختى.

سؤال القصة: نستفيد من هذه القصة:
1/ حقو المغتربين ما يشيلو هدايا زيادة وزن وتعب على الفاضى(سعد قشرة مالو أبا؟).
2/الآباء ما يتشاكلو قدام اولادم.
3/نسيب الهجوم الغير مبرر على الغير.
4/لازم يجيبو مسدس لبعشوم .
5/ أبو بعشوم عمل الفلم ده عشان يزوغ من كشف العرس.

[أبو حمزة]

2/الآباء ما يتشاكلو قدام اولادم.


أخي أشرف الرائع..الفقرة أعلاه من أكثر النقاط أهمية:إذ أن ذلك يُأثر في البنية التحتية للعيال.. وله كبير الأثر في جعل الطفل ضعيف الشخصية.. أو عدواني.. أوجبان..ولا يستطيع أن يعتمد على نفسه.. والمشكلة المصاحبة مباشرة هي: التبوُّل اللاإرادي..

[أشرف صلاح السعيد]

2/الآباء ما يتشاكلو قدام اولادم.


أخي أشرف الرائع..الفقرة أعلاه من أكثر النقاط أهمية:إذ أن ذلك يُأثر في البنية التحتية للعيال.. وله كبير الأثر في جعل الطفل ضعيف الشخصية.. أو عدواني.. أوجبان..ولا يستطيع أن يعتمد على نفسه.. والمشكلة المصاحبة مباشرة هي: التبوُّل اللاإرادي..

عوافى اخى ابوحمزة..
على كدا نص شفع الزمن ديل عاملين شغل تمام لناس التنجيد..
مروراتك تزيد وتكمل كل المواضيع..
كن كما انت فطرى الميول وجميل السريرة..

[أشرف صلاح السعيد]

بعشوميات 4..

دخل ابو بعشوم البيت ووجده مكتظا باللافتات.." إنتخبوا بعشوم خير من يمثلكم"..:لا للحكم الشمولى وأحادية القطب".." نعم للديمقراطية".." التغيير يبدأ معى فصوتوا لى"..
أها زولك ضرب لخمة وتملكه الاندهاش "هو شنو الحاصل؟"..

ابو بعشوم : ياولية دا شنو دا!! دا شنو المعلق فى البيت دا!!

ام بعشوم : أسأل ولدك أهندا قدامك..

ابو بعشوم : ولدى!! أسأل الشافع المامرق من بطن الواطة دا!! طيب..وانتا ياشافع البلا دا شنو دا؟

بعشوم : دى انتخابات منزلية..عايزين تداول للسلطة فى بيتنا مش بيتنا برضو دولة ساكناها جماعة؟

ابو بعشوم : انتخابات آآ..وإن شاء الله منو المرشح نفسو؟ أنتا ولا امك ولا تكون ام سنينات مكسرة دى "يقصد عشوشة"؟

بعشوم : انا..والعايز يرشح نفسو لرئاسة البيت اليترشح ..لسة باب الترشيحات مفتوح..

ابو بعشوم : ماشاء الله ..والله فيك الخير ماعملتها استفتاء واديتنا شرف الترشيح..

عشوشة : هو التلشيح دا سنو؟

ابو بعشوم : رد على المواطنة دى..يمكن هى كمان تتلشح..

بعشوم : انتى ياعشوشة بليدة كدا مالك..انا ماوريتك انتى وامى قبيل الترشيح دا شنو؟

عشوشة : لكن انا ما نسيت..انا عايزا اتلشح..

بعشوم : تترشحى شنو انتى كمان!! انتى لسة تحت السن القانونية..

اب بعشوم "لازال ماسكا اعصابه ومسايرا لبعشوم" : والسن القانونية دى ياسيادة المرشح واللجنة الانتخابية ياربى كم؟

بعشوم : اقلاها عشرة سنين..

ابو بعشوم : ماشاء الله ..يعنى عملتا انتخابات وعملت شروط انتخابية وعملتا دعاية ..الناقص شنو ماعملتو ياربى؟؟

بعشوم : باقى المناظرة مع المرشحين التانيين..

ابو بعشوم : ومنو المرشحين الباقين غيرك؟

بعشوم : امى قالت مافاضية من شغل البيت..وعشوشة ليها حق التصويت بس..يعنى بقيت انتا..

ابو بعشوم : وانا لو ماداير اترشح العمل كيف؟

بعشوم : أفوز أنا بالتزكية..

ابو بعشوم : النفرض مثلا مثلا انتا بقيت رئيس البيت..حتمول البيت ..قصدى الدولة من وين؟

بعشوم : من الضرائب ومنك..

ابو بعشوم : من الضرائب ومنى..يعنى انتا الرئيس وانا هجليج..طيب والضرائب دى من منو؟

بعشوم : من الناس البجونا زيارات ..هم بس يجو يتبطحو ويكملو شايينا واكلنا ويفرتقو!!

ام بعشوم : سجمى ياولدى انتا داير تفضحنا مع الضيوف؟

بعشوم : هو البجينا دا مش جاى عشان حاجة ولا عشان يتونس؟ اكان عايز حاجة يدفع ليها..واكان عايز يتونس يتخيل نفسو جاى نادى ويدفع حق الاشتراك..

ابو بعشوم : كلامك سمح..وانتا ياسيادة الرئيس حتعمل شنو للشعب والدولة؟

بعشوم : انا بخت السياسة العامة للدولة ..هسى قول ليا انتا مترشح ولا لا؟

ابو بعشوم : مترشح..

وتجلس العائلة وتبدأ عملية الانتخابات السرية ..ثم تأتى عملية الفرز..

ابو بعشوم : الورقة الاولى ابو بعشوم..الورقة الثانية بعشوم..الورقة الثالثة مرسوم خطين "يعنى بعشوم لانو عشوشة مابتعرف تكتب ولا تقرا فهموها خط ابو بعشوم خطين بعشوم.. محاولة لتزوير الانتخابات من قبل ابو بعشوم لانو الخط اسهل من خطين لعشوشة البتمسك القلم فى تلاتلا "..الورقة الرابعة بعشوم..

بعشوم : انا الفايز ..انا الفايز وى وا انا الفايز وى وا انا الفايز..

ويستقيظ ابو بعشوم من نومه مفزوعا..والعرق قد أغرق ملابسه..

ابو بعشوم : ياام بعشوم .. ياام بعشوم..

ام بعشوم : فى شنو ياراجل؟ ومالك عرقان قدر دا؟ اكان مالكهربا فى والمروحة شغالا!!

ابو بعشوم : خلينى من عرقى هسع..الود بعشوم وينو؟

ام بعشوم : طلع مع خالو قالو ماشين مقر الحزب عشان الانتخابات..

ابو بعشوم : الانتخابات..

ويخرج ابو بعشوم مسرعا الى مقر الحزب حتى لا يتحقق حلمه ويجد بعشوما يوما ما رئيسا للبيت..

[أبو حمزة]

والله جمال حقيقي .. تخيل .. أنا في آخر عمري بقيت أهبل .. غلبني أقف من الضحك .. يعني نائب المدير كان أمامي .. اضطررت لأحكي له (السالفة) .. الله يجازي محنك يا هندسة..!!

عودة للموضوع : إن أكثر ما شدني هو:
عبارة (ابو بعشوم : من الضرائب ومنى..يعنى انتا الرئيس وانا هجليج..طيب والضرائب دى من منو؟

بعشوم : من الناس البجونا زيارات ..هم بس يجو يتبطحو ويكملو شايينا واكلنا ويفرتقو!!)
.. حقيقة والله مرات ناس يجوك في مواعيد الغداء .. وواحدين يجلسوا لحين العشاء.. طيب ماذا نسمي هذا..!!

[أشرف صلاح السعيد]

والله جمال حقيقي .. تخيل .. أنا في آخر عمري بقيت أهبل .. غلبني أقف من الضحك .. يعني نائب المدير كان أمامي .. اضطررت لأحكي له (السالفة) .. الله يجازي محنك يا هندسة..!!

عودة للموضوع : إن أكثر ما شدني هو:
عبارة (ابو بعشوم : من الضرائب ومنى..يعنى انتا الرئيس وانا هجليج..طيب والضرائب دى من منو؟

بعشوم : من الناس البجونا زيارات ..هم بس يجو يتبطحو ويكملو شايينا واكلنا ويفرتقو!!)
.. حقيقة والله مرات ناس يجوك في مواعيد الغداء .. وواحدين يجلسوا لحين العشاء.. طيب ماذا نسمي هذا..!!

حاشاك من الهبل حبيبنا ابوحمزة..
نسميهم اجلاف ..ماعندهم زوق..تنابلة..زى ماعايز..بس والله فى ناس كل مايقولوا ماشين تقعد تحنسم ولو باتو بيكونوا زى النسمة..
جد متابعاتك تشرفنى اخى ابو حمزة ويديك كل العوافى..

[ام نوران]

اشرف يارائع,,,,,والله جد مباااااااااااااااااااالغه وماعرفت اقتبس ياتو حته ,,موتنا ضحك ,,,وبعشومياك اكتر من رائعه,,,
تخريمه:(يعني مالقيت غير اسم بعشوم ده:p وكمان معاهو عشوشه:eek:,,,كملت:D

[أشرف صلاح السعيد]

اشرف يارائع,,,,,والله جد مباااااااااااااااااااالغه وماعرفت اقتبس ياتو حته ,,موتنا ضحك ,,,وبعشومياك اكتر من رائعه,,,
تخريمه:(يعني مالقيت غير اسم بعشوم ده:p وكمان معاهو عشوشه:eek:,,,كملت:d

عوافى اختى ام نوران..
لكم اسعدنى ان القاك بين بعشوماتى فشكرا لحضورك الكريم..
لم لا نضحك ونستمتع فالحياة اجمل من ان نضيعها بين الهموم والعبوس..ولعل بين الضحكات نقرأ مايفيد..
بعشوم ماشين ولكن شناتو هنا ضد الشين فلا يلين الحديد الا الحديد..
وعشوشة طويرة غلبانة لا حول لها ولا قوة ولكن لها الحق بالحياة..
فكان بعشوم وعشوشة..

[عزيز عيسى]

وبعد برهة تعود عشوشة
عشوشة:أبوى اللاجل فاااات.
أبو بعشوم :أحسن..هو دا وقت زيارة!! ناس ما بتحس صحيح.
بعشوم من بعيد: الكضاب بودوهو النار .. الكضاب بيودوهو النار...............

1/ عشوشة لجنة.


الأخ أشرف صاحب الكتابة الأنيقة والمواضيع الشيقة التي
تعكس الصورة الحقيقية لحال مجتمعنا السوداني..

عجبني صاحبك (الكلكة) بعشوم ومفروض الأطفال السودانيين
كلهم يكونوا شجعان مثل بعشوم يسأل أي سؤال يجول بخاطره
ويريد أن يعرف كل صغيرة وكبيرة والأباء يردوا بكل صدق تماما
كما يفعل الأباء الخواجات مع أطفالهم.

أما صديقتنا عشوشة (بالمناسبة عندنا هنا عضوة قديمة إسمها
عشوشة غايتو لو ظهرت بتوريك المكشن بلا بصلة).. هههه قلت
عشوشة لجنة؟ :) :) :D :eek:
أعتقد عشوشة (أخت البطل بعشوم) بتكون قالت للضيف
أبوي قال ليك أنا نائم.. والضيف زعل وفات.

الصراحة مع الطفل مهمة للغاية لأنها بتبعث فيه الثقة بالنفس
وبتشجعه على أن لا يكون كذاب في تعامله مع الآخرين.

عندنا هنا في أمريكا الأطفال كلهم بعاشيم يسألوك أسئلة منكر
ونكير ما يسؤلوك ليها.. ولازم تكون معاهم صريح وتجاوبهم على
قدر أسئلتهم ولو حاولت تتذاكي وتكذب عليهم بيفهموها طايرة
وما حيثقوا فيك تاني أبدا..

شكرا على طرح هذه المواضيع القيمة وزرع الإبتسامة في نفوسنا
وننتظر منك المزيد.

[أشرف صلاح السعيد]

الأخ أشرف صاحب الكتابة الأنيقة والمواضيع الشيقة التي
تعكس الصورة الحقيقية لحال مجتمعنا السوداني..

عجبني صاحبك (الكلكة) بعشوم ومفروض الأطفال السودانيين
كلهم يكونوا شجعان مثل بعشوم يسأل أي سؤال يجول بخاطره
ويريد أن يعرف كل صغيرة وكبيرة والأباء يردوا بكل صدق تماما
كما يفعل الأباء الخواجات مع أطفالهم.

أما صديقتنا عشوشة (بالمناسبة عندنا هنا عضوة قديمة إسمها
عشوشة غايتو لو ظهرت بتوريك المكشن بلا بصلة).. هههه قلت
عشوشة لجنة؟ :) :) :d :eek:
أعتقد عشوشة (أخت البطل بعشوم) بتكون قالت للضيف
أبوي قال ليك أنا نائم.. والضيف زعل وفات.

الصراحة مع الطفل مهمة للغاية لأنها بتبعث فيه الثقة بالنفس
وبتشجعه على أن لا يكون كذاب في تعامله مع الآخرين.

عندنا هنا في أمريكا الأطفال كلهم بعاشيم يسألوك أسئلة منكر
ونكير ما يسؤلوك ليها.. ولازم تكون معاهم صريح وتجاوبهم على
قدر أسئلتهم ولو حاولت تتذاكي وتكذب عليهم بيفهموها طايرة
وما حيثقوا فيك تاني أبدا..

شكرا على طرح هذه المواضيع القيمة وزرع الإبتسامة في نفوسنا
وننتظر منك المزيد.

اخى عزيز رمضان كريم..
اسعدنى دخولك الى البعشوميات..
تعرف انو احترام عقل الطفل هى مفروض بتاعتنا ولكن ماذا نفعل فى الشرقية وعنترياتها المكذوبة..الرسول صلى الله عليه وسلم كان يخاطب الاطفال بكنيات الرجال ويعاملهم فكريا كالكبار ويمازحهم بقدر سنهم..
امسينا نخشى اسئلة الاطفال لان القصور بنا لا بأسئلتهم..نقمعهم ونضربهم ونزجرهم لاتفه الاسباب والاسئلة..
بابا احنا جينا كيف؟ اصلو ماما بلعت ليها حبة وانتا قمت جيت..يااخى معقول..
بابا الله وين؟ ماتسأل أسئلة زى دى عشان مايودوك النار..
تعال يابابا هاك "اليد فاضية" ويجى الطفل ومايلاقى شى واول بذرة كذب تكون اتزرعت..
شكرا ليك ولمداخلتك المثرية ويديك كل العوافى..

بالنسبة لاختنا عشوشة والله الاسم جا كدا ولو فيها تكشن بلابصل بعمل تغيير تكتيكى فورى وبنغير شهادة الميلاد لعشوشة الصغيرة..مالى ومال الدقو وسرقو عجلتو..

[أبو حمزة]

عشوشة .. وود أبرق .. هي لا..! بعشوم..
هذا الجمال يجب ألَّا يقف.. سلمتَ أخي أشرف وأنت تسعدنا بالكتابات الرائعة ..
وتزرع فينا الأمل بدون رتوش . . وتسقينا الهنأ و نحن في صيام.. سكر بالحلال..
أحببناك وفي قلولبنا أسكناك..فزدنا ولا تنظر للخلف ..اكتب فنحن أدمناك..

[أشرف صلاح السعيد]

عشوشة .. وود أبرق .. هي لا..! بعشوم..
هذا الجمال يجب ألَّا يقف.. سلمتَ أخي أشرف وأنت تسعدنا بالكتابات الرائعة ..
وتزرع فينا الأمل بدون رتوش . . وتسقينا الهنأ و نحن في صيام.. سكر بالحلال..
أحببناك وفي قلولبنا أسكناك..فزدنا ولا تنظر للخلف ..اكتب فنحن أدمناك..

والله ياأباحمزة بما إنك صارحتنى عديل كدا أحب أوريك رغم ارتباطى القلوب عند بعضيها "على أول أولاد بمبة"..
تسلم يارائع ولكن يااخوى فى رمضان دا وعطشو خلى السكسكة..
بس عشانك هاك البعشومية الجاية دى..

[أشرف صلاح السعيد]

بعشوميات 5..
قال ليك الدنيا صيام والعطش ألف والشمش وليست الشمس نسبة للحرورية الشديدةلأنو لو شمس كانت بتكون الحرورية السديدة زى حكومتنا الرسيدة وليس الرشيدة"هووى وقفونى رمضان طلع الراس"..نرجع لبعشومياتنا..كنا وين؟ هو احنا لسة كتبنا شى..آيا الشمش نشفت الحلاقيم زى أختا الإنقاذ وبعشوم بيرشرش فى الحوش وأبوه يجى نابل "ماكايس للضل والبراد عليك أمان الله فى الفطر يتقدل ويتضرع كأنو ماعندو بيت وعيال""..

بعشوم : يا عشوشة ابعدى من قدامى والله برشك وبعدين تتوسخى انا ماغرضى..

عشوشة : لشنى ..لشنى "وهى تدور ولا فاتن حمامة فى زمانا"..

ابو بعشوم : يابهم ياتيس ياتعيس"على قول منعم" عايز تعمل لاختك سحاوى؟

بعشوم : ماتشوفا هى انا كل ماابعد منها تجى تقيف قدام الخرطوش..انا اعمل ليها شنو ..انا ماكلمتها قبيل..

ابوبعشوم : الخرطوش اليرصرصوك بيو "يرصرصرو كيف هو بعشوم دا لستك؟"..وبعدين فتحت الموية الاربع وعشرين ساعة دى زاتا ماقدت جيبى قد..امشى اقفل الخرطوش دا قوام ياحيوان..

بعشوم : لكن ياابوى امى قالت ليا رش الحوش عشان تطلع المراتب وتفرش العناقريب لانو ..

ابو بعشوم -مقاطعا : هو شنو ولا ولا ولا ولا ولا انتى ياشافع راديو؟ قلت ليك اقفل الزفت ..يلا طير اقفلو..شافع خشمو التقول محلوج مابيعرف يسكت( كلو)2 ..

عشوشة : ابو ملحوج معناتا سنو؟

ابوبعشوم : انتى كمان ياام نص لسان الناقصك الساعة دى و أسئلتك منو؟

وفى هذا الاثناء تأتى أم بعشوم حاملة مرتبة من الداخل لتضعها على احد العناقريب بالحوش..

ام بعشوم : يابعشوم ليه مارشيت الحوش كلو؟

بعشوم : ما ابوى حمانى وقال ليا اقفل الخرطوش..وماخلانى اتم كلامى كمان واوريو انك قلت ليا شنو..

عشوشة : آيا ياامى وساكلو كمان عسان بلسلسنى..إنتى ياامى ملحوج معناها سنو؟

ام بعشوم : انتى كدى اصبرى انا هسع مافاضية ليك..ياابوبعشوم ليه حميت الولد يرشرش الحوش؟

ابو بعشوم : والله دا الفضل!!ماتجى تشدينى من اضانى وانتى بتسألينى وبتحققى معاى!!كدا مزااااج "يكون بيعمل دعاية شاى؟"..مايرشرش هو هاميكم شنو مالفاتورة بيدفعا حمار الشيل أب دبرة "على قول جلالة"..

ام بعشوم : هايى ياراجل قول بسم الله مالك هايج فينا؟احنا غرضنا نريحك..

ابوبعشوم : تريحونى بفاتورة موية اطول من ولدك الكريه دا لو باعوهو تمنو مابيسددا..

عشوشة : بيعو يا ابوى بيعو وجيب ليا بدالو علوسة العب بيها عسان هو مابيلعب معاى كتيل..

ام بعشوم : انتى يابت اتكتمى وخلى الكبار يعرفو ينضمو ..دا شنو الشافعة الناطا لينا فى حلوقنا دى؟..خلاص طيب خش جوا وارقد فى الحر..

ابوبعشوم : ليه فى الحر والمروحة وينا ؟

عشوشة : الكلهبا قااااطعة من قبييييييل..

ابوبعشوم : يابعشوم امشى شغل الماسورة ورش الحوش دا قوام..

بعشوم : ماماشى..مرة رش ومرة ماترش وكمان بيشكل..

ابو بعشوم : ياابن الجزمة القديمة نلاقيها منك ولا من ناس الكهربا والحكومة ..امشى رش رشاش يفرمك ويقددك يخليك زى المصفى..قوم غور افتح الماسورة..

سؤال القصة:
الآذان بتاع المغرب باقى ليو كم؟

[درديري كباشي]

غايتو يا اشرف بعشوم وعشوشة ديل لذيذين يستاهلو العض

انا بقيت اتخيل شكلهم بعشوم نوع الشفع العندو كريشة صغيرة ديك اسمها التمبله تلاقيها طالعة من تحت الفنيلة المقددة ورجليه مرسومة بالخرط بسبب السوائل والسيول البيتعرض ليها ..

اما عشوشة مضفرة شعرها ضفيرتين ما موزونات وشعرها شبه منكش .. وفستانها ما موزن من جنبه قصير وجمبة ثانية طويل ..

لو دي مواصفاتهم .. انا بقول ليك الجماعة ديل لا قوني

[أشرف صلاح السعيد]

غايتو يا اشرف بعشوم وعشوشة ديل لذيذين يستاهلو العض

انا بقيت اتخيل شكلهم بعشوم نوع الشفع العندو كريشة صغيرة ديك اسمها التمبله تلاقيها طالعة من تحت الفنيلة المقددة ورجليه مرسومة بالخرط بسبب السوائل والسيول البيتعرض ليها ..

اما عشوشة مضفرة شعرها ضفيرتين ما موزونات وشعرها شبه منكش .. وفستانها ما موزن من جنبه قصير وجمبة ثانية طويل ..

لو دي مواصفاتهم .. انا بقول ليك الجماعة ديل لا قوني

تعرف ياابوالدر تكتب توجع لينا بطونا من الضحك وعقولنا من حاجات تانية حميانى..
تعلق نفس الشى يازول اختانى قبل الفطور انا ماعندى حيل ليك هسى..
بالله الشافع اب تنبلة دا هو حوام كدا؟ والعشوشة ياها زاتا بس مالك ماجبتا سيرة نخرينا؟

[أشرف صلاح السعيد]

بعشوميات 6..


ام بعشوم : ياراجل هسع دى العمل كيف؟ العيد دا على الابواب والشفع ديل ياكافى البلا لا دلقانة لا شدة ماجبناها ليهم..

ابو بعشوم : ياولية عيد !!عيد شنو؟ هو إحنا ديون رمضان ماحليناها عايزانى اخش فى متاهات العيد..

ام بعشوم : متاهات شنو ياراجل؟ مالعيد دا لازم مقاضيو تتجاب..هو ياكافى البلا لا كعك لا خبيز ولا هديمات للعيال!!إتصرف غايتو مع عيالك ديل إنت مخيّر معاهم..لكن الخبيز اصلو مابتنازل عنو..انتا داير الناس ياكلو وشى؟ووب على عايز تبقينا معرة فى الحلة؟..

بعشوم : والله يابا ناس حاج النعيم ودو ليك كترت صوانى للفرن..كتار كترة..ولا ناس عم ياسين والله انا براى شيلونى صينتين للفرن غير اولادم الخمسة..

ابو بعشوم : هااى اسمعو ..انا لاعندى ليكم قروش لخبيز ولا لهدوم..وانتا ياشافع البلا البحشرك فى كلام الكبار دا شنو؟سد بوزك الكريه دا ..عايز تولعا.هو من غيرك شبك امك دى ماقادرين عليها..

بعشوم : ياابوى هسع دى انا قلت شنو؟ انتو بس فلاحتكم فينى انا..انا هسع سويت شنو؟

ام بعشوم : ياراجل ماتطلع حرتك فى الولد..كدى هسى الخبيز دا كيف؟

ابو بعشوم : يامرة انتى حيطة؟ مابتفهمى ؟ ماعندى قروووووش..ماعندى ليكم قروووش..اغنيها ليك؟..

عشوشة : ابوى انا عندى قلوش اديك ليها تشتلى لينا بيها خبيس؟..

ابو بعشوم : انتى ياام لجنة قروش شنو العندك؟ لو باعوك كلك مابتجيبى جنيه من بتاع زمان..

ام بعشوم : ياراجل هاااى ماتتزاوغ ليا من الكلام مع الشفع..قوم اتصرف جيب ليك قروش وماتفضحنا مع خلق الله..

ابو بعشوم : اقوم اتصرف آآآ..ليه قالو ليك مدير بنك الخرطوم مناسبنى؟ اتصرف كيف يعنى؟ انا متسلف من طوب الارض..اجيب ليكم قروش من وين؟..

ام بعشوم : وقت ماعندك لينا دبارة انا بسوق الاولاد وبمشى اعيد عند ناس ابوى..البخلينى فى بطن بيتك ولا خبيزاية فيو شنو؟ الامشى انستر فى بيت ناس ابوى..

ابو بعشوم : طيرى طيارة التخمك..كدا زاتو احسن الواحد يرتاح من شبكتك وصداعك كل ساعة دايرا ودايرا هو شنو قالو ليك عليا بنك؟..امشى قشة ماتعتر ليك..

ام بعشوم : ارحكم ياعيال نخلى ليو البيت يسرح ويمرح فيو..

بعشوم : يمة لكن نمشى ناس جدى وماعندنا هدوم للعيد؟

ام بعشوم : قسمتكم يااولادى ..يتمى وابوكم حى..

ابو بعشوم : التتيتمى انتى يالملعونة "استغفر الله" ..غورى قبل مااقوم عليك انتفك تنتيف..

وتمضى ام بعشوم وصغارها الى بيت ابيها..من الجانى؟ الاب؟ ام الظروف؟ ام التمساح البتقدل فى الاسواق وكل الطرقات؟ام الحكومة المشغولة بالاتفاقيات؟ام هل نحن نحمل انفسنا بالاعياد فوق ما نتحمل؟..

[ابوخالد]

اخونا ابراهيم سلام ورمضان كريم عليك..
الله يديك العافية بس ماوريتنا اتخارجتا من الشافع كيف؟..
يااخى بعشومنا الهنا دا شافع ابوه زاتو عايز تربية وتوجيه ويمكن محو أمية..الشافع حيطلع مالايووق كيف..
أها العيد على الابواب كشكش جيبك والخمسمياية لو اديتا لشافع هسى مابتحلك ويمكن يحدر ليك بسببا..
هو بقينا مانعيد على الناس من هين..ههههههههههههه


ايوة ياصاحب البعشوميات .....

طيب ما تقول كده من زمان .... أبن .. أفصح ...

هروب العيد من العيدية .... والله دى جديدة ....

ووقعت لى ياددددددددددددددددوب ...

أصلوا البيسوق ليهو رقشة فى الزمن ده

بتعلموا مسك اليد .... ونكران المعرفة .... جارك كان

ركب معاك تعمل منو رائح ....

[أشرف صلاح السعيد]

حبيبنا ابوخالد مبارك عليك العيد وعلى الاسرة الكريمة..
طوااالى لقيت ليك سبب لسفرتى من الرياض..
.وبعدين جارى البيركب الركشة دا كان حالى احسن منو ماكان زاملنى فى الخط بركشة..
وبمناسبة العيدية عليك امان الله بالمدينة فى كترة شفع سيبم ساااى..
ليك وحشة ياابوخالد والصوم مشى تانى اشاكلك كيف ماعارف..
يديك كل العوافى وكالعادة المرة الثانية احلى ياجامع الاحباب..

[أبو حمزة]

طبعاً .. أنا لا تعليق..!! فالفات جمالوا لا يعاد..!!

ولكن خوفي من الجاااي..! رمضان عكس لنا صورة إبداعاتك رغم العطش والجوع والفلس..

طيب أتانا الفطر.. النشوف سفرياتك ورحلة أهل البيت ( بيت بعشوم)* يا رائع بمعنى الكلمة..

وطبعاً الشوق حلَّق بينا .. وسرح بخيالنا لأبعد من مشاكل الأطفال ..وضيق الحال..

كل مناي أعرف جد بعشوم ماذا سوف يعمل.. ( تعال بسرعة قبل مواعيد الشاي)..!! لأنو خايفين من الخبيز والكعك..

همسة: عيد سعيد.. ومنانا نشوفك..!!

[أشرف صلاح السعيد]

طبعاً .. أنا لا تعليق..!! فالفات جمالوا لا يعاد..!!

ولكن خوفي من الجاااي..! رمضان عكس لنا صورة إبداعاتك رغم العطش والجوع والفلس..

طيب أتانا الفطر.. النشوف سفرياتك ورحلة أهل البيت ( بيت بعشوم)* يا رائع بمعنى الكلمة..

وطبعاً الشوق حلَّق بينا .. وسرح بخيالنا لأبعد من مشاكل الأطفال ..وضيق الحال..

كل مناي أعرف جد بعشوم ماذا سوف يعمل.. ( تعال بسرعة قبل مواعيد الشاي)..!! لأنو خايفين من الخبيز والكعك..

همسة: عيد سعيد.. ومنانا نشوفك..!!


الحانى كلما وإحساسا حبيبنا ابوحمزة كل الاعوام انت والاسرة الكريمة بكل الخيرات والعوافى والسعادات..
يااخى كلامك دا بيخوفنى اكتب تانى لأجارى روعة التوقع فيك وانت ابواللماحية وضليع اللغة..
الله يسترنى معاك ومع كل من يجيبا وهى طايرة وراكة"أى الفكرة"..
إيه رأيك تدينى خط عريض للبعشوميات القادمة؟ولا تهم البنقدر عليو بنسوى ومابنضحى لا ببعشوم ولا بأبو رغم تقفيلتو..
كل عام وانت سمح ونظيف وسعيد وربنا يحقق كل الأحلام مع أم حمزة ومايأتى من غرسكم الطيب..
متين انت فاضى وبنشاقق فريقكم..

[محمد عبد الله عبدالقادر]

بعشوميات 2..

بعشوم يلعب بالحوش مع عشوشة حجلة ويعدى أبوهم..
أبو بعشوم : ده شنو البتعمل فيوده !! تلعب لعب البنات؟ إنت ياود بت؟
بعشوم : دى هسع دى لعبة بنات ؟
أبو بعشوم : آييا لعب بنات، قال ما لعب بنات قال!
بعشوم : كيفن يعنى لعب بنات؟ وهو فى لعب للبنات ولعب للأولاد.
أبو بعشوم : لعب الأولاد الكورة مش الحجلة.
بعشوم : ابوى هسع دى لمن العب الحجلة شنو البى يحصل؟ ببقى بت؟ طيب امبارح عشوشة ما لعبت معاى كورة ؟
أبو بعشوم : يا ولد أفهم فى لعب للبنات بس وفى لعب للاولاد بس؟
أبو بعشوم : طيب يا ابوى وشليل حقت الاولاد ولا البنات؟
أبو بعشوم : بتاعت .. بتاعت آآآآآ الاولاد.
بعشوم : طيييييييب ليى امى وعشوشة لعبوها معانا يوم دااااااك؟
أبو بعشوم : يا ولد سيب اللماضة و الحجلة دى ما تلعبا تانى مفهوم ولا ما مفهوم؟
عشوشة : ابوى يعنى العب بلاى الحجلة كيف؟
أبو بعشوم : العبيها براك زى البنات.
أم بعشوم : يلا االغدا ..

سؤال القصة : ما الذى نستتدل عليه من الحكاية؟
1/ ابو بعشوم ما عندو موضوع وفاكيها فى الشفع؟
2/ للصغار يمكن اللعب حتى سن معينة وبعدين كل جنس يشوف البناسبو؟
3/ أبو بعشوم يربى اولاده بمعايير مزدوجة؟
4/ ام بعشوم اخيراً ظهرت بالقصة؟


ابو صلاح سلامات
الظاهر انا جيت متاخر شديد

الاهل خلو الاولاد يلعبو في الشمس في عزززززززز الضهريه والناريه ديك

[أشرف صلاح السعيد]

اخى محمد كل عام وانت والاهل بخير وصحة وسعادة..
يااخى الناس ديل ماعندهم نيمة كااربة انت قايل النيمة دى بس الا فى النفاج؟
وبعدين انت من زمن الغدا الساعة اتنين ولا تلاتا..يااخى الناس بقت تتغدا خمسة وستة مسا دا لو اتغدو..
لك التحية وشكرا لمرورك اللذيذ..

[محمد عبد الله عبدالقادر]

بعشوميات 3..

بعشوم قاشر قشرة شديدة ببدلته العسكرية ذات النجوم الثلاث التى أهدتها له خالته علوية لما جاءت من السعودية لمناسبة زواج شقيقتها الصغرى،أما عشوشة ولا سندريلا بفستانها الأبيض المكشكش والمطرز، ولكن كل الشترة كانت بالأحذية لأن علوية نست أو تناست جلبها كهداي مكملة للشياكة، ولندع الأحذية جانباً حتى لا أجرح شعور بعشوم وأخته المصون عشوشة.
بعشوم : أبوى عليك الله إشترى لى مسدس عشان أبقى ضابط جد جد.

أبو بعشوم: هو إنتا يا ولد ماشى حفلة ولا ماشى ليك كمين؟يا ولدى مسدس شنو فى السخانة دى!

بعشوم:أبوى عليك الله..عليك الله جيب لى مسدس.

أبو بعشوم:يا ولد أجيبو ليك من وين؟ لو نفضونى ما بينزل منى قرش، وأنا زاتى ما عارف خالتك دى الهداها للبدلة دى شنو! لو جابت ليك جزمة ما كان أخير؟

أم بعشوم : ما بسألك يا راجل عاد ده كلام شنو ده، سجمى يا يمة يعنى كنا نقول للمرة معليش ما عايزين البدلة أدينا بدلا جزمة؟!

أبو بعشوم:يا زولة لا بدلة ولا جزمة ، كان أخير ما تجيب أى شى وما تشبك فينى البلوة ده.

أم بعشوم: عليكم الله شوفو الراجل ده، ده جزات المعروف، بدل ما نقول كتر خيرا الإتذكرتنا وجابت لعيالنا هدايا.

أبو بعشوم:هدايا ! هدايا شنو والله المغتربين ديل بيجيبو لينا فى الجنجخيس ساكت، إنت قايلا البدلة دى وفستان بتك ده بى كم يعنى؟تلاقيها جايباو من حراج المرحوم كان قدرك.

أم بعشوم:إن شاء الله بشلن (حليل أيام الشلن)‘ ما هدية شنو إنتا مشاركن ولا شنو؟

أبو بعشوم:دافعى كويس ، ليه ما بتدافعى ، حرم الهدايا دى لو كانت جابتا واحدة من أخواتى كان شفنا العجب وما قعتينا فى الواطة.

أم بعشوم:والله قصة ! هم أخواتك شن جيبن؟ والله مما دخلت علىّ ما شفت واحدة من أخواتك داخلا علينا وفى إيدا كيس ملح، قال أخواتى يا راجل أسكت أخير ليك وما تقلب علىّ المواجع.

أبو بعشوم:عليكم الله شوفو المرة دى، مواجع والله المواجع ما شفتها إلا لما عرستك يا نحس.

أم بعشوم:دى آخرتا يا راجل أنا نحس؟ والله ما قاعدا ليك فى البيت ده سانية وأمشى شوف ليك مرة ما نحس عشان تعجبك وتعجب أخواتك.

أبو بعشوم:قطر عجيب يودى ما يجيب، الباب يفوت جمل و لو ما كفاك نطى بالحيطة، مرة فقُر.

أم بعشوم:يلا يا أولاد أمرقو قدامى، ده ما ما جديد عليو عايز إمسخ لىّ عرس أختى.

سؤال القصة: نستفيد من هذه القصة:
1/ حقو المغتربين ما يشيلو هدايا زيادة وزن وتعب على الفاضى(سعد قشرة مالو أبا؟).
2/الآباء ما يتشاكلو قدام اولادم.
3/نسيب الهجوم الغير مبرر على الغير.
4/لازم يجيبو مسدس لبعشوم .
5/ أبو بعشوم عمل الفلم ده عشان يزوغ من كشف العرس.


اشرف سلامات

دي جايه من حاجه واحدة ( الفلـــــــــس)

[أشرف صلاح السعيد]

اشرف سلامات

دي جايه من حاجه واحدة ( الفلـــــــــس)

يكفينا شرو وشرهم..وماتسألنى شر منو ديل..
كن بالف عافية وكل الخير..

[النويري]

يا حبيبنا أشرف اللذيذ انت عارف بعشوم دي أنا أخر مرة سمعتها قبل 17 سنة وأنا في الإبتدائي لكن الفكرة رائعة ولكن التنفيذ إتخيل لي صعب شوية بس في بعشوميين لحد الأن مع خالص تحياتي

[أشرف صلاح السعيد]

يا حبيبنا أشرف اللذيذ انت عارف بعشوم دي أنا أخر مرة سمعتها قبل 17 سنة وأنا في الإبتدائي لكن الفكرة رائعة ولكن التنفيذ إتخيل لي صعب شوية بس في بعشوميين لحد الأن مع خالص تحياتي


حبيبنا النويرى كل الاعوام انت والاسرة والاهل بخير وعافية وسعادة..
البعشوم والمرفعين وابو الشمام والدودو والبعاتى حليل حكاويهم ..
بس يااخوى البعشومين ديل منو؟ رسلم ليا رسالة خسوسى مااكون منهم..
كل الامانى محققة ويديك كل العوافى..

[محمد عبد الله عبدالقادر]

يكفينا شرو وشرهم..وماتسألنى شر منو ديل..
كن بالف عافية وكل الخير..

شرهم ديل ما برضو معروفين
البسببو الفلس زاااااتو

[أشرف صلاح السعيد]

شرهم ديل ما برضو معروفين
البسببو الفلس زاااااتو

هااااى يالجنا ماتعملنا مشاكل انا ماحمل مداوسات..تقصد ناس الكناتين مو كدى؟

[عباس الدسيس]

حبيبنا اشرف الابداع انتي اعلا منوا والروعه كملتها يا حلو كلك حلو بطعم كلامك الزي السكر بمتابعتي لبعشوميات كان السرور والضحك حليفنا وعشوشه تزقزق معنا علي امشاطها بسلك الكهرباء وهي تضحك باعلي صوتها (( ما تقول انا ود ابرق)) نحن في انتظار مزيد من الابداع

[أشرف صلاح السعيد]

حبيبنا اشرف الابداع انتي اعلا منوا والروعه كملتها يا حلو كلك حلو بطعم كلامك الزي السكر بمتابعتي لبعشوميات كان السرور والضحك حليفنا وعشوشه تزقزق معنا علي امشاطها بسلك الكهرباء وهي تضحك باعلي صوتها (( ما تقول انا ود ابرق)) نحن في انتظار مزيد من الابداع

حبيبنا الدسيس الانيق عوافى..
والله ماحلو الا راسك والجواو ..
ومستنين الربة شنو مالا طالت ؟ المكبرات واشتريناها..

[أشرف صلاح السعيد]

بعشوميات ..7

كان الوقت عصرية ويجيك بعشوم داخل البيت فلنة الكورة الوحيدة "عبد الواحد" مشروطة وحالتو كدا بالبلى..

ام بعشوم : ووب عليا دا منو الشرط ليك هدومك ؟..

بعشوم : فى الكورة..

ام بعشوم : كورة شنو دى البتقطع الهدوم!!ماكل يوم ياو لد بتلعب كورة ليه مااتشرطت هدومك ؟..ورينى منو الشرط ليك هدومك وبهدل ليك خلقتك دى كدا..ولا بحدس ليك ابوك..

عشوشة : امى اجلى "اجرى" احدس ابوى؟..أبوى ..ياأبوى..

ام عشوشة : يابت اتلهى..انا هسع قلت ليك اجرى؟..تعالى هنا..

عشوشة : ابوى قال ليا اكلمو باى سى بيحسل فى البيت..

بعشوم : امى مش قالت ليك ماتكلمى "بحدرة وهرشة"..

عشوشة : بكلمو ..بكلمو..

ام بعشوم : ياابت تعال هنا بلا يخمك ..عايزانى اقطع ليك لسانك يالقوالة ولا اتشتشو ليك؟..تعالى هنا يا وسخة..

عشوشة : "خائفة"..خلاس خلاس مابكلمو..

ام بعشوم : تعال هنا يالداير تزوغ انا لسة ماخلصتا مفاهمتى معاك..العمل فيك كدا منو؟..حتتكلم ولا انا الامشى اجيب ابوك يتفاهم معاك؟..

بعشوم : امى ماقلت ليكى الكورة واهندى الشرطة زااتا صغيرة..

ام بعشوم : دا شاكر "متسلفنو من ابوالدر وكدا" مش كدا؟..انا ماقلتا ليك ماتلعب الزفتا دى مية مرة..الله يشرط وشو الهبيل المجنون ..هو انتا قدرو ولا لحم سدرو؟..والله الليلة دى مااخلى..امشى يابت جيبى ليا توبى الامشى اورى امو المكشن بلا بصل..

عشوشة : امى توبك وين؟.."مالفيفة وخفية قاعدة على الهبشة الشافعة "..

بعشوم : امى دا ماشاكر..

ام بعشوم : اها منو سمح؟..

بعشوم : انا اتشاكلتا مع سيف..

ام بعشوم : سجمى مع سيف ..هو زاتو البخلى راجل بشنبو يلعب معاكم شنو "لمى ولدك المايلعب مع الاكبر منو "..ياراجل تعال ألحق ولدك ولد السرة قطعو ليك تقطيع..

عشوشة : ابوى ماسمعك..امسى اناديو؟..ابوى ابوى امى بتناديك..ابوى ابوى..

بعشوم : امى عليك الله ماتكلمى ابوى عليك الله..اولاد الفريق تانى مابيخلونى وحيزفونى الجاب ابوهو ..عليك الله ماتكلمى..

ابو بعشوم : فى شنو ياولية؟..كرهتينى البيت المابعرف اخد فيو غمدة دا..

ام بعشوم : سيف ولد موسى شوفو عمل فى ولدك شنو..

ابو بعشوم : فوت قدامى يازفت والله دا الفضل..وانتا ماعندك يدين ياخايب تخليهو يقطعك كدا..وهسع الفلنة دى تانى بتنفع؟"شوفو الراجل همو فى القروش وولدو سو كفتة"..

بعشوم : ابوى انا ماخليتو..انا..

ابو بعشوم : (مقاطعا ابنه) انتا بالنينى اليشقك "النينى دا مابتاع الخرفان؟"..امشى قدامى..والله الليلة ياانا ياموسى وولدو..

يذهب بعشوم بمعية أبيه ليجدا كل الفريق ببيت موسى الذى فرتق بعشوم الطوبة برأس ابنه ولم يكتفى بذلك وحسب بل وكمل كمينة طوب على باقى جسمه وكل من حاجز..فينسحب ابو بعشوم وبعشومه انسحاب تكتيكى بعد ان انتهر ابنه امام الجميع وجعله يعتذر..

ابو بعشوم : عافى منك ود ابوك بصح..

بعشوم : يعنى ياابوى انا بقيت راجل؟..

ابو بعشوم : راجل من ضهر راجل..عافى منك ياالبعيو ..

[أشرف صلاح السعيد]

بعشوميات..8

بعشوم فرحان بكورتو الجابتا ليو خالتو علوية من السعودية وعمل ليو قونين فى الحوش عشان يلعب شوت شوت مع السجمانة عشوشة المتاحة ليو 24/24 ساعة لانو ابو حذرو يطلع بالكورة ويلعب بيها مع اولاد الفريق وتقوم تتقدا "التقول جايبا بقروشو"..

بعشوم : تعالى يا عشوشة نلعب شوت شوت..

عشوشة : سوت سوت دى سنو ؟

بعشوم : انا اشوت الكورة عشان تدخل بين الطوبتين ديل وانتى تشوتيها عشان تدخل بين الطوبتين ديلك..فهمتى..

عشوشة " وكان ما دخلت؟..

بعشوم : احيا منك..كان ما دخلت تشوتى تانى وتالت لغاية ما تدخل..فهمتى..

عشوشة : فهمتا..طيب وكان دخلت سنو يعنى؟..

بعشوم : يعنى قون..

عشوشة : والقون دا سنو يعنى..

بعشوم : يعنى البجيب اقوان اكتر بيفوز..انتى سآلا كدا مالك يااخ..ماتلعبى وبس..

عشوشة : ولما افوز بيحسل سنو؟..

بعشوم : "خلااص مرارتو اتفقعت" ..يا بت ما بيحصل شى بنكون لعبنا وبس..حتلعبى ولا تطيرى من وشى؟..

عشوشة : خلاس حاالعب..

بعشوم : "بعد ما شات الكورة بمرمى عشوشة"..قووون..واحد صفر..

عشوشة : "بعد ما جابت الكورة الغلبتا تمسكا واساسا ما فاهمة مفروض تتمسك وبعد ما شاتتا"..قوون..

بعشوم : ما قون هسع الكورة دى دخلت بين الحجرين؟

عشوشة : كانت حتدخل بس انتا مسكتها ليه..

بعشوم : يا غبية انا لما اشوت ما تخلى الكورة تخش بين الحجرين بتاعينك وامسكيها..

عشوشة : بس انتا ما قلت ليا كدى اول..

بعشوم : هسع قلت ليك فهمتى؟..ويشوت الكورة"..قووون..اتنين صفر..

عشوشة : لكن انتا بتسوت سديد وانا ما بعرف زيك..وتشوت ويمسك الكورة بعشوم..

بعشوم : "يشوت " ..قوووون ..تلاتا صفر..

عشوشة : ما دايرا ألعب لعبتك السينة وكريهة دى..تعال نلعب حجلة..

بعشوم : احجل راسك ..انتى ما سمعتى ابوى قال ليا ما العب لعب بنات..

عشوشة : وكولتك دى هسى بتاعت بنات؟..امسى جيب ليك ولد عويل زيك كدا يلعب معاك..شنو العوالة دى تسوت وتكورك قووون..عوالة بس..

[أبو حمزة]

(ابو بعشوم : فوت قدامى يازفت والله دا الفضل..وانتا ماعندك يدين ياخايب تخليهو يقطعك كدا..وهسع الفلنة دى تانى بتنفع؟"شوفو الراجل همو فى القروش وولدو سو كفتة"..

بعشوم : ابوى انا ماخليتو..انا..

ابو بعشوم : (مقاطعا ابنه) انتا بالنينى اليشقك "النينى دا مابتاع الخرفان؟"..امشى قدامى..والله الليلة ياانا ياموسى وولدو..)
المشاركة الأصلية كتبت بواسطة أشرف صلاح السعيد


والله العظيم.. الفقرة دِه.. كانت عاوزة ترفدني من الشغل المسائي..!!
الله يخليك ويديم العافية عليك..

ولا تعليق.:.!!

إبداع .. إبداع... تقول لي الركشة... قسم بالله .. ده هو الموضوع الأول..!!

[أشرف صلاح السعيد]

(ابو بعشوم : فوت قدامى يازفت والله دا الفضل..وانتا ماعندك يدين ياخايب تخليهو يقطعك كدا..وهسع الفلنة دى تانى بتنفع؟"شوفو الراجل همو فى القروش وولدو سو كفتة"..

بعشوم : ابوى انا ماخليتو..انا..

ابو بعشوم : (مقاطعا ابنه) انتا بالنينى اليشقك "النينى دا مابتاع الخرفان؟"..امشى قدامى..والله الليلة ياانا ياموسى وولدو..)
المشاركة الأصلية كتبت بواسطة أشرف صلاح السعيد


والله العظيم.. الفقرة دِه.. كانت عاوزة ترفدني من الشغل المسائي..!!
الله يخليك ويديم العافية عليك..

ولا تعليق.:.!!

إبداع .. إبداع... تقول لي الركشة... قسم بالله .. ده هو الموضوع الأول..!!

حبيبنا ابو حمزة تحياتى..
انا كان عارفك عامل رايح عشان بعشوميات مختفية ما كان زمااان بعشمت بمزاااج ..
بس يااخوى ما نجيبا تختفى ونجيبا تقرب تترفد شنو يعنى "نتير؟"..
دقستا يا فردة وصوتا للركشة ..بس تعرف اخوك يقوم يتشفتن ومن واحد 11 يغير عنوان بعشوميات ل "عشوشيات" كيف اخوك ما تفتيحة؟؟..
والله ليك وحشة..

[بحيرى]

اخى صلاح تحيه طيبه ,
للاسف هذا هو حال بيوتنا الا من رحم ربى ,
فهل ترى معى أن الله قد رحم احداً من هذه العادات ؟

[أشرف صلاح السعيد]

اخى صلاح تحيه طيبه ,
للاسف هذا هو حال بيوتنا الا من رحم ربى ,
فهل ترى معى أن الله قد رحم احداً من هذه العادات ؟

سلام اخى بحيرى..
والله السواد الاعظم وانا منهم كثيرا نقع فى ذلك ولكن هى الموروثات والثقافة التى عند الواقع كثيرا ما تغلب الحكمة والفكرة السليمة..
لكن عل التذكير بما نقع فيه يكثر خجلنا لما نصنع فنقلل منه ثم نشفى منه ..

[أشرف صلاح السعيد]

بعشوميات .. 9

جلس بعشوم مع بعض اصحابه ومنهم دودو والمرفعين وأخذوا يتجاذبون أطراف الحديث..وعاملين جلسة حوار وكدا..

الدودو : هم الناس الكبار ديل جنهم يقولو لينا أقعدو ساكت ليه؟ويقضمو علينا؟؟..

المرفعين : عشان هم ما بيحبو الكلام الكتير..ولأنهم فقرييين وكريهيين..

بعشوم : "اتصلح فى قعدتو وكدا"..والله الكبار ديل بيتكلمو اكتر مننا بكتييير وكلامن نصو كضب كمان..وهم بيقولو لينا ما تنكلم عشان هم اليتكلمو واحنا نسمع لكلامم الخارم بارم..

الدودو : لكن هم ما بيعرفو اكتر مننا واحنا لازم نسمع كلامن عشان نستفيد منهم..

بعشوم : ما بيعرفو ولا حاجة..حسع دى شوفو رجال الحلة كل يوم يقعدو فى الشارع وكلهم بيتكلمو..حسع دى منو البيعرف اكتر واحد فيهم؟؟..

المرفعين : ما بعرف لكن عم أبشر شعرو كلو أبيض وما قاعد يتكلم كتير زى الباقين..وأى حاجة يقولوها يقول ليهم خلو الناس فى حالم وادو الطريق حقو..حتى المرة الفاتت عم ميرغنى زعل منو ومشى ساب ليهو القعدة..

بعشوم ما قلت ليكم هم زاتم ما بيعرفو شى وفاكنها فينا عشان نحنا صغار.. انا ابوى دا جنو يتكلم فى الناس ..ولما يقابلم يسلم عليهم شديد التقول بريدم..ولما أسألو أبوى انتا ما قلتا الزول دا ما بطيقو وبتكرهو ليه بتضحك معاو؟..يقول ليى انتا يا شافع حسع البدخلك فى كلام الصغار شنو؟..

الدودو : وكمان جنهم يدقونا وينيزونا ولما احنا ننبز يقولو لينا عيب..والله هم حقاريين خلاص.. يوما داك كنت واقف ورا الحيطة ولقيت ليك ناس ابوى بيقولو كلام كعب خلاص ولما نقولو احنا يلبعونا ويكفتونا..والله بس خلينى اكبر والله اسمى ولدى ابو الدودو واكفتو ليك كل يوم..

المرفعين : انا زااتى بسمى ولدى زى اسم ابوى وألبعو جنس تلبع..والعجب كان جبتها بت والله قرصات امى الحارة ديك كلها اخلصا منها..فقريين خلاص..

وعشوشة تراها لابتة والشفع ما جايبين خبر..وسجلت الكلام كلو وجاتم ناقزة..

عشوشة : اسطبلو اما حدست ليكم ابوى..

بعشوم : والله البقوِّل بيودوهو النار "ناقل الكفر ليس بكافر سمعا كدا"..انتى عايزة تمشى النار..

عشوشة : امسى النال ليه.. تمسو انتو عسان دايلين تدقو امهاتكم وابواتكم..

الدودو : خلاص بنديك حلاوة وما تكلمى لينا زول..

عشوشة : بكلم وبكلم ..ما دايلة حلاوتكم كل ملة تغسونى بيها..

المرفعين : والله تكلمى لينا ناس ابوك ندقك لمااان تبولى "عذرا ولكن هكذا سمعتها وسمعتموها" ..

بعشوم : المرفعين دا عندو سوط طويييل ولو ضرب بيو زول يمكن يموت ويدفنوه تحت الواطة فى الضلمة براو..انا مالى بعدين تبقى براك فى الضلمة وتجيك الدبايب تعضيك..

عشوشة : "باكية ومرتعبة"..خلاس خلاس ما بحدس ليكم..

نستفيد من القصة:
1- ارهاب الكبير للصغير..
2- التربية الغير حميدة يسقطها الطفل على غيره..
3- الكبار مفتريين وكضابين ومنافقين احيانا..
4- اسماء اصحاب بعشوم زى وشهم..
5- عشوشة قوالة وراسا ما بجى الا بالتخويف..
6- ك ما ظهر وما خفى أعظم.

[أبو حمزة]

وعشوشة تراها لابتة والشفع ما جايبين خبر..وسجلت الكلام كلو وجاتم ناقزة..

عشوشة : اسطبلو اما حدست ليكم ابوى..

بعشوم : والله البقوِّل بيودوهو النار "ناقل الكفر ليس بكافر سمعا كدا"..انتى عايزة تمشى النار..

عشوشة : امسى النال ليه.. تمسو انتو عسان دايلين تدقو امهاتكم وابواتكم..

الدودو : خلاص بنديك حلاوة وما تكلمى لينا زول..

عشوشة : بكلم وبكلم ..ما دايلة حلاوتكم كل ملة تغسونى بيها..

المرفعين : والله تكلمى لينا ناس ابوك ندقك لمااان تبولى "عذرا ولكن هكذا سمعتها وسمعتموها" ..
المشاركة أعلاه كُتبت بواسطة: م. أشرف صلاح السعيد..

يا لجمال الفكرة .. وحلاوة الحوار..!!
حقيقة هذا هو يوم العيد.. جمال .. + جمال..!!
والأجمل من ذلك حينما تجلعها تخمِّر.. يعني تروح وتجيها بعد يومين ثلاثة...!!
أنت مبدع أخي أشرف.. لا .. ليست مجاملة.. أنا مبسوط.. لا أدري أحب بعشوم وتوم@جيري..!!
ففضلاً أخي حلقة قبل الأضحى.. وأكون ممنون لك..!! مو هيك (ذي ما بيقول أبو خالد)..!!

[أشرف صلاح السعيد]

بعشوميات ..10

جلس ضيوف أو بعشوم بالحوش فى ذلك المساء من يوم ما..وكان بعشوم يقوم بدور الياور لأبيه وللضيوف..

أبو بعشوم : لكن تعرف يا حاج مضوى الإنتخابات الجاية دى معروفة نتيجتا..الكيزان ديل اصلو ما بيفرطو فى الكرسى تب..

بعشوم : ابوى الكيزان ديل شنو؟..

ابو بعشوم : يا ود اللقافة والتحشر عليك شنو؟..لما الكبار يتكلمو تقعد تسمع بس وتنطم..عيال شنو ديل البشبو للزول فى حلقو فى اى شى!!..

مضوى : يا ابو بعشوم خلى الولد يستفهم وما تكتمو..ما يانا كنا بنسعل لما كنا قدرم..بعشوم يا ولدى ابوك قصدو ناس الحكومة..

بعشوم : وليه بيقولو ليهم كيزان ياعم مضوى؟..

مضوى : والله يا ولدى ما عندى علم ..لكنى بسمع كيزان دى من ما وعيت واصلى ما سعلتا ليه؟..

ابو بعشوم : جيلنا احنا الزيو منو؟..اصلو ما كنا بتحشر فى المالينا فيو..والله ما كدا يا سيد أحمد اخوى؟..

سيد أحمد : والله كل جيل ليو ميزاتو ..وليو ماليو وعليو ما عليو..بس تعرف يا ابو بعشوم زمنا كان بسيط والحاجات كنا بنسميها بمسمياتا..الحكومة حكومة والمعارضة معارضة..كيزان وحمر وحزب الاسياد والكلام الفارغ دا ما كان ليو مكان زمنّا..الشفع هسع دى معذورين مية اسم والف مصطلح والامور بقت معقدة واحنا ديل زاتنا كتير بنكون مطششين وما فاهمين شنو الحاصل خليهم هم..

ابو بعشوم : والله يا سيد احمد اخوى براك المعقد الامور..يا زول شهرا ماليك فيو نفقة لا تعد ايامو..هسع دى حترشحو منو؟..

بعشوم : يرشح معناها شنو؟..

ابو بعشوم : يا ولد طير انكشح من قدامى..والله دا الفضل..اقعد انا اونسك انتا واسيب الرجال الكبار ديل..غورك يا شافع من هنا..

مضوى : يا ابو بعشوم حلمك على الوليد يااخ..ما تفهمو عشان يعرف بالهداوة..

ابو بعشوم : يا حاج مضوى وعِرفتو دى حتفيدو فى شنو؟..

سيد احمد : بتفيدو بالحيل ..أقلاها لما يكبر يعرف أساسيات حقوقو وواجباتو..

ابو بعشوم : اهندا نحنا شن فادتنا معرفتنا ولا حتى ترشيحنا؟..البشير جاى جاى..أكان عرفنا ولا ما عرفنا..

مضوى : استغفر يازول ..كيف الكلام دا!!..بكرة دا غيب وحق الله هو بس البيعرفو..

سيد احمد : وبعدين يااخ المرة دى الامور فيها اختلاف..انتا ناسى ناس الحركة ولا شنو؟..والله السنة دى دا يراقب داك وداك يراقب دا..وخلينا كدى النفهم بعشوم دا..يرشح يا بعشوم معناها الزول يختار ليو زول عايز يبقى حاجة يا فى الحكومة يا فى جماعة من الناس..اها هسع دى فى ناس عايزة تبقى رؤساء للبلد عشان كدا الناس بتمشى تختار منهم واحد عشان يبقى الرئيس..فهمتا؟..

بعشوم : والبشير يمشى وين؟..

سيد احمد : البشير زاتو مرشح نفسو تانى يبقى رئيس..

ابو بعشوم : قصدك سادس ما تانى..هو فى امريكا مش الرئيس بيقعد اربعة سنين فى الرئاسة وممكن يرشحو تانى اربعة سنين؟..هسع دى البشير ليو عشرييين سنة يعنى خمسة مرات وداير يترشح للسادسة ما كدى؟..

بعشوم : وطيب لو ما فاز يبقى شنو؟..

ابو بعشوم : اها يااخوانا شوفو جنس دا!!..فتحتو ليو طاقة عشان يسائل استلم القعدة..

مضوى : ما فيها شى يا زول خليو اليسعل الوليد دا والله راسو ما هين وبيسعل اسعلة تحيّر خلتنا انحنا الكبار زاتو نفكر فيها..بعشوم يا ولد ما ببقى حاجة ..ببقى زول زينا كدا سااكت وبجى رئيس جديد بدالو..

بعشوم : يعنى هسع دى انا ممكن ابقى لما اكبر رئيس؟..

سيد احمد : ممكن..بس اكرب نفسك وذاكر كويس..

ابو بعشوم : أكان المزاكرة بتبقى رؤسا أكان اساتذة الجاميعات ما فكوها ..يازول قول غير كدا..البلد دى دايرالا عسكرى..يا هم العساكر الببقو رؤسا اكان فلحو واكان فشلو ببقو فُطُسا..وناس العلام زى الطرحة المعلقة فى الحبل بدون مشابك..هوا يوديها هناك وهوا يطيرا هناك..

مضوى : والله كلامك ياهو الشايفنو من ما قمنا..وهوا الشعب علا غلاب بس ناس الزمن ديل بقى هواهم كتمة ..

بعشوم : انا لما اكبر حأبقى رئيس..وأجيب للناس الاكل والهدوم السمحة وكل حاجة سمحة..

مضوى : من هسع عندك صوتى..

سيد احمد : وصوتى كمان بس الله يحينا لداك الزمان..

ابو بعشوم : والله سمعنا بأحلام زلوط علا احلام بعشوم دى جديدة لنج..

أها ياابا حمزة كيف؟..وتانى إن شاء الله ألحقك واحدة قبل العيد إن شاء الله..تحياتى..

[أبو حمزة]

كدة أنا مبسوط..100% .. ربنا يخضِّر ضراعك..
(ويا رب ما تروح.. وكان رُحتَ .. إن شاء الله يلقوك)..!!

[أشرف صلاح السعيد]

بعشوميات..11

بعشوم وعشوشة وولد الجيران حمادة الجيران مرابطين حول الخروف المنتظر لتنفيذ الاعدام فيه أكلا حتى الاشباع لبطون اللحمة والبروتين الحيوانى غدى يصيبها بالتلبكات المعوية والاسهالات اللامقدور على مسكها اكثر من المشوار الى المستراح "صحى مريح راحة هو"..

حمادة: انت يا بعشوم خروفكم دا مالو صغيرونى كدا وضعيف؟..

بعشوم : "مغتاظ"..دا هسع دى ضعيف؟..اسمعو بيباعى "المصدر باع فهو مباعى والمضارع بيباعى والصوت باااع باااع زى الحيكومة الباعت المشروع وخلتنا نباعى ودايرانا نبايع" كيف..صوتو اعلى من خروفكم الباطل داك التقول جايبنو من استار اكاديمى..وخروفكم زااتو كلو صوف ومنفوخ على الفاضى التقول نافخنو بسيلكون..والموضة زاتا بقت الاسلم انت من زمن الجقق والشحم دا واللحم دا؟..

عشوشة : خلوفنا ضعيف؟..ضعيف هو ولا اختك ام كلاعات لقاق دى؟..

حمادة: والله انحنا خروفنا لما جابو نزلو ابو والولد الشغال من كبرو..مش زى خروفكم العامل زى الخروف الصغنبوتى الفى ال ام بى سى ثرى داك..

بعشوم : انا ابوى كرا خروفنا من الزريبة كر..ابوى ما قوى ولا داير ليو زول يساعدو كمان..

عشوشة : آيا ابوى بطل وعضلاتو كبااال..مش زى ابوك الجنو يلكب العلبية بتاعتو..ابوى بيمشى بكلعينو عشان هو قوى..

حمادة: ابوكم يعنى اقوى من ابوى؟..

عشوشة : آيا..وامى اكان مسكت امك والله تمعطا زاتو وتخليها تتبكبك زى العويلة..

حمادة: والله هسى امشى اكلم ليكم امى وابوى يا شكالين..ياالخروفكم زى خروف افلام الكرتون..

عشوشة : امشى كلمم..عشان يجو وابوى وامى يزعمطوهم ليك ويشيلو خلوفكم الدبة داك..

بعشوم : امشى كلمم..ولا خايفين منهم..والله ابوى يجيب عكازو يكسرم ليك..طير اطلع من بيتنا انحنا قاعدين نمشى ليكم وننبز ليكم خروفكم ابو تفة الغليييد داك..اطلع برا من بيتنا..

ام بعشوم : يا اولاد مالكم بتتشاكلو؟..

حمادة: يا خالتو ام بعشوم ..شوفتى بعشوم وعشوشة نبزو ليى ابوى وامى وقالو ليى انتى وعمو ابو بعشوم بتدقوهم كمان..

ام بعشوم : دا كلام شنو دا يا اولاد؟..عيب عليكم حمادة دا فى بيتكم تشاكلو ليه؟..

عشوشة : امى حمادة الكليه دا قال لينا خلوفنا ضعييف وصغيلونى..هو مالو ومال خلوفنا..

ام بعشوم : طيب ما هو اصلو جيب ابوكم بيفضحنا وسط الحلة..هسع دى الخروف دا عاجبكم؟..

بعشوم : آيا عاجبنا..مش جابو لينا ابوى..إن شاء الله يكون بعيو ومحوص مش خروفنا..هو مالو ومالنا؟..

ام بعشوم : ما ياكم شبه ابوكم وعمايلكم ياهى عمايلو..معليش يا حمادة ما تزعل منهم ديل اخوانك..

عشوشة : ما اخوانو ..خليهو اليطيل بلا بيتنا الكليه دا..إن شاء الله خلوفكم يموت..والله ما نديكم حتة لحماية..

ام بعشوم : انتو حقد ابوكم دا مجبدين بيو تجبد..خشى جوا انتى يا مقصوفة الرقبة يا ام نص لسان..حمادة انتا ألعب مع بعشوم وما تتشكلو..سمح؟..

بعشوم : انا ابوى بنادينى وماشى ليو..خليهو اليمشى بيتم يلعب مع خروفن الدبة اب تفة..


كل الاعوام والجميع بكل الخير واليقين وبنجاح وفلاح..

[ابوخالد]

[center]كدة أنا مبسوط..100% ..
ربنا يخضِّر ضراعك..
(ويا رب ما تروح.. وكان رُحتَ .. إن شاء الله يلقوك)..!!


شباب ,,,
كل الجمال إنتو ,,, وكل المُنى ,,
عودة بعشومية رائعة ,,, نتمنى التواصل ,,



وكل عام والجميع بمليوووووووووووون وواحد خير

[أشرف صلاح السعيد]

كدة أنا مبسوط..100% .. ربنا يخضِّر ضراعك..
(ويا رب ما تروح.. وكان رُحتَ .. إن شاء الله يلقوك)..!!


أبو حمزة إن شاء الله كل الاعوام وكل اللحاظ تكون مبسوط وبكل الخير وكل من يهموك..

[أشرف صلاح السعيد]

شباب ,,,
كل الجمال إنتو ,,, وكل المُنى ,,
عودة بعشومية رائعة ,,, نتمنى التواصل ,,

[center]
وكل عام والجميع بمليوووووووووووون وواحد خير


الجمال يمشى منك وين ؟ يوسف اسمك وصالح ابوك..جمال وصلاح ..

كل اللحاظ تكون السعادة مرفرة حولك وكل الخير يلازمك واهلك..

[moh_alnour]

بعشوم نوع الشفع العندو كريشة صغيرة ديك اسمها التمبله تلاقيها طالعة من تحت الفنيلة المقددة ورجليه مرسومة بالخرط بسبب السوائل والسيول البيتعرض ليها
أما عشوشة مضفرة شعرها ضفيرتين ما موزونات وشعرها شبه منكش .. وفستانها ما موزن من جنبه قصير وجمبة ثانية طويل
لو دي مواصفاتهم .. أنا بقول ليك الجماعة ديل لاقوني

أنا برضو لاقوني و شفتهم بس يا ربي شفتهم وين ؟ يمكن في الدِش :p




المرفعين : و الله تكلمى لينا ناس ابوك ندقك لمااان تبولى " عذرا ولكن هكذا سمعتها وسمعتموها "

:p ما تتحسس يا ريس :p كلنا سمعناها كدا من أماتنا و حبوباتنا :eek:




مضوى : والله يا ولدى ما عندى علم ، لكنى بسمع كيزان دى من ما وعيت و أصلى ما سعلتا ليه ؟

قيل أن الأمام حسن البنأ ( مؤسس جماعة الأخوان المسلمين بمصر ) قال ذات مرة ( إن هذا الدين بحر عميق و ما نحن إلا كيزان نغرف منه ) فألتصق الاسم بهم ( و الله أعلم )




امسينا نخشى اسئلة الاطفال لان القصور بنا لا بأسئلتهم

حقيقي البوست غني بالرسائل التي كانت هدف لكل مجلات الأطفال و برامج الأطفال بالتلفزيون في السابق
و التي تسعى من خلال تلك البرامج و الإصدارات إلى توصيل مفاهيم صحيحة و قيم أخلاقية عالية تتعلق بالوسيلة المُثلى لتربية الأطفال
بينما أطفال اليوم فلهم قُدرات و مهارات أكبر من تلك التي أكتسبها أبائهم و بالتالي يأتي الخوف من أسئلة الصغار في هذا الجانب

[أشرف صلاح السعيد]

الحبيب محمد النور تحياتى وكل الاعوام انت ومن يهمك بكل الخير وكما تتمنون..

أنا برضو لاقوني و شفتهم بس يا ربي شفتهم وين ؟ يمكن في الدِش :p


ربنا يوعى الامهات والاباء وتختفى صور الشفع ابات تنابل وابات سوائل بالانوف جارية والحفيان جسمن وكريعاتن ويحفظ كل الاطفال والكبار....

:p ما تتحسس يا ريس :p كلنا سمعناها كدا من أماتنا و حبوباتنا :eek:


والله يا ابو حميد انا ما بتحسس بس خايف البعض هو اليتحسس ويتعامل مع المسألة باكتر مما تحتمل..يديك العافية..

قيل أن الأمام حسن البنأ ( مؤسس جماعة الأخوان المسلمين بمصر ) قال ذات مرة ( إن هذا الدين بحر عميق و ما نحن إلا كيزان نغرف منه ) فألتصق الاسم بهم ( و الله أعلم )


تشكر على الايضاح وفى اعتقادى الكثيرين ما كانو عارفين سبب هذه التسمية وكلنا كنا بستعملا على عمانا "شفت اللقافة دى؟"..

حقيقي البوست غني بالرسائل التي كانت هدف لكل مجلات الأطفال و برامج الأطفال بالتلفزيون في السابق
و التي تسعى من خلال تلك البرامج و الإصدارات إلى توصيل مفاهيم صحيحة و قيم أخلاقية عالية تتعلق بالوسيلة المُثلى لتربية الأطفال
بينما أطفال اليوم فلهم قُدرات و مهارات أكبر من تلك التي أكتسبها أبائهم و بالتالي يأتي الخوف من أسئلة الصغار في هذا الجانب


كثير منا خلق ايطار وكتب على حوافه ممنوع الخروج عن هذه الحدود..رغم ان لا حدود بالمعرفة والاستفسار..الفهم المغلوط فى حرمانية السؤال عن الله وعن الدين والجنس والعديد من المواضيع هو افتقار للوعى..علينا اجابة الصغير والكبير بما نمتلك لمعلومات وان كانت بسيطة فالمهم ان تكون حقيقية ويكون اسلوب الافهام بعيد عن التحريف والتضليل بدوافع الحرمانية والعيب المكذوبات..لكل سؤال اجابة ومن قال لا ادرى فقد افتى وتلك ايضا اجابة واجابة نموذجية وبها يمكن الشخص الوصول للمعرفة ايضا فلربما سؤال طفل كشف عدم إلمامنا بجانب ما سقط عنا..
تبسيط الاجابة بما يتسق مع فهم الطفل هو المحك وعلينا الاجابة بصدق فالطفل يبنى كثير من أفكاره على أسس يضعها الكبار..