النفاق عند الاولاد / توجد مواقف

[مدنيّة]

طبعا الاولاد دائما بيقولوا انه البنات منافقات


بعد خبرة السنوات وصلت لقناعة تااااااامة انه الاولاد منافقين درجة اولي

[مدنيّة]

جرس يرن
اول ما يشوف الرقم
اضانك ما تسمع الا
ياخ دا عايز شنو
ياخ كرهنا
ياخ الزول دا ثقيل جنس ثقالة

[مدنيّة]

اها الخط اول مايفتح
اضانك تسمع
"وينك ياحبيب"
مشتاقين
وينك ماظاهر
طولنا منك
وعلي ذلك فقس

[مدنيّة]

اها الاولاد ديل عندهم نفاق ماعادي
بس مابيظهروه
نفاق باطني
وشابكننا احنا الضعفاء ديل
انه البنات حاقدات وكدا

[مدنيّة]

مع انه في راس الشخشي انه البنات واضحاااااااااااات ما منافقات
يعني المابحبوه ما بيقيفوا ليه في الظلط
بوصفوا ليه البيت غلط ادددديل كدا

[mutasim]

الاخت مدنيه رمضان كريم
الله يجازيك والله كلامك صحيح بس الحكايه دى فى السودان قليله تعالى شوفى بره والله الواحد يقول الناس كلهم كزابين والاشيياء دى كشفها الموبايل , لكن فى بنات منافقات رضو لانى بعمل مع البنات ومكارات مكر,,,

[الفخيييم]

جرس يرن
اول ما يشوف الرقم
اضانك ما تسمع الا
ياخ دا عايز شنو
ياخ كرهنا
ياخ الزول دا ثقيل جنس ثقالة


البنت برضو بتقول دي صحبتي فلانه
ثقيلة خلاص وتاني ما تشوفيها الا هي في الاوضة بتتكلم00
نفاق متوفر علي الكل اتخيل لي الرجل او الولد اخف قدرا
لانو عندو فرصة يتكلم مع اربعه ولا شنو؟

[معتز الريح]

جرس يرن
اول ما يشوف الرقم
اضانك ما تسمع الا
ياخ دا عايز شنو
ياخ كرهنا
ياخ الزول دا ثقيل جنس ثقالة


اها الخط اول مايفتح
اضانك تسمع
"وينك ياحبيب"مشتاقين
وينك ماظاهر
طولنا منك


لا يصبح نفاق إذا كان المتصل أحد شخصين :
* زول طالبك قروش ومواعيدها استحقت وأنت ما عندك ..
* والكفيل ..

[moh_alnour]

مع انه في راس الشخشي انه البنات واضحاااااااااااات ما منافقات
يعني المابحبوه ما بيقيفوا ليه في الظلط بوصفوا ليه البيت غلط ادددديل كدا

و النزيدك من الشعر بيت يا أم جمال الأولاد البدوروهوا بولعوا ليهو اللمبة و الما بدوروهو بحرشوا ليهو الكلبة ;)
و في رواية أخرى البدوروهوا بجوهوا بالدرب و الما بدورهوا بحرشوا ليهو الكلب ;)
لكن يا أم جمال ما بتتفقي معاي أنو بعض المواقف تطلب الدبلماسية و التجمل
و مع ذلك فالنفاق ليس قصرا ً على الأولاد كما الحال بالنسبة للبنات

[معتز الريح]

البنات يدردقووووك لمان تقع
وتجي تطرح .. يلصقوا ليك ..
يخلوك (تسالم من طرف)

ده ما نفاق؟

[ابوخالد]

طبعا الاولاد دائما بيقولوا انه البنات منافقات


بعد خبرة السنوات وصلت لقناعة تااااااامة انه الاولاد منافقين درجة اولي


لا ...... أختلف معك يا مدنية .....
من تجربتى فى الحياة ...
أخ لثمانية بنات وإثنى عشر صبيآ ... وأب لبنتين
وولدين ...

أقول البنات فظيعات ...
وده ناتج من قلة الحيلة ... والضعف الفطرى ..
وده بيولد الإبداع فى أساليب الكذب ...

فهى لا تُــكذب ولكنها تتجمل ..... وهذه ألعن ....

وتفطرى على خير

[محب]

الاخت مدنية تعالى نتقف منو المنافقين اكتر البنات ام الاولاد بعدين نشوف الاسباب هي شنو الخلت الشباب اعمل كدا ؟

[الملكة اسماء ( ام محمد )]

..


أقول البنات فظيعات ...
وده ناتج من قلة الحيلة ... والضعف الفطرى ..
وده بيولد الإبداع فى أساليب الكذب ...


فهى لا تُــكذب ولكنها تتجمل ..... وهذه ألعن ....




عموما الشخص الكذاب اي كان بنت او ولد ان وصل مرحلة الابداع في الكذب فللاسف يكون اول من يصدق كذبته

[ابوخالد]

عموما الشخص الكذاب اي كان بنت او ولد ان وصل مرحلة الابداع في الكذب فللاسف يكون اول من يصدق كذبته




ملكة قبل ماتفطرى ...

هل يمكن لإنسان أن يرسم الكذبة بإبداع ... ويتلبسه ...

ويتعايش معاها عادى ... كأنه ما حاصل شئ ...
ويحاول الدفاع عنها بكل السبل ....
معقولة .......... دى..

تفطرى على خير

[مهيد ود السفاح]

الاخت مدنية تعالى نتقف منو المنافقين اكتر البنات ام الاولاد بعدين نشوف الاسباب هي شنو الخلت الشباب اعمل كدا ؟



ظاهرات يا محب

[الملكة اسماء ( ام محمد )]

ملكة قبل ماتفطرى ...


هل يمكن لإنسان أن يرسم الكذبة بإبداع ... ويتلبسه ...


ويتعايش معاها عادى ... كأنه ما حاصل شئ ...
ويحاول الدفاع عنها بكل السبل ....
معقولة .......... دى..





معقولة جدا جدا
وكتير بنلاقي نماذج لناس من كثر مابكذبوا بصدقوا كذبتهم
للاسف الابداع في نسج الصورة وتخيل ابعاد الكذبة ودراستها بدقة يجعل من الكذاب ممثل لدور البطولة في اللوحة الهلامية التي يقوم باخراجها بقالب يجعله اول المصدقين ولايستغرب بعدها تصديق الجمهور لكذبته
والادهى من ذلك ينتقد نقاط ضعف( الحبكة ) واذا لاحظ انتقاد غيره لجانب هو شايف انه ابدع فيه برد باسلوب هجومي غالبا بكشف الكذبة

[درديري كباشي]

بصراحة انا لا اؤؤمن باطلاق الاحكام المطلقة ابدا سوى كان هذا الحكم مبني على جنس او على نوع . بمعنى عرق اوعلى ىنساء او رجال .

لانه النفس البشرية نفسها معقدة وقد تختلف بين حتى التوام في الطباع ..

لكن سمت العصر وضغوط الحياة وتعدد سبل المواجهه بين الناس جعل النفاق نتاج طبيعي لهذه الخلطة العجيبة .. وهذا الشئ متوفر بين الرجال والنساء ..

تجد مجموعة جالسين في مكان واحد داخل عليهم شخص .. قبل ما يصل مدى السمع اليهم يكونا كلهم قد اغتابوه ..

- اها جانا الكذاب المنافق دا هسع يقعد يمجد لينا في الحكومة..- الثاني ما منتفع ومستفيد ومال عمارته دي كان وارثها د ابوه كان غفير- والثالث انت ولا في العربية الراكبه ..


وعندما يصل .. اااهلا يا ابو عمر شيخنا ابو عمر شرفتنا والله .

[العاقب مصباح]

سمعت لى مقولة من وانا صغير ولسه حافظها :-

النساء كاذبات إلى حد أنه لا يمكن تصديق حتى عكس ما يقُلن ..

[محمد حسين (المميز)]

النساء كاذبات إلى حد أنه لا يمكن تصديق حتى عكس ما يقُلن ..



عليـــك نوووووووووور
ياودمصبــــاح;)

[محمد حسين (المميز)]

إحــــــذر


البنات إذا إجتمعـــن

فالنتيجـــه الحتميــّــه بعد الإجتمـــاع
مصيبــــه:D





ن =النفاق والنميمه
لاصقه فيكم لامحاله :p:D:p
يالبنوت:p

[مدنيّة]

الاخت مدنيه رمضان كريم
الله يجازيك والله كلامك صحيح بس الحكايه دى فى السودان قليله تعالى شوفى بره والله الواحد يقول الناس كلهم كزابين والاشيياء دى كشفها الموبايل , لكن فى بنات منافقات رضو لانى بعمل مع البنات ومكارات مكر,,,

اهلييين مصطفي
الله اكرم
تصوموا وتفطروا علي الف خير يارب

اولا نتفق انه النفاق صفة ذميمة جدا
والعنوان وتخصيص الاولاد بيه كان من باب الاثارة الصحفية "وش صحفي"

اها ندخل في الموضوع

صراحة فكرتي عن الاولاد او الرجال عموما انهم واضحين "او هكذا يجب ان يكونوا"

بعد خلصنا الجامعة ودخلنا في الحيارة العملية
بدت تظهر لي حاجات كانت مخفية عني ومن ضمنها المثال الذكرته في البوست دا

جد طوالي بقيف في الحتة دي وبستغرب ليها
بفهم انه الواحد يكون وضاح مع نفسه قبل الناس

ياخ الماضايقه دا اتعامل معه بمشاعرك دي زاتها وفي حدودها
علي الاقل عشان ما ترهق نفسك

ولا رايك شنو يامصطفي

[مدنيّة]

لانو عندو فرصة يتكلم مع اربعه ولا شنو؟
[/center]

عشان كده الراجل نفاقو أكبر بمعدل 4 إلى 1 .. أها ما معاي حق ؟؟؟

[مدنيّة]

لا يصبح نفاق إذا كان المتصل أحد شخصين :
* زول طالبك قروش ومواعيدها استحقت وأنت ما عندك ..
* والكفيل ..

الكفيل دا غير المدير ؟؟

غايتو احتياطي كدا
وجهة نظر مفبولة

[مدنيّة]

و النزيدك من الشعر بيت يا أم جمال الأولاد البدوروهوا بولعوا ليهو اللمبة و الما بدوروهو بحرشوا ليهو الكلبة ;)
و في رواية أخرى البدوروهوا بجوهوا بالدرب و الما بدورهوا بحرشوا ليهو الكلب ;)
لكن يا أم جمال ما بتتفقي معاي أنو بعض المواقف تطلب الدبلماسية و التجمل
و مع ذلك فالنفاق ليس قصرا ً على الأولاد كما الحال بالنسبة للبنات

ياود الجاك ابدا من حيث انتهيت

في ردي علي مصطفي ثبتت حتة انه النفاق ما محصور علي الاولاد
والعنوان كان من باب الاثارة الصحفية ليس الا "كما هو الحال في بوست هزيمة انثي"

اها نجي للموضوع الاساسي

هل معني الدبلوماسية المثال اللي ذكرته في البوست دا ؟

معك انه المجاملة مطلوبة

لكن مفترض اني اجامل ورا الزول قبل قدامه
ولا شنو يا "عريس"

[العاقب مصباح]

عليـــك نوووووووووور
ياودمصبــــاح;)



يعنى متفق معاى

اها يا مدنية اتتنين لو قالوا ليك البنات هم المنافقات يبقى حقيقة

والاتنين فيهم واحد مميز كمان

اها شن قولك

[مدنيّة]

البنات يدردقووووك لمان تقع
وتجي تطرح .. يلصقوا ليك ..
يخلوك (تسالم من طرف)

ده ما نفاق؟

في حالة زي دي
انت الغلطان

لانك اكيد بتكون فهمت الدردقة دي غلط

ياخ امكن دردقة اخوية سااااي

[مدنيّة]

لا ...... أختلف معك يا مدنية .....
من تجربتى فى الحياة ...
أخ لثمانية بنات وإثنى عشر صبيآ ... وأب لبنتين
وولدين ...

أقول البنات فظيعات ...
وده ناتج من قلة الحيلة ... والضعف الفطرى ..
وده بيولد الإبداع فى أساليب الكذب ...

فهى لا تُــكذب ولكنها تتجمل ..... وهذه ألعن ....

وتفطرى على خير


ربنا يخليهم ياابوحالد

الرسول صل الله عليه سلم لما جاءه واحد
وقال ليه انه بيسرق وبيزني وبيكذب
وبيعمل كل الصفات السئية
وطلب من الرسول صل الله عليه وسلم انه يامر ليترك صفة واحد فقط

الرسول صل الله عليه وسلم
قال ليه لا تكذب

لانه عارف انه الصدق هو مربط الفرس في حياة الانسان

لذلك الكذب مفروض جملة وتفصلا من الاولاد او البنات

احتراااماتي ابو خالد

[مدنيّة]

الاخت مدنية تعالى نتقف منو المنافقين اكتر البنات ام الاولاد بعدين نشوف الاسباب هي شنو الخلت الشباب اعمل كدا ؟

اهلييين محب

طبعا مافي اي دراسة لا نؤكد منو الاكثر نفاقا
الاولاد ام البنات

لانه مافي حقيقة مثبتة في الدنيا دي الا الموت

عشان كدا حتة نتفق دي صعبة شوية


كدي خلينا نتجاوزها ونشوف الاسباب هي شنووو

[بنت الرفاعي]

إحــــــذر




البنات إذا إجتمعـــن


فالنتيجـــه الحتميــّــه بعد الإجتمـــاع
مصيبــــه:D





ن =النفاق والنميمه
لاصقه فيكم لامحاله :p:D:p
يالبنوت:p


:eek::eek::eek::eek::eek::eek:
:confused::confused::confused::confused::confused: :confused:
مادائما إذا اجتمعوا البنات يكونوا كدة!!

وإذا فرضنا وقلنا دي صفة في أغلب النسوان , أها تعال شوف أغلب الرجال في جلساتهم وجمعاتهم :eek: ولا أقول ليك إنت عارف براك الحاصل ومافي داعي.


أما عن الموضوع في حد ذاتو , ما القصة بنت أو ولد , لأنو ده مامقياس , وغير كدة دي بقت حاجة شبه عادية , لكن صراحة كدة شاهدتها في الأولاد أكثر من البنات , لأنو الرجال دائما علاقاتهم أكثر من البنات, وبرضو البنت ممكن تحافظ على علاقاته بطريقة ودية , يعني ممكن لو بتكره ليها واحدة تانية أصلا مافي سبب بيخليها تتصل ليها , وهو أساسا الكراهية لزومها شنو؟؟ إلا سبب واضح وأكيد الثانية حتكون عارفة شعورها علشان كدة حتتحاشاها.
غايتو الله يهدي الجميع.:)

[معتز الريح]

ياخ امكن دردقة اخوية سااااي


ههههههههههههههههههههههههههههه
يمكن !!!!

[الملكة اسماء ( ام محمد )]

ممكن سؤال ؟

ليه دائما بناخذ المواضيع بحساسية ونجد كل فئة تحاول الدفاع عن نفسها مع انه الموضوع غالبا بكون محتاج اراء قوية وكلمة حق ( بعيدا عن التجارب الشخصية )
باختصار الاحساس الذي ينتاب من يقراء بعض الردود هو ان صاحبها ( مشوكش - ماكل مقلب من الطرف الثاني )
يعني ماممكن تحكموا على الغالبية بسبب تجربة شخصية .. والا رايكم شنو ؟

[معتز الريح]

بعض الردود هو ان صاحبها ( مشوكش - ماكل مقلب من الطرف الثاني )





والله ما أنا ..
ده أشرف صاحبي ..

[الملكة اسماء ( ام محمد )]

والله ما أنا ..


ده أشرف صاحبي ..



:eek::eek::eek:
كنت حااااسة

شفت يااستاذي الفاضل
القصة دي اول مايكون فيها ( تحامل ) بكون السبب ( شواكيش )


اها قلت لي الماكل مقلب منو :rolleyes:

[معتز الريح]

:eek::eek::eek:
كنت حااااسة

شفت يااستاذي الفاضل
القصة دي اول مايكون فيها ( تحامل ) بكون السبب ( شواكيش )


اها قلت لي الماكل مقلب منو :rolleyes:



أنا ما غايظني الشاكوش ..
الأخدو (أبوالشوش) صاحبي .. لكن
غايظاني الدردقة ..

[الملكة اسماء ( ام محمد )]

أنا ما غايظني الشاكوش ..



الأخدو (أبوالشوش) صاحبي .. لكن
غايظاني الدردقة ..



والله سياسة الدردقة دي سياسة حكيمة جدا جدا لكن لما يبقى اخرها شاكوش يبقى الماخدو بستاااااااهل
لانه ببساطة (قلب المؤمن دليله) يعني لو قلبه ( صاحي ) ماكان دردقوه ولا في الاخر شوكشوه
بصراحة في الحالة دي الشوكشته ( ذكية جدااااااا) مش كذابة

[معتز الريح]

والله سياسة الدردقة دي سياسة حكيمة جدا جدا لكن لما يبقى اخرها شاكوش يبقى الماخدو بستاااااااهل
لانه ببساطة (قلب المؤمن دليله) يعني لو قلبه ( صاحي ) ماكان دردقوه ولا في الاخر شوكشوه
بصراحة في الحالة دي الشوكشته ( ذكية جدااااااا) مش كذابة


أبوالشوش والله مفتح ..
لكن الدردقة كانت جامده ..
وشوهدت الجانية بتدردق في صاحبي (أبواللول) ..
حتى ما خلت أبوالشوش يكمل العدة ..
حسه أنا مستني دردقتي ..

هو النفاق ده كيف؟ ..

[ود الجعلي]

مع انه في راس الشخشي انه البنات واضحاااااااااااات ما منافقات
يعني المابحبوه ما بيقيفوا ليه في الظلط
بوصفوا ليه البيت غلط ادددديل كدا



مدنية
بأختصار :
الاولاد ينافقوا من اجل مصلحة مادية مفيدة " مزنوق في قرشيات" "شُغل " " فيزا" " نسابة" وده اسمو أسلوب دبلوماسي

اما البنات فحاجاتهم فارغة "فشخرة وبوبار" " شوفوني" " ...حسادة وبس " والامثلة كتيرة يامدنية

هذا والله أعلم

[الملكة اسماء ( ام محمد )]

هو النفاق ده كيف؟ ..


معنى النفاق: وهو أن يظهر الإنسان إيمانه وهو في باطنه كافر مكذب.
قال الله تعالى( {إِذَا جَاءَكَ الْمُنَافِقُونَ قَالُوا نَشْهَدُ إِنَّكَ لَرَسُولُ اللَّهِ وَاللَّهُ يَعْلَمُ إِنَّكَ لَرَسُولُهُ وَاللَّهُ يَشْهَدُ إِنَّ الْمُنَافِقِينَ لَكَاذِبُونَ} [المنافقون: 1].



ولاحظ في فرق شاااسع بين النفاق والكذب
فالكذب: هو أن يخبر الإنسان بخلاف الواقع
قال رسول الله صلى الله عليه وسلم : «إياكم والكذب فإن الكذب يهدي إلى الفجور، وإن الفجور يهدي إلى النار، وما يزال الرجل يكذب ويتحرى الكذب حتى يكتب عند اللَّه كذابًا».
وبجيك راجعة :)

[ام قبس]

ياجماعة الموضوع واااااااااضح
الرسول صلي الله عليه وسلم قال في ما معناه ( صفات المنافق ثلاث اذا حدث كذب واذا وعد اخلف واذا اؤتمن خان )
يعني النفاق متضمن الكذب واشياء اخر
نجي نمسك الكذب بي صراحة الكذب بتاع البنات بتكلم عن المجموعة الاكبرفي الوصف بهذه الصفه للاسباب الاتيه المراة في المجتمع الشرقي عامه والمجتمع السوداني خاصة محاطه بقيود ومتاريس لتجبرها في كثير من الاحيان للجؤ الي الكذب وبكل الوانه الابيض
اما ادم او ابو الرجال
بجيكم راجعه

[الجندي المجهول]

طبعا الاولاد دائما بيقولوا انه البنات منافقات


بعد خبرة السنوات وصلت لقناعة تااااااامة انه الاولاد منافقين درجة اولي

الاخت مدنية (عفواً لاختيار اللون الازرق للكتابة )
ولكن في دي والله والله ما جانبك حظ من الحقيقة ( خاصة وانه معروف ان الولد اصدق من البنت ) وموضوع التلفون دا حتى البنات عندهم والامثلة كثيرة ( ودائماً البنت متطلعة لدرجة انها ممكن تكذب او تخلق قصة خرافية ) ووالله النوع دا كتير لمان مالي الحتة ...
عموما ( ظلمتي الولد ) ظلم الحسن والحسين ( والولد بيعيشها بي اي حاجة ) وبيمشي حالو ولا رايك شنو ؟

تخريمة :
صدقا لكلامي قبل فترة من الزمن 4 او خمسة سنين استحضر قصة حكاها لي الرائع ( حمدتو ) ما حمدتو بتاعنا نائب المدير العام واحد تاني ( درس هو في جامعة السودان ) وكان معاهم بنت من كترت ما ممثلة انها حنكوشة الايسكريم بتمسكوا بالتوشس ( المناديل) وفاكها في روحها شديد خلاص ( جنس كضب غايتو ) ويم مرضت وتعبت وصمموا لازم يمشوا ليهم بيتهم وهي تشيل وتعتذر في النهاية الجماعة مشوا ( وطباعا عمره الفقر ما كان عيب ) ولعلمك وعلمي انا وليعلم الجميع ان اغلبية اهل الجنة من الفقراء) ولكن لجهل هذه المسكينة التي ادعت ( وكذبت ونافقت) من اجل ان تظهر بمظهر لن يضيف اليها شيئا ( سوى ) الصحبة الكاذبة وبس .

اها يا مدنية رايك شنو ؟

ردك بسرعة ( دفاعاً او استسلام ) وانا اعرف انك تحبيبن الحق ( كما نحسبك ) -- ( وش مبسوط جنس بسطة) والرجوع للحق فضيلة ...

[عبدالله]

السلام عليكم و رمضان كريم عليكم
تقبل الله صيامكم و قيامكم
الكذب دا ما عندو جنس ولا لون ولا وطن وتعددت الدوافع و الكذب كذب

[amino]

http://www.q8boy.com/images/dsyy5xmfnsivtmccjv23.jpg (http://www.q8boy.com/)


دا الواقع يامدنية صاح

بعد دا كلوا يكون النفاق وين؟

والله لو ما البنات نخش الجنة جررررررررررررررى

[الملكة اسماء ( ام محمد )]

والله لو ما البنات نخش الجنة جررررررررررررررى


والبنات ضيعوك من درب الجنة ؟( عقلك في راسك تعرف خلاصك ):rolleyes:

[moh_alnour]

هل معني الدبلوماسية المثال اللي ذكرته في البوست دا ؟ معك انه المجاملة مطلوبة
لكن مفترض اني اجامل ورا الزول قبل قدامه ولا شنو يا " عريس "

أنا تحدثت بصورة عامة يا أم جمال يعني كان مفروض أقول ( بعيدا ً عن موضوع و مثال البوست )
نحن شعب تعودنا أن نمد يدنا لكل من أخطا في حقنا و أن نستقبل في بيوتنا بالبشاشة و الترحاب
كل من كان لنا معه خلافات شخصية و لكن عندما يصل الأمر أن يأتيك هذا الشخص إلى المنزل زائرا ً أو معتذرا ً
فالأمر يصبح مختلفا ً تماما ً و تصبح المشاعر حقيقية و ليس نفاق و على ذلك يمكن أن تقيسي الأمر في محادثة الجوال
أها النجيك لكلمة ( مشتاقين ) دي أنا شخصيا ً ما بتطلع مني إلا حقيقية و عندما أسمعها من شخص و أحس بأنها حقيقية فإن ردي يكون ( بالأكتر )
و لكن عندما تحس بأنها خرجت من لسانه من باب المجاملة أو جرت في لسانه من باب إكمال صيغة السلام فإن ردي يكون ( تشتاق ليك العافية )
و عموما ً النفاق صفة غير جميلة عند الأولاد أو البنات و خاصة النفاق في المشاعر

[amino]

والبنات ضيعوك من درب الجنة ؟( عقلك في راسك تعرف خلاصك ):rolleyes:


:D:D:D:D:D:D:D:D:D:D:D:
:D:D:D:D:D:D:D:D:D:D:D:

وانتوا خليتوا فيهوا عقل
:p:p:p:p:p:p:p

[حاتم مرزوق]

انا بتعجبني مواضيع اختنا مدنية لأنها فيها تسخينة ..

يوجد حقد طبقي
يوجد مواقف
يوجد

والحكاية دي مهمة في العنوان والحصل لي انا مثلا

حقد طبقي ؟؟؟ توش علي الموضوع

مواقف !!!! افتح

ومن هنا ولي قدام اي موضوع ما فيه تسخينة ما حيلقي رواج.

بالنسبة للموضوع:

هي كلها دقيقتين لو مسك الأنسان فيها لسانه لبرئ من تهمة النفاق ولكن الصبر سلعة نادرة.

ان تقول هذا الشخص ثقيل الدم ومن ثم ترفع سماعة التلفون وتضحك معه !! ذلك ما لا يستقيم ثقالة وضحك !!

اللسان هو سبب البلاوي !!وعلينا تلجيمه

[GREY MAN]

والله انا مبسوط من اسلمة الزوقه.

يعني تكون ماسك ليك موضوع مع زول عزيز علي الماسنجر وفجاه يقول ليك دقيقه اصلي ....تعاين للساعه تلقاها عشره.

فالزوقه اسلاميه .........دي تصنيفه شنو؟؟

[مدنيّة]

عموما الشخص الكذاب اي كان بنت او ولد ان وصل مرحلة الابداع في الكذب فللاسف يكون اول من يصدق كذبته


بغض النظر عن تصديقه لكذبته
ح يكون انسان سئ

[مدنيّة]

ملكة قبل ماتفطرى ...

هل يمكن لإنسان أن يرسم الكذبة بإبداع ... ويتلبسه ...

ويتعايش معاها عادى ... كأنه ما حاصل شئ ...
ويحاول الدفاع عنها بكل السبل ....
معقولة .......... دى..

تفطرى على خير

ابوخالد
لطفا
مع انه السؤال موجه للملكة
لكن اسمح لي اجاوب عليه من وجهة نظري

اتخيل انه عاااااااااااااااااادي بيكون ممكن

زمان زمن عجيب وغريب

[مدنيّة]

ظاهرات يا محب

كيف يعني
:mad::mad::mad::mad:

[مدنيّة]

بصراحة انا لا اؤؤمن باطلاق الاحكام المطلقة ابدا سوى كان هذا الحكم مبني على جنس او على نوع . بمعنى عرق اوعلى ىنساء او رجال .

لانه النفس البشرية نفسها معقدة وقد تختلف بين حتى التوام في الطباع ..

لكن سمت العصر وضغوط الحياة وتعدد سبل المواجهه بين الناس جعل النفاق نتاج طبيعي لهذه الخلطة العجيبة .. وهذا الشئ متوفر بين الرجال والنساء ..

تجد مجموعة جالسين في مكان واحد داخل عليهم شخص .. قبل ما يصل مدى السمع اليهم يكونا كلهم قد اغتابوه ..

- اها جانا الكذاب المنافق دا هسع يقعد يمجد لينا في الحكومة..- الثاني ما منتفع ومستفيد ومال عمارته دي كان وارثها د ابوه كان غفير- والثالث انت ولا في العربية الراكبه ..


وعندما يصل .. اااهلا يا ابو عمر شيخنا ابو عمر شرفتنا والله .

درديري مرحب بيك
اول مرة تزورنا


اكيد الكلام ما مطلق
لكن اطلقناه للاثارة الصحفية "حلوة الصحفية دي"

وجد دي حاجة سئية جدا
انه الواحد يكون بوش قدام الناس ولما يدوه ضهرهم يكون بوش غير

وللاسف مجتمعنا مليااااااااااااااان بيها

[مدنيّة]

سمعت لى مقولة من وانا صغير ولسه حافظها :-

النساء كاذبات إلى حد أنه لا يمكن تصديق حتى عكس ما يقُلن ..


شكلها المقولة دي عاملة ليك عقدة لهسي :cool:

[مدنيّة]

إحــــــذر


البنات إذا إجتمعـــن

فالنتيجـــه الحتميــّــه بعد الإجتمـــاع
مصيبــــه:d



ن =النفاق والنميمه
لاصقه فيكم لامحاله :p:d:p
يالبنوت:p

يا المميز
كدي خليني من النساء ومصيبتهم

كلامي القلته دا حاصل ولا ما حاصل

[أشرف صلاح السعيد]

الاخت مدنية رمضان كريم..
اراى بدعواك شئ من العنصرة وان لم تخلو الفكرة من احدى علامات العولمة..النفاق لا جنس له ولا مرحمة..واصدقك القول كانت المرأة من تتهم دوما بالنفاق والمجرمة..لكنا حولنا زماننا وخلطنا الحابل بالنابلة..فبعض الرجال غدا كبعض النساء اساتذة بعلم تبدل وتغير الاقنعة والمكلمة..وكلا الجنسين ببعضة صاروا للنفاق مسيلمة..
نسأل الله الصدق والاخلاء الاوفياء بين الجموع المسلمة..

[مدنيّة]

يعنى متفق معاى

اها يا مدنية اتتنين لو قالوا ليك البنات هم المنافقات يبقى حقيقة

والاتنين فيهم واحد مميز كمان

اها شن قولك

مميز ماقلنا حاجة

لكن التاني عرفنا سبب عزوفه عن الزواج وعقدته :cool:

[مدنيّة]

:eek::eek::eek::eek::eek::eek:
:confused::confused::confused::confused::confused: :confused:
مادائما إذا اجتمعوا البنات يكونوا كدة!!

وإذا فرضنا وقلنا دي صفة في أغلب النسوان , أها تعال شوف أغلب الرجال في جلساتهم وجمعاتهم :eek: ولا أقول ليك إنت عارف براك الحاصل ومافي داعي.


أما عن الموضوع في حد ذاتو , ما القصة بنت أو ولد , لأنو ده مامقياس , وغير كدة دي بقت حاجة شبه عادية , لكن صراحة كدة شاهدتها في الأولاد أكثر من البنات , لأنو الرجال دائما علاقاتهم أكثر من البنات, وبرضو البنت ممكن تحافظ على علاقاته بطريقة ودية , يعني ممكن لو بتكره ليها واحدة تانية أصلا مافي سبب بيخليها تتصل ليها , وهو أساسا الكراهية لزومها شنو؟؟ إلا سبب واضح وأكيد الثانية حتكون عارفة شعورها علشان كدة حتتحاشاها.
غايتو الله يهدي الجميع.:)

اللهم امين يامرام
وكويس انك لاحظتي الحاجة دي برضو معاي

لانها بالجد انا غايتو بلاقيها بكميات ما عادية

[مدنيّة]

يعني ماممكن تحكموا على الغالبية بسبب تجربة شخصية .. والا رايكم شنو ؟




يا الملكة
معظم اراءنا في الحياة نابعة عن تجارب شخصية

[مدنيّة]

مدنية
بأختصار :
الاولاد ينافقوا من اجل مصلحة مادية مفيدة " مزنوق في قرشيات" "شُغل " " فيزا" " نسابة" وده اسمو أسلوب دبلوماسي

اما البنات فحاجاتهم فارغة "فشخرة وبوبار" " شوفوني" " ...حسادة وبس " والامثلة كتيرة يامدنية

هذا والله أعلم

مرحب بود الجعلي

تتعدد الاسباب
والنفاق واحد

والله اعلم

[مدنيّة]

ياجماعة الموضوع واااااااااضح
الرسول صلي الله عليه وسلم قال في ما معناه ( صفات المنافق ثلاث اذا حدث كذب واذا وعد اخلف واذا اؤتمن خان )
يعني النفاق متضمن الكذب واشياء اخر
نجي نمسك الكذب بي صراحة الكذب بتاع البنات بتكلم عن المجموعة الاكبرفي الوصف بهذه الصفه للاسباب الاتيه المراة في المجتمع الشرقي عامه والمجتمع السوداني خاصة محاطه بقيود ومتاريس لتجبرها في كثير من الاحيان للجؤ الي الكذب وبكل الوانه الابيض
اما ادم او ابو الرجال
بجيكم راجعه

ياام قبس
كدي حق البنات خليه

انا منتظرة جيتك لنفاق ادم

[مدنيّة]

الاخت مدنية (عفواً لاختيار اللون الازرق للكتابة )
ولكن في دي والله والله ما جانبك حظ من الحقيقة ( خاصة وانه معروف ان الولد اصدق من البنت ) وموضوع التلفون دا حتى البنات عندهم والامثلة كثيرة ( ودائماً البنت متطلعة لدرجة انها ممكن تكذب او تخلق قصة خرافية ) ووالله النوع دا كتير لمان مالي الحتة ...
عموما ( ظلمتي الولد ) ظلم الحسن والحسين ( والولد بيعيشها بي اي حاجة ) وبيمشي حالو ولا رايك شنو ؟

تخريمة :
صدقا لكلامي قبل فترة من الزمن 4 او خمسة سنين استحضر قصة حكاها لي الرائع ( حمدتو ) ما حمدتو بتاعنا نائب المدير العام واحد تاني ( درس هو في جامعة السودان ) وكان معاهم بنت من كترت ما ممثلة انها حنكوشة الايسكريم بتمسكوا بالتوشس ( المناديل) وفاكها في روحها شديد خلاص ( جنس كضب غايتو ) ويم مرضت وتعبت وصمموا لازم يمشوا ليهم بيتهم وهي تشيل وتعتذر في النهاية الجماعة مشوا ( وطباعا عمره الفقر ما كان عيب ) ولعلمك وعلمي انا وليعلم الجميع ان اغلبية اهل الجنة من الفقراء) ولكن لجهل هذه المسكينة التي ادعت ( وكذبت ونافقت) من اجل ان تظهر بمظهر لن يضيف اليها شيئا ( سوى ) الصحبة الكاذبة وبس .

اها يا مدنية رايك شنو ؟

ردك بسرعة ( دفاعاً او استسلام ) وانا اعرف انك تحبيبن الحق ( كما نحسبك ) -- ( وش مبسوط جنس بسطة) والرجوع للحق فضيلة ...

اولا بعتذر لعدم الرد بسرعة
ناس الشغل كرهونا الشغل زاتوووو :mad::mad:

وبالنسبة للون سماحالمرة دي
لكن تاني ماتكررها:cool:

الزولة الضربت بيها المثل دي يالجندي
زولة مسكينة شديد
واحتمال والله اعلم انها تكون مريضة
لانه مافي زول سوي بيخفي حقيقة وضعه

وبعدين يخفيه عشان يصل لشنووو ؟
ولما يتكشف موقفه ح يكون شنو قدام نفسه قبل الناس !!!

جد حزنت ليها الزولة دي

[مدنيّة]

السلام عليكم و رمضان كريم عليكم
تقبل الله صيامكم و قيامكم
الكذب دا ما عندو جنس ولا لون ولا وطن وتعددت الدوافع و الكذب كذب

وعليكم السلام ورحمة الله وبركاته
الله اكرم ياعبدلله

كلامك صح مية مية

[مدنيّة]

http://www.q8boy.com/images/dsyy5xmfnsivtmccjv23.jpg (http://www.q8boy.com/)


دا الواقع يامدنية صاح

بعد دا كلوا يكون النفاق وين؟

والله لو ما البنات نخش الجنة جررررررررررررررى


amino
وانتو بتبارهم لشنو
لغاية لما يطلعوكم من الجنة ؟!!

[الاميره]

العزيزه مدون..صبحك الله بالف خير
والله الموضوع مهم وحيوى شديد وعلى فكره الكذب عند الصغار سمه لابد منها لتنمية ملكاتهم العقليه ولكن مع الانتباه والتصحيح وتعريفه بانه كذب..
وانا عندى ولد وبنت فى المدرسه الابتدائيه..غير اثنين اخرين صغار فى البيت..
البنت الكبيره بتجى اول ما تدخل البيت هاك يا رقى بالبتعملو فى المدرسه ولما تتلولو فى الحكى بعرفها كذابه وابداء احاصرها بالاسئله لحدى ما اعرف الخطاء ونصلحو
عكس الولد,..سكوت وبعمل الحاجه الهو عايزها وبصر عليها حتى ولو شرحت ليه 10 مرات
البت لو عايزه شى يتدلع وتلف وتدور عكس الولد بطلب حاجاتو على طول..وفى النهايه بتلقى فى كذب متوفر بيناتم ...
ودمتى بالف خير

[مدنيّة]

أنا تحدثت بصورة عامة يا أم جمال يعني كان مفروض أقول ( بعيدا ً عن موضوع و مثال البوست )
نحن شعب تعودنا أن نمد يدنا لكل من أخطا في حقنا و أن نستقبل في بيوتنا بالبشاشة و الترحاب
كل من كان لنا معه خلافات شخصية و لكن عندما يصل الأمر أن يأتيك هذا الشخص إلى المنزل زائرا ً أو معتذرا ً
فالأمر يصبح مختلفا ً تماما ً و تصبح المشاعر حقيقية و ليس نفاق و على ذلك يمكن أن تقيسي الأمر في محادثة الجوال
أها النجيك لكلمة ( مشتاقين ) دي أنا شخصيا ً ما بتطلع مني إلا حقيقية و عندما أسمعها من شخص و أحس بأنها حقيقية فإن ردي يكون ( بالأكتر )
و لكن عندما تحس بأنها خرجت من لسانه من باب المجاملة أو جرت في لسانه من باب إكمال صيغة السلام فإن ردي يكون ( تشتاق ليك العافية )
و عموما ً النفاق صفة غير جميلة عند الأولاد أو البنات و خاصة النفاق في المشاعر




ياود الجاك والله انا من خلال الشفته دا ابدا ما عجبني
وبعدين ما مرة ولا اتنين

د يوصلت لدرجة اني صنفتها "ظاهرة" من كترتها

ياخ كيف الواحد لما يشوف رقم زول
يتزهج ويتنرزف قبل مايرد
واول مايرد
يبقي الكلام غير ؟؟!!!

يعني البجبرني شنو اعمل كدا
غايتو من ناحيتي ماشايفة انه في زول مجبور يعمل كدا


همسة : وانا اقول شابكني طوالي تشتاق ليك العافية لية :cool:

[مدنيّة]

انا بتعجبني مواضيع اختنا مدنية لأنها فيها تسخينة ..

يوجد حقد طبقي
يوجد مواقف
يوجد

والحكاية دي مهمة في العنوان والحصل لي انا مثلا

حقد طبقي ؟؟؟ توش علي الموضوع

مواقف !!!! افتح

ومن هنا ولي قدام اي موضوع ما فيه تسخينة ما حيلقي رواج.

بالنسبة للموضوع:

هي كلها دقيقتين لو مسك الأنسان فيها لسانه لبرئ من تهمة النفاق ولكن الصبر سلعة نادرة.

ان تقول هذا الشخص ثقيل الدم ومن ثم ترفع سماعة التلفون وتضحك معه !! ذلك ما لا يستقيم ثقالة وضحك !!

اللسان هو سبب البلاوي !!وعلينا تلجيمه

شكرا كتير يااستاذ حاتم علي ذوقك
وشهادتك في حقي
وسام اضعه علي صدري


اكيد اللسان سبب بلاوي كتيرة

غايتو الله يقدرنا ونتحكم فيه

[مدنيّة]

والله انا مبسوط من اسلمة الزوقه.

يعني تكون ماسك ليك موضوع مع زول عزيز علي الماسنجر وفجاه يقول ليك دقيقه اصلي ....تعاين للساعه تلقاها عشره.

فالزوقه اسلاميه .........دي تصنيفه شنو؟؟

يا grey man
ماتعصر علي شديد في الحتة دي

لكن احتياطي كدا

الزوغة شينة
واسلمتها حرام

[مدنيّة]

الاخت مدنية رمضان كريم..
اراى بدعواك شئ من العنصرة وان لم تخلو الفكرة من احدى علامات العولمة..النفاق لا جنس له ولا مرحمة..واصدقك القول كانت المرأة من تتهم دوما بالنفاق والمجرمة..لكنا حولنا زماننا وخلطنا الحابل بالنابلة..فبعض الرجال غدا كبعض النساء اساتذة بعلم تبدل وتغير الاقنعة والمكلمة..وكلا الجنسين ببعضة صاروا للنفاق مسيلمة..
نسأل الله الصدق والاخلاء الاوفياء بين الجموع المسلمة..

الله اكرم اشرف اخوي
وتصوموا وتفطروا علي الف خير يارب

اكيد النفاق لا جنس له
لكن زي ماقلت من خلال البوست
العنوان من قبيل الاثارة الصحفية ليس الا

ناس الاعلام بيقولوا الخبر ان تقول
عض الرجل الكلب
لا ان تقول
عض الكلب الرجل


همسة : شايفاك متحامل شديد علي جنسنا :cool:

[مدنيّة]

العزيزه مدون..صبحك الله بالف خير
والله الموضوع مهم وحيوى شديد وعلى فكره الكذب عند الصغار سمه لابد منها لتنمية ملكاتهم العقليه ولكن مع الانتباه والتصحيح وتعريفه بانه كذب..
وانا عندى ولد وبنت فى المدرسه الابتدائيه..غير اثنين اخرين صغار فى البيت..
البنت الكبيره بتجى اول ما تدخل البيت هاك يا رقى بالبتعملو فى المدرسه ولما تتلولو فى الحكى بعرفها كذابه وابداء احاصرها بالاسئله لحدى ما اعرف الخطاء ونصلحو
عكس الولد,..سكوت وبعمل الحاجه الهو عايزها وبصر عليها حتى ولو شرحت ليه 10 مرات
البت لو عايزه شى يتدلع وتلف وتدور عكس الولد بطلب حاجاتو على طول..وفى النهايه بتلقى فى كذب متوفر بيناتم ...
ودمتى بالف خير

اهلييين بالاميرة
نورتي الحتة

تعرفي يااميرة

حيانا بتساءل منو العلم الاطفال الكذب ؟
او هو خيال وهم بيسرحوا بيه شوية ماعارفة
لانه زي ما ذكرتي هندهم حكاية مبااااااااااالغة

همسة : ربنا يحفظ ليك الاولاد ويخليك ليهم

[ود الجعلي]

مدنية
انا بديك يا بت القبائل " بيان بالعمل "
قريت ردودك كلها في البوست بتاعك ده

وماشاء الله عندك مقدرة وطاقة جبارة في الردود
"اللهم لاحسد " وده ممكن يكون نفاق محمود ومقبول
وهو مايسمى بالمجاملة

وصدقيني ده لو كان ولد كان ما ممكن يرد على كل المتداخلين بهذه الحرفية العالية حتى لو رد على الناس كلها ممكن تحسي بعدالرد التالت
تبدا اللهجة تتغير لانو بكون اصابو الملل والزهج وامكن ما يكمل ........... وامكن يعمل ليهم كلهم مع بعض رد واحد ويكتب عليهو اسماءهم وعبارة اشكركم على المرور

هجمة مرتده: مدنية اتي شايقية؟؟؟؟؟؟؟

[محمد هاشم]

إن كيدهن عظيم

[شيخ الحارة]

اختي

ماسمعتيه عنا فئة قليل

وماسمعناهو عنكم وشفنا وشاهدنا اذيد من القليل

حقيقة في الغربه سمعت كذب الرجل للمخارجه من الورطة وبرضو كذب عند الكاتبين

وما عايشنا مع البنات لتورط وبرضو يكتب كذب

الا من رحهما الله

وارقدي عافية

بدون (عتب) نفيات بس

[ام قبس]

جيييييييييييتك يامدون لي نفاق الرجال
طبعا البنات ممكن يكونوا كضابات
بس الرجال منافقين شديد شديد علي قول قبس بتي ( ودا دليل علي تأكيدها لي اي شيء)
يعني كضب +خيانه+وعود في الهواء= راجل يمشي علي قدميه
نجي نمسك الاولي
الكضب البنات اتعلموة من وين ؟ من الرجال
يعني الواحدة لو عاوزة تكضب حتكضب علي امها ولا علي اخوها البيعمل اي شيء غلط ومسموح بيه ويجي يتبجح بيه
ولمان تعمل هي حاجه قدر النمله يعمل ليها فيها ابو الصالح العام
ولو حاولت تبر موقفها في خطائها لازم يجرسها يعني مابيكتفي بالتلميح بتاعها لاعترافها بي غلطها
وقيس علي كدا لحدي ماهو يشككها في نفسها او يخليها تبحث عن كضب مدنكل
يعني ذي ماهو بيسعي لتثبيت انها مابتفهم ومابتعرف تتصرف هي بالكضب وابتكار اساليبه بتسعي لاثبات عكس ذلك
وبرضه كل العلاقات بين الراجل والمراءة لو بداءت بالكذب تأكد ان الرجل وراها
يعني لو الراجل متواضع البيخلي البت تحاول تظهر ليه انها مروقه شنو وتكذب عليه
نجي للخيانه كمان دي حقت الرجال والنسوان
اجي يا بنات امي
مالرجال معروفين الواحد لو ماخان عينك عينك كدا عيونه دي مابتقصر
وبجيكم لي باقييكم بعدين

[مدنيّة]

مدنية
انا بديك يا بت القبائل " بيان بالعمل "
قريت ردودك كلها في البوست بتاعك ده

وماشاء الله عندك مقدرة وطاقة جبارة في الردود
"اللهم لاحسد " وده ممكن يكون نفاق محمود ومقبول
وهو مايسمى بالمجاملة

وصدقيني ده لو كان ولد كان ما ممكن يرد على كل المتداخلين بهذه الحرفية العالية حتى لو رد على الناس كلها ممكن تحسي بعدالرد التالت
تبدا اللهجة تتغير لانو بكون اصابو الملل والزهج وامكن ما يكمل ........... وامكن يعمل ليهم كلهم مع بعض رد واحد ويكتب عليهو اسماءهم وعبارة اشكركم على المرور

هجمة مرتده: مدنية اتي شايقية؟؟؟؟؟؟؟

ياود الجعلي
كلامك شهادة اعتز بيها


غايتو انا بالذات في حتة الردود دي بكون مستمتعة جدا
وانا برد علي الناس

ولو بمرادي اصل الناس في مكانها عشان ارد عليها


رد الهجمة :: ياريت

[ابراهيم]

مع انه في راس الشخشي انه البنات واضحاااااااااااات ما منافقات
يعني المابحبوه ما بيقيفوا ليه في الظلط
بوصفوا ليه البيت غلط ادددديل كدا

مدنية معليش
منكن تشرحي الحتة دي تاني

[مدنيّة]

مدنية معليش
منكن تشرحي الحتة دي تاني

ههههههههههههههههه
شنو ياابراهيم
البيوتفول دي
اتغير ولاشنو!!

[ابراهيم]

بيوتيفل ما معانا هنا
اشلاحي لينا الموضوع دة هههههه

[مدنيّة]

بيوتيفل ما معانا هنا
اشلاحي لينا الموضوع دة هههههه

اها جات من الله
قلت لي اعمل شنو!!! ههههههههههههههههههههه

[ابراهيم]

خلاص خليتك
غايتو محظوظة حظ

[مدنيّة]

خلاص خليتك
غايتو محظوظة حظ

كل زول حسب نيته ياابراهيم ياخ
جيت تصيدني
اهو قلبت عليك :cool:

[ابراهيم]

انا نيتي كانت سليمة والله

[ودسمير]

تحايا بطول المسافه بين مدنى والخرطوم ...
اختى اولا ليس دفاعا عن الاولاد ولكن ..
كلمة النفاق دى حاره جدا ..
ممكن يكون كذب ( لا اكذب ولكنى اتجمل ) وهى ليست حكرا على الاولاد ولكن على الجنسين
اتمنى ا ن يلهمنا الله المصداقيه ويجنبنا كل ما هو ضدها حتى لو فى سبيل المزاح .

وحتما سنلتقى

[النويري]

النفاق يا مدنون ذي ما قال ليك معتصم بره السودان شيء فظيع جداً واحد مره من المرات شغال مندوب مبيعات مدير التسويق شافو في الإشارة أتصل عليهو قال ليهو يا فلان وين أنت وهو شايفو قال ليهو أنا في الشركة الفلانية بخلص في شيك وبجي المكتب المدير قال والله المندوب عمروا ما يتمسك جاء بي جمبوا وضرب ليهو البوري وفات خلاهو والنماذج كتيرة تلقى الجماعة في بيت العزابة في الكوتشينة والواحد زوجتو تتصل عليهو يقول ليها أفتحي الباب انا قريب منكم وهو بينو وبين البيت 45 دقيقة والله عجائب

مدون بجيك راجع للجنس اللطيف

تخريمة: البوست دا جميل ياخي أنا ما شفتو لي

[montaser kabaly]

سلامات مدنية البوست
اولا انا بختلف فى التخصيص وبتفق فى المسمى على عمومياته على الطرفين وبفتكر دا نتاج للقولبة المفاهيم ولاسف اصبح يأطر له باعتبار تسميات تانية مثل الرياء الاجتماعى وكدا
المشكلة بتكمن فى انو الطرفين الراجل والست اى طرف بيكون على علم ولو بالحد الادنى بنفاق الاخر وبكون مستمتع بالمواصلة ودا على مستوى العلاقة بين حبيبين او زوجين بس بستثنا رابطة الصداقة مالم تندرج تحت اى تصنيف
مسالة ضعف الانثى انا مابتفق معاك بالنظرة المادية للضعف لانو الحديث البتمسكبيه الناس مسالة خلق الانثى من ضلع اعوج للاسف تفسيره خاطى فى الاذهان فالضعف حسب التفسير معنوى وليس مادى
فعلى العموم دا تنميط سالب للعلاقة الاجتماعية بمفهوم النفاق ودمتى.

[مدنيّة]

انا نيتي كانت سليمة والله

النية زاملة سيدها زي ما بيقول المثل اليوغندي ياابراهيم
واهي ظهرت بوقعتك :cool:

[مدنيّة]

تحايا بطول المسافه بين مدنى والخرطوم ...
اختى اولا ليس دفاعا عن الاولاد ولكن ..
كلمة النفاق دى حاره جدا ..
ممكن يكون كذب ( لا اكذب ولكنى اتجمل ) وهى ليست حكرا على الاولاد ولكن على الجنسين
اتمنى ا ن يلهمنا الله المصداقيه ويجنبنا كل ما هو ضدها حتى لو فى سبيل المزاح .

وحتما سنلتقى

يديك العافية يامعتز

---------
الكذب والنفاق
وجهان لعمة واحدة يامعتز
واكيد ما مقتصر علي الاولاد فقط

---------
اللهم آمين يارب

--------
تحاياي معتز

[مدنيّة]

النفاق يا مدنون ذي ما قال ليك معتصم بره السودان شيء فظيع جداً واحد مره من المرات شغال مندوب مبيعات مدير التسويق شافو في الإشارة أتصل عليهو قال ليهو يا فلان وين أنت وهو شايفو قال ليهو أنا في الشركة الفلانية بخلص في شيك وبجي المكتب المدير قال والله المندوب عمروا ما يتمسك جاء بي جمبوا وضرب ليهو البوري وفات خلاهو والنماذج كتيرة تلقى الجماعة في بيت العزابة في الكوتشينة والواحد زوجتو تتصل عليهو يقول ليها أفتحي الباب انا قريب منكم وهو بينو وبين البيت 45 دقيقة والله عجائب

مدون بجيك راجع للجنس اللطيف

تخريمة: البوست دا جميل ياخي أنا ما شفتو لي

ابدأ ليك من حيث انتهيت يانويري
البوست دا مكتوب من يوم
01-09-2009
لكن ابراهيم رفعه
له الشكر والتحايا

----------
الموبايل دا غايتو كشف جنس حاجات في الناس يانويري ههههههههههههههه
ربنا يهديهم
ويغفر لهم ولنا

--------
شكرا نويري
ومنتظرة رجعتك

[مدنيّة]

سلامات مدنية البوست
اولا انا بختلف فى التخصيص وبتفق فى المسمى على عمومياته على الطرفين وبفتكر دا نتاج للقولبة المفاهيم ولاسف اصبح يأطر له باعتبار تسميات تانية مثل الرياء الاجتماعى وكدا
المشكلة بتكمن فى انو الطرفين الراجل والست اى طرف بيكون على علم ولو بالحد الادنى بنفاق الاخر وبكون مستمتع بالمواصلة ودا على مستوى العلاقة بين حبيبين او زوجين بس بستثنا رابطة الصداقة مالم تندرج تحت اى تصنيف
مسالة ضعف الانثى انا مابتفق معاك بالنظرة المادية للضعف لانو الحديث البتمسكبيه الناس مسالة خلق الانثى من ضلع اعوج للاسف تفسيره خاطى فى الاذهان فالضعف حسب التفسير معنوى وليس مادى
فعلى العموم دا تنميط سالب للعلاقة الاجتماعية بمفهوم النفاق ودمتى.

هلا منتصر

---------
التخصيص سببه تقسيمات الجندر وكدا يامنتصر ههههههههههههههههههه

----------
عارف يامنتصر
حتي في الصداقات في زمنا دا بيكون فيها نفاق
لانه قلما نجد صداقة حقيقية وخالصة لوجه الله تعالي
بدون مصالح

--------
تحاياي