قاموس الاصوات والكلام

[درديري كباشي]

عندي ملاحظات في كلامنا الدارجي نحن السودانيون تحديدا وهي اننا نستخدم شئ اشبة بالموسيقى التصويرية عندما نحكي كان الكلمات والتعبيرات لاتكفي لدقة وصف ما نحكي ... لذلك نكملها باصدار اصوات تقلد ما سمعنا ... وانا لم الحظ تميزنا وتفردنا بهذا الشئ الا بعد ان اغتربت واحتكيت بجنسيات اخرى بمختلف اللغات واللهجات .. لقد تطرقت لذات الموضوع قبل ذلك بطريقة محتلفة وبعنوان اصوات وكلام ... قد تكونوا لم تفهموا بعد بما عنيته بالموسيقى التصويرية لكن يمكن بعد قرائه هذا المقطع الاسكتش الصغير تتضح الرؤيا . تخيلوا ان احدهم جاء يحكي لنا ..
... تعرفوا يوم الخميس الفات بالليل كدا براي من نفسي قلت الليلة لازم اصل بيت ناس كربوج داك واعرف سرهم ... اول حاجة رنننننننننننننن ضغط الجرس .. وانتظرت شوية مافي زول فتح ... تاني قلت يمكن الجرس ما شغال ... طق طق طق دقيت الباب بيدي ... برضوا ما في زول فتح .... بس اتناولت حجر من الشارع .. وكو وكو وكو دقيت بكل قوتي ... بعد شوية كده .... فت فت فت سمعت صوت خطوات جاية على الباب ... رجعت لورى شوية كدا ... بعد شوية .... زييييييت الباب فتح .... لكن ما في زول ظهر ... بس فجاه فاااااو جات حاجة جارية .. انا اتخلعت وبسرعة حتى ما عرفتها هي حيوان ولا بني ادم ... يا زول انا لاوزت ... ومسكت جلابيتي باسناني .. وبت بت بت قمت جاري جري شديد .. ما وقفت ليك الا جمب بيت ناس حاج سعيد ... ومليت الكوز من زير السبيل بتاعهم .. وقرطع قرطع قرطع ... قطعت لي كوز كامل ... وهاف هاف هاف ... نفسي دا طالع ونازل ... ودق دق دق قلبي دا يدق .. وانا مركز ناحية بيت ناس كربوج ... فجاه نااااااااااااان جات عربية شرطة وسسسسسييييييييييك حكت فرمله قدام بيت ناس كربوج .. تلب تلب تلب نطوا ليك منها عساكر ... وكو كو كو دقوا الباب بقعر البندقيه .. الباب ما فتح بس واحد منهم رجع ورا .. وجا جاري كاررررراو كسر الباب برجليه ... بس العساكر دخلوا جوة .. ومن بعيد تسمع كشلن كررراو صوت كسير اظن كسروا كل حاجة ... بعد شوية تسمع لب وووووواي لب واااي الظاهروا وقعوا ضرب في الجماعة .....

[درديري كباشي]

وانا معاكم في انه لكل شعب خاصية في التعبير اضافة للكلام ... يعني مثلا نلاحظ انه المصريين يستخدمون اياديهم اكثر اثناء الكلام ... مثلا عندما يقول ( انت فاكرني عبيط .... ونعم يا اخويا ... وانا ما اتكلش اوانظا ) كل عباره من هذه العبارة عندها حركة باليدين تتبعها يعني مثلا يخط اصبعه جهة راسه عندما يقول هو انت فاركني عبيط ؟؟؟ ويضع يديه في وسطه عندما يقول ..... نعم يا اخوي ؟؟؟؟ وهكذا ...
اما نحن السودانين نستخدم تقليد الاصوات قد لاتكون بصورة ظاهره او عند كل الناس لكن لا ينكر احد بانها موجوده في لهجتنا .... والدليل شاعرنا الشعبي الفذ محمد الحسن سالم حميد استخدم هذه التعابير الصوتيه في احد قصائده ... مثل قصيدة الضو:

ساعة وداعو بقت طرب
غنى وضرب بي طوتو عن ساعة العشي
بانت نويرات العرب ... حزنانة غبشى مدعشى
حس الصبار في الموية ... والقعو والمعوز
طراهو للديك العجوز
يا الضو يجوز
ينجا ويجوز
الصبرة كمير كو كو
تنعشا عشاها من ضو
الصبرة حرامية وشو
في خبال خازوقا اتلولو
لا ترمي دموعك شو شو
قاوم والمرة بتحلو
ترف استخبارتن اوو
صاج الدبابة الكررو
ضنب لطيارة الفي الجو
الترمي القنابل بو بو
كم يبني بلادك يا الضو
كم يبني بلادك يا الضو
والضو بكى ... فورن وشي
من شوقا واللا من العذاب الفوقا
واللا من التعب غالبو المشي
وكل فردة جارها من بلد
يا الضو سلامتك جيت متين
سبتوها وحدا للدعت
سبتوها وحدا يالخزين
سبتوها وحدا للبعوض ... للطير ودباي البحر
لون الضبابين الكلاب الجندب الفار السعر
يا الضو بلدنا وودعت
راحت شتول دوب فدعت
فاتت بيوت ما ضاقت الزين والعديل ما اتمتعت
باعت سعايات انسعت
يا الضو تليسو بالقصاد
وآخر المطاف شملة كنيشي اتوسعت
حلتنا غرقت من طرف
حلتنا غرفت في شبر
غرقنا يالضو صح سرف

[درديري كباشي]

طبعا الكلام الفات داك كله كان مقدمة للقاموس ونحن محتاجين نبنيه مع بعض .. وهو قد يفيدنا في كتاباتنا اليوميه خاصة في قصصنا الشعبية :

- زيتك زيتك زيتك : قطعه بالمقص
2- شرررررررررر: الماسورة صبت
3- برطع برطع برطع : العوير الخواف قام جاري
4- كارررررررو : الباب وقع في الارض (باب خشب )
5- كاشششلالاو : كسر ليه قزاز العربية
6- كلللن كلللن كللن : الجرس ضرب
7-تولبوت : الحرامي نط الحيطة
8- بردلوب : العوير وقع ( لازم يكون عوير لان بردلب تشير الى انه الوقعة بدون اي كنترول او مقاومة يعني وقعة سودة )
9-كررررررررر : جراه بالواطه
10- جرررررررر : الكلب قام فينا
11- زت زت زت : جا ماشي علينا عاجباه روحه ولبسته العسكرية .
12- قرمش قرمش قرمش : اكل البسكويت ناشف
13- كرم كرم كرم : اكل العجور
14- خمش خمش خمش : اكل البطيخة
15- كرش كرش كرش : حكى ضهره
16- نااااااااااااااااااان : العربية جات ماشة
17- بيب بيب بيب : ضربت بوري
18- لووووب : رشيته بونية لمن آمن
19- صصصصصاج :: محطة بالصوت في ضهره
20-فت فت فت فت : وقع يفتفت ( يفرفر ) في الارض
والبقية ستاتي

--------------------------------------------------------------------------------

[أشرف صلاح السعيد]

كنتا ماشى ليك تنكش تنكش واغنى وشوية احس ليك بشى وراى اتلفت فيو يختفى..قلبى بدا يدقدق لما سمعتو دُق دُق دُق دقدقة شديدة خلاص..يازول قمتا فننن جارى وطبعا من شدة الخوف ماشفتا ليك شجرة النيم قدامى وتوووووش دخلتا ليك فيها بوشى طاااااخ..وقعت ليك فى الارض لب ضهرى لمااااان طرق طق طقطق..يازول قمتا فى ثانية وجرى فيو نضيف لمن وصلت البيت لقيت الباب قافل وفى ثانية تلبت ليك بالحيطة تُلُبُت واقع ليك كُنكُرُب فى ضنب كلبنا النايم جنب الحيطة وقام ليك مخلوع ويكورك او او او ..وادخل ليك البيت الاقى ليك ناس مابعرفم فى البرندة نايمين وفيهم زول واحد صاحى وقبل مااسألو تااااح ادانى ليك كف خلا اضانى صنننن تصن..
واقوم ليك من النوم مخلوع..لكن جنس حلم هو خلانى اشرب ليك موية التلاجة قرطع قرطع ماخليت لناس البيت نقطة..

[مدنيّة]

ماخليت لناس البيت نقطة..

طبعا في الاول قريت نقطة دي انتفضت
لكن تاني اتذكرت انها زادت

درديري كعهدنا بك
دوما مكمل الروعة

[درديري كباشي]

لب لب لب لب

سلام حاااااااار لمدنية واشرف

كررررررررررررررررررررر جريت العنقريب جبته في ضل النيمة

وطاخ طاخ طاخ نفضته من الغبار


واتفضلوا اقعدوا مالكم واقفين ..



:هات شلن :::: عطسة رجالية
هاتسون عطسة ستاتية وفي رواية اخرى هتش فقط وخاصة عند الحناكيش
22:سيك سيك سيك : ساق العجلة برااااحة
23:دل دل دل دل : شغل البابور ( السواقي كسلا يا حليلة )
24: كر كر كر كر : الدبابة جات ماشة
25: بامممممممم : الطيارة رمت قنبلة

26: تششششششش: صوت الطعمية في الزيت
27 : طشششششششش: العربية دخلت في موية المطرة
28: زط زط زط : جلدها بالحزام او بسير البلاستيك
29: وللوللوللللووي : سكلبت
30: ايوي ايوي ايوويا : ضرتها زغردت فرحانة
31: آتشووووم : عطسة نسائية
32: قدف دقدف دقدف : القطار اتحرك

[درديري كباشي]

اكثر مكان يستخدم فيه الاصوات هو وسط الكورة والسينما

في الكورة مثلا ,,

زيتك مهند طلع من الاول وزيتك طلع من الثاني ولاب فكاها ليك موزة لهيثم مصطفى .. وهيثم طار ليك معاها على الطاير .. ولب وين في المقص ... الحارس دا فاوو طار ليك ورب وقع سف النجيلة وما جاب حاجة ..

[ود الجعلي]

موسوعة

يديك العافية وعيني باردة