بتاع الغاز التعيس

[monim]

كان الوقت في عز الظهيرة وقطع الغاز بالمنزل ، فذهبنا أنا وبناتي الصغار ( زوبة ) و( فيفي ) لمحل الغاز الوحيد ووجدناه مغلقاُ وكل مرة نلف الشارع ونجي راجعين ونلقاه لسه ما فتح ، فأقول للبنات ( بتاع الغاز التعيس ده لسه ما فتح ) فيموتون بالضحك ... فصارات مضحكة وسخرية وسميناه بتاع الغاز التعيس ، وبقيت كل ما نطلع ومعاي البنات يقولوا لي يا بابا شوف داك يشبه بتاع الغاز التعيس ، يا بابا ده برضه تعيس ذي بتاع الغاز ... وضحكة برئية تفرقع في السيارة .

عايز من أصحاب التجارب مع الناس التعيسين يحكوها لينا هنا ، ودي في السودان كتيرة جدا وما تتحسب فمثلا تجي لبتاع الدكان وبعد ما تشتري الفول وتصلحه يقول ليك بصوت ( قليد ) وبايخ : والله العيش أنتهى ، فهذا تعيس ، والبتمشى وتجي وتلقاه في محله ما سوى شيء وما قدر يتصرف ده تعيس ، والبتحكي ليه ساعة وتفهم فيه وفي النهاية يقول ليك ( آآآْْْْْْْْءءء ؟؟؟) ، ده تعيس ، يا اخونا الشخصية التعيسة كثيرة في المجتمع ومكرهاه حياته
يلا كل زول يكب لينا التعساء البعرفهم ... من أجل الوصول لتشريح هذه الشخصية التعيسة وهي شخصية جامدة وسلبية وغير معطاءة . وتتسبب في رفع ضغط المجتمع وتزيد وتيرة الامراض المزمنة فيه ... وفي النهاية مبادراتكم وآرائكم لتحجيمها وتقليصها الى اقل قدر ممكن .

مع عميق ودي

[درديري كباشي]

هلا يا منعم موضوع لذيذ ويلا لقي طرفك ..

الممرضة التعيسة البتصحيك من النوم عشان تديك حبة منومة

الكمساري بتاع البص الشايفك مدخل يدك في جيبك ولسع بيطقطق ليك في اضانك..

سيد اللبن شايفك انت جايي من الدكان علي البيت ولسع بيدق الباب بعكازه ..


بتاع التاكسي شايفك ماشي على عربيتك يقاطع عليك عايزك تركب معاه هو

[ود الجعلي]

في بقالة جمبنا سيدها هندي اسمو عبدالرشيد التعيس لانو بضاعتو كلها ضاربة ومعفصة ومدتها قربت تنتهي

[monim]

"]أنظروا الى هؤلاء التعساء : [/font]


صاحب دكان دكانه حصله موت أكلينيكي وبدأ يتلاشى ، مشى ليه ود عمتي أشترى منه أمواس حلاقة وكانت آخر ما يملك وبعدها أعلن وفاة دكانه رسميا .... شفتوا تعاسة أكترمن كده


صاحب كوفي نت ما عنده سي دي روم وما عنده مشغل فيديو وما عنده تحميل صور وكل السماعات خربانة وأحيانا كثيرة شبكته قاطعة وأحيان أكثر كهربته قاطعة ومرات هو ذاته قاطع .... تعاسة مدنكلة


دكتور انف واذن وحنجرة لا يملك من معدات الكشف على هذه الاجهزة الحساسة سوى بطارية صغير ( يجهر ) بيها اضانك ويآخد سبعين الف وعيادته ما فيها كراسي ولا موية والاستقبال برندة زنك حارة وبعد ده كله مزدحم .... دى ما تعيس هو لكن تعيسين العيانين القاعدين في البرندة الحارة دي وحا يدفعوا سبعين الف نظير ( جهرة ) البطيطيرية .


سواق الحافلة الما يحلى ليه يكب بنزين الا لمان يكون شاحن فل والواطة حارة


الكمسنجي البقول عربي عربي في موقف الكلاكلة شرق والله ليه 12 سنة ما اتغير ولا اتبدل ولا اتطور ولا ملَ كل ما أمشي اجازة القاه ذاته يكورك ( عربي غابة .... عربي حرية )

[monim]

الزول البصاقر التلفزيون 24 ساعة ومعلي الصوت لى آخر شي ومتابع لي أي برنامج حتى الآذان ما عنده قشة مرة .

المغترب البتلقاه قالب قناة السودان 24 ساعة ما عايز أي ثقافة تانية .


الزول الكل ما تضرب ليه ما يرد ولمان يرد يقول ليك والله لقيت مكالماتك لكن ما عندي رصيد .... الزول الرصيده قاطع طوالي وهو ما محتاج ده في نظري تعيس


السعودي الكل ما يلاقيك يقول ليك تتعشى معي اليوم ... وقبل ما يسمع ردك يقول ليك طيب في أمان الله سلمي لي على الوالدة وينصرف


بتاع المطعم السوداني الكل ما تجي داير فلافل تلقاه يا دوب ختاها في الزيت عمرها ما ترجاك جاهزة .

[أشرف صلاح السعيد]

الحلاق التفهمو انك بتحلق بالمكنة الشعر كلو بمستوى واحد ويصر يقنعك ويحلق ليك مارينز..حلاق تعيز قصدى تعيس..
سواق التكسى التاخدو مشوار وتفهمو انك مستعجل جدا وتتفق معاو بالهو عايزو وتلاقيو يهدى كل ما يلاقى ليو واحد ماشى كدارى..تعيس..
الزول البيجيك وعندو مصلحة من خلالك وتسهلا ليو وتلاقيو يلف ويدور عشان يغمت ليك حاجة عشان عرف انك ممكن تفتح ليو شغل جديد..تعيس ..
الزول الماعندو لا خبرة ولا راس مال وعايز يشاركك فى مشروع من فكرتك وانتا بتقدر تنفزو افضل من غيرو وتلاقيو لسه بيعمل وهمات عشان يشاركك ..تعيس..

[monim]

الحلاق التفهمو انك بتحلق بالمكنة الشعر كلو بمستوى واحد ويصر يقنعك ويحلق ليك مارينز..حلاق تعيز قصدى تعيس..
سواق التكسى التاخدو مشوار وتفهمو انك مستعجل جدا وتتفق معاو بالهو عايزو وتلاقيو يهدى كل ما يلاقى ليو واحد ماشى كدارى..تعيس..
الزول البيجيك وعندو مصلحة من خلالك وتسهلا ليو وتلاقيو يلف ويدور عشان يغمت ليك حاجة عشان عرف انك ممكن تفتح ليو شغل جديد..تعيس ..
الزول الماعندو لا خبرة ولا راس مال وعايز يشاركك فى مشروع من فكرتك وانتا بتقدر تنفزو افضل من غيرو وتلاقيو لسه بيعمل وهمات عشان يشاركك ..تعيس..



والله يا اشرف فعلاً جماعتك الفوق ديل تعسا ء بالطريقة الصححححح .... والمؤسف أنهم بقوا كتيرين خلاص .... الله يستر علينا منهم
مع شكري الجزيل لك أخي الفاضل

[monim]

في بقالة جمبنا سيدها هندي اسمو عبدالرشيد التعيس لانو بضاعتو كلها ضاربة ومعفصة ومدتها قربت تنتهي



ده يا الجعلي ممكن يكون ( مقسم ) أو ( كبانية ) تغذي منطقتكم كلها بالتعاسة .... يا ساتر منه

[monim]

السوداني البفضل يدق بشدة جرس بابك ودون توقف لدرجة تصيبك وكل ناس بيتك بالتنشن .... لما تنزل تلقاه غلطان في الباب وعايز باب جارك ده تعيس .


سواق الحافلة المعلي صوت المسجل للطيش والناس لصق بعض ويتونسوا بالكواريك وصوت الجوالات يصمت مع صوت المعركة أقصد الشريط ، عندما تطلب من السائق خفض الصوت عشان عندك مكالمة وينط واحد يطلب منه يرفعه تاني تاني ده تعيس

الزول البتصيد العزومات ويجيد اصطيادها وحضورها ويحرص على تلبيتها ، لكنه بالمقابل عمرو ما أقام واحدة في بيته وكل عزوماته من شاكلة ما تمر علينا وماتنقطع وخلينا نشوفك ...ده تعيس

الضيف البقوم معاك الشغل بدري ويركب معاك ترحيل الشركة ويطلع معاك الشركة ويشرب معاك قهوة وبعد شوية يفطر وبعد الفطور برضه ما مشى ده أكتر من تعيس ... ده ممكن يدخل في فئة تعيس وبائس كمان .

[monim]

الزول الجلدة الكل ما يباريك في موقف فيه دفع مطعم ... مواصلات ... تلقاه يدخل يده في جميع جيوبه واحد تلو الآخر وتخرج فاضية ويحاول بحركاته وتعابير وشه يوريك أنو جادي وعايز يدفع ... وفي النهاية عندما يراك دفعت يهدأ ويخرج يديه من جيوبه ويتنفس الصعداء ويفرح بي جواه ... ده تعيس

[الملكة اسماء ( ام محمد )]

هههههههههه
عليكم الله واصلوا
ابتديت احس اني ( تعيسة ) لاني ماشفت الكلام دا من بدري

سؤال = ليه اخترنا كلمة تعيس ما ( فقر ) مثلا ؟

[ابوخالد]

بتاع عربية الإسكريم البيحوم حولك وإنت قاعد فى البر

والا الخلا ومبسوط مع العيال الأربعة ....

ده تعيس والا عايز دقة ...

[monim]

هههههههههه
عليكم الله واصلوا
ابتديت احس اني ( تعيسة ) لاني ماشفت الكلام دا من بدري

سؤال = ليه اخترنا كلمة تعيس ما ( فقر ) مثلا ؟



هلا بالملكة

سعيد بمرورك والتعيس والفقر هما أولاد أعمم شققة وود خالتهم البائس

[monim]

بتاع عربية الإسكريم البيحوم حولك وإنت قاعد فى البر

والا الخلا ومبسوط مع العيال الأربعة ....

ده تعيس والا عايز دقة ...


مساك الله بالخير أبو خالد

لكن تعرف الاتعس منه الراجل بتاع العجلة بتاعة الشاي والقهوة الفي حديقة الملز .... شايفك راصي الترامس بتاعتك كلها قدامك وبعد ده يدور حولكم .... تفتكر ده بيلعب على شنو ؟؟؟؟ لا أرى له مبرر سوى أنه تعيس

[monim]

تعيس .... الزول الكل ما تقترح حاجة يضع ليك متاريس وعوارض وهمية ويكسر مقاديفك ...

تعيس .... الزول الشايفك شغال وتعبان وينظّر ليك بي خشمه دون أن يمد أيده لمساعدتك

تعيس .... الزول الكل ما تسوي فيه حسنة ينظر ليها باستقلال وتكبر ويطمع في المزيد دون قولة شكرا ..

تعيس ... الزول الكل ما يجي من السفر تقول ليه شغال شنو كنت ؟ يقول ليك كنت ماسك الفلانية لكن خليتها .... عمروا ما استمر في حاجة .

[monim]

التعساء كملوا يا جماعة والله شنو ؟؟؟؟؟

[monim]

؟؟؟؟؟؟؟؟؟؟؟؟؟؟؟

[أشرف صلاح السعيد]

يبنشر ليك لستك فى عز الضهر والشمس شبر فوقك وبتكون بتعفرت فى العربية يجيك واحد مارى يقول ليك: كفارة مالو اللستك بنشر؟ ..تسكت منو لانو الرد بيكون جد كعب اللحظة ديك..يفاجأك يقول: ياخى ماتخت للعربية دقار بتتدحرج..يدحرج ميتينو ..ده تعيس ابن تعيسيه"عللى وزن سيبويه"..

[monim]

يبنشر ليك لستك فى عز الضهر والشمس شبر فوقك وبتكون بتعفرت فى العربية يجيك واحد مارى يقول ليك: كفارة مالو اللستك بنشر؟ ..تسكت منو لانو الرد بيكون جد كعب اللحظة ديك..يفاجأك يقول: ياخى ماتخت للعربية دقار بتتدحرج..يدحرج ميتينو ..ده تعيس ابن تعيسيه"عللى وزن سيبويه"..



فعلا يا أشرف ده تعاسته يقسموا منها للجيران ... أسئلة الغباء تندرج تحت باب التعاسة ، شكرا لمرورك وتعليقك يا رائع

[الجندي المجهول]

هناي التعيس لما يصرح ليك تصريح تعيس وتبقى انت اتعس منو لانك تعيس ( غايتو جنس تعاااسة)

[monim]

التعيس وهو شقيق المتعوس ... فيقال اتلم المتعوس على خايب الرجاء وهو ابن عمه لزم ... فشكلوا ثنائي خطير لترسيخ وتأصيل وتأطير التعاسة وغربلتها وأكسدتها عشان يطلعوا تعاسة صافية أصلية غير مغشوشة ذي السمن البلدي البطلعوه من ( الفرصة ) الناتجة عن عملية خش اللبن ،

يحصل ( خش ) جامد وشديد للمتعوس وخايب الرجا

ينجبوا ؟؟؟

تعسانة
تاعوس
منحوس
تعوسة

مع التحية

[أبو ريان]

التعيس البجيك عندو مشكلة وورطة كبيرة دايرك تسلفه باي طريقة علشان يحل مشكلتو وبعد ماتديه الفلوس يبقي يتماطل عليك ورد ساي في التلفون مايرد عليك واخيراً يقفل جواله .
والتعيس العندو سر ماقدر يمسكه براه واختارك انته واصطفاك من بين الأهل والأصدقاء جميعا واداك سره وبعد ساعة يمر في الشارع ويلقي سره منشور في حبل الغسيل .
والتعيس العندو حالة وفاة والناس ماشة تعزيه وفي واحدين جايين من سفر بعيد وخالين اولادهم يجي تلقي فاتح التلفزيون وبيحضر قال متابع مسلسل تكري مهم .
والتعيس البقول ليك الموضوع بتاعك دا بسيط جداً وخلاص اعتبرو انتهي وجيب لي ورقك وتاني لاتلقي الموضوع ولا تلقي ورقك .
والكثير الكثير من التعاسة والتعيسيين
اللهم احفظنا يااااااااااااااااااارب

[حاتم مرزوق]

عين التعاسة ان تأتي لتتفرج في مباراة المريخ وفجأة تكتشف ان المدرب مازدا .

[محمد هاشم]

نحن في إجازة من الشغل ومستمتعين جدا ومعانا الاهل بي جاي والاخوان وفي واحد تعيس يضرب لي تلفون كل يوم علشان يذكرني إنو الاجازة باقي ليها أقل من أسبوع
طيب ياتعيس إنت مالك
ولا مستخسر علينا أيامنا الحلوة

[monim]

عين التعاسة ان تأتي لتتفرج في مباراة المريخ وفجأة تكتشف ان المدرب مازدا .



أخي حاتم

مساك الله بالخير

طبعا كان في جدل حامي الوطيس حول موضوع الكسل وطبعا أنا الكنت كاتب الموضوع ده في موقع تاني ونقل الى هنا بواسطة أحد الاعضاء وشايفك من الممعارضين بشدة واحترم رأيك وأنو شايف بصيص أمل وأن الامة بخير ونتمنى أن تفاؤلك يصبح واقع ملموس

أما موضوعنا الحالي وهو التعاسة فهذه شايف الكل متفق على أنها متوفرة بكثرة وأشياء كثيرة تجلبها وتسببها وتمرضنا خاصة في رمضان ده

مع تحياتي وعميق ودي

[monim]

نحن في إجازة من الشغل ومستمتعين جدا ومعانا الاهل بي جاي والاخوان وفي واحد تعيس يضرب لي تلفون كل يوم علشان يذكرني إنو الاجازة باقي ليها أقل من أسبوع
طيب ياتعيس إنت مالك
ولا مستخسر علينا أيامنا الحلوة




أخي محمد هاشم

مساء الخير ولعلكم بخير ومتعكم الله باجازتكم الموشكة على الانقضاء

أما صاحبنا التعيس البضرب تلفونات ده الله يعينكم ويصبركم عليه في رمضان ده

تحياتي وعميق ودي

[أشرف صلاح السعيد]

تكون ماشى مع ام العيال وتلاقى واحد مجرد معرفة..يعنى لا كان فردتك ولاشى..يسلم عليك ويجترا ليو كم ذكرايا خيبانة نصهم اساسا بيكونو ماحصلو..دا كلو كوم ولما يوجه كلامو لحرمنا المصون ويقول: تعرفى راجلك دا زمان كان دنجوان عصرو وكان بيصول ويجول والبنات يتجدعن قدامو والله ايام لكن..وطبعا لكن دى ماليها اى مكان من الاعراب بس ماعرف ينهى الموضوع الزى وشو قام ختاها اعتراضية لسخافتو..دا بقى تعيس بن تعسان بن تعس بن تعسويه..

امنية:
ياريت كلامو كان جد..

[monim]

والله انت لذيذ يا أشرف .... يديك العافية

[monim]

التعيس لمان تكونوا مجموعة من الناس تتكلموا عن وضع السودان المهبب وضعف الخدمات والبنية التحتية وفشل الولاية في القيام بدورها وتكون كل الناس متفقة على الوضع البائس والفشل الزريع .... فجأة ينبري واحد ويقول ليك والله الحكومة دي ما قصرت وظبتت البلد وبقت كلها عمارات ... عمارات في عينك يا تعيس ... حا يدوك واحدة منهم

[ود سعدابى]

التعيس : الذى كل ما احسنت إليه تجده لايمحد ربه ولايشكرك

تعيسه ايضا: تلك التى تهرس ليها كل دروبك حنين تجد كل السويتو راح فى اول لفة خصام بسيط

تعيس : صاحب الصيدليه وهو يضع لافته ومكتوب عليها مغلق وتنظر من خلال الزجاج تجده يرتشف كباية شاى و قهقهات مع الزميلات وانت محتاج الدواء !!!

[monim]

مساء الخير ود السعدابي

دي نماذج تعاسة ( بمزاج ) والله النوعين الذكرتهم ديل كتار خلاص في السودان الله يكفينا شرهم

تقبل تحياتي وشكري على مرورك ومشاركتك الرائعة

[محمد هاشم]

واحد يكون ليه زمن ما اتصل ليك وفجأة كدة يمطرك بوابل من الاتصالات لغاية ما تقرب تصدق انو بقى حنين واتذكر أيام زمان ويقول ليك عايز الاقيك ولما تلاقيه تكتشف انو دايرك عشان يمقلبك ويدخلك في إحدى برامج التسويق الشبكي الوهمية (كوست نت , بزناس , قولد كوست ) القايمين فيها شباب اليومين ديل والمشكلة إنك تقول ليه صراحة إنك ما عايز تخش وما عندك قدرة على الاشتراك علشان تزوغ منه يقول ليك أنا بسلفك تقوم تقول ليه البرامج دي حرام يطلع ليك فتوى من جيبة عليك الله ده تعيييييييييييييييييييييس ابن متعوس ال تاعس ولا لا

[monim]

واحد يكون ليه زمن ما اتصل ليك وفجأة كدة يمطرك بوابل من الاتصالات لغاية ما تقرب تصدق انو بقى حنين واتذكر أيام زمان ويقول ليك عايز الاقيك ولما تلاقيه تكتشف انو دايرك عشان يمقلبك ويدخلك في إحدى برامج التسويق الشبكي الوهمية (كوست نت , بزناس , قولد كوست ) القايمين فيها شباب اليومين ديل والمشكلة إنك تقول ليه صراحة إنك ما عايز تخش وما عندك قدرة على الاشتراك علشان تزوغ منه يقول ليك أنا بسلفك تقوم تقول ليه البرامج دي حرام يطلع ليك فتوى من جيبة عليك الله ده تعيييييييييييييييييييييس ابن متعوس ال تاعس ولا لا

فعلا يا أخي محمد
والله ذي ديل بقوا كتيرين خلاص ... ياخي حاجة تكره الله يعيينا عليهم

شكرا على المرور والمشاركة الدمها خفيف

[محمد هاشم]

اليومين ديل متلحني واحد يتصل لي بعد المويات يقول لي عربيتي طلع بيها ولدي الكبير ونحن دايرين نتونس معاك عليك الله تعال بي عربيتك سوقني مع الاولاد جيبنا بيتكم بعدين رجعنا أقول ليه أنا داير أصلي التراويح في الجامع الفلاني وبعد داك عندي كده وكده مشوار
يقول لي ماعندك أي مشكلة بعد ماتخلص أنا راجيك يعني الراجل عايز يجاملني لكن بي طريقة صعبة خالص خالص

[ام قبس]

ايييييييييييييييييييييك تعاسات بالكوم
اول تعاسه
تجي من يوم بداء الساعة سته صبحا ومليان مشاوير وتعبان تعب السنين وعندك ساعة وحدة بس ترتاح فيها قبل الشافعة ماتجي من الروضه تقول تاخد ليك نومه سريعة في الساعة دي وتقفل التلفون والموبايل وحتي حله البريستوا وكل شيء بيصدر صوت
ترقد وتبداء الجفون تجي لي بعض وبداءت النعسه لذيذة
وفجاء جرس الباب وكانه زول اتكل فيه وماعرف يقوم منه
وطارت الجفون وطار النعاس وطار قلبي علي قول احمد المصطفي
وتعاين من العين السحريه( تعاسه صغيرونه (( هي سموها العين السحريه ليه))
وتلقي جارتنا ام اربع واربعين اقصد ام اثنين وتسعين عام والراجوفه حاصله ختت يدها في جرس الباب وماعرفت ترفعها
دا كدا بيكون يوم تعيس
اها افتح ووب ما افتح وبيييييين
ما انا عارفاها عاوزة شنو
يابت هاك افتحي لي العلبه دي والعلبه الانا ماعارفاها بتاعة شنو
وما حافتحها لانوا الحاجة ممكن بكرة تتكل علي الله ويجوا ناس البوليس ويالله البصمات في العلبه وختيتي ليها شنو وفلم هندي وتبقي انت ابو وام التعاسه
وتقفل الباب وتعاين بي العين تلقي الحجة اتحركة حركة تعيسة ومشت قدام ورجعت خلف علي اساس الاخت غيرت الشقة وتاخد ليها تكله تاني في الجرس
وتفتح ليها تقول ليك بي كل غضب انتي تاني
اتخيلوا معاي كميه تعاستي
وفي حد في الدنيا اتعس من كدا
وتعاستي بتذكرني بالتعاسه ام دود علي وزن جبنه المصريين ام دود
وراجعة تاني

[monim]

اليومين ديل متلحني واحد يتصل لي بعد المويات يقول لي عربيتي طلع بيها ولدي الكبير ونحن دايرين نتونس معاك عليك الله تعال بي عربيتك سوقني مع الاولاد جيبنا بيتكم بعدين رجعنا أقول ليه أنا داير أصلي التراويح في الجامع الفلاني وبعد داك عندي كده وكده مشوار
يقول لي ماعندك أي مشكلة بعد ماتخلص أنا راجيك يعني الراجل عايز يجاملني لكن بي طريقة صعبة خالص خالص



ده عايز يجاملك على حسابك منتهى التعاسة
عندنا زمان مثل بيقول ليك ديل ناس سلام بلا غرد وطيبين بلا مرض

ده زول مرض وتعيس عليك أمشي جامع الراجحي ده صلاته يمكن تخلص قريب 11
الله يعينك

متشكر أخي محمد على المرور والمشاركة اللذيذة

[monim]

ايييييييييييييييييييييك تعاسات بالكوم
اول تعاسه
تجي من يوم بداء الساعة سته صبحا ومليان مشاوير وتعبان تعب السنين وعندك ساعة وحدة بس ترتاح فيها قبل الشافعة ماتجي من الروضه تقول تاخد ليك نومه سريعة في الساعة دي وتقفل التلفون والموبايل وحتي حله البريستوا وكل شيء بيصدر صوت
ترقد وتبداء الجفون تجي لي بعض وبداءت النعسه لذيذة
وفجاء جرس الباب وكانه زول اتكل فيه وماعرف يقوم منه
وطارت الجفون وطار النعاس وطار قلبي علي قول احمد المصطفي
وتعاين من العين السحريه( تعاسه صغيرونه (( هي سموها العين السحريه ليه))
وتلقي جارتنا ام اربع واربعين اقصد ام اثنين وتسعين عام والراجوفه حاصله ختت يدها في جرس الباب وماعرفت ترفعها
دا كدا بيكون يوم تعيس
اها افتح ووب ما افتح وبيييييين
ما انا عارفاها عاوزة شنو
يابت هاك افتحي لي العلبه دي والعلبه الانا ماعارفاها بتاعة شنو
وما حافتحها لانوا الحاجة ممكن بكرة تتكل علي الله ويجوا ناس البوليس ويالله البصمات في العلبه وختيتي ليها شنو وفلم هندي وتبقي انت ابو وام التعاسه
وتقفل الباب وتعاين بي العين تلقي الحجة اتحركة حركة تعيسة ومشت قدام ورجعت خلف علي اساس الاخت غيرت الشقة وتاخد ليها تكله تاني في الجرس
وتفتح ليها تقول ليك بي كل غضب انتي تاني
اتخيلوا معاي كميه تعاستي
وفي حد في الدنيا اتعس من كدا
وتعاستي بتذكرني بالتعاسه ام دود علي وزن جبنه المصريين ام دود
وراجعة تاني



مساك الله بالخير أم قبس

ما عندك حل غير تخلي جرس بيتكم صاااامت
عسى الله يصرف عنك هذه التعيسة

[ام قبس]

تعيس بتاع الصيدليه التقول ليه عاوز حبوب صداع يقول ليك جيب رشته (( دا طبعا عندنا هنا بس ))
تعيس الراجل الراكب عجله وفي اخر لحظة يمد يده علي اساس لافي وتخش انت في القدامك
تعيسة صاحبتي البتضرب لي قبل الفطور بي خمسه دقائق عشان تقول لي الفطور قرب
تعيس الفنان اللازم يبداء اول حفلاه بي بنطلون ابيض وقميص احمر ((ذي سجنل تو))
تعيس الجزار التلقي ضبان الدنيا والعالمين لامي فيه وقدر الضبان ناس منتظرين يشتروا لحمة ((علي اساس اصلوا الضبان بتلمه في اللحمة مافي غلط))
تعيس الراجل راكب في البص وفجاءة تلقاه يقول اخ توف ويعملها ليك في نص البص
وجاياكم تاني

[ام قبس]

تعيسه الممرضه البتتعامل مع المرضي بي عنجهيه علي اساس لو ما الظروف كنت بقيت دكتورة
تعيس المضيف التلقاه حايم في نص المطار بالينوفورم علي اساس هو الحيسوق الطيارة
تعيس المكنيكي التمشي ليه يطلع مابتعرف اي شيء وهو باش مهندس كبير
تعيسه المراة ماتصدق راجلها يطلع بي جاي وهاك ياتلفوناتواول ماتسمع صوت الباب تعمل روحها قامت تستقبله
تعيس الخفير التترجه يفتح الباب معاك حاله عاجله يقعد يحقق معاك علي اساس هو المدير
تعيس كل انسان كذب علي نفسه واتمني وضع فوق وصدق كذبته وعاش فيها

[ام قبس]

تعيس زول لبس ابيض في ابيض وجات فيه عربيه في مويه وبقته ابيض بي بني
تعيسه مرة شحدت ليها توب من جارتها لزوم البوبار وفي المناسبه اتشرط التوب
تعيسه واحدة تاني شحدت توب وجات بت ست التوب وقالت ليها قدام الناس دا توب امي
تعيس راجل بيدخن وكل مايشوف زول عندو صندوق يشحدة سيجارة
تعيس سيد البقاله تقول ليه اديني علبه صلصه يقول ليك في طماطم كويسه

[monim]

شكرا يا أم قبس على مجموعات التعاسة المظبتة ... ولا تبخلي علينا بالمزيد

تحياتي وتصومي وتفطري على خير

[محمد هاشم]

والله يا منعم الله يديك العافية و تعرف بقيت مولع جدا بكتاباتك دي كيف وحسيت بي ألفة والله ربنا يعلم فبالله شد حيلك معانا وما تنسانا من صالح دعواتك ومسجاتك وكتاباتك ياراجل يارائع

[monim]

واحد يجي من الشغل هلكاااان ... يلقى المرة ماسكة سماعة التلفون ليها ساعة مع أحدى الجارات أو الصديقات شغالات ( بري) في الفاضي ... واصلت ونستها في التلفون ... طولت جدا في الموضوع ده ... والمسكين منتظر وهي ولا على بالها خالص ...
دي تعيسة جنس تعاسة
وهو ذاته تعيس حظ الوقع في دي

[monim]

والله يا منعم الله يديك العافية و تعرف بقيت مولع جدا بكتاباتك دي كيف وحسيت بي ألفة والله ربنا يعلم فبالله شد حيلك معانا وما تنسانا من صالح دعواتك ومسجاتك وكتاباتك ياراجل يارائع

يا راجل ده انت الاروع والاجدع ولولا تشجيعاتكم لما كتبنا حرفا

شكرا على المرور العليل ... على وزن النسيم العليل ... كلاهما يشتركان في الخفة والرقة

[monim]

تكون مسافر الاجازة وخلاص ربطت شنطك وستفت كل أمورك وعندك وزن زائد محتار فيه وعامل ليك قلق ومواعيد الطيارة قربت ... بينما انت في هذه الحالة وهذا التنشن يضرب ليك واحد يقول أنا جاي عليك .... تفتكره جاي يودعك وتقول ليه مرحب أتفضل ... يجيك داخل مزعنف شنطة قدر الليلة وباكر عايز يشيلك ياها ... تتلاطم الاسئلة بداخلك يا ربي وزنها كم ... أكيد حا يكون عارف الوزن ومحضر تكلفته ... تتفاجأ بيه يفتح الشنطة ويبدأ يشرح في محتوياتها ... التياب ده لي مرتي .... التوبين الفي الكيس ديل للوالدة ما تخلي المرة تشيلهم ... اللبسة دي لي ود أختي الصغير ... الكيس دي لي أختي المطلقة القاعدة معانا في البيت ... يعني عايزك توصلها وتوزعها بالتفصيل كمان ... والاسئلة لا زالت تتلاطم داخل صاحبنا الذي ضاق موعد طائرته ... يا ربي حا يدفع حق الوزن ؟؟؟؟؟ ، ولكن تأتيه الطامة عندما يقول ليه طيييب يا استاذ تصل بالسلامة وسلم على الجماعة وينصرف .
ده تعيس ومش تعيس وبس ده من الاسباب الرئيسية للجلطات البتجي للناس قبل السفر
مع عميق ودي

[monim]

فوق يا ناس مدني الجميلين

[محمد هاشم]

تكون مسافر الاجازة وخلاص ربطت شنطك وستفت كل أمورك وعندك وزن زائد محتار فيه وعامل ليك قلق ومواعيد الطيارة قربت ... بينما انت في هذه الحالة وهذا التنشن يضرب ليك واحد يقول أنا جاي عليك .... تفتكره جاي يودعك وتقول ليه مرحب أتفضل ... يجيك داخل مزعنف شنطة قدر الليلة وباكر عايز يشيلك ياها ... تتلاطم الاسئلة بداخلك يا ربي وزنها كم ... أكيد حا يكون عارف الوزن ومحضر تكلفته ... تتفاجأ بيه يفتح الشنطة ويبدأ يشرح في محتوياتها ... التياب ده لي مرتي .... التوبين الفي الكيس ديل للوالدة ما تخلي المرة تشيلهم ... اللبسة دي لي ود أختي الصغير ... الكيس دي لي أختي المطلقة القاعدة معانا في البيت ... يعني عايزك توصلها وتوزعها بالتفصيل كمان ... والاسئلة لا زالت تتلاطم داخل صاحبنا الذي ضاق موعد طائرته ... يا ربي حا يدفع حق الوزن ؟؟؟؟؟ ، ولكن تأتيه الطامة عندما يقول ليه طيييب يا استاذ تصل بالسلامة وسلم على الجماعة وينصرف .
ده تعيس ومش تعيس وبس ده من الاسباب الرئيسية للجلطات البتجي للناس قبل السفر
مع عميق ودي


ده مش تعيس ده اللهم إني صائم .................. وكمان ................. عديل كدة النقط دي بوضحا ليك بعد الفطور ياخي ده التعاسة ذاته وإذا اتصرف معاي بالتعاسة دي طوالي بشرح ليه حقيقة الامر وإنو موضوع وزني زاتو أنا في جهجهة لكن المشكلة إنو التعساء المن النوع ده بيكونوا ناس ما ممكن تحرجهم قريبك ود فريقكم وهكذا

[أشرف صلاح السعيد]

تجى قرفات من مشوار مخيب لآمال عراض كنت مأمل عليها "اكيد قريشات مضيّعة" ويصفر ليك بوليس الحركة..قدر مايفتش ليو عن مخالفة مايلقى ..الرخص؟اهندى..اضرب بورى..طيييط..شغل الاشارة..تك تك تك .. لابس شنو فى رجلك؟ مركوب بشراب بنفسجى مقلم "جنس قدم"..يقوم يتكشم ويتبسم بعباطة ويقول ليك طيب ياحبيبنا مافيها حق الفطرة؟ بالله تمها انتا ..البوليس دا يبقى شنو؟

[monim]

يبقى تعيسويه

[monim]

واحد يكون ( لصقة ) مباريك تركبوا المواصلات يتحكحك ويتثاقل لغاية ما تدفع .... تخشوا المطعم يفضل ياكل وياكل ويتحكحك ويغسل وينشف يديه ويقول ( عاع ) تكون أنت دفعت ... تطلع علبة سجايرك عشان تدخن تلقاه مادي أيده وكمان يعلق يا سلام مارلبور و أبيض ... تمرق كيسك عشان تسف تلقاه التقطه منك دون اذنك ... تكون بتتكلم مع زول في السودان مكالمة دولية تلقاه مادي يده قائلا : بالله اديني اسلم عليه ... يجيك في البيت يتناول لاب توبك والسخيف يقعد يفتش في ملفاتك وأسرارك ويعلق كمان ...

دى تصفوه بي شنو ؟؟؟؟ يبدو لي التعاسة شوية عليه خالص

وكل عام وانتم بخير

[monim]

يا أخوانا أنا راجع من الاجازة ومليان بمواقف الناس التعساء القابلوني .... بحكيها ليكم لاحقا برواقة كده
مع تحياتي

[ام قبس]

ياخي الف حمدلله علي السلامه
وانا قلت الزول دا يمكن يكون لما فيه تعيس براه ووصله الاستيكه
والله بركه الرجعت سالم ياخي
وتحياتنا لي اليوميات وكسل ناسنا التعبانه
ومنتظرنك
همسه
انا دعيت لي تؤمه بين اشرف السعيد والدرديري كباشي استلموها ولا اتذكروا شكروني عليها
ورشحتك ليهم تبقي ثلاثيه بدل ثنائيه قايتوا اتفق معاهم كان يدوك شيء من الهمر بتاع نجم الشهر ان شاء الله الرفرف الوراني

[monim]

شكرا يا أم قبس يا رائعة .... أنا جيت من الاجازة عائد باشواقي وونستي وجئت متلفحاً بالليل والصمت ..... والله جواي كترة كلام وقصص وخواطر تملا المنتدى ده لمن يدفق بس يصلوا اولادي المقطوعين في سواكن ديل ونستقر ونقول بسم الله
وكل سنة وانت طيبة وشكرا لاهتمامك بي وقناعتك بكتاباتي

[moh_alnour]

في الإنتظار يا منعم

[طه بورتبيل]

التعيس مابي سببو لكن شنو السبب الله بس عارف الزول مابقبي تعيس إلا إذا كان مظلوم ونفسو في حاجه تنصف جانبو يعني داير يخاج العندو باي طريقه

[ابوخالد]

أخى / منعم


http://di0r.jeeran.com/3eed-S3eed2007.gif
وكل عام وأنت بألف خير


حتة تعاسة ,,,
اليوم خميس ,, والدنيا مدارس ,, وآخر غرف طول الإسبوع
والعيال منتظرين الخميس ده ,, للعب وكده ,,,
والساعة 11صباحآ واليوم نص دوام ,, يتصل عليك
عزيز وغالى ويقول ليك أنحنا بعدين إمكن نجيكم ,,
وتنتظر والعيال بعدين بتاعتو دى ,,, والعيال لابسين ومحرقين
روحك للفُسحه ,,, وتنتظر مُجبر لحدى الساعة 10مساءآ
ويجى صاحبك ويقعد لحدى الساعة 11:30 مساءآ ,,,

فى تعاسة أكتر من كده
مع العلم نحنا نؤمن بالمقولة المشهورة
نوموا بدرى وأصحوا بدرى
وودعوا الخضرى

[ابوخالد]

مساك الله بالخير أبو خالد

لكن تعرف الاتعس منه الراجل بتاع العجلة بتاعة الشاي والقهوة الفي حديقة الملز .... شايفك راصي الترامس بتاعتك كلها قدامك وبعد ده يدور حولكم .... تفتكر ده بيلعب على شنو ؟؟؟؟ لا أرى له مبرر سوى أنه تعيس



تعرف يا منعم يا أخوى

التعاسة الكبيرة

إنك تكون فى الرياض وما تعطرنا بى شوفتك

ولماتنا دى كلللللللللللللللللها ما هببتو لينا ,,,

تعيس أنا حتى الثمالة ,,, أخى

[monim]

الى الرائعون روعة هذا المنتدى العملاق :

ود النور

طه بور تيبل

أبو خالد

وكل أعضاء منتديات ود مدني الراقين

كل عام وانتم بخير

شكرا جزيلا على الاهتمام والاطراء

والحب

أعدكم أنني في الفترة القليلة القادمة ساطلق عدد من المقالات المتنوعة من وحي تداعيات الاجازة والباخرة عذاب والعوارض المتاريس الكتيرة القابلتنا ... ولن أنسى التعساء الذي رسموا لحظات البؤس على وجوهنا البرئية . والتي بفضلهم اصبحت بائسة وتعيسة .


تحياتي وعميق ودي لكم جميعا

[أشرف صلاح السعيد]

ياخي الف حمدلله علي السلامه
وانا قلت الزول دا يمكن يكون لما فيه تعيس براه ووصله الاستيكه
والله بركه الرجعت سالم ياخي
وتحياتنا لي اليوميات وكسل ناسنا التعبانه
ومنتظرنك
همسه
انا دعيت لي تؤمه بين اشرف السعيد والدرديري كباشي استلموها ولا اتذكروا شكروني عليها
ورشحتك ليهم تبقي ثلاثيه بدل ثنائيه قايتوا اتفق معاهم كان يدوك شيء من الهمر بتاع نجم الشهر ان شاء الله الرفرف الوراني


كل عام يا منعم والجميع بكل الخير وبينتج خير وبيقول خير وجميع الأمانى الطيبات محققات إن شاء الله..

أم قبس: غايتو جنس اللوم دا ما سمعنا بيو قبل دا..تقولى فلان وفلان ديل زى التيمان يقومو يشكروك!! ولا تزعلى يا ست ..تشكرات من هنا لمان تلف وترجع تانى هنا ..كل سنة انت والاسرة وجميع الاهل بخير وكما تنشدون..

شرف ليى أكون توم لمثل منعم ودرديرى بس أكون التوم الصغنبوتى ..

عودة للموضوع:
تمشى زريبة البهايم مشان تشترى خروف الضحية يجيك مسعول المبيعات فيها ناقز ونادى فيك "تعال يازول بجاى" وانت اصلا وصلت بجاى بتاعتو دى..اها يقوم يساعلك: بتدور خروف ضحية؟؟ مع العلم بأنو انا فى الزريبة فى تاريخ 10/12/1430هـ وبعد صلاة العيد ..ياربى أكون عايز خروف قعدة ؟؟!!..بعدا يمسك ليك خروف بعد ما الود عمل تفحيصة سريعة للخرفان بنظرة ثاقبة وخبيرة "اها وباقى الخرفان دى يا ربى حيتبرع بيها"..
ما اطول عليكم زريبة البهايم وبعض الباعة الفيها من قبيلة تعسويه بن تعاسة الحمضانى..

[هبوية]

وريني الما تعيس منو ؟؟؟؟؟ ماأظن في

[monim]

أخواني الاكارم الاعزاء .... نهاركم سعيد

هالكم دي :

تعيس مدير شركة الاسكلا فرع جدة الذي اتصلت عليه اشكو له أن عفشنا رجع السودان وربما يكون ضاع .. وقلت له أنني بسجل ليك صوت لوم لكونك ملكتني معلومة خطأ مفادها أن العفش يظل بمخزن الجمارك بجدة لحين ظهور صاحبه وبعد مرور عدة شهور يصادر ، بينما الواقع والحقيقة التي قالها لي مدير الجمارك السعودية فرع الباخرة أن العفش يعاد للبلد التي اتى منها في نفس الباخرة وهي راجعة تاني يوم بتأخده معاها .
شوفوا يا جماعة نوعية التعاسة والشغل الدراش واحد مدير شركة نقل غير ملم بابسط النظم والقوانين والادهى والامر ( ينجر ) من راسه ويديك معلومة غلط ... زوجتي قاعدة يوم كامل في الميناء فاضية وعفشها في الزريبة الجنبها يسمع في نضمها وهي نايمة على معلومة انو بمخزنهم بجدة ... والادهى والامر أن مندوب شركة الأثقلة أقصد الاسكلا بسواكن عندما طلبت منه زوجتي اخراج عفشها من الباخرة لكونها راجعة قال ليها صعب اخراج العفش من الباخرة لكن ما يهمك سيتولى موظفونا هناك استلامه وحفظه لحين وصولك للسعودية وستجديه في الحفظ والصون ... الى هنا بلغ السيل الزبى وليس امامنا سوى عمل فروع لهذا ( المول الضخم ) من التعاسة ويمكن أن تكون على النحو التالي :
1. مدير شركة نقل لا يعرف ابسط ابجديات وظيفته الروتينية.
2. موظفين أسكلة جهلة وسخفاء ومصابون بعقدة الدونية .
3. واسرة كريمة تبهدلت بسبب التراخي وقلة المرؤة السودانية .
4. وحوش باخرة بسواكن جايط كما الكمونية .

قيل ثم من يا شيخنا ، قال :
5. مستوى ردي من التعامل وبعيد كل البعد عن الاحترافية والمهنية

مع عميق ودي