ماذا يدور داخل امخاخكم [الأرشيف]

مشاهدة النسخة كاملة : ماذا يدور داخل امخاخكم

ام قبس

24-08-2009, 02:53 PM

اخوتي في منتديات ود مدني
سلام من الله عليكم اجمعين
ورمضان كريم عليكم
واسفة لو جات متاخرة
باعتبار الزمن هنا عندنا بعدكم :o
تقبل الله منا ومنكم صالح الاعمال قولوا امين
افرد هذا البوست لتسألوات تدور في داخل الكثيرين عن طبيعة الاشياء في الدول الاوربيه
اشياء باختلافها في كل النواحي
لتكن دردشه رمضانيه بيننا للتواصل ونقل مايمكننا نقله
وليس لنا الا احترام مالايعجبنا
ولنبداء من اول مخ

عبدالله الصديق

24-08-2009, 03:15 PM

ود الجعلي

24-08-2009, 03:38 PM

باختصار مسلمين من غير اسلام .. صادقين عمليون انسانيون يكرهون النفاق والبوهية

ام قبس

24-08-2009, 03:59 PM

شكرا سيدتي لهذه الفكرة حتى نعلم من مجرب وليس طبيب
ارى ان الاوروبيين يحترمون الآخرين كل واحد في حالة لا توجد عندهم عنجهية العرب والتدقيق في كل شيء..التعامل الراقي..مساحة الحرية
ام المساويء قلة دور العبادة او بعدها..غلاء الاسعار والضرائب الباهظة التي تصل احيانا الى40% من الراتب.. والمشكلة الاكبر تربية الاطفال وقوانين البلد وكثير من الاسر تلاشت وسط العادات الاوروبية وفقدت بناتها الائي احتمين بالقانون الاوروبي في انشاء علاقات غير شرعية تنتهي غالبا بسجن الاب

اول الامخاخ
الاخ عبدالله الصديق
في الاحترام دا شيء غريب
عندهم احترام للاخر بكل اشكاله
وخت الف خط تحت اشكاله دي
مثلا عندهم مجموعه مثل عبده الشيطان والعياذ بالله
يلونون شعرهم بالوان غريبه ذي تلقي ليك واحدة عامله شعرها برتقالي
وعامله كحل في عين واحدة
ذي المرة بتاعة المشاكل
عارف قصه المرة بتاعة المشاكل دي
قالوا المراة البتحب المشاكل لمان تطول ماتلقي ليها زول تشاكله تقوم تكحل عين واحدة وتمرق عشان تلقي ليها زول يسألها هي يفلانه مالك ماكحلتي عينك التانيه
وتقوم تدور ليك فيه
اها هنا لو كحلوا نخرتهم ذاتها مافي زول بهببه ليهم
والجماعة ديل عندهم اسم تاني وسلوك تاني بحكي ليكم قصته بعد رمضان
ورغم غرابه كل شيء يتعلق بيهم لكن مابتلقي
زول بتلفت حتي ليهم
وممكن تلقي زول شايل موبايل 3310 نوكيا عين ابوة طالعة
ولابس بنطلون جنز اكل الدهر عليه وشرب ولمان يعرف نفسه يكون عالم ولا نابغة في مجال ما
يقيمون الجوهر اكثر من المظهر
يعني نحنا هنا بنلبس لبسنا الزي الفي السودان يعني اسكيرت وبلوزة وطرحة
بالنسبه ليهم غطاء الشعر دا عحيب
لكن ماتلقي منهم الا كل احترام
طبعا القله القليله البتلقاها متعنصرة
وسبحان الله القله دي لو ازهرت تعنصرها دا من حقي اشتكيها واكسب قضيه تعويض مبالغة
يعني حتي واضعين ضوابط للفئه المابتقدر تظبط نفسها
بالنسبه لدور العبادة
اتخيل هم الاغلبيه منهم لا دينين ( طبعا انا بتكلم عن السويديين علي وجه الخصوص )) والقله مسيحيين لو تصدق ان في المدينه التي اسكنها اكبر جامع في السويد وتقريبا ثالث مسجد من حيث الحجم في اوربا ويزوره المسلمين من جميع انحا اوربا والمتبرع بتشييده رجل بر قطري
ومسميه باسم والدته ترحم علي روحها
بالنسبه للضرائب دي حقيقة يدفع الشخص الذي يعمل في وظيفة نسبه32% من مرتبه للدوله ضرائب
لكن النظام الاجتماعي هنا مرتب
يعني هذه الضريبه ترد بارباحها عند التقاعد
وتدفع هذة الضريبه للاشخاص الذين لايعملون والامهات حديثي الولادة وطلاب المدارس والجامعات
الدوله تحسها نظام اشتراكي بمعني الكل يعيش بمستوي واحد الذي يعمل والذي يدرس ولم تتوفر له فرصه العمل
مشكله التربيه والاطفال هذه حقا اخي المعضله الكبري
اليوم تحدثت مع جارتي الفلسطينيه وجدتها غاضبه جدا فطفلتها التي تدرس فالصف الاول اساس جاتها تخبرها انهم عرضوا عليهم اليوم في المدرسه كيفيه انجاب طفل من اول لحظه وحتي لحظه ولادة الطفل
وهذه البدايه فقط
وبجيك بتوسع في موضوع تربيه الاطفال دي
ومشكله الاسر كمان الضاع كثير من بناتها وانصهروا في المجتمعات الاوربيه
وصدقني يا اخي الاطفال عجينه لينا يمكن تشكيلها بدفيء الاسرة وحنان الابوين
وقوة العلاقة الاسريه لحفظ كيان الاسرة وعاداتها وتقاليدها
لدي طفله تدرس في الحضانه عندما حان موعد تسلمها للروضه سألوني عن ماذا اريد انبههم له
شرحت لهم انني مسلمه لا احب ان تطعم ابنتي لحوم بكل انواعها (خنزير ولحم بقر وخراف او دجاح حتي) استجابوا لطلبي ولكن اشترطوا ان اطعمها في نفس الفترات لحوم من المذبوحة بالطريقة التي تتوافق مع ديني في البيت لكي يضمنوا نموا الطفله بشكل صحيح

طبعا سيدور في راس الكثيرين كيفيه تمكني من التأكد انهم لا يطعمونها كما اتفقوا معي
طفلتي في عمرها سنتين عندما سلمتها لهم تعرف تتحدث وتعرف انواع الاطعمه بالذات اللحمه وكنت اسالها في كل اليوم ماذا اكلت في الروضه
وصادف يوم ان اخبرتني انها اليوم اكلت لحمه في الروضه فزعت واخذت بعضي ودقري علي الروضه وواجهتهم بان لماذا اطعمتم الطفله لحمة باخبروني انها ليست لحمة بل مشروم وحضروه لي وفعلا شكله كما اللحمة
ولنا عودة
شاكرة مرورك ومعلوماتك القيمة

ام قبس

24-08-2009, 04:08 PM

باختصار مسلمين من غير اسلام .. صادقين عمليون انسانيون يكرهون النفاق والبوهية

والله شرفت
وعلي وزن الغنيه ياود الرجال انت الليله شرفت
صدقني ياود الجعلي هذا اول ماجاء بخاطري عندما عايشتهم
سبحان الله واكيد لحكمة يعلمها الله
سعيدة بي مرورك

ابوخالد

24-08-2009, 07:41 PM

ام قبس

24-08-2009, 08:42 PM

رمضان كريم أم قبس .......

تصوموا وتفطروا على خير ...

حسب علمى ثقافتهم عن دول العالم الثالث شبه

معدومة والأفريقية بالذات ......... ودى سمة غالبية الدول الأوروبية ...

بتعملوا شنو لتوضيح صورة السودان مثلآ لدى السويديين ؟؟؟؟

وهل فى رغبة منهم لتفهم ذلك ؟؟؟

ودمتى بألف خير

رمضان كريم يابو خالد
دي حقيقة
واذكر اول فترة لي بالسويد جأتني فتاة تدرس في مايعادل عندنا الثامن اساس وقالت لي صحيح النساء في السودان لايرتدون ملابس
استغربت جدا وسألتها من اين جاءت بهذا الاعتقاد ردت انهم احضروا ليهم في المدرسه فلم توثيقي عن السودان
وفيه ترقص النسوة شبه عاريات
اولا اوضحت لها ان هذا الفلم يخص قبيله في جنوب السودان كانت في الماضي من عاداتها ان تفعل هذا وكل ذلك كان في الماضي نسبه للحرب الاهليه التي حدت من تطور اهل الجنوب اما في السودان فلا يوجد مثل هذا الشيء
وكانت المدرسه قريبة من المنزل
واجمل مافي هذه البلد لايتردد الشخص كثيرا في الاعتراض علي كل شيء بالمنطق والجدل الموثق
ذهبت ثاني يوم لهذه المدرسة والغريبه حتي معرفتهم بالسودان ضعيفه جدا وكانوا يصنفوننا علي اننا من الصومال فهم يعرفون الصومال كثيرا نسبه للتواجد الصومالي الكثيف هنا
المهم سالت من مشرفة الصف واخبرتها انني اريد التحدث معها بخصوص الفلم الذي عرضوه في يوم امس علي الطلبه
سألتني لماذا اخبرتها عن مادار بيني وبين الفتاه اول تعليقها هل يوجد في السودان اشخاص لهم لون ابيض مع العلم ان لون بشرتي ليس ابيض ولكنها قالت انها كانت تعتقد ان اهل السودان هم الجنوبيين فقط
احضرت لي الفلم وطلبت مني ان اشاهدة وحدي (( طبعا داخل المدرسة)) لانشغالها وسوف تحضر عند انتهاءها وفعلا حضرت قبل انتهاء الشريط وطلبت ان اشرح لها قمت بالتوضيح كما وضحت للفتاة ووعدتها ان احضر لها افلام توثيقيه عن السودان بشرط ان توعدني بعدم عرض هذا الشريط مرة اخرة
اما بالنسبه لرغبتهم في التفهم
هم شعب نهم للمعرفة كل انواع المعرفة ومستمعييت جيدين
ويحترمون الثقافات الاخري بالاخص التي يجهلونها
ونحن والحمد لله برغم جهلهم الكامل لثقافتنا لكنهم الان صاروا يفرقون بيننا وبين الشعب الصومالي
واصبحوا يدركون الكثير عنا بالاخص في طريقة التعامل
ولي عودة في هذا الموضوع
اشكرك جدا علي مرورك

الصادق صديق ابوالجاز

24-08-2009, 10:12 PM

ام قبس

25-08-2009, 01:02 AM

السيدة أم قبس
تحية طيبة ورمضان كريم (زي بتاعتك) جات متأخرة
فعلاً ما يدور في أزهان الناس عن أوروبا وأمريكا كثير, ما يجول في خاطري دائماً وخصوصاً عندما قدمت للحصول على طلب (الغرين كارد الأمريكي) هو أن الشارع الأوروبي متفكك نهائياً وليس فيه أي خصوصية, بمعنى أكثر (للشرح فقط) الممارسات الجنسية المخلة بالأخلاق تملأ الشارع وهذا ما كان يوجسني من الذهاب إلى هناك.
ثانياً: موضوع ضرب الأبناء وأنهم من الممكن أن يسحبوا أبنائك منك إذا وجدوا علامات ضرب على أجسادهم؟؟!! وحدثت في أمريكا لعائلة سودانية.
منتظرين ردك.

رمضان كريم يالصادق
الشارع اوروبي متفكك بقيمنا نحن
نحن نعتبرها تفكك وهم يعتبروها قمه الترابط ((بالذات الفي الشارع دي وقدام الناس))
بالمناسبه يمكن تكون شويه فكرتك خطاء عن الشارع الاوربي
((الممارسات الجنسيه)) لاتحدث ابدا في الشارع العام ولا في الحدائق والكافيهات
وممنوعه بامر الشرطه اكيد هناك اشياء تحدث في الشارع تحدث بالنسبه لنا غريبه ولو حدثت في بلادنا لوجدت كل الشارع وقف يتفرج وعملوها سينما من غير فلوس
بس عندهم الاشياء دي اكثر من عادي ولا احد يعيرها اي اهتمام وهذه هي خصوصيتهم
اما بالنسبه لضرب الابناء هذه موجودة بكثرة وعادي جدا ياخذ ابناءك منك اذا ثبت انك قمت بضربهم حتي اذا لم يكن هناك اثار في اجسامهم
اذا اشتكوا هم فقط من سوء معامله او تضايقوا من اجواء المنزل
وعن من فقدوا ابنائهم وبناتهم حالات تحدث بين الفينه والاخري
واختك كان ماشه تحدث ليها (( راجع البوست قبل تقول لا ليه لا))
وربنا يحفظنا ياخي
واسعدني مرورك

أشرف صلاح السعيد

25-08-2009, 01:29 AM

ام قبس

25-08-2009, 12:06 PM

احتكاكاتى مع الاوربيين دايما علاقة طالب ومعلم او مرؤس ورئيس..فلا استطيع تقييمهم خارج هذه الايطارات..والتى اراهم فيها يتناولونها باحترافية عالية..
اما الامريكان حبابينا فديل راقدين سلطة مابعرفو سجمن ..كان فى برنامج تبادل طلابى بين جامعتى وجامعة ميتشيغن وكنا بنعمل علاقات معاهم لمعرفتم بس فعلا الناس ديل ماشين على البركة وماناقشين حنانانم دا بالنسبة للثقافة والحياة العامة..بس تجيهم فى تخصصاتم مابتصقعو فهم جد بس تطلع بيهم برا الفريق "التخصص" بيقعو واطة..زى اهلنا اولاد بمبة عرفتوهوم؟

مرحب اخي اشرف
حقيقي هم عندهم التخصوصيه مهمه جدا
يعني بتاع الطب ما ممكن يفهم في اي مجال تاني
لكن يكون بيبحت ليل ونهار في مجاله
ومعلوماتهم بسيطه جدا عادي تلقي واحد او واحدة مابيعرف ابسط المعلومات الجغرافيه
ودا راجع لانه وقتهم مقسم بطريقة عجيبه جدا
قدر ماحاولت اقسمه زيهم ماقدرت
ضرب مثل اول ايام الاسبوع يوم الاثنين عادة العمل بيبدا من الساعة ثمانيه صباحا بيصحوا من النوم الساعة سته ودا الشغال ولا العاطل الساعة سته كل البلد فندروا
يقعدوا يشربوا القهوة ويفطروا لحدي الساعة سبعه بعد داك العندوا شغل او مدرسه او جامعة كل زول ركب وسيله مواصلاته (( وفي الصيف الكل بي عجلاتهم)) ومشوا الي مواقعهم
الغداء في كل السويد الساعة 12 لحدي واحدة او في بعض المؤسسات الي الساعة واحدة وربع عادة الدوام لحدي اربعة بيجوا البيت اربعة ونص او خمسه عندهم وجبه اساسيه بياكلوها هي العشاء بعد داك عندهم ذي ساعة ونص للتلفزيون و الجرايد او الجلوس مع الاطفال
لحدي الساعة تسعة لازم يكونوا رقدوا في سرايرهم
عشان ينوموا ويواصلوا بكرة نفس الفلم بي ضبانتها
عندهم ايام العطل السبت والاحد هي دي الايام لترفيه والسوق وتسوق حاجات البيت ونضافة البيت والغسيل وكدا وفي اليومين دي من النادر تلقي فيها عمل او بحث او ماشابه ذلك
اها قول لي يعرفوا حاجات خارج تخصصاتهم بي وين
ولو سألت الواحد منهم بعد سنتين الساعة عشرة صباحا حيعمل شنو بيكون عارف
مش تقول لي نحنا لو قلت لي بعد شويه ماشة وين اكون ماعارفة
وكل شغلنا نجر في نجر
وعلي راي اخونا عبد المنعم السباك يعمل ليك فيها كهربجي وبتاع سيراميك وبتاع بهيه وبصلح تلفونات وموبايلات كلام ذي دا مافي هنا
ووالله الاغلب الاعم مابيعرفوا شي عن الشعب السوداني غير اننا سود وكلنا جنوبيين او من دارفور
(( ودارفور دي زاتها جات هسع قريب))
اسعدني تداخلك

ود الجعلي

03-09-2009, 04:08 AM

ام قبس
شكرا" على
المعلومات مفيدة جدا" وارجو ان تواصلي عن التعليم والتربية لان ذلك ما نفتقده

ام قبس

05-09-2009, 08:58 AM

ام قبس
شكرا" على
المعلومات مفيدة جدا" وارجو ان تواصلي عن التعليم والتربية لان ذلك ما نفتقده

ود الجعلي هلا
حاواصل في الموضوع بتوسع
وحنمسكم حته حته
افتتهم ليك فتيت
وهاك دي جرعة
عن التعليم
من عمر السنه الطفل مسعوليتهم او فلقل مشتركة بين البيت والمرسه (( صحي صحي مشتركة ماذي شعاراتنا البنرفعها ديك))
وهاك يا حوارات اسبوعيه وجنس سعالات لو الطفل غاب
هاك الحكايه دي
جارة لينا صوماليه عندها ولد عزبها عذاب شديد جدا جدا عمرة في حدود ال15 سنه
امسكي اشحني الولد علي الصومال
غشته طبعا نمشي لي اهلك ونشوفهم ونرجع
الولد صدق
سافر معاها خلته هناك وجات
بجيك للقصة بعد افطر الاذان اذن

ام قبس

05-09-2009, 03:52 PM

اها جيت حبيبي صدق المؤمن ماصديق
وساف في الاجازة بتاعة الصيف مع امه للصومال
انتهت الاجازة بيحضر في حاجاتهقالت ليه لا ياشاب ماكانك
قال ليك الولد اتهجم هجمه مرتدة
وقعد يبكي بكي شديد
واهلها قدر ماشولوها وختوها حلفت بالتقطعها ماهي سايقاها معاها
المهم جات راجعه مافي زول جاب خبر الولد وين مشي الصومال
فتحت المدارس المشرفين سالوا من محمد
محمد اجازة تمت (( بس ماجاء راجع ))
رسلوا للام نادوها الولد وين الولد في الصومال
يعمل شنو هناك
خليته مع اهله
ليه
الولد مااتربي كويس
وتتقال من العدوا
رساله للبوليس
رساله للخدمه الاجتماعية (( ودي البتصرف الفكة )) يعني لو زعلت منك حققك راح
البوليس عمل للوليه استدعي الولد حصل ليه شنو هناك
المرة والله ماحصل ليه شيء الولد كويس
لو كويس ليه هو هناك
اداة التأمين الاجتماعي استدعاء الولد لو ماجاء في خلال اسبوع حتتعرضي للمحاكمة وبعدها ترجعي انتي واولادك كلكم الصومال
المرة جقلبت شيلك في ختك البوايس سمع صوت الولد فكوها
بقت في البيجيب ليها الولد من هناك
خسارات تقيله ودولارات
والولد يجي بس
وامبارح بحمد الله رجع البلد
وماعارفة الموضوع حينتهي وين
والله يكون في عون امه
تقول لي الفصل فيه كم
المدير ما عارف

littlestar

06-09-2009, 02:08 AM

رمضان كريم يابو خالد
دي حقيقة
واذكر اول فترة لي بالسويد جأتني فتاة تدرس في مايعادل عندنا الثامن اساس وقالت لي صحيح النساء في السودان لايرتدون ملابس
استغربت جدا وسألتها من اين جاءت بهذا الاعتقاد ردت انهم احضروا ليهم في المدرسه فلم توثيقي عن السودان
وفيه ترقص النسوة شبه عاريات
اولا اوضحت لها ان هذا الفلم يخص قبيله في جنوب السودان كانت في الماضي من عاداتها ان تفعل هذا وكل ذلك كان في الماضي نسبه للحرب الاهليه التي حدت من تطور اهل الجنوب اما في السودان فلا يوجد مثل هذا الشيء
وكانت المدرسه قريبة من المنزل
واجمل مافي هذه البلد لايتردد الشخص كثيرا في الاعتراض علي كل شيء بالمنطق والجدل الموثق
ذهبت ثاني يوم لهذه المدرسة والغريبه حتي معرفتهم بالسودان ضعيفه جدا وكانوا يصنفوننا علي اننا من الصومال فهم يعرفون الصومال كثيرا نسبه للتواجد الصومالي الكثيف هنا
المهم سالت من مشرفة الصف واخبرتها انني اريد التحدث معها بخصوص الفلم الذي عرضوه في يوم امس علي الطلبه
سألتني لماذا اخبرتها عن مادار بيني وبين الفتاه اول تعليقها هل يوجد في السودان اشخاص لهم لون ابيض مع العلم ان لون بشرتي ليس ابيض ولكنها قالت انها كانت تعتقد ان اهل السودان هم الجنوبيين فقط
احضرت لي الفلم وطلبت مني ان اشاهدة وحدي (( طبعا داخل المدرسة)) لانشغالها وسوف تحضر عند انتهاءها وفعلا حضرت قبل انتهاء الشريط وطلبت ان اشرح لها قمت بالتوضيح كما وضحت للفتاة ووعدتها ان احضر لها افلام توثيقيه عن السودان بشرط ان توعدني بعدم عرض هذا الشريط مرة اخرة
اما بالنسبه لرغبتهم في التفهم
هم شعب نهم للمعرفة كل انواع المعرفة ومستمعييت جيدين
ويحترمون الثقافات الاخري بالاخص التي يجهلونها
ونحن والحمد لله برغم جهلهم الكامل لثقافتنا لكنهم الان صاروا يفرقون بيننا وبين الشعب الصومالي
واصبحوا يدركون الكثير عنا بالاخص في طريقة التعامل
ولي عودة في هذا الموضوع
اشكرك جدا علي مرورك

أم قبس
أحييكى على المجهود الجبار
فى نقل ثقافات متبادله بين عالمين
تعرفى زمان برضو
كنا ف دوله أوروبيه
ف كانو الخواجات بيستغربو من لونا ولبسنا
وبيسألو أمى إنتو اللبس ده يعنى بيصرفوهو ليكم ف المطار :o:o
لا والأدهى والأمر
لما جات مسافره السودان
سألت جارتا لو محتاجه لحاجه من السودان
قالت ليها آى
دايره أسد :eek::eek::eek:
صوره مشوهه جدن عن السودان
وإنو هو إنسان الغابه
أكيد دلوقت الصوره نوعاً ما بتكون إختلفت وإتغيرت
بالعولمه والتكنولوجيا الحاصله
وموقفنا السياسى المتأزم
خلت العالم كلو يلقى ضوء على بلدنا المغموره والمُغيبه

littlestar

06-09-2009, 02:10 AM

وبجيكى تانى صااااااده
لأنو كل واحد فينا بيحمل داخلو عبر وحواديت

ام قبس

06-09-2009, 02:12 AM

أم قبس
أحييكى على المجهود الجبار
فى نقل ثقافات متبادله بين عالمين
تعرفى زمان برضو
كنا ف دوله أوروبيه
ف كانو الخواجات بيستغربو من لونا ولبسنا
وبيسألو أمى إنتو اللبس ده يعنى بيصرفوهو ليكم ف المطار :o:o
لا والأدهى والأمر
لما جات مسافره السودان
سألت جارتا لو محتاجه لحاجه من السودان
قالت ليها آى
دايره أسد :eek::eek::eek:
صوره مشوهه جدن عن السودان
وإنو هو إنسان الغابه
أكيد دلوقت الصوره نوعاً ما بتكون إختلفت وإتغيرت
بالعولمه والتكنولوجيا الحاصله
وموقفنا السياسى المتأزم
خلت العالم كلو يلقى ضوء على بلدنا المغموره والمُغيبه

لتلاستار
كلامك ميه ميه
وماشه بعيد ليه
حتي العرب جاهلين لي ثقافتنا
ولينا حكاوي جايه
انتظريني
شكرا علي المداخله

الجندي المجهول

06-09-2009, 02:21 AM

هل صحيح بالنسبة للمشاريع التي تخدم المواطن لا يوجد بها غش او رشاوي او تلاعب في المواصفات والمقاييس كما يحدث عندنا ام انها اشاعة وكذلك لديهم من يسرق اموال الشعب وتلاعب بها

ام قبس

06-09-2009, 02:37 AM

هل صحيح بالنسبة للمشاريع التي تخدم المواطن لا يوجد بها غش او رشاوي او تلاعب في المواصفات والمقاييس كما يحدث عندنا ام انها اشاعة وكذلك لديهم من يسرق اموال الشعب وتلاعب بها

الجندي اهلا بيك
غش ورشاوي مافي
بالنسبه للمشاريع
مامحتاجين ليها
غش في المواصفات في
في محلات العرب والاجانب
ليس لديهم من يسرق اموال الشعب
ليه؟
لان الشعب اساسا ماعندة مال يتسرق

بنت الرفاعي

06-09-2009, 03:45 AM

لتلاستار
كلامك ميه ميه
وماشه بعيد ليه
حتي العرب جاهلين لي ثقافتنا
ولينا حكاوي جايه
انتظريني
شكرا علي المداخله

فعلا العرب جاهلين لي ثقافتنا وحياتنا , تصدقي إنو لما كنا صغار أنا وأخواتي , اللي بيتعرفوا علينا أول مرة , كانوا بيغالطونا في جنسيتنا !!!! اللي بيقول نحن من أهل البلد , واللي بيقول نحن من إحدى الدول الخليجية , وده كلو لأنو لوننا فاتح ( بالرغم من إنو مافاتح للدرجة دي (أكيد ناتج من مقارنتهم للبيشوفوا في التلفزيون وناس الحرب ))!! , وطبعا هم بيشوفوا في التلفزيون زي ماقلتي من زمن حرب الجنوب , وأسي كمان دارفور , و متخيلين إنو نحن بيوتنا من القش وقطاطي القش ( ما القطاطي الحديثة ) , وماعندنا ترفيه , وحياتنا حرب في حرب , يعني في نظرهم حياتنا غاية في البؤس , وبالرغم من أني كنت صغيرة , كنت بجتهد علشان أغير فكرة الأطفال اللي معاي , وأحكي ليهم عن السودان , وناسها كيف عايشين , وكانوا بيستغربوا لأني بحكي عن دولة , وهم بيشوفوا في التلفزيون دولة ثانية !!! و كنت بزعل لأنو الإعلام هو اللي ناقل صورة جزئية , وهو اللي مدخل كل الأفكار دي , حتى الأستاذات مرّات كنت بحكي ليهم عن العيش في السودان , و الحمدلله بالرغم من إستغرابهم بيفهموا الوضع , وزي ماقلتي مامتخيلين إنو في ناس لونهم فاتح و أبيض بس كلهم من ذوي اللون الأسود فقط !!
والحمدلله حاليا في نوع من التطور , وإحتمال يكونوا فهموا طبيعة السودان , وأهلها , أتمنى ذلك.

الدكتور

06-09-2009, 04:15 AM

الحمد لله الذي جعلني من المسلمين
اختي والله مهما بلغوا من التطور وكل شي اذا مافي اسلام ولاحاجة

littlestar

06-09-2009, 11:36 AM

تعرفى يا (أم كبس)
أكتر حاجه بتعجبنى ف الأمه دى شنو
طبعن بعد إحترامهم لمواعيدهم وشغلهم وإخلاصهم فيهو
بالجد لما يجو عندنا هنا ف السودان
بيحاولو بقدر الإمكان يحترمو الشارع السودانى
يعنى ما أظن إنى شفت لى يوم خواجيه
حايمه ف السودان لابسه شورت ولآ فانيلا كت مثلاً
لا بالعكس بيحاولو قدر ما فيهم يحتشمو ويحترمو شعائر البلد ال هم فيهو
لدرجة ساعات بتخت الإشارب فوق راسها
وشال يغطى أكتافا
لو الحاله إستدعت
بقى تعالى شوفينا نحن لما نمشى هناك
ال تقولى أساسن نحن أل فرنجه
بنرمى كل حاجه ورا ضهرنا وهاك يا لبس
أقصد ياعرى
تعرفى
إتذكرت لى نكته
من واحده صاحبتى ملتزمه ومتحجبه والحمدلله
وخلى بالك من كلمة محجبة دى
ختى تحتها ألف خط أحمر
قالت هى كان مشت أى دوله أجنبيه
ما بتشوف أى غضاضه فى إنها تلبس هدوم سباحه
لأنها وقتها ما بتكون حاجه شاذة
ومافى زول ح يعاين ليها أصلن
بالذمه ده كلام :eek::eek:!!!
حمانا الله
وأصلح حال المسلمين جميعاً

سودانية وافتخر

06-09-2009, 12:28 PM

والله يا ام قبس احييك على الجهد الرائع الي بتبذليهو..امشي وارجع ليكي تاني مع اسئلتي واستفساراتي:d:d

سودانية وافتخر

06-09-2009, 12:35 PM

فعلا العرب جاهلين لي ثقافتنا وحياتنا , تصدقي إنو لما كنا صغار أنا وأخواتي , اللي بيتعرفوا علينا أول مرة , كانوا بيغالطونا في جنسيتنا !!!! اللي بيقول نحن من أهل البلد , واللي بيقول نحن من إحدى الدول الخليجية , وده كلو لأنو لوننا فاتح ( بالرغم من إنو مافاتح للدرجة دي (أكيد ناتج من مقارنتهم للبيشوفوا في التلفزيون وناس الحرب ))!! , وطبعا هم بيشوفوا في التلفزيون زي ماقلتي من زمن حرب الجنوب , وأسي كمان دارفور , و متخيلين إنو نحن بيوتنا من القش وقطاطي القش ( ما القطاطي الحديثة ) , وماعندنا ترفيه , وحياتنا حرب في حرب , يعني في نظرهم حياتنا غاية في البؤس , وبالرغم من أني كنت صغيرة , كنت بجتهد علشان أغير فكرة الأطفال اللي معاي , وأحكي ليهم عن السودان , وناسها كيف عايشين , وكانوا بيستغربوا لأني بحكي عن دولة , وهم بيشوفوا في التلفزيون دولة ثانية !!! و كنت بزعل لأنو الإعلام هو اللي ناقل صورة جزئية , وهو اللي مدخل كل الأفكار دي , حتى الأستاذات مرّات كنت بحكي ليهم عن العيش في السودان , و الحمدلله بالرغم من إستغرابهم بيفهموا الوضع , وزي ماقلتي مامتخيلين إنو في ناس لونهم فاتح و أبيض بس كلهم من ذوي اللون الأسود فقط !!
والحمدلله حاليا في نوع من التطور , وإحتمال يكونوا فهموا طبيعة السودان , وأهلها , أتمنى ذلك.

انتي عارفة يا مرام والله نحنا برضو كان بحصلينا تفس كدا ياماااا كانو بغالطونا في جنسيتنا..لا وغير كدا اتذكر مرة من المرات في وحدة صحبتي كانت من اهل البلد مرة جات زيارة عندنا في بيتنا فكنا قاعدين نتكلم على السودان كدا ففجاة سالت قالت انتو عندكم في السودان بيوت كدا زينا ومحلات ومولات وحدائق وكدا؟!!!! عاد ان هنا استغربت استغراب من سؤالها ولمن جاوبتها قلتليها ايوة دا كلو عندنا وكدا وقعدت احكليها عن السودان قامت قالت لي انا كنت فاكرا السودان دي كلها غابات وناس مقطعين وسود وحالتهم حالة:confused: لمن سالتها طيب من وين اخذتي الانطباع دا قالت من الاعلام السوداني!!!! لذلك وجب على الاعلان السوداني تحسين صورة السودان واظهاره بالكامل مش جزء فقط منو ونحن كمان لازم بدورنا نحكي ليهم السودان هو شنو؟!... والمعذرة على الاطالة.. مع خالص الاحترام والتقدير

سودانية وافتخر

06-09-2009, 12:38 PM

هل بالفعل ان هناك في الدول الاوروبية بيخيرو الوالدان في الدروس الي بياخدوها اطفالهم في المدرسة؟؟مع كل التحايا

ود الجعلي

06-09-2009, 02:03 PM

ام قبس

من خلا ل طرحك في هذا البوست نتعلم ونعرف اشياء لا نجدها في الكتب او حتى لو وجدناها لا نحس فيها الروح انما معلومات مجرده جافة فارجو ان تواصلي وتكتبي كل ما في هذه الحياة السويدية لاننا سغوفون بهذا النظام الساحر الذي تتمتع به هذه الشعوب المتحضرة الراقية التي استطاعت ان تتربع على عرش العالم ببساطة بالصدق والنظام والنظافة والاهتمام والعمل والتربية والثقافة والموسيقى
فاكتبي يا ام قبس كل القبس ونورينا الله ينور طريقك