فهل لكم رأي ؟؟

[ضياء الدين احمد]

الصبح لم يتنفس بعد ولكنه يقارب الي ذلك لانه الشتاء والجو تنتابه حاله من الغباش عندما ايقظتني الوالده انا واخي بعد ان تأكدت اننا لبسنا ما يقينا البرد لنذهب الي حاجه (زينب ) حتي نشتري منها اللقيمات وبعدها عدنا الي المنزل يحدونا شوق الي الدفء واللقيمات معا ‘ واول ما ندخل الي المطبخ تغذوا انوفنا رائحة الشاي المقنن فنجلس علي البنابر ونحن متدثرين بالبطاطين احيانا ونمسك باكواب البلاستيك المليئة نعم اكواب البلاستيك لان الزجاج مرحلة لم يصلها من كان في عمرنا فهي حكر على الكبار فقط وذلك مخافة كسرها فالنساء دائما كما تعلمون يحبون (العدة) كما يحبون ابنائهم فنجلس نلتهم اللقيمات وكأنه آخر ذاد لنا في هذه الدنيا كما كانوا يقولون كيف لا ونحن من ذهب لاحضاره في هذا الزمهرير اذا فحصتنا منه ينبغي ان تكون اكبر من الباقين والجدل في ذلك يكرر كل يوم يا لها من ايام جميله وذكريات لا انساها فكنت اقول لهم نعم ليس بالخبز وحده يحيا الانسان ولكن اذا كان الامر يتعلق باللقيمات فقد يكون لي راي آخر فهل لكم انتم راي ؟

[aborawan]

يديك الف عافية اخوي ضياء ويا لها من ايام جميلة وذكريات رائعه ، طبعاً يا غالي لذة اللقيمات في برنامجا واللي اهو الطلعة باكراً وتمشي لست اللقيمات وتشتري منها وتطحن ليك كم واحدة وانت واقف جمبها :):) وتسمع ليك كلمة حلوة من الخالة بائعة اللقيمات هاك دي يا وليدي اكلا عشان تتدفأ وحاجات كده طبعاً بتكلم معاك كده وبحكي ليك وانا ما عشت ف يالسودان كتير بس كنتا كل ما تقرب الاجازة السنوية للوالد بكون فرحان واكتر شئ بفرحني كان هو البرنامج الصباحي بتاع اللقيمات ده وكنت بصحى من قبل الفجر بي كتير واصحي اى واحد من اولاد الخالات او العمات عشان نمشي لي ست اللقيمات :):) طبعاً الود حنكوش وكده ما كان بقدر يمش براه بخاف من الظلام :D:D

مشكور اخوي مع التحية

[HAMADTO]

بسم الله الرحمن الرحيم
السلام عليكم ورحمة الله تعالى وبركاته
والله يا ضياء الدين حسي انا شامي ريحت لقيمات حاجه خضره في نخرتي .....
ما اجمل اللقيمات في البرد قمة المتعه ......
لك مني خالص التحايا يا ضياء الدين وفي انتظار المزيد من الذكريات ..

http://www.asmilies.com/smiliespic/psmilie/006.gif http://www.asmilies.com/smiliespic/psmilie/006.gif http://www.asmilies.com/smiliespic/psmilie/006.gif http://www.asmilies.com/smiliespic/psmilie/142.gif http://www.asmilies.com/smiliespic/psmilie/142.gif http://www.asmilies.com/smiliespic/psmilie/142.gif

[ابراهيم]

يا سلاااااااااااام يا ضياء الدين ... أنا لي زمن حاسي بإني فقدت حاجة كانت صديقة بالنسبة لي ... اتاري دي اللقيمات وفي رواية أخرى (الزلابية) ياخ والله دي تذكرة حلوة منك يديك العافية وبمناسبة كباية البلاستيك دي انا لي حسي متذكر كان عندي كباية ظهرية عشان انا هلالابي وكمان بتذكر حاجة التاية الله يرحمها ست اللقيمات كان بتديني زيادة قطعتين التهمهم في الطريق والله لكن زمن ...

ألا ليت ايام الشتاء قريب

ودهراً تولى بالزلابية يعود

ولكم ودي وحبي

[ضياء الدين احمد]

مشكورين كتير الاخوان ابوروان والرائع نبيل والهلالابي ابراهيم قلت لي لونها ظهري والله دي قلبت فيها هوبا اتزكرتها كيف؟

[HAMADTO]

وينك يا ضياء الدين حارمنا من ابداعاتك .... انشاء الله المانع خير

http://www.asmilies.com/smiliespic/FAWASEL/001.GIF http://www.asmilies.com/smiliespic/FAWASEL/001.GIF

[امير عبدالباقي]

طبعا ياضياء نحن اللقيمات ليه نكه خاصه وزكريات جميله بنشتري اللقيمات من التوري الله يرحمها واهم شي وانت جالس معاها وتمسك المقصوصه واعتقد ماكل الناس بتعرف المقصوصه وهي البقلبو بيها اللقيمات في الصاج وتاخذ بستله اللقيمات وفي خشمك واحده وتطلع منها وتجد حصان الكارو وفيه شموم وهيوبه بنزلو في الخضار والزوبار طبعا اجمل واحلي فواكهه اكلتها حتي الان الزوبار ده ياجماعه الفواكه المضروبه المعفصه (هنا في السعوديه برموها في الزباله) تمشي تشرب الشاي يالزلابيه وتنتظر بتين يدوك فريني فريني ده ابو قرشين لو بتزكروه عشان تشتري تبش بالشطه ومنقايه مزوبره لكن زي العسل والله ايام محفوره في الزاكره

[ابو المهتــدي]

بسم الله الرحمن الرحيم
والله جد انها ايام خوالي 0 ضبعا انا اكبركم سننا ولنا مع للقيمات زكريات
تصدقوا نحن نرسل لها يقيمة قرشين وقرش ونص وكانت تكفينا 0تصدقو
5 بتعريفة والزيادة لو واحدة او اثنين ناكلها في الطريق واهم شي اخفاء معالم خشمك
من الزيت 0 انها زكريات ولي معها وقفات 0وسوف نزكرها ملحقا مع الوالدة رحمها الله 0لننا سابقون لكم عمرا 0 ام يانبيل لقيمات حاجة خضرة ربنا يديها
طول العمر والصحة 0 نحن طلبة في الاسطي والثانوي 0ولنا فيها ايضا زكريات
بين السوريبه 0 ومدني 0

[Wayel]

والله ذكريات ...
فريق الحلبة ... وشموم وسيدة والقسيمة وعبد اللطيف (حلاااااااااااااااااااااااااااااااوة) ...
القسم الأول ... فريق السوق ... أم سويقو ... العشير ...
حيث للدنيا مذاق مختلف ونكهة مميزة ...
إييييييييييييييييييييييييييييييك ...
أهم ما في الموضوع ...
الكثير من الدعاء للتوري (بالرحمة والمغفرة) ...

[أبوبكرحامد]

الذكريات صادقة ونبيلة .......... مهما تجافينا بنقول حليلا
ياسلام على مدنى وذكريات مدنى .
ياوائل بالله قول اسمك الحقيقى لأنو إسم وائل إسم حديث فما دمت عايشت عبد اللطيف بتاع الحلاوة فمعنى ذلك إنك مولود قبل اكتشاف اسم وائل ، والله قبل فترة ليست بالقصيرة تذكرت عبد اللطيف بتاع الحلاوة وتمنيت لو يعود الزمن للوراء لننعم بهذه المناظر الرائعة ، ناس فريق الحلبة تم ترحيلهم لمستوطنات قرب السوق الشعبى ونلتقيهم فى مواصلات سنكات جبرونا " يامضنى " أقصد يامدنى ونطقتها بلسان ناس فريق الحلبة وهم أهل وأحباب عشنا بينهم قبل الإنتقال إلى حى بانت .

ود الماذون

[مهيرة]

طبعا اللقيمات أسع بقت والحمد لله جزء لا يتجزأ من مكونات حفلات الشاي في البيوت ولها مكانه خاصة بين الحلويات والسندودشات والحوامض 00 وتتنوع احجامها وأشكالها بين المكور والمقعر والمطول 00 وهي الوحيدة التي يوضع علي رأسها السكر المسحون 00 اكراما لها ولتاريخها الطويل 00

وقام اتعزز الليمون !!

موضوع جميل وشيق 00 وتحيا اللقيمات الأصبحت ذكري !

[أبوبكرحامد]

والله يامهيرة دلعتوا اللقيمات ، يعنى معقولة مقعر ومحدب والله ياللقيمات أيامك ساكوبيس ولينا بى حالك ونعيش ونشوف الجاتوه بجوار الفول والتسالى عند الحاجات ماأصلو الدنيا علاية ودلاية.

ود الماذون

[أبوريلان]

والله يا ضياء الدين رجعت بينا لزمنا سمح بالحيل ، وكت بنقوم قبل الآذان عشان اللقيمات وبدون منبه ولا شىء ماذى هسه المنبه والجوال كل واحدؤ يدق للدوام ، ربنا يرحم جميع ستات القيمات ويرحمنا معهم والذكرى حلوه شديد نحنا فى العشير عندنا حاجه خجيجه الله يرحمها ويحسن إليها ، طبعا يا ضياء الواحد فى الصباح داك مع البرد الشديد بقوم زى الفول المدمس وبعد يضرب ليه قطعة ولا قطعتين من القيمات بتظهر على طول فى شفاه طبعا الزيت بكون ظاهر عشان هو بكون مغبش زى ماقلت ليك زى الفول المدمس بتاع حاجة مريم جوار كبرى حاجه عشه . ودمتم يا أهل مدنى .

[ضياء الدين احمد]

مشكووور اخي حمدتو علي سؤالك عني والمانع هو هذا الكمبيوتر الذي بدأ يحسدني علي لقائي بكم وعلي ونستنا الجميله مع الاحباب فأكثر من التعطل واخيرا اصطلحنا حتي اطل عليكم من جديد لاشكر كل من مروا علي مائدتي وتفضلوا مزيدا من اللقيمات!!