ثقافتنا

[mutasim]

من الملاحظ اننا خجلانين من ثقافتنا ودايما بنغيرها او ماعندنا ثقه فى نفسنا عشان كده بنقلد مع اننا من اقدم شعوب الارض ولدينا حضارة قديمه جدا وللاسف وسايل اعلامنا والاعلاميين من يفعلوا هذا الامر وكمثال تقليد الشوام اليومين ديل اولا كلمة اعتزر منك وهى كلمه لبنانيه وبعض السوريين يستعملوها ولاتستعمل فى اى دوله عربيه وهى لغويا خطا الصحيح اعتزر لك وليس منك ولاحظت ان بعض الاخوة بالمنتدى يستعملونها وبعض المذيعيين بقناة هارمونى , والاحرف الانجليزيه s m ينطقها الشوام خطا ايضا ينطقوا الs آس وال m آم وبرضو بعض المزيعيين بدواء فى التقليد واتزكر انى اشهد زوجتى على هذا الامر وقلت ليها بكرة السودانيين حايقلدوا وينسوا الصاح اما بخصوص عادات الزواج حكايه ناس محلات الفيديو البصوروا الحفلات ادخلوا عادات غريبه منها ان تحضر العروس للحفل وهى تمسك بيد والها والعريس مع اخوه او اهله ويسلموهم لبعض ومش عارفين هذا تقليد كنسى يتم فى الكنايس وبعدها يبتدوا رقص slow بموسيقى غربيه وبعدها زفه مصريه انتهت عاداتنا وانا شاهدت هذا الامر فى زواج بنتى مؤخرا واعترضت ولكنى سكت خفت اعمل مشكله وللاسف لاتوجد جهه مسؤله عن المحافظه على التقاليد السودانيه الغنيه جدا , فاتمنى ان تهتم جمعية وادمدنى بهذا الامر
وتحياتى

[mutasim]

نواصل حكاية التقليد المستمرين فيه لما نفقد كيانا ونبقى تبع
فى اعلان اليومين ديل عن زيت هايل فيه واحده بتزغرد زغاريد بالطريقه المصريه بطريقة تحريك اللسان وتحريك اليد اعلى واسفل ويبث عدة مرات يومى يعنى دعوة لتغيير الزغاريد السودانيه اليويو فى طريقها للانقراض بسبب ضعفنا مع العلم ان نفس زغاريدنا موجوده بالمغرب وموريتانيا وما فكرو يغيروها

[الجندي المجهول]

والله موضوعك جميل يا اساتاذ معتصم والحفاظ على الثقافة دي شي ينصب في خانة الواجب ....

تخريمة :
اليابانين والصينين اكثر شعبين على الارض محافظين على ثقافتهم ( خاصة اليابانين) ولم تؤثر عليهم العادات الدخيلة -- برغم مرارات هيروشيما والاذى الجسيم والكبير الذي اصابهم ولكن ... انها الارادة

[أشرف صلاح السعيد]

معتصم عوافى..
والله كلامك جد ملاحظ فى الكثير من ابناء جلدتنا..بعض الجكس بدى يغير لون بشرتو قلنا الجمال شى نسبى ناس بتحب البياض وناس بتحب السواد وحسابن مع ربهم فى تغيير الخلق..بعد شوية لقينا البمشى الخليج لسانو بتعوج وقلنا يااخى ممكن تأثير البيئة مختلف من شخص لآخر..لكن تصل الحالة لجوا البلد دى نقول عليها هسى شنو؟
شى تانى ..ظاهرة المذيعات البيض كل مااتفرج فى التلفزيون يجينى احساس ناس القنوات ديل عايزين يثبتوا إننا بيض مع إنو نسبة الناس البيض فى السودان لا تتجاوز 2% على اعلى تقدير..
بعض النسوان لما يدخلو فكرة غير سوانية بنقول مايهو حال النسوان بيموتو فى التمييز ولو كان كاذب..لكن نلقى تعطيش الجيم فى المذيعين والمذيعات دى الكارثة زاتا..شنو يكونوا طمعانين فى عقودات مع الفضائيات العربية..وياترى الناس ديل بيقروا القرآن بجيم معطشة؟
غايتو الشكية لأب إيدن قوية..

[mutasim]

الجندى سلام الله عليك ومشكور على مرورك وتعلبقك الممتاز وبخصوص المحافظة على ثقافتنا لاتوجد استراتيجيه لهذا الموضوع والمشكله الاعلاميين هم من يحاول تغيير الثقافه بواسطة التقليد الاعمى مره تقليد مصرى ومره شامى وحتى الهندى العروس بقوا يلبسوها السارى الهندى ويعملوا ليها نقطه حمراء على جبينها ومش عارفين ان هذا رمز للديانه الهندوسيه ووزارة الثقافه فاكره ان عملها شعر وبس واذا وزير الثقافه غير مثقف وانا اقصد الوزير السابق مرة قطع كيكه بالسيف فى احتفال بسفارة الايرانيه واتخيل وين وضع السيف رمى ليهم فوق الكيكه فجخه كلها وانتهى منها :mad::mad:

[mutasim]

سلام الاخ اشرف السعبد ومشكور على المرور والله المذيعيين هم اصل البلاء فى هذا الموضوع وهم البدخلوا المصطلحات المستورده وفاكرنه نوع من الرقى

وحكاية تغيير اللسان هم ديل المش راضين بالثقافه السودانيه امثال حسن الدنقلاوى او مايسمى بالمصرى وهو يحب هذا اللقب الراجل ده موجود فى السودان منذ عام 1971 ولسه مصر اتكلم بالهجه المصريه واللبس المصرى ودائما يقول السودانيين السودانيين وهو سودانى اما وابا وعاش فى مصر فترة اقصر من العاشه بالسودان والمشكله اعلامنا بطلقوا عليه هذ اللقب ماعندنا اعلام اعلام مسئ للبلد ..................

[الاميره]

الاخ mutasin....مساك الله بالخير..
المشكله اساسها فى البيت ..فعاداتنا وتقاليدنا تنشا بتربيه الاجداد ومن ثم الاباء لنا ..ومن المؤسف ان نستعف ونقبح تقاليدنا السمحه.. ونتلبس بعادات شعوب غيرنا ..فكان من المفروض التجديد فى عاداتنا اذا اردنا التغيير من الروتين والعاديه ..
ولك احترامى وتقديرى

[mutasim]

الاخت اميره الله يمسيك بالخير
بخصوص الاباء والجدود شربونا من الثقافه السودانيه لانهم مابعرفوا غيرها المشكله فى الجيل الجديد والاجهزه الاعلاميه ولاتوجد جهه مهتمه بهذا الامر ومتابعاه نحن حتى اسماء الاحياء والشوارع غير سودانيه بنقلد ياخوانا زمان كان الناس بقلدون الحصل شنو ؟؟